KALLATTIIN, MM Abiy Guyyaa Goototaa Keeniyaa irratti hariiroon biyyoota lameenii akka cimu waamicha dhiyeessan

Haguuggii Tamsaasa Kallattii

1. Sa'aatii 5 duraHojjattoonni mootummaa guyyoota sadii keessatti hojiitti akka deebi'an Bulchiinsaa Imaanaa Tigraay waamicha godhe

   Tigraay akka bulchuuf dhiyeeny mootummaa federaalaan kan hundaa'e Bulchiinsa Imaanaa Tigraay hojjattoonni mootummaa guyyoota sadi keessatti hojiitti akka deebi'an waamicha dhiyeesse.

   Mootummaan Imaanaa Tigraay ibsa baaseen, hojjattoonni mootummaa har'a, Kibxata, irraa eegaluun gara hojiisaanitti akka deebi'an jedheera.

   Ibsa fuula miidyaa hawaasaa TV Tigraay irratti baheen, hojjattoonni mootummaa giyyoota jedhaman keessatti hojiitti hin deebine itti gaafatamummaa akka fudhatan akeekkachiisera.

   "Hojjataan mootummaa guyyoota sadan ibsaman keessatti hojiitti hin deebine, itti gaafatamummaasaa ni fudhata," jedhe bulchuunsi haaraan Tigraay.

   Gaggeessitoonnifi qindeessitoonni waajjiraalee hojjattoota mootummaa hojiisaanii idileetti deebi'an akka galmeessanis ajajeera ibsa kanaan.

   Mootummaan Imaanaa Tigraay dhuma torban darbee kan hundaa'e yoo ta'u, ji'oota jahaan dhufaniif naanicha akka bulchuuf mootummaa federaalaa irraa imaanaan itti kennameera.

   Ji'oota jahaan keessatti naannichatti tasgabbii buussuu, bu'uuraaleen misoomaa hojiitti deebisuu, tajaajilawwan bu'uuraa iddootti deebisuufi ji'a jaha keessatti filannoon akka gaggeeffamuuf haala mijeessuu kanneen jedhan itti gaafatamummaa mootummaa haaraa hundaa'etti kennaman keessaa warra ijoodha.

2. Sa'aatii 6 duraUKn haleellaa Huutiin Sa'ud Araabiyaarratti gaggeessu qolachuuf xayyaarota waraanaa bobbaasufi

   Mootumman UK haleellaa misaa'elaafi diroonii hidhattoonni Huutii Saawudiirratti gaggeessan qolachuuf xayyaarota waraanaa gara Sa'udiitti akka ergu beeksise.

   Kaayyoon xayyaarota waraanaa bobbaasuu magaalotaafi bu'uuraalee misoomaa Saawudii haleellaa Huutiin gaggeessaa jiru irraa qolachuuf akka ta'e ibsan Ministiirri Muummee UK Andii Barnihaam.

   Mootummaan Yaman Sa'udiin hogganamuufi Huutii gidduutti lolli cimaa deemuu hordofee Huutiin buufata xayyaaraa Saawudii dabalatee bu'uuraalee anniisaa biyyattii misaa'elaafi dirooniin haleelaa jira.

   Biyyoonni michuu Saawudii ta'an deggarsa ittisaa kennuuf beeksisaa jiru.

   Masiriin guyyootan dura Saawudiif deeggarsa barbaachisu akka ergitu beeksisteetti.

   UKn ammoo xayyaarota waraanaa Taayifuun jedhaman erguun haleellaa dirooniifi misaa'elaa Huutiin gaggeessu qolachuun Saawudii akka deeggartu ifa gootetti.

   "Xayyaaronni waraanaa kunneen haleellaa gaggeeffamu qolachuuf malee Huutii irratti haleellaa hin gaggeessan," jedhan Ministiirri Ittisaa UK Wees Istiitings ibsa har'a kennaniin.

3. Sa'aatii 6 duraBaraak Obaamaa qorannoo yakkaa Ilhaan Omar irratti banamerratti yaada kenne

   Pirezidantiin duraanii Ameerikaa Baaraak Obaamaa qorannoo yakkaa miseensa mana-maree Ameerikaa kan taate Ilhaan Omaar irratti baname "baayyee kan nama qaanessudha" jedhe.

   Mootummaan Federaalaa Ameerikaa Ilhaan Omaar irratti qorannoo kan baneef Pirezidant Doonaald Tiraampiin cimsitee waan qeeqxuufidha jedhe Baaraak Obaamaa.

   "Mootummaan federaalaa humna isaa guutuu fayyadamaa kan jiru warra seera kabajanii fi aanga'oota ummataan filamanirrattidha," jedhe.

   Waayit Hawus akka jedhetti, qorannoon ministeera haqaa miseesna amana-maree kanarratti bane "seeraa fi sirna kabachiisuu" kan kaayyeefatedha.

   Torban darbe miseensonni nageenyaa biyya keessaa mana jireenyaa Ilhaan Omaar Waashingiten keessatti argamu sakatta'aniiru.

   Bakka buutuun umataa Mineesotaa kun akkamitti akka baqannaan gara Ameerikaa seente irratti qorannoon gaggeeffamaa jira.

   Sakatta'insi kunis qorannoo kana waliin wal qabata jedhameera.

   Somaaliyaatti kan dhalatte Ilhaan Omaar gara Ameerikaatti kan imalte maatiishee waliin yeroo ijoollummaasheetti ture.

   Bara 1995 Ameerikaa yeroo galtetti umurii ishee sobdeetti ta'uu danda'a jechuun qorannoon irratti gaggeeffamaa jira.

   Baraak Obaamaa fuula X isaarratti akka barreessetti, abbaan Ilhaan lammii Ameerikaa kan ta'an yeroo Ilhaan umuriin ishee waggaa 17 hin guutiin dura waan ta'eef mirga lammii Ameerikaa ta'uu qabdi.

   "Bulchiisni kun miseensa mana-maree kana biyyaa ari'uudhaaf yaala ajira. Abbaan ishee lammii Ameerikaa kan ta'e yeroo isheen waggaa 18 guutte waan ta'eef mirga lammummaa argachuu hin qabdu jechuun waan qabatamaa hin taane 'jette, jettee' dhiyeesseera," jechuun qeeqeera.

   "Wanti akkasii kun baratamnaan ishee qofaarratti kan dhaabbatu miti. Pirezidantonni paartiiwwan lamaan keessaa yeroo itti aanutti filataman gocha wal fakkaatu raawwachuu danda'u," jedhe itti dabaluun.

4. Sa'aatii 6 duraRonaaldoon garee biyyaalessaa Poorchugaal keessaa guyyaa 30f dhorkame

   Federeeshiniin Kubbaa Miilaa Poorchugaala (FPF) Kiristaanoo Ronaaldoo garee biyyaalessaa keessaa guyyoota 30f dhorke. Ronaaldoon akka garee biyyaalessaaf akka hin taphanne dhorkamuun ala maallaqaan yuroo 255 adabameera.

   Adabbiin kun kan irratti darbes leenjisaa garee biyyaalessaa Poorchugaal Jiirg Jeesus waliin wal dhibdee uumameen kaampii gareen biyyaalessaa keessa turan dhiisee ba'uu isaatiinidha.

   Taphataan umuriin isaa 41 ta'ee fi amballii garee Poorchugaal kun, Adoolessa 9 ture wayita gareen isaa Noorwey waliin taphachuuf jedhu kaampii gadhiisee kan bahe.

   Guyyaa sanarraa kaasee tapha itti aanee Denmaark waliin qaban irratti akka hin hiriirres dhorkame.

   Ronaaldoon akka jedhutti, waliigaltee laanjisaa garichaa Joorg Jeesus waliin qaban waan hojiirra hin oolleef kaampii gadhiisee ba'uuf murteesse.

   Amantaan isarra godhadhe na gfane jedhee laanjisaa kana himate Ronaaldoon.

   Leenjisaan Poorchugaal gama isaatiin waliigalteen Ronaaldoo waliin qabu akka hin jirre waakkateera, garuu taphataan kun yeroo barbaadetti garee kanatti carraan deebiyuu banaadha jedhe.

   Badhaasa kubbaa miilaa guddicha Ballon d'Or si'a shan kan mo'ate Ronaaldoon, seenaa kubbaa miilaa keessatti taphataa waancaa idil-addunyaa hedduu mo'atee fi Poorchugaaliif ammoo tapha 146 taphatedha.

5. Sa'aatii 9 duraMM Abiy Guyyaa Goototaa Keeniyaa irratti hariiroon biyyoota lameenii akka cimu waamicha dhiyeessan

   Guyyaa Goototaa Keeniyaa Maashujaa jedhamuun bara kana bulchiinsa Eldoreetitti kabajamu irratti argamuun hariiroon biyyoota lameenii akka cimu waamicha dhiyeessan.

   Keeniyaan qabsoo walabummaaf taasifteefi Itoophiyaan lola Adwaa irratti injifannoo Xaaliyaan irratti argatte walbira qabuun dubbatan.

   ''Seenaan obboloota nu godhe, filannoo keenyaan ammoo michoota badhaadhinaa tahuu qabna. Bilisummaan Afrikaa tolaan kan kenname osoo hin taane namoota kabaja isaanii dabarsanii hin kennineen argame,'' jedhan.

   MM Abiy qonnaan bultoonnii fi oomishtoonni biyyoota lameenii daangaa irratti haala salphaa taheen akka walitti daldalan waamicha dhiyeessan.

   Imalaafi aadaa walii wal barsiisuun hariiroon hawaasa gidduu jiru akka cimus dubbtaniiru.

   ''Michoomni keenya daldala waloon guddata. Har'a Safaricom lammiilee Itoophiyaa hedduu wal quunnamsiisa. Mpesa'n namoonni qarshii akka ergatan, kaffaltii akka raawwtan gargaara,'' jedhan MM Abiy

   Lammiilee Keeniyaa arjummaa isaaniif kan galateeffatan Abiy, ''Keeniyaa yoo dhufnu akka mana keenyaati. Maatiifi hiriyyaa gidduu seenna. Kabajamoo pireezidantii, yaa uummata Eldoreet simannaa keessaniif galatoomaa,'' jedhan.

   Warreen bilisummaaf otoo qabsaa'anii wareegaman kabaja kennuun dhalooti duraanii hogganoota ammaaf kaka'umsa tahuu himan.

6. 20 Onkololeessa 2026Pirezdantii itti aanaan US JD Vaans Neetaaniyaahuu deeggaruu hin fedhu jedhe

   Pirezdantiin US Donaald Tiraamp wayita Israa'el filannootti deemtutti Beenjaamin Neetaniyaahuu akka deggaran godhan kan ibsan yoo ta'u itti aanaan isaanii JD Vaans deeggarsi kun akka turu murteessan.

   JD Vaans gaaffii fi deebii miidiyaa dijitaalaa "Towi" waliin tolcheen filannoo Israa'el keessa seenuu hin barbaadu jedhe.

   "Kaadhimamtoota Ameerikaatiin nan deeggara. Xiyyeeffannoon koo filannoo walakkeessaa Ameerikaati."

   Yaada isaa itti fufuun, Neetaniyaahuu dura dhaabbachuuf miti, garuu isa hin deeggarus, dhimma filannoo Israa'elii keessa seenuu hin fedhu.

   Filannoon Israa'el torban dhufu filatama. Filannoon kun haleellaa Onkololeessa 07, 2023 Haamaas Israa'el irratti raawwate booda kan jalqabaati.

7. 20 Onkololeessa 2026Hanqina maallaqaan WFP Gaazaaatti gargaarsa dhiyeessu hir'isuufi

   Dhaabbilee Sulula Gaazaatti gargaarsa nyaataa dhiyeessan keessaa tokko kan ta'e Sagantaan Nyaataa Addunyaa "dirqamee tajaajila lubbuu baraarsaa hir'isaa" akka jiru hime. Akka WFP himatutti hanqinni maallaqaa tajaajila gargaarsaa akka dhaabu isa dirqisiiseera.

   Waliigalaan namootni tajaajila gargaarsaa Dhaabbata UN kana keessaa hir'ifaman harka tokko sadaffaa jechuunis mil.1.6 hanga miliyoona 1.1 ta'u jedhame.

   Hir'inni gargaarsaa kun wayita maatiin hedduun Gaazaa keessaa hanqina nyaataan qoramaa jiranitti waan ta'e dha.

   Dhiibbaan tokko qophaa'aan garee hawaasaan kennamaa ture keessaa guyyatti 250,000 hanga 150,000 ta'u hir'ata jechuu dha.

   Maatiiwwan naannawa fagoo, kanneen akka daangaa Israa'elii fi to'annoo waraanaa jala jiru keessa jiraatan guyyaa guyyaan osoo hin taane, guyyaa tokko oolee guyyaa itti aanu nyaanni isaan dhaqqaba jechuu dha.

   Uummanni Gaazaa keessa jiraatu milyoona 2.1 ta'u hundumtuu kan buqqa'e yoo ta'u, kanneen keessaa harka sadi keessaa harki lama gargaarsa irratti hirkatee jiraata.

   Sababa gargaarsi kun hir'achuuf jiruuf maatii hedduun yaaddoo keessa jiru.

8. 19 Onkololeessa 2026Tiraamp filannoo Israa'elitti gaggeeffamuuf Netaaniyaahuu akka deeggaru ibse

   Filannoo torbee dhufu Israa'elitti gaggeeffamu ilaalchisee Doonaald Tiraamp deeggarsa isaa Beenjaamiin Netaaniyaahuuf akka kennu ifa godhe.

   Tiraamp "Netaaniyaahuun nama cimaadha" jechuun filannicharratti inni Ministiira Muummee Israa'eel ta'ee akka itti fufuuf akka deeggaru ibse.

   Tiraamp barreeffama fuula miidiyaa hawaasaa Truth Social jedhurratti barreesseen, Beeniyaamiin Netaaniyaahuu "mormiifi dhiibbaa Israa'el keessaa dabalatee irra osoo jiruu nama cimaa, qaruxee, jagna" jechuudhaan jaje.

   Dhiibbaa irra jiru hunda dandamatee nama mo'atee ba'e ta'uus ibse Tiraamp.

   Doonaald Tiraamp ergaa uummata Israa'eliif barreesseen, Beeniyaamiin Netaaniyaahuu irra deebi'anii akka filataniif waamicha gochuus ibse.

   Waraana USfi Israa'el ji'a torba dura Iraanirratti bananiin wal-qabatee akkaataa itti waraanni gaggeeffameefi gaggeessitoota lamaan gidduutti garaa garummaan uumamuu hordofee beekamtiin Tiraamp Israa'el keessatti qabu laaffataa deemera.

   Haa ta'u garuu, Netaaniyaahuun irra deebiin akka filamuuf Tiraamp akka deeggaru ibsuu hordofee Netaaniyaahuufi paartiisaa Likud Paartidhaaf hamilee guddaadha.

   Ragaaleen akka agarsiisanitti, filannoo Israa'el Onkoloolessa 27 gaggeeffamuun kaadhimamaan sagalee caalmaa argatee injifatu akka hin jirreedha.

   Filannoowwan biyyattii keessatti kana dura gaggeeffamaa turan irratti, mootummaa hundeessuuf sagalee caalmaa argachuu dhabuurraa kan ka'e filannoon irra deddeebiin gaggeeffamaa ture.

   Beeniyaamiin Netaaniyaahuu gaggeessaa Israa'el yeroo dheeraaf biyyattii gaggeessedha. Filannoo kanaan irra deebiin filama taana, caalmatti nama yeroo dheeraaf Israa'el gaggeesse ta'ee galmaa'a.

9. 19 Onkololeessa 2026'US boombii hamaan yoo nu halelete, loltoonnishee ni barbadaa'u' - Iraan

   Yeroo paarlaamaan Iraan ministerota haaraa mirkaneessuuf sagalee kennaa jirutti, Meherdaad Akilaaqiin ammoo biyyi isaa yoo Yuunaayitid Isteetis boombii humni isaa akkaan guddaa ta'e "Mother of Alla Bombs" fayyadamteef deebii kennuuf qophaa'aa akka jirtu rippoortarootatti hime.

   Akkas jechuun dubbate: "Dhimma kanarratti marii barbaachisaa gooneerra waan ta'eef nuti tasgabbii qabna. Sodaa malee hojii keenya itti fufna, dandeettii keenyaan ofitti amanamummaatiin itti fufuna".

   Ministira ittisaa haaraa ta'uu mirkanaa'uun booda, Pirezidantiin Ameerikaa akkamitti akka karaa nagaa loltoota isaa naannicha keessaa itti baasu ilaalcha keessa galchuu qaba jedhe Akilaaqiin.

   "Boombii sana darbatee jennaan, naannoo sana keessaa loltoota du'an meeqa akka baasuuf jiru arguu danda'a," jedhe.

   Akka ministirichaatti, Ameerikaan hanga ammaa sadarkaa doorsistutti kan hin raawwatiin sababa kanaafidha. Haata'u malee, Ameerinaa doorsisa jechaan dhageessistu gara qabatamatti hojiitti hiikuutti jijjiirraan, gatiishee argatti jechuun akeekkachiise.

10. 19 Onkololeessa 2026Sa'ud Arabiyaan lammileen Baangilaadish lama masjiida Makkaa keessatti gocha safuu cabsu raawwatan jette ajjeeste

    Sa'ud Arabiyaan lammileen Baangilaadish lama, dhiira tokkoo fi dubartii tokko, masgiidota qulqulluu Makkaa keessaa tokko keessatti gochawwan safuu cabsan raawwachuun shakkamanii qabaman jette du'aan adabuu Ministeerri dhimma biyya keessaa Sa'udii hime.

    Burqaan oduu mootummaa Sa'ud Arabiyaa, SPA, akka gabaasetti, namni Nazaarul Islaam Abdul Basiir, akkasumas dubartiin Siitii Akter jedhamtu akka aanga'oonni jedhanitti gocha safuu cabsu masgiida keessatti raawwataniiru.

    Akka aanga'oonni Sa'ud Arabiyaa jedhanitti, humnoonni nageenyaa namoota kanneen lamaan qabuun gara mana murtii dhimmi kun ilaallatuutti geessan.

    Manni murtii kunis jarri lachuu yakkamoo ta'uu isaanii adda baasuun, yakki raawwatames hangam hamaa akka ta'e ilaalcha keessa galchee ilaaluun gocha fokkuu masjiida qulqulluu keessatti raawwatamee fi haalli yakki raawwatame jedhame kun itti raawwatames madaaluun murtee du'aa irratti dabarseera jedhe Ministeerichi.

    Murteen kun ol iyyannoon boodas waan ragga'eef murteen du'aa kenname Onkoloolessa 14 hojiirra oolee ajjeefamaniiru jedhan aanga'oonni.

    Haata'u malee, aanga'oonni Sa'ud Arabiyaa gosa gocha namoonni kunneen raawwatanii ittiin yakkamoo ta'an jedhe, guyyaa isaan itti raawwatan, akkasumas murteen du'aa yoom akka irratti murameefi guyyaa kam akka ol iyyannoon isaanii kufaa ta'e ilaalchisee ibsa bal'aa hin kennine.

    Miidiyaaleen biyya keessaa Sa'ud Arabiyaas dhimma kana ilaalchisee odeeffannoo bal'aa kan hin dhiyeessine yoo ta'u, ibsuma ministeerri dhimma biyya keessaa baase qofa gabaasan.

    Mootummaan Baangilaadish dhimma kana irratti waan itti himame akka hin jirre ibseera.

11. 19 Onkololeessa 2026Bulchiinsi Albartaa Kanaadarraa foxxoquuf dhiisurratti sagalee kennaa jirta

    Jiraattonni Bulchiinsa Albartaa Kanadarraa foxxoquufi dhiisuu murteessuuf sagalee kennaa jiru.

    Bulchaan Albartaa Daani'eel Simiiz waamicha taasiseen jiraattonni bulchiinsichaa sagalee kennaa jiru.

    Sagaleen kennamaa jiru kun Kanaadarraa foxxoquuf murtee uummataa taasifamu osoo hin taane yaada fottoquu jedhu deeggaruufi dhiisuu murteessufi.

    Yaadicharratti sagaleen akka kennamu kan murtaa'e namoonni 30,000 ta'an mallatteessuun iyyata dhiyeessurraa kan ka'eedha.

    Kanneen Kanaadarraa foxxoquuf deeggaran, bulchiinsi boba'aan badhaatuu taatee Albartaan imaammata mootummaan Kanaadaa hordofuun diinagdeedhaan kan miidhamte ta'uu kaasu.

    Ministiira Muummee Kanaadaa kan ta'an Maark Kaarneey dabalatee kanneen Albartaan qaama Kanaadaa taatee akka itti fuftu barbaadan ammoo, yeroo biyyattiin dhiibbawwan alaa garaa garaa keessa jirtu kanatti ilaalchi fottoquu deeggaramuu hin qabu jechuun tokkummaan akka jiraatu waamicha dhiyeessaa jiru.

    Ragaaleen akka agarsiisanitti jiraattonni Albartaa hedduunsaanii qaama Kanaadaa ta'anii itti fufuu barbaadu.

    Sagalee kennamaa jiruun jiraattoonni Albartaa Kanaadaa irraa fottoquu qabna kan jedhu sagalee caalmaan yoo argame, bara 2027 sagaleen uummataa akka gaggeeffamu bulchaan Albartaa Daani'eel Simiiz ibsan.

12. 19 Onkololeessa 2026Ministirri Dhimma Alaa Raashiyaa erga waraanaa asi yeroo jalqabaaf Iraan daawwachuufi

    Minstirri Dhimma Alaa Raashiyaa Sergeey Laavroov har'a gara Tehraan deemaa jira, kunis erga US fi Israa'el biyyattii irratti haleellaa raawwatanii as daawwannaa isaa jalqabaati.

    Televijiiniin Iraan akka gabaasetti, Laavroov daawwannaa kanaan Pirezidaantii Iraan Masoud Pezeshkiyaan waliinis ni wal arga.

    Walitti bu'iinsi Iiraanii fi Ameerikaa gidduutti hammaachaa dhufuu hordofee, Raashiyaan gahee jaarsummaa guddaa taphachuuf akka barbaaddu dubbatamaa jira.

    Laavroov, kan Minstira Dhimma Alaa Iraan Abbaas Araaghchii waliin walga'uuf eegamu, carraaqqiin Mooskoo "waraana guutuu ta'etti akka hin deebi'amne ittisuu irratti kan xiyyeeffate" ta'uu dubbateera. Gara Iraaniitti imaluun dura, Laavroov Baahireen daawwatee ture.

    Walga'ii saglaffaa marii tarsiimoo Raashiyaa fi GCC kan Manamaatti gaggeeffame irratti, biyyoota Galoo Galaanaa fi biyyoota ollaa isaanii, Iraaqii fi Joordaan dabalatee, gidduutti mariin kallattii akka taasifamu waamicha godhe.

    Daawwannaan Laavroov gara Iraan taasise kun, dhiheenya kana walga'ii gam lamaa Pirezidaantii Raashiyaa Viladimir Puutin Masuud Pezeshkian waliin taasisan irratti, Mooskoon carraaqqii jaarsummaa irratti hirmaachuuf qophii ta'uu ishee erga ibsitee booda dhufe.

    Puutin carraaqqiin kun Dhaabbata Gamtaa Islaamaa (OIC) fi Mana Maree Nageenyaa Dhaabbata Mootummoota Gamtoomanii (UNSC) dabalachuu akka danda'u dubbataniiru.

13. 19 Onkololeessa 2026Masriin haleellaa Saa'udiin Huutii irratti raawwattu deeggaruuf waliigalte

    Qaamni tikaa Masrii, Saa'udii Aarbiyaan haleellaa Huutii Yaman irratti taasiftu deeggaruuf waliigaluu Dilbata kaleessaa ibse.

    Saa'udiin michootishee deeggarsa akka godhaniif gaafachaa baate. Finciltoonni Huutii bu'uuraalee boba'aafi buufataalee xayyaaraa Saa'udii irra deddeebiin misaayelaa fi dirooniin haleelaa jiru.

    Misaayelonni warri Huutii dhukaasan otoo furguggifamanii kallattii jijjiiruu waan danda'aniif fashaleessuuf rakkisaa dha jetti Saa'udiin.

    Hamma har'aa Saa'udii keessatti qofa namoonni 19 yoo ajjeefaman balaliin kumaan lakkaa'amu ammoo haqameera.

    Dilbata kaleessaa hogganaan Humna Ittisaa Saa'udii pireezidantii UAE waliin wal arguun haala itti michooma jabeessan irratti dubbataniiru.

    Biyyooti lameen Yaman keessatti gareelee garagaraa waan deeggaraniif yeroo dhihoo as gidduu isaanii muddamni hammaateera.

    Masriin deeggarsa waraanaa gochuuf kan waliigalte ilmi mootii biyyattii Masrii daawwachuun ji'a tokko booda dha.

    Manni maree ittisaa biyyaalessaa Masrii pireezidantii biyyattii Abdal Fattaa Alsiisii nagaan Saa'udii akka eegamuuf ''deeggarsa danda'amu hunda,'' gochuuf waliigaluu ibsa kanarratti eerameera.

    Dhimma kanarratti ibsi bal'aa kennamuu baatus Alsiisin waraana bobbaasuu akka danda'aniif mana marichaa eeyyama gaafataniiru.

    Dilbatuma kaleessaa ministarri haajaa alaa Iraan Abbaas Argaachii fi gitnisaanii Masrii Baadir Abdallaatii ''dhimmoota qaxanaa irratti,'' bilbilaan dubbataniiru.

    Saa'udii fi Huutii giddduu waraanni adeemaa jiru gama lamaaniin namoota nagaa irratti miidhaa qaqqabsiisaa jira.

14. 19 Onkololeessa 2026Paastariin Keeniyaa maatiin akka ijoollee ofii beelessanii fixan ajajuun himatame adabbiin irratti muramuuf

    Manni murtii Keeniyaa paastarii guyyaan dhumaa gahe jechuun namoota jumlaan fixaa ture Pool Makeenzii irratti murtii dabarsuufi.

    Makeenziin fi duuka bu'oonni isaa 29 lubbuu namoota 191 galaafachuun kan himataman yoo ta'u, hundisaanii iyyuu ijoolleedha jechuun ni danda'ama.

    Gartuu amantii kun daa'imman dirqiin hanga dhumanitti beelessuun yoo duutan "Iyyasuus bira deemtu" jedhaan ture.

    Barsiifanni amantaa isaa guyyaan dhumaa geesse jedhu immoo barnoota lagadhaa, qoricha ammayyaas hin fayyadaminaa isaan "hamoodha" jedhee gorsa.

    Makeenzii fi duuka bu'oonni isaa 29'n ajjeechaa hin raawwanne jechuun falmatan. Nama tokkollee du'aatiif hin dirqisiifne jedhu.

    Hogganaan nageenyaa draanii Makeenzii, Enoos Amaanyaa Ngaala jalqaba wajjin kan himatame yoo ta'u,boodararra waliin marii godhameen ragaa abbaa alanga ta'e. Walmariin adeemsa seeraa keessattiI kennanii fudachuu jedhama.

    Makeenzii fi gareen isaa himannaawwan biraa shororkeessummaa, finxaalessummaa fi daa'imman barnootarraa ugguruufi himannaa seeraa kaanin himataman.

    Paastariin kun paastarii jalqabaa ajjeechaa namaatiin himatame kan jalqabaa ti. Aangawoonni reeffi namoota 400 iddoo waaqeffannaa bosona Shaakaahoolaa handaara galaanaatti dhiyootti argamutti argamuu himan.

    Keeniyaan bosona gartuun amantii Cult ta'e keessatti dhuman fulaa yaadannootti jijjiiruuf

15. 19 Onkololeessa 2026'Qoqqobbii Raashiyaa kan adda kutne mariin nagaa akka itti fufuufi'-Tiraamp

    Pirezdantiin US Donaald Tiraamp murtoon qoqqobbiiwwan Raashiyaarra kaa'aman adda kutuu Mooskoon marii akka itti fuftu jajjabeessuufi jedhe.

    "Adeemsa marii nagaa waraana Yukireenii fi Raashiyaarran jira,"jedhe Traamp fuula miidiyaa hawaasaa isaa Social Truth irratti. Waan gowwaan Raashiyaa mariirraa dhiibu tokkollee gochuu hin fedhu" jedhe Tiraamp.

    Traamp Jimaata galgala qoqqobbiiwwan hedduu Raashiyaa irratti murtaa’an osoo hojiirra ooluuf guyyaan lama hafuu bulcheera; kunis wal-dhabdeen Puutiini fi Pirezidantii Yukireen Voloodimiir Zeleeniskii gidduu jiru yeroo bal'achaa dhufetti.

    Pirezdantii Raashiyaa Vilaadimiir Puutiinirra goruun "dogoggora seenaati" jedhe Zeleniskiin. Ergamaan Raashiyaa Kiiriil Dimiitiriyeef ajaja Traamp kanaaf deebii yoo kennu "yeroo seena-qabeessaa fi dhugumaan barbaachisaa ta'e" jedhee waameera.

    Uggurriwwan Kongiresii Ameerikaatiin dabarfamanii fi Piriizidantii Ameerikaatiin Fulbaana keessa mallatteeffamanii seera ta'an kunniin, gabaa Ameerikaa fi addunyaa irratti "miidhaa hamaan" geessisu danda'u turan jedheera.

    Ministirri Dhimma Alaa Ameerikaa Maarkoo Ruubiyoon uggura kana guyyoota 60f dhaabuun, dhiibbaa inni diinagdee Ameerikaa fi addunyaa irratti geessisuu danda'u xiinxaluuf jechadha jedha.

    Tiraampi ergaa isaa Truth Social irratti, Zeleniskii "waraana kana dhaabuu hin barbaadu, tariis takkallee" jedhe. Osoo fedhee amma caalaa waggaa lama dura godha tura ture" jedhe.

    Zeleeniskii erga Raashiyaan lola guutuu Yuukireen irratti Guraandhala 2022 jalqabdee as waraanni akka dhaabatuuf dhiibbaa gochaa jira, akkasumas Puutiin nagaya akka hin barbaadne deddeebisee dubbata.

    Zeleniskiin waraanni akka dhaabbatu dhiibbaa gochaa ture, erguma Raashiyaan bara 2022 weerara irratti deddeebiin Puutiin nagaa hin barbaadu jechaa ture.

16. 18 Onkololeessa 2026Sa'ud Arabiyaatti helikooptarri kuftee caccabdee namoonni lama du'an

    Kibba Sa'ud arabiyaa, naannoo Naajraan keessatti helikooptariin Ah-6i rakkoo tekinikaa ishee mjudateen kuftee caccabnaan namoonni keessa turan lama du'uu dubbi-himaan humna walii Sa'udiin durfamuu Meejar Jeneraal Turkii Al-Maalikii hime.

    Al-Maalikiin ibsa kenneen akka jedhetti, helikooptariin kun kuftee kan caccabde lafa bulchiinsa Ministeerri Ittisa Biyyaa Sa'ud Arabiyaa jala jiru keessattidha.

    Yeroo lolli humna waloo Sa'udiin durfamuu fi garee Yaman jiru gidduutti hammaataa dhufe kanatti, naannoon Naajraan kun haleellaa finciltoonni Huutii Iraaniin deegaraman irraa dhfuun irra deddeebiin isa mudateera.

    Dubbi-himaan waraanaa Huutii Yaahyaa saaree fuula X isaarratti akka barreessetti, gareen isaa helikooptara Appaachee haleeluuf gargaartu osoo naannoo daangaa Huutiin to'atee jiru keessatti oppereeshinii gaggeessa ajirtuu rukkutanii kuffiisuu ibse.

    Haata'u malee, Al-Maalikiin suura helikooptara Appaachee maxxansuun akkas jechuun himannaa kana mormeera: "Isin nuti kuffiise jettanii himachuu dandeessu, garuu inni garuu amma gara dirree hojiisaatti deebiya".

17. 18 Onkololeessa 2026Dhimmi Iraan fala argatee, gatiin boba'aa bakka isaatti deebiyuuf jira -Tiraamp

    Pirezidantiin Ameerikaa Doonaald Tiraamp Sambata dubbii duula filannoo isteetii Kentaakii keessatti taasiserratti dubbateen dhimmi Iraan dhiyootti fala argatee, gatiin boba'aas bakka isaa sirriitti deebiya jedhe.

    "Waggaa lama lamaan duubatti deebiyuu hin barbaadnu. Dhimma kanatti xumura gochuu barbaadna," jedhe Tiraamp.

    "Iraan haleelamuun isheemarra ture sababiin isaa ammoo meeshaa waraanaa nukilaraa gabbifataa turte," jedhe Tiraamp itti dabaluun.

    Iraan garuu himannaa meeshaa waraanaa n ukilaraa hidhachuu ykn gabbifachuuf yaalaa jirti jedhu irra deddeebiin waakkataa turteetti.

    Tiraamp itti dabaluun akkas jedhe: "Humni nukilaraa Iraan akka irra deebiyee hin ijaaramne mirkaneeffachuu barbaadna; yeroo ammaa kanas dhimmi irratti hojjechaa jirrus isuma kandha."

18. 18 Onkololeessa 2026'Giyookeresh Amajji keessa Arsenaal gadhiisuu barbaada'

    Taphataan sarara fuula duraa Siwiidin Viktor Giyookeresh jijjiirraa taphattootaa Amajji dhufu banamu keessa Arsenaal gadhiisuuf yaada qaba.

    Akka TeamTalk gabaasetti, taphataan umuriin isaa waggaa 28 ta'e kun kan Arsenaaliin gadhiisuu barbaadeef yeroo inni dirree seenee taphatu jalaa waan xiqqaateefidha.

    Bara darbe Ispoorting Lisban irraa gara Arsenaal kan dhufe Giyookeresh, waliigala goolii 21 kilabichaaf lakkoofsisuun waggaa 22 booda waancaa akka argatuuf gumaacheera.

    Giyokereesh kilaba Ispoortingitti gahuumsa addaarra ture.

    Viiktoor Giyokereesh waggaa tokko dura kilaba Ispoortingiif taphoota 52 irratti galchii 54 lakkoofsisee ture- taphoota hundarratti galchii tokkoofi isaa ol lakkoofsise jechuudha.

    Giyokereesh ittisa dhumaa irratti hirkachuun bakka bal'aa irraa galchii lakkoofsisuun beekama. Ispoorting yeroo ture kubbaa fageenyarraa ergamuuf sarara ittisaa garee faallaa humnaan dhiibuun bakka bal'aa uummatee galchii lakkoofsisa.

    Arsenaal gaafa mallatteessisu kan Shaampiyoonaa Poorchugaal Spoortingitti lakkoofsise caalaa lakkoofsisa jedhamee eegamaa ture.

    Garuu akka eegame hin taane.

    Arsenaalitti rakkoo maaltu isa mudate?

19. 18 Onkololeessa 2026Ameerikaan qubattoota Weest Baank keessatti hokkara uuman akka dhaabsistu Israa'el gaafatte

    Ameerikan qubattoota Yihudootaa warra Weest Baank keessatti hokkara uumaniifi haleellaa raawwatan dhaabsisuuf tarkaanfii dabalataa akka fudhattuuf Israa'eliin gaafatte.

    Ministirri Dhimma Alaa Ameerikaa, Maarkoo Ruubiyoo gocha qubattoonni Yihudootaa Weest Baank keessatti raawwachaa jiran dhaabsisuudhaaf Israa'el tarkaanfii dabalataa akka fudhattuuf waamicha gochaa jirra jedhe.

    Dubbiin Ruubiyoo kun kan dhaga'ame viidiyoon yeroo namoonni baayyee ta'anii ogeessa suuraa Ameerikaa Washington Post keessa hojjetu Heyidii Leviin reebamu agrsiisu mul'achuu hordofeeti.

    Leviin yoo xiqqaate namoota lamaan Jimaata yeroo qubattoonni Jewiish namoota nagaa Filisxeem irratti haleellaa raawwatan miidhaman lamaan keessaa tokko ture.

    Akka ministeera Dhimma Alaa Beeljiyeem jedhetti, dippilomaatiin Awurooppaa fi kantiibaan Faransaay akkuma kana Weest Baank bakka humnaan qabatame keessatti haleelamaniiru.

    Beeljiyeem haleellaa ambaasaaddarasheefi dippilomaatota biraa irratti xiyyeeffate kana kan balaaleffatte yoo ta'u, namoota gocha kana raawwatan akka seeratti dhiyeessituuf Israa'eliin gaafateera.

    Waraanni Israa'el (IDF) gocha "hamaa hokkara uumuu" jedhe kana blaaleffachuun qorannoo gochuu akka itti fufu ibseera.

    Haata'u malee, waajirri Ministira Muummee Israa'el Benjaamiin Netaaniyaahuu waan ta'e jedhame kanarraa shakkii qabaachuu ibsuun, gochi kun tarii qaama " duula kabaja gaarii Israa'el xureessuuf qindaa'ee ta'uu mala" jedheera.

    Ruubiyoon akka jedhetti, Ministeerri Dhimma Alaa Ameerikaa haleellaa Leevin irratti raawwatame dabalatee, gocha kana irratti qorannoo jalqabeera.

20. 18 Onkololeessa 2026ASHAMAA!

    Akkam jirtu hordoftoota keenyaa? Odeeffaannoo karaa toora tamsaasa kallattiin isin biraan geenyu jalqabneerra.

    Qormaanni mootummaa Imaanaa Tigyaayitti hundaa'e eeggatu maali?,

    Raashiyaan muddama Itoophiyaafi Ertiraa jaarsummaan furuuf gaaffii dhiyeessu ishee,

    Waraana kaabaan booda hireen TPLF maal taha? Biyya ollaatti baqatuu moo of ijaaruun aangootti deebi'uu? kan jedhuufi odeessaalee biroo karaa Marsariitii (Website), Instagram, YouTube, Facebook, WhatsApp fi TikTok keenyaas ni argattu.

    DHIYAADHAA!