Sgrùdadh Litreachais
Tagh earrann gus fiosrachadh fhaighinn mun bhàrdachd
Clann-nighean an Sgadain
- An gàire mar chraiteachan salainn
- ga fhroiseadh bhom beul,
- an sàl 's am picil air an teanga,
- 's na meuran cruinne, goirid a dhèanadh giullachd,
- no a thogadh leanabh gu socair, cuimir,
- seasgair, fallain,
- gun mhearachd,
- 's na sùilean cho domhainn ri fèath.
- B' e bun-os-cionn na h-eachdraidh a dh'fhàg iad
- 'nan tràillean aig ciùrairean cutach,
- thall 's a-bhos air Galldachd 's an Sasainn.
- Bu shaillte an duais a thàrr iad
- às na mìltean bharaillean ud,
- gaoth na mara geur air an craiceann,
- is eallach a' bhochdainn 'nan ciste,
- is mara b' e an gàire
- shaoileadh tu gu robh an teud briste.
- Ach bha craiteachan uaille air an cridhe,
- ga chumail fallain,
- is bheireadh cutag an teanga
- slisinn à fanaid nan Gall –
- agus bha obair romhpa fhathast
- nuair gheibheadh iad dhachaigh,
- ged nach biodh maoin ac':
- air oidhche robach gheamhraidh,
- ma bha siud an dàn dhaibh,
- dhèanadh iad daoine.
Clann-nighean an Sgadain
Ann a bhith toirt dhuinn tuairisgeul no dealbh air a' chlann-nighean, tha am bàrd a' ruith air ceithir pàirtean den bhodhaig sa chiad earrann den dàn. A' chiad rud 's e am beul, no co-dhiù an gàire.
Dhasan sin an rud as cudromaiche mu dheidhinn na clann-nighean. Nuair a leughas tu an dàn air fad, smaoinich carson a tha e cho cudromach.
