တိုက်ရိုက်ထုတ်လွှင့်မှု , ပြင်သစ် Paris Peace Forum ကို SCEF ကိုယ်စားလှယ်အဖွဲ့တက်မယ်

တိုက်ရိုက် ထုတ်လွှင့်ချက်

1. လွန်ခဲ့သော ၅၄ မိနစ် ကSCEF ကိုယ်စားလှယ်အဖွဲ့ Paris Peace Forum တက်ရောက်မယ်, ပြင်သစ်သမ္မတနဲ့ သီးခြားတွေ့ဆုံဖို့ရှိတယ်လို့ဆို

   

   ဓာတ်ပုံ ရင်းမြစ်, SCEF

   ဖက်ဒရယ်ဒီမိုကရေစီပြည်ထောင်စုပေါ်ထွန်းရေးဦးဆောင်ကောင်စီ (SCEF) ကိုယ်စားလှယ်အဖွဲ့ဟာ ပြင်သစ်နိုင်ငံ ပါရီမြို့မှာ နိုဝင်ဘာ ၁၀ ရက်နဲ့ ၁၁ ရက်မှာ နှစ်ရက် ကျင်းပမယ့် Paris Peace Forum ကို တက်ရောက်မယ်လို့ ပြင်သစ်အစိုးရနဲ့ နီးစပ်သူတစ်ဦးထံက သိရပါတယ်။

   Forum ကာလအတွင်း ပြင်သစ်သမ္မတ အီမန်နျူရယ် မက်ခရွန်နဲ့ သီးခြားတွေ့ဆုံရေးပြင်ဆင်ထားပြီး SCEF ရဲ့ လုပ်ငန်းစဉ်တွေကိုဆွေးနွေးဖို့ စီစဉ်ထားတယ်လို့ သိရပါတယ်။

   SCEF ကိုယ်စားလှယ်အဖွဲ့ကို SCEF ရဲ့ မူဝါဒရေးရာအကြံပေး နော်မေဦးက ဦးဆောင်မှာဖြစ်ပြီး NUG နိုင်ငံခြားရေးဝန်ကြီးလည်းဖြစ်၊ SCEF အတွင်းရေးမှူးအဖွဲ့ဝင်လည်းဖြစ်တဲ့ ဒေါ်ဇင်မာအောင်လည်း ပါဝင်တက်ရောက်မယ်လို့ အဲဒီအခြေအနေကို သိရှိထားတဲ့ ထိုင်းအခြေစိုက် သံတမန်သတင်းရင်းမြစ်တစ်ဦးက ပြောပါတယ်။

   ကနဦးအစီအစဉ်တွေအရ ပြင်သစ်သမ္မတအပြင် ပြင်သစ်သမ္မတဟောင်းရဲ့ အကြံပေးနဲ့ အခြားပြင်သစ်ခေါင်းဆောင်တချို့ကိုလည်း တွေ့ဆုံပြီး SCEF ရဲ့ လုပ်ငန်းစဉ်တွေကို တင်ပြဆွေးနွေးဖို့ ပြင်ဆင်နေတယ်လို့ ဆိုပါတယ်။

   ဘီဘီစီအနေနဲ့ ပြင်သစ်ခေါင်ဆောင်ပိုင်း‌တွေနဲ့ တွေ့ဆုံမယ်ဆိုတာနဲ့ ပတ်သက်လို့ SCEF ပြော‌ရေးဆိုခွင့်ရှိသူတွေနဲ့ သီးခြားအတည်ပြုနိုင်ရေး ကြိုးစား‌‌နေပါတယ်။

   Paris Peace Forum ကို ၂၀၁၈ ခုနှစ်က စတင်ကျင်းပခဲ့တာဖြစ်ပြီး အခုနှစ်မှာ ၉ ကြိမ်မြောက် ကျင်းပတာဖြစ်ပါတယ်။ ဒီနှစ်ရဲ့ ခေါင်းစဉ်ကတော့ “Joining Forces on What Matters Most” ဖြစ်ပြီး ကမ္ဘာ့နိုင်ငံတွေအနေနဲ့ အရေးကြီးတဲ့ စိန်ခေါ်မှုတွေကို အတူတကွ ပူးပေါင်းဖြေရှင်းဖို့ ဆိုပြီး ရည်ရွယ်ထားပါတယ်။

   စစ်ပွဲတွေ၊ ရာသီဥတုပြောင်းလဲမှု၊ နည်းပညာအပြောင်းအလဲနဲ့ ကမ္ဘာ့စီးပွားရေးဆိုင်ရာ စိန်ခေါ်မှုတွေကို နိုင်ငံတစ်နိုင်ငံတည်းနဲ့ ဖြေရှင်းဖို့ မဖြစ်နိုင်တဲ့အတွက် နိုင်ငံတွေအကြား ပူးပေါင်းဆောင်ရွက်ရေးကို အလေးထားဖို့ Forum က ဖော်ပြထားပါတယ်။

   ဒီနှစ် Forum မှာတော့ ကလေးသူငယ်တွေရဲ့ အနာဂတ်ကို အလေးထားတဲ့ Child Summit ကိုလည်း ပထမဆုံးအကြိမ် သီးခြားထည့်သွင်းကျင်းပမှာဖြစ်ပါတယ်။ ကလေးတွေရဲ့ ပညာရေး၊ ကျန်းမာရေး၊ အာဟာရနဲ့ မျက်နှာပြင်နဲ့ နည်းပညာတွေရဲ့ သက်ရောက်မှုတွေကို ဆွေးနွေးသွားမှာဖြစ်ပါတယ်။

2. လွန်ခဲ့သော ၅၄ မိနစ် ကLabubu အရုပ်တွေကို အရူးအမူးဝယ်စုဆောင်းမှု အရှိန်ကျလာလို့ ရောင်းအားကျဆင်း

   

   ဓာတ်ပုံ ရင်းမြစ်, Getty Images

   နှစ်အတော်ကြာ ကမ္ဘာတစ်ဝန်း ရေပန်းစားခဲ့တဲ့ Labubu အရုပ်တွေကို စုဆောင်းသူတွေကြားမှာ အခုနောက်ပိုင်း လူကြိုက်လျော့လာနေပါတယ်။

   Labubu ထုတ်တဲ့ Pop Mart ရဲ့ ထုတ်ပြန်ချက်အရရောင်းအားဟာ စက်တင်ဘာလကုန်အထိ သုံးလအတွင်း မနှစ်က အလားတူကာလနဲ့ နှိုင်းယှဉ်ရင် ကမ္ဘာတစ်ဝန်း ၅၀ ရာခိုင်နှုန်းအထိ ကျဆင်းခဲ့တယ်လို့ ကုမ္ပဏီဘက်က ‌ပြောပါတယ်။

   တရုတ်ပြည်မကြီးပြင်ပ ဈေးကွက်တွေမှာ ရောင်းအားကျဆင်းမှု ပိုသိသာခဲ့ပြီး အမေရိကန်ဈေးကွက်မှာတော့ ဝင်ငွေ ၇၀ ရာခိုင်နှုန်းထက်မနည်း ကျဆင်းခဲ့ပါတယ်။

   အရင်က အသက်အရွယ်မရွေး စုဆောင်းသူတွေဟာ ဘယ်အရုပ်ပါမလဲ မသိနိုင်တဲ့ အလုံပိတ်ဘူး (Blind Box) တွေကို တစ်ဘူး ဒေါ်လာ ၁၅ (ပေါင် ၁၁) နဲ့အထက် ပေးဝယ်ခဲ့ကြပါတယ်။ ကိုယ်လိုချင်တဲ့ အရုပ်မရသူတွေဆိုရင်လည်း ပြန်လည်ရောင်းချတဲ့ ဈေးကွက်မှာ ဈေးပိုပေးပြီး ဝယ်ယူခဲ့ကြပါတယ်။

   အခုတော့ Ensito ဟာ Hello Kitty နဲ့ Squishies လို တခြားခေတ်စားနေတဲ့ အရုပ်တွေအကြောင်း အကြောင်းအရာတွေကို ပိုပြီးအာရုံစိုက်လာပါတယ်။

   ဒီအခြေအနေဟာ တစ်ချိန်က Labubu အရုပ်တွေကို ကမ္ဘာတစ်ဝန်း အလွန်အမင်း ရေပန်းစားစေခဲ့ပြီး မိခင်ကုမ္ပဏီ Pop Mart ရဲ့ တန်ဖိုးကို အမေရိကန်အရုပ်ကုမ္ပဏီကြီးတွေဖြစ်တဲ့ Hasbro နဲ့ Mattel နှစ်ခုပေါင်းထက်တောင် ပိုများလာစေခဲ့တဲ့ ဝယ်လိုအား အရှိန်ကျလာတဲ့ လက္ခဏာတစ်ခု ဖြစ်ပါတယ်။

   ဘေဂျင်းအခြေစိုက် Pop Mart ဟာ တစ်ကြိမ်တစ်ခါ လူမှုကွန်ရက်ပေါ်မှာ ဗိုင်းရပ်စ်လို ပျံ့နှံ့ပြီး ရေပန်းစားခဲ့တဲ့ အရှိန်အဟုန်ကို ကျော်လွန်ပြီး ပရိသတ်တွေရဲ့ စိတ်ဝင်စားမှုကို ဆက်လက်ထိန်းထားနိုင်ဖို့ အခက်တွေ့နေရတယ်လို့ စီးပွားရေးလေ့လာသူတွေက သုံးသပ်ကြပါတယ်

3. လွန်ခဲ့သော ၅၄ မိနစ် ကမလေးရှားရဲ့ အော်ပရာဇီမှာ ၂ လအတွင်း မြန်မာ ၂၀ ဦးထက်မနည်းဖမ်းဆီးခံရ

   

   ဓာတ်ပုံ ရင်းမြစ်, မလေးရှားလူဝင်မှုကြီးကြပ်ရေးဌာန (JIM)

   မလေးရှားနိုင်ငံ၊ ပီနန်းနဲ့ ကက်ဒါပြည်နယ်တို့မှာ အောက်တိုဘာနှောင်းပိုင်းနဲ့ အခု နိုဝင်ဘာလ ၂ လအတွင်း ပြုလုပ်ခဲ့တဲ့ လူဝင်မှုကြီးကြပ်ရေး (အော်ပရာဇီ) စစ်ဆင်ရေးတွေမှာ နိုင်ငံခြားသား ၇၄၄ ဦး ဖမ်းဆီးခံခဲ့ရပြီး အဲဒီအထဲမှာ မြန်မာနိုင်ငံသား ၂၀ ဦး ပါဝင်တယ်လို့ မလေးရှားလူဝင်မှုကြီးကြပ်ရေးဌာန (JIM) ရဲ့ နိုဝင်ဘာ ၈ ရက် ထုတ်ပြန်ချက်အရ သိရပါတယ်။

   အောက်တိုဘာ ၁၂ ရက်က ကက်ဒါပြည်နယ်၊ ကူလင်းမြို့နားက ဆောက်လုပ်ရေးလုပ်ငန်းခွင်မှာ ပြုလုပ်ခဲ့တဲ့ စစ်ဆင်ရေးမှာ နိုင်ငံခြားသား ၆၃၀ ဦး ဖမ်းဆီးခံခဲ့ရပြီး မြန်မာနိုင်ငံသား ၇ ဦး ပါဝင်ပါတယ်။

   အောက်တိုဘာ ၂၀ ရက်က ပီနန်းပြည်နယ်၊ ဘူကစ်မဲတာဂျမ်နဲ့ ပရိုင်မြို့တွေရှိ စားသောက်ဆိုင်၊ ဖျော်ဖြေရေးဆိုင်နဲ့ စက်ရုံနှစ်ရုံကို ဝင်ရောက်စစ်ဆေးခဲ့ရာမှာလည်း နိုင်ငံခြားသား ၅၉ ဦး ဖမ်းဆီးခံခဲ့ရပါတယ်။ အဲဒီအထဲမှာ မြန်မာနိုင်ငံသား ၅ ဦး ပါဝင်ပါတယ်။

   အလားတူ နိုဝင်ဘာ ၆ ရက်က ပီနန်းပြည်နယ်၊ ဘူကစ်မဲတာဂျမ်မြို့ရှိ ဖျော်ဖြေရေးဆိုင်နှစ်ဆိုင်ကို ဝင်ရောက်စီးနင်းခဲ့ရာမှာလည်း နိုင်ငံခြားသား ၁၁၄ ဦး ဖမ်းဆီးခံခဲ့ရပြီး မြန်မာအမျိုးသား ၈ ဦး ပါဝင်ပါတယ်။

   မလေးရှားအာဏာပိုင်တွေဟာ နိုင်ငံအတွင်း နိုင်ငံခြားသားတွေရဲ့ တရားဝင်နေထိုင်ခွင့်နဲ့ အလုပ်လုပ်ခွင့်တွေကို စစ်ဆေးပြီး လူဝင်မှုကြီးကြပ်ရေးဥပဒေ ချိုးဖောက်မှုတွေ၊ တရားမဝင်အလုပ်ခန့်ထားမှုတွေကို တားဆီးနိုင်ဖို့ နိုင်ငံတစ်ဝန်း စစ်ဆင်ရေးတွေကို ဆက်တိုက်ပြုလုပ်နေတာဖြစ်ပါတယ်။

4. လွန်ခဲ့သော ၅၅ မိနစ် က

   မင်္ဂလာပါ။ နိုဝင်ဘာ ၉ ရက် ဘီဘီစီမြန်မာပိုင်းသတင်း‌တွေကို ဒီစာမျက်နှာမှာ တိုက်ရိုက် တင်ဆက်ပေး‌‌နေပါတယ်။