पचपन्न वर्षमाथि उमेर समूहका व्यक्तिलाई कोभिड खोप दिने कार्यक्रम स्थगित
खोपको उपलब्धता सुनिश्चित भएपछि मात्रै ५५ वर्षमाथि उमेर समूहका व्यक्तिलाई कोभिड-१९ विरुद्धको खोप उपलब्ध गराइने सरकारले जनाएको छ।
स्वास्थ्य मन्त्रालयका प्रवक्ता डा. जागेश्वर गौतमले भारतबाट खरिद सम्झौता गरिएको खोप उपलब्ध भएपछि मात्रै दोस्रो प्राथमिकताको दोस्रो चरणमा रहेका व्यक्तिहरूलाई खोप दिइने बताए।
६५ वर्षभन्दा माथिको उमेर समूहका ज्येष्ठ नागरिकलाई खोप उपलब्ध गराउने समयसीमा मङ्लवार सकिएको छ।
उक्त समयसीमा सकिएपछि अर्को दश दिन ५५ वर्षदेखि ६४ वर्षको उमेर समूहका व्यक्तिलाई खोप दिने बताइएको थियो।
उक्त उमेर समूहको जनसङ्ख्या लगभग १८ लाख रहेको बताइन्छ। हालसम्म १६ लाखभन्दा बढीले खोप लगाइसकेको बताइएको छ।
नेपालले अहिलेसम्म लगभग साढे २३ लाख खोप भित्र्याएको छ।
खोपको पहिलो मात्रा लिएका व्यक्तिलाई उपलब्धता सुनिश्चित गरेर दोस्रो खोप लिन सूचना आह्वान गरिने अधिकारीहरूले बताएका छन्।
तस्बिर स्रोत, Reuters
