còmhla ris an Urr Pòl Moireach bhon Eaglais Shaor

Anns an t-seirbheis cluinnidh sibh na sailm agus an leughadh a leanas:
Salm 62: 6-7 air fonn St Mary's agus 's e an t-Urr Coinneach Fearghasdan a tha os cionn na seinn le taic bho choitheanalan Eaglaisean Leòdhais agus na Hearadh.
Salm 60: 3-4 air fonn Coleshill agus 's e an t-Urr Niall Seathach a tha os cionn na seinn a chaidh a chlàradh ann an 1986 air teip "Gaelic Psalm Singing from Lewis"
Salm 61: 1-3 air fonn Walsall agus 's e Dòmhnall MacLeòid a tha os cionn na seinn a chaidh a chlàradh air clàr LP "Gaelic Psalmody Recital" le Lewis Recordings ann an 1978.

Leughadh : Salm 61
Ceann-teagaisg: Salm 61: 2

'S ann à Nis ann an Eilean Leòdhais a tha Pòl agus às dèidh dha an sgoil fhàgail, chaidh e a Ghlaschu far an robh e ag ionnsachadh mu choinneamh obair ann a bhith a' stiùireadh gnìomhachas togail. Nuair a bha e deiseil, thill e air ais a Leòdhas agus bha e ag obair aig companaidh togail athar.

Airson iomadach bliadhna bha Pòl a' faireachdainn gun robhas ga ghairm chun na ministrealachd, agus anns an t-Sultain 2014 lean e an t-slighe sin le bhith a' tòiseachadh air cùrsa ann an Sgoil Dhiadhaireachd Dhùn Èideann.

Chaidh Mgr Moireach a phòsadh ri coitheanal Eaglais Shaor Cheann a' Loch ann an 2017.

Tha Pòl pòsta aig Amanda a bhuineas dhan an t-Òb sna Hearadh agus tha ceathrar a theaghlach aca. Nuair a gheibh e ùine dha fhèin, 's caomh le Pòl a bhith a' leughadh agus a' cur seachad nas urrainn dha de dh'ùine còmhla ri theaghlach.