لائیو , آؤٹ لک، ٹیمز، کو پائلٹ سمیت مائیکروسافٹ کی متعدد سروسز میں خلل، بحالی میں توقع سے زیادہ وقت لگ رہا ہے: مائیکروسافٹ

لائیو کوریج

1. 12 منٹ قبلپاسداران انقلاب کا بحرین میں امریکی ریڈار کو نشانہ بنانے کا دعویٰ

   پاسداران انقلاب نے جمعہ کی صبح ایک بیان میں دعویٰ کیا ہے کہ اس نے سرک پر آدھی رات کو کیے جانے والے امریکی فضائی حملے کے جواب میں بحرین میں امریکی افواج کے ’ ارلی وارننگ ریڈار‘ کو نشانہ بنا کر تباہ کر دیا ہے۔

   ایران کی سرکاری خبر رساں ایجنسیوں نے پاسداران انقلاب کے بیان کا حوالہ دیتے ہوئے کہا ہے کہ ’یہ دشمن کے لیے ایک سنگین انتباہ ہے کہ وہ آبنائے ہرمز میں اپنے فضائی حملوں اور تیل کی سمگلنگ کو ختم کر دے۔‘

   پاسداران انقلاب نے بیان میں دعویٰ کیا کہ ’بار بار خلاف ورزیوں اور جارحیت کی صورت میں ایرو سپیس فورس ایک سرحدی تصادم کے لیے پوری طرح چوکس ہے۔ خلاف ورزی کرنے والی کمپنیوں کو دشمن کی سنگین کارروائیوں کا سامنا کرنا پڑے گا۔‘

   اس اعلان سے کچھ دیر قبل ایرانی خبر رساں اداروں نے سرک پر فضائی حملے کی اطلاع دی تھی جس کی پاسداران انقلاب نے تصدیق کرتے ہوئے کہا تھا کہ حملوں کے دوران خلیج فارس کے ساحل سے دور علاقے میں ٹیلی کمیونیکیشن ٹاور کو نشانہ بنایا گیا تھا۔

2. 26 منٹ قبلمائیکروسافٹ سروسز میں خلل سائبر اٹیک نہیں، آسٹریلوی وزیر کا دعویٰ

   آسٹریلیا کے وزیرِ برائے داخلہ اور سائبر سیکیورٹی امور ٹونی برک کا کہنا ہے کہ انھوں نے ملک میں مائیکروسافٹ کے حکام سے بات کی ہے، جن کا ماننا ہے کہ وہ کسی سائبر حملے کا شکار نہیں ہیں۔

   ٹونی برک نے صحافیوں سے گفتگو کرتے ہوئے بتایا کہ ’ان کا خیال ہے کہ وہ کسی حد تک اسی طرح کی صورتحال سے نمٹ رہے ہیں جیسی ہم نے ماضی میں 'کراؤڈ سٹرائیک' (CrowdStrike) کے معاملے میں دیکھی تھی، جہاں ایک سافٹ ویئر اپ ڈیٹ میں خرابی پیدا ہو گئی تھی۔‘برک کے مطابق، موجودہ بندش (آؤٹ ایج) کا سب سے زیادہ اثر ای میل سسٹمز پر پڑا ہے۔

   انھوں نے مزید کہا کہ ’کراؤڈ سٹرائیک کے واقعے میں ہم نے دیکھا تھا کہ اس کے بعد کئی دیگر مصنوعات کی کارکردگی بھی متاثر ہوئی تھی اور اس کے دور رس اثرات سامنے آئے تھے۔‘

   واضح رہے کہ جولائی 2024 میں امریکی سائبر سیکیورٹی کمپنی کراؤڈ اسٹرائیک کی جانب سے جاری کردہ ایک خامی سے بھرپور سافٹ ویئر اپ ڈیٹ کے نتیجے میں دنیا بھر میں کروڑوں افراد متاثر ہوئے تھے، جس نے ونڈوز آپریٹنگ سسٹمز پر چلنے والے کمپیوٹرز کو فریز کر دیا تھا۔

3. 38 منٹ قبلبی بی سی نیوز اُردو اب موبائل ایپ پر بھی دستیاب، ابھی ڈاؤن لوڈ کیجیے

   بی بی سی اُردونے اپنی نئی ایپ لانچ کر دی ہے، جس کے ذریعے اب صارفین اپنی دلچسپی کی تمام علاقائی و عالمی خبریں، تجزیے اور معلومات براہ راست اپنے موبائل فون یا ٹیبلٹ پر حاصل کر سکیں گے۔

   بی بی سی اُردو کا تمام مواد بی بی سی ورلڈ سروس کی نئی ایپ پر دستیاب ہو گا جسے آپ اپنے موبائل فون یا ٹیبلٹ کی مناسبت سے ایپ سٹور یا گوگل پلے سے ڈاؤن لوڈ کر سکتے ہیں۔

   نئی ایپ کیسے ڈاؤن لوڈ کی جائے؟

   گوگل پلے سٹور سے اینڈروئڈ ڈیوائسزکے لیے بی بی سی ایپ ڈاؤن لوڈ کرنے کے لیے یہاں کلک کریں

   ایپ سٹور سے آئی فون اور آئی پیڈ کے لیے بی بی سی ایپ ڈاؤن لوڈ کرنے کے لیے یہاں کلک کریں

4. 41 منٹ قبلسروسز میں خلل دور کرنے میں توقع کے خلاف وقت لگ رہا ہے: مائیکرو سافٹ

   مائیکروسافٹ نے اپنی تازہ ترین اپ ڈیٹ میں کہا ہے کہ اس کے پلیٹ فارم کی خدمات کو بہتر بنانے اور بندش کو ٹھیک کرنے کے لیے کام جاری ہے تاہم اس میں توقع کے خلاف وقت لگ رہا ہے۔

   کمپنی کے بیان کے مطابق ’فرم اس مسئلے کو حل کرنے کے دوسرے طریقوں کی جانچ کر رہی ہے تاکہ زیادہ سے زیادہ صارفین کو اپنے سسٹمز کو اوور لوڈ کیے بغیر اس کے پلیٹ فارم پر جانے کی اجازت دی جا سکے۔‘

   یاد رہے کہ مائیکرو سافٹ نے اس نے قبل متنبہ کیا تھا کہ جو خدمات بحال ہو چکی ہیں وہ ٹریفک موصول ہونے کے بعد دوبارہ غیر فعال ہو سکتی ہیں۔

5. ایک گھنٹہ قبلآؤٹ لک، ٹیمز کو پائلٹ سمیت مائیکروسافٹ کی متعدد سروسز میں خلل، بحالی کے لیے تیزی سے کام کر رہے ہیں: مائیکروسافٹ

   مائیکروسافٹ کی آؤٹ لک، ٹیمز اور کو پائلٹ سمیت مائیکرو سافٹ کی متعدد سروسز میں خلل کے بعد کمپنی کی جانب سے کہا گیا ہے کہ وہ عالمی بندش کے اثرات کو محدود کرنے کے لیے تمام ممکنہ طریقے تلاش کرنے کے لیے مسلسل کوشاں ہے۔

   یاد رہے کہ جمعے کے روز دن کے آغاز سے لے کر اب تک لگ بھگ پانچ گھنٹے سے زائد مائیکرو سافٹ سروسز پاکستان سمیت دنیا کے متعدد ممالک میں متاثر ہیں۔

   ٹیکنالوجی کمپنی نے ایکس پر اعلان کیا ہے کہ اس کا بنیادی ڈھانچہ اس وقت بڑھتے ہوئے دباؤ کے زیر اثر ہے۔

   مائیکروسافٹ کا کہنا ہے کہ وہ اپنی ایپز کی عالمی سطح پر ہونے والی بندش کو حل کرنے کے لیے تیزی سے کام کر رہا ہے۔ایکس پر اپنی تازہ ترین اپ ڈیٹ می انھوں نے کہا کہ اس کی ٹیم متاثرہ سسٹمز کو دوبارہ شروع کرنے کی کوششوں میں مثبِت نتائج دیکھ رہی ہے اور ان کی کارکردگی کا فعال طور پر جائزہ لے رہی ہے۔

   کمپنی نے اس سے پہلے کہا تھا کہ کچھ سروسز زیادہ ٹریفک آنے پر دوبارہ غیر فعال ہو سکتی ہیں اور وہ یہ چیک کر رہی ہے کہ اس مسئلے کی وجہ کیا ہے۔

   مائیکروسافٹ نے بتایا کہ وہ ’اس بگ کو ٹھیک کرنے کے لیے اب بھی کام کر رہا ہے۔‘

   کمپنی کے مطابق اس کی کچھ سروسز مختصر طور پر دوبارہ بحالی کے بعد دوبارہ کام کرنا بند کر سکتی ہیں۔الیکٹرانک سروسز کی بندش کی نگرانی کرنے والی ویب سائٹ 'ڈاؤن ڈیٹیکٹر' (DownDetector) کے مطابق، جمعرات کی شام تقریباً 18:00 جی ایم ٹی پر آؤٹ لک سروس کے مسائل سے متعلق عالمی سطح پر موصول ہونے والی رپورٹس کی تعداد 138,058 تک پہنچ گئی تھی۔

   اگرچہ یہ مسئلہ ابتدائی طور پر امریکہ میں رپورٹ کیا گیا تھا، تاہم مائیکروسافٹ کا کہنا ہے کہ کنیکٹیویٹی کے یہ مسائل دنیا کے کسی بھی خطے میں صارفین کو متاثر کر سکتے ہیں۔

   مائیکروسافٹ نے وضاحت کی کہ اس کی تحقیقات سے یہ بات سامنے آئی ہے کہ ’انفرسٹرکچر پر بڑھتا ہوا دباؤ ڈیٹا ٹریفک میں اضافے کی وجہ سے نہیں بلکہ بہت سے سرورز کے غیر متوقع طور پر کام بند کر دینے کی وجہ سے ہے۔‘

   بیان میں مزید کہا گیا کہ ’ہماری تحقیقات سے یہ سامنے آیا کہ متاثرہ سرورز پر ایک بنیادی عمل بہت زیادہ دباؤ میں ہے، جو سرورز کے جواب دینا بند کرنے اور سروس کی صلاحیت میں کمی کا سبب بن رہا ہے۔‘

6. ایک گھنٹہ قبلحوثیوں کا سعودی عرب میں تیل کی تنصیبات اور فوجی مقامات کو نشانہ بنانے کا دعویٰ

   یمن میں حوثیوں کی جانب سے سعودی عرب کے اندر تیل کی تنصیبات اور فوجی مقامات کو نشانہ بنانے کا دعویٰ کیا گیا ہے۔

   انصار اللہ گروپ کے فوجی ترجمان، یحییٰ ساری نے جمعرات کے روز جاری بیان میں کہا کہ گروپ کی فورسز نے سعودی ’ایسٹ ویسٹ‘ تیل کی پائپ لائن پر ایک ڈرون کے ذریعے پمپنگ سٹیشن نمبر سات اور بحیرہ احمر میں یانبو میں تیل کی تنصیب کو بیلسٹک میزائل سے نشانہ بنایا ہے۔

   ایک علیحدہ بیان میں انھوں نے دعویٰ کیا کہ ایک ڈرون نے ریاض میں آرامکو کی ایک تنصیب کو نشانہ بنایا، یہ دعویٰ کیا کہ حملہ اس کے ہدف کو نشانہ بنا۔

   دوسری جانب سعودی زیرقیادت اتحاد کے ترجمان ترکی المالکی نے ریاض اور مشرقی علاقوں میں دو ڈرونوں کو روکنے اور تباہ کرنے کا اعلان کیا ہے تاہم اس کی مزید تفصیلات تاحال جاری نہیں کی گئیں۔

7. ایک گھنٹہ قبلاقوام متحدہ نے یمن سے متعلق پابندیوں میں ایک سال کی توسیع کر دی

   اقوام متحدہ کی سلامتی کونسل نے متفقہ طور پر ایک قرارداد منظور کرتے ہوئے یمن سے متعلق پابندیوں میں ایک سال کی توسیع کر دی ہے۔ اجلاس میں سعودی عرب پر حوثی گروپ کے حملوں کی شدید مذمت بھی کی گئی ہے۔

   جمعرات کو منظور کی جانے والی اس قرارداد کے تحت، پابندیوں کی زد میں شامل افراد اور اداروں کے اثاثے منجمد کرنے اور سفری پابندیوں کے اقدامات کو 14 نومبر 2027 تک بڑھا دیا گیا ہے۔

   سلامتی کونسل نے یمن سے متعلق ماہرین کے پینل کے مینڈیٹ میں بھی رواں سال دسمبر تک توسیع کر دی گئی ہے۔سلامتی کونسل نے حوثیوں پر زور دیا ہے کہ وہ فوری اور غیر مشروط طور پر اپنی فوجی کارروائیاں بند کریں؛ جن میں عام شہریوں، شہری تنصیبات، تجارتی ہوائی اڈوں اور بین الاقوامی بحری گزرگاہوں کو نشانہ بنانا شامل ہے۔

   اقوام متحدہ میں برطانیہ کی مستقل مندوب، سارہ میکنٹوش نے کہا کہ یہ قرارداد یمن اور خطے میں حوثی حملوں کے خلاف کونسل کے عزم کا مظہر ہے۔ انھوں نے مزید کہا کہ اس فیصلے سے اسلحے کی پابندی مزید مؤثر ہوگی، بالخصوص ہتھیاروں کی تیاری میں استعمال ہونے والے خام کیمیکلز اور دیگر اشیاء پر کڑی نظر رکھی جائے گی، جن کی فہرست آنے والے مہینوں میں تیار کی جائے گی۔

   بی بی سی عربی کے مطابق بین الاقوامی طور پر تسلیم شدہ یمنی حکومت نے اس فیصلے کا خیرمقدم کیا ہے؛ تاہم حوثیوں کو باضابطہ طور پر دہشت گرد گروپ کے طور پر نامزد نہیں کرنے پر افسوس کا اظہار کیا ہے۔

8. 2 گھنٹے قبلمتحدہ عرب امارات: فجیرہ میں ٹریفک حادثے میں 14 افراد ہلاک, حفصہ خلیل

   متحدہ عرب امارات کی وزارت داخلہ کا کہنا ہے کہ فجیرہ میں ایک ٹرک کے کئی گاڑیوں کے ساتھ تصادم کے نتیجے میں 14 افراد ہلاک اور متعدد لوگ زخمی ہوئے ہیں۔

   وزارت داخلہ کے مطابق ایک ٹرک ڈرائیور اپنے ٹرک پر سے کنٹرول کھو بیٹھا تھا۔

   وزارت کی جانب سے جاری بیان میں مزید کہا گیا ہے کہ اس حادثے کی زد میں پانچ ٹرکوں سمیت 23 گاڑیاں آئیں اور یہ حادثہ اس وقت پیش آیا جب رات 12 بجے سے قبل ’ٹریفک سست رفتار‘ سے آگے بڑھ رہا تھا۔

   بیان میں مزید کہا گیا ہے کہ تصادم کے بعد ’ٹرک میں آگ لگ گئی جو کہ دیگر گاڑیوں تک بھی پھیلی، جس کے نتیجے میں بھاری جانی نقصان ہوا۔‘

   فجیرہ پولیس کے مطابق اس واقعے کے بعد 30 افراد کو ہسپتال منتقل کیا گیا ہے، جبکہ ہلاک ہونے والے افراد کی شناخت معلوم کرنے کے لیے ڈی این اے ٹیسٹ کیے جا رہے ہیں۔

   پولیس کے مطابق ہلاک ہونے والے کچھ افراد اماراتی شہری ہیں۔

   دوسری جانب متحدہ عرب امارات میں انڈین قونصل خانے کا کہنا ہے کہ ہلاک ہونے والوں میں اس کے شہری بھی شامل ہیں اور اس نے ’غمزدہ خاندانوں‘ سے رابطہ کیا ہے اور وہ مقامی حکام کے ساتھ مل کر انھیں مدد فراہم کر رہا ہے۔

   حکام کا کہنا ہے کہ قابو سے باہر ہونے والا ٹرک اُلٹنے سے قبل پہلے ایک گاڑی سے ٹکرایا اورپھر ان گاڑیوں سے بھی جو ’ٹریفک کی سست رفتار‘ کے سبب سڑک پر رُکی ہوئی تھیں۔

   حادثے کے بعد پولیس، طبی اور شہری دفاع کی ٹیمیں موقع پر پہنچیں، آگ بجھائی، زخمیوں کو ہسپتال منتقل کیا اور سڑک کو محفوظ بنایا۔ اب بھی وہاں ماہرین کی ٹیمیں موجود ہیں۔

   پولیس اور وزارت داخلہ دونوں نے ہی ہلاک ہونے والے خاندانوں سے تعزیت کا اظہار کیا ہے اور زخمی ہونے والوں کی جلد صحتیابی کے لیے دعا کی ہے۔

   زخمی ہونے والوں میں سے آدھی تعداد کو طبی مدد دینے کے بعد گھر بھیج دیا گیا ہے، جبکہ باقی افراد تاحال زیر علاج ہیں۔

   حکام کے مطابق زخمی ہونے والوں میں اماراتی، عمانی، انڈین، برازیلین، پاکستانی، اردنی اور مصری شہری شامل ہیں۔

9. 2 گھنٹے قبلامریکہ کو ایران کے ساتھ کسی معاہدے کی ضرورت نہیں: صدر ڈونلڈ ٹرمپ

   امریکہ کے صدر ڈونلڈ ٹرمپ کا کہنا ہے کہ کہا ہے کہ امریکہ کو ایران کے ساتھ معاہدے کی ضرورت نہیں۔ ان کا مزید کہنا ہے کہ انھوں نے نائب صدر جے ڈی وینس کو ڈیموکریٹ ریاستوں میں ہونے والی ’وسیع پیمانے پر بدعنوانی‘ پر توجہ مرکوز کرنے کی ہدایت کی ہے۔

   جمعرات کے روز اپنے سوشل میڈیا نیٹ ورک ’ٹروتھ سوشل‘ پر جاری ایک پیغام میں صدر ٹرمپ کا کہنا ہے کہ انھوں نے جے ڈی وینس کو ہدایت کی ہے کہ وہ امریکہ بھر میں ڈیموکریٹک پارٹی کے زیرِ انتظام شہروں اور ریاستوں میں ہونے والی ’وسیع پیمانے پر بدعنوانی اور جرائم‘ پر اپنی مکمل توجہ مرکوز کریں۔

   ٹرمپ نے دعویٰ کیا کہ مینیسوٹا، کیلیفورنیا اور الینوائے جیسی ناقص انداز میں چلائی جا رہی ہیں اور بدعنوانی کا شکار ہیں۔ ان کے بقول ہر ماہ اربوں ڈالر چرائے جا رہے ہیں۔

   انھوں نے دعویٰ کیا کہ اگر اس بڑے پیمانے کی مجرمانہ سرگرمی کا خاتمہ کر دیا جائے تو امریکہ کا بجٹ تیزی سے متوازن کیا جا سکتا ہے۔

   انھوں نے الزام لگایا کہ ’بدعنوانی ڈیموکریٹک قیادت کے خون میں شامل ہے۔‘

   ایران کے متعلق بات کرتے ہوئے انھوں نے کہا کہ ’ہمیں ایران کے ساتھ کسی معاہدے کی ضرورت نہیں۔ وہ دن بہت پہلے گزر چکے ہیں۔ ہمارے پاس ان کا پیسہ ہے، سیکڑوں ارب ڈالر، اور ہمارے پاس ان کی آبنائے ہرمز بھی ہے۔‘

10. 2 گھنٹے قبلاہم خبروں کا خلاصہ

    بی بی سی اردو کا لائیو کوریج کا سلسلہ جاری ہے تاہم جمعے کے روز خبروں کا سلسلہ آگے بڑھانے سے قبل ایک نظر گزشتہ روز کی اہم خبروں کے نکات پر ڈال لیتے ہیں۔

    • پاکستانی فوج کے ترجمان لیفٹیننٹ جنرل احمد شریف چوہدری نے کہا ہے کہ سعودی عرب کی سلامتی، خودمختاری اور علاقائی سالمیت کے لیے پاکستان کا عزم ’غیر متزلزل اور ناقابلِ سمجھوتہ‘ ہے۔ عرب اخبار الشرق الاوسط کو دیے گئے ایک انٹرویو میں انھوں نے کہا کہ مکہ مشترکہ دفاعی اتحاد کی مشترکہ دفاعی ذمہ داریوں کو عملی شکل دینے کے لیے ایسے اقدامات کیے جا رہے ہیں جن سے ضرورت پڑنے پر سعودی عرب میں متفقہ فوجی دستوں اور دفاعی صلاحیتوں کی فوری تعیناتی ممکن ہو سکے۔
    • ایران کی پاسدارانِ انقلاب کی بحریہ نے کہا ہے کہ آبنائے ہرمز کے جنوبی حصے سے گزرنے والے دو آئل ٹینکر گذشتہ رات ایک شدید دھماکے کے بعد رک گئے۔ پاسداران انقلاب کے شعبۂ تعلقاتِ عامہ کے مطابق دونوں جہاز سپر ٹینکر تھے اور ان میں مجموعی طور پر 40 لاکھ بیرل سے زیادہ خام تیل موجود تھا۔
    • ترکی کے صدر رجب طیب اردوغان نے جمعرات کو اپنے ایرانی ہم منصب مسعود پزشکیان سے ملاقات کے بعد کہا ہے کہ امریکہ اور ایران کے درمیان جنگ کے خاتمے کے لیے مذاکرات ’بنا کسی تاخیر کے‘ دوبارہ شروع ہونے چاہییں۔
    • امریکی ٹیکنالوجی کمپنی اینویڈیا کا کہنا ہے کہ کمپنی کے شریک بانی جینسن ہوانگ نے اپنی تمام قیادتی ذمہ داریوں سے استعفیٰ دے دیا ہے۔ یاد رہے کہ جینسن ہوانگ پر الزام تھا کہ ان کا ایک مبینہ چینی جاسوس ایلس ہوانگ کے ساتھ تعلق تھا۔ بعد ازاں ایسی خبریں سامنے آئیں جن میں دعویٰ کیا گیا کہ جینسن ہوانگ کا کمپنی کی ایک عہدیدار سے بھی تعلق تھا۔
    • بلوچستان کے ضلع مستونگ میں سرکاری حکام نے سکیورٹی فورسز کے ایک کیمپ پر خودکش حملے کو ناکام بنانے کا دعویٰ کیا ہے۔
    • پاکستان کی مقامی صرافہ مارکیٹ میں جمعرات کے روز سونے کی فی تولہ قیمت میں 10 ہزار 900 روپے کی کمی ریکارڈ کی گئی، جس کی وجہ عالمی مارکیٹ میں سونے کی قیمتوں میں کمی ہے۔
    • گلگت بلتستان کے ضلع غذر سے وادی یاسین جانے والی ایک مسافر ہائی ایس دریائے آباسین میں گرنے کے نتیجے میں ہونے والی ہلاکتوں کی تعداد 11 ہو گئی ہے۔
    • امریکی حکام کے مطابق نیویارک سٹی میں ایک عمارت کھلے تعمیراتی مقام پر گرنے سے کم از کم دو افراد ہلاک اور 17 سے زائد زخمی ہو گئے ہیں۔ واقعے کے بعد بڑے پیمانے پر تلاش اور امدادی کارروائی شروع کر دی گئیں۔

11. 2 گھنٹے قبلبی بی سی اردو کے نئے لائیو پیج میں خوش آمدید

    بی بی سی اردو کے نئے لائیو پیج میں خوش آمدید۔

    یہاں آپ کے لیے پاکستان سمیت دنیا بھر سے اہم خبریں اور تجزیے پیش کیے جاتے ہیں۔ اگر آپ 12 اکتوبر کی خبروں کو پڑھنا چاہیں تو اس لنک پر کلک کریں۔