ኢራን ግጭቱ የሚቆመው “በድርድር ብቻ” እንደሆነ ገለጸች

የቀጥታ ሽፋን

1. 24 መስከረም 2026የሰሜን ኢትዮጵያው ግጭት መቀስቀሱ በተገለፀ ማግስት ጠቅላይ ሚኒስትር ዐቢይ ወደ ጂቡቲ አቀኑ

   

   የፎቶው ባለመብት, Office of the Prime Minister-Ethiopia

   ጠቅላይ ሚኒስትር ዐቢይ አሕመድ ዛሬ ወደ ጂቡቲ ማምራታቸውን ጽሕፈት ቤታቸው አስታወቀ።

   የጠቅላይ ሚኒስትሩ ጽሕፈት ቤት በማኅበራዊ የትስስር ገፁ ከፎቶግራፎች ጋር ባጋራው አጭር መረጃ፣ ጠቅላይ ሚኒስትሩ ወደ ጅቡቲ ያመሩት ለይፋዊ የሥራ ጉብኝት እንደሆነ ነው የገለፀው።

   ጠቅላይ ሚኒስትሩ ወደ ጂቡቲ መሄዳቸው የተገለፀው በኢትዮጵያ መንግሥት ኃይሎች እና በትግራይ ታጣቂዎች መካከል ግጭት እንደ አዲስ መቀስቀሱ በይፋ በተገለፀ ማግስት ነው።

   ጠቅላይ ሚኒስትሩ ጂቡቲ ሲደርሱ ፕሬዚዳንት ኢስማኤል ኦማር ጊሌ አቀባበል እንዳደረጉላቸው የጽሕፈት ቤታቸው መረጃ ያመለክታል።

   ሁለቱ መሪዎች በኢትዮጵያ እና በጅቡቲ መካከል ያለውን ኢኮኖሚያዊ ትስስር “ይበልጥ ለማጠናከር ያለመ የጋራ ፕሮጀክት ይፋ የሚሆንበትን መድረክ ይታደማሉ” ከማለት ውጭ ጽሕፈት ቤቱ ስለ ጉብኝቱ በዝርዝር አልገለፀም።

   ትናንት ረቡዕ መስከረም 13/2019 ዓ. ም. ማለዳ የትግራይ ኃይሎች መቀለ የሚገኘውን አውሮፕላን ማረፊያ መቆጣጠራቸው ከተገለጸ በኋላ በአፋር እና በአማራ ክልሎች በሚገኙ ቦታዎች ውጊያዎች መካሄዳቸው ተዘግቧል።

   ይሁን እንጂ ዳግም ስለተቀሰቀሰው ግጭት የፌዴራሉ መንግሥት እስካሁን በይፋ ያለው ነገር የለም።

2. 24 መስከረም 2026በትግራይ በረራ የተቋረጠባቸው አውሮፕላን ማረፊያዎች

   

   ለወራት በውጥረት ውስጥ የነበረው የፌደራል መንግሥቱ እና የህወሓት መሪዎች ግንኙነት ወደ ይፋዊ ጦርነት ማምራቱ ተዘግቧል።

   ከማክሰኞ ሌሊት ጀምሮ በተያዩ ቦታዎች ላይ በተወሰዱ እርምጃዎች እና ግጭቶች የተቀሰቀሰው ጦርነት እንዳሳሰባቸው የተለያዩ አገራት፣ አህጉራዊ ድርጅቶች እና ተቋማት እየገለጹ ነው።

   ትግራይ ክልል ከአማራ እና ከአፋር ክልሎች ጋር በሚዋሰንባቸው አካባቢዎች ግጭቶች መቀስቀሳቸውን የህወሓት መሪዎች፣ የጠቅላይ ሚኒስትሩ አማካሪ እና የአፋር ክልል አረጋግጠዋል።

   በተጨማሪም የትግራይ ኃይሎች በክልሉ ውስጥ የሚገኙ ዋነኛ የአውሮፕላን ማረፊያዎችን ተቆጣጥረዋል። በዚህም የመቀለ፣ የአክሱም እና የሽረ አውሮፕላን ማረፊያዎች ተዘግተው በረራዎች ተቋርጠዋል።

   እስካሁን የኢትዮጵያ መንግሥት ስለክስተቱ በይፋ ያለው ነገር ባይኖርም፣ ግጭቱ ዳግም ወደ ደም አፋሳሽ ጦርነት ሊሸጋገር ይችላል የሚል ስጋት ተፈጥሯል።

3. 24 መስከረም 2026ኦነግ የተመሠረተው ጥምረት ኦሮሚያን የጦር ሜዳ የሚያደርግ ነው አለ

   

   የኦሮሞ ነጻነት ግንባር በሰባት ታጣቂ ቡድኖች በቅርቡ መመሥረቱ የተገለጸው ጥምረት ኦሮሚያን የጦርነት ሜዳ የሚያደርግ ነው በማለት ተሳታፊዎች ውሳኔያቸውን እንዲያጤኑ ጥሪ አቅርቧል።

   በዳውድ ኢብሳ የሚመራው እና መቀመጫውን አዲስ አበባ ያደረገው የኦሮሞ ነጻነት ግንባር ባወጣው መገልጫ የኦሮሞ ነጻነት ሠራዊት (ኦነሠ) ተሳታፊ የሆነበትን ጥምረት ከመቃወሙ በተጨማሪ በዋናነት መንግሥት ኦሮሚያ ውስጥ ሀቀኛ ድርድር እንዲጀምር ጥሪ አቅርቧል።

   ኦነግ በመግለጫው "ጽምዶ" እና "ሰሜናዊ ጥምረት" በማለት የጠራው እንቅስቃሴ ዓላማው "ኦሮሚያን የጦርነት ሜዳ ማድረግ እና ኦሮሚያን በመቆጣጠር ሀብቷን ለመቀራመት ነው" በማለት ከስሷል።

   ኦነግ በመግለጫው የጠቀሰው በቅርቡ የተመሠረተውን የታጣቂ ቡድኖችን ጥምረት ስለመሆኑ በግልጽ ባያስቀምጥም ያቀረበው ክስ እና ጥሪ ትኩረቱ ጥምረቱ ላይ መሆኑን ያመለክታል።

   ጥምረቱን ከፈጠሩት ታጣቂ ቡድኖች መካከል አንዱ የሆነው እና በኦሮሚያ ክልል ውስጥ የትጥቅ እንቅስቃሴ እያደረገ ላለው ኦነሠ የሚመስል ጥሪም አቅርቧል።

   "ለኦሮሞ ሕዝብ እታገላለሁ እያሉ ከታሪካዊ ወራሪዎቻችን እና ጨቋኞች ጋር የቆሙ ታሪክ ፈጽሞ የማይረሳው ስህተት እየፈጸሙ በመሆናቸው መንገዳቸውን መለስ ብለው እንዲቃኙ" አሳስቧል።

   ጨምሮም ኦነግ የኦሮሞ ሕዝብ የፖለቲካ ልዩነት ሳያግደው የሌሎችን መብቶች ሳይጥስ ግዛቱን ለመከላከል በአንድነት እንዲቆምም ጥሪ አድርጓል።

   እንዲሁም የኦሮሚያ ብሔራዊ ክልላዊ መንግሥት እና የኦሮሞ ፖለቲካ ፓርቲዎች የሕዝቡን መብት አደጋ ላይ በማይጥል ሁኔታ በአንድነት እንዲቆሙ አሳስቧል።

   በማጠቃለያው ላይም ጦርነት እና ወታደራዊ እርምጃ ዘላቂ መፍትሄ እንደማያመጣ በመጥቀስ ብቸኛው መፍትሄ ድርድር መሆኑን አመልክቷል።

4. 24 መስከረም 2026የአውሮፓ ኅብረት በሰሜን ኢትዮጵያ ያለው ውጥረት በአስቸኳይ እንዲረግብ ጥሪ አቀረበ

   

   የፎቶው ባለመብት, THE EUROPEAN PARLIAMENT

   በሰሜን ኢትዮጵያ በፍጥነት እየተባባሰ ያለው ሁኔታ እና ይህ ሁኔታ በሕዝቡ ላይ እያሳደረ ያለው ተጽዕኖ በጥልቅ እንደሚያሳስበው የአውሮፓ ኅብረት ገለፀ።

   በበርካታ አካባቢዎች ወታደራዊ እንቅስቃሴ ስለመኖራቸው የሚወጡ ዘገባዎች፣ እንዲሁም በትግራይ የሚገኙትን የመቀለ፣ የአክሱም እና የሽረ አየር ማረፊያዎች የህወሓት ኃይሎች መቆጣጠራቸውም አሳስቦኛል ሲል ኅብረቱ ባወጣው መግለጫ አስታውቋል።

   ባለፉት ሳምንታትም በኢትዮጵያ መከላከያ ሠራዊት የተፈጸሙ በርካታ የድሮን ጥቃቶችን በስጋት ሲከታተል እንደቆየም ጠቅሷል።

   “ውጥረቱን በአስቸኳይ ማርገብ ያስፈልጋል” ያለው የአውሮፓ ኅብረት፣ ሁለቱም አካላት ግጭትን በዘላቂነት ለማቆም ለተደረሰው ስምምነት ዳግም ቁርጠኝነታቸውን እንዲያሳዩ ጠይቋል። ለዚህም “ጊዜው አልረፈደም” ብሏል።

   ልዩነቶች ሊፈቱ የሚችሉት በውይይት ብቻ እንጂ በወታደራዊ እርምጃ እንዳልሆነም ገልጿል።

   የሲቪሎችን ደኅንነት መጠበቅን እና የሰብዓዊ ድጋፍ ሥራዎችን ገለልተኝነትና ነፃነት ማክበርን ጨምሮ የግጭቱ ተሳታፊዎች ዓለም አቀፍ የሰብዓዊነት ሕግን እንዲያከብሩ ኅብረቱ አሳስቧል።

   የአውሮፓ ኅብረት በዚሁ መግለጫው፣ በሰብዓዊ ድጋፍ መኪኖች ላይ የሚደርሱጥቃቶችን እና የሰብዓዊ ድጋፍ ተደራሽነትን የሚከለክል ማንኛውንም እርምጃ በጽኑ እንደሚያወግዝ አስታውቋል።

   ኅብረቱ ውጥረትን ለማርገብ የሚደረጉ ጥረቶችን፣ በአፍሪካ ኅብረት የሚመራውን የሽምግልና ሂደት እና ትርጉም ያለው ውይይትን ለመደገፍ ያለውን ቁርጠኝነት አረጋግጧል።

5. 24 መስከረም 2026ኢጋድ በሰሜን ኢትዮጵያ የተነሳው ግጭት እንዲገታ አሳሰበ

   

   የፎቶው ባለመብት, IGAD

   የምሥራቅ አፍሪካ የልማት በይነ መንግሥታት ባለሥልጣን (ኢጋድ) በሰሜን ኢትዮጵያ ያለው ውጥረት መባባሱ “እጅግ እንዳሳሰበው” አስታወቀ።

   እንደ አዲስ የተቀሰቀሰው ግጭት፣ የአውሮፕላን ማረፊያዎች በቁጥጥር ሥር መዋል እና የአየር ትራንስፖርት አግልግሎት መቋረጥ እንዳሰጋው ኢጋድ በድረ ገጹ ባወጣው መግለጫ አትቷል።

   ሁሉም ወገኖች “ግጭቱን እንዲያቆሙ እንዲሁም ውጥረቱን ከሚያባብሱ፣ የንጹኃንን ሕይወት ለአደጋ ከሚያጋልጡ እና የሰላም ጥረትን ከሚያሰናክሉ ድርጊቶች እንዲቆጠቡ” ጠይቋል።

   የፕሪቶሪያ ስምምነት “ችግሮችን ለመፍታት እንዲውል” እና በስምምነቱ የተቀመጡት ግዴታዎች “ሙሉ በሙሉ እንዲከበሩ” ኢጋድ በመግለጫው አሳስቧል።

   ተዋጊዎቹ ሳይዘገይ ወደ ቀጥተኛ ውይይት እንዲመለሱ እና ጎረቤት አገራትም ግጭቱን ከማባባስ እንዲቆጠቡ ጠይቋል።

   በአፍሪካ ኅብረት አሸማጋይነት የተደረሰው የፕሪቶሪያ ስምምነት እንዲከበር የጠየቀው ኢጋድ “መጠነ ሰፊ ግጭት በኢትዮጵያ እና በቀጣናው የከፋ መዘዝ ያስከትላል” ሲልም አሳስቧል።

6. 24 መስከረም 2026የኢራን ፕሬዝዳንት አገራችው “እንደማትንበረከክ” በተመድ ጉባዔ ላይ ተናገሩ

   

   የፎቶው ባለመብት, EPA

   የኢራኑ ፕሬዝዳንት ማሱድ ፔዤሽኪያን በተባበሩት መንግሥታት ጠቅላላ ጉባዔ ላይ ባደረጉት ንግግር አገራቸው “እንደማትንበረከክ” ተናገሩ።

   የአሜሪካው ፕሬዝዳንት ዶናልድ ትራምፕ በጉባዔው ላይ ባደረጉት ንግግር ኢራንን “ለማጥፋት” መዛታቸውን ተከትሎ የኢራኑ ፕሬዝዳንት በሰጡት ምላሽ ነው ይህንን የተናገሩት።

   አሜሪካ እና እስራኤል በኢራን ላይ ጦርነት ከከፈቱ ሰባት ወራት ተቆጥረዋል።

   የኢራኑ ፕሬዝዳንት አገራቸው አሁንም ለዲፕሎማሲያዊ ንግግር ዝግጁ መሆኗን ገልጸዋል።

   ለትራምፕ ዛቻ በሰጡት ምላሽም “ማዕቀቦች ሲጣሉ፣ ጫናው ሲበረታ እና ግብዝነቱ ሲባባስ ኢራናውያን የበለጠ ራሳቸውን ይከላከላሉ” ብለዋል።

   አሜሪካ በባሕረ ሰላጤው የሚያልፉ የኢራን መርከቦች ላይ የጣለችውን ክልከላ ስታነሳ ቴህራን ከስምምነት እንደምትደርስ ፕሬዝዳንቱ ጨምረው ገልጸዋል።

   “ሁሉም አካል ከሆርሙዝ ወሽመጥ እየተጠቀመ እኛ ብቻ ክልከላ ሊጣልብን አይችልም” ብለዋል።

   የኢራን ፕሬዝዳንት በተመድ ጠቅላላ ጉባዔ ላይ ንግግር ማድረግ ሲጀምሩ የአሜሪካ ልዑካን አዳራሹን ጥለው ወጥተዋል። እስካሁን ድረስ በፕሬዝዳንቱ ንግግር ላይ ከአሜሪካ በኩል አስተያየት አልተሰጠም።

   በኒው ዮርኩ ጉባዔ ላይ የኢራን ፕሬዝዳንት “የአሜሪካው ፕሬዝዳንት አሸባሪ ብሎናል፤ እኛ የሽብር ሰለባ ነን” ብለዋል።

7. 23 መስከረም 2026የኢራን ፕሬዝዳንት “ወራሪዎች እንዲጸጸቱ እናደርጋለን” ሲሉ በተመድ ጉባዔ ተናገሩ

   

   የፎቶው ባለመብት, UN TV Grab

   በተባበሩት መንግሥታት ጠቅላላ ጉባዔ ላይ ንግግር ያደረጉት የኢራን ፕሬዝዳንት ማሱድ ፔዤሽኪያን የአገራቸው ፍላጎት የኒውክሌር የጦር መሣሪያ መገንባት እንዳልሆነ ገልጸው፤ የኒውክሌር ሳይንስ እና ሰላማዊ ቴክኖሎጂ የማበልጸግ እንቅስቃሴ ግን እንደማይገታ አስታውቀዋል።

   “ኢራን የኒውክሌር እውቀት በጥቂት አገራት ቁጥጥር ሥር መሆኑን አትቀበልም” ብለዋል።

   ኢራን የባሕር ላይ ደኅንነት ጥበቃን “ማንም እንዲነጥቃት እንደማትፈቅድም” በንግግራቸው ጠቅሰዋል።

   ጨምረውም “ራሳችንን ለመከላከል ከሆነ ጦርነት አንፈራም። የሰላም ድርድርም ገሸሽ አናደርግም” ብለዋል።

   ፕሬዝዳንቱ “ኃይል የምንፈልገው ራሳችንን ለመከላከል እንጂ ሌሎች አገራትን ለመውረር አይደለም” ሲሉም ተናግረዋል።

   “አቶሚክ ቦምቡ ያለው እስራኤል ነው፤ መርማሪዎቹ ግን ኢራን መጥተዋል” በማለትም በጉባዔው ላይ ንግግራቸውን አሰምተዋል።

   አክለውም “እስራኤል ትገድላለች፤ ማዕቀብ የሚጣለው ግን በኢራን ላይ ነው” ሲሉ ተችተዋል።

   የአሜሪካው ፕሬዝዳንት ዶናልድ ትራምፕ በጉባዔው ላይ ኢራንን “ለማጥፋት” መዛታቸው ይታወሳል።

   የኢራኑ ፕሬዝዳንት “ይሄ በኃይል ጫና የማሳደር ምልክት ነው” ሲሉ ምላሽ ሰጥተዋል።

   አገራቸው ላይ ጫና ለማሳደር ቢሞከርም “ኢራን ወራሪዎቿ እንዲጸጸቱ ታደርጋለች” በማለት ዝተዋል።

   በመካከለኛው ምሥራቅ ያለውን ሁኔታ በተመለከተም “የትኛውም አገር ብቻውን ደኅንነቱ የተጠበቀ አይሆንም። ደኅንነት የምንገነቫው በጋራ ነው፤ ደኅንነት ስናጣ የምንጋፈጠውም አብረን ነው” ብለዋል።

8. 23 መስከረም 2026በደቡብ አፍሪካ በመኖሪያ ቤት ላይ በተከፈተ ተኩስ 11 ሰዎች ተገደሉ

   

   የፎቶው ባለመብት, SAPS

   በደቡብ አፍሪካ ደርባን ከተማ አቅራቢያ በመኖሪያ ሕንፃ ላይ በተከፈተ ተኩስ ቢያንስ 11 ሰዎች ተገደሉ።

   ማክሰኞ ምሽት ላይ መሣሪያ የታጠቁ ሰዎች በመኖሪያ ሕንጻው ላይ ከበባ በመፈፀም ነበር በ14 ሰዎች ላይ ተኩስ የከፈቱት። በዚህም 10 ሰዎች ወዲያውኑ ሲሞቱ አራቱ ወደ ሆስፒታል ከተወሰዱ በኋላ ሕይወታቸው ማለፉን ፖሊስ ገልጿል።

   ከሟቾቹ መካከል ነፍሰ ጡር ሴት እንደምትገኝበት ተገልጿል።

   የጥቃቱ ዓላማ ምን እንደሆነ እስካሁን አልታወቀም።

   አሁን ላይ ባለው መረጃ 13 ወንዶች እና ነፍሰ ጡር እንደሆነች የተገለጸ አንዲት ሴት በቤቱ ውስጥ በዝግጅት ላይ እየተዝናኑ ባሉበት ወቅት ሦስት ግለሰቦች ቦታው በመድረስ ተኩስ መክፈታቸውን ፖሊስ በመግለጫው አመልክቷል።

   በቦታው የነበረ የአካባቢው የቴሌቪዥን ጣቢያ የሆነው ኢኤንሲኤ ዘጋቢ ታጣቂዎቹ ከአካባቢው ከመሸሻቸው አስቀድሞ የተጎጂዎቹ ንብረት የሆነ ተሽከርካሪን በእሳት ማያያዛቸው ገልጿል።

   ፖሊስ ተጠርጣሪዎቹን እያደንኩ ነው ብሏል።

   ደቡብ አፍሪካ በዓለም ላይ ከፍተኛ ግድያ ከሚፈፀምባቸው አገራት አንዷ ነች። የፖሊስ መረጃ እንደሚያሳየውም በቀን ከ60 በላይ ሰዎች ይገደላሉ።

9. 23 መስከረም 2026አሜሪካ እና ኢራን ከወራት በኋላ ለመጀመሪያ ጊዜ “ ተስፋ ሰጭ” ውይይት ማድረጋቸው ተገለጸ

   

   የፎቶው ባለመብት, Getty Images

   የኢራን እና የአሜሪካ ከፍተኛ ባለሥልጣናት በኒው ዮርክ እየተካሄደ ባለው ጉባዔ ጎን ለጎን ተገናኝተው መወያየታቸው ተገለጸ።

   አገራቱ ከወራት በኋላ ለመጀመሪያ ጊዜ ንግግር ያደረጉት ፕሬዚደንት ትራምፕ ግጭቱ ካልተፈታ እስላማዊ ሪፐብሊኳን "እንደሚያጠፉ" በዛቱበት ተመሳሳይ ቀን ነው።

   የኢራን የውጭ ጉዳይ ሚኒስትር እና የአሜሪካው ፕሬዚደንት ዶናልድ ትራምፕ መልዕክተኛ ስቲቭ ዊትኮፍ የተኩስ አቁሙ ከፈረሰ በኋላ ለመጀመሪያ ጊዜ በተሳተፉበት እና በኳታር አሸማጋይነት በተደረገው ድርድር የተደረሰ ስምምነት ስለመኖሩ አልተገለጸም።

   ዊትኮፍ የተለያዩ ውይይቶች ማድረጋቸውን እና የተደረጉትም ንግግሮች “ገንቢ እና ተስፋ ሰጭ” እንደሆኑ ተናግረዋል።

   “በውይይቶቹ ወቅት አደራዳሪዎቹ በሁለቱ ተወካዮች መካከል ያሉ ሃሳቦችን ወደኋላ እና ወደፊት እየተመላለሱ ሲያነሱ ነበር” በማለት ውይይቶቹ “ ተስፋ ሰጭ፣ ገንቢ እና ስኬታማ” እንደነበሩ ገልጸዋል።

   ፕሬዚደንት ትራምፕም በኋላ ላይ የአሜሪካ ባለሥልጣናት ከኢራን ልዑካን ጋር “ለሦስት ሰዓታት የዘለቀ ውጤታማ ውይይት” ማድረጋቸውን ለጋዜጠኖች ተናግረዋል።

   የኢራን የመንግሥት ቴሌቪዥንም የውጭ ጉዳይ ሚኒስትሩ አባስ አራግቺ ከዊትኮፍ ጋር መነጋገራቸውን ዘግቧል።

   ኢርና የውጭ ጉዳይ ሚኒስትሩ ቃል አቀባይ ኢስማኤል ባጋይን ጠቅሶ እንደዘገበው ድርድሩ የተደረገው በኳታር አደራዳሪዎች አማካኝነት እንደሆነ ገልጿል።

   ኢራን አሜሪካ "የእብሪት ድርጊቷን እንድታቆም እንደምትፈልግ" ገልጻለች።

   አሜሪካ እና እስራኤል በኢራን ላይ አየር ጥቃት የከፈቱት የካቲት ወር መጨረሻ ላይ ነበር። ይህንንም ተከትሎ ኢራን በገልፍ እና በአረብ ባሕረ ሰላጠጤው የአሜሪካ አጋራት የጦር ሰፈሮች ላይ ጥቃት በመፈፀም ምላሽ የሰጠች ሲሆን 20 በመቶው የዓለም ነዳጅ እና የተፈጥሮ ጋዝ የሚተላለፍበትን ወሳኙን የሆርሙዝ ወሽመጥ ዘግታለች።

   ወሽመጡ መዘጋቱም የነዳጅ አቅርቦት ላይ መስተጓጎል የፈጠረ ሲሆን ዋጋ እንዲዋዥቅ አድርጓል።

10. 23 መስከረም 2026የደቡብ አፍሪካ ፖሊስ ከፍተኛ ባለሥልጣን በወሲባዊ ትንኮሳ ክስ ተመሰረተባቸው

    

    የፎቶው ባለመብት, Gallo Images via Getty Images

    በደቡብ አፍሪካ ካሉት ከፍተኛ የፖሊስ መኮንኖች አንዱ ወሲባዊ ትንኮሳ በመፈጸም ተከስሰው በጆሃንስበርግ ሰሜን ምዕራብ በሚገኝ ፍርድ ቤት ቀረቡ።

    ክሶቹ ሌተናል ጄኔራል ሻድራክ ሲቢያ የ16 ዓመት ልጅን ለጾታዊ ግንኙነት በማባበል እንዲሁም የ18 ዓመት ልጅን አስገድደው ደፍረዋል የሚሉ ናቸው።

    በተጨማሪም ጄነራሉ ሕገወጥ የሰዎች ዝውውር ክስ የቀረበባቸው ሲሆን ይህም ሌሎች ከዚህ ጉዳይ ጋር በተያያዘ ሊታሰሩ እንደሚችሉ ይጠቁማል።

    ሰኞ ዕለት የታሰሩት እና ከኃላፊነታቸው የታገዱት ምክትል የፖሊስ ኮሚሽነር ምንም አስተያየት አልሰጡም።

    የ59 ዓመቱ አዛውንት መስከረም 29 የዋስትና ጥያቄ ለማቅረብ ዳግም ፍርድ ቤት ይቀርባሉ ተብሎ ይጠበቃል።

    አቃቤ ሕግ ሲቢያ ከታሰሩበት እስር ቤት ለማስመለጥ የተዘጋጀ ዕቅድ መኖሩን ፍንጮች አሉ በማለት ወደ ሌላ ማረሚያ ቤት እንዲቀይሩ ጠይቋል።

    በከፍተኛ የፖሊስ መኮንኑ ላይ ክስ የተመሰረተው ፖሊስ በሙስና እና ከወንጀለኞች ጋር በመተባበር ተወንጅሎ የሕዝብ ተወካዮች ምርመራ እያካሄዱ ባለበት ወቅት ነው።

    የማድላንጋ ኮሚሽን በመባል የሚታወቀው ይህ ምርመራ ባለፉት ሳምንታት የተጀመረ ሲሆን ሲቢያ ፖሊስ ከለላ እንዲሰጥ በመስማማት '20 ኢምፓላዎች' ከተባለ የወንጀል መሪ ስጦታዎች ተቀብሏል የሚል ክስ ቀርቦባቸዋል።

    የአገሪቱ ፖሊስ ግን ክሱን ውድቅ አድርጎታል።

11. 23 መስከረም 2026ትራምፕ በመንግሥታቱ ድርጅት ላይ ባደረጉት ንግግር ኢራንን “ለማጥፋት” ዛቱ

    

    የፎቶው ባለመብት, Getty Images

    የአሜሪካው ፕሬዚዳንት ዶናልድ ትራምፕ ለተባበሩት መንግሥታት ጉባዔ ተሰብሰቢዎች ኢራንን ዳግም ማጥቃት ወይም የሰላም ድርድሩን መቀጠል የሚሉ “ትልቅ ውሳኔዎችን” መጋፈጣቸውን ተናገሩ።

    ማክሰኞ ዕለት በኒው ዮርክ በተጀመረው የመንግሥታቱ ድርጅት ጉባዔ ላይ የተገኙት የኢራን ልዑክ አንድ ብቻ ናቸው።

    ትራምፕ ለጉባዔው ባደረጉት ንግግር ከኢራን ጋር የገቡበት ግጭት የማይፈታ ከሆነ እስላማዊ ሪፐብሊኳን “ሊያጠፏት” እንደሚችሉ ዝተዋል።

    ትራምፕ በመንግሥታቱ ድርጅት አዳራሽ ለተሰበሰቡት የዓለም መንግሥታት ንግግር ሲያደርጉ “የዓለም አቀፉ መንግሥታት” የሚለውን ሃሳብ ውድቅ አድርገው በሩሲያ እና በዩክሬን መካከል ሰላምን ለማምጣት እንደሚያሸማግሉ እንዲሁም አሜሪካ የሰው ሠራሽ አስተውሎት ፉክክሩን በበላይነት እንደምታጠናቅቅ ተናግረዋል።

    ፕሬዚዳንቱ ይህንን የተናገሩት ከፍተኛ የአሜሪካ እና የኢራን ዲፕሎማቶች ከተወያዩ ከአንድ ቀን በኋላ ነው።

    በመካከለኛው ምሥራቅ ጦርነት እያካሄዱ ያሉት ትራምፕ ከጉባዔው ጎን ለጎን በርካታ የዓለም መሪዎችን አግኝተው አነጋግረዋል።

    ፕሬዚዳንት ትራምፕ ንግግራቸውን የጀመሩት በምጣኔ ሃብት፣ በስደተኞች፣ በድንበር እና ወንጀልን በመቆጣጠር ረገድ ያስመዘገቧቸውን ስኬቶች በመዘርዘር ነው።

    ፕሬዚዳንቱ በንግግራቸው ባለፈው ዓመት በየካቲት ወር ከእስራኤል ጋር በመሆን የጀመሩትን እና የዓለም ነዳጅ ዋጋ ማሻቀብ ያስከተለውን የኢራን ጦርነት ትክክለኛነት ለማስረዳት ጥረዋል።

    የፕሬዚዳንቱ ንግግር የመንግሥታቱ ድርጅት ዋና ጸኃፊ አንቶኒዮ ጉቴሬዝ የዓለም ሕዝብ “እርስ በእርሱ የተሳሰረ” መሆኑን፤ ነገር ግን ዓለም አቀፍ መንግሥታት ልዩነታቸው እየሰፋ መሆኑን መሆኑን አጽንኦት ሰጥተው የተናገሩትን የተቃረነ ነው።

    የትራምፕ ንግግር ጦርነቱ ቴህራን የኒውክሌር ጦር መሣሪያ እንዳይኖራት ማድረግ የቻለ ነው ሲሉ ተደምጠዋል።

    "ከኢራን ጋር፣ አገራቸውን ዳግም እንዲገነቡና ከምንጊዜውም በበለጠ ታላቅ አገር እንዲፈጥሩ የሚያስችላቸው ስምምነት ይደረግ ይሆን?" ሲሉ የተናገሩት ትራምፕ ቀጥለውም "ወይስ ይህን የእስላማዊ ሪፐብሊክ መንግሥት በፍጥነት አጥፍቼ ሰዎችንና አገራትን እንደገና የመግደልና የማውደም ዕድል ፈጽሞ እንዳያገኙ አደርጋለሁ? ወደ ገሃነምስ እወረውራቸዋለሁ?" ሲሉ በንግግራቸው ላይ ጥያቄ አቅርበዋል።

    ትራምፕ እስካሁን ሳይሳካ የቆየው ከኢራን ጋር የሚደረገው የሰላም ድርድር ከኅዳሩ ምርጫ በኋላ ይሳካል ብለው እንደሚያምኑ ተናግረዋል።

    ይህ አስተያየታቸው ድርድሮችን ክፍት እያደረጉ ከፍተኛ ወታደራዊ ኃይልን በመጠቀም ማስፈራራትን የሚያካትተውን የእርሳቸውን የውጭ ፖሊሲ ስትራቴጂ የሚያንፀባርቅ ነው።

    ትራምፕ ከንግግራቸው በኋላ ለጋዜጠኞች የአሜሪካ ባለሥልጣናት ከተባበሩት መንግሥታት ጠቅላላ ጉባኤ ጎን ለጎን ከኢራን ልዑክ ጋር "እጅግ ውጤታማ" የሆነ ሦስት ሰዓት የፈጀ ውይይት ማድረጋቸውን ተናግረዋል።

    የኢራን መገናኛ ብዙኃን የውጭ ጉዳይ ሚኒስትር አባስ አራግቺ በመካከለኛው ምሥራቅ የአሜሪካ ልዩ ልዑክ ከሆኑት ስቲቨ ዊትኮፍ ጋር መገናኘታቸውን ዘግበዋል።

    የኢራን ውጭ ጉዳይ ሚኒስተር ቃል አቀባይ ኢስማኤል ባጋይ ንግግሩ በአደራዳሪዋ ኳታር በኩል መደረጉን መናገራቸውን ኢርና ዘግቧል።

    ቴህራን የቀረቡት ቅድመ ሁኔታዎች አሜሪካ በሁሉም ግንባሮች የምታካሄደውን ጦርነት ማቆም ጨምሮ የሚጠይቅ መሆኑን የመገናኛ ብዙኃኑ ዘግቧል።

    ቢቢሲ ዊትኮፍን ስለ ስብሰባው ጠይቆ በአውራ ጣታቸውን በጥሩ ሁኔታ ሄዷል የሚል ምልክት በመስጠት መልሰዋል።

    ዊትኮፍ በኋላ ላይ በኤክስ ገጻቸው ላይ ንግግሩ “ቀኑን በሙሉ በሁለቱ ወገኖች መካከል መልዕክቶችን ሲያለዋውጡ በነበሩ አደራዳሪዎች” በኩል መካሄዱን አስታውቀዋል።

    ዊትኮፍ አከለውም "ገንቢ እና ተስፋ ሰጪ ይሆናሉ ብለን ተስፋ ያደረግነውን የአንድ ዙር ውይይት በተሳካ ሁኔታ አጠናቀናል" ሲሉ ተናግረው "አደራዳሪዎቹም ሥራቸውን ይቀጥላሉ" ብለዋል።

12. 22 መስከረም 2026ትራምፕ የተመድ በጀት በ15 በመቶ መቀነሱን እና በሺዎች የሚቆጠሩ ሰራተኞቹ መሰናበታቸውን ተናገሩ

    

    የፎቶው ባለመብት, Reuters

    የአሜሪካው ፕሬዚደንት ዶናልድ ትራምፕ መንግሥታቸው ከሌሎች በርካታ አገራት ጋር በመተባበር በመንግሥታቱ ድርጅት ታሪክ እጅግ ሰፊ የሆነ ማሻሻያ ማድረጉን አስታወቁ።

    ትራምፕ ዛሬ በተጀመረው የተባበሩት መንግሥታት ጠቅላላ ጉባኤ ላይ ባደረጉት ንግግር የድርጅቱ በጀት በዘንድሮው የአውሮፓውያኑ ዓመት ለመጀመሪያ ጊዜ 15 በመቶ መቀነሱን እና ከ4000 በላይ ሰራተኞቹም እንደተሰናበቱ ተናግረዋል።

    ድርጅቱ "አስደናቂ አቅም" እንዳለው የጠቀሱት ፕሬዚደንቱ፣ ነገር ግን የግራ ዘመሞችን "አጀንዳ መሸከም" ማቆም አለበት ብለዋል።

    ትራምፕ በሁለተኛው የሥልጣን ዘመናቸው ትላልቅ እርምጃዎችን የወሰዱ ሲሆን ከእነዚህ መካከል አሜሪካን ከበርካታ ዓለም አቀፍ ድርጅቶች አባልነት ማስወጣት ይገኝበታል።

    የፕሬዚደንቱ እርምጃ ካረፈባቸው 66 ተቋማት መካከል ግማሽ ያህሉ ከመንግሥታቱ ድርጅት ጋር የተገናኙ ናቸው።

    በወቅቱ ዋይት ሃውስ በሰጠው መግለጫ እርምጃው የተወሰደው ተቋማቱ "ለአሜሪካ ጥቅም የሚሰሩ" ባለመሆናቸው እና "ውጤታማ ያልሆኑ ወይም ድብቅ አጀንዳዎችን ስለሚያራምዱ" እንደሆነ ገልጿል።

13. 22 መስከረም 2026አፍሪካ በተመድ የጸጥታ ምክር ቤት ቋሚ መቀመጫ እንዲኖራት ዋና ጸሐፊው ጠየቁ

    

    የፎቶው ባለመብት, EPA

    የተባበሩት መንግሥታት ድርጅት ዋና ፀሐፊ አንቶኒዮ ጉቴሬዝ አፍሪካ በመንግሥታቱ ድርጅት የፀጥታ ምክር ቤት ውስጥ ቋሚ መቀመጫ እንዲኖራት ጠየቁ።

    ዋና ፀሐፊው ይህን ያሉት ዛሬ በተጀመረው የተመድ ጠቅላላ ጉባዔ ላይ የመክፈቻ ንግግር ባደረጉበት ወቅት ነው።

    ጉቴሬዝ በንግግራቸው አፍሪካ ቢያንስ አንድ ቋሚ መቀመጫ ሊሰጣት እንደሚገባ አፅንኦት ሰጥተዋል።

    “ በ21ኛው ክፍለ ዘመን የፀጥታው ምክር ቤት የአፍሪካ ቋሚ ውክልና አለመኖር ኢ ፍትሃዊ እና ምክንያታዊ ያልሆነ ነው” ሲሉ መቀየር እንዳለበት አሳስበዋል።

    ዋና ፀሐፊው ባለፈው ዓመትም “ከ1945 በኋላ ብዙ የዓለም እውነታ ተቀይሯል፤ ይሁን እንጂ የፀጥታው ምክር ቤት ስብጥር ጉልህ ለውጥ ሳያሳይ እንደቀጠለ ነው” ሲሉ ተመሳሳይ ጥሪ አቅርበው ነበር።

    የፀጥታው ምክር ቤት አራት ቋሚ አባላት ያሉት ሲሆን እነዚህም ቻይና፣ ፈረንሳይ፣ ሩሲያ፣ ዩናይትድ ኪንግደም እና አሜሪካ ናቸው።

    በዚህም የአፍሪካ ክፍል በቅኝ ግዛት ሥር በነበረበት በሁለተኛው የዓለም ጦርነት ወቅት የነበረውን እውነታ አሁንም ያንፀባርቃል በሚል ምክር ቤቱ ለረዥም ጊዜ ሲተች ቆይቷል።

    ምክር ቤቱ የተለያዩ የዓለም ቀጣናዎችን የሚወክሉ አስር ቋሚ ያልሆኑ አባላት ቢኖሩትም እንደ አምስቱ ቋሚ መቀመጫ እንዳላቸው አገራት ድምጽን በድምጽ የመሻር መብት የላቸውም።

    የአፍሪካ ሕብረት በምክር ቤቱ ውስጥ ሁለት ቋሚ ተወካዮች እና ተጨማሪ ሁለት ቋሚ ያልሆኑ ተወካዮች እንዲኖሩት ለረዥም ጊዜ ግፊት ሲያደርግ ቆይቷል።

    የፀጥታው ምክር ቤት አገራት፣ ተቋማት እና ግለሰቦች ላይ ዓለም አቀፍ ማዕቀቦችን መጣል፣ የሰላም ማስከበር ስምሪቶችን መፍቀድ፣ እንዲሁም ለግጭቶች ተመድ ምን ዓይነት ምላሽ መስጠት አለበት የሚለውን የመወሰን ሥልጣን አለው።

14. 22 መስከረም 2026ሳዑዲ በየመን በፈፀመችው ጥቃት ከ20 በላይ ሰላማዊ ሰዎች መገደላቸው እና መቁሰላቸው ተገለጸ

    

    የፎቶው ባለመብት, EPA

    ሳዑዲ አረቢያ ባለፉት 24 ሰዓታት ውስጥ በየመን በፈፀመችው ጥቃት ከ20 በላይ ሰላማዊ ሰዎች እንደተገደሉ እና ጉዳት እንደደረሰባቸው የየመን ሁቲዎች እና ከቡድኑ ጋር ግንኙነት ያለው ሚዲያ አስታወቁ።

    የሁቲ ጦር ቃል አቀባይ ሳዑዲ አረቢያ ግጭቱ ከተባባሰ ወዲህ ከ900 በላይ የአየር እና የሚሳዔል ጥቃቶችን በይዞታቸው ላይ መፈፀሟን ተናግረዋል።

    በዓለም አቀፍ ማኅበረሰብ ዘንድ እውቅና ያለው የየመን መንግሥት በበኩሉ ቡድኑ ለተፈፀመበት ጥቃት አፀፋ ለመስጠት በላህጂ ግዛት በገበያ ሥፍራ ላይ በፈፀመው ጥቃት ሰላማዊ ሰዎች ተጎድተዋል ሲል ከስሷል።

    ሁቲዎች ግን የሳዑዲ ጥቃት የየመን ሰላማዊ ሰዎችን ዒላማ ያደረገ እንደሆነ ጠቅሰው፣ ግጭቱ ከተቀሰቀሰ ወዲህ የሚፈፀመው ጥቃት መባባሱን ገልጸዋል።

    ታጣቂ ቡድኑን የምትደግፈው ኢራንም ሳዑዲ አረቢያ በሁቲ ግዛቶች ላይ የምትፈፅማቸውን ጥቃቶች እንድትታቆም አሳስባለች።

15. 22 መስከረም 2026አሜሪካ ከኢራን ጋር ለመነጋገር ዝግጁ መሆኗን የውጭ ጉዳይ ሚኒስትሯ ተናገሩ

    

    የፎቶው ባለመብት, EPA/Shutterstock

    የአሜሪካ የውጭ ጉዳይ ሚኒስትር ማርኮ ሩቢዮ በኒው ዮርክ በሚካሄደው የተባበሩት መንግሥታት ጠቅላላ ጉባዔ ጎን ለጎን ከኢራን ባለሥልጣናት ጋር ለመነጋገር ዝግጁ መሆናቸውን ገለጹ።

    ሩቢዮ "አሁን ላይ ምንም ነገር የታቀደ አይመስለኝም ፤ ነገር ግን ለእንዲህ ዓይነት ውይይት በእርግጠኝነት ዝግጁ ነን። በተለይ ተገናኝቶ መነጋገሩ አዎንታዊ ውጤት ካመጣ እና በመጨረሻም ዋናውን ዓላማ የማሳካት ተስፋ ካለ” ብለዋል።

    ሚኒስትሩ ዋና ዓላማ ሲሉ የገለጹት ኢራን የኒውክሌር የጦር መሣሪያ መታጠቅ እንዳትችል ማረድግን ነው።

    የኢራን የውጭ ጉዳይ ሚኒስትር አባስ አራቅቺ ሰኞ ዕለት ጀመርው በኒው ዮርክ የሚገኙ ሲሆን ማስዑድ ፔዝሽኪያንም ለጠቅላላ ጉባኤው ወደ ኒውዮርክ ተጉዘዋል።

    ከሁለት ቀናት በፊት ፕሬዚደንት ዶናልድ ትራምፕ ከኢራኑ ፕሬዚደንት ማስዑድ ፔዝሽኪያን ጋር ለመገናኘት ዝግጁ መሆናቸውን ለፎክስ ኒውስ ተናግረው ነበር።

    ጠቅላላ ጉባኤው ዛሬ የተጀመረ ሲሆን የኢራን ተወካዮች ንግግር እንደሚያደርጉ ይጠበቃል።

16. 22 መስከረም 2026በቱርክ በትምህርት ቤት አቅራቢያ በተፈፀመ ጥቃት 11 ሰዎች ተጎዱ

    

    የፎቶው ባለመብት, Getty Images

    በቱርክ በትምህርት ቤት አቅራቢያ በተከፈተ ተኩስ 11 ሰዎች ላይ ጉዳት መድረሱን ፖሊስ አስታወቀ።

    ማክሰኞ ጠዋት ላይ አንድ መሣሪያ የታጠቀ ግለሰብ በከፈተው ተኩስ ከተጎዱት መካከል ሁለቱ በአስጊ ሁኔታ ውስጥ መሆናቸው ተገልጿል።

    ጥቃቱ የተፈፀመው በምዕራባዊ ማኒሳ ግዛት በሚገኝ ኢንሲ ኡዝሜዝ በተባለ የሙያ እና የቴክኒክ ትምህርት ቤት አቅራቢያ ሲሆን ጉዳት የደረሰባቸው ሁሉም ተማሪዎች ናቸው ተብሏል።

    ጥቃቱን በመፈፀም የተጠረጠረው የ15 ዓመት ታዳጊ በቁጥጥር ሥር መዋሉን ፖሊስ ገልጿል።

    ተጠርጣሪው የጦር መሣሪያ ይዞ ጭር ባለ መንገድ ወደ ትምህርት ቤቱ ሲራመድ እና ተመልሶ በሩጫ ሲያመልጥ ከደኅንነት ካሜራ የተገኙ ተንቃሰቃሽ ምሥሎች አሳተይዋል።

    የተጠርጣሪው እናት፣ አባት እና የመሣሪያው ባለቤት እንደሆኑ የተገለፁት አያትም ከክስተቱ ጋር በተያያዘ በቁጥጥር ሥር መዋላቸውን የአገሪቷ የፍትሕ ሚኒስትር አኪን ጉርሌክ ተናግረዋል።

    የጥቃቱ ዓላማ ምን እንደሆነ እስካሁን ግልጽ አይደለም።

    የአገሪቷ የትምህርት ሚኒስቴር “ክስተቱ አገራችንን በተለይም የትምህርት ማኅበረሰቡን እጅግ ያሳዘነ ነው” ብሏል።

    ሚኒስቴሩ ጨምሮም ሦስት ብሔራዊ መርማሪዎች ወደ ማኒሳ ግዛት መላካቸውን ገልጿል።

    በቱርክ በዚህ ዓመት ብቻ በትምህርት ቤት ላይ ጥቃት ሲፈፀም ይህ ሦስተኛው ነው።

    የአሁኑ ጥቃት የተፈፀመው መንግሥት እየጨመረ የመጣውን መሰል ጥቃት ለማስቆም እየታገለ ባለበት ወቅት ነው።

17. 22 መስከረም 2026የአሜሪካ ዋነኛ የቴሌቪዥን ጣቢያዎች ለትራምፕ እንቅስቃሴ ሽፋን መስጠታቸውን አቋረጡ

    

    የፎቶው ባለመብት, EPA

    ፕሬዝዳንት ዶናልድ ትራምፕ ሲኤንኤን፣ ፖለቲኮ እና ኤምኤስ ናው መገናኛ ብዙኃን ዋይት ሐውስ ገብተው እንዳይዘግቡ የጣሉትን ዕገዳ በመቃወም ዋነኛ የአሜሪካ የቴሌቪዥን ጣቢያዎች ለፕሬዝዳንቱ የሚሰጡትን ሽፋን አቋረጡ።

    ትራምፕ አርብ ዕለት እገዳውን ሲያሳውቁ፣ መገናኛ ብዙኃኑ ስለ አስተዳደራቸው “የፈጠራ ወይም የውሸት” ዘገባዎችን እያቀረቡ ነው ሲሉ ከስሰዋል። የዜና ተቋማቱ በበኩላቸው፣ ዘጋቢዎቻቸው ቅዳሜ ዕለት ወደ ዋይት ሐውስ እንዳይገቡ መከልከላቸውን ገልጸዋል።

    ሦስቱ የአሜሪካ የዜና ተቋማት በመቀጠል፣ “መንግሥት ፕሬሱ ምን እንደሚዘግብ አይወስንም የሚለውን መርኅ ለማስከበር” በትራምፕ አስተዳደር ላይ ክስ እንደሚመሠርቱ አስታውቀዋል።

    ዋነኞቹ የቴሌቪዥን ጣቢያዎች ለትራምፕ ሽፋን ላለመስጠት መወሰናቸውን ተከትሎ የፕሬዝዳንቱ ጽህፈት ቤት “ትራምፕ ቲቪ” የተባለ የራሱን በኢንተርኔት የሚተላለፍ ቻናል ጀምሯል፤ ይህም ስለ ፕሬዝዳንቱ ያለማቋረጥ ለ24 ሰዓታት ቪዲዮዎችን የሚያስተላልፍ ነው።

    ሌሎችም በርካታ የአሜሪካ የዜና ተቋማት በጋራ በሚደረጉ የፕሬዝዳንቱ ዘገባዎች ላይ እንደማይሳተፉ አስታውቀዋል። ከእነዚህ መካከል ዘ ኒው ዮርክ ታይምስ እና ዘ ዋሽንግተን ፖስት ከትራምፕ ዝግጅቶች የሚገኙ ፎቶዎችን እንደማያጋሩ አሳውቀዋል።

    በዚህ ምክንያት ትራምፕ በፕሬዝዳንታዊ አውሮፕላናቸው ሲሳፈሩ ወይም በተባበሩት መንግሥታት ጠቅላላ ጉባኤ ለመሳተፍ ኒው ዮርክ ሲደርሱ የሚያሳይ ምንም ቪዲዮ በቴሌቪዥን ጣቢያዎች አልቀረበም።

    ትራምፕ በዋይት ሐውስ ደቡባዊ መስክ ላይ በተገነባው አዲስ ሄሊኮፕተር ማረፊያ ምረቃ ላይ የተገኙ ሲሆን፣ ዝግጅቱ በአዲሱ የዋይት ሐውስ ድረ-ገጽ ላይ በቀጥታ ተላልፏል፣ ሆኖም የፕሬዝዳንቱ ንግግር በግልጽ አልተሰማም።

18. 22 መስከረም 2026የግንባታ ሠራተኞች በቆረጡት ኬብል ምክንያት በአሜሪካ ውስጥ በረራዎች ተስተጓጎሉ

    

    የፎቶው ባለመብት, EPA

    በአሜሪካ ውስጥ የግንባታ ሠራተኞች ለአየር ትራፊክ ቁጥጥር አስፈላጊ የሆነ ኬብል በስህተት በመቁረጣቸው በአገሪቱ በሚገኙ ዋና ዋና አየር ማረፊያዎች በመቶዎች የሚቆጠሩ በረራዎች እንዲዘገዩ ምክንያት ሆነ።

    በዚህም የተነሳ ሰኞ ከሰዓት በኋላ በኒው ዮርክ፣ ፔንስልቬኒያ፣ ኒው ጀርሲ እና ማሳቹሴትስ በሚገኙ አየር ማረፊያዎች ውስጥ የሚካሄዱ በረራዎች ዘግይተዋል።

    የአሜሪካ ትራንስፖርት ሚኒስትር ሴን ዳፊ ኬብሉ መጠገኑን እና አየር ማረፊያዎቹ ወደ መደበኛ ሥራቸውን እንደሚመለሱ የገለጹ ቢሆንም፣ አሁንም መዘግየቶች ሊኖሩ እንደሚችሉ አስጠንቅቀዋል።

    ይህ በአሜሪካ ምሥራቃዊ ክፍል የተፈጠረው ከፍተኛ የበረራ መስተጓጎል ዛሬ ማክሰኞ በኒው ዮርክ ከሚካሄደው የተባበሩት መንግሥታት ጠቅላላ ጉባኤ አስቀድሞ የተፈጠረ ሲሆን፣ ለጉባኤው በርካታ የዓለም መሪዎች በከተማዋ አካባቢ ወዳሉ አየር ማረፊያዎች ይደርሳሉ ተብሎ ይጠበቃል።

    የአሜሪካ የትራንስፖርት ባለሥልጣናት እንዳሉት፣ የተቆረጠረው ኬብል የበረራ መቆጣጠሪያ ሥርዓትን ጎድቶታል። ይህ ሥርዓት አውሮፕላኖችን በሚነሱበት እና በሚያርፉበት ጊዜ ደኅንነታቸው በተጠበቀ ሁኔታ ለመምራት ይጠቅማል።

    የኒው ጀርሲ የሕዝብ ማመላለሻ ተቋም የቢቢሲ የአሜሪካ አጋር ለሆነው ሲቢኤስ ኒውስ እንደገለጸው፣ በቁፋሮ ቦታው የነበሩ ምልክቶች በተሳሳተ ሁኔታ ተቀምጠው ስለነበረ የግንባታ ሠራተኞቹ መስመሩን በስህተት ቆርጠውታል።

19. 22 መስከረም 2026ዩኬ ለሳዑዲ አረቢያ “ወታደራዊ ድጋፍ” እንደምትሰጥ አስታወቀች

    

    የፎቶው ባለመብት, NurPhoto via Getty Images

    የዩናይትድ ኪንግደም ጠቅላይ ሚኒስትር አንዲ ቡርንሀም አገራቸው ለሳዑዲ አረቢያ ወታደራዊ ድጋፍ እንደምትሰጥ አስታወቁ።

    በኢራን በሚደገፉት የሁቲ አማጽያን ጥቃት የተሰነዘረባትን ሳዑዲ ለመርዳት በበረራ ላይ ላሉ አውሮፕላኖች ነዳጅ የመሙላት አገልግሎት እንደሚሰጥ ተናግረዋል።

    ወታደራዊ ድጋፉ በቀጣይ ቀናት እንደሚጀመር ተገልጿል። በቆጵሮስ በሚገኘው ራፍ የዩኬ የጦር ሰፈር የሚገኝ አንድ የእንግሊዝ አውሮፕላን በወታደራዊ ድጋፉ እንደሚካተትም ተመልክቷል።

    ጠቅላይ ሚኒስትሩ እንደተናገሩት ሳዑዲ አረቢያ ወታደራዊ ድጋፍ እንዲደረግላት ጠይቃለች። ከመከላከያ ሚኒስትሩ ዌስ ስተርሊንግ እና የውጭ ጉዳይ ሚኒስትሩ ኤድ ሚሊባንድ በተሰጣቸው ምክር መሠረት ጥያቄውን ለመቀበል መወሰናቸውን ተናግረዋል።

    ወታደራዊ ድጋፉ “ለሳምንታት” ሊዘልቅ እንደሚችል ተገልጿል።

20. 22 መስከረም 2026ኢራን ሁቲዎችን “ማስታጠቅ እና መደገፍ” እንድታቆም የቡድን ሰባት አገራት አሳሰቡ

    

    የፎቶው ባለመብት, EPA

    ኢራን ሁቲዎችን “ማስታጠቅ እና መደገፍ” ማቆም አለባት ሲሉ የቡድን ሰባት አገራት የውጭ ጉዳይ ሚኒስትሮች በጋራ ባወጡት መግለጫ አሳሰቡ።

    በየመን ሁቲ ታጣቂዎች በሳዑዲ አረቢያ ላይ የተፈጸሙ ጥቃቶችን “እጅግ እናወግዛለን” ሲሉም በመግለጫው አቋማቸውን አስታውቀዋል።

    በየመን በሳዑዲ ከሚደገፉ የመንግሥት ኃይሎች ጋር በቅርቡ እየተባባሰ የመጣው ውጊያ ለቀጣናው እንዲሁም ለዓለም አቀፍ የኃይል አቅርቦት ዘርፍም አስጊ እንደሆነ ገልጸዋል።

    በኢራን የሚደገፉት ሁቲዎች በቀይ ባሕር አቅራቢያ ግዛቶችን መያዛቸውን ተከትሎ ባለፉት ጥቂት ቀናት ውስጥ በሺህዎች የሚቆጠሩ ስደተኞች ከየመን ሸሽተው ወጥተዋል።

    የቡድን ሰባት አገራት መግለጫውን ያወጡት በኒው ዮርክ ከሚካሄደው የተባበሩት መንግሥታት ጠቅላላ ጉባዔ አስቀድሞ ነው። በጉባዔው የኢራን ተወካዮች ንግግር እንደሚያደርጉ ይጠበቃል።

    የዩናይትድ ኪንግደም፣ ካናዳ፣ ፈረንሳይ፣ ጣልያን፣ ጃፓን እና አሜሪካ የውጭ ጉዳይ ሚኒስትሮች በጋራ ባወጡት መግለጫ “ሁቲዎች በአፋጣኝ ሁሉንም ወታደራዊ እንቅስቃሴ እንዲያቆሙ እንጠይቃለን” ብለዋል።

    “የመርከብ ጉዞዎች ላይ የሚደርስ ጥቃት እና ዛቻ እንዲገታ እና ወደ ፖለቲካዊ የንግግር ሒደት መመለስ እንዲቻል” ሲሉም አሳስበዋል።