Türkiyə daşqınlarında ölənlərin sayı 51-ə çatıb - şəkillər

Türkiyədə şiddətli daşqınlar və torpaq sürüşmələri nəticəsində 51 nəfər həyatını itirib. Bir nəfər hələ də itkin düşmüş hesab olunur. Bu barədə Türkiyənin fövqəladə hallar üzrə qurumu bildirir.

Ölkənin Qara dəniz sahilindəki Kastamonu, Bartın və Sinop bölgələrinin bir hissəsi 10 avqustdan etibarən su altında qalır.

Zərər çəkmiş bölgələrdən 2 minə yaxın insan təxliyə edilib.

Bu, qısa müddət ərzində Türkiyədə baş verən ikinci təbii fəlakət hadisəsidir.

Bundan əvvəl ölkədə onlarla meşə yanğınları tüğyan edib.

Ən son məlumata görə, çökmüş körpülər və elektrik dirəklər də daxil olmaqla infrastruktura ciddi ziyan dəyib, bəzi yerlərdə sellə yollar yuyulub, evlər və müəssisələri su basıb.