ကမ္ဘာတစ်ဝန်း ပြတ်တောက်မှုတွေကြောင့် Microsoft ကို တိုင်ချက် ၁၄၀,၀၀၀ နီးပါးရောက်ရှိ
Teams၊ Outlook နဲ့ AI ဆော့ဖ်ဝဲလ် Copilot အပါအဝင် ဝန်ဆောင်မှုတွေမှာ ချိတ်ဆက်မှု ပြဿနာတွေတက်နေလို့ မနေ့ညက ကမ္ဘာတစ်ဝန်းကတိုင်ကြားချက်ပေါင်း ၁၄၀,၀၀၀ နီးပါးအထိ Microsoft က ရခဲ့ပါတယ်။
အမေရိကန်၊ ဂျပန်နဲ့ စင်ကာပူ အပါအဝင် ကမ္ဘာတစ်ဝန်းက သုံးစွဲသူတွေဟာ အခုလို ပြတ်တောက်မှုတွေနဲ့ ရင်ဆိုင်နေရကြောင်း တိုင်ကြားထားကြတာပါ။
ဒါကအမြင့်ဆုံးတိုင်ကြားချက် အရေအတွက်ဖြစ်ပြီး နည်းလမ်းပေါင်းစုံကို သုံးပြီး ကြိုးစားဖြေရှင်းနေတယ်လို့ကုမ္ပဏီဘက်က ထုတ်ပြန်ထားပါတယ်။
အခုလို ချို့ယွင်းမှုဖြစ်တာက Microsoft 365 ထဲမှာပါတဲ့ပရိုဂရမ်တွေကို သွားပြီး ထိခိုက်နေတာပါ။ Microsoft 365 ဆိုတာ စီးပွားရေးလုပ်ငန်းတွေကြားမှာလူသုံးများတဲ့ အွန်လိုင်းဝန်ဆောင်မှုတစ်ခုဖြစ်ပြီး Outlook, Teams နဲ့ OneDrive လိုမျိုး လုပ်ငန်းခွင်သုံး ချိတ်ဆက်ဆောင်ရွက်မှုတွေကို အသုံးပြုနိုင်အောင်ဝန်ဆောင်မှုပေးထားတာ ဖြစ်ပါတယ်။
နိုင်ငံတကာအဖွဲ့အစည်းတွေအတွက်ဆိုရင်တော့ ဒီပလက်ဖောင်းဟာ ကမ္ဘာတစ်ဝန်းက လုပ်ဖော်ကိုင်ဖက်တွေနဲ့ အချင်းချင်း ချိတ်ဆက်ဖို့နဲ့ ပူးပေါင်းလုပ်ဆောင်ဖို့အတွက် အရေးကြီးပါတယ်။
အခုဖြစ်နေတဲ့ပြဿနာတွေထဲမှာ သုံးစွဲသူတွေအနေနဲ့ တချို့ဖိုင်တွေကို ဖွင့်ကြည့်လို့မရတာ၊ Calendar အက်ပ်တွေထဲက အချက်အလက်တချို့ကို ကြည့်လို့မရတာမျိုးတွေ ကြုံရနိုင်တယ်လို့ Microsoft က ဆိုပါတယ်။
ဒီလို ဝန်ဆောင်မှုတွေ ပြတ်တောက်သွားတာက ဆိုက်ဘာတိုက်ခိုက်ခံမှုကြောင့် မဟုတ်နိုင်ဘူးလို့ ဘီဘီစီကနားလည်ထားပါတယ်။
သူ့ရဲ့ AI ပလက်ဖောင်းဖြစ်တဲ့ Copilot လည်း ကောင်းကောင်းအလုပ်မလုပ်နိုင်တာမျိုးဖြစ်နိုင်ပေမဲ့ စာပို့တာတွေနဲ့ အွန်လိုင်းအစည်းအဝေးတွေကတော့အများအားဖြင့် ပုံမှန်အလုပ်လုပ်နေတယ်လို့ ကုမ္ပဏီက ပြောပါတယ်။
ဆာဗာအတော်များများ ရုတ်တရက် အလုပ်မလုပ်တော့တာ ကြောင့် ကျန်နေသေးတဲ့ စနစ်တွေကို ဝန်ပိသွားပြီး အခုလို ပြတ်တောက်ရတာလို့ Microsoft က ပြောထားပါတယ်။