ရန်ကုန်၊ အရေပြားယားယံမှုပြဿနာကြောင့် အမှိုက်ပုံရွှေ့ဖို့ မေးမြန်းချက် ပယ်ချခံရ
ရန်ကုန်မြို့ ၊ ဒဂုံမြို့သစ်အရှေ့ပိုင်း က ထားဝယ်ချောင်အမှိုက်ပုံကြောင့် အရေပြားယားယံပြဿနာ နဲ့ ကျန်းမာရေးထိခိုက်မှုတွေရှိနေလို့ ရွှေ့ပြောင်းပေးဖို့အရေး ဒီကနေ့ လွှတ်တော်မှာ ဆွေးနွေးခဲ့ပါတယ်။
ဒဂုံမြို့သစ်(အရှေ့ပိုင်း) ပြည်သူ့လွှတ်တော်အမတ် ဒေါ်အေးအေးမြင့်က မေးမြန်းခဲ့တာဖြစ်ပြီး ပြန်လည်ဖြေကြားခဲ့တဲ့ နေပြည်တော်ကောင်စီက ရွှေ့ပေးဖို့ ငြင်းဆိုခဲ့ပါတယ်။
ညအချိန်ရောက်ရင် အရေပြားယားယံပြီး အဖု၊ အပိတ်တွေ ထွက်လာနေသူတွေ ရှိလာတယ်လို့ ရန်ကုန်မှာ နေထိုင်ကြသူအချို့က လူမှုကွန်ရက်ပေါ်မှာ ရေးသားပြောဆိုနေကြအပြီးမှာ လွှတ်တော်အမတ်က အခုလိုမေးခွန်း ထုတ်လာတာဖြစ်ပါတယ်။
အမှိုက်စွန့်ပစ်မယ့်မြေနေရာ ရှားပါးတာနဲ့ အမှိုက်ပုံကနေ လျှပ်စစ်ထုတ်မှာဖြစ်လို့ အမှိုက်ပုံကို ဖျက်သိမ်းဖို့ မရှိသေးဘူးလို့ နေပြည်တော်ကောင်စီအဖွဲ့ဝင် ဦးခင်မောင်လတ်က လွှတ်တော်မှာ ပြန်လည်တုံ့ပြန်ပါတယ်။
ဒါပေမဲ့ အရံအမှိုက်ပုံအနေနဲ့တော့ ဒဂုံမြို့သစ်(ဆိပ်ကမ်း)မြို့နယ်က သရက်ပင်ချောင် နောက်ဆုံးစွန့်ပစ်အမှိုက်ပုံကို ဘတ်ဂျက်ရရှိမှုအပေါ်မူတည်ပြီး အကောင်အထည်ဖော်နေတယ်လို့ သူက ပြောပါတယ်။
၇ ဧကခွဲကျော်ကျယ်တဲ့ ထားဝယ်ချောင်အမှိုက်ပုံဟာ ဒဂုံမြို့သစ်မြောက်ပိုင်း၊ ၅၁ ရက်ကွက်နဲ့ ဒဂုံမြို့သစ်အရှေ့ပိုင်း အမှတ် ၁ ရပ်ကွက်ကြားက ကျန်စစ်သားတံတားအနီးမှာရှိပါတယ်။
နေပြည်တော်ကောင်စီဘက်ကတော့ လက်ရှိမှာ နောက်ဆုံးအမှိုက်ပုံတွေ ကနေထွက်တဲ့ မီသိန်းဓာတ်ငွေ့ကနေ လျှပ်စစ်ထုတ်နိုင်ဖို့ မြို့ပြပတ်ဝန်းကျင် ထိန်းသိမ်းရေးနှင့် သန့်ရှင်းရေးဌာနနဲ့ တောင်ကိုရီးယားကုမ္ပဏီတွေကြား ဆွေးနွေးနေတယ်လို့ ပြောပါတယ်။
လက်ရှိမှာ ဒီကုမ္ပဏီတွေနဲ့ “BOD စနစ် နဲ့ PPA စာချုပ်များချုပ်ဆိုနိုင်ရေး ဆောင်ရွက်နေဆဲဖြစ်ပါတယ်” လို့ နေပြည်တော်ကောင်စီ၀င်က ပြောပါတယ်။
ဒီစီမံကိန်းဟာ အမှိုက်ပုံမှာရှိတဲ့ အမှိုက်ဟောင်းတွေကနေ ထွက်လာတဲ့ မီသိန်းဓာတ်ငွေ့တွေကို စုစည်းသန့်စင်ပြီး Generator နဲ့ လျှပ်စစ်ဓာတ်အားထုတ်လုပ်မှာဖြစ်တယ်လို့ ဆိုပါတယ်။ ဒီစီမံကိန်း ကနေ လျှပ်စစ်ဓာတ်အား ၁ ဒသမ ၂ မဂ္ဂါဝပ်ထုတ်လုပ်နိုင်ဖို့ရည်ရွယ်ထားတယ်လို့ ဆိုပါတယ်။
ဒီစီမံကိန်းအပြင် ရန်ကုန်မြို့၊ ထိန်ပင်နဲ့ ထားဝယ်ချောင်အမှိုက်ပုံတွေက နေ့စဉ်ထွက်နေတဲ့ အမှိုက်တန်ချိန် ၂,၅၀၀ ကျော်ကနေ လျှပ်စစ်ဓာတ်အားနဲ့ သဘာဝဓာတ်ငွေ့ (CNG) ထုတ်လုပ်နိုင်ဖို့ ရန်ကုန်မြို့တော်စည်ပင်သာယာရေးကော်မတီဘက်က တင်ဒါခေါ်ယူမှုတွေရှိနေပါတယ်။
ဒီစီမံကိန်းဆောင်ရွက်ဖို့ လျှောက်ထားတဲ့ကုမ္ပဏီအများအပြားလည်းရှိနေတယ်လို့ နေပြည်တော်ကောင်စီ၀င် ပြောပါတယ်။