Delyth Lewis, aelod o staff Comisiwn y Senedd ers 2002, sy'n cario byrllysg seremonïol y Senedd, sef rhodd gan Senedd De Cymru Newydd, i'r Siambr.

Roedd Delyth yn allweddol yn y gwaith o sefydlu Senedd Ieuenctid Cymru. Hi fydd y fenyw gyntaf i gario'r byrllysg a bydd yn cael ei hebrwng gan Lukas Santos Evans, dirprwy gludydd y byrllysg a dau aelod o Senedd Ieuenctid Cymru, sef Ffiôn-Hâf Scott ac Aryan Gupta.

Wrth i'r Brenin a’r Frenhines gamu i mewn i’r Senedd, mae'r Llywydd yn cyflwyno’r Brenin, a’r Prif Weinidog yn cyflwyno’r Frenhines, i:

• Helen Jenner AS, arweinydd grŵp Senedd Reform UK
• Ken Skates AS, arweinydd Grŵp Senedd Llafur Cymru
• Darren Millar AS, arweinydd grŵp Senedd Ceidwadwyr Cymru
• Anthony Slaughter AS, arweinydd Plaid Werdd Cymru
• Jane Dodds AS y Democratiaid Rhyddfrydol
• Kerry Ferguson AS, Dirprwy Lywydd y Senedd
• Manon Bonner, Prif Weithredwr a Chlerc y Senedd.

Mae baner y Safon Frenhinol yn cael ei chodi a'r ddwy anthem genedlaethol yn cael eu chwarae.

Mae car y Brenin a'r Frenhines wedi cyrraedd y Senedd.

Cemlyn Davies
Gohebydd Gwleidyddol BBC Cymru

Mae sawl wyneb cyfarwydd yn y gynulleidfa'n aros i'r Brenin gyrraedd. Mae Ysgrifennydd Cymru, Stephen Kinnock yma.

Felly hefyd penaethiaid y byd darlledu yng Nghymru a chynrychiolwyr o'r gwahanol gymunedau crefyddol.

Mae masgot un o ganghennau’r fyddin wedi dod i'r bae heddiw gyda'i geidwaid i fod yn rhan o'r seremoni.

Mae presenoldeb mawr o'r lluoedd arfog yn amlwg y tu allan i'r Senedd.

Cofiwch y gallwch chi wylio'r digwyddiadau yn y Senedd drwy glicio uchod.

Wrth i’r Aelodau Brenhinol nesau mae cyfarchiad y Gynnau Brenhinol (21 rownd) yn seinio y tu allan i'r Senedd.

Nid pawb oedd yn falch o groesawu'r Brenin a'r Frenhines i'r Senedd heddiw. Roedd rhai pobl wedi dod gyda baneri yn protestio'n erbyn y Frenhiniaeth.

Cafodd rhai eu clywed yn gweiddi bod y cyfan yn "wastraff arian".

Cyn yr agoriad, dywedodd Llywydd y Senedd, Huw Irranca-Davies AS bod y seremoni "yn nodi dechrau pennod newydd yn hanes y Senedd".

"Mae'r Senedd nawr yn fwy, ac wedi'i hethol drwy system etholiadol newydd a gynlluniwyd i adlewyrchu yr amrywiaeth o safbwyntiau a phrofiadau ledled ein gwlad yn well.

“Mae’n anrhydedd i ni fod Eu Mawrhydi y Brenin a’r Frenhines yma i rannu’r foment hon gyda ni.”

“Byddwn yn defnyddio’r foment hon i ddathlu pobl, cymunedau a diwylliant Cymru ac i atgoffa ein hunain o ddyheadau’r rhai sy’n rhoi eu hymddiriedaeth ynom ni i’w gwasanaethu yn nhymor y Seithfed Senedd hon.”

Pan ymwelodd Brenin Charles III â Chymru am y tro cyntaf ers iddo etifeddu'r Goron yn 2022 anerchodd y Senedd yn y Gymraeg.

Dywedodd yn Gymraeg: "Diolch o galon am eich geiriau caredig."

Bu'n "fraint i fod yn Dywysog Cymru am mor hir", meddai, cyn dweud bod gan ei fab, William - Tywysog newydd Cymru - "gariad mawr at Gymru".

Cemlyn Davies
Gohebydd Gwleidyddol BBC Cymru

Dyma agoriad seremonïol gynta'r Senedd i'r Brenin Charles fel brenin, ond mae wedi bod yn bresennol ar gyfer pob un o'r seremonïau blaenorol wrth ochr ei fam, y diweddar Frenhines Elizabeth II ac yn rhinwedd ei rôl fel Tywysog Cymru.

Dydy hi ddim yn glir pam nad yw mab y brenin, William, yma heddiw. Pan gafodd ei enwi'n Dywysog Cymru yn 2022 awgrymodd ambell i aelod o Blaid Cymru y dylid dileu'r teitl ac fe wnaeth miloedd o bobl arwyddo deiseb yn galw am hynny hefyd.

Mae Rhun ap Iorwerth wedi dweud ei bod hi'n ddoeth na chafodd William arwisgiad ffurfiol achos y byddai hynny wedi achosi rhaniadau.

Ffynhonnell y llun, PA Media

Dwy sy'n aelodau o gôr Plastaf ac fydd yn perfformio'r gân 'O Gymru' heddiw fel rhan o'r seremoni yw Olive ac Alaw.

Mae rhai o aelodau o Senedd Ieuenctid Cymru wedi'u gwahodd i Fae Caerdydd heddiw ar gyfer y seremoni.

Cemlyn Davies
Gohebydd Gwleidyddol BBC Cymru

Yn y gorffennol mae ambell i aelod o Blaid Cymru ym Mae Caerdydd wedi cadw draw o'r digwyddiadau yma - yn eu plith Leanne Wood cyn iddi ddod yn arweinydd ar y blaid.

Y disgwyl heddiw yw y bydd holl aelodau'r blaid yn bresennol. Ond teg dweud o'r sgyrsiau dwi wedi eu cael dros y dyddiau diwethaf nad ydyn nhw i gyd yn frwd dros fod yma.

Mae rhai o blant ysgolion lleol yr ardal hefyd wedi teithio i'r Senedd gyda'u baneri yn barod i gyfarch y Brenin a'r Frenhines.

Mae torf o bobl nawr yn dechrau casglu o flaen y Senedd yn barod i gyfarch y Brenin a'r Frenhines i Fae Caerdydd.

Cemlyn Davies
Gohebydd Gwleidyddol BBC Cymru

Bydd y cyfarfod cyntaf yma rhwng y Brenin Charles a Phrif Weinidog Cymru, Rhun ap Iorwerth ar risiau'r Senedd yn foment arwyddocaol a symbolaidd.

Mae gan blaid ap Iorwerth hanes hir o wrthwynebu'r frenhiniaeth tra ei bod hi hefyd am weld Cymru annibynnol ar wahân i'r Deyrnas Unedig.

Mae ap Iorwerth ei hun wedi dweud yn y gorffennol nad yw'n "credu mewn brenhinoedd a thywysogion", er ei fod yn cydnabod bod y frenhiniaeth yn parhau'n bwysig i nifer o bobl Cymru.

Yn ystod ei ddyddiau'n yr ysgol a choleg roedd ap Iorwerth yn aelod o fand o'r enw 69 - cyfeiriad at arwisgiad dadleuol Charles fel Tywysog Cymru yng Nghastell Caernarfon ym 1969.

Helo a chroeso i'n darllediad o agoriad seremonïol y Senedd newydd, yr agoriad cyntaf sy'n nodi dechrau Senedd ehangach.

Mae'r Brenin wedi bod yn bresennol ym mhob agoriad o'r Senedd, gan gynnwys y cyntaf ym 1999, fel Tywysog Cymru ar y pryd.

Dyma fydd yr agoriad cyntaf iddo fod yn bresennol ynddo fel Brenin.

Bydd y digwyddiad yn dechrau gyda gorymdaith Aelodau o’r Senedd, dan arweiniad cludydd y byrllysg, a dau aelod o Senedd Ieuenctid Cymru a gaiff eu hebrwng gan Gorfflu Drymiau’r Gwarchodlu Cymreig.

Yn y Siambr, bydd y Brenin, Huw Irranca-Davies y Llywydd, a'r Prif Weinidog Rhun ap Iorwerth yn annerch y Senedd.