Mae Loti a Mili yn crwydro'r maes mewn steil bore 'ma.

Mae Heledd a'i meibion, Myfyr a Cynan hefyd yn barod i fwynhau'r arlwy.

BBC Cymru Fyw

Wrth siarad yn y gynhadledd i'r wasg dywedodd Mari Grug ei bod yn "falch eithriadol" i fod yn llywydd y brifwyl.

"Mae'r Eisteddfod yn y gwaed, fi'n rhoces o Fynachlog ddu a dwi'n falch iawn bod yr Eisteddfod yma.

"Ni 'ma fel teulu i fwynhau, a dwi mor falch bod y genhedlaeth nesaf yn mwynhau yr un pethau â fi."

Soniodd bod gweld "brwdfrydedd" eu plant yn yr Eisteddfod yn creu "balchder" iddi.

Dywedodd hefyd ei bod yn ymwybodol bod lot or ardal yn dod yma am y tro cyntaf "ac mae hynny'n gwneud fi'n hapus iawn".

Yn y gynhadledd i'r wasg dywedodd Prif Weithredwr yr Eisteddfod, Betsan Moses, bod hi'n argoeli i fod yn ddiwrnod llwyddiannus.

"Mae'r torfeydd yn llifo, am 06:50 roedd na deulu yn y ganolfan groeso!"

Gyda Sioe Aberteifi yn digwydd yn yr ardal hefyd dywedodd "ni wedi cydweithio i gadw'r ffyrdd i fynd, maen nhw'n dod yn hwylus!

"Mae'n argoeli i fod yn ddiwrnod a hanner!"

Mae cystadleuaeth Bandiau pres dosbarth 2/3 yn para tan oddeutu 11:45 ar lwyfan y pafiliwn.

Mae chwech o fandiau yn cystadlu sef Band Arian Crosskeys, Ammanford Town Silver Band, Band Pres Llansawel, Seindorf Arian Crwbin, Newport Borough Brass Band a Markham and District Band.

Y beirniad yw Gareth Robinson.

Mae'r Eisteddfod yn pwysleisio bod yna bob ymdrech i sicrhau prifwyl sy'n amgylcheddol gyfeillgar ac felly mae anogaeth i deithio ar drafnidiaeth gyhoeddus.

Dod ar drên?

Mae Trafnidiaeth Cymru'n rhedeg bysiau gwennol rheolaidd i'r Maes o orsaf Caerfyrddin, gyda'r bws olaf yn gadael y Maes i ddychwelyd i orsaf Caerfyrddin ar gyfer trên:

• 22:41 i Gaerdydd (Llun i Gwener);
• 21:34 (dydd Sadwrn);
• 21:15 (dydd Sul).

Mae'r gwasanaeth bws gwennol am ddim ac mae modd darllen yr amserlen yma, dolen allanol.

Mae nifer o orsafoedd trên eraill sy'n cysylltu â bysiau, ac mae modd dal trên i orsaf Abergwaun er mwyn cerdded i'r orsaf fysiau yn y dref a dal bws T5 sy'n mynd heibio'r Maes.

Dod ar fws?

Gallwch ddefnyddio gwasanaeth bws TrawsCymru T5 i fynd yn uniongyrchol i'r Eisteddfod yn Llantwd.

Mae TrawsCymru wedi cynyddu pa mor aml mae'r gwasanaeth T5 yn gweithredu rhwng Aberteifi ac Abergwaun rhwng 1 ac 8 Awst.

Mae gwasanaeth bws 430 yn darparu cysylltiad rhwng Arberth ac Aberteifi drwy Grymych.

Bydd y gwasanaeth yn rhedeg yn ddyddiol yn ystod yr Eisteddfod, gyda phob gwasanaeth yn teithio'r holl ffordd i ac o Arberth.

Bydd bws ychwanegol hwyr gyda'r nos hefyd yn gadael yn uniongyrchol o'r Maes am 23:15.

Mae gwasanaeth bws 460 yn darparu cysylltiad rhwng Caerfyrddin ac Aberteifi drwy Gastellnewydd Emlyn - o ddydd Llun i Sadwrn yn unig.

Newidiwch yn Aberteifi ar gyfer cysylltiad ymlaen i'r Maes ar wasanaeth T5 neu'r bws gwennol.

Gallwch hefyd ddefnyddio gwasanaeth bws fflecsi i deithio o amgylch yr ardal tra byddwch yno.

Bydd gwasanaeth bws gwennol (Bws yr Arglwydd Rhys) yn rhedeg yn rheolaidd rhwng Sgwâr Finch a'r Maes o 07:00 tan 00:00.

Mae'r gwasanaeth am ddim ac yn gadael y sgwâr ar yr awr i deithio i'r Maes ac yn gadael y Maes i ddychwelyd i Aberteifi bob hanner awr wedi.

Bydd disgyblion Ysgol Glannau Gwaun o Abergwaun yn chwarae offerynnau drwy'r dydd ym Mhentre Y Garreg Las, ar Lwyfan y Maes ac ym mhabell Gwasanaeth Cerddoriaeth Sir Benfro.

Dywedodd y pennaeth Mari Jones: "Mae dod i'r Eisteddfod yn brofiad bendigedig i'r plant ac maen nhw mor gyffrous. Mae'r ysgol yn ysgol ddwy ffrwd - Cymraeg a Saesneg a dyw llawer erioed wedi bod yn yr Eisteddfod Genedlaethol o'r blaen.

"Mae mor gyfleus a gwych i gael y brifwyl yng nghanol y tair sir ac mae'r bore cyntaf yn llawer prysurach nac o'n i yn feddwl."

"Dwi'n cofio mynd i faes Eisteddfod Abergwaun 1986 pan o'n i yn fach ac fe wnaeth hi fwrw drwy'r wythnos - felly mae'n wych cael diwrnod braf heddiw.

"Rydyn ni yn ddiolchgar iawn i Wasanaeth Cerddoriaeth Sir Benfro sy'n rhoi cyfle i bob disgybl ym mlwyddyn 4 i chwarae offeryn a rydyn ni ar y maes heddiw i ddathlu hynny," ychwanegodd.

Wrth agor y gynhadledd i'r wasg fore Sadwrn, dywedodd Cadeirydd y Pwyllgor Gwaith, John Cwmbetws: "Mae 'di bod yn bleser rhyfeddol.

"Mae'r fraint yn fwy fyth i fod wedi arwain tim diwyd - pobl sydd wedi rhoi ac ymroddi yn llwyr i'r wyth diwrnod hyn.

"Ry'n ni wedi cael hwyl anghyffredin wrth godi arian.

"O ffenest y gegin adref dwi'n medru gweld y deml eisteddfodol, dwi wedi gweld hi'n dod o'r ddaear fel Phoenix.

"Gobeithio y daw'r genedl yma yn ei miloedd."

Tywydd

Mae ’na ychydig o newid ar droed o ran y tywydd, felly dyma’r rhagolygon ar gyfer ardal yr Eisteddfod, fel maen nhw ar hyn o bryd, medd Llyr Griffiths-Davies, cyflwynydd tywydd Radio Cymru.

Dydd Sadwrn

Diwrnod sych a heulog, gydag awel ysgafn. Y tymheredd tua 18 i 20 gradd selsiws.

Dydd Sul

Bore heulog, ond yn cymylu yn ystod y prynhawn gydag ychydig o law ysbeidiol erbyn nos Sul. Y tymheredd tua 20-22 gradd selsiws.

Dydd Llun

Cyfnodau heulog, gyda chawodydd, all fod yn drwm ar brydiau, gyda mellt a tharanau’n bosib. Y tymheredd yn debygol o gyrraedd 23 gradd selsiws.

“Mae'n lyfli bod hon yn Steddfod leol i ni a ni mor falch bod Cymru yn cael ymweld â chornel y Wes Wes,” medd Begw a Steffan o Efailwen.

Dros Frecwast
BBC Radio Cymru

Wrth siarad ar Dros Frecwast bore 'ma dywedodd Elen Elis, Cyfarwyddwr Artistig yr Eisteddfod: "Mae yna arlwy eang iawn. Dwi yn ddiolchgar hefyd i bobl leol oherwydd ni wedi bod yn trefnu yr holl arlwy artistig gyda'r bobl leol a gyda phartneriaid wrth gwrs hefyd - ac mae artistiaid da yn gweithio efo ni o flwyddyn i flwyddyn.

"Da ni wedi eistedd rownd byrddau - mae pobl o gelfyddydau gwahanol wedi bod yn trafod themâu gan gynnwys enwogion, hanes a thirwedd a chynnyrch lleol,

"Mae 'na lwyth o arlwy i bawb. Ni wedi siapio amserlen ar y cyd - ac mae yna linyn cyswllt ar draws ein llwyfannau ni."

Mae ambell le ar y maes i brynu hufen iâ arbennig.

Bonnie o Abertawe yw’r cwsmer cynta'!

Roedd Jem Tynrhos a Jane Blank o Lanrhystud yn astudio'r map yn y brif fynedfa cyn mentro ar y maes. Bydd Jem ar stondin Clera ger y Tŷ Gwerin drwy'r wythnos yn cynnal sesiynau twmpath.

Mae Jane, sy'n awdures llyfrau hanesyddol, yn "edrych mlaen i grwydro'r maes, mwynhau'r awyrgylch a mynd i'r Lle Celf ynghyd â mynychu llu o ddigwyddiadau llenyddol".

“Co ni off! Mae'r Steddfod wedi dechre a fi mor falch o bawb sy' wedi bod yn rhan o’r paratoi.

"Braint yw cael bod yn llywydd a fi methu aros!” medd Mari Grug wrth gyrraedd y Maes.

Bydd Mari yn siarad yn y seremoni agoriadol am 13:45

Mae Gruffydd Rees ac Ifan, Llew a Fflur o Dryslwyn ger Llandeilo yn brysur yn y babell wyddoniaeth gydol y dydd.

Mae good vibe 'ma, medd Gruffydd wrth i'r haul dywynnu.

Mae Llantwd yng ngogledd Penfro a rhyw dair milltir o Aberteifi.

Os ydych yn gorfod teithio mewn car i'r Eisteddfod, y cyngor yw dilyn yr arwyddion 'Eisteddfod' melyn i gyrraedd y Maes. Y y cod post yw SA43 3NU.

Mae Maes B, y maes carafanau a gwersylla teuluol, Hwyrnos a maes pebyll Maes B, ynghyd â'r meysydd parcio i gyd yn agos at Faes yr Eisteddfod.

O'r gogledd a'r canolbarth:

Bydd traffig yn teithio i'r Maes ar yr A487, gan deithio i'r de o Aberystwyth, ymlaen i Synod Inn, heibio Aberteifi, cyn cyrraedd y safle, i'r gogledd o Lantwd ar yr A487.

O dde Cymru:

Bydd arwyddion clir yn cael eu gosod o gyffiniau Caerfyrddin ymlaen.

O'r ardal hon, dilynwch yr A40 i gyfeiriad cylchfan Penblewyn. Yno, cewch eich cyfeirio i gymryd yr A478 tua'r gogledd.

Parhewch hyd at y groesffordd gyda'r B4332, trowch i'r chwith a theithio tua'r gorllewin.

Dilynwch yr B4332 am tua dwy filltir, trowch i'r dde a dilyn y ffordd tuag at yr A487, nes cyrraedd y gyffordd gyda'r A487.

Ar ôl cyrraedd yr A487, ewch tua'r gogledd i gyfeiriad Aberteifi.

Parhewch am filltir nes cyrraedd y lleoliad, yn Llantwd.

Dod ar feic?

Mae hyd at 400 safle beic cloadwy wedi'u lleoli wrth ymyl y Ganolfan Groeso.

Y cyngor yw i chi gymryd gofal wrth feicio i'r Maes gan fod yr A487 yn gallu bod yn brysur.

Ffynhonnell y llun, Digwyddiadau Eisteddfod y Garreg Las

Mae yna groeso twymgalon iawn yn Llantwd

Ffynhonnell y llun, Digwyddiadau Eisteddfod y Garreg Las

Am 13:10 cystadleuaeth yr Unawd o dan 12 oed fydd ar lwyfan y Pafiliwn.

Y dasg eleni yw canu 'Fy ngardd fach i' gan J Eirian Jones.

Dyma'r olygfa o'r rhagbrawf ben bore.

Mae tair gwobr - £60, £40 a £20 - oll wedi cael eu rhoi gan Gwynfor, Sian a Rhiannon, er cof am Dad a theulu Pennar, Llandudoch.

Y beirniaid yw Catrin Aur a Jessica Robinson.

Mae'r criw yma o Grwbin newydd gyrraedd y Maes.

Mae Efan, Steffan a Dewi (y plant) wedi dod i gefnogi Cath a Buddug sy'n cystadlu heddiw gyda seindorf arian Crwbin.

Yn ôl Buddug "joio a ffindo Cyw yw plan y plant ar ôl i ni gystadlu".