Umucamanza yategetse ubutegetsi bwa Trump kureka gushyira ibikangisho ku bashinzwe amatora muri Amerika

Umucamanza wo ku rwego rw'igihugu muri Amerika yategetse leta y'icyo gihugu kureka gushyira ku nkeke abategetsi bashinzwe amatora ku rwego rw'uturere na za leta ivuga ko izabashyiriraho ibirego by'inshinjabyaha ku bw'uruhare rwabo mu gutunganya impapuro z'itora.

Uwo mucamanza wo muri leta ya California yategetse ko minisiteri y'ubutabera (DoJ) igomba kureka gusaba abategetsi bashinzwe amatora ku karere no ku rwego rwa za leta gushyira ku ruhande cyangwa kutabara amajwi amwe ubutegetsi bwa Trump buvuga ko ashobora kuva ku batari abenegihugu.

Icyo cyemezo gifashwe mu gihe hasigaye iminsi ibiri ngo habe amatora y'abagize inteko ishingamategeko aba hagati muri manda, azagena ishyaka rya politike rizagenzura inteko ishingamategeko y'Amerika mu myaka ibiri ya nyuma y'ubutegetsi bwa Perezida Donald Trump.

Ku wa gatandatu, Trump yanenze icyo cyemezo, arandika ati: "Kuki bakwanga gucyemura Uburiganya bwo mu Matora?"

Mu kwezi gushize muri leta ya California, inyandiko zo mu rukiko zigaragaza ko minisiteri y'ubutabera yoherereje amabaruwa umunyamabanga wa leta, ari na we mukuru w'ibikorwa by'amatora muri iyo leta, hamwe n'umwanditsi w'akarere ka Los Angeles, ibasaba gushyira ku ruhande impapuro z'itora z'abatora 20,000 biyandikishije ngo bazatore, ubutegetsi bwa Trump "bwemera" ko "bashobora" kuba atari abenegihugu.

Hashize hafi icyumweru, abategetsi bitwaje intwaro bo muri minisiteri y'umutekano mu gihugu bahaye amabaruwa abategetsi bo ku rwego rw'akarere n'abakozi bo muri California babakangisha kubashyiriraho ibirego by'inshinjabyaha nibaramuka badashyize ku ruhande izo mpapuro z'itora.

Ariko ayo matsinda yavuze ko adashobora gukurikiza ibyo yasabwe kuko agomba gukurikiza uburyo bw'amatora bugengwa n'amategeko yo ku rwego rwa leta n'ayo ku rwego rw'igihugu. Umucamanza yatesheje agaciro ubwo busabe, yandika ko ibyo "byayogoza" amatora.

Muri icyo gihe kandi, amakuru avuga ko minisiteri y'ubutabera yatangiye iperereza ryo mu rwego nshinjabyaha ku bategetsi bashinzwe amatora mu karere, itanga inzandiko z'urukiko zibahamagaza kwisobanura imbere y'inteko nkuru iburanisha yo ku rwego rw'igihugu.

Imiryango iharanira uburenganzira bwa muntu n'amashyirahamwe aharanira inyungu z'abakozi bo mu rwego rw'amatora yatanze ikirego mu rukiko, ishinja minisiteri y'ubutabera kwivanga mu nshingano yabo yo gukoresha amatora. Umucamanza Trina Thompson yategetse ubutegetsi bw'Amerika guhagarika ibyo bikorwa byabwo.

Umucamanza Thompson yanditse ati: "Nubwo Abaregwa bavuga ko ibikorwa byabo bigamije guhagarika gutora mu buryo butemewe n'amategeko kw'abatari abenegihugu, ibikorwa byabo bishobora gutuma habaho kwivanga mu migendekere y'amatora no kwambura uburenganzira abatora bemewe n'amategeko."

Ubutegetsi bwa Trump bwanoherereje leta ya Washington ibaruwa nk'iyo ijyanye n'abavugwa ko ari abatora batari abenegihugu, busaba ko umunyamabanga wa leta waho ahagarika gutunganya izo mpapuro z'itora, nkuko bikubiye muri icyo cyemezo cya Thompson.

Ayo mayeri ari mu buryo bumaze imyaka bukoreshwa na Trump n'ubutegetsi bwe mu kurwanya ikivugwa ko ari uburiganya mu matora bemeza ko bukorwa henshi mu gihugu, nubwo ubushakashatsi bugaragaza ko ibyo bibaho gacye cyane.

Mbere yuko amatora yo hagati muri manda aba ku itariki ya 3 y'uku kwezi kw'Ugushyingo (11), Perezida Trump yashidikanyije ku mutekano w'amatora – avuga ko uburiganya "burimo kwiyongera cyane" ku batora hifashishijwe iposita no ku batora batari abenegihugu. Trump yanemereye igihembo cya miliyoni y'amadolari (ingana na miliyari 1, 4 FRW) umuntu wese uzajya umenyekanisha ahantu habaye uburiganya mu matora muri Amerika bikavamo guhamwa n'icyaha.

Ariko ubushakashatsi bunyuranye bwumvikanisha ko ibyo bibaho gacye cyane. Ishami rya BBC rigenzura ukuri kw'amakuru, ryitwa BBC Verify, ryatangaje ko ububikoshingiro bw'amakuru bw'ikigo Heritage Foundation bwasanze harabayeho abatari abenegihugu 24 bahamwe no gutora hagati y'umwaka wa 2005 n'uwa 2025.

Mu butumwa yatangaje ku wa gatandatu, Trump yanenze ibyemezo ubutegetsi bwe buherutse gufatirwa bijyanye n'ibirego by'uburiganya bushobora kubaho mu matora ndetse yasezeranyije gukomeza guharanira ko habaho "Amatora nta Makemwa".