KAI TSAYE , Abubuwan da ke faruwa a Najeriya da sauran sassan duniya, Alhamis 05/11/2026

Rahoto kai-tsaye

Abdullahi Bello Diginza

1. Mintuna 9 da suka wuceDole ne mu riƙa ɗora wa Trump alhaki idan muka fara jagorantar majalisa

   Babban Sanatan Amurka, Bernie Sanders, ya ce bayan jam’iyyar Democrat ta karɓe ikon majalisar dokokin ƙasar, dole ne a “riƙa ɗaukar mataki kan” shugaban Amurka, Donald Trump.

   Da aka tambaye shi a shirin BBC Newsnight ko yanzu Democrats za su gurfanar da Trump da kuma ’yan uwansa a gaban kuliya tare da tsige shi, Sanders ya ce: “Tabbas.”

   Sanatan mai ra’ayin kawo sauyi, wanda ke da tasiri kuma mai zaman kansa ne, ya soki halin da jam’iyyar ke ciki duk da nasarar da ta samu a zaɓukan tsakiyar wa’adin mulki.

2. Mintuna 49 da suka wuce'Nasarar Demokrats koma-baya ce ga Trump da Isra'ila'

   Wasu kafofin yaɗa labaran Isra'ila sun bayyana sakamakon zaɓen tsaiyar wa'adin Amurka a matsayin “babbar koma baya” ga Donald Trump da Isra’ila, kamar yadda Sashen Fasha na BBC ya ruwaito.

   Yayin da suke tattauna nasarar Democrats a jihohin da Republican ke da ƙarfi, waɗannan kafafen yaɗa labaran sun bayar da misali ga nasarar Abdulrahman Abdul-Sayed a matsayin sanata Musulmi na farko a Amurka, da kuma matsayinsa na suka ga Isra’ila.

   A lokaci guda, wasu manazarta Isra’ila sun ɗora alhakin sanarwar da Trump ya yi kan yiwuwar kawo ƙarshen tallafin soji da Amurka ke bai wa Isra’ila a shekarar 2027 a kan Benjamin Netanyahu, tare da gargadin illolin siyasa da na kuɗi da hakan ka iya haifarwa.

   Kafafen yaɗa labarai na Isra’ila sun mayar da hankali kan sakamakon zaɓukan tsakiyar wa’adin mulki na Amurka, inda jam’iyyar Democrat ta karɓe ikon duka Majalisar Wakilai ta Amurka da kuma Majalisar Dattawan Amurka.

   Jaridar Haaretz mai ra’ayin sassaucin ta riƙa bayar da rahotonni zaɓukan na Amurka kai tsaye tare da ci gaba da sabunta sakamakon zaɓen.

3. Sa'a 1 da ta wuceDemokrats na shirin ɗaukar matakan kawo ƙarshen yaƙin Iran

   Jam'iyyar hamayya ta Demokrats a Amurka, wadda ta samu gagarumar rinjaye zaɓukan tsakiyar wa'adi da aka gudanar a ƙasar ta jaddada ƙudurin kawo ƙarshen yaƙin Iran.

   Chuck Schumer, wanda shi ne shugaban marasa rinjaye na majalisar dattawan ƙasar kafin gagagarumar nasarar da jamiyyarsa ta samu, wanda kuma a yanzu ake sa ran zai zama shugaban masu rinjaye, ya jaddada muhimmancin kawo ƙarshen yaƙin na Iran.

   ''Dole ne mu ɗauki matakan kawo ƙarshen yaƙin idan har muna son cika alƙawuran da muka ɗaukar wa Amurkawa kafin wannan zaɓe'', in ji shi.

   A jawabin da ya yi bayan jam'iyyarsa ta Republican ta sha kaye a zaɓukan, Shugaba Trump ya amince cewa yaƙin Iran ne ya haddasawa jam'iyyarsa faɗuwa zaɓen.

   Shugaban marasa rinjaye na majalisar wakilan ƙasar, Hakeem Jeffries ya ce jam’iyyar Democrats za ta mayar da hankali wajen fafutukar samar da rayuwa mai sauƙi ga Amurkawa, da kuma tabbatar da gaskiya da adalci a ayyukan hukumomin gwamnati.

   Sai dai a bayanne take cewa Jeffries da Schumer za su fuskanci ƙalubale wajan aiki tare da Shugaba Donald Trump, a dan haka sai sun nemi hanyar da za ta tabbatar cewa Mista Trump bai yi amfani da ikon shugaban ƙasa wajan ƙin amincewa da manufofinsu ba.

4. Sa'a 1 da ta wuceIlhan Omar ta gode wa magoya bayanta kan sake zaɓenta

   Ƴar majalisar wakilan Amurka mai wakiltar gundumar Minnesota ta biyar, Ilhan Abdullahi Omar ta gode wa ɗimbin magiya bayanta kan sake zaɓenta a zaɓen tsakiyar wa'adin Amurka.

   Cikin wani saƙo da ta wallafa a shafinta na sada zumunta bayan samun nasararta, ƴar majalisar ta ce ''ina godiya a gare ku al'ummar Minnisota, ba zan taɓa mantawa da karimcin da kuke nuna min ba''.

   Ilhan ƴar asalin Somaliya, kuma ƴar jam'iyyar hamayya ta Demokrats na wakiltar gundumar tun 2019.

   Ƴarmajalisar ta yi suna wajen sukar manufofin shugaban Amurka Donald Trump, wanda shi ma ya sukarta a bainar jamar.

   A baya-bayan nan ma wasu jami'an tsaro suka kai samame gidanta da ke birnin Washington da nufin gudanar da bincike.

5. Sa'o'i 2 da suka wuceTinubu ya koma Najeriya bayan kammala Umarah a Saudiyya

   Shugabna Najeriya, Bola Tinubu ya koma ƙasar bayan kammala ziyarar Umara zuwa Saudiyya.

   Jirgin shugaban ƙasar ya sauka a filin jirgin saman Abuja, babban birnin ƙasar ranar Laraba da daddare.

   A makon da ya gabata ne shugaban Najeriya ya tafi ziyarar ibadar zuwa Saudiyya.

   A lokacin ziyarar shugaban ya samu damar shiga ɗakin Ka'abar.

6. Sa'o'i 3 da suka wuceWasu ƴan Republican sun fara nesanta kansu da Trump

   Jamiyyar Republicans mai mulki a Amurka, ta fara nazari kan dalilan da suka sa jam'iyyar ta sha mummunan kaye a zaɓen tsaiyar wa'adi.

   Sakamakon zaɓen ya sa jam'iyyar Demokrats mai hamayya ta ƙwace rinjayen majalisun dokokin kasar biyu.

   Faɗuwar da Repbulican ta yi a zaɓen, na ɗaya daga cikin munanan shan kayen da ta taɓa fuskanta a tarihi.

   Ƴan jam'iyyar sun fara nazari kan makomar jamiyyar bayan shugabancin Donald Trump.

   Wasu daga cikin aminansa sun fara nesanta kansu da shugaban Amurkan, musamman mataimakinsa, JD Vance.

   Mista Vance ya ɗora alhakin shan kayen kan yakin da Amurka ke yi da Iran, kodaya ke ra’ayinsa ya zo ɗaya da na Shugaba Trump wanda da kansa ya ce yaƙin Iran ne ya sa suka faɗi a zaɓen.

7. Sa'o'i 3 da suka wuceMaraba lale

   Masu bin shafin BBC Hausa kai-tsaye barkanmu da safiyar wannan rana ta Alhamis.

   Yau ma dai kamar jiya Abdullahi Bello Diginza ke fatan sake kasancewa da ku a daidai wannan lokaci domin kawo muku irin wainar da ake toyawa a faɗin duniya.

   Ku biyo mu a shafukanmu na sada zumunta domin tafka muhawara kan labaran da muke wallafawa.