Abubuwan da ke faruwa a Najeriya da sassan duniya

Rahoto kai-tsaye

Nabeela Mukhtar Uba

1. 9 Oktoba 2026Mutum 29 sun mutu a hatsarin mota a Tanzania

   Aƙalla mutum 29 ne suka mutu yayin da kusan 30 suka jikkata a wani mummunan hatsarin mota da ya auku a yankin Morogoro da ke gabashin Tanzania.

   'Yansanda sun ce hatsarin ya faru ne bayan wata babbar mota ɗauke da itatuwa ta yi yunƙurin wuce wata mota, inda ta yi karo da wata motar fasinja.

   Motar fasinjan ta kama da wuta nan take, lamarin da ya yi sanadin mutuwar mutum 28 da ke cikinta, yayin da mutum ɗaya a cikin babbar motar shi ma ya mutu.

   Mutanen da suka jikkata na samun kulawa a asibiti, yayin da jami'ai ke ƙoƙarin gano waɗanda suka mutu.

   A wani hatsari na daban da ya faru a yankin a wannan rana, mutum huɗu ciki har da 'yansanda uku sun mutu, yayin da wasu bakwai suka jikkata.

2. 9 Oktoba 2026Zan ɗauki matakan kawo ƙarshen yaƙin Iran - Putin

   

   Asalin hoton, AFP via Getty Images

   Shugaban Rasha Vladimir Putin ya ce ƙasarsa a shirye take ta ɗauki "duk matakan da suka dace" domin taimakawa wajen kawo ƙarshen yaƙin Iran.

   Putin ya bayyana hakan ne yayin ganawarsa da shugaban Iran Masoud Pezeshkian a Turkmenistan, inda ya ce Rasha za ta yi duk mai yiwuwa domin warware rikicin.

   Ya kuma yi zargin cewa Iran ba ita ce ta haddasa rikicin ba, tare da yaba ci gaban dangantaka tsakanin Tehran da Moscow.

   A nasa ɓangaren, Pezeshkian ya ce Iran na ci gaba da neman mafita ta hanyar tattaunawa da Amurka, amma ya jaddada cewa ƙasarsa ba za ta amince da matakan bai-ɗaya ba.

   Ya kuma ce burinsu shi ne kawo ƙarshen yaƙin tare da kare haƙƙin al'ummar Iran bisa dokokin ƙasa da ƙasa.

3. 9 Oktoba 2026NDLEA ta gano bindigogi 40 da jabun takardun kuɗi a Kogi

   

   Asalin hoton, Getty Images

   Hukumar Hana Sha da Fataucin Miyagun Ƙwayoyi ta Ƙasa (NDLEA) reshen Jihar Kogi ta ce ta kama sama da tan 10 na miyagun ƙwayoyi tare da ƙwato bindigogi 40 da harsasai 874 daga waɗanda ake zargi da fataucin miyagun ƙwayoyi tun daga ƙarshen shekarar 2025.

   Hukumar ta kuma ƙwato jabun takardun kuɗi na Naira, Dala da Fam, da kuma jabun magunguna, waɗanda aka miƙa wa hukumomin da suka dace domin ci gaba da bincike.

   Shugaban hukumar NDLEA a jihar, Mista Umar Yahuza, ne ya bayyana hakan a Lokoja yayin da yake zantawa da manema labarai jim kaɗan bayan miƙa makaman da harsasan da aka ƙwato ga Cibiyar Kula da Ƙananan Makamai da Ƙananan Makamai.

   Daily Trust ta ruwaito cewa makaman da aka ƙwato sun haɗa da bindigogi ƙanana guda biyar da wasu bindigogi 35. Ya ce an kama mutane da dama da ake zargi da hannu a fataucin miyagun ƙwayoyi da sauran laifuka masu alaƙa da hakan a tsukin lokacin.

   Ya ƙara da cewa da yawa daga cikin waɗanda ake zargin suna fuskantar shari’a a Babbar Kotun Tarayya da ke Lokoja, inda maza suka kai sama da kashi 80 cikin 100 na masu fuskantar tuhumar.

   Yahuza ya ce miyagun ƙwayoyin da aka kama sun haɗa da tramadol, hodar Iblis, methamphetamine da tabar wiwi inda tabar wiwi ta fi yawa a cikin adadin da aka kama.

   Ya bayyana cewa an ƙwato wasu daga cikin makaman ne daga hannun mutanen da ake zargi da noman tabar wiwi, waɗanda suka mallaki makaman domin tunkarar jami’an tsaro yayin ayyukan sintiri da kama masu laifi.

   Shugaban NDLEA na jihar ya tabbatar da cewa rundunar za ta ci gaba da yaƙi da masu fataucin miyagun ƙwayoyi da sauran masu aikata laifuka. Ya kuma buƙaci jama’a su riƙa bai wa hukumomin tsaro bayanan da za su taimaka wajen yaƙi da laifuka.

   Haka kuma ya gargadi mazauna jihar da su guji taimaka wa masu laifi, yana mai jaddada cewa fataucin miyagun ƙwayoyi da amfani da su ba bisa ƙa’ida ba na ƙara haddasa matsalolin tsaro, garkuwa da mutane da sauran laifuka a cikin al’umma

4. 9 Oktoba 2026An rufe wasu makarantun Malaysia sakamakon hayaƙi daga gobarar daji

   An rufe makarantu a wasu jihohin Malaysia a yau Juma'a, sakamakon hayaki daga gobarar daji a Indonesia, wanda ya sa gurbatar iska ta kai matakin da ke barazana ga lafiya.

   Yankunan da lamarin ya shafa sun haɗa da babban birnin ƙasar, Kuala Lumpur, da kuma cibiyar gudanarwar gwamnati ta Putrajaya.

   A Singapore ma, an samu gurbacewar iska mafi muni a kasar.

   Indonesia na fama da gobarar daji mafi muni a cikin sama da shekara goma.

5. 9 Oktoba 2026Za a nuna hukuncin kisa ta hanyar harbi kai tsaye a Amurka

   

   Asalin hoton, AFP via Getty Images

   Sakataren harkokin Tsaron Amurka, Pete Hegseth, ya ce za a bai wa jama'a damar kallon yadda za a zartar da hukuncin kisa ta hanyar harbi kan Nidal Hasan, wanda aka samu da laifin kai harin bindiga a sansanin sojin Fort Hood a shekarar 2009.

   Wani jami'in ma'aikatar tsaron Amurka ya tabbatar da cewa za a watsa yadda za a zartar da hukuncin kai tsaye ta intanet.

   Hasan, wanda tsohon likitan masu fama da matsalar ƙwaƙwalwa ne a rundunar sojin Amurka, ya kashe sojoji 13 tare da raunata wasu 32 a harin da ya kai a Fort Hood da ke jihar Texas.

   Wakiliyar BBC ta ce an shirya zartar da hukuncin kisan ne a sansanin soja na Fort Hood da ke jihar Texas a ranar 3 ga watan Disamba, kuma zai zama karo na farko da sojin Amurka za su zartar da hukuncin kisa ta hanyar harbi tun bayan kawo karshen Yaƙin Duniya na Biyu

6. 9 Oktoba 2026Salam Alaikum!

   Masu bin mu a wannan shafi na Kai Tsaye da BBC Hausa ke kawo muku a kowace rana, barka da warhaka.

   Da fatan mun wayi gari lafiya. Kamar kodayaushe, a yau ma za mu ci gaba da kawo muku labarai da rahotanni na abubuwan da ke faruwa a duniya – musamman a Najeriya da ƙasashe maƙwabta.

   Za ku iya garzayawa shafukanmu na sada zumunta – Fesbuk da Tuwita da kuma Instagram inda a nan ma muka wallafa ƙarin labarai da bidiyo.

   Sai ku kasance tare da mu.