Alvarez zai koma buga wa Atletico Madrid wasanni

Rahoto kai-tsaye

Ibrahim Mohammed, Haruna Kakangi, Buhari Fagge

1. 31 Agusta 2026Dortmund na son ɗaukar aron Nwaneri daga Arsenal

   Borussia Dortmund ta tuntuɓi Arsenal kan batun ɗaukar Ethan Nwaneri a matsayin aro zuwa ƙarshen kakar wasan bana.

   Arsenal dai ta shirya barin Nwaneri ya tafi aro kafinrufe kasuwar musayar ƴan wasaa ranar Talata, kuma ana ci gaba da tattaunawa tsakanin ƙungiyar ta Premier League da takwararta ta Bundesliga.

   An fahimci cewa Dortmund ta gabatar da tayi ga Arsenal, kuma ana sa ran za a yanke hukunci kan wannan tayi a gobe da safe.

   A farkon wannan watan ne BBC Sport ta bayyana cewa Arsenal za ta fi ba da fifiko ga tayin ɗaukar Nwaneri a matsayin aro, kasancewar ƙungiyar ba ta son sayar da matashin ɗan wasan na ta kan yarjejeniyar dindindin.

   Makomar ɗan wasan mai shekara 19 ta kasance batun da ake ta ce-ce-ku-ce a kai a wannan bazarar, inda matashin da ya taso daga makarantar horas da matasa ta Arsenal ya ja hankalin manyan ƙungiyoyi a gasar Premier League da sauran sassan Turai.

2. 31 Agusta 2026Tottenham na nazarin yiwuwar ɗaukar Mudryk a matsayin aro

   Tottenham na tattaunawa kan ɗaukar ɗan wasan gefe na Chelsea, Mykhailo Mudryk, a matsayin aro na tsawon kakar wasa guda.

   Ɗan wasan mai shekara 25 yana da matuƙar sha'awar buga wasa a gasar Premier League bayan ya warware matsalar tuhumar amfani da haramtattun ƙwayoyi da Hukumar Kwallon Kafa ta yi masa a watan da ya gabata.

   Chelsea ta tattauna da Leeds amma ta ƙi amincewa da tayin da aka yi mata.

   Yanzu Tottenham ta shiga takarar neman ɗan wasan a matakin ƙarshe bayan ta yi ƙoƙarin ɗaukar ɗan wasan gaba na Everton, Iliman Ndiaye, da kuma ɗan wasan gaba na Liverpool, Cody Gakpo.

   A yanzu su ne suka fi kusa da ɗaukar ɗan wasan na tawagar ƙasar Ukraine, wanda bai buga wasa ba tun watan Nuwamban 2024.

   Haka kuma, Tottenham ta nuna sha'awarta ta ɗaukar ɗan wasan baya na Chelsea, Tosin Adarabioyo.

   An fahimci cewa Mudryk a shirye yake ya koma Arewacin Landan, sakamakon kyakyawar alaƙa da ke tsakaninsa da Roberto de Zerbi, wanda ya horas da shi a kungiyar Shakhtar Donetsk.

   Mudryk ya koma Chelsea ne daga Shakhtar Donetsk a shekarar 2023 kan kuɗi fam miliyan 61.

3. 31 Agusta 2026Everton ta yi tayin sayen Balogun daga Monaco

   Everton ta gabatar da tayin sayen ɗan wasan gaba na Monaco, Folarin Balogun — wanda kulob ɗin na Faransa ya ƙiyasta darajarsa ta kai fam miliyan 40.

   Everton na son ƙarfafa ɓangaren ƴan wasanta na gaba kafin a rufe kasuwar musayar ƴan wasa a ranar Talata, inda take zawarcin Balogun da kuma ɗan wasan gaba na Tottenham, Richarlison.

   Ana ganin Richarlison na da shakku game da komawa Everton, kulob ɗin da ya baro domin komawa Spurs a shekarar 2022.

   Sai dai Everton na ci gaba da nuna sha'awarta ta sayen ɗan wasan gaba na Amurka, Balogun, kuma ta riga ta gabatar da tayi ga ɗan wasan mai shekara 25.

   Ana jiran a ga ko tayin ya isa ya gamsar da Monaco har ta amince ta saki Balogun.

   Amma tsohon ɗan wasan na Arsenal ya zama babban ɗan wasan da Everton ke son ɗauka kafin ƙarshen kasuwar wannan bazarar.

   Balogun ya kasance cikin wani babban cece-kuce a lokacin gasar cin kofin duniya, inda aka kore shi daga filin wasa saboda mummunan ƙetar da ya aikata a wasan da suka buga da Bosnia-Herzegovina a zagayen ƴan 32 na gasar, kuma ya kamata a ce an dakatar da shi nan take.

   Sai dai kwamitin ladabtarwa na hukumar ƙwallon ƙafa ta duniya (FIFA) ya dage dakatarwar tasa na tsawon shekara guda — matakin da ya jawo suka sosai, musamman bayan da aka gano cewa Shugaban Amurka Donald Trump da jami'an Fadar White House sun yi tunkari hukumar FIFA domin neman a sassauta hukuncin da aka yi wa ɗan ƙasar Amurkar.

4. 31 Agusta 2026Wane ciniki ne zai faɗa cikin waɗannan?

   Duk da cewa tun ranar 15 ga watan Yuni aka buɗe kasuwar musayar ƴanwasa amma har yanzu wasu ƙungiyoyin Premier na nan suna faɗi-tashin ganin sun kammala cinikin ƴanwasa kafin lokacin da kasuwa za ta rufe, ƙarfe 12 na daren ranar Talata.

   Kama daga Julian Alvarez zuwa Enzo Fernandez, Cody Gakpo da Ismaila Sarr, ana sa ran wataƙila a ji wani babban labari.

   To amma dole ne fa sai an hanzarta kafin kulle ƙofar kasuwa.

   Julian Alvarez zuwa Barca ko Arsenal

   Da alama tafiyar Julian Alvarez zuwa Arsenal za ta iya zama labarin da aka fi kasa kunne ana jira yayin da har yanzu babu tabbas kan makomar ɗanwasan gaban na Atletico Madrid.

   Ɗanwasan mai shekara 26 na tsakiyar dabarwar zaɓi biyu: ko dai ya bi zuciyarsa zuwa Barcelona, inda ƙungiyarsa ta ce atafau, ko kuma abu mafi sauƙi shi ne tafiya Arsenal.

   Arsenal ta daɗe tana sha’awar ɗaukar Alvarez kuma ƙungiyar na bibiya sau da ƙafa halin da yake ciki a Atletico, inda ƙungiyarsa ke neman kuɗin da bai gaza fam miliyan 128 ba.

   Enzo zuwa Manchester City

   Enzo bai buga wasan da Chelsea ta yi nasara ba a ƙarshen mako kan Brighton, kuma makomarsa a ƙungiyar na ci gaba da rawa ganin cewa ana alaƙanta shi da wani ciniki mai tsoka zuwa Manchester City.

   Koci Enzo Maresca ya yi aiki da Enzo a lokacin da yake horas da Chelsea, yanzu kuma yana neman yadda zai ƙara ƙarfin ƙungiyarsa bayan tafiyar Rodri, Bernando Silva, Nico Gonzalez da kuma Tijjani Reinders.

   Gakpo zuwa City ko Spurs

   Mancester City ta fara tattaunawa da Liverpool kan sayen ɗanwasan gaba na Liverpool Cody Gakpo, kuma da alama ɗan asalin ƙasar ta Netherlands na son tafiya.

   Kuma akwai yiwuwar Liverpool ta ƙyale shi ya tafi bayan sayen ɗanwasa Bradley Barcola.

   Haka nan Tottenham ma na neman ɗanwasan sai dai rahotanni sun ce City ta miƙa tayin kuɗin da ya kai fam miliyan 85, kuma ana tunanin cewa Gakpo zai fi son tafiya Cityn.

5. 31 Agusta 2026Messi ya yi ritaya daga buga wa Argentina wasa

   Kyaftin ɗin Argentina Lionel Messi ya sanar da yin ritaya daga buga ƙwallon ƙafa a matakin ƙasa da ƙasa, inda ya bayyana cewa wannan mataki ya sosa masa rai amma ya yi la'akari da cewa "lokaci ya yi".

   Ɗan wasan mai shekara 39, wanda ya jagoranci Argentina wajen lashe Kofin Duniya a Qatar a shekarar 2022, ya zura Ƙwallaye 125 a wasanni 207 da ya buga, lamarin da ya sanya shi zama ɗan wasan Argentina da ya fi kowa yawan zura ƙwallaye da kuma yawan buga wa ƙasar wasa a tarihi.

   A wani saƙo da ya wallafa a shafinsa na Instagram, Messi ya ce ya bayar da dukkan ƙarfinsa ga tawagar ƙasar, amma yanzu "ba shi da sauran abin da zai bayar".

   A farkon watan Agusta, Messi ya bayyana cewa yana nazarin makomarsa a fagen ƙwallon ƙafa bayan rasuwar mahaifinsa, Jorge, wanda ya rasu yana da shekaru 68 bayan doguwar jinya.

   Wanda ya lashe kyautar Ballon d'Or sau takwas ɗin ya ce ya rubuta saƙon sanarwar yin ritayarsa ne a ranar 21 ga watan Yuli, kwana biyu bayan da Argentina ta sha kashi a hannun Spain a wasan ƙarshe na gasar cin kofin duniya da aka gudanar a wannan bazarar.

   Latsa nan domin karanta cikakken labarin.

6. 31 Agusta 2026Valencia na son ɗaukar aron Elliott daga Liverpool

   Valencia na tattaunawa da Liverpool kan ɗaukar Harvey Elliott a matsayin aro har zuwa karshen kakar wasan bana.

   Ɗan wasan mai shekara 23 ya kamala kakar wasa ta bara a matsayin aro a Aston Villa amma wasa ɗaya kacal ya buga a gasar Premier.

   Valencia, wadda ta ƙare a matsayi na tara a gasar La Liga a kakar wasa da ta gabata kuma ba ta cancanci shiga gasar Turai ba, tana aiki don nemo hanyar da za ta dace don tabbatar da yarjejeniyar.

   Ƙungiyar ta Spain tana son Liverpool ta biya rabin albashin ɗan wasan.

   Elliott ya yi wasa akai-akai a lokacin wasannin share fage na fuskantar kakar bana a ƙarƙashin sabon kocin Andoni Iraola amma daga baya an cire shi daga cikin wasanni biyu na farko na Premier League na ƙungiyar.

7. 31 Agusta 2026Munoz ya koma Nottingham Forest daga Crystal Palace

   Nottingham Forest ta kammala cinikin daukar dan wasa Daniel Munoz daga Crystal Palace kan kudi £22m.

   Ɗan wasan bayan na gefen dama, wanda ɗan ƙasar Colombia ne, zai sake haɗuwa da koci Oliver Glasner a filin wasan City Ground, bayan sun lashe kofin FA da kuma Conference League tare a kungiyar Palace.

   Ya rattaba hannu kan kwantiragin shekara uku bayan ya shafe shekaru biyu da rabi a Selhurst Park, inda ya zura ƙwallaye 11 a wasanni 109 da ya buga.

   Munoz ya bi sahun Liam Delap, wanda aka ɗauko kan kuɗi £50m, kuma yana iya fara buga wa ƙungiyar wasa a karawar da za ta yi da Tottenham Hotspur a gasar Premier ranar Asabar mai zuwa.

   Munoz, wanda ya buga wa ƙasarsa wasanni 51, ya kuma taimaka wa Palace wajen lashe kofin Community Shield a shekarar 2025.

8. 31 Agusta 2026Manchester City ta kammala ɗaukar Allan daga Palmeiras

   Manchester City ta kamala daukar dan wasan gefe Allan Elias daga Palmeiras kan yarjejeniyar da ta kai fam miliyan 34.

   A tashin farko dai City ta biya fam miliyan 32 a kan dan wasan na Brazil mai shekara 22, tare da karin fam miliyan 2.2 idan aka cika wasu sharudda, ya kuma rattaba hannu kan kwantiragin shekara biyar.

   Allan ya zo ne domin ya maye gurbin takwaransa dan kasar Brazil, Savio, wanda ya kammala komawa Tottenham Hotspur kan fam miliyan 75 a makon da ya gabata.

   Dan wasan mai buga gefen dama ya zura kwallaye tara tare da taimakawa aka ci wasu guda 12 a wasanni 96 da ya buga a dukkan gasanni da kungiyar Palmeiras.

   Allan shi ne sabon dan wasan da aka kara a tawagar Enzo Maresca a wannan bazarar.

   Ya zuwa yanu dai City ta kashe sama da fam miliyan 230 a wannan bazarar, inda ta dauki Elliot Anderson daga Nottingham Forest kan fam miliyan 116 da kuma Ayyoub Bouaddi daga Lille kan fam miliyan 85.6

9. 31 Agusta 2026Barcola ya koma Liverpool daga PSG kan kuɗi £123m

   Liverpool ta kammala ɗaukar ɗan wasan gaba na Faransa, Bradley Barcola, daga ƙungiyar Paris St-Germain kan kuɗin da ka iya kaiwa fam miliyan 123.

   Da farko, PSG ta sanya wa dan wasan mai shekaru 23 farashin fam miliyan 145, amma Liverpool za ta biya fam miliyan 106 a matsayin na farko, tare da karin fam miliyan 17 da za a iya biya dangane da wasu sharudda na gaba.

   Barcola ya rattaba hannu kan kwantiragin shekaru biyar, inda ya zama sabon dan wasa na biyar da ya koma Anfield a wannan bazara, bayan daukar dan wasan gefe Victor Munoz da masu tsaron baya Jeremy Jacquet, Ronald Araujo da Ifeanyi Ndukwe.

   "An ɗauki lokaci mai tsawo, amma ina matuƙar farin ciki a yau da na samu damar buga wa Liverpool wasa; abin da kawai nake so shi ne in kasance a filin wasa kuma in samu damar taka leda," in ji Barcola.

   "Ina fatan cimma manyan nasarori. Abu na farko shi ne lashe gasar Premier League - wannan yana ɗaya daga cikin manyan burina a rayuwa."

   Barcola ya koma PSG daga Lyon a shekarar 2023 kan kuɗin da aka bayyana cewa ya kai fam miliyan 38.5, inda ya lashe kofunan Ligue 1 guda uku da Champions League guda biyu da French Cup sau biyu, da UEFA Super Cup da kuma FIFA Intercontinental Cup.

10. 31 Agusta 2026Barka da warhaka!

    Barka da zuwa shafin labaran wasannin kai-tsaye na BBC Hausa.

    Shafin da babu kamar shi wajen kawo muku muhimman abubuwa da ke faruwa a duniyar wasanni.

    Za ku iya tafka muhawara kan labaran da muke kawo muku a shafukanmu na sada zumunta: Facebook, Instagram da X.

    Haka nan za ku samu labarai da ɗumi-ɗuminsu a zaurenmu na BBC Hausa WhatsApp idan kuka latsa nan.

    Ku je shafinmu na YouTube domin kallon ƙayatattun bidiyoyi na bayanai kan labaran da suka shafe ku.