Naidheachdan 11:00m

An Spàinn

Tha aithrisean ann gun do chaill air a' char as lugha 30 duine am beatha ann an tubaist-rèile faisg air Toledo ann am meadhan na Spàinne. Tha e coltach gun do bhuail trèana a bha a' siubhal à Madrid ann an ceann a deas na dùthcha ann an trèana a bha na stad. Chaidh 46 duine a mharbhadh ann an tubaist eadar dà thrèana air an aon shlighe san Fhaoilleach.

Buidseat

Thuirt an Seansalair, John Healey, gun cuir e às dhan chìs-stèidhte air cunntasan gas airson, na bhriathran fhèin, faochadh a dhèanamh do theaghlaichean. Tha Roinn an Ionmhais den bheachd gun sàbhail sin mu £45 sa chumantas gach bliadhna dhan mhòr-chuid de dhachaighean. Bheir Mgr Healey seachad a' chiad bhuidseat aige tràth feasgar.

Iosrael

Thuirt dithis cheannardan an dà phartaidh phoileataigeach as motha a th' ann an Iosrael gum feuch iadsan ri riaghaltas a stèidheachadh an dèidh an taghaidh choitchinn an-dè. Aig an ìre seo, le mu leth den bhòt air chunntas, tha coltas gum faigh am Prìomhaire a th' ann, Benjamin Netanyahu, an àireamh as motha sheataichean ach nach bi sin gu leòr airson mòr-chuid.

Obar Pheallaidh

Ghabh Comhairle Coimhearsnachd Obar Pheallaidh ann an Siorrachd Pheairt ri plana chonnspaideach am baile a chèileachadh ri Salado ann an Teagsas, a dh'aindeoin iomairt an aghaidh sin. Tha feadhainn mì-thoilichte le taic Salado dhan Cheann-Suidhe Trump, agus cuideachd cho faisg 's a tha am baile air Fort Hood, far a bheil dùil prìosanach a chur gu bàs anns an Dùbhlachd. A dh'aindeoin sin bhòt a h-uile comhairliche, ochdnar dhiubh gu lèir, airson a' ghluasaid.