Spòrs

Tùs an deilbh, RSAC Motorsport

Bha cùisean gu math teann eadar na prìomh fharpaisich aig Ralaidh RSAC na h-Alba ann an Dail Beithich aig an deireadh-sheachdain.

Thàinig Garry Pearson is Hannah NicFhilip am bàrr às dèidh dhaibh trì stèidsean a ghlèidheadh anns a' Fiesta Rally 2 aca.

B' e Dàibhidh Bogie agus Ciorstaidh Riddick, à Dùn Phris is Gall-Ghàidhealaibh a bhuannaich na trì stèidsean eile, gam fàgail dìreach 15 diogan air dheireadh air Pearson is NicFhilip.

Agus cha robh ach 28 diogan eadar na prìomh 3 chàraichean, le Mark McCulloch is Mìcheal Hendry san treas àite.

Bhuannaich Paddy Rothach às a' Chaol, agus Anndra Stevenson, à Baile nan Granndach, Rèis 2WD agus bha iad cuideachd anns an 10mh àite thairis air na roinnean air fad.

Ann am Prìomh Lìog na h-iomain aig an deireadh-seachdain, bhuannaich Ceann Loch Seile aig an taigh 2-1 an aghaidh Cheann a' Ghiùthsaich - a' chiad turas a chaill sgioba Bhàideanach ann an cha mhòr dà bhliadhna.

Chaidh aig na trì sgiobannan a th' aig mullach na lìog air buannachadh cuideachd, mar a leanas:

An Gearasdan 5-0 Lòbhat

Camanachd an Òbain 10-1 A' Mhanchainn

Bail' Ùr an t-Slèibh 6-1 Caol Bhòid

Bhuannaich Camanachd an Eilean Sgitheanaich 2-1 an aghaidh Chabar Fèidh aig Cùl Dà Leòthaid.

Tha An Gearasdan a-nise aig mullach a' Phrìomh Lìog.

Bhuannaich Ceiltich an Òbain Cupa a' Chinn-Fheadhna 4-2 an aghaidh Bhail' a' Chaolais ann an Canaich.

Thàinig Geamannan nan Eilean ann an Arcaibh gu ceann a-raoir.

Chrìochnaich sgioba nan Eilean Siar san ochdamh àite air clàr nam bonn le 11 duais a' dol dhachaigh leotha.

'S iad na h-Eileanan Fàrach a bh' aig mullach a' chlàir – dà bhliadhna mus bi na farpaisean a' tòiseachadh anns na h-eileanan sin fhèin.

Ag aithris à Arcaibh seo Ailean MacLeòid.

Rinn Am Bac a' chùis air Na Hearadh oidhche Haoine airson Cupa ABC a bhuannachadh.

Chrìochnaich an dà sgioba co-ionnan aig 3-3 às dèidh dhan a' Bhac tadhal fhaighinn ann an ùine a bharrachd aig deireadh a' gheam a' ciallachadh gun robh feum air breaban-peanais.

Thàinig Am Bac am bàrr 4-1 anns na breaban-peanais.

Ann an geam iongantach aig Pàirc Chnoc nan Gobhar chaidh Am Bac air thoiseach tràth tro Sheumas Moireach.

Fhuair Na Hearadh co-ionnan ge-tà às dèidh bhreab-peanais bho Anndra Moireasdan agus chuir Tam Dudley air thoiseach iad beagan mhionaidean às dèidh sin.

Thìll Am Bac le tadhal tràth san dàrna leth bho Eòghann Dòmhnallach.

Ach le beagan mhionaidean ri dhol chuir Coinneach MacSuain Na Hearadh air thoiseach a-rithist.

Ach le cùisean air a dhol a-steach a dh'ùine a bharrachd aig deireadh a' gheam bha briseadh-cridhe ann dha Na Hearaich, is Louie Dòmhnallach a' toirt a' gheam co-ionnan uair eile bhon spot-pheanais.

Bha barrachd bhreaban-peanais a dhìth airson an geam a dhearbhadh agus 's iad Am Bac a bhuannaich sin 4-1.

Às dèidh briseadh-dùil an là an-dè, thog sgioba ball-coise nam ban aig WIIGA iad fhèin airson a' bhonn umha a bhuannachadh aig Geamannan nan Eilean.

Rinn iad a' chùis air Gozo an-diugh 3-0 airson deagh chrìoch a chur air an iomairt aca ann an Arcaibh.

Tha 11 bonn aig sgioba WIIGA uile gu lèir.

Bhuannaich Abbie Stiùbhart às na h-Eileanan an Iar bonn umha ann an rèis an 800m aig Geamannan nan Eilean.

Chrìochnaich i le uair de 2:14.11 a bha nas lugha na dà dhiog air cùlaibh Darcey Hodgson à Guernsey a bhuannaich am bonn òir le Emily NicArtair à Arcaibh a' togail am bonn airgid.

'S e seo an dàrna bonn aig Abbie às dèidh dhith bonn airgid a bhuannachadh san 1500m.

Às dèidh briseadh-dùil an là an-dè, thog sgioba ball-coise nam ban aig WIIGA iad fhèin airson a' bhonn umha a bhuannachadh aig Geamannan nan Eilean.

Rinn iad a' chùis air Gozo an-diugh 3-0 airson deagh chrìoch a chur air an iomairt aca ann an Arcaibh.

Tha Eilean Mhanainn, a rinn a' chùis air na h-Eileanan an Iar air breaban-peanais, a' cluich Bermuda sa chuairt dheireannach.

Bhuannaich Mhairi Hall bonn umha ann an leth-mharaton nam ban aig Geamannan nan Eilean ann an Arcaibh.

Chrìochnaich Hall ann an 1:23:58.00, beagan is sia mionaidean air culaibh an tè a' bhuannaich an rèis, Crista Cain à Eilean Mhanainn, agus dìreach 21 dìog air cùlaibh Jessica Troy à Jersey a bh' anns an dàrna àite.

A bharrachd air soirbheachas pearsanta thog na h-Eileanan an Iar am bonn òir airson farpais nan sgiobaidhean, le Mhairi san treasamh àite, Muriel NicLeòid san ochdamh àite agus Ailyn NicAoidh san 21mh àite.

'S e briseadh-duil a bh' ann dhan an dà chuid sgioba nam fear agus nam ban aig WIIGA anns a' bhall-coise Diardaoin.

Chaill an dà sgioba air breaban peanais air a' cheann thall, le iomairt nam fear a' tighinn gu ceann.

Tha aon gheama eile aig na boireannaich an-diugh ge-tà, is iad a' cluich Gozo airson a' bhonn umha.

Tùs an deilbh, WIIGA

Bha fìor dheagh rèis aig Seonaidh MacAonghais san 5000m oidhche Dhiardaoin is e crìochnachadh sa cheathramh àite, nas lugha na dà dhiog air cùlaibh nam bonn.

Gu dearbh bha nas lugha na ceithir diogan eadar a' chiad agus an ceathramh àite.

Le uair de 15:17.07 ge-tà, chaidh e nas luaithe na bha e air a dhol a-riamh roimhe san rèis sin.

Bhrist e cuideachd an clàr aig WIIGA thar 5000m a bha air a bhith aig Connor MacIlleathain (15:18.14) bho Jersey ann an 2015.

Chrìochnaich fireannaich nan Eilean Siar anns an t-siathamh àite ann am farpais nan sgiobaidhean sa ghoilf aig Geamannan nan Eilean.

Bha Dàibhidh Black sa 15mh àite san fharpais do dhaoine fa leth, le Colin MacRisnidh san 22na àite, Edward Rodgers san 27mh àite agus Dòmhnall Iain MacLeòid san 36mh àite.

A-mach às na 16 sgiobaidhean 's iad Eilean Mhanainn a bhuannaich am bonn òir, le dithis de na cluicheadairean aca cuideachd a' buannachadh bonn òir agus bonn airgid san fharpais do dhaoine fa leth.

Ann am farpais nam ban bha Jane Nicolson às na h-Eileanan an Iar san 27mh àite agus Melanie Duff san 32na àite.

Briseadh dùil an-dè do sgioba ball-coise nam ban aig na h-Eileanan an Iar, is iad a' call air breaban-peanais ri Eilean Mhanainn, ach tha cothrom aca fhathast air bonn, is iad a' cluich Gozo an-diugh.

Tha Kara Hanlon air ceithir bunn òir agus bonn umha a chosnadh aig Geamannan nan EIlean.

Bhiodh sin gu leòr do chuid ach tha Kara cuideachd airson an ath ghinealaach de luchd-snàimh anns na h-eileanan a bhrosnachadh gus feuchainn ris an t-shlighe a ghabh i fhèin san spòrs a leantainn.

Ghlèidh sgioba nan Eilean Siar bonn òir eile aig Geamannan nan Eilean ann an Arcaibh, is Kara Hanlon a' buannachadh rèis an 100 meatair individual medley.

Seo mar a chaidh sin agus na naidheachdan eile bho Arcaibh aithris air An Là.

Tùs an deilbh, WIIGA

Tha sgioba ruith nam fear aig na h-Eileanan an Iar troimhe chun na cuairt deireannaich dhen rèis relay 4x100m aig Geamannan nan Eilean.

Chrìochnaich an sgioba de Thomas Brennan, Tony Wesley, Ewan Amos agus Hector Neally san treasamh àite sa heat aca le uair de 44.98, gam fàgail leis an t-siathamh uair as luaithe.

Thèid an cuairt dheireannach a chumail feasgar Dihaoine.

Bhuannaich Kara Hanlon rèis an 100m individual medley aig Geamannan nan Eilean gus an ceathramh bonn òir aice a' chosnadh.

Chrìochnaich Kara ann an 1:02.92, an uair as luaithe a rinn i a-riamh anns an rèis seo.

A bharrachd air bonn òir a-nochd, thàinig Kara am bàrr ann an rèisean 50m, 100m agus 200m breaststroke ann an Arcaibh. Fhuair I bonn umha san 200IM.

Tha Kara a-nis air 17 buinn a' bhuannachadh aig Geamannan nan Eilean thar nam bliadhnaichean, barrachd na neach eile bho na h-Eileannan an Iar.

Chaill sgioba nan Eilean Siar ri Eilean Mhanainn san iar-chuairt dheireannaich de dh'fharpais a' bhuill-choise.

Bhuannaich Eilean Mhanainn 3-2 air breaban peanais às dèidh dhan gheam crìochnachadh 1-1 às dèidh ùine a bharrachd.

Thàinig sin às dèidh do sgioba nan Eilean Siar Beth NicLeòid a chur eadar na puist aig fìor dheireadh a' gheama an àite Lisa Mason.

Cluichidh Eilean Mhanainn a-niste an aghaidh Bhermuda sa chuairt dheireannaich. Rinn Bermuda a' chùis air Gozo 3-0.

Thèid na h-Eileanan an Iar an aghaidh Gozo madainn Dihaoine airson dearbhadh cò bhuannaicheas am bonn umha.

Tha an iar-chuairt dheireannach eadar sgioba nan Eilean Siar agus Eilean Mhanainn air a dhol gu ùine a bharrachd.

Sin às dèidh dhan gheama crìochnachadh 1-1.

Anns a' gheam eile tha Bermuda, a rinn a' chùis air na h-Eileanan an Iar sa chuairt dheireannaich an turas mu dheireadh ann an Guernsey, 2-0 air thoiseach air Gozo.

Bha Catriona Bain is Ailyn NicAoidh a' ruith às leth WIIGA ann an cuairt dheireannach an 5,000m a-raoir.

Ged nach d'fhuair iad bonn tha na geamaichean air còrdadh riutha gu mòr is iad air tòrr ionnsachadh.

Tha iad an dòchas cothrom eile fhaighinn is an t-eòlas ùr a chur gu feum.

Tha sgioba nan Eilean Siar co-ionnan 1-1 aig leth-ùine sa gheam aca le Eilean Mhanainn san iar-chuairt dheireannaich de dh'fharpais ball-coise nam ban.

Chaidh sgioba WIIGA air thoiseach bhon spot-peanais tro Kyla McMurdo le beagan is 30 mionaid air a' ghleoc.

Bha Eilean Mhanainn co-ionnan mu chòig mionaidean às dèidh sin ge-tà às dèidh tadhal bho Bhecky Cole.

Tha sgioba nan Eilean Siar ag amas air a dhol aon cheum nas fhaide air an turas mu dheireadh ann an Guernsey nuair a bhuannaich iad am bonn airgid.

Tùs an deilbh, Orkney2025

Tha Kara Hanlon air cuairt dheireannach eile a ruighinn aig Geamannan nan Eilean ann an Arcaibh.

'S i Kara an treas tè a bu luaithe ann na rèisean dearbhaidh an 100 meatair medley shingilte madainn an-diugh.

Chrìochnich i ann an 1:04.46, air cùlaibh Chloe Brown às Guernsey agus Eve Wood às Arcaibh. Bha Eva NicSuain anns an 18mh àite.

Bidh a' chuairt dheireannach ann aig 6f a-nochd fhathast is Kara a' feuchainn air a ceathramh bonn òir de na geamannan agus an còigeamh bonn uile gu lèir tron t-seachdain.

Gheibh a h-uile duine a tha a' farpais às leth nan Eilean ann an Arcaibh an-diugh spionnadh, tha fios, às na rinn Kara Hanlon san amar-snàimh a-raoir.

Bonn òr eile - an turas seo san 100 meatair breaststroke - agus clàr eile.

Seo an ceathramh bonn a tha Kara air buannachadh aig geamannan Arcaibh is 16 aice a-nise uile gu lèir.

A' bruidhinn ri Ailean MacLeòid às dèidh làimh, thuirt Kara gu bheil teans fhathast gum bi i air ais aig Geamannan nan Eilean a-rithist.

Chan eil i deiseil ann an Arcaibh fhèin is i ag amas an-diugh air bonn san 100 IM.

'S e là trang a tha gu bhith air gu leòr eile ann an sgioba WIIGA.

Nam measg tha sgioba ball-coise nam ban. Thèid an sgioba an aghaidh Eilean Mhanainn aig meadhan-là san iar-chuairt dheireannaich.

Tha fir nan Eilean Siar cuideachd a' cluich an-diugh. Bidh iadsan an aghaidh Gozo sa gheama dearbhaidh 'son an 7mh is 8mh àite is an geama sin a' tòiseachadh aig 3:30f.

Bidh aire cuideachd feasgar air lùth-chleasachd.

'S e an-diugh an là mu dheireadh de dh'fharpaisean na boghadaireachd airson sgioba nan Eilean Siar.

Chan eilear air bonn a bhuannachadh ach cha b' e sin an t-slat-tomhais a bha aca dhaibh fhèin, tha iad ag ràdh.

Is tha an sgioba gu math cinnteach gu bheil iad air adhartas a dhèanamh.

Ghlèidh sgioba nan Eilean Siar bonn òir eile aig Geamannan nan Eilean ann an Arcaibh, is Kara Hanlon a' buannachadh an rèis 100 meatair breastroke.

Seo mar a chaidh sin agus na naidheachdan eile bho Arcaibh aithris air An Là.