तपाईँ अहिले हाम्रो वेबसाइटको थोरै डेटा प्रयोग हुने ‘टेक्स्ट-ओन्ली’ साइटमा हुनुहुन्छ। सबै तस्बिर र भिडिओसहित मूल वेबसाइटमा जान यहाँ क्लिक गर्नुहोस्।
मूल वेबसाइट तथा पूरा संस्करणमा जानुहोस्।
हाम्रो वेबसाइटको थोरै डेटा प्रयोग हुने संस्करणबारे थप जान्नुहोस्।
भोटेकोशी र त्रिशूली नदीमा विनाशकारी बाढी गएको नौ दिनपछि त्रिशूली ३एको सुरुङमा फसेका दुई जनाको आज जीवितै उद्धार गरिएको छ। भित्र अरू मानिस खोज्ने प्रयास जारी राखिएको अधिकारीहरूले बताएका छन्।
आज त्रिशूली ३ए जलविद्युत् आयोजनाको सुरुङबाट उद्धार गरिएका कबीर महर्जनकी श्रीमती हीराशोभा महर्जनले बीबीसीसँग कुरा गर्दै खुसी व्यक्त गरेकी छन्।
"फेसबुकबाट फोटो देखेँ। एकदमै खुसी लाग्यो। उहाँलाई छाउनीस्थित अस्पतालमा ल्याउँदै छन्। म त्यतै जान लागेकी छु।"
"दश दिनसम्म खानपिन केही थिएन। एकदमै डर लागेको थियो। अब हामी सबै खुसी छौँ। रोइ पनि रहेका छौँ।"
यो पनि पढ्नुहोस्
नेपाली सेनाको नेतृत्वमा रहेको उद्धारटोलीले आज बिहान त्रिशूली ३ए जलविद्युत् आयोजनाको सुरुङभित्र फसेका मानिसहरूसँग सम्पर्क गर्न सकेको थियो।
त्रिशूली ३ए जलविद्युत् आयोजनाको सुरुङभित्रबाट जीवितै उद्धार गरिएका एक व्यक्तिलाई सेनाको हेलिकप्टरले नुवाकोटको बट्टार पुर्याएको छ।
त्रिशूली ३ए जलविद्युत् आयोजनाको सुरुङभित्रबाट दुई जनालाई जीवितै उद्धार गरिएको नेपाल विद्युत् प्राधिकरणका सहप्रबन्धक सुरेश राउतले बीबीसी न्यूज नेपालीसँग पुष्टि गरेका छन्।
उद्धार गरिएका पहिलो व्यक्ति सञ्जय साह हुन्। आयोजनामा मेकानिकल फोर्म्यान हुन्।
राउतका अनुसार दोस्रो व्यक्ति मेकानिकल सूपरभाइजर कबीर महर्जन हुन्।
"उनी [महर्जन] अलिकति हाँसे र उद्धारकर्मीतिर धन्यवादको सङ्केत गरे," राउतले भने।
सुरुङभित्र फसेको नौ दिनपछि दशौँ दिन मानिसहरू जीवितै फेला पर्दा उद्धारकर्मी र प्राधिकरणका कर्मचारीहरू भावुक बनेको प्राधिकरणकी कर्मचारी शोभा पौडेलले बीबीसीलाई बताइन्।
त्रिशूली ३ए जलविद्युत् आयोजनाको सुरुङभित्रबाट एक जनालाई जीवितै उद्धार गरिएको नेपाल विद्युत् प्राधिकरणका सहप्रबन्धक सुरेश राउतले बीबीसी न्यूज नेपालीलाई बताएका छन्।
उद्धार गरिएका व्यक्तिलाई सेनाले अक्सिजन दिन थालेको पनि उनले बताए।
"अक्सिजन कमी भएको र एकदमै थकित महसुस गरेकाले अबको केही क्षणमा (उहाँले) सोधपुछको जबाफ दिन सक्ने हुनुहुन्छ। बोलौँबोलौँ लागे पनि बोल्न गाह्रो भएको छ।"
त्रिशूली ३ए जलविद्युत् आयोजनाको सुरुङभित्र फसेका ठानिएका मानिसहरूबाट आवाज आएको जानकारी प्राप्त भएको नेपाल विद्युत् प्राधिकरणका सहप्रबन्धक सुरेश राउतले बीबीसी न्यूज नेपालीलाई जानकारी दिएका छन्।
“यहाँ खोजी तथा उद्धारको नेतृत्व गर्नुभएको सेनाका कर्नेल गङ्गा बरालले हामीलाई भित्रबाट आवाज आएको जानकारी दिनुभएको हो,” राउतले भने।
“सेनाको कर्नेल गङ्गा बराल सरले - हामीले यताबाट आवाज दियौँ, 'भाइहरू हामी उद्धार टोली हो, आउँदैछौँ है!' भनेपछि उताबाट हुन्छ, हुन्छ भनेर खबर आयो।”
उनले अबको दुई तीन घण्टामा त्यहाँ पुगेर उद्धार गरिसक्ने आफ्नो अपेक्षा भएको जानकारी दिए।
सुरुङ भएको स्थानमा गृहमन्त्री सुधन गुरुङ पुगेका छन्।
सुरुङमा उद्धारका लागि गरिएका दुईवटा योजना 'प्लान ए र प्लान बी' जारी राख्न उनले निर्देशन दिएको राउतले बताए।
यसबारे बीबीसीले सोद्धा नेपाली सेनाका प्रवक्ता राजाराम बस्नेतले यसबारे आधिकारिक तरिकाले नै जानकारी दिइने बताए।
तर अहिलेसम्म सेना झन्डै १०० मिटरभित्र प्रवेश गरिसकेको उनले बताए।
त्रिशूली ३ए जलविद्युत् आयोजनामा फसेका मानिसहरूको खोजी गर्ने क्रममा "भित्रबाट एकभन्दा बढी व्यक्तिको आवाज सुनिएको पुष्टि भएको" त्यहाँको उद्धारमा विज्ञका रूपमा संलग्न श्रीराम न्यौपानेले सामाजिक सञ्जालमा लेखेका छन्। उनी सांसद पनि हुन्।
"उद्धार टोलीले ‘नआत्तिनुहोस्, हामी उद्धार गर्दै छौँ’ भनेपछि भित्रबाट ‘हुन्छ’ भन्ने प्रतिक्रिया प्राप्त भएको छ," उनले फेसबुकमा एउटा सङ्क्षिप्त पोस्ट गर्दै जानकारी गराएका छन्।
यसअघि उनले उक्त जानकारी उद्धारमा खटेको सेनाबाट प्राप्त भएको लेखेका थिए।
यद्यपि नेपाली सेना र नेपाल प्रहरीले त्यसबारे औपचारिक जानकारी दिएका छैनन्।
सुरक्षास्रोतहरूका अनुसार गृहमन्त्री सुधन गुरुङ त्रिशूली ३ए को आयोजनास्थलमा आज बिहान हेलिकप्टरबाट पुगेका छन्।
नेपाली सेनाले उद्धारकर्मीहरू सुरुङमा १०० मिटर भित्रसम्म पुगेको तर लेदो पन्छाउँदै अगाडि बढ्नुपर्ने स्थिति रहेको बीबीसी न्यूज नेपालीलाई बताएको छ।
'आशाजनक सङ्केत'
श्रीराम न्यौपानेले आज बिहान गरेको अर्को पोस्टमा लेखेका छन्, "नेपाली सेना र सशस्त्र प्रहरीको उद्धार टोली सुरुङभित्र प्रवेश गरी उद्धार कार्यलाई तीव्रता दिइरहेको छ। सुरुङभित्रबाट मानिस बोलेको आवाज सुनिएको जानकारी प्राप्त हुनु आशाजनक सङ्केत हो।"
"हिजो साँझसम्म इन्जिनिअरको भूमिकामा साइटमै रहेर उद्धार तथा खोजी कार्यमा संलग्न थिएँ। अब सांसदको हैसियतमा हेलिकप्टर प्रयोग नगरी पैदल जनसंवाद गर्दै विदुरसम्म पुग्ने र त्यसपछि गाडीमार्फत् काठमाण्डू फर्कने तयारीमा छु।"
नमस्कार। बीबीसी न्यूज नेपालीको यो लाइभ पेजमा तपाईँलाई स्वागत छ।
भोटेकोशी र त्रिशूली नदीमा विनाशकारी बाढी आएको आज दशौँ दिन हो। यो लाइभ पेजमा हामी बाढीले निम्त्याएको विनाश र खोजी तथा उद्धारकार्यसँग सम्बन्धित विषयमा जानकारी गराउने छौँ।
बाढीबाट प्रभावित क्षेत्रमा अझै पनि ठूलो सङ्ख्यामा मानिसहरू सम्पर्कविहीन छन्। सरकारले तिनको खोजी आफ्नो उच्च प्राथमिकतामा भएको बताउँदै आएको छ।
राष्ट्रिय विपद् जोखिम न्यूनीकरण तथा व्यवस्थापन विभागका अनुसार हिजो साँझसम्म सम्पर्कविहीन मानिसहरूको सङ्ख्या ५,००० भन्दा बढी थियो।
खोज, राहत तथा उद्धारकार्यमा २१,४०० जति सुरक्षाकर्मी परिचालन भएको प्राधिकरणले जनाएको छ।
भोटेकोशी-त्रिशूली बाढीको नवौँ दिनमा यस घटनासम्बन्धी मुख्यमुख्य अप्डेट यसप्रकार छन्।
यससँगै हामी आजका लागि यो पेज स्थगित गर्दै छौँ। हाम्रो लाइभ पेज हेरिदिनुभएकामा धन्यवाद।
हामी यो पेजमा पुनः भोलि बिहानदेखिका नयाँ सूचना अप्डेट गर्ने छौँ।
अन्य समाचारका लागि हाम्रो वेबसाइट हेर्नुहोला। हाम्रा सामग्रीहरू फेसबुक, इन्स्टाग्राम र यूट्यूबमा पनि उपलब्ध छन्।
शुभरात्रि।
भोटेकोशी-त्रिशूली बाढीका कारण ३ खर्ब ८७ अर्ब रुपैयाँभन्दा बढीको क्षति भएको प्रारम्भिक अनुमान गरिएको राष्ट्रिय विपद् जोखिम न्यूनीकरण तथा व्यवस्थापन प्राधिकरणले जनाएको छ।
बिहीवार साँझ काठमाण्डूमा आयोजित प्रेस ब्रीफिङका क्रममा प्राधिकरणका प्रमुख कार्यकारी धर्मराज उप्रेतीले क्षतिको प्रारम्भिक आँकडा सार्वजनिक गरेका हुन्।
"भवन, सडक, दूरसञ्चार, कृषि, चौपाया सबैको हेर्दा ३ खर्ब ८७ अर्ब ५४ करोड रुपैयाँ बराबरको क्षेत्रगत क्षति भएको एकदमै प्रारम्भिक तथ्याङ्क आएको छ," उनले भने।
उप्रेतीका अनुसार सबै क्षेत्रमा 'अर्ली रिकभरी' का लागि अनुमानित ७ अर्ब ९५ करोड लाग्न सक्ने देखिएको छ।
विभिन्न जलविद्युत् आयोजनाका सुरुङ र त्यसभित्र रहेका उत्पादन केन्द्र ('पावरहाउस')हरूमा मानिसहरू थुनिएको नौ दिन बितिसक्दा पनि अहिलेसम्म चार जनाभन्दा बढीको जीवित उद्धार गर्न नसकिएको अधिकारीहरूले बताएका छन्।
विभिन्न जलविद्युत् आयोजनाका सुरुङ संरचनाभित्रबाट तीन वटा शव निकालिएको नेपाली सेनाले जनाएको छ। बिहीवार लाङटाङ खोला जलविद्युत् आयोजनाको सुरुङबाट थप दुई जनाको शव निकालिएको आयोजनाका प्रवर्धकले बताएका छन्।
कैयौँ दिनको प्रयासबाट पनि जलविद्युत्को सुरुङमा फसिरहेको ठानिएका १५० जनाभन्दा धेरै मानिसहरूसम्म उद्धारकर्मी किन पुग्न सकिरहेका छैनन्?
रसुवा बाढीमा परेर १,२५९ जनाको शव फेला परेको र ५,०८३ जना सम्पर्कविहीन बनेको पछिल्लो विवरणमा सरकारले जनाएको छ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणले बिहीवार साँझ ७ बजे जारी गरेको विवरणमा भेटिएका शवमध्ये ९५ जनाको मात्र सनाखत भई बुझिलिएको जनाइएको छ।
यसबीचमा १२ हजार जनाभन्दा धेरैको उद्धार भएका र ३ हजार आठ सयभन्दा धेरै आश्रय स्थलमा रहेको उक्त विवरणमा जनाइएको छ।
बाढीले पृथ्वी राजमार्गको कृष्णभीर खण्डमा कटान गरेपछि सो रूटबाट पेट्रोलियम ट्याङ्कर तथा ग्यास बुलेटहरू आउन नसक्ने हुँदा आपूर्तिका लागि वैकल्पिक व्यवस्था मिलाइएको नेपाल आयल निगमले जनाएको छ।
निगमले काठमाण्डू उपत्यकामा बिक्रीवितरण गर्ने पेट्रोलियम पदार्थ 'बाइरोडो बाटो' (त्रिभुवन राजपथ)बाट भित्र्याइरहेको छ भने एलपी ग्यास ग्यास उद्योगहरूका हकमा हाललाई तराईका उद्योगहरूमा ग्यास सिलिन्डर भरी सोही बाटोबाट ल्याउने व्यवस्था मिलाएको छ।
बिहीवार मात्र उपत्यकाका लागि विभिन्न ब्र्याण्डका करिब २४,५०० सिलिन्डर उपत्यका ल्याउने व्यवस्था मिलाइएको र शुक्रवारदेखि यो क्रम नियमित एवं थप परिमाणमा ल्याइने निगमले जनाएको छ।
“उद्धार कार्यको सहजीकरणका लागि निगमको थानकोटस्थित बागमती प्रादेशिक कार्यालयबाट बाढी प्रभावित क्षेत्रहरूमा हाल सञ्चालनमा रहेका पेट्रोल पम्पहरूलाई हालसम्म पेट्रोल १,०५,००० लिटर र डीजल २,०२,००० लिटर उपलब्ध गराइएको तथा माग बमोजिम सार्वजनिक बिदाका दिनमा समेत पेट्रोल र डीजलको बिक्रीवितरणको व्यवस्था मिलाएको” बिहीवार जारी निगमको विज्ञप्तिमा उल्लेख छ।
प्रभावित क्षेत्रका विभिन्न स्थानका सेल्टरमा रहेका बाढी प्रभावित व्यक्तिहरूका लागि आवश्यक पर्ने एलपी ग्यास निगमको समन्वयमा नेपाल एलपी ग्यास उद्योग सङ्घबाट उपलब्ध गराउने १,२५० थान मध्येबाट राष्ट्रिय विपद् जोखिम न्यूनीकरण तथा व्यवस्थापन प्राधिकरण सिंहदरबार काठमाण्डूको अनुरोधमा रसुवा र नुवाकोट जिल्लामा ५०० थान सिलिन्डर पठाउने व्यवस्था मिलाएको निगमले जनाएको छ।
भोटेकोशी नदीमा बाढी आउँदा कामविशेषले तिब्बततर्फ रहेका एक नाबालकसहित ११४ नेपाली नागरिकलाई चीन सरकारले सकुशल उद्धार गरी सिन्धुपाल्चोकको तातोपानी नाकाबाट नेपाल प्रवेश गराएको नेपाल प्रहरीले जनाएको छ।
ती नेपालीहरू नेपालतर्फ प्रवेश गरिरहेको प्रहरीद्वारा बिहीवार सार्वजनिक एउटा भिडिओ फुटेजमा देखिन्छ।
यसअघि मनसुन प्रतिकार्य कमान्ड पोस्टको बैठकले बाढीका कारण चीनतिर अड्किएका नेपालीलाई चीनले तातोपानी पुर्याएपछि पूर्वाधार विकास मन्त्रालयले काठमाण्डूमा उपयुक्त व्यवस्था मिलाउन र भूमिव्यवस्था, सहकारी, सङ्घीय मामिला तथा सामान्य प्रशासन मन्त्रालयले घरठेगानासम्म पुर्याउन व्यवस्था गर्ने, गराउने निर्णय गरेको थियो।
भदौ १० गते भोटेकोशी र त्रिशूली नदीमा आएको विनाशकारी बाढीमा हजारौँ घरहरूमा क्षति पुगेको छ।
भागेर ज्यान जोगाएका मानिसहरू अहिले बिस्तारै बाढीले पुरेको आफ्नो घर वा भग्नावशेषमा केही उपयोगी सामान भेटिन्छ कि भनेर खोज्न जान थालेका छन्।
यो भिडिओ हेर्नुहोस्।
बाढीबाट प्रभावित नुवाकोटस्थित त्रिशूली-३ए जलविद्युत् आयोजनाको सुरुङको मुख खुलाउने काम जारी रहेको प्रधानमन्त्रीको सचिवालयले जनाएको छ।
आयोजनाका सुरुङ तथा मुख्य संरचनाहरू बाढीले पुरिएपछि त्यहाँ मानिसहरू फसेको आशङ्का गरिएको छ।
नेपाली सेनाको नेतृत्वमा चिनियाँ टोली र अन्य प्राविधिक गरी ९३ जनाको टोली पाँच वटा एक्स्कभेटर, कम्प्रेसर र ब्रेकरसहित खोजी तथा उद्धारमा जुटिरहेका सचिवालयले जानकारी दिएको छ।
सुरुङको मुखमा ४० मिटर लामो र २० मिटर अग्लो भत्केका फलामसहितका संरचना तथा ठूल्ठूला ढुङ्गाहरू छन्।
“रातदिन निरन्तरको प्रयासपछि त्यो पन्छ्याएर माथिबाट ३ फिट जति सुरुङको मुख खुलाइएको छ,” सचिवालयले जनाएको छ।
योसँगै उद्धार टोली त्यसभित्र १५-२० मिटर परसम्म पुगिसकेको छ भने एक्स्कभेटर तथा मशीनसहित प्रवेश गर्नका लागि पूरै मुख खुलाउनुपर्ने भएकाले त्यहाँ रहेको बाँकी अवरोध हटाउने कार्य जारी छ।
माटो तथा लेदोले भरिएको उक्त सुरुङ छिचोलेपछि मात्रै भित्र पावरहाउसलगायत अन्य संरचनामा पुग्न सकिने बताइएको छ।
काठमाण्डूस्थित पशुपति आर्यघाटमा पनि कुशको प्रतिमा बनाएर आफ्ना प्रियजनको अन्तिम संस्कार गर्नेहरूको सङ्ख्या बुधवारदेखि बढ्न थालेको अधिकारीहरूले बताएका छन्।
"बुधवार तीन जनाको त्यसरी अन्तिम संस्कार गरिएको हाम्रो अभिलेखले देखाउँछ," पशुपति क्षेत्र विकास कोषका सूचना अधिकारी सूर्य भाटले बीबीसीसँग भने, "बिहीवार चाहिँ घाटमा त्यसरी अन्तिम संस्कार गर्नेहरूको लस्कर देखियो।"
अन्य विभिन्न धार्मिक समुदायमा पनि कतिपय सम्पर्कविहीन व्यक्तिको धार्मिक बिदाइ कार्य सुरु भइसकेको सम्बन्धित जानकारहरू बताउँछन्।
त्यसो त सामाजिक सञ्जालमा कतिपयले बाढीमा परेर पितृकार्य गरिएको घटनामा परिवारले अनावश्यक हतार गरेको वा केही दिन पनि कुर्न नसकेको भन्दै टिप्पणी गर्ने गरेको पाइन्छ।
तर मानिसहरूले नबुझेर त्यस्ता टिप्पणी गर्ने गरेका जानकारहरूको भनाइ छ।
यसबारे विस्तृतमा पढ्नुहोस्।
रसुवागढीमा आएको भीषण बाढीपछि तिब्बतको केरुङमा रोकिएका ११४ जना नेपालीहरू बिहीवारबाट नेपाल फर्किन थालेको ल्हासास्थित नेपाली महावाणिज्य दूतावासले जनाएको छ।
मानसरोवर तीर्थयात्रा र व्यापार व्यवसायका लागि भिसा लगाएर तिब्बत पुगेका अधिकांश नेपालीहरू स्वदेश फर्किसकेको महावाणिज्यदूत लक्ष्मीप्रसाद निरौलाले जानकारी दिए।
तर अस्थायी पास लिएर केरुङ पुगेका नेपालीहरू अहिले फर्किन लागेका हुन्।
यसबारे विस्तृत समाचार
नेपाल सरकारले आगामी भदौ २२ गते सोमवारका दिन गत साता भोटेकोशी-त्रिशूली बाढीमा परी ज्यान गुमाउने मानिसहरूको सम्झनामा राष्ट्रिय शोक मनाउने निर्णय गरेको छ।
बिहीवार बसेको मन्त्रिपरिषद् बैठकले विनाशकारी बाढीको १३औँ दिन राष्ट्रिय शोक मनाउने निर्णय गरेको सरकारका प्रवक्ता तथा शिक्षामन्त्री सस्मित पोखरेलले जानकारी दिए।पोखरेलका अनुसार उक्त दिन स्वदेश तथा विदेशमा रहेका नेपाल सरकारका कार्यालयहरूमा राष्ट्रिय झण्डा आधा झुकाइने छ।
"भदौ १० गते नेपाल-चीन सिमानामा आएको अकल्पनीय भीषण बाढीका कारण मृत्युवरण गर्ने व्यक्तिहरूको सम्मानस्वरूप उक्त घटना भएको १३औँ दिनको पुण्यतिथिका दिन अर्थात् भदौ २२ गते राष्ट्रिय शोक मनाउने र उक्त दिन नेपालभरका सरकारी कार्यालय तथा विदेश स्थित नेपाली दूतावास तथा नियोगहरूको राष्ट्रिय झण्डा आधा झुकाउने," सरकारका प्रवक्ता मन्त्री सस्मित पोखरेलले बताए।