"Helitaanka qaab jireedkan wuxuu u baahan yahay dadaal ka badan kan ragga" –Haweenka Itoobiya ee ku tartama dhisida murqaha

Edon Frezewud, oo ah gabar 21 jir ah oo ku tartanta ciyaaraha dhisida murqaha , ayaa sheegtay in faallooyinka ay dadka ugu reebaan muuqaalladeeda TikTok qaarkood ay la xiriiraan qaab-dhismeedka jirkeeda, dumarnimadeeda iyo inay mustaqbalka carruur dhali doonto iyo in kale.

Wax ku dhow hal sano tan iyo markii Edon ay bilowday ciyaaraha dhismaha murqaha. Waxay sheegtay in markii ay ciyaartan ku biiraysay aysan aqoon badan u lahayn jir dhiska. Waxay markii hore baraha bulshada kala socotay ciyaartan, ka dibna ka qaybgalkeedii tartan dhacay laba sano ka hor ayaa sii kordhiyay xiisaheeda.

Bilaabidda iyo sii wadidda ciyaartan ma ahayn arrin sahlan. Edon waxay sheegtay inaysan qoyskeeda ka helin taageeradii ay u baahnayd, balse ay go'aansatay inay iyadu bilowdo ciyaarta, isla markaana ay sii wadato.

Waxay sheegtay in faallooyinka lagu reebo muuqaalladeeda ay TikTok soo dhigto qaarkood ay dumarnimadeeda ku xiriiriyaan qaab-dhismeedka jirkeeda, halka kuwo kalena ay wax ka weydiiyaan inay mustaqbalka guursan doonto ama carruur dhali doonto.

Edon waxay sheegtay in mararka qaar la weydiiyo: "Marka ilmahaagu weynaado, muxuu nuugi doonaa?" Balse iyadu waxay ku jawaabtaa: "Mustaqbalka waan guursan doonaa, carruurna waan dhali doonaa, waanan nuujin doonaa." Waxay sheegtay in arrimahaasi aysan wax xiriir ah la lahayn ciyaarta ay ku jirto, isla markaana ay faallooyinka noocaas ah qosol ku dhaafto.

Edon waxay aaminsan tahay in dhibaatada la xiriirta aqbalaadda ciyaartan, gaar ahaan marka laga eego dhaqanka bulshada iyo qaabka labiska, ay dadka qaar ka hor istaagto inay ciyaarta ku biiraan.

Gaar ahaan, dharka bikini-ga ah ee haweenku ku xirtaan masraxa tartanka, halkaas oo ay ku soo bandhigaan qaab-dhismeedka jirkooda, ayaa dhaliil badan kala kulma dadweynaha.

Edon waxay sheegtay in markii ugu horreysay ay ku adkayd la qabsiga labiskaas, isla markaana ay caqabad ku noqotay inay u adkaysato faallooyinka uga imanayay dad kala duwan iyo qoyskeedaba.

"Marka aan maanta bikini soo xiranno oo aan masraxa tagno, ma aha dharka aan soo bandhigayno. Waxaan masraxa u fuulnaa inaan dadka tusno waxa aan dadaalka badan ku gaarnay," ayay tiri, iyadoo sharraxaysa in ujeeddadu tahay in la muujiyo natiijada dadaalka.

Itoobiya gudaheeda, ma aha wax lala yaabo in la arko haween badan oo taga goobaha jimicsiga. Qaar waxay sidaas u sameeyaan si ay u wanaajiyaan awooddooda jireed, halka kuwo kalena ay doonayaan inay beddelaan qaab-dhismeedka jirkooda.

Hase yeeshee, in jir dhiska loo sameeyo si tartan looga qayb galo waxay u baahan tahay dadaal intaas ka badan, cunto gaar ah iyo in qofku wajaho faallooyin kala duwan oo uga imanaya bulshada.

Haweenka ku hawlan ciyaartan gudaha Itoobiya weli aad bay u yar yihiin. Tartamada la qabtana waxaa ka qayb gala tiro kooban oo haween ah.

Meron Hirpo, oo 20 jir ah, ayaa sheegtay inay ciyaarta bilowday iyadoo 16 jir ah. Waxay tilmaantay in tirada haweenka heer tartan ah ku jira ay aad u yar yihiin.

Waxay sheegtay in dadaalka loo baahan yahay si heer tartan loo gaaro, xakamaynta cuntada, tamar-yaraanta iyo isbeddellada hormoonnadu ay yihiin caqabado dheeraad ah.

Meron, waxay sheegtay inaysan la kulmin haween ka soo baxay gudaha Itoobiya oo heer tartan ah ku jira, marka laga reebo kuwa dibadda ka yimaada ee dalkooda ku matala tartamada.

Waxay sidoo kale sheegtay in marka haweeneydu samayso ciyaaraha murqaha lagu dhiso ay dadka qaar ku yiraahdaan waxay isu beddeli doontaa nin, ayna awoodi doonin inay guursato ama carruur dhasho.

Meron, waxay sheegtay inay jir dhiska bilowday iyada oo aan oggolaansho ka haysan qoyskeeda, balse ay sii wadatay ciyaarta sababtoo ah jacaylka ay u qabto, halkii ay ka dhegaysan lahayd faallooyinka dadka kale.

Meron, waxay intaas ku dartay in caqabadaha ciyaartan aysan ku koobnayn oo keliya aragtida bulshada, balse xaaladda dhaqaale ee Itoobiya ay iyaduna caqabad ku tahay ka qaybgalka jir dhiska.

Sida ay sheegtay, ciyaartani waxay u baahan tahay cunto ku habboon iyo nafaqooyin jirka dhisa, taas oo kharashkeeda dabooliddeedu ay adag tahay.

Yonás Girma, oo ah agaasimaha Xiriirka Itoobiya ee Jimicsiga Jirka iyo Dhismaha Murqaha, isla markaana leh 30 sano oo waayo-aragnimo ah oo dhinaca ciyaartan ah, ayaa sheegay in lixdii sano ee la soo dhaafay ay ku hawlanaayeen sidii haween badan loogu soo jiidi lahaa tartamada.

Hase yeeshee, muddadaas tiradii ugu badnayd ee hal tartan ay ka qaybgeliyeen waxay ahayd shan haween ah. Waxaa sidoo kale jiray xilli hal haweeney oo keliya ay tartanka ka qaybgashay.

Tartankii lixaad ee la qabtay bishii Agoosto ee sannadkii hore waxaa ka qayb galay afar haween ah: laba ku tartamayay qaybta bikini-ga iyo laba ku tartamayay jir dhiska.

Edon Frezewud iyo Meron Hirpo ayaa ku tartamay qaybta bikini-ga, waxaana tartanka ku guuleysatay Edon oo kaalinta koowaad gashay.

Ciyaaraha dhismaha murqaha ee haweenka waxay inta badan leeyihiin toddoba qaybood oo waaweyn. Kuwaas oo kala ah: Qaab-dhismeedka jirka ee taam ah, qaybta dharka Bikini, Miskaha iyo bowdyaha oo xooggan, Murqo muuqda oo isku dheellitiran, Jir dhis, Murqo-dhismeedka dumarka iyo dhisidda murqaha waaweyn ee dumarka.

Qaybahan tartanku waxay ku kala duwan yihiin qaabka jirka ee laga doonayo tartamayaasha, heerka koritaanka murqaha iyo awoodda ay ku soo bandhigaan naftooda marka ay masraxa joogaan.

Bikini-gu waa mid ka mid ah qaybaha ugu caansan tartamadaas. Tartamayaasha waxaa laga filayaa inay yeeshaan jir is-waafaqsan oo isboorti ahaan u dhisan, halkii laga eegi lahaa murqo aad u waaweyn.

Waxaa si gaar ah loo eegaa isu dheellitirka qaabka garbaha, dhexda, miskaha iyo lugaha.

Dharka lagu xirto tartanka bikini-guna waa mid ka mid ah astaamaha lagu garto qaybtan. Tartamayaashu waxay masraxa ku soo baxaan dhar tartan oo gaar ah iyo kabo ciribta dambe dhaadheer. Halkaas ayay ku soo bandhigaan qaab-dhismeedka jirkooda, kalsoonida ay naftooda ku qabaan, habka ay isu soo bandhigaan iyo awooddooda masraxa.

Marka laga yimaado qaybta dharka, qaybta Wellness waxay xoogga saartaa murqaha si gaar ah uga muuqda miskaha, barida iyo bowdyaha. Qaybta Figure-na waxaa lagu soo bandhigaa qaab jir oo isu dheellitiran, leh garbo ballaaran iyo dhex yar.

Qaybta jimicsiga, marka laga soo tago qaab-dhismeedka jirka, waxaa tartamayaashu bandhig ku soo gudbiyaan xirfadaha jimicsiga, qoob-ka-ciyaarka, xoogga iyo dabacsanaanta jirka.

Women's Physique waxay u baahan tahay jidh leh murqo si weyn u kobcay oo si cad u muuqda, halka Women's Bodybuilding ay xoogga saarto mugga murqaha iyo xooggooda.

Dhanka kale, qaybta Fit Model waxay xoogga saartaa qaab-jir dabiici ah oo isu dheellitiran.

Yonás, ayaa sheegay in dharka ay haweenku xirtaan marka ay masraxa ku tartamayaan iyo habka ay jirkooda u soo bandhigaan ay sababaan in qaar ka mid ah haweenku aysan ku qanacsanayn ka qaybgalka tartamada.

Wuxuu sheegay in faallooyinka dadka ay ka bixiyaan muuqaallada ay baraha bulshada soo dhigaan ay mararka qaar yihiin kuwo ay ka buuxaan aflagaaddo iyo yasid. Yonás wuxuu intaas ku daray inay mararka qaarkood ku qasbanaadaan inay xiraan qaybta faallooyinka ee muuqaallada qaarkood.

Si qofku ugu diyaar garoobo inuu masraxa uga qayb galo tartamada ciyaartan, waxaa laga yaabaa inuu u baahdo ugu yaraan laba sano oo tababar joogto ah.

Yonás, wuxuu sheegay in diyaarinta tababarka haweenka iyo ragga ay dhinacyo qaarkood ku kala duwan tahay. Wuxuu tilmaamay in haweenka ay waqti dheer ku qaadan karto kobcinta murqaha iyo dhimista dufanka jirka marka loo eego ragga.

Edon, dhankeeda, waxay aaminsan tahay in waxa dadka qaar ka yaabiya ay tahay inay iyadu ku guulaysatay waxyaabo ay dadka kale awoodi waayeen inay gaaraan.

Waxay sharraxday in kala duwanaanshaha hormoonnada ragga iyo dumarka uu saamayn ku leeyahay dhismaha murqaha. Gaar ahaan, ragga ayaa leh heerar testosterone oo ka sarreeya kuwa haweenka, taas oo siinaysa faa'iido gaar ah marka ay murqaha dhisayaan. Waxay aaminsan tahay in haweenku u baahan karaan dadaal dheeraad ah si ay u gaaraan heer isku mid ah oo murqo-dhis ah.

Si kastaba ha ahaatee, jawaabaha bulshada ka imanaya mar walba ma aha kuwo taban. Edon waxay sheegtay in faallooyinka ay dadka kaga maqasho waddooyinka qaarkood ay yihiin kuwo dhiirrigelin leh.

Waxay sheegtay in ragga ay ka hesho jawaabo ku dhiirrigeliya oo ku saabsan qaab-dhismeedka jirkeeda, halka haweenkuna ay su'aalo weydiiyaan si ay khibraddeeda wax uga bartaan ama ay iyaguna u bilaabaan ciyaartan. Waxay intaas ku dartay in ragga qaarkood marka ay arkaan ay xiiseeyaan ciyaarta.

Ciyaaraha dhismaha murqaha kuma koobna oo keliya in saacado badan lagu qaato goobta jimicsiga. Waxay sidoo kale u baahan yihiin in cuntada la habeeyo, la raaco qorshe tababar, cuntada horay loo sii diyaariyo iyo in nolol-maalmeedka qofka lala jaanqaadiyo ciyaarta.

Edon, waxay hadda u shaqaysaa tababare gaar ah oo dadka kale jimicsiga bara. Waxay tababar qof-qof ah ku bixisaa internetka iyo goobaha jimicsiga.

Waxay sidoo kale aad u danaynaysaa inay mustaqbalka si ka wanaagsan isu diyaariso, isla markaana Itoobiya ku matasho tartamada ka dhaca dalalka dibadda.

Meron, waxay haweenka kula talinaysaa inay naftooda ku kalsoonaadaan oo ay raacaan waxyaabaha ay aaminsan yihiin. Waxay aaminsan tahay in xitaa haddii dadku aysan aqbalin ama taageerin, haddana ay suurtagal tahay in bulshada la beddelo iyadoo ficil ahaan loo muujinayo waxa qofku aaminsan yahay.