ቀጥታ , ቻይና ልዑላውነትን ግዝኣታዊ ሓድነትን ኤርትራ ክኽበር ከም ዝግባእ ገሊጻ - የማነ ገብረመስቀል

ቀጥታዊ ሸፈነ

1. ቅድሚ 7 ሰዓታትሃገራዊት ጋንታ ኤርትራ ምስ ጊኒ ንእተካይዶ ጸወታ ምድላዋት ትገብር ኣላ

   

   ምንጪ ስእሊ, Nega W/ghergis

   ሃገራዊት ጋንታ ኩዕሶ እግሪ ኤርትራ ምስ ጊኒ ንእተካይዶ ጸወታ ዘድሊ ባይታ ንምጥጣሕ፡ ሓደ ጕጅለ ናብ ርእሰ-ከተማ እታ ሃገር ኮናክሪ ከም ዝኣተወ ፈደረሽን ኩዕሶ እግሪ ኤርትራ ኣፍሊጡ።

   እዚ ብፕረዚደንት ፈደረሽን ኩዕሶ እግሪ ኤርትራን ሴካፋን ጳውሎስ ወልደሃይማኖት ዝምራሕ ልኡኽ፡ ኣብ ኮናክሪ ምስ ዝምልከቶም ሰበስልጣንን ፈደረሽን ኩዕሶ እግሪ ጊኒን ናይ ምድላው ኣኼባታትን ዘተን የካይድ ኣሎ።

   እቲ ግጥም ብ12 ሕዳር ክካየድ ዝተመደበ ኰይኑ፡ ጕዕዞ ተጻወትቲ ሃገራዊት ጋንታ ኤርትራ ድማ ካብ 7 ሕዳር ኣትሒዙ ኣብ ኣርባዕተ ጕጅለታት ተኸፋፊሉ ናብ ኮናክሪ ክፍጸም እዩ። ኵሉ ምድላዋት እቲ ግጥም ድማ ብዝተወጠነሉ መንገዲ ብጽቡቕ ይቕጽል ምህላዉ ተሓቢሩ።

   ብተወሳኺ፡ ኣብ ጊኒ፡ ላይበርያ፡ ኮትዲቯር፡ ኣንጎላ፡ ጋናን ናይጀርያን ዝርከቡ ኤርትራውያን፡ ንሃገራዊት ጋንታኦም ምዉቕ ኣቀባብላ ንምግባር ይዳለዉ ኣለዉ። ተቐማጦ ኮናክሪ ዝዀኑ ኤርትራውያን ድማ ንኸተማኦም ብባንዴራ ሃገሮም ብምስላምን መካይን ብምስሊ እታ ጋንታ ኣሰሊፎም ኣብ ጐደናታት ብምዝዋርን ናይ ደገፍ ሃዋህው ንምፍጣር ይንቀሳቐሱ ምህላዎም እቲ ሓበሬታ የረድእ።

   ተወሳኺ፤

   ሃገራዊት ጋንታ ኩዕሶ እግሪ ኤርትራ ስለምንታይ ኣብ ቅድሚ ህዝባ ዘይትጻወት?

   እቶም 7 ኤርትራውያን ኣብ ኢስዋቲኒ ዕቝባ ከም ዝሓተቱ ተፈሊጡ

2. ቅድሚ 9 ሰዓታትሬድዋን ሑሴን፡ "እንታይ ከም ዝኣበሰ ከይተነግሮ መጠንቀቕታ ዝተጻሕፈሉ ሚድያ የሎን"

   

   ምንጪ ስእሊ, Ethiopian Media Authority

   ኣቦመንበር ቦርድ በዓል-መዚ መራኸቢ ብዙሓንን ዳይረክተር ሃገራዊ ድሕነትን ኰይኑ ዝሰርሕ ዘሎ ሬድዋን ሑሴን፡ ካብ ሓሙሽተ ግዜ ንላዕሊ እንታይ ከም ዝኣበሰን ኣየናይ ሕጊ ከም ዝጠሓሰን ከይተነግሮ መጠንቀቕታ ዝተጻሕፈሉ ሚድያ ከም ዘየለ ገሊጹ።

   ሬድዋን ነዚ መብርሂ ዝሃበ፡ ብዓል-መዚ መራኸቢ ብዙሓን ኢትዮጵያ ነተን ብኣምሓርኛን እንግሊዝኛን ዝወጽኣ ጋዜጣታት ‘ሪፖርተር’ን ‘ዘ ሪፖርተር’ን ዘሕትም ‘ማእከል ሚድያን ኮሙኒኬሽንን’፡ ፍቓድ ምዝገባኡ ንዘይተወሰነ እዋን ድሕሪ ምዕጋዱ እዩ።

   እቲ ትካል ንዘሕትመን ጋዜጣታት ካብ ሕትመትን ምዝርጋሕን ጠቕሊለን ደው ክብላ ዝወሰነ እቲ ብዓል-መዚ፡ ንሃገራዊ ረብሓ ዝጻረሩ፡ ንፖለቲካውን ቍጠባውን ህድኣት ዝዘርጉ፡ ከምኡ’ውን ኣብ መንጎ ሕብረተሰብ ምጥርጣርን ምድንጋርን ዝፈጥሩ ጽሑፋት ብምዝርጋሕ ተደጋጋሚ ጥሕሰታት ሕግን ሞያዊ ስነ-ምግባርን ከም ዝፈጸማ ጠቒሱ ነይሩ።

   መንግስቲ ንሚድያታት ናይ ምዕጋድ ስጕምቲ ዝወስድ ዘሎ ንደሞክራሲ ንምዕፋን ዘይኰነስ "ንመአረምታ ዝዓለመ እዩ" ዝበለ ሬድዋን፡ ገለ ትካላት ሚድያ ክሳብ 15 ግዜ ተመኺረን ጌጋታተን ከዕርያ ቃል ከም ዝኣተዋ ብምጥቃስ፡ ኵሉ ትካል ካብ ሕጊ ንታሕቲ ክኸውን ከም ዝግባእ ኣረዲኡ።

   ዓለምለኻዊ ተጣባቒ ሰብኣዊ መሰላት ‘ሂዩማን ራይትስ ዎች’ ብወገኑ፡ ጋዜጣ ‘ሪፖርተር’ ካብተን ኣብታ ሃገር ዝተረፋ ውሑዳት ናጻ ሚድያታት ሓንቲ ምንባራ ብምጥቃስ፡ እቲ ዝተወሰደ ስጕምቲ ኣብ ልዕሊ ስቪላዊ ምሕዳር ዝካየድ ዘሎ መጥቃዕቲ ኰይኑ መንግስቲ ነቲ ውሳነ ብህጹጽ ክስርዞ ጸዊዑ ኣሎ።

   ተወሳኺ፤

   ዓለምለኸ ትካላት መንግስቲ ኢትዮጵያ ኣብ ልዕሊ ጋዜጣ ኣዲስ ስታንዳርድ ንዝወሰዶ ስጉምቲ ተቓዊሞም

   ኢትዮጵያ፡ በዓል መዚ መራኸቢ ብዙሓን ንተሌቪዥን ትግራይ ዳግማይ ኣጊዱ

3. ቅድሚ 9 ሰዓታትፕረዚደንት ኢሳይያስ ምስ ፍሉይ ልኡኽ ቻይና ኣብ ቀርኒ ኣፍሪቃ ተራኺቡ

   

   ምንጪ ስእሊ, MOI

   ፕረዚደንት ኢሳይያስ ኣፈወርቂ ምስ ፍሉይ ልኡኽ ቻይና ኣብ ጕዳያት ቀርኒ ኣፍሪቃ ዝዀነ ሁ ቻንግቹን፡ ብዛዕባ ክልተኣዊ ዝምድናታትን ምዕባለታት ቀርኒ ኣፍሪቃን ዘትዩ፡ ክብል ኣገልግሎት ዜና ኤርትራ ኣቃሊሑ።

   እዚ ርክብ ዓርቢ ኣጋ ምሸት ኣብ መቐበሊ ኣጋይሽ ደንደን ኣስመራ ዝተኻየደ ኰይኑ፡ ፕረዚደንት ኢሳይያስን ሚስተር ሁን ኣብ መንጎ ኤርትራን ቻይናን ዘሎ ምትሕብባር፡ ከምኡ’ውን ኣብ እዋናዊ ዞባዊ ምዕባለታት ብሰፊሑ ተዘራሪቦም።

   ከም መግለጺ ሰበ-ስልጣን ኤርትራ፡ ሚስተር ሁ፡ መንግስቲ ቻይና ንልኡላውነትን ግዝኣታዊ ሓድነትን ኤርትራ ምኽባር ዘለዎ ኣገዳስነት ብዝምልከት ዘለዎ መርገጺ ዳግማይ ኣረጋጊጹ ኣሎ።

   እዚ ዘተ ዝካየድ ዘሎ፡ ኣብ ቀርኒ ኣፍሪቃ ጂኦ-ፖለቲካዊ ውጥረት እናቐጸለ ኣብ ዝመጸሉን፡ ዞባዊ ጸጥታዊ ስግኣታት፡ ዲፕሎማስያዊ ምትፍናንን ቍጠባዊ ረብሓታትን ንኣቓልቦ ዓበይቲ ዓለምለኻውያን ሓይልታት ብዝያዳ ኣብ ዝስሕበሉ ዘሎን እዋን እዩ።

   ቻይና ኣብዚ ዝሓለፈ ዓመታት ብመንገዲ ወፍሪ ትሕተ-ቅርጺ፡ ንግድን ዲፕሎማስያዊ ተበግሶታትን ኣብቲ ዞባ ዘለዋ ተሳትፎ ኣስፊሓቶ ትርከብ። በይጂን ንዞባዊ ርግኣትን ልምዓትን ኣብ ምድንፋዕ ዘለዋ ተራ ንምሕያል ከም ኣካል ናይቲ እትገብሮ ጻዕሪ፡ ኣብ 2022 ንቀርኒ ኣፍሪቃ ዝኸውን ፍሉይ ልኡኽ ሸይማ እያ።

   ኤርትራን ቻይናን ብፖለቲካዊ ምትሕብባር፡ ቍጠባዊ ሽርክነትን ስሩዕ ርክባት ላዕለዎት ሰበ-ስልጣንን ዝደልደለ ነዊሕ ዝጸንሐ ዝምድና ኣለወን። ቻይና ካብቶም ቀንዲ ኣህጉራውያን መሻርኽቲ ኤርትራ ኰይና፡ ኣብታ ሃገር ንሓያሎ ናይ ልምዓትን ትሕተ-ቅርጽን ፕሮጀክታት ደገፍ ክትገብር ጸኒሓ እያ።

   ብዛዕባ ጭቡጥ ውጽኢት ናይቲ ናይ ትማሊርክብ ግን ዝሰፍሐ ተወሳኺ ዝርዝር ሓበሬታ ኣይወጸን።

   ተወሳኺ፤

   ልኡላውነት ምስዘይክበር ጥዑይ ዝምድና ክህሉ ኣይክእልን'ዩ - ፕረዚደንት ኢሳይያስ

   ኤርትራ፡ ኢትዮጵያ ህርፋን ወደባት ክሳብ ዘይሓደገት ዘተ ከም ዘየሎ ኣፍሊጣ

4. 6 ሕዳር 2026መቐለ፡ ሰራዊት ኢትዮጵያ ዘውጽኦ ሓድሽ መመርሒታት ጸጥታ

   

   ሰራዊት ኢትዮጵያ፡ ኣብ ከተማ መቐለ ዘሎ ሓፈሻዊ ጸጥታዊ ኵነታት ጠቒሱ፡ ንምንቅስቓስ ተሽከርከርቲ፡ ዘይሕጋዊ ኣጽዋርን ካልእንዝምልከት ብሓሙስ ሓድሽ መምርሒ ኣውጺኡ።

   እቲ ሰራዊት ኣብዚ እዋናዊ መግለጺኡ፡ ኣብ ርእሰ-ከተማ ክልል ትግራይ ገበን ንምግታእን ድሕነት ህዝቢ ንምሕያልን ዝዓለመ ምዃኑብምግላጽ እዩ ነዚ ተኸታታሊ ናይ ጸጥታ ስጕምትታት ኣፍሊጡ ዘሎ።

   እቲ ዝወጸ ምልክታ መምርሒታት፡ "ሓፈሻዊ ኵነታት ጸጥታ ምምሕያሽ'ኳ እንተ ኣርኣየ"፡ ብሰንኪ እናወሰኸ ዝመጽእ ዘሎ ገበናዊ ንጥፈታትብምስጋእ፡ ኣብታ ከተማ እገዳ ለይታዊ ምንቅስቓስ ተሽከርከርቲ፡ ገዛ-ንገዛ ዝካየድ ፍተሻታትን፡ ኣብ ኢድ ውልቀሰባት ዘሎ ዘይሕጋዊ ኣጽዋርንምርካብ ናይ ሰለስተ መዓልታት ናይ ምሕረት ኣዋጅን ኣውጺኡ።

   ምሉእ ትሕዝቶ፤

   መቐለ፡ ሰራዊት ኢትዮጵያ ዘውጽኦ ሓድሽ መመርሒታት ጸጥታ እንታይ እዩ?

5. 6 ሕዳር 2026ሰላም ከመይ ትሓድሩን ትውዕሉን - ኣኣብ ዘለኹምዎ

   ኣብዚ ቀጥታዊ ፈነወና ዝተፈላለዩ እዋናዊ ሓበሬታታት ክትከታተሉ ንዕድመኩም።

   ትሕዝቶታትና ብዝተፈላለዩ ኣማራጺታት ትረኽብዎም

   መርበብ ሓበሬት ቢቢሲ ትግርኛ

   ዩትዩብ ቢቢሲ ትግርኛ

   ቢቢሲ ትግርኛ ፌስቡክ

   ቲክቶክ ቢቢሲ ትግርኛ

   ኢንስታግራም ቢቢሲ ትግርኛ

   ሰናይ ምክትታል