آصف حسن: پاکستانی نژاد ڈاکٹر جنھوں نے برطانیہ میں ہزاروں زندگیاں بچائیں اور لاکھوں دل جیتے

برطانیہ سے تعلق رکھنے والی سسلیا پیدائشی طور پر ہی دل کے مرض میں مبتلا تھیں اور دو سال کی عمر تک پہنچتے پہنچتے اُن کی متعدد سرجریاں اور یہاں تک کہ بائی پاس تک ہو چکا تھا۔

اور جب سسلیا آٹھ سال کی ہوئیں تو انھیں زندہ رکھنے کے لیے ہارٹ ٹرانسپلانٹ کے علاوہ کوئی اور چارہ نہ تھا۔

مگر مسئلہ یہ تھا کہ اُس وقت سسلیا کے لیے اُن کی عمر اور وزن سے مطابقت رکھنے والا کوئی ڈونر (عضو عطیہ کرنے والا) نہیں مل رہا تھا۔ جس ڈونر کا میچ ملا بھی، اُس کا وزن 90 کلوگرام تھا جبکہ آٹھ سالہ سسلیا صرف 20 کلوگرام کی تھیں۔ سادہ الفاظ میں سسلیا کے جسم کے لیے وہ دل بہت بڑا تھا۔

نیوکاسل کے فری مین ہسپتال سے منسلک ڈاکٹر آصف حسن اور اُن کی ٹیم نے ایک نئی تکنیک استعمال کرتے ہوئے، جو اس سے پہلے بچوں کی ہارٹ سرجریز میں استعمال نہیں ہوئی تھی، سسلیا کے چھوٹے سے سینے میں وہ بڑا دل لگا دیا۔

یہ نہ صرف سسلیا اور اُن کے خاندان والوں کے لیے بلکہ بچوں کی ہارٹ سرجری کے شعبے کے لیے بھی ایک ’زندگی بچانے والی‘ کامیابی تھی۔

حال ہی میں پرائیڈ آف برٹن ایوارڈز میں ڈاکٹر آصف حسن کو ہارٹ سرجری کے شعبے میں اُن کی گراں قدر خدمات کی وجہ سے لائف ٹائم ایچیومنٹ ایوارڈ سے نوازا گیا ہے۔

جب اِن ایوارڈز کی تقریب کی فوٹیج سوشل میڈیا پر وائرل ہوئی تو شاید ہی کوئی ایسی آنکھ ہو گی جو اشکبار نہیں ہوئی ہو۔

خصوصاً اُس وقت جب میزبان نے ڈاکٹر آصف کو سٹیج پر بلا کر انھیں بتایا کہ جن بچوں کی انھوں نے ہارٹ سرجریز کی ہیں اُن میں سے کچھ بچے یہاں ناظرین میں موجود ہیں اور اپنی جانیں بچانے کے لیے ان کا شکریہ ادا کرنا چاہتے ہیں۔

یہ سننے کے بعد ڈاکٹر آصف بھی اپنے آنسوؤں پر قابو نہ رکھ سکے۔

یہ منظر سبھی دل رکھنے والوں کے لیے، بالخصوص برطانیہ میں مقیم پاکستانیوں کے لیے، ایک قابلِ فخر لمحہ تھا کیونکہ ڈاکٹر آصف حسن پاکستانی نژاد برطانوی شہری ہیں اور گذشتہ 35 برسوں سے یہاں چھوٹے بچوں کی زندگیاں بچا رہے ہیں۔

ڈاکٹر آصف کا شمار بچوں کی ہارٹ سرجریز کے حوالے سے دنیا کے بڑے ہارٹ سرجنز میں ہوتا ہے، یہی ان کی سپیشیئلٹی یا بقول اُن کے ’سُپر سپیشیئلٹی‘ ہے، یعنی بچوں کی ہارٹ سرجریز اور ٹرانسپلانٹ۔

ڈاکٹر آصف کے مطابق انھوں نے اپنے کیریئر کے دوران مجموعی طور پر چار ہزار سے زیادہ ہارٹ آپریشنز اور 400 سے زیادہ ہارٹ ٹرانسپلانٹ کیے ہیں۔ اس کے علاوہ بے شمار دیگر آپریشنز بھی ہیں، جن میں وہ ڈاکٹروں کی معاونت کرتے رہے ہیں۔

بی بی سی اُردو کو دیے گئے ایک خصوصی انٹرویو میں ڈاکٹر آصف حسن نے سسلیا کے کیس کے حوالے سے بتایا کہ جب بچی کو 90 کلوگرام وزنی شخص کا ہارٹ دیا گیا تو اُس کا چاک سینہ بند کرنا ناممکن تھا، اسی لیے سینے کو بند نہیں کیا گیا۔

ڈاکٹر آصف کے مطابق ’ہوا یہ کہ ہارٹ آہستہ آہستہ اپنی جگہ بنانے کے لیے سکڑتا گیا اور جِلد سینے کو کوور کرتی گئی۔‘

پرائیڈ آف برٹن ایوارڈ کی تقریب کے دوران جو بچے ڈاکٹر آصف حسن سے ملنے کے لیے آئے تھے، اُن میں سسلیا نامی وہ بچی بھی شامل تھی، جو کہ اب جوان ہو چکی ہے۔

کراچی کے ڈاؤ میڈیکل کالج سے تعلیم اور کریئر

ڈاکٹر آصف حسن کا خاندان سنہ 1947 میں انڈیا کے شہر آگرہ سے کراچی منتقل ہوا تھا، جہاں سنہ 1956 میں ڈاکٹر آصف کی پیدائش ہوئی۔

ڈاکٹر آصف نے سنہ 1979 میں ڈاؤ میڈیکل کالج سے ایم بی بی ایس کیا اور پھر انگلینڈ چلے آئے، جہاں بقول اُن کے مختلف ہسپتالوں میں ’در بدر‘ گھومنے کے بعد بالآخر وہ نیو کاسل میں سیٹل ہو گئے اور یہیں سے فری مین ہسپتال میں 35 سال ملازمت کرنے کے بعد 2026 میں ریٹائر ہوئے۔

ایک سوال کے جواب میں ڈاکٹر حسن نے بتایا کہ انھیں تو معلوم ہی نہیں تھا کہ انھوں نے اپنے کیریئر کے دوران کتنے آپریشن کیے ہیں اور یہ کہ جب اُن پر بنائے گئے ایک پروگرام کے ضمن میں تحقیق کی گئی تو انھیں پتا چلا کہ انھوں نے 4000 آپریشن کر رکھے ہیں۔

’ہاں مجھے یہ ضرور معلوم ہے کہ میں نے 400 ٹرانسپلانٹ کیے ہیں۔ اُن میں صرف دل کے ٹرانسپلانٹ نہیں بلکہ دل اور گردوں کے، دل اور جگر کے، اور دل اور پھیپھڑوں کے ٹرانسپلانٹ بھی شامل ہیں۔‘

ڈاکٹر آصف کے مطابق انھوں نے ایک بچے کا ٹرانسپلانٹ اُس وقت بھی کیا جب اُس کی عمر محض چند ہفتے تھی۔

ایک سوال کے جواب میں کہ کیا بچوں کو صرف بچوں کا دل ہی لگ سکتا ہے؟ ڈاکٹر آصف نے ایک واقعہ سناتے ہوئے کہا کہ نیوکاسل کے ہسپتال میں اکتوبر 1987 میں پہلا ہارٹ ٹرانسپلانٹ ایک ایسی بچی کا ہوا تھا، جس کی عمر پانچ ماہ تھی۔

’اگلے سال وہ 40 برس کی ہو رہی ہے اور میں اس کی 40ویں سالگرہ کی تقریبات منعقد کر رہا ہوں۔ پانچ، چھ مہینے کی بچی میں نیا دل لگا اور اس کی عمر کے ساتھ ساتھ بڑا ہوتا گیا۔‘

سوال کا جواب دیتے ہوئے انھوں نے کہا کہ ’بعض دفعہ بچوں میں بڑی عمر کے افراد کا دل بھی ٹرانسپلانٹ کرنا پڑتا ہے کیونکہ اکثر دل عطیہ کرنے والے افراد بڑی عمر کے ہوتے ہیں۔ اگر بچہ دس، پندرہ سال کا ہو تو اُس میں وہ ہارٹ اکوموڈیٹ ہو جاتا ہے۔‘

’لیکن بعض اوقات بچے بہت چھوٹے ہوتے ہیں اور ان کے لیے اُن کی عمر کے حساب سے ہارٹ نہیں ملتا، تو ان میں بڑوں کا ہارٹ بھی لگایا جا سکتا ہے۔‘

بڑوں کی نسبت بچوں کے آپریشنز کتنے مشکل ہوتے ہیں؟

ہم نے ڈاکٹر آصف سے سوال کیا کہ بچوں کا آپریشن کتنا مشکل ہوتا ہے؟ اس کا جواب دیتے ہوئے انھوں نے کہا کہ ’اس کا جواب بہت سادہ بھی ہے اور بہت مشکل بھی۔‘

’سادہ تو یہ ہے کہ جب ہارٹ کے مرض میں مبتلا بچے پیدا ہوتے ہیں تو ان کے خون میں آکسیجن نہیں ہوتی اور ان کا رنگ بھی بالکل مختلف ہوتا ہے۔ اس کے علاوہ ترقی یافتہ ملکوں میں عورت کی زچگی کے 20 ہفتوں کے بعد جب اس کا الٹرساؤنڈ ہوتا ہے تو یہ پتا چل جاتا ہے کہ بچے میں کیا مسئلہ ہے۔‘

’بعض اوقات ایسا بھی ہوتا ہے کہ بچے کی پیدائش کے کچھ منٹ بعد ہی اس کی جان بچانے کے لیے اس کا آپریشن کرنا پڑتا ہے۔ میں نے ایسے بھی کئی آپریشن کیے ہیں۔‘

وہ کہتے ہیں کہ مفروضہ یہ ہے کہ اس نوعیت کے آپریشن بہت مشکل ہوتے ہیں، مگر حقیقت یہ ہے کہ سائنس اتنی ترقی کر گئی ہے کہ یہ سب چیزیں اب سٹینڈرڈ بن گئی ہیں۔

اس سوال کے جواب میں کہ کیا کبھی انھیں یہ لگا کہ آپریشن بہت مشکل ہے؟

انھوں نے کہا کہ ’آپ جمناسٹک دیکھتے ہیں؟ اس میں جمناسٹ چھلانگ لگاتا ہے اور قلابازیاں لیتا ہوا لینڈ کر جاتا ہے۔ بالکل اسی طرح آپ کسی بھی شعبے میں چھوٹے چھوٹے قدم اٹھاتے ہوئے منزل پر پہنچتے ہیں۔۔۔ یہی حال سرجری کا بھی ہے۔ آپ سوچتے ہیں کہ یہ کیسے ہو گیا لیکن اس تک پہنچنے کے لیے آپ بہت محنت کرتے ہیں، چھوٹے چھوٹے سٹیپس لیتے ہیں۔ بالکل سیڑھی کے سٹیپس کی طرح آپ آہستہ آہستہ اوپر چڑھتے ہیں۔‘

جذباتی اثر اور 17 گھنٹے طویل آپریشن

جب اُن سے پوچھا گیا کہ بچوں یا بڑوں کا آپریشن کرنے والے سرجنز پر کیا ان کے کام کا کوئی نفسیاتی یا جذباتی اثر پڑتا ہے؟ تو ڈاکٹر آصف کا کہنا تھا کہ ’اس صورتحال پر ہر کوئی مختلف طریقے سے ردِعمل دیتا ہے۔

’ایک بہت ہی مشہور سرجن کا قول ہے کہ ہر سرجن کے دل میں ایک قبرستان ہوتا ہے، جس کا وہ ہر رات دو یا تین بجے جا کر معائنہ کرتا ہے، آپ کو (آپریشنز کے دوران) جب کامیابی نہیں ملتی تو وہ ہمیشہ یاد رہتی ہے۔ آپ بھولتے نہیں ہیں۔‘

’میں اب ریٹائر ہو گیا ہوں لیکن ہر رات مجھے لگتا ہے کہ میں کوئی آپریشن کر رہا ہوں اور وہ کامیاب نہیں ہو رہا ہے۔ ٹراما ضرور ہوتا ہے لیکن آپ کو اپنے آپ کو تیار کرنا پڑتا ہے کہ آپ جذباتی طور پر اتنے وابستہ نہ ہوں۔‘

اس سوال کے جواب میں کہ کیا انھیں اپنا سب سے مشکل کیا ہوا کوئی آپریشن یاد ہے؟ ڈاکٹر آصف نے کہا کہ ’میرے خیال میں میں نے جو سب سے لمبا آپریشن کیا ہے وہ ایک ایسے مریض کا تھا جس کا دل اور جگر ایک ہی وقت ٹرانسپلانٹ ہونا تھا۔

’میں نے دل ٹرانسپلانٹ کیا اور میرے ایک ساتھی نے جگر۔ یہ آپریشن 17، 18 گھنٹے چلا تھا۔ یہ بہت پیچیدہ تھا کیونکہ اس شخص کے پہلے بھی کئی آپریشن ہو چکے تھے۔‘

کئی بچے جن کے ڈاکٹر آصف نے آپریشنز کیے تھے وہ اب جوان ہو چکے ہیں اور اُن سے اور اُن کے والدین سے ڈاکٹر آصف کا ایک تعلق بن گیا ہے۔

ڈاکٹر آصف بتاتے ہیں کہ ’پرائیڈ آف برٹن کی تقریب میں ایک ایسی لڑکی بھی تھی جس کے پانچ مرتبہ آپریشن کرنے پڑے تھے۔ اور اب اس کی عمر 28 سال ہے۔‘

ڈاکٹر آصف کے مریض بچے اور ان کے والدین اب بھی ان سے رابطے میں رہتے ہیں اور بقول ڈاکٹر آصف یہ تعلق ’باہمی‘ ہے۔

جب ڈاکٹر آصف حسن سے پوچھا گیا کہ اُن کے لیے پرائیڈ آف برٹن کیا معنی رکھتا ہے تو اُن کا کہنا تھا کہ یہ اعزاز اُن کے لیے کوئی خاص معنی نہیں رکھتا اور یہ کہ وہ صرف ’ایمانداری اور پروفیشنل طریقے‘ سے اپنا کام کر رہے تھے۔

ڈاکٹر آصف حسن کے مطابق ’اکثر یہ سمجھا جاتا ہے کہ ’سرجنز آر لائیک گاڈز‘ (سرجنز خداؤں جیسے ہوتے ہیں)، مگر یہ ٹھیک نہیں ہے۔ آپ (سرجنز) کو سمجھنا چاہیے کہ آپ کا ایک کام ہے، آپ کو وہ کام پوری ایمانداری اور اچھی طرح سے کرنا چاہیے۔‘

’این ایچ ایس جیسا کوئی اور ادارہ نہیں‘

برطانیہ میں صحت کے ادارے نیشنل ہیلتھ سروس (این ایچ ایس) کے متعلق ڈاکٹر آصف کا کہنا ہے کہ وہ آج جو کچھ بھی ہیں وہ این ایچ ایس کی وجہ سے ہیں۔

’یہ ایک ایسا منفرد ادارہ ہے جس میں آپ پاؤں کے ناخن سے لے کر ہارٹ ٹرانسپلانٹ تک بالکل مفت کروا سکتے ہیں۔‘

ڈاکٹر آصف برطانیہ کے علاوہ امریکہ اور دوسرے ممالک میں بھی کام کر چکے ہیں۔ انھوں نے بتایا کہ امریکہ جیسے ملک میں بھی کئی والدین کے پاس بچوں کا علاج اور اس کے بعد ادویات لینے تک کے لیے پیسے نہیں ہوتے تھے اور کئی ایک تو اپنا گھر بار تک بیچ کر بچوں کا علاج کراتے تھے۔

’لیکن برطانیہ میں ایسا نہیں ہوتا کیونکہ یہاں این ایچ ایس ہے۔ اس کے اپنے بہت سے مسائل ہیں لیکن دوسری قسم کے ہیں۔‘

’میں نے بہت ملکوں میں بھی کام کیا ہے اور ہر سسٹم کی کچھ خوبیاں ہیں اور کچھ خامیاں۔ لیکن این ایچ ایس کی خوبی یہ ہے کہ آپ کو علاج کے لیے اپنا گھر نہیں بیچنا پڑتا۔ اور خاص طور پر اگر ایمرجنسی کا معاملہ ہو تو اس سے اچھا کوئی ادارہ ہی نہیں ہے۔‘

جب ان سے پوچھا گیا کہ کیا اب ریٹائر ہونے کے بعد اُن کو لگتا ہے کہ وہ اپنے کیے گئے کام سے مطمئن ہیں؟

انھوں نے کہا کہ اس بارے میں انھوں نے بہت پہلے سوچا تھا کہ جب ’نیوکاسل میں میرا کام ختم ہو گا تو جس دن وہ ختم ہو گا، تب میں نہیں چاہوں گا کہ کسی کو یہ کہنا پڑے کہ ہمیں ڈاکٹر آصف کی ضرورت ہے۔ اگر میں یہ کر پایا تو میں سمجھوں گا کہ میں نے اپنا کام پوری طرح سے کیا، اور جن لوگوں کو میں نے سکھایا ان کو میری کوئی ضرورت نہیں ہے۔ میں نے اپنے سٹوڈنٹس کو ٹرین کیا اور میں یہ چاہتا تھا کہ وہ مجھ سے بہتر ہوں اور ایسی چیزیں کر رہے ہیں جو میں نے نہیں کی تھیں۔‘

ٹینس، غالب اور باغبانی

اپنی مصروفیات کے بارے میں بات کرتے ہوئے ڈاکٹر آصف نے بتایا کہ اُن کے تین مشغلے ہیں۔ یعنی ٹینس کھیلنا، غالب کو پڑھنا اور باغبانی کرنا۔

وہ نیو کاسل کی 65 سال کی عمر سے زیادہ کے لوگوں کی ٹینس ٹیم میں شامل ہیں اور ٹورنامنٹ بھی کھیلتے ہیں۔

ڈاکٹر آصف کے پسندیدہ شاعر غالب ہیں اور اُن کی شاعری کے حوالے سے ڈاکٹر آصف اور اُن کے دو دوست، شیر شاہ سید اور احمد ظہیر بابر، اُس وقت کتاب کے ایک پراجیکٹ پر کام کر رہے ہیں جس میں وہ اور شیر شاہ غالب کے سو اشعار کا انگریزی میں ترجمہ کریں گے اور احمد ظہیر بابر ان اشعار کو سامنے رکھتے ہوئے ان کی پینٹنگز بنائیں گے۔

اس پراجیکٹ کے متعلق بتاتے ہوئے ڈاکٹر آصف نے احد ندیم قاسمی کا ایک شعر سنایا:

وہ جو شعروں میں ہے اک شے پسِ الفاظ ندیمؔ

اس کا الفاظ میں اظہار نہیں ہو سکتا

یعنی غالب کی شاعری اتنی آفاقی ہے کہ صرف اسے لفظوں ہی میں بیان نہیں کیا جا سکتا اور یہ بہت معنی رکھتی ہے۔

ڈاکٹر آصف بتاتے ہیں کہ ’تو جسمانی صحت کے لیے ٹینس، دماغی صحت کے لیے غالب اور ماحولیاتی صحت کے لیے گارڈننگ (باغبانی)۔‘

ڈاکٹر آصف نے یہ بھی بتایا کہ ان کا تعلق ایک ادبی گھرانے سے ہے اور شاعر منیب الرحمان اُن کے نانا تھے، والد عربی میں پی ایچ ڈی تھے جبکہ والدہ کو بھی شعر و شاعری سے شغف تھا۔

’مجھے میرے نانا کی غزلیں، نظمیں سناتی رہتی تھیں۔ ہم شام کو ٹی وی نہیں دیکھتے تھے بلکہ ہمارے گھر میں ادبی باتیں اور شعر و شاعری ہوتی رہتی تھی۔‘

ڈاکٹر آصف حسن کے ساتھ انٹرویو ایک نہایت دلچسپ ’سٹروک‘ پر ختم ہوا۔

انھوں نے بتایا کہ جب وہ ہسپتال میں کام کرتے تھے تو بیس برس تک ہسپتال میں کام کرنے والے سب مردوں اور خواتین کے لیے ضروری تھا کہ ہر شام بدھ کو چھ بجے اکٹھے ہو کر ان کے ساتھ ہاکی کھیلیں۔

انھوں نے ہنستے ہوئے بتایا کہ ’یہی وہ موقع ہوتا تھا جس میں میرے جونیئر ڈاکٹرز، جنھیں میں نے کوئی مشکل کام سونپے ہوتے تھے اور وہ نہیں کر سکتے، مجھ سے بدلہ لے سکیں۔‘

BBC World Service کی نئی ایپ ڈاؤن لوڈ کریں۔

'BBC News اردو' ایڈیشن کا انتخاب کریں اور نیوز الرٹس، تحقیقاتی اور تفصیلی رپورٹس، سب کچھ ایک ہی جگہ پر حاصل کریں۔

نوٹ: نئی ایپ برطانیہ اور امریکہ میں دستیاب نہیں ہے اور اس کا انگریزی زبان میں ایڈیشن موجود نہیں۔