لائیو , عالمی سطح پر خام تیل کی قیمتوں میں مزید کمی: امریکی عوام نے ووٹ کے ذریعے جنگ کو مسترد کر دیا ہے، ایران

لائیو کوریج

1. 2 گھنٹے قبلعالمی منڈی میں خام تیل کی قیمتوں میں مزید کمی

   امریکہ میں وسط مدتی انتخابات اور مشرق وسطیٰ میں امن مذاکرات کے تناظر میں بدھ کے روز تیل کی قیمتوں میں کمی دیکھی گئی ہے۔ یہ صورتحال اس کے باوجود سامنے آئی ہے کہ گذشتہ ہفتے امریکہ میں خام تیل کے ذخائر غیر متوقع طور پر کم ہوئے ہیں۔

   خبررساں ادارے روئٹرز کے مطابق برینٹ خام تیل کے فیوچر (مستقبل کے) معاہدے 0.25 فیصد کمی کے ساتھ 103.34 ڈالر فی بیرل پر آ گئے، جبکہ امریکی ویسٹ ٹیکساس انٹرمیڈیٹ خام تیل کے فیوچر 53 سینٹ یا 0.55 فیصد گر کر 95.56 ڈالر فی بیرل پر پہنچ گئے۔

   یاد رہے کہ گذشتہ کاروباری سیشن میں برینٹ کی قیمت میں ایک فیصد سے زیادہ کمی ہوئی تھی اور یہ تقریباً چار ہفتوں کی کم ترین سطح پر آ گئی تھی، کیونکہ تاجر یوکرین اور ایران میں جاری جنگوں کے خاتمے سے متعلق مذاکرات کا جائزہ لے رہے تھے۔

   ادھر تیل کی منڈیوں اور تاجروں کی نظریں امریکہ، اسرائیل اور ایران کے درمیان جاری جنگ کے خاتمے کے لیے ہونے والے مذاکرات پر بھی مرکوز ہیں، جبکہ قطر نے امریکا کے وسط مدتی انتخابات کے بعد ممکنہ کشیدگی اور حملوں میں اضافے کو روکنے کے لیے ثالثی کی کوششیں تیز کر دی ہیں۔

2. 2 گھنٹے قبلامریکی عوام نے ووٹ کے ذریعے جنگ کو مسترد کر دیا ہے: باقر قالیباف

   ایران کی پارلیمان کے سپیکر محمد باقر قالیباف نے کانگریس کے دونوں ایوانوں میں ریپبلکنز کی ممکنہ شکست کے تناظر میں کہا ہے کہ ووٹ کے ذریعے امریکی عوام نے ’جنگ کو مسترد‘ کر دیا ہے۔

   قالیباف نے سوشل میڈیا پلیٹ فارم ایکس پر ایک پوسٹ میں کہا کہ ’ضمیر کی آواز ہو یا بڑھتی ہوئی مہنگائی، امریکیوں نے جنگ کو ’نہ‘ کہا ہے، اور ہم اس پیغام کی تائید کرتے ہیں۔‘

   انھوں نے خبردار کیا کہ اگر امریکی حکومت عوامی خواہشات کے برخلاف ’بین الاقوامی سرپرستوں اور بلیک میل کرنے والوں‘ کی خدمت کرے گی تو اسے عوامی انکار کا سامنا کرنا ہو گا۔

3. 4 گھنٹے قبلفی الحال ایران پر نئے حملے کا کوئی منصوبہ نہیں: ٹرمپ

   امریکی صدر ڈونلڈ ٹرمپ نے کہا ہے کہ واشنگٹن کے پاس اس وقت ایران پر کسی نئے حملے کا کوئی فوری منصوبہ نہیں۔

   برطانوی اخبار فنانشل ٹائمز کو منگل کو دیے گئے ایک انٹرویو میں ٹرمپ نے کہا کہ وہ ایران کے ساتھ جاری صورتحال سے مطمئن ہیں، تاہم انھوں نے یہ بھی اشارہ دیا کہ اگر ضرورت پڑی تو وہ جنگ جاری رکھنے کے لیے تیار ہیں۔

   چھ منٹ دورانیے کے اس ٹیلی فونک انٹرویو میں ٹرمپ نے کہا: ’ایسا لگتا ہے کہ ہم وہ سب کچھ حاصل کر رہے ہیں جو ہم چاہتے ہیں۔‘

   دوسری جانب امریکہ میں وسط مدتی انتخابات کے فوری بعد ایران کے خلاف کسی نئی فوجی کارروائی کے امکان پر خدشات برقرار ہیں، خصوصاً اس کے بعد جب ایران کی سپریم نیشنل سکیورٹی کونسل کے سیکریٹری محسن رضائی نے کہا کہ تہران اپنے مجوزہ منصوبے پر واشنگٹن کے ردعمل سے مطمئن نہیں۔

   منگل کو مصر اور ایران کے وزرائے خارجہ کے درمیان ہونے والی ٹیلی فونک گفتگو کو بھی ان خدشات کے تناظر میں دیکھا جا رہا ہے۔ اس گفتگو میں مصری وزیر خارجہ بدر عبدالعاطی نے تہران پر زور دیا کہ وہ مذاکرات میں مزید لچک کا مظاہرہ کرے۔

4. 5 گھنٹے قبلسپین میں ٹرین حادثے کے بعد وزیرِ ٹرانسپورٹ نے استعفیٰ دے دیا

   سپین کے وزیرِ ٹرانسپورٹ اوسکار پوئنٹے نے ٹرین حادثے میں کم از کم 69 افراد کی ہلاکت اور درجنوں کے زخمی ہونے کے چھ روز بعد اپنے عہدے سے استعفیٰ دے دیا ہے۔

   پارلیمان میں اپنے فیصلے کا اعلان کرتے ہوئے انھوں نے کہا: ’ایک سال سے بھی کم عرصے میں اس نوعیت کے دو سنگین حادثات کے بعد ملک کا وزیر ٹرانسپورٹ اپنے عہدے پر برقرار نہیں رہ سکتا۔‘

   سپین میں جنوری میں بھی ایک ٹرین حادثہ پیش آیا تھا جس کے نتیجے میں 46 افراد ہلاک ہوئے تھے۔

5. 6 گھنٹے قبلایران جنگ کے باعث یورپ کو اب تک 127 ارب یورو کے اضافی اخراجات برداشت کرنا پڑے: صدر یورپی کمیشن

   یورپی کمیشن کی صدر ارسلا وان ڈر لیئن نے کہا ہے کہ آبنائے ہرمز کی بندش کے نتیجے میں یورپی ممالک کو فوسل فیولز کی درآمد پر اب تک 127 ارب یورو کے اضافی اخراجات برداشت کرنا پڑے ہیں۔

   منگل کو مشرقِ وسطیٰ کے بحران کے معاشی اثرات پر بات کرتے ہوئے انھوں نے کہا کہ یورپ کو اپنی توانائی کی ضروریات پوری کرنے کے لیے بہت زیادہ قیمت ادا کرنا پڑ رہی ہے۔

   ارسلا وان ڈر لیئن نے زور دے کر کہا کہ اس صورتحال نے ایک بار پھر بیرونی توانائی کے ذرائع پر انحصار کے حوالے سے یورپ کی کمزوری کو نمایاں کر دیا ہے اور یہ واضح کیا ہے کہ برِّ اعظم کو توانائی کے شعبے میں اپنی خود مختاری اور سلامتی مزید مضبوط بنانے کی ضرورت ہے۔

6. 6 گھنٹے قبلپاکستان کا مقامی سطح پر تیار کردہ پہلے فضا سے فضا میں مار کرنے والے ’فاز‘ میزائل کا کامیاب تجربہ کرنے کا دعویٰ

   پاکستانی فوج کے شعبہ تعلقاتِ عامہ (آئی ایس پی آر) نے دعویٰ کیا ہے کہ پاکستان نے اپنے پہلے مقامی سطح پر تیار کردہ فضا سے فضا میں مار کرنے والے میزائل ’فَاز‘ کا کامیاب تجربہ کیا ہے۔

   پاکستان کے سرکاری میڈیا کے مطابق آئی ایس پی آر کا کہنا ہے کہ جدید ٹرمینل گائیڈنس سسٹم سے لیس یہ میزائل طویل فاصلے پر فضائی اہداف کو نشانہ بنانے کی صلاحیت رکھتا ہے، جس سے پاکستان فضائیہ کی عملی اور آپریشنل استعداد میں اضافہ ہو گا۔

   آئی ایس پی آر کا کہنا ہے کہ پاکستان کی سول اور عسکری قیادت نے اسے قومی دفاعی صلاحیتوں اور خود انحصاری کے میدان میں ایک اہم سنگِ میل قرار دیا ہے۔

7. 7 گھنٹے قبلہسپانوی فٹبالر میچ کے دوران گول کیپر سے ٹکرانے کے بعد ہلاک

   ہسپانوی فٹبال ٹیم ٹینیرائف کے سٹرائیکر خیسوس دے میگیل ایک میچ کے دوران زخمی ہونے کے بعد وفات پا گئے ہیں۔ ان کی عمر 30 برس تھی اور وہ سپین کے دوسرے درجے کی ایک لیگ کے میچ کے دوران شدید زخمی ہوئے تھے۔

   سوموار کے روز کھیلے جانے والے میچ کے دوران ٹینیرائف ایف سی اینڈورا کے خلاف میچ میں گول کیپر خیسوس اووونو کے ساتھ ٹکر کے نتیجے میں ان کے سر اور سینے پر چوٹیں آئی تھیں۔

   گذشتہ روز میگیل کی حالت کو ’مستحکم لیکن تشویشناک‘ قرار دیا گیا تھا، تاہم منگل کی صبح ان کی طبیعت مزید بگڑ گئی اور ہسپانوی کھلاڑی وفات پا گئے۔

   خبر رساں ادارے روئٹرز کے مطابق، ہسپانوی پولیس نے دے میگیل کی وفات کے بعد ممکنہ غیر ارادی قتلِ خطا کے معاملے کی تحقیقات شروع کر دی ہیں۔

   ہسپانوی قانون کے تحت، ایسی ہر موت جسے غیر طبعی قرار دیا جائے، خودکار طور پر عدالتی تحقیقات کا باعث بنتی ہے۔

8. 7 گھنٹے قبللبنان سمیت تمام محاذوں پر جنگ کا خاتمہ امریکہ کے ساتھ کسی بھی معاہدے کا بنیادی نکتہ ہے: اسماعیل بقائی

   ایرانی وزارتِ خارجہ کے ترجمان اسماعیل بقائی کا کہنا ہے کہ لبنان سمیت تمام محاذوں پر جنگ کا خاتمہ امریکہ کے ساتھ کسی بھی معاہدے کا بنیادی نکتہ ہے۔

   ایرانی وزارتِ خارجہ کے ترجمان نے صحافیوں سے گفتگو کے دوران قطری ثالثوں کے ذریعے مذاکرات اور امریکہ کے ساتھ پیغامات کے تبادلے کی پیش رفت سے متعلق ایک سوال کا انھوں نے کوئی واضح جواب نہیں دیا۔

   ان کا کہنا تھا کہ ’ہمارے مطالبات واضح ہیں۔ جب تک ہمارے مطالبات، جو مکمل طور پر جائز اور معقول ہیں، پورے نہیں کیے جاتے، ہم خطے میں سلامتی کی بحالی کے بارے میں بات نہیں کر سکتے۔ ہم یہ تصور نہیں کر سکتے کہ لبنان سمیت تمام محاذوں پر جنگ روکنے کے عزم کے بغیر کسی مفاہمت تک پہنچا جا سکتا ہے۔‘

   ’اسلام آباد مفاہمت کے پہلے نکتے کے مطابق، جس کی امریکہ نے بدقسمتی سے خلاف ورزی کی، لبنان سمیت تمام محاذوں پر جنگ کے خاتمے کا معاملہ کسی بھی سفارتی عمل کے اہم نکات میں شامل ہو گا۔‘

9. 7 گھنٹے قبلایران کے مطالبات پر امریکہ کا جواب ’قابلِ اطمینان‘ نہیں، محسن رضائی

   ایران کی قومی سلامتی کونسل کے سیکریٹری محسن رضائی کا کہنا ہے کہ ایران کے مطالبات پر امریکہ کا جواب ’قابلِ اطمینان‘ نہیں تھا۔

   بی بی سی فارسی کے مطابق محسن رضائی نے اپنے ایکس اکاؤنٹ پر لکھا ہے کہ ’ایران کے حقوق اور مطالبات کے بارے میں امریکہ کا جواب قابلِ اطمینان نہیں تھا، اور انھیں ایران کی ساتوں شرائط کا مکمل اور واضح جواب دینا اور ان پر عمل کرنا چاہیے۔ صرف اسی صورت میں آبنائے ہرمز دوبارہ کھولی جائے گی۔‘

   یاد رہے کہ گذشتہ چند روز میں ایران اور امریکہ کے درمیان قطری ثالثوں کے ذریعے جنگ کے خاتمے اور آبنائے ہرمز دوبارہ کھولنے کے لیے مذاکرات ہوئے ہیں، تاہم ان کا نتیجہ تاحال واضح نہیں۔

   گذشتہ ہفتے امریکی نائب صدر جے ڈی وینس نے محسن رضائی کو ایک خط لکھا تھا۔

   تاحال یہ معلوم نہیں کہ آیا محسن رضائی نے اس خط کا جواب دے دیا ہے یا نہیں۔ تاہم عباس عراقچی نے اس سے پہلے کہا تھا کہ چونکہ یہ خط قومی سلامتی کونسل کے سیکریٹری کے نام لکھا گیا تھا، اس لیے اس کا جواب دینے یا نہ دینے کا فیصلہ بھی انہی کے اختیار میں ہے۔

10. 7 گھنٹے قبلحکومت کا ایل پی جی کی درآمد کو مسابقت کی بنیاد پر کھولنے اور کوٹہ سسٹم ختم کرنے کا اعلان

    پاکستان کی حکومت نے اعلان کیا ہے کہ ملک میں لیکوڈ پیٹرولیم گیس (ایل پی جی) کی درآمد کو مسابقت کی بنیاد پر کھولا جائے گا اور ایل پی جی کوٹہ سسٹم ختم کر دیا جائے گا۔

    منگل کے روز وفاقی وزیرِ اطلاعات عطااللہ تارڑ اور وزیر پیٹرولیم علی پرویز ملک نے اسلام آباد میں ایک پریس کانفرنس سے خطاب کرتے ہوئے بتایا کہ منگل کے روز وزیرِ اعظم نے توانائی کے معاملے پر ایک میٹنگ کی جس میں فیصلہ کیا گیا کہ ایل پی جی کی درآمد مسابقت کی بنیاد پر کھولی جائے گی۔

    علی پرویز ملک نے کہا کہ ایل پی جی قیمت کے حوالے سے ملک کے مختلف شہروں سے شکایات آ رہی ہیں کہ ایل پی جی 700 سے 800 فی کلو فروخت ہو رہی ہے، جبکہ عدم دستیابی کی بھی شکایات ہیں۔

    انھوں نے بتایا کہ ملک میں ایل پی جی کی اس وقت کل مانگ 24 لاکھ ٹن ماہانہ کے قریب ہے جو کہ روزانہ کی بنیاد پر ساڑھے چھ، سات ہزار ٹن بنتی ہے۔

    وزیرِ پیٹرولیم کے مطابق 2000 سے 2500 ٹن ایل پی جی مقامی طور پر پیدا کی جاتی ہے جبکہ مجموعی مانگ کا تقریبا نصف حصہ مغربی سرحد سے آتا ہے جس میں مشکلات آئی ہوئے ہیں۔ ان کے مطابق اس کے علاوہ بقیہ ایل پی جی سمدر کے راستے آتی ہے۔

    علی پرویز ملک کا کہنا ہے کہ حکومت سردیوں میں گیس کی فراہمی کے لیے کام کر رہی ہے اور کوشش ہے کہ سردیوں میں کھانے میں تینوں اوقات میں صارفین کو گیس فراہم کی جائے۔

    ان کا کہنا ہے کہ وزیرِ اعظم نے توانائی کے معاملے پر ہونے والے اجلاس میں فیصلہ کیا ہے کہ ایل پی جی کی درآمد کو مسابقت کی بنیاد پر کھولا جائے گا۔ ان کا کہنا ہے کہ کمپیٹیشن کے ذریعے باہر سے سستا سے سستا ایندھن لانے کی کوشش کی جائے گی اور عوام کو اس ہی قیمت پر دستیابی کو یقینی بنایا جائے۔

    وزیرِ پیٹرولیم نے بتایا کہ اس کے علاوہ حکومت نے ایل پی جی کوٹے کا نظام بھی ختم کر دیا ہے۔

    ’مقامی کمپنیوں کو کہا جائے گا کہ وہ پانچ یا 10 ٹن کی لاٹ بنا کر اس کی نیلامی کریں اور نیلامی کے ان نتائج کو شائع کیا جائے گا۔‘

    ان کا کہنا ہے کہ پی ایس او، سوئی سدرن اور پاکستان ایل پی جی لمیٹد کو ایل پی جی کی ’بلک‘ مقدار میں درآمد کا حکم دیا ہے۔

11. 7 گھنٹے قبلٹرمپ کی ایران پر حملے کی تصدیق: ’ایران میں اینٹی ایئر کرافٹ سسٹم کو نشانہ بنایا گیا‘

    امریکی صدر ڈونلڈ ٹرمپ نے فاکس نیوز کو ٹیلی فونک انٹرویو میں تصدیق کی ہے کہ امریکہ نے ایران پر حملے کیے ہیں۔ اس سے قبل آبنائے ہرمز میں واقع جزیرے قشم کو نشانہ بنانے کی کارروائی کی اطلاعات سامنے آئی تھیں۔

    ٹرمپ نے کہا کہ ’ایران نے طیارہ شکن نظام کی ایک تنصیب بنائی تھی اور جیسے ہی یہ مکمل ہوئی، ہم نے گذشتہ رات اسے کامیابی سے نشانہ بنایا۔‘ انھوں نے اس کارروائی کو ’محدود حملہ‘ قرار دیا۔

    دوسری جانب ایرانی صدر مسعود پزشکیان نے کہا ہے کہ امریکہ اور اسلامی جمہوریہ ایران کے درمیان دوبارہ لڑائی کسی کے مفاد میں نہیں ہو گی۔ یہ بیان ایسے وقت میں سامنے آیا ہے جب مشرقِ وسطیٰ میں کشیدگی کے ایک نئے دور سے بچنے کے لیے سفارتی کوششیں جاری ہیں۔

    پزشکیان نے حکومتی اجلاس سے خطاب کرتے ہوئے کہا کہ ’اس جنگ سے کسی کو فائدہ نہیں ہو گا۔‘ انھوں نے کہا کہ تنازع کو ’مذاکرات کے ذریعے‘ حل کرنے کی کوششیں جاری ہیں۔

    ایرانی صدر نے مزید کہا کہ اسلامی جمہوریہ کے سپریم لیڈر مجتبیٰ خامنہ ای نے حکومت کو ان معاملات پر بات چیت کرنے کے اختیارات دیے ہیں جنھیں وہ پہلے ممنوع قرار دیتے تھے۔ تاہم انھوں نے ان معاملات کی مزید وضاحت نہیں کی۔

12. 7 گھنٹے قبلسندھ حکومت کا ایم کیو ایم کو 29 نومبر کو شاہراہِ فیصل پر جلسے کی اجازت دینے سے انکار, ریاض سہیل، بی بی سی اردو، کراچی

    حکومتِ سندھ نے متحدہ قومی موومنٹ پاکستان (ایم کیو ایم) کو 29 نومبر کو کراچی کی شاہراہِ فیصل پر جلسہ کرنے کی اجازت دینے سے انکار کر دیا ہے۔

    ایم کیو ایم پاکستان نے نئے صوبوں کے قیام کی حمایت میں 29 نومبر کو شہر کی مرکزی شاہراہ پر جلسہ کرنے کا اعلان کیا تھا۔

    صوبائی وزیرِ اطلاعات شرجیل انعام میمن نے کابینہ کے اجلاس کے بعد میڈیا سے گفتگو کرتے ہوئے کہا کہ کسی بھی سیاسی جماعت کو جلسے کے لیے باقاعدہ اجازت لینا ہوگی اور اپنی سرگرمیاں پُرامن اور قانونی طریقے سے انجام دینا ہوں گی۔

    انھوں نے ایم کیو ایم کو مخاطب کرتے ہوئے کہا کہ ’شاہراہِ فیصل پر جلسے کی اجازت ہرگز نہیں ہوگی اور ایم کیو ایم کو 12 مئی جیسے واقعات دہرانے کی اجازت نہیں دی جائے گی۔‘

    شرجیل میمن کا کہنا تھا کہ تمام سیاسی جماعتوں کو آئین اور قانون کے دائرے میں رہتے ہوئے سیاسی سرگرمیاں کرنے کی آزادی ہے، تاہم کوئی بھی فریق حکومت پر اپنا فیصلہ مسلط نہیں کر سکتا۔ ان کے بقول حکومت کسی صورت تصادم اور بدامنی کی فضا پیدا نہیں ہونے دے گی۔

    انھوں نے کہا کہ پاکستان پیپلز پارٹی اور سندھ حکومت صوبوں کے معاملے پر اپنا مؤقف واضح کر چکی ہیں۔ سندھ اسمبلی اس معاملے پر فیصلہ دے چکی ہے اور اس سے بالاتر کوئی قانون یا فیصلہ نہیں ہو سکتا۔

    شرجیل میمن نے ایم کیو ایم رہنماؤں مصطفیٰ کمال، فاروق ستار اور خالد مقبول صدیقی پر تنقید کرتے ہوئے کہا کہ ان کی عوامی حیثیت ایسی نہیں کہ وہ کونسلر بھی منتخب ہو سکیں۔ ان کا الزام تھا کہ یہ رہنما براہِ راست عوامی ووٹوں کے بجائے ’بیک ڈور اور چور دروازے‘ سے اسمبلیوں میں پہنچے ہیں۔

    واضح رہے کہ قوم پرست جماعت سندھ ترقی پسند پارٹی نے چند ہفتے قبل 29 نومبر کو کراچی میں ریلی نکالنے کا اعلان کیا تھا، جس کے بعد پیر کو ایم کیو ایم نے بھی اسی روز جلسے کا اعلان کیا۔

13. 7 گھنٹے قبلگذشتہ روز کی اہم خبریں

    • قطر کی جانب سے جاری بیان میں کہا گیا ہے کہ ’اسے اب بھی امید ہے کہ امریکہ اور ایران کسی معاہدے پر پہنچ جائیں گے اور دونوں ملک مذاکراتی عمل کے لیے پُر عزم ہیں۔‘ جبکہ امریکی صدر ٹرمپ نے بھی کہا کہ ایران سے معاہدہ ہو سکتا ہے۔
    • ایران کی پاسدارانِ انقلاب کی بحریہ نے دعویٰ کیا ہے کہ آبنائے ہرمز سے بغیر اجازت کے گزرنے کی کوشش کرنے والے تین آئل ٹینکرز بارودی سرنگوں سے ٹکرا گئے، جس کے نتیجے میں ان میں دھماکے ہوئے اور آگ لگ گئی۔
    • یوکرین کا کہنا ہے کہ روسی بمباری میں ایک امدادی سامان تقسیم کرنے والے مرکز کو نشانہ بنایا گیا جس کے نتیجے میں کم از کم 26 افراد ہلاک ہو گئے۔ یوکرین کے صدر ولودیمیر زیلینسکی نے اس حملے کو ’انتہائی ہولناک‘ قرار دیا ہے۔
    • سعودی عرب میں ہونے والے 2027 کے ایشین کپ فٹبال کو میزبان ملک پر ہونے والے متعدد ہلاکت خیز حملوں کے بعد ملتوی کر دیا گیا ہے۔
    • سعودی عرب کی سرکاری تیل کمپنی آرامکو کے منافع میں رواں سال کی تیسری سہ ماہی کے دوران نو فیصد اضافہ ہوا ہے۔ کمپنی کو اس اضافے میں عالمی منڈی میں تیل کی قیمتوں میں جنگ کے باعث ہونے والے اضافے سے فائدہ پہنچا، جبکہ آبنائے ہرمز میں کشیدگی کے باوجود اس راستے سے تیل کی برآمدات بھی مضبوط رہیں۔
    • اتحادی افواج نے دعویٰ کیا ہے کہ انھوں نے سعودی عرب کے علاقے مکہ مکرمہ میں ایک ڈرون کو روک کر تباہ کر دیا گیا ہے۔ اتحادی افواج کے ترجمان کرنل ترکی المالکی نے ایکس پر جاری بیان میں ڈرون کو روکنے اور تباہ کرنے کی تصدیق کی، تاہم انھوں نے ڈرون کی سمت، اسے بھیجنے والے یا اس کے ممکنہ ہدف کے بارے میں مزید تفصیلات نہیں بتائیں۔
    • اقوام متحدہ کی سلامتی کونسل نے طالبان کے محکمۂ انٹیلیجنس کے سربراہ ملا عبدالحق واثق کو طبی علاج کے لیے متحدہ عرب امارات جانے کی خصوصی اجازت دے دی ہے۔
    • نیپال میں ایورسٹ بیس کیمپ کے قریب دو ہیلی کاپٹروں کے درمیان تصادم کے نتیجے میں ایک انڈین شہری ہلاک جبکہ ایک اور شخص زخمی ہو گیا۔

14. 7 گھنٹے قبلبی بی سی کے لائیو پیج میں خوش آمدید!

    بی بی سی کے لائیو پیج میں خوش آمدید۔ پاکستان سمیت دنیا بھر کی اہم خبروں اور تجزیوں کے متعلق جاننے کے لیے بی بی سی کی لائیو پیج کوریج جاری ہے۔

    گذشتہ روز تک کی خبریں جاننے کے لیے یہاں کلک کریں۔