پیٹرول 9.41 روپے، ڈیزل 5.56 روپے فی لیٹر سستا

لائیو کوریج

1. 6 نومبر 2026یہ صفحہ اب مزید اپڈیٹ نہیں کیا جا رہا

   بی بی سی اردو کی لائیو کوریج جاری ہے تاہم اس صفحے کو اب مزید اپڈیٹ نہیں کیا جا رہا۔

   تازہ ترین خبروں کے لیے اس لنک پر کلک کریں۔

2. 6 نومبر 2026اہم علاقائی معاملات پر پوتن سے مشاورت کی گئی: محسن رضائی

   ایران کی سپریم نیشنل سکیورٹی کونسل کے سیکریٹری محسن رضائی نے کہا ہے کہ ماسکو کے اپنے حالیہ دورے کے دوران انھوں نے روسی صدر ولادیمیر پوتن کے ساتھ اہم علاقائی معاملات، جنگ کے بعد کی صورتحال اور خطے کے سکیورٹی انتظامات پر تبادلہ خیال کیا۔

   اس سے قبل ایرانی میڈیا نے رپورٹ کیا تھا کہ محسن رضائی نے ماسکو میں ولادیمیر پوتن سے ملاقات کے دوران ایران کے رہبر مجتبیٰ خامنہ ای کا پیغام بھی روسی صدر تک پہنچایا۔

   خبر رساں ادارے تسنیم کے مطابق محسن رضائی نے ملاقات کے بعد کہا کہ روسی صدر کے ساتھ اہم علاقائی امور، جنگ کے بعد پیدا ہونے والی صورتحال اور خطے کے سکیورٹی انتظامات پر گفتگو اور مشاورت کی گئی۔

   مجتبیٰ خامنہ ای کا پیغام پوتن تک پہنچانے کے بارے میں انھوں نے کہا کہ ایران کے رہبر چاہتے تھے کہ یہ پیغام جلد از جلد روسی صدر تک پہنچ جائے۔

   محسن رضائی نے یہ بھی بتایا کہ ملاقات میں روس سے ایران تک گیس پائپ لائنوں کی تعمیر پر بات چیت ہوئی تاکہ ایک طرف ایران اپنی گیس کی کمی پوری کر سکے اور دوسری جانب روسی گیس کو پڑوسی ممالک کو فروخت کیا جا سکے۔

   یہ ملاقات ایسے وقت میں ہوئی جب دونوں رہنماؤں نے پیر کے روز ٹیلیفون پر بھی علاقائی اور بین الاقوامی صورتحال پر تبادلہ خیال کیا تھا۔

3. 6 نومبر 2026پیٹرول 9.41 روپے اور ڈیزل 5.56 روپے فی لیٹر سستا کر دیا گیا

   اوگرا کے نوٹیفکیشن کے مطابق پیٹرول کی قیمت میں نو روپے 41 پیسے فی لیٹر کمی کی گئی ہے، جس کے بعد اس کی نئی قیمت 352 روپے 59 پیسے فی لیٹر ہو گئی ہے۔

   اسی طرح ہائی سپیڈ ڈیزل پانچ روپے 56 پیسے فی لیٹر سستا کیا گیا ہے، جس کے بعد اس کی قیمت 382 روپے 25 پیسے فی لیٹر مقرر کی گئی ہے۔

4. 6 نومبر 2026محسن رضائی نے پوتن سے ملاقات میں ایران کے رہبر کا پیغام پہنچایا: ایرانی میڈیا

   ایرانی میڈیا کے مطابق ایران کی سپریم نیشنل سکیورٹی کونسل کے سیکریٹری محسن رضائی نے ماسکو میں روسی صدر ولادیمیر پوتن سے ملاقات کی اور ایران کے رہبر مجتبیٰ خامنہ ای کا پیغام انھیں پہنچایا۔

   اس سے قبل کریملن کے ترجمان دیمیتری پیسکوف نے بھی تصدیق کی تھی کہ روسی صدر ولادیمیر پوتن نے کریملن میں ایران کی سپریم نیشنل سکیورٹی کونسل کے سیکریٹری سے ملاقات اور گفتگو کی ہے۔

   یہ ملاقات دونوں رہنماؤں کے درمیان چند روز قبل ہونے والی ٹیلیفونک گفتگو کے بعد ہوئی ہے۔

   ایران کی سپریم نیشنل سکیورٹی کونسل نے پیر کے روز بتایا تھا کہ محسن رضائی اور ولادیمیر پوتن نے ٹیلیفون پر علاقائی اور عالمی پیش رفت، بالخصوص مغربی ایشیا کی صورتحال پر تبادلہ خیال کیا تھا۔

5. 5 نومبر 2026پاکپتن میں بس اور ٹرک میں تصادم، 11 افراد ہلاک، 33 زخمی

   پاکپتن کے قریب دیپالپور روڈ پر ایک مسافر بس اور ٹرک کے درمیان تصادم کے نتیجے میں 11 افراد ہلاک جبکہ 33 زخمی ہو گئے ہیں۔

   ریسکیو 1122 کے مطابق حادثہ جمعرات کی شام پیش آیا اور اطلاع موصول ہونے کا وقت شام چھ بج کر 38 منٹ تھا۔ ابتدائی معلومات کے مطابق حادثے کی ممکنہ وجہ ایک موٹرسائیکل کو اوورٹیک کرتے ہوئے بس کی تیز رفتار تھی۔

   ریسکیو 1122 کے مطابق آٹھ افراد کو معمولی زخم آئے، جبکہ 25 زخمیوں کو ڈسٹرکٹ ہیڈکوارٹر (ڈی ایچ کیو) ہسپتال پاکپتن منتقل کیا گیا۔

6. 5 نومبر 2026اسحاق ڈار کا عباس عراقچی سے ٹیلی فون پر رابطہ، خطے میں ہونے والی حالیہ پیش رفت پر تبادلۂ خیال

   پاکستان کے نائب وزیرِ اعظم اور وزیر خارجہ سینیٹر اسحاق ڈار کی ایران کے وزیر خارجہ عباس عراقچی سے ٹیلی فون پر گفتگو ہوئی ہے۔

   پاکستانی وزارتِ خارجہ کی جانب سے جاری بیان میں کہا گیا ہے کہ دونوں وزرائے خارجہ نے خطے میں ہونے والی حالیہ پیش رفت پر تبادلۂ خیال کیا۔

   بیان کے مطابق، ایرانی وزیرِ خارجہ سے گفتگو کے دوران اسحاق ڈار نے مسائل کے حل کے لیے مسلسل مکالمے اور سفارت کاری کی اہمیت پر زور دیا اور تمام فریقوں کے تعمیری انداز میں رابطے جاری رکھنے کی ضرورت اجاگر کی۔

   وزارتِ خارجہ کی جانب سے جاری بیان کے مطابق اسحاق ڈار نے اس بات کا اعادہ کیا کہ خطے میں دیرپا امن، سلامتی اور استحکام کے حصول کے لیے فعال اور مسلسل سفارتی کوششیں ناگزیر ہیں۔

7. 5 نومبر 2026کیا محدود اختیارات والے صدر ٹرمپ ’مسٹر ویٹو‘ کا کردار ادا کریں گے؟, برنڈ ڈیبسمین جونیئر، نامہ نگار برائے وائٹ ہاؤس

   ڈونلڈ ٹرمپ اپنی دوسری صدارتی مدت کے اگلے دو برسوں میں ایک حد تک ’لیم ڈک‘ صدر ہوں گے، یعنی ان کے اختیارات سیاسی طور پر محدود ہو سکتے ہیں۔

   تاہم وہ کسی طور بے اختیار نہیں ہوں گے۔

   ان کے پاس ایک ایک اہم اختیار ویٹو پاور کی صورت میں موجود ہے، جس کے تحت وہ کانگریس کے منظور کردہ قانون کو مسترد کر سکتے ہیں۔ جب تک ریپبلکن ارکان ڈیموکریٹس کا ساتھ نہ دیں، ڈیموکریٹس کے پاس ان کے ویٹو کو ختم کرنے کے لیے درکار حمایت موجود نہیں ہوگی۔

   ٹرمپ پہلے ہی اشارہ دے چکے ہیں کہ وہ ’مسٹر ویٹو‘ کا کردار ادا کرنے کے لیے تیار ہیں۔

   ٹرمپ صدارتی احکامات، ہنگامی حالت کے اعلانات اور وفاقی اداروں کو ہدایات جاری کر کے بھی حکومت چلا سکتے ہیں۔ اس کے علاوہ خارجہ پالیسی کے شعبے میں بھی ان کے پاس وسیع اختیارات موجود ہیں۔ کانگریس ان اقدامات کے مقابلے کے لیے قانون سازی کر سکتی ہے، لیکن ایسی کسی بھی کوشش کو صدارتی ویٹو کا سامنا کرنا پڑ سکتا ہے۔

   صدر کے پاس مجرموں کو معافی دینے کا اختیار بھی ہے، جسے محدود نہیں کیا جا سکتا۔ اگر ٹرمپ اپنی مدتِ صدارت کے اختتام سے قبل اپنے اتحادیوں کو پیشگی معافیاں دیتے ہیں، جیسا کہ جو بائیڈن نے کیا تھا، تو یہ سیاسی طور پر ایک متنازع معاملہ بن سکتا ہے۔

   اس کے علاوہ ٹرمپ کے پاس ریپبلکن کنٹرول والی کانگریس کے تقریباً دو ماہ باقی ہیں، جس کے دوران وہ ججوں اور دیگر نامزد عہدیداروں کی منظوری سے متعلق اپنی جماعت کی ترجیحات کو آگے بڑھانے کی کوشش کر سکتے ہیں۔

8. 5 نومبر 2026ایران نے یمن میں پاسداران انقلاب کی موجودگی کی تردید کر دی: ان ’جعلی خبروں‘ کا مقصد حقائق پر پردہ ڈالنا ہے، اسماعیل بقائی

   یورپی یونین کی خارجہ پالیسی کی سربراہ کے بیانات کے جواب میں ایرانی وزارت خارجہ کے ترجمان نے سعودی عرب اور یمن کے حوثیوں کے درمیان جاری تنازع میں ایران کے ملوث ہونے کے الزام کو مسترد کر دیا ہے۔

   اسماعیل بقائی نے یورپی یونین پر یمنی عوام کے خلاف پابندیوں اور معاشی محاصرے میں ملوث ہونے کا الزام عائد کیا ہے۔ ان کا کہنا ہے کہ اسی وجہ سے یمن میں انسانی حقوق کی وسیع پیمانے پر خلاف ورزیوں پر یورپی یونین بھی ذمہ دار ہے۔

   یاد رہے کہ رواں ہفتے یورپی یونین کی خارجہ پالیسی کی سربراہ کایا کالاس نے سعودی عرب پر حوثی حملوں اور یمن میں ان کی فوجی کارروائیوں میں اضافے کی مذمت کی تھی، اور ایران سمیت تمام فریقوں سے حوثیوں کو فوجی معاونت فراہم کرنا بند کرنے کا مطالبہ کیا تھا۔

   اقوام متحدہ کی جانب سے تسلیم شدہ یمنی حکومت کی وزارت خارجہ نے منگل کو کہا تھا کہ 21 غیر ملکی فوجی ماہرین، جن میں پاسدارانِ انقلاب کے 14 ارکان اور لبنان کی حزب اللہ کے سات ارکان شامل ہیں، حوثیوں کے ساتھ مل کر کام کر رہے ہیں۔

   ایرانی وزارت خارجہ کے ترجمان نے ان دعوؤں کو ’جعلی خبر‘ قرار دیتے ہوئے کہا کہ ان کی اشاعت کا مقصد حقائق پر پردہ ڈالنا اور عوامی رائے کو گمراہ کرنا ہے۔

9. 5 نومبر 2026امریکی مڈٹرم انتخابات کے نتائج اور یوکرین سے امن معاہدے سے متعلق روسی میڈیا کی قیاس آرائیاں, سٹیو روزنبرگ، مدیر برائے روس

   روسی اخبار کومرسانت نے پیش گوئی کی ہے کہ جب تک صدر ڈونلڈ ٹرمپ کو کانگریس کی حمایت حاصل ہے، وہ ’آئندہ دو ماہ کے دوران یوکرین تنازع کے حل کے لیے سنجیدہ کوششیں کریں گے۔‘

   اخبار میں شائع ہونے والے ایک تجزیاتی مضمون میں روسی حکام پر زور دیا گیا کہ وہ ’اس موقع سے بھرپور فائدہ اٹھائیں۔‘

   تاہم کریملن نے اس بات کی تردید کی ہے کہ وہ اپنی حکمتِ عملی کا انحصار امریکہ کی اندرونی سیاسی صورتِ حال پر کر رہا ہے۔

   صدر ولادیمیر پوتن کے ترجمان دمیتری پیسکوف نے صحافیوں کے ساتھ اپنی روزانہ کی بریفنگ میں مجھ سے کہا: ’یوکرین کے حوالے سے روسی فیڈریشن کے مفادات کا تعین امریکہ کی صورتِ حال کے مطابق نہیں کیا جا سکتا۔

   ’ہمارے مفادات ہر صورت میں محفوظ رہیں گے۔ روس ایک مکمل خود مختار ریاست ہے۔‘

   کومرسانت کے مطابق جب کانگریس کا کنٹرول ڈیموکریٹس کے پاس چلا جائے گا تو ’ڈیموکریٹس اپنی یہ کوشش بڑھا دیں گے کہ ٹرمپ ماسکو سے مذاکرات نہ کر سکیں، وہ یوکرین کو براہِ راست امریکی فوجی امداد کی بحالی کا مطالبہ کریں گے، اور روس اور اس کے اہم تجارتی شراکت داروں کے خلاف نئی پابندیاں تجویز کریں گے۔‘

   آج ایک اور روسی اخبار، نیزاویسیمایا گزیٹا نے تجویز دی ہے کہ یوکرین سے متعلق کسی امن معاہدے کے لیے ’نومبر اور دسمبر بہترین وقت ہوں گے۔‘

10. 5 نومبر 2026’آپ یہ اپنے باس سے کیوں نہیں کہتے؟‘: امریکی الیکشن میں شکست کی وجہ جنگ کو قرار دینے پر قالیباف کا وینس سے سوال

    ایرانی پارلیمنٹ کے سپیکر محمد باقر قالیباف نے اپنے ایک بیان میں دعویٰ کیا ہے کہ ’امریکہ ’اسرائیل فرسٹ‘ پالیسی کے خاتمے کے دہانے پر موجود ہے۔‘

    باقر قالیباف نے یہ بیان امریکی نائب صدر جے ڈی وینس کے حالیہ بیان کے بعد ردِعمل میں دیا ہے جس میں جے ڈی وینس نے ریپبلکن پارٹی کی انتخابی شکست میں ایران کے ساتھ جنگ کو ایک اہم سبب قرار دیا تھا۔

    سماجی رابطے کی ویب سائٹ ایکس پر جے ڈی وینس کی پوسٹ کا حوالہ دیتے ہوئے قالیباف نے لکھا کہ ’آپ کا باس جنگ کے اگلے مرحلے کی تیاری کر رہا ہے، جبکہ امریکہ 'اسرائیل فرسٹ' پالیسی کے خاتمے کے دہانے پر کھڑا ہے۔‘

    قالیباف نے انھیں ایک ایسے ’ہارے ہوئے جواری‘ سے تشبیہ دی جو شکست کے باوجود کھیل کی میز چھوڑنے کو تیار نہیں۔

    انھوں نے ڈونلڈ ٹرمپ کا حوالہ دیتے ہوئے مزید کہا کہ ’تھیٹر کی تقریریں چھوڑیں۔ آپ یہ بات اپنے باس سے کیوں نہیں کہتے؟‘

    یاد رہے کہ جے ڈی وینس نے کہا تھا کہ ایران کے ساتھ جنگ امریکی وسط مدتی انتخابات میں ریپبلکنز کی شکست کے اہم عوامل میں سے ایک تھی۔

    جے ڈی وینس نے کیا کہا تھا

    امریکی نائب صدر جے ڈی وینس نے بدھ کے روز اپنی جماعت کی وسط مدتی انتخابات میں شکست کا ذمہ دار براہِ راست ایران کے ساتھ جنگ کو ٹھہرایا تھا۔

    سیاسی مبصرین نے اسے ممکنہ طور پر 2028 کے صدارتی انتخاب سے قبل خود کو صدر ڈونلڈ ٹرمپ سے الگ شناخت دینے کی کوشش قرار دیا ہے۔

    وینس نے ایکس پر 600 الفاظ پر مشتمل بیان میں لکھا کہ ’اگر آپ یہ مؤقف اختیار کرنا چاہتے ہیں کہ اس جنگ کی قیمت کے طور پر اگلے چھ برس کے لیے سینیٹ سے محرومی قابلِ قبول تھی تو ضرور کریں۔ کم از کم یہ ایک دیانت دار مؤقف ہوگا۔‘

    یہ غیر معمولی بیان تھا۔ حالیہ امریکی سیاسی تاریخ میں ایسی مثالیں کم ہی ملتی ہیں کہ کوئی موجودہ نائب صدر خارجہ پالیسی کے ایک اہم معاملے پر صدر سے اس قدر کھل کر اختلاف کرے۔

    مزید حیران کن بات یہ رہی کہ صدر ٹرمپ نے بھی اس رائے سے اتفاق کیا کہ وسط مدتی انتخابات کے نتائج پر جنگ نے ’بڑی حد تک‘ اثر ڈالا۔ تاہم انھوں نے یہ بھی کہا کہ اگر انھیں دوبارہ وہی فیصلہ کرنا پڑے تو وہ پھر یہی راستہ اختیار کریں گے۔

    یہ ردعمل اس بات کا ابتدائی اشارہ سمجھا جا رہا ہے کہ ٹرمپ، جو عموماً اپنے قریبی ساتھیوں سے مکمل وفاداری کی توقع رکھتے ہیں، وینس کو 2028 کی ممکنہ صدارتی مہم کے لیے نسبتاً زیادہ آزادی دے سکتے ہیں۔

11. 5 نومبر 2026امریکہ میں مڈ ٹرم الیکشن: کانگریس میں ڈیموکریٹس کی بڑی کامیابی کے بعد اب آگے کیا ہو گا؟

    امریکہ میں وسط مدتی انتخابات کے بیشتر مقابلوں کے نتائج سامنے آ چکے ہیں، تاہم ملک بھر میں کئی مقامات پر ووٹوں کی گنتی اب بھی جاری ہے۔

    سینیٹ میں الاسکا اور مسیسیپی کی نشستوں کے نتائج کا ابھی انتظار ہے۔ گورنر کے دو انتخابات، یعنی ریاستی گورنر کے عہدے کے لیے مقابلے، بھی اب تک جاری ہیں۔ یہ مقابلے کنساس اور الاسکا میں ہیں۔

    ایوانِ نمائندگان میں، جہاں تمام نشستوں پر انتخابات ہوئے، 48 حلقوں کے نتائج ابھی تک سامنے نہیں آئے ہیں۔

    جب تمام نتائج آ جائیں گے تو ہمیں کانگریس کے دونوں ایوانوں کی مکمل ساخت کی زیادہ واضح تصویر ملے گی، جن پر ڈیموکریٹس ڈونلڈ ٹرمپ کی صدارت کے آخری دو برسوں کے دوران کنٹرول رکھیں گے۔

    تاہم اب تک کے نتائج سے یہ تو واضح ہو گیا ہے کہ ڈیموکریٹک پارٹی نے کانگریس کا کنٹرول حاصل کر لیا ہے۔

    امریکی انتخابات کی اصطلاح میں اسے ’نیلی لہر‘ کہا جا رہا ہے کیوں کہ امریکہ میں ڈیموکریٹک پارٹی کی نمائندہ رنگت نیلی سمجھی جاتی ہے، اور جب وہ مختلف ریاستوں اور حلقوں میں توقع سے کہیں زیادہ کامیابیاں حاصل کرے تو اسے ’نیلی لہر‘ کہا جاتا ہے۔

    ڈیموکریٹس کانگریس کا کنٹرول کب سنبھالیں گے؟

    نو منتخب ڈیموکریٹس کا ایک نیا گروپ جنوری میں کانگریس میں داخل ہو گا، لیکن انھیں کچھ رکاوٹوں کا سامنا کرنا پڑ سکتا ہے۔

    اگرچہ ڈیموکریٹس کو سینیٹ اور ایوانِ نمائندگان دونوں میں کنٹرول حاصل ہو گا، تاہم ریپبلکن صدر ڈونلڈ ٹرمپ اب بھی قانون سازی کو مسترد کرنے کا اختیار رکھتے ہیں۔

    ٹرمپ کے لیے اس کے کیا معنی ہو سکتے ہیں؟

    نئی کامیابی پر خوش ڈیموکریٹس کو صدر ٹرمپ بار ہا یاد دلا چکے ہیں کہ ان کے پاس صدارتی ویٹو کا اختیار موجود ہے۔

    تاہم، ہمارے شمالی امریکہ کے نامہ نگار کے مطابق، صرف یہ حقیقت کہ بعض صدارتی اختیارات اب بھی ٹرمپ کے اختیار میں ہیں، اس بات کی ضمانت نہیں کہ ان کے پاس انھیں استعمال کرنے کی سیاسی خواہش بھی موجود ہو۔

12. 5 نومبر 2026سعودی فوجی اتحاد کا مدینہ کی جانب داغا گیا میزائل مار گرانے کا دعویٰ، حوثیوں کی مقدس مقامات کو نشانہ بنانے کی تردید

    سعودی عرب کی قیادت میں قائم فوجی اتحاد نے جمعرات کے روز دعویٰ کیا ہے کہ اس نے ایک بیلسٹک میزائل کو تباہ کر دیا ہے، جس کے بارے میں اس کا کہنا ہے کہ اسے حوثی گروہ انصار اللہ کی جانب سے مدینہ کے علاقے کی طرف داغا گیا تھا۔ تاہم حوثیوں نے اس الزام کی تردید کرتے ہوئے کہا ہے کہ ان کی کارروائیاں صرف سعودی تیل کی تنصیبات اور فوجی اڈوں تک محدود ہیں۔

    یہ پیش رفت ایک ایسے وقت میں سامنے آئی جب سعودی حکام نے ینبع اور شرورہ میں ممکنہ خطرے کے پیشِ نظر انتباہات جاری کیے تھے۔ تاہم بعد میں حکام نے اعلان کیا کہ خطرہ ٹل گیا ہے۔

    اتحادی فوج کے ترجمان ترکی المالکی نے ایکس پر جاری اپنے ایک بیان میں کہا ہے کہ ’فضائی دفاعی نظام نے مدینہ کے علاقے کی جانب داغے گئے ایک بیلسٹک میزائل کو روک کر تباہ کر دیا۔‘

    دوسری جانب حوثیوں کے فوجی ترجمان یحییٰ سریع نے مدینہ کو نشانہ بنانے کے سعودی الزامات کو مسترد کرتے ہوئے انھیں ’خطرناک من گھڑت دعویٰ‘ قرار دیا۔

    حوثیوں سے منسلک المسیرہ ٹی وی کے مطابق یحییٰ سریع کا کہنا ہے کہ حوثیوں کی کارروائیوں کا ہدف ’صرف تیل کی تنصیبات اور فوجی اڈے‘ ہیں اور گروہ اسلام کے مقدس مقامات کے احترام کا پابند ہے۔

    حوثیوں نے سعودی عرب پر الزام عائد کیا کہ وہ ایسے دعوے کر کے بین الاقوامی رائے عامہ کو اپنے حق میں ہموار کرنا اور یمن کے خلاف اپنی فوجی مہم کے لیے حمایت حاصل کرنا چاہتا ہے۔

13. 5 نومبر 2026عمان اور ایران کے وزرائے خارجہ کے درمیان رابطہ، آبنائے ہرمز میں جہاز رانی کی بحالی کے حوالے سے تبادلۂ خیال

    عمان کی سرکاری خبر رساں ایجنسی نے خبر دی ہے کہ ایران اور عمان کے وزرائے خارجہ نے آبنائے ہرمز میں جہاز رانی کی بحالی کے حوالے سے تبادلۂ خیال کیا ہے۔

    خبر رساں ایجنسی کے مطابق عباس عراقچی اور بدر البوسعیدی کے درمیان جمعرات کے روز ٹیلی فونک گفتگو ہوئی۔

    خبر کے مطابق گفتگو کے دوران فریقین نے اس بات پر زور دیا کہ کشیدگی میں کمی کے مرحلے سے آگے بڑھتے ہوئے پائیدار مفاہمتوں تک پہنچنا ضروری ہے، جن میں سمندری راستوں کے تحفظ اور بین الاقوامی تجارت و توانائی کی ترسیل کے تسلسل کو یقینی بنانے کے لیے مشترکہ تکنیکی نظام وضع کرنا شامل ہے۔

    دونوں رہنماؤں نے اس بات کو بھی ضروری قرار دیا کہ تمام ممالک کی خودمختاری کا احترام کیا جائے، تمام فریقوں کے جائز مفادات کو مدنظر رکھا جائے اور تنازعات کے حل کے لیے مذاکرات کی بحالی کی راہ ہموار کی جائے۔

    عمان نیوز ایجنسی کے مطابق یہ کوششیں جنگی کیفیت کے خاتمے اور مستقبل میں تنازعات کے دوبارہ جنم لینے سے روکنے کے لیے کی جا رہی ہیں، اور دونوں ممالک نے مشاورت کا سلسلہ جاری رکھنے پر اتفاق کیا ہے۔

14. 5 نومبر 2026فرانس میں ٹریڈ یونینز کی ہڑتال، ڈھائی لاکھ سے زیادہ افراد سڑکوں پر نکل آئے

    فرانس میں پانچ ٹریڈ یونینز کی جانب سے ملک گیر ہڑتال کے اعلان کے بعد احتجاجی مظاہرے ہو رہے ہیں۔ اس سے قبل فرانس میں ہائی سکول کے طلبہ اور بڑھتی ہوئی مہنگائی پر تنقید کرنے والے دیگر افراد بھی مظاہرے کر رہے ہیں۔

    جمعرات کو مقامی وقت کے مطابق دوپہر ایک بجے (پاکستانی وقت کے مطابق شام 5 bjy) تک تقریباً 70 شہروں اور قصبوں میں ڈھائی لاکھ سے زیادہ افراد سڑکوں پر نکل آئے تھے، اور سی جی ٹی یونین کی سوفی بینے کے مطابق یہ تو ’بس شروعات‘ ہے۔

    یونینں نے عہد کیا ہے کہ وہ ستمبر میں ہائی سکولوں کی حالتِ زار اور وسائل کی کمی کے خلاف شروع ہونے والے احتجاجی سلسلے کو ’اگلے مرحلے‘ تک لے جائیں گے۔ بعد ازاں اس تحریک میں کارکن اور بلند قیمتوں کے خلاف سرگرم نام نہاد ’ییلو ویسٹ‘ تحریک بھی شامل ہو گئی۔

    وزیر داخلہ لوراں نونیز نے کہا کہ 70 ہزار پولیس اہلکار تعینات کیے جا رہے ہیں اور خبردار کیا کہ تشدد کے کسی بھی ممکنہ واقعے پر ’انتہائی سخت ردعمل‘ دیا جائے گا۔

    جمعرات کی دوپہر کے اوائل میں لیوں میں کچھ بدامنی کی اطلاعات موصول ہوئیں، جہاں ایک گاڑی کو آگ لگا دی گئی۔ حکام کے مطابق یہ واقعات شدت پسند بائیں بازو سے وابستہ سیکڑوں افراد پر مشتمل ’بلیک بلاک‘ گروہ کے ارکان سے منسوب کیے جا رہے ہیں۔

15. 5 نومبر 2026کراچی میں این سی سی آئی کی سائبر کرائم میں ملوث ملزمان کے خلاف کاروائیاں، 100 سے زائد خواتین سمیت 275 افراد گرفتار, ریاض سہیل، بی بی سی اردو ڈاٹ کام، کراچی

    پاکستان کے نیشنل سائبر کرائم انویسٹی گیشن ایجنسی (این سی سی آئی اے) نے کراچی میں سائبر کرائم میں ملوث ملزمان کے خلاف کارروائیوں کے دوران 100 سے زائد خواتین سمیت 275 افراد کو گرفتار کرنے کا دعویٰ کیا ہے۔

    حکام کے مطابق گرفتار افراد کے خلاف قانون کے مطابق مقدمات درج کیے جا رہے ہیں۔

    این سی سی آئی کے ڈپٹی ڈائریکٹر شہزاد اکبر نے جمعرات کی شام ایک پریس کانفرنس کے دوران بتایا کہ کاوش کراؤن سینٹر اور شاہراہ فیصل پر قائم تین بڑی کمپنیوں کے خلاف کارروائیاں کی گئیں، جہاں مبینہ طور پر بے نظیر انکم سپورٹ پروگرام سمیت مختلف طریقوں سے شہریوں کا ڈیٹا جمع کیا جا رہا تھا۔ کارروائی کے دوران 300 سے زائد لیپ ٹاپ بھی قبضے میں لیے گئے ہیں۔

    این سی سی آئی حکام کے مطابق کراچی میں 300 سے زائد غیر قانونی کال سینٹرز کام کر رہے ہیں، جہاں روایتی جرائم اب سائبر کرائم کی شکل اختیار کر رہے ہیں۔

    حالیہ کارروائی میں ایک کال سینٹر پر چھاپہ مار کر وہاں موجود افراد کے خلاف ایف آئی آر درج کی گئی۔

    شہزاد اکبر نے بتایا کہ گرفتار افراد میں کم عمر لڑکے اور لڑکیاں بھی شامل ہیں۔ ان کا کہنا ہے کہ بعض بچوں کو یہ بھی معلوم نہیں تھا کہ وہ کس نوعیت کی سرگرمیوں کا حصہ بن رہے ہیں۔

    انھوں نے کہا کہ تمام کارروائیاں قانون کے مطابق کی گئی ہیں اور ایف آئی آر درج ہونے کے بعد پولیس کو ملزمان کو 24 گھنٹے تک تحویل میں رکھنے کا قانونی اختیار حاصل ہے۔ حکام کا کہنا تھا کہ ان کارروائیوں کا مقصد بچوں یا خواتین کو ہراساں کرنا نہیں بلکہ سائبر جرائم میں ملوث عناصر کے خلاف کارروائی کرنا ہے۔

16. 5 نومبر 2026روم آنے والی پروازوں کے خلاف جھوٹی بم دھمکی ای میل کے ذریعے بھیجی گئی تھی: اطالوی حکام

    روم کے ہوائی اڈوں کا انتظام چلانے والے ادارے ایروپورتی دی روما کے مطابق آج صبح روم آنے والی دو پروازوں کے خلاف موصول ہونے والی جھوٹی بم دھمکی ای میل کے ذریعے بھیجی گئی تھی، جس کی سبجیکٹ لائن ’تھریٹ نوٹیفکیشن‘ تھی۔

    یہ انتباہی پیغامات مبینہ طور پر ’فائٹرز آف دی مالی سٹیٹ‘ کی جانب سے دستخط شدہ تھے۔ اس گروہ نے دعویٰ کیا کہ وہ ایک ’فیمینسٹ حکومت‘ کو نشانہ بنا رہا ہے اور ’تاریخ میں اپنا نشان چھوڑنا‘ چاہتا ہے۔

    دھمکیوں میں کہا گیا تھا کہ وہ دھماکوں کے ذریعے ’آسمان کو سرخ کر دیں گے۔‘

    یہ تفصیلات پہلے اطالوی میڈیا نے رپورٹ کیں، جس کے بعد روم کے دونوں ہوائی اڈوں کا انتظام سنبھالنے والے ادارے ایروپورتی دی روما نے بی بی سی کو فون پر ان کی تصدیق کی۔

17. 5 نومبر 2026ہفتے میں دوسری مرتبہ یورپی مسافر طیاروں کو بم سے اڑانے کی دھمکیاں، متعدد پروازوں کا رخ متبادل اڈوں کی جانب موڑ دیا گیا

    یورپ بھر میں فضائی سفر اس وقت متاثر ہوا جب متعدد مسافر طیاروں کو بم سے اڑانے کی دھمکیاں موصول ہوئیں۔ رواں ہفتے کے دوران یہ دوسری مرتبہ ہے کہ مختلف ایئر لائنز کو بم کی دھمکیاں ملی ہیں۔

    کچھ طیاروں کو لڑاکا طیاروں کی نگرانی میں ان کی منزل تک پہنچایا گیا، جبکہ بعض پروازوں کا رخ متبادل ہوائی اڈوں یا فوجی اڈوں کی جانب موڑ دیا گیا۔

    تاہم اب تک کسی بھی طیارے سے دھماکہ خیز مواد ملنے کی اطلاع نہیں ملی۔

    جمہوریہ چیک کی پولیس کا کہنا ہے کہ پراگ آنے والی چار پروازوں کو بم کی دھمکیاں موصول ہوئی تھیں، تاہم تلاشی میں کسی بھی جہاز سے دھماکہ خیز مواد برآمد نہیں ہوا۔

    دھمکیوں سے متاثر ہونے والی دیگر پروازوں میں:

    • ایجین ایئر لائنز کی تھیسالونیکی سے میلان جانے والی پرواز جسے میلان میں اتارا گیا۔
    • ریان ایئر کی پورٹو سے میلان جانے والی پرواز جو میلان میں اتری۔
    • ایئر لنگس کی ڈبلن سے روم جانے والی پرواز، جسے فرانس کے ایوریو فضائی اڈے کی جانب موڑ دیا گیا۔
    • فن ایئر کی ہیلسنکی سے روم جانے والی پرواز، جو روم میں اتری۔
    • وِز ایئر کی میلان سے بخارسٹ جانے والی پرواز، جو بخارسٹ میں اتری۔
    • وِز ایئر کی میلان سے وارسا جانے والی پرواز، جسے ویانا کی جانب موڑ دیا گیا۔
    • لاٹ ایئر لائنز کی وارسا سے برسلز جانے والی پرواز، جو برسلز میں اتری۔
    • ریان ایئر کی کوپن ہیگن سے صوفیہ جانے والی پرواز، جو صوفیہ میں اتری۔
    • ریان ایئر کی میڈرڈ سے صوفیہ جانے والی پرواز، جو صوفیہ میں اتری۔
    • ریان ایئر کی لندن سے صوفیہ جانے والی پرواز، جسے بلغاریہ کے شہر پلوودیف کی جانب موڑ دیا گیا۔

    وِز ایئر نے کہا ہے کہ اس کی میلان سے وارسا جانے والی پرواز کو "طے شدہ حفاظتی ضوابط" کے تحت ویانا منتقل کیا گیا۔ کمپنی کے مطابق دیگر ایئر لائنز کو بھی اسی نوعیت کی دھمکیوں کا سامنا کرنا پڑا ہے۔

18. 5 نومبر 2026قطر کے شمال میں آئل ٹینکر سے دو نامعلوم پروجیکٹائل ٹکرانے کی اطلاع ہے: یو کے ایم ٹی او

    برطانیہ کے میری ٹائم ٹریڈ آپریشنز سینٹر (یو کے ایم ٹی او) کا کہنا ہے کہ اسے قطر کے شمال میں واقع سمندری حدود میں ایک آئل ٹینکر سے دو نامعلوم میزائل نما اشیا کے ٹکرانے کی اطلاع موصول ہوئی ہے۔

    یو کے ایم ٹی او کے مطابق یہ حملہ بدھ چار نومبر کو گرینچ معیاری وقت کے مطابق دوپہر 12:20 بجے (پاکستانی وقت کے مطابق 5 بج کر 50 منٹ پر) قطر کے شہر مدینۃ الشمال سے تقریباً 50 ناٹیکل میل شمال میں پیش آیا۔

    برطانوی ادارے کا کہنا ہے کہ ٹینکر کے عملے کی حالت، نقصان کی نوعیت اور حملے کے ممکنہ ماحولیاتی اثرات کے بارے میں تاحال معلومات دستیاب نہیں ہیں۔

    برطانیہ کے میری ٹائم ٹریڈ آپریشنز سینٹر نے علاقے سے گزرنے والے جہازوں کو احتیاط برتنے اور کسی بھی مشتبہ سرگرمی کی فوری اطلاع دینے کی ہدایت کی ہے۔ حکام واقعے کی تحقیقات کر رہے ہیں۔

19. 5 نومبر 2026ایران کے ٹینکروں کے خفیہ نیٹ ورک کی مبینہ معاونت کا الزام، انڈین جوڑے اور اُن کی کمپنیوں پر پابندیاں عائد

    امریکہ کے محکمہ خزانہ نے ایک انڈین جوڑے اور اُن کے زیر انتظام متعدد کمپنیوں پر ایران کے ٹینکروں کے خفیہ نیٹ ورک کی مبینہ معاونت اور پابندیوں سے بچنے میں سہولت فراہم کرنے کے الزام میں پابندیاں عائد کر دی ہیں۔

    بدھ کے روز امریکی محکمہ خزانہ کی جانب سے جاری بیان میں کہا گیا کہ انڈیا کے شہر چندی گڑھ کے رہائشی سنیل کمار شرما اور اُن کی اہلیہ جسپریت پریتی شاہد نے جعلی جہاز رجسٹریشن ادارے قائم کر کے اور بحری سرٹیفکیٹس جاری کر کے ایرانی تیل لے جانے والے ٹینکروں کی سرگرمیوں میں سہولت فراہم کی۔

    محکمہ خزانہ کے مطابق اس جوڑے نے ایران کے خفیہ بحری بیڑے کے جہازوں، جن میں ایرانی افواج اور اُن سے وابستہ گروہوں کی جانب سے چلائے جانے والے جہاز بھی شامل ہیں، کو گیانا، ایسواتینی اور لاؤس سمیت مختلف ممالک کے بحری اداروں کی نقالی کے ذریعے بین الاقوامی پابندیوں سے بچنے میں مدد فراہم کی۔

    بیان کے مطابق شرما نے 2023 میں سنگاپور میں ایک کمپنی قائم کی تھی جو ایسواتینی کے نام پر جہازوں کی رجسٹریشن کی خدمات فراہم کرتی تھی۔ ایسواتینی کے حکام کی جانب سے باضابطہ طور پر اس اعلان کے باوجود کہ اس کمپنی کا ملک سے کوئی تعلق نہیں، یہ کمپنی ایرانی تیل لے جانے والے ٹینکروں کو رجسٹریشن اور پرچم کی خدمات فراہم کرتی رہی۔

    امریکہ کے محکمہ خزانہ نے انڈیا میں قائم کئی کمپنیوں پر بھی پابندیاں عائد کی ہیں جن کے بارے میں محکمے کا کہنا ہے کہ وہ اس جوڑے کے کنٹرول میں ہیں۔

    ان پابندیوں کے بعد جاری ایک بیان میں امریکی وزیر خزانہ سکاٹ بیسنٹ کا کہنا تھا کہ ہم اُن تمام افراد پر پابندیاں عائد کریں گے جو ایرانی حکومت کی حمایت جاری رکھے ہوئے ہیں۔

20. 5 نومبر 2026وفاقی حکومت کے احکامات کے بعد خیبر پختونخوا میں بلدیاتی انتخابات کا انعقاد ممکن نہیں رہا: الیکشن کمیشن

    پاکستان کے الیکشن کمیشن کا کہنا ہے کہ وفاقی حکومت کے جاری کردی احکامات کے بعد صوبہ خیبر پختونخوا میں بلدیاتی انتخابات کا انعقاد ممکن نہیں رہا۔

    الیکشن کمیشن کی جانب سے جمعرات کے روز ایک اعلامیہ جاری کیا گیا جس میں کہا گیا ہے کہ ادارے نے خیبر پختونخوا میں، سوائے اُن اضلاع کے جہاں پر گورنر رول اور ایمرجنسی کے بعد آئین کے آرٹیکل A-140 کو معطل کردیا تھا، بلدیاتی الیکشن کروانے کا فیصلہ کیا تھا اور اس سلسلے میں متعدد اقدامات شروع کردیے گئے تھے۔

    اعلامیے میں کہا گیا ہے کہ جمعرات کے روز الیکشن کمیشن کا اجلاس منعقد ہوا جس میں وفاقی حکومت کی جانب سے گذشتہ روز جاری کردہ حکم نامے کی شق نمبر 2 کا تفصیلی جائزہ لیا گیا ’جس کے تحت آئینِ پاکستان کے آرٹیکل A-140 کو معطل کیا گیا ہے اور اس کا اطلاق پچھلے آرڈر کے تحت مخصوص اضلاع کے علاوہ دیگر تمام اضلاع پر بھی کردیا گیا ہے۔‘

    بیان میں کہا گیا ہے کہ بریفنگ کے دوران الیکشن کمیشن کو بتایا گیا کہ آئین کا آرٹیکل A-140صوبوں میں مقامی حکومتوں کے قیام سے متعلق ہے، جبکہ اس آرٹیکل کی ذیلی شق (2) کے تحت مقامی حکومتوں کے انتخابات کا انعقاد الیکشن کمیشن کی آئینی ذمہ داری ہے۔

    کمیشن کا کہنا ہے کہ اجلاس میں فیصلہ کیا گیا ہے کہ مذکورہ حکم نامے کے باعث صوبہ خیبر پختونخوا کے باقی اضلاع میں بھی بلدیاتی انتخابات کا انعقاد ممکن نہیں رہا۔

    بیان میں مزید گیا ہے کہ ان انتخابات کے انعقاد کے سلسلے میں اب تک کیے گئے تمام اقدامات کو بھی تاحکمِ ثانی روکنے کا فیصلہ کیا گیا ہے۔