ٹرمپ کی ایران پر حملے کی تصدیق: ’ایران میں اینٹی ایئر کرافٹ سسٹم کو نشانہ بنایا گیا‘

لائیو کوریج

1. 2 نومبر 2026سات ماہ بعد عمران خان سے ملاقات ہوئی، قانونی معاملات پر نئی ہدایات ملیں: وکیل سلمان صفدر کا دعویٰ

   پاکستان کے سابق وزیر اعظم عمران خان کے وکیل سلمان صفدر نے دعویٰ کیا ہے کہ اڈیالہ جیل انتظامیہ نے آج شام ساڑھے چار بجے ان کی عمران خان اور ان کی اہلیہ بشریٰ بی بی سے ملاقات کرائی ہے۔

   سلمان صفدر نے سماجی رابطے کی ویب سائٹ ایکس پر جاری بیان میں بتایا کہ متعدد درخواستوں اور مسلسل کوششوں کے بعد انھیں سات ماہ بعد عمران خان اور گیارہ ماہ بعد بشریٰ بی بی سے ملاقات کا موقع ملا۔

   انھوں نے کہا کہ ملاقات تقریباً 40 منٹ جاری رہی، تاہم یہ وقت زیرِ سماعت مقدمات اور دیگر قانونی امور پر تفصیلی مشاورت کے لیے ناکافی تھا۔

   سلمان صفدر کے مطابق ملاقات کے دوران عمران خان اور بشریٰ بی بی نے انھیں اپنی صحت اور جیل میں رہائش سے متعلق حالات کے بارے میں آگاہ کیا، جبکہ مختلف مقدمات اور قانونی معاملات کے حوالے سے نئی ہدایات بھی دیں۔

2. 2 نومبر 2026صورتحال کی حساسیت کے باعث ثالثوں کے ساتھ مشاورت میں تیزی آ گئی: عباس عراقچی

   ایران کے وزیر خارجہ عباس عراقچی کا کہنا ہے کہ آبنائے ہرمز سے متعلق صورتحال کی حساسیت اور خطے میں بڑھتی ہوئی کشیدگی کے باعث ثالث ممالک کے ساتھ مشاورت میں نمایاں تیزی آ گئی ہے۔

   ترکمانستان میں موجود عباس عراقچی نے ایرانی سرکاری خبر رساں ایجنسی ارنا کو بتایا کہ موجودہ حالات کی نزاکت اور بحران کی سنگینی کے پیش نظر سفارتی رابطوں اور مشاورت کا عمل پہلے سے زیادہ تیز ہو گیا ہے۔ ان کے بقول، قطر اور پاکستان ثالث کے طور پر انتہائی فعال کردار ادا کر رہے ہیں۔

   عباس عراقچی نے کہا کہ ایران اور قطر کے درمیان تین روزہ مذاکرات اتوار کو کسی واضح پیش رفت کے بغیر ختم ہوگئے، جس کے بعد ایرانی وفد پیر کے روز تہران واپس پہنچ گیا۔

   انھوں نے زور دے کر کہا کہ ایران اپنی شرائط اور تجاویز پہلے ہی سامنے رکھ چکا ہے اور اب معاملات کی پیش رفت کا انحصار ’واشنگٹن کی سیاسی دانشمندی‘ پر ہے۔

   ایرانی وزیر خارجہ کے مطابق، ایران کی شرائط تسلیم کیے جانے کی صورت میں ہی آبنائے ہرمز کو دوبارہ کھولا جا سکتا ہے اور مذاکراتی عمل بحال ہو سکتا ہے۔ انھوں نے خبردار کیا کہ اگر امریکہ نے ’دھوکا دہی یا فوجی کارروائی‘ کا راستہ اختیار کیا تو اسے ماضی کے مقابلے میں کہیں زیادہ سخت اور شدید ردعمل کا سامنا کرنا پڑے گا۔

   عباس عراقچی نے ایران کی سپریم نیشنل سیکیورٹی کونسل کے ڈپٹی سیکریٹری علی باقری کنی کے حالیہ دورۂ بیجنگ کا بھی ذکر کیا۔ ان کے مطابق، علی باقری کنی نے چینی حکام کے ساتھ اہم علاقائی اور سکیورٹی امور پر تبادلہ خیال کیا، جن میں خطے کی صورتحال، سلامتی کے مسائل اور امن و جنگ سے متعلق امور شامل تھے۔

3. 2 نومبر 2026رہبر اعلیٰ نے حکومت کو امن مذاکرات کے لیے اختیارات دے دیے، صدر مسعود پزشکیان کی تصدیق

   ایرانی صدر مسعود پزشکیان نے کہا ہے کہ رہبرِ اعلیٰ مجتبیٰ خامنہ ای نے حکومت کو جاری امن مذاکرات کے سلسلے میں بعض اختیارات تفویض کیے ہیں، جبکہ ایران اور امریکہ کے درمیان کشیدگی اور جنگ کے خاتمے کے لیے قطر کی ثالثی میں سفارتی کوششیں جاری ہیں۔

   ایرانی سرکاری خبر رساں ایجنسی کے مطابق، مسعود پزشکیان نے بڑے شہروں کے گورنرز اور میئرز کے اجتماع سے خطاب کرتے ہوئے کہا کہ حکومت موجودہ بحران کے حل کے لیے مذاکرات کا راستہ اختیار کر رہی ہے۔ ان کے بقول، ’ہم بات چیت کے ذریعے مسئلے کو حل کرنے کی کوشش کر رہے ہیں اور اس سلسلے میں رہبرِ انقلاب نے حکومت کو کچھ اختیارات بھی دیے ہیں۔‘ تاہم انھوں نے ان اختیارات کی نوعیت یا دائرۂ کار کے بارے میں مزید تفصیلات نہیں بتائیں۔

   ادھر خبر رساں ادارے روئٹرز کے مطابق ذرائع کا کہنا ہے کہ ایرانی مذاکرات کاروں نے گذشتہ چند روز کے دوران قطری ثالثوں کے ساتھ متعدد ملاقاتیں کی ہیں۔ ان مذاکرات کا مقصد امریکہ کے ساتھ جاری تنازع کے خاتمے اور خطے میں جاری جنگ کے لیے ممکنہ سیاسی حل تلاش کرنا ہے۔ اطلاعات کے مطابق ایک ابتدائی مسودۂ تجویز زیرِ غور ہے، جبکہ فریقین کے درمیان مزید ملاقات کا بھی امکان موجود ہے۔

   ان سفارتی پیش رفتوں کی خبروں کے بعد عالمی تیل منڈی میں نمایاں کمی دیکھی گئی۔ برینٹ خام تیل کی قیمت تقریباً چھے فیصد کمی کے بعد 106.65 ڈالر فی بیرل تک آ گئی، جبکہ امریکی ویسٹ ٹیکساس انٹرمیڈیٹ خام تیل 6.1 فیصد گر کر 97.75 ڈالر فی بیرل پر پہنچ گیا۔ تجزیہ کاروں کے مطابق مذاکرات میں ممکنہ پیش رفت کی امید نے مشرقِ وسطیٰ سے تیل کی سپلائی میں رکاوٹوں کے خدشات کم کیے، جس کے نتیجے میں قیمتوں پر دباؤ آیا۔

   اپنے خطاب میں صدر پزشکیان نے ملک کی معاشی اور سماجی صورتحال کا بھی ذکر کیا۔ انھوں نے کہا کہ بعض شہری اب بھی اپنی بنیادی ضروریات پوری کرنے سے قاصر ہیں، جبکہ سرحدی اور محروم علاقوں کے رہائشیوں نے ہمیشہ ملک اور نظام کا بھرپور دفاع کیا ہے۔ ان کا کہنا تھا کہ محروم طبقات حکومتی حمایت اور توجہ کو قدر کی نگاہ سے دیکھتے ہیں، تاہم کچھ حلقے ایسے ہیں جو ہر حال میں عدم اطمینان کا اظہار کرتے رہتے ہیں۔

4. 2 نومبر 2026الخلیل میں 10 روزہ اسرائیلی فوجی آپریشن ختم، ہزاروں بے گھر فلسطینیوں کی گھروں کو واپسی شروع

   اسرائیلی فوج نے پیر کے روز مقبوضہ مغربی کنارے کے جنوبی شہر الخلیل سے اپنی فوجیں واپس بلانے کا اعلان کیا ہے۔

   یہ انخلا 10 روزہ سکیورٹی اور فوجی آپریشن کے اختتام پر عمل میں آیا، جو دو فلسطینیوں کے حملے میں دو اسرائیلی فوجیوں کی ہلاکت کے بعد شروع کیا گیا تھا۔

   رپورٹس کے مطابق اسرائیلی فوجی آپریشن کے دوران تین ہزار سے زائد فلسطینیوں کو اپنے گھروں سے نقل مکانی کرنا پڑی۔ اس دوران اسرائیلی فورسز نے شہر الخلیل اور اس کے گردونواح کا محاصرہ کر رکھا تھا۔ اسرائیلی حکام کا کہنا تھا کہ کارروائی کا مقصد حملے میں ملوث مسلح افراد کی تلاش تھا۔

   فلسطینی خبر رساں ادارے وفا کے مطابق الخلیل کے گورنر خالد دودین نے بتایا کہ ’اسرائیلی فوج شہر سے نکل چکی ہے اور اس کے انخلا کے بعد فلسطینی سکیورٹی فورسز نے علاقے کی ذمہ داریاں سنبھال لی ہیں۔‘

   انھوں نے مزید کہا کہ ’متعلقہ حکام ان ضروری انتظامات میں مصروف ہیں جن کے ذریعے آپریشن کے دوران گھروں سے بے دخل ہونے والے خاندانوں کی واپسی کو ممکن بنایا جا سکے۔‘

   فلسطینی ذرائع ابلاغ نے مقامی حکام کے حوالے سے بتایا ہے کہ شہر کے محلے الجلدا، عین دیر باہا اور دیگر علاقوں میں خاندانوں نے اپنے گھروں کو واپس جانا شروع کر دیا ہے۔ یہ علاقے کئی روز تک سخت فوجی پابندیوں اور محاصرے کی زد میں رہے۔

   خبر رساں ادارے اے ایف پی کے مطابق ایک اسرائیلی فوجی عہدیدار نے بتایا کہ فوجیوں نے پیر کی صبح الخلیل میں فوجی کارروائی کے علاقے سے واپسی کا عمل شروع کیا، کیونکہ تمام زمینی سرگرمیاں مکمل ہو چکی تھیں۔

   عہدیدار کا مزید کہنا تھا کہ ’دہشت گردی کے خلاف کارروائیاں پورے مغربی کنارے میں جاری رہیں گی۔‘ اسرائیلی فوجی حکام مقبوضہ فلسطینی علاقوں کے لیے بائبل کی اصطلاح ’یہودیہ و سامریہ‘ بھی استعمال کرتے ہیں۔

5. 2 نومبر 2026آبنائے ہرمز میں گذشتہ نو روز کے دوران 11 آئل ٹینکرز میں آگ لگنے کے واقعات پیش آئے: پاسدارانِ انقلاب کا دعویٰ

   ایرانی پاسدارانِ انقلاب کی بحریہ نے دعویٰ کیا ہے کہ گذشتہ نو روز کے دوران آبنائے ہرمز میں 11 آئل ٹینکرز آگ کی لپیٹ میں آ چکے ہیں، جبکہ بعض سمندر میں ڈوب گئے ہیں۔

   پاسدارانِ انقلاب کی بحریہ نے ایکس پر جاری بیان میں کہا ہے کہ 25 اکتوبر سے، جس روز امریکی سینٹرل کمانڈ کے سربراہ بریڈ کوپر نے آبنائے ہرمز کا دورہ کیا تھا، آج تک نو روز کے دوران 11 خلاف ورزی کرنے والے آئل ٹینکرز کو آگ لگی، جن میں سے بعض ڈوب چُکے ہیں۔

   دوسری جانب ایرانی ذرائع ابلاغ نے اطلاع دی ہے کہ آج آبنائے ہرمز کے مشرقی حصے میں ایک آئل ٹینکر بارودی سرنگ سے ٹکرانے کے بعد آگ کی لپیٹ میں آ گیا۔

   واضح رہے کہ آبنائے ہرمز عالمی سطح پر تیل کی ترسیل کے لیے انتہائی اہم سمندری گزرگاہ ہے، جس پر کنٹرول کے حوالے سے ایران اور امریکہ دونوں اپنے اپنے دعوے کر رہے ہیں۔

6. 2 نومبر 2026ایران کے صوبے سیستان و بلوچستان میں انجینیئرز کی گاڑی پر حملہ، حملہ آور فرار

   ایران کے جنوب مشرقی صوبے سیستان و بلوچستان کے سرحدی علاقے میں ایک کمپنی کے لیے کام کرنے والے انجینیئرز کی گاڑی کو نشانہ بنایا گیا، جس کے بعد حملہ آور فرار ہونے میں کامیاب ہوگئے۔

   ایرانی خبر رساں ادارے تسنیم کے مطابق واقعہ سراوان کاؤنٹی کے سرحدی علاقے میں پیش آیا، جہاں ترقیاتی منصوبوں پر کام کرنے والے ٹھیکیدار کے انجینیئرز کی گاڑی پر مبینہ دہشت گرد عناصر نے حملہ کیا۔

   خبر رساں ادارے تسنیم کی رپورٹ میں شبہ ظاہر کیا گیا ہے کہ حملے میں کالعدم دہشت گرد تنظیم جیش العدل کے عناصر ملوث ہو سکتے ہیں، جو ماضی میں بھی خطے میں ترقیاتی منصوبوں اور ان سے وابستہ افراد کو نشانہ بناتے رہے ہیں۔

   دوسری جانب بی بی سی فارسی نے ایرانی سرکاری خبر رساں ادارے کے حوالے سے بتایا ہے کہ حملے کا نشانہ بننے والی گاڑی صوبے کے علاقے کلگان میں انجینیئرز کو لے جا رہی تھی، جو گلشن شہر کی حدود میں واقع ہے۔ رپورٹ کے مطابق حملہ آور کارروائی کے بعد موقع سے فرار ہوگئے۔

   تاحال اس حملے میں کسی کے بھی ہلاک یا زخمی ہونے کے حوالے سے کوئی تفصیلات سامنے نہیں آئی ہیں، جبکہ حملہ آوروں کی شناخت بھی ظاہر نہیں کی گئی۔

   یہ واقعہ ایسے وقت میں پیش آیا ہے جب صوبے کے مختلف علاقوں میں بنیادی ڈھانچے اور ترقیاتی منصوبوں پر کام جاری ہے۔ دوسری جانب حالیہ ہفتوں کے دوران سیستان و بلوچستان میں بدامنی اور مسلح جھڑپوں میں بھی اضافہ دیکھنے میں آیا ہے، جن میں سکیورٹی اہلکاروں اور مسلح گروہوں کے ارکان کی ہلاکتوں کی اطلاعات سامنے آ چکی ہیں۔

7. 2 نومبر 2026ہنگو میں گھر کے اندر فائرنگ سے دو خواتین، تین بچوں سمیت چھ افراد ہلاک

   پاکستان کے صوبہ خیبر پختونخوا کے ضلع ہنگو میں گھر کے اندر فائرنگ کے نتیجے میں دو خواتین، تین بچوں اور ایک مرد سمیت چھ افراد ہلاک ہو گئے ہیں۔

   ضلع پولیس افسر صلاح الدین کنڈی کے مطابق واقعہ تھانہ دوآبہ کی حدود میں واقع علاقے سروخیل میں پیش آیا۔

   پولیس کے مطابق واقعے کے بعد لاشوں کو دوآبہ ہسپتال منتقل کر دیا گیا ہے جبکہ پولیس کی بھاری نفری موقع پر پہنچ گئی ہے۔

   ڈی پی او صلاح الدین کنڈی کا کہنا ہے کہ واقعے کی وجوہات اور محرکات جاننے کے لیے تحقیقات جاری ہیں اور ملزمان کی گرفتاری کے لیے سرچ آپریشن بھی شروع کر دیا گیا ہے۔

8. 2 نومبر 2026ایران کے خلاف نئی فوجی کارروائی کے اشارے تشویش ناک ہیں: روس

   روسی وزارتِ خارجہ کی ترجمان نے کہا ہے کہ ’اس بات کے اشارے موجود ہیں کہ ایران کے خلاف نئی فوجی کارروائی کی منصوبہ بندی کی جا رہی ہے اور یہ انتہائی تشویش ناک ہے۔‘

   ماریا زاخارووا نے کہا کہ ’گذشتہ چند ماہ کے تلخ تجربات سے یہ ظاہر ہوا ہے کہ فوجی مہم جوئیاں، جن سے ایران میں ہلاکتیں اور تباہی پھیلتی ہیں، ایرانی عوام کے اپنے ملک کی خودمختاری اور آزادی کے دفاع کے عزم کو نہیں توڑ سکتیں۔ جو لوگ آج نئے حملوں کی دھمکیاں دے رہے ہیں، انھیں اس پر دوبارہ غور کرنا چاہیے۔‘

   روس متعدد بار ایران پر امریکہ اور اسرائیل کے حملوں کو بین الاقوامی قانون کی خلاف ورزی قرار دے چکا ہے۔

   حالیہ دنوں میں، جب ثالثوں نے ایران اور امریکہ کے درمیان کشیدگی کم کرنے کی کوششیں تیز کر دی ہیں، ڈونلڈ ٹرمپ کی دھمکیاں بھی جاری رہی ہیں۔ جبکہ تمام نظریں امریکہ کے وسط مدتی انتخابات پر لگی ہوئی ہیں جو کہ کل منعقد ہوں گے۔

9. 2 نومبر 2026ایران کو اپنے دفاع کے لیے چین کی حمایت حاصل ہے: چینی وزیر خارجہ

   چینی وزیر خارجہ نے کہا ہے کہ ایران کو اپنی خودمختاری اور سلامتی کے دفاع کے لیے چین کی حمایت حاصل ہے۔

   ایران کی سپریم نیشنل سکیورٹی کونسل کے نائب سیکریٹری علی باقریکنی کے ساتھ ملاقات میں وانگ یی نے کہا کہ ان کا ملک مشرقِ وسطیٰ کے تنازع میں شامل تمام فریقوں پر زور دیتا ہے کہ وہ سیاسی حل پر غور کریں۔

   چینی صدر شی جن پنگ نے بھی پیر کے روز عمان کے سلطان ہیثم بن طارق آل سعید کے ساتھ ملاقات کے دوران کہا تھا کہ مشرقِ وسطیٰ اور خلیج فارس کا خطہ ’بڑی طاقتوں کے درمیان مسابقت کا میدان‘ نہیں بننا چاہیے۔

   چین اور عمان کے درمیان ملاقات کے بعد جاری ہونے والے مشترکہ بیان میں مسقط نے مشرقِ وسطیٰ میں امن کے لیے چین کی تجاویز کی حمایت کی اور امید ظاہر کی کہ بیجنگ خطے میں دیرپا استحکام کے قیام میں ’زیادہ نمایاں کردار‘ ادا کرے گا۔

   چین تیل کا سب سے بڑا خریدار اور ایران کے اہم ترین اقتصادی شراکت داروں میں سے ایک ہے۔

   چین نے ایران پر امریکہ اور اسرائیل کے حملوں کے ساتھ ساتھ واشنگٹن کی پابندیوں کی بھی مذمت کی ہے۔ اس نے بارہا سفارت کاری کے ذریعے جنگ کے خاتمے بالخصوص آبنائے ہرمز کھولنے کا مطالبہ کیا ہے۔

10. 2 نومبر 2026امریکہ کے ساتھ معاہدے کی صورت میں آبنائے ہرمز کو دو روز میں بحال کیا جا سکا ہے: ایران

    ایران کا کہنا ہے کہ امریکہ کے ساتھ معاہدے کی صورت میں آبنائے ہرمز پر جہازوں کی آمد و رفت کو دو روز کے اندر بحال کیا جا سکتا ہے۔

    ایرانی وزارت خارجہ کے ترجمان اسماعیل بقائی نے اپنی پریس کانفرنس میں کہا کہ امریکہ کے ساتھ بات چیت کی بنیاد ایران کا سات نکاتی منصوبہ ہے جسے اب مختصر کر دیا گیا ہے اور یہ ’دو دن کے اندر عمل درآمد کے لیے تیار ہے۔‘

    تاہم انھوں نے کہا کہ ’جب تک امریکی بحری ناکہ بندی ختم نہیں کی جاتی اور ایران کے جائز مطالبات پر عمل درآمد نہیں ہوتا تب تک کوئی معاہدہ نہیں ہو گا اور نہ ہی آبنائے ہرمز کو دوبارہ کھولا یا محفوظ بنایا جائے گا۔‘

    ’واحد حقیقی اور قابلِ عمل تجویز تہران کا پیش کردہ منصوبہ ہے۔‘

    امریکی نائب صدر جے ڈی وینس کے خط کا حوالہ دیتے ہوئے بقائی نے کہا کہ یہ خط ’کوئی نئی تجویز پیش نہیں کرتا‘۔ ان کے مطابق ثالثوں کے ذریعے کسی بھی بالواسطہ رابطے کی بنیاد ایران کا وہی سات نکاتی منصوبہ ہے۔

    بقائی نے مزید کہا: ’چونکہ یہ خط سپریم نیشنل سکیورٹی کونسل کے معزز سیکریٹری (محسن رضائی) کے نام تھا، اس لیے اس کے جواب کے طریقہ کار اور نوعیت کا فیصلہ کرنا انھی کا اختیار ہو گا۔‘

    خیال رہے کہ وینس نے ایران کی سپریم نیشنل سکیورٹی کونسل کے سیکریٹری کو ایک خط بھیجا ہے جس میں امریکی حکام کے مطابق مذاکرات کی بحالی اور بعض ضروری اشیا، جن میں ادویات بھی شامل ہیں، ایران درآمد کرنے میں سہولت فراہم کرنے سے متعلق تجاویز شامل ہیں۔

11. 2 نومبر 2026افغان پناہ گزینوں کو پاکستان بھیجنے کے امریکی منصوبے پر طالبان حکومت کی تنقید, بی بی سی مانیٹرنگ

    طالبان نے ان رپورٹس پر تشویش کا اظہار کیا ہے جن کے مطابق امریکہ زیرِ حراست افغان پناہ گزینوں کو پاکستان بھیجنے کا منصوبہ بنا رہا ہے۔

    طالبان حکومت کی وزارتِ خارجہ کے شعبۂ تعلقاتِ عامہ و مواصلات کے سربراہ ضیا احمد تکل نے کہا کہ ’اسلامی امارتِ افغانستان ان خبروں پر گہری تشویش کا اظہار کرتی ہے کہ امریکہ ایسے افغان پناہ گزینوں کو، جنہیں ابھی تک قانونی رہائشی دستاویزات حاصل نہیں ہوئیں، پاکستان بھیجنے کا ارادہ رکھتا ہے۔‘

    انھوں نے امریکہ پر زور دیا کہ وہ اس معاملے میں ’ذمہ دارانہ اور متوازن رویہ‘ اختیار کرے۔

    انھوں نے کہا کہ افغان شہریوں کے مستقبل سے متعلق کوئی بھی فیصلہ یا اقدام دونوں ممالک کے درمیان واضح مفاہمت، ضروری رابطہ کاری اور متعلقہ افراد کے حقوق اور جائز مطالبات کو مدنظر رکھتے ہوئے کیا جانا چاہیے۔

    ضیا احمد تکل نے مزید کہا کہ ’کسی تیسرے ملک کے لیے یہ مناسب نہیں کہ وہ کسی دوسرے ملک کے شہریوں کے مستقبل کو سودے بازی کا موضوع بنائے، چاہے یہ محدود اور عارضی فوائد کے حصول کے لیے ہو یا کسی اور مقصد کے تحت۔ ایسے فیصلے انسانی وقار، حقوق اور تسلیم شدہ اخلاقی و انسانی اصولوں کے منافی ہو سکتے ہیں۔‘

    اس سے قبل متعدد بین الاقوامی ذرائع ابلاغ نے رپورٹ کیا تھا کہ ٹرمپ انتظامیہ کئی افغان پناہ گزینوں کو پاکستان کے راستے افغانستان واپس بھیجنے کی منصوبہ بندی کر رہی ہے۔

    واضح رہے کہ گذشتہ سال امریکی حکومت نے ہزاروں افغانوں کو عارضی طور پر ملک بدری سے تحفظ دینے والا پروگرام ختم کر دیا تھا، جس کا طالبان نے اُس وقت خیرمقدم کیا تھا۔

12. 2 نومبر 2026فلوریڈا میں نجی طیارہ گر کر تباہ، تمام 9 افراد ہلاک

    امریکا کی ریاست فلوریڈا میں ایک کاروباری جیٹ طیارہ رہائشی علاقے میں گر کر تباہ ہو گیا، جس کے نتیجے میں طیارے میں سوار تمام 9 افراد ہلاک ہو گئے۔

    یہ حادثہ کریسٹ ہیون کے قریب پیش آیا، جو ڈونلڈ ٹرمپ کے ریزورٹ مار-آ-لاگو سے تقریباً 14 کلومیٹر کے فاصلے پر واقع ہے۔ حادثہ مقامی وقت کے مطابق دوپہر 12:50 بجے پیش آیا۔

    جائے حادثہ کی تصاویر میں ایک مصروف سڑک کے درمیان ایک بڑا گڑھا دیکھا جا سکتا ہے، جبکہ لیئر جیٹ 60 طیارے کا ملبہ اور آگ سڑک پر پھیلی ہوئی دکھائی دیتی ہے۔ تاہم زمین پر موجود کسی شخص کے زخمی ہونے کی اطلاع نہیں ملی۔

    امریکی فیڈرل ایوی ایشن ایڈمنسٹریشن (FAA) کے مطابق طیارہ آسٹن، ٹیکساس سے روانہ ہوا تھا اور بہاماس جا رہا تھا۔

    ابتدائی فضائی تجزیے سے معلوم ہوا ہے کہ حادثے سے پہلے طیارہ بہت تیزی سے نیچے گر رہا تھا۔

    فضائی ٹریفک کنٹرول اور کاک پٹ کے درمیان ہونے والی گفتگو کی ریکارڈنگ کے مطابق عملے نے ’درمیانی درجے کی فضائی بے چینی‘ اور طیارے پر برف جمنے کی صورتحال کا ذکر کیا تھا۔

    بعد میں عملے کی جانب سے بتایا گیا کہ طیارہ بارش اور برفانی ذرات کے علاقے میں داخل ہو رہا ہے اور اسے مزید بلندی حاصل کرنے کی ضرورت ہے۔ کچھ لمحوں بعد عملے نے اطلاع دی کہ طیارہ فی منٹ 10 ہزار فٹ کی رفتار سے نیچے اتر رہا ہے۔

    اس کے بعد عملے نے ہنگامی صورتحال کا اعلان کرتے ہوئے کہا کہ طیارہ حد سے زیادہ رفتار کے ساتھ فی منٹ 20 ہزار فٹ کی رفتار سے نیچے جا رہا ہے، اور پھر کہا: ’ہم زمین سے ٹکرا جائیں گے۔‘

    سوشل میڈیا پر گردش کرنے والی غیر مصدقہ ویڈیو میں دکھایا گیا ہے کہ ایک طیارہ تقریباً عمودی زاویے سے زمین کی طرف گرتا ہے اور ٹکراتے ہی ایک بڑے دھماکے سے آگ کا گولا بن جاتا ہے۔

    فلوریڈا کے گورنر رون ڈی سینٹس نے کہا: ’یہ منظر انتہائی خوفناک تھا۔ ایسا لگ رہا تھا جیسے کوئی میزائل نیچے آ رہا ہو، پھر زبردست دھماکہ ہوا اور ملبہ ہر طرف بکھر گیا۔‘

    ابھی تک ہلاک ہونے والوں کی شناخت جاری نہیں کی گئی۔ حکام کے مطابق زمین پر موجود کسی شخص کے ہلاک یا زخمی ہونے کی اطلاع نہیں ہے۔

    امریکی وزیرِ ٹرانسپورٹ شان ڈفی نے اس حادثے کو ’انتہائی المناک سانحہ‘ قرار دیتے ہوئے کہا کہ تحقیقاتی ٹیم جائے حادثہ پر بھیجی جا رہی ہے تاکہ نیشنل ٹرانسپورٹیشن سیفٹی بورڈ کی تحقیقات میں مدد فراہم کی جا سکے۔

13. 2 نومبر 2026سعودی حملوں میں الحدیدہ کی تیل تنصیبات اور بندرگاہ کو نشانہ بنایا گیا: حوثیوں کا دعویٰ

    یمن میں حوثیوں نے پیر کو دعویٰ کیا ہے کہ سعودی عرب کی جانب سے بحیرۂ احمر کے ایک اہم بندرگاہی علاقے اور صوبہ الحدیدہ میں واقع ایک تیل تنصیب پر فضائی حملے کیے گئے، جن میں سات افراد زخمی ہوئے۔

    حوثیوں کی وزارتِ صحت کے ترجمان انیس الاصبحی نے سوشل میڈیا پلیٹ فارم ایکس پر ایک بیان میں کہا کہ سعودی قیادت والے اتحاد کے حملے میں راس عیسیٰ بندرگاہ پر چار شہری زخمی ہوئے، جبکہ باجل کے علاقے میں ایک تیل تنصیب پر حملے میں مزید تین افراد زخمی ہوئے۔

    انہوں نے کہا کہ "تیل کی تنصیبات اور اہم بندرگاہوں پر بار بار حملے بین الاقوامی انسانی قانون کی کھلی خلاف ورزی ہیں اور یمن میں جنگی جرائم کی فہرست میں اضافہ کرتے ہیں، جن میں شہریوں اور اہم بنیادی ڈھانچے کو نشانہ بنایا جاتا ہے۔"

    حوثیوں سے وابستہ ٹی وی چینل المسیرہ نے اس سے قبل خبر دی تھی کہ سعودی عرب نے راس عیسیٰ بندرگاہ پر ایک گھاٹ اور ایک تجارتی جہاز کو نشانہ بنایا ہے۔

    الحدیدہ حوثیوں کے زیرِ کنٹرول سب سے بڑی بندرگاہ ہے اور اس کے ذریعے خوراک اور انسانی امداد کا بڑا حصہ حوثیوں کے زیرِ انتظام علاقوں تک پہنچتا ہے۔

    راس عیسیٰ بندرگاہ، جو الحدیدہ شہر کے شمال میں واقع ہے، تیل کی درآمد اور ذخیرہ کرنے کے لیے بھی استعمال ہوتی ہے۔

    حوثی ذرائع ابلاغ نے یہ بھی اطلاع دی ہے کہ اتوار کو الحدیدہ صوبے میں واقع یونیورسٹی آف الحدیدہ کے میڈیکل کالج پر بھی حملے کیے گئے۔

    دوسری جانب سعودی عرب کی قیادت والے اتحاد نے کہا ہے کہ اس نے حوثیوں کے زیرِ استعمال "اہم وسائل کو ناکارہ بنانے کے لیے ایک درست اور ہدفی کارروائی" انجام دی ہے۔

    اقوامِ متحدہ کے مطابق یمن میں لڑائی دوبارہ شروع ہونے کے بعد اب تک 1,600 سے زیادہ افراد ہلاک اور 3 لاکھ سے زائد بے گھر ہو چکے ہیں۔

14. 2 نومبر 2026عالمی منڈیوں میں تیل کی قیمتوں میں نسبتاً کمی

    عالمی منڈیوں میں پیر کے روز کاروبار کے آغاز پر تیل کی قیمتوں میں نسبتاً کمی دیکھی گئی۔

    شمالی سمندر کے برینٹ خام تیل کی قیمت پیر کی صبح کی تجارت میں 110 ڈالر سے نیچے آ گئی اور تقریباً 109 ڈالر 70 سینٹ فی بیرل پر خرید و فروخت ہوئی۔

    یہ کمی ایسے وقت میں سامنے آئی جب قطر کی ثالثی میں ایران اور امریکہ کے درمیان رابطے اور مذاکراتی کوششیں جاری ہیں، اگرچہ اتوار کو قطر کی مائع گیس لے جانے والے ایک جہاز اور پیر کی صبح ایک اور آئل ٹینکر کو نشانہ بنائے جانے کے واقعات نے عالمی توانائی کی منڈی کو بدستور تشویش میں مبتلا رکھا ہے۔

    یہ صورتحال امریکہ میں کانگریس کے وسط مدتی انتخابات سے صرف ایک دن پہلے سامنے آئی ہے۔

15. 2 نومبر 2026جعلی ہنگامی پیغامات میں یوکرین کی جانب سے جوہری ہتھیاروں سے لیس ڈرون بھیجے جانے کی وارننگ شامل

    روس اور یوکرین کی ایمرجنسی الرٹ ایپس مبینہ طور پر ہیک ہو گئی ہیں۔

    روس کی ایمرجنسی ایپ پر ایک جعلی پیغام بھیجا گیا جس میں دعویٰ کیا گیا کہ یوکرین نے روس کے تمام علاقوں کی طرف جوہری ہتھیاروں سے لیس ڈرون بھیج دیے ہیں۔

    اس پیغام میں لوگوں کو کہا گیا کہ وہ تین ہفتوں کا کھانے پینے کا سامان جمع کریں اور محفوظ جگہوں پر چلے جائیں۔

    دوسری جانب یوکرین کی فضائی خطرے سے خبردار کرنے والی ایپ پر بھی جعلی پیغامات نظر آئے۔

    یوکرین کے حکام نے اس ہیکنگ کا الزام روس پر لگایا ہے اور شہریوں سے کہا ہے کہ ایپ میں آنے والے کسی بھی غیر معمولی یا مشکوک پیغام کو نظر انداز کریں۔

    چند گھنٹے بعد روس نے بھی اعلان کیا کہ اس کی ایمرجنسی الرٹ ایپ بڑے سائبر حملے کا نشانہ بنی ہے، تاہم اس نے کسی ذمہ دار فریق کا نام نہیں بتایا۔

    دونوں ممالک میں ان جعلی الرٹس نے لوگوں میں تشویش پیدا کر دی، لیکن حکام کا کہنا ہے کہ اصل ہنگامی انتباہی نظام بدستور کام کر رہا ہے۔

    ادارے نے ان جعلی الرٹس کی تصاویر بھی جاری کیں جو یوکرین کی فضائی خطرے سے آگاہ کرنے والی ایپ پر ظاہر ہوئی تھیں۔

16. 2 نومبر 2026پاکستانی سفیر پر مبینہ ’حملے‘ کی اطلاعات پر ایران میں پاکستانی سفارتخانے کی وضاحت

    ایران میں پاکستان کے سفارتخانے نے پاکستان کے ایران میں سفیر عمران احمد صدیقی پر مبینہ حملے کے بارے میں گردش کرنے والی بعض خبروں کا نوٹس لیا ہے۔

    سفارتخانے نے واضح طور پر کہا ہے کہ یہ رپورٹس بے بنیاد اور حقائق کے منافی ہیں۔

    تہران میں پاکستانی سفارتخانے نے پاکستان کے سفیر عمران احمد صدیقی سے متعلق گردش کرنے والی افواہوں کی تردید کرتے ہوئے ایک بیان کرتے ہوئے کہا کہ سوشل میڈیا اور دیگر حلقوں میں ایران میں پاکستان کے سفیر عمران احمد صدیقی سے متعلق بعض رپورٹس کا نوٹس لیا گیا ہے۔

    سفارتخانے نے زور دے کر کہا کہ شائع کی گئی یہ رپورٹس مکمل طور پر بے بنیاد ہیں اور ان میں کسی قسم کی سچائی یا اعتبار موجود نہیں ہے۔

    حالیہ دنوں میں سوشل میڈیا کے متعدد اکاؤنٹس پر ایک دھندلی ویڈیو شیئر کی جا رہی تھی، جس کے بارے میں دعویٰ کیا گیا کہ تہران میں پاکستان کے سفیر پر حملہ کیا گیا ہے۔ تاہم پاکستانی سفارتخانے نے ان دعوؤں کو مسترد کرتے ہوئے انھیں غلط اور حقائق کے منافی قرار دیا ہے۔

17. 2 نومبر 2026روس اور یوکرین دعویٰ کہ ان کے ایمرجنسی وارننگ سسٹمز پر سائبر حملے کیے گئے

    روس اور یوکرین دونوں نے کہا ہے کہ ان کے ہنگامی انتباہی نظاموں کو سائبر حملوں کا سامنا کرنا پڑا ہے۔

    ماسکو میں روسی وزارتِ ہنگامی حالات نے کہا کہ اس کے الرٹ ایپ پر ہونے والا ’بڑے پیمانے کا سائبر حملہ‘ حملہ آوروں کو جعلی اطلاعات بھیجنے کے قابل بنا سکتا تھا۔ تاہم وزارت نے واضح کیا کہ عوامی انتباہی نظام معمول کے مطابق کام کر رہا ہے۔

    یہ پیش رفت اس واقعے کے فوراً بعد سامنے آئی ہے جب یوکرین کی فضائی حملوں سے آگاہ کرنے والی ایپ نے ایک بظاہر ہیکنگ کے بعد غلط انتباہات جاری کر دیے تھے۔

    بی بی سی کے یوکرین رپورٹر عبدالجلیل عبدالرسولوف کے مطابق، یہ غلط انتباہات یوکرین کے محاذی علاقے خرسون میں مقامی جنگ بندی کے خاتمے سے صرف چند منٹ پہلے جاری کیے گئے تھے۔

    دونوں واقعات نے جنگ کے دوران سائبر سکیورٹی اور عوامی انتباہی نظاموں کی حفاظت کے بارے میں نئے خدشات کو جنم دیا ہے، کیونکہ ایسے حملے عوام میں خوف و ہراس پھیلانے اور ہنگامی حالات میں غلط معلومات پہنچانے کا باعث بن سکتے ہیں۔

    جنگ بندی ختم ہونے سے چند منٹ پہلے جھوٹے انتباہات جاری

    یوکرین کے شہر اولیشکی، جو 2022 سے روسی قبضے میں ہے، میں جنگ بندی کے خاتمے سے صرف چند منٹ قبل جعلی انتباہی پیغامات جاری کیے گئے۔ یہ انتباہات ایک مبینہ سائبر حملے کے بعد سامنے آئے تھے۔

    چھ روزہ جنگ بندی کے دوران سینکڑوں افراد کو اولیشکی سے محفوظ مقامات پر منتقل ہونے کا موقع ملا۔ یہ معاہدہ امریکی خاتونِ اول میلانیا ٹرمپ اور پوپ لیو چہاردہم کی مدد سے طے پایا تھا۔

    روس کے یوکرین پر مکمل حملے کے آغاز کے بعد یہ سب سے طویل جنگ بندی قرار دی جا رہی ہے۔

    تاہم امکان ہے کہ اولیشکی میں دوبارہ لڑائی شروع ہو جائے، کیونکہ دونوں فریق ایک دوسرے پر الزام لگا رہے ہیں کہ انھوں نے جنگ بندی کے دوران اپنی محاذی پوزیشنوں کو مضبوط بنانے کی کوشش کی۔

    اس کے باوجود اس انسانی ہمدردی کے مشن نے کچھ امید بھی پیدا کی ہے۔

    کیئو کے حکام کا کہنا ہے کہ یہ پیش رفت ’مستقل حل‘ کی جانب لے جا سکتی ہے اور ’امن عمل میں مزید اقدامات کی راہ ہموار کر سکتی ہے۔‘

    روس کی جانب سے اولیشکی آپریشن کی رابطہ کار یانا لانتراتوا نے کہا کہ دونوں ممالک ’باقاعدہ انسانی ہمدردی کے مشنز‘ جاری رکھنے پر متفق ہوئے ہیں۔

    تاہم روسی صدر ولادیمیر پوتن کے ترجمان کے مطابق کریملن ایسے انسانی مشنز کو امن مذاکرات سے الگ معاملہ سمجھتا ہے۔

18. 2 نومبر 2026خلیجی تعاون کونسل کی قطر کے گیس بردار جہاز پر حملے کی مذمت

    خلیجی تعاون کونسل (GCC) نے قطر کے مائع گیس بردار جہاز پر حملے کی شدید مذمت کرتے ہوئے اسے ’کشیدگی میں خطرناک اضافہ‘ قرار دیا ہے۔

    کونسل کے سیکریٹری جنرل جاسم محمد البدیوی نے ایک بیان میں کہا کہ ایسے حملے علاقائی استحکام اور عالمی توانائی کی منڈیوں کے لیے خطرہ ہیں۔

    قطر کی سرکاری خبر رساں ایجنسی کے مطابق جمعے کی شام گیس بردار جہاز المعیدہ خلیج فارس سے گزر رہا تھا جب اسے ایک ’نامعلوم شے‘ نے نشانہ بنایا۔

    البدیوی نے خبردار کیا کہ تیل اور گیس بردار جہازوں پر حملے عالمی توانائی کی فراہمی میں رکاوٹ، منڈیوں میں عدم استحکام اور سمندری ماحول کو نقصان پہنچا سکتے ہیں۔

19. 2 نومبر 2026آبنائے ہرمز میں دو آئل ٹینکر سمندری بارودی سرنگوں سے ٹکرا کر پھٹ گئے: پاسدارانِ انقلاب کا دعویٰ

    ایران کی پاسدارانِ انقلاب فورس کے شعبۂ تعلقات عامہ کا کہنا ہے کہ آبنائے ہرمز میں دو آئل ٹینکر مبینہ طور پر ’غیر مجاز راستے‘ سے گزر رہے تھے، جہاں وہ سمندری بارودی سرنگوں سے ٹکرا گئے اور دھماکوں کا شکار ہو گئے۔

    بیان کے مطابق ان میں سے ایک جہاز ایک ’بہت بڑا آئل ٹینکر‘ تھا، جو شدید دھماکے کے بعد آگ کی لپیٹ میں آ گیا اور جل رہا ہے۔

    سپاہ پاسداران نے اپنے سابقہ بیانات کی طرح ان جہازوں پر یہ الزام بھی عائد کیا ہے کہ انھوں نے اپنے نیویگیشن اور شناختی نظام بند کر رکھے تھے اور وہ ’خفیہ طور پر‘ آبنائے ہرمز سے گزرنے کی کوشش کر رہے تھے۔

    یہ دعویٰ ایسے وقت میں سامنے آیا ہے جب برطانیہ کی میری ٹائم ٹریڈ آپریشنز اتھارٹی نے چند گھنٹے قبل ایک جہاز کو ایک ’نامعلوم شے‘ کے نشانہ بننے کی اطلاع دی تھی۔

    عالمی بحری آمدورفت کی نگرانی کرنے والے ادارے وینگارڈ کے مطابق متاثرہ جہازوں میں سے ایک پاناما کے پرچم تلے سفر کر رہا تھا۔ دھماکے اور آگ لگنے کے بعد اس کا کچھ حصہ پانی میں ڈوب گیا ہے۔

    دوسری جانب، حالیہ ہفتوں میں امریکی سینٹرل کمانڈ نے اس دعوے کی تردید کی ہے کہ جہاز سمندری بارودی سرنگوں سے ٹکرا رہے ہیں۔ امریکی فوج کا موقف ہے کہ ایران ان جہازوں کو نشانہ بنانے کے لیے میزائلوں اور ڈرونز کا استعمال کر رہا ہے۔

20. 2 نومبر 2026گذشتہ روز کی اہم خبروں کا خلاصہ

    • برطانیہ میں فارمیسیز کی نمائندہ تنظیم نے خبردار کیا ہے کہ مشرق وسطیٰ میں جاری کشیدگی اور آبنائے ہرمز میں جہاز رانی سے متعلق غیر یقینی صورتحال کے باعث بعض اہم ادویات کی سپلائی متاثر ہو رہی ہے، جس سے ادویات کی قلت کا خطرہ بڑھ گیا ہے۔
    • پاکستانی حکام کا کہنا ہے کہ افغان سرحدی پوسٹوں سے پاکستانی سرحدی چوکیوں پر فائرنگ کا سلسلہ جاری رہا، جس کے جواب میں پاکستانی سکیورٹی فورسز نے جوابی کارروائی کرتے ہوئے متعدد افغان سرحدی پوسٹوں، مارٹر پوزیشنز اور دفاعی چوکیوں کو نشانہ بنایا۔
    • ایران کے وزیر خارجہ عباس عراقچی نے پارلیمان کی قومی سلامتی اور خارجہ پالیسی کمیٹی کو بریفنگ دیتے ہوئے کہا ہے کہ تہران مذاکرات اور سفارتی معاملات میں اپنی پہلے سے اعلان کردہ سات شرائط پر بدستور قائم ہے۔ واضح رہے کہ ایران کی امریکہ کے لیے سات شرائط میں پابندیوں کا خاتمہ، منجمد فنڈز کی رہائی اور خطے میں امریکی فوجی موجودگی میں کمی سمیت دیگر نکات شامل تھے۔
    • وفاقی حکومت نے پیٹرول کی قیمتوں کے تعین کا طریقہ کار تبدیل کرتے ہوئے آئل ریفائنریز کو ہدایت کی ہے کہ درآمدی قیمت اور ریفائنری کی سطح پر مقررہ قیمت کے درمیان فرق سرکاری خزانے میں جمع کرایا جائے، جبکہ اس سے حاصل ہونے والا مالی فائدہ پیٹرول کی قیمت میں کمی کی صورت میں عوام کو منتقل کیا جائے گا۔
    • امریکی وزیر خارجہ مارکو روبیو نے کہا ہے کہ امریکہ سعودی عرب کے ساتھ اپنے دفاعی معاہدوں اور سکیورٹی وعدوں کا پابند ہے اور آئندہ بھی ان پر عمل کرتا رہے گا، خاص طور پر دفاعی نوعیت کے وعدوں پر۔