لائیو , جنگ کی صورت میں یورپ تک موجود فوجی اڈے نشانہ بن سکتے ہیں: ایران کی امریکہ کو دھمکی

لائیو کوریج

1. 13 منٹ قبلجنگ کی صورت میں یورپ تک موجود امریکی فوجی اڈے نشانہ بن سکتے ہیں: ایران

   

   ،تصویر کا ذریعہGetty Images

   ایران کی سپریم نیشنل سکیورٹی کونسل کے سیکریٹری محسن رضائی نے خبردار کیا ہے کہ اگر امریکہ نے ایران کے خلاف ایک اور جنگ شروع کی تو مغربی ایشیا سے لے کر یورپ تک اس کارروائی میں شامل تمام فوجی اڈے ایرانی حملوں کے جائز اہداف ہوں گے۔

   بدھ کو عرب نشریاتی ادارے المدین کو دیے گئے انٹرویو کے مندرجات منظرِ عام پر آنے کے بعد محسن رضائی نے ایکس پر اپنے بیان میں کہا کہ امریکہ یا اس کے اتحادیوں کے لیے کوئی مقام محفوظ نہیں ہو گا۔

   المدین کے ساتھ گفتگو میں انھوں نے یہ بھی کہا کہ ایران اپنے یورینیم پروگرام کے حوالے سے ’ایک ذرہ بھی‘ پیچھے ہٹنے کو تیار نہیں اور اگر امریکہ کی جانب سے نئے حملے کیے گئے تو تہران اپنے فوجی ردعمل کا دائرہ مزید وسیع کر سکتا ہے۔

2. 23 منٹ قبلسپین میں عام ہڑتال: بارسلونا میں جھڑپیں، رہائش اور مہنگائی کے خلاف ہزاروں افراد سڑکوں پر نکل آئے, نک بیک، گائے ہیجکو اور البا مورگاڈے، میڈرڈ

   

   ،تصویر کا ذریعہReuters

   سپین میں 14 برس بعد ہونے والی پہلی ملک گیر عام ہڑتال کے دوران بارسلونا میں مظاہرین اور پولیس کے درمیان جھڑپیں ہوئیں، جبکہ ملک بھر میں لاکھوں کارکنوں سے وابستہ یونینوں کی اپیل پر ہزاروں افراد نے رہائش کے بڑھتے بحران اور مہنگائی کے خلاف احتجاج کیا۔

   دارالحکومت میڈرڈ میں تقریباً ایک لاکھ 20 ہزار افراد نے مظاہرے میں شرکت کی، جبکہ بارسلونا میں 50 ہزار سے زائد افراد سڑکوں پر نکل آئے۔ بعد ازاں بارسلونا کے مرکزی علاقوں میں نقاب پوش افراد اور پولیس کے درمیان تصادم ہوا، جس کے دوران کئی مقامات پر کچرے کے ڈبوں کو آگ لگا دی گئی اور بعض دکانوں کے شیشے توڑے گئے۔

   مقامی میڈیا کے مطابق کچھ مظاہرین نے پولیس پر آتش بازی کا سامان بھی پھینکا جبکہ چند دکانوں، جن میں ایک معروف کھلونوں کی دکان بھی شامل ہے، کو نقصان پہنچایا گیا۔ بعض افراد نے ایک بڑی ٹیکنالوجی کمپنی کے سٹور میں داخل ہونے کی بھی کوشش کی۔

   ’شروع میں ماحول پُرامن اور خوشگوار تھا‘

   بارسلونا میں احتجاج میں شریک ایک خاتون نے بی بی سی کو بتایا کہ دن کے وقت مظاہرہ زیادہ تر پُرامن اور خوشگوار تھا اور اس میں بڑی تعداد میں بچے اور بزرگ بھی شریک تھے۔

   ان کے مطابق شام کے وقت شہر کے مختلف حصوں میں آگ لگی ہوئی تھی۔ ان کا کہنا تھا کہ ’ہر طرف آگ دکھائی دے رہی تھی، صورت حال بہت شدید ہو گئی تھی۔‘

   ٹرانسپورٹ متاثر، گرفتاریاں بھی ہوئیں

   ہڑتال کے باعث سپین بھر میں ٹرانسپورٹ اور دیگر عوامی خدمات متاثر ہوئیں جبکہ کئی بڑی سڑکوں پر ٹریفک معطل رہی۔

   وزارتِ داخلہ کے مطابق مختلف واقعات کے سلسلے میں درجنوں افراد کو گرفتار کیا گیا ہے۔ بعض جائیداد کے کاروبار سے وابستہ دفاتر پر حملوں کی بھی اطلاعات سامنے آئی ہیں۔

   میڈرڈ میں مظاہرین میں سے ایک نے خبر رساں ادارے روئٹرز کو بتایا کہ ’ہم نے شہر کو تقریباً مفلوج کر دیا ہے۔ بارش کے باوجود لوگ بڑی تعداد میں سڑکوں پر موجود ہیں۔‘

   رہائش کا بحران احتجاج کا بنیادی سبب

   37 برس کی ٹیچر اولگا ڈومنگو نے کہا کہ وہ اس لیے احتجاج کر رہی ہیں کیونکہ رہائش کی صورت حال ناقابلِ برداشت ہو چکی ہے۔ ان کے بقول، ’زندگی گزارنے کے اخراجات اور تنخواہوں میں اتنا فرق ہے کہ موجودہ حالات میں گزارا ممکن نہیں رہا۔‘

   یہ ہڑتال سستے گھروں کی قلت اور بڑھتی مہنگائی کے خلاف جاری احتجاجی تحریک کے بعد سامنے آئی۔ اس تحریک کو اس وقت زیادہ توجہ ملی جب 87 سالہ ماری کارمین اباسکال کو میڈرڈ کے اُس فلیٹ سے بے دخل کر دیا گیا جہاں وہ سات دہائیوں سے رہ رہی تھیں۔ چند ہفتے بعد وہ ہسپتال میں فوت ہو گئیں۔

   جائیداد کے شعبے سے متعلق اعداد و شمار کے مطابق میڈرڈ میں 50 مربع میٹر کے ایک فلیٹ کا اوسط ماہانہ کرایہ تقریباً 1170 یورو تک پہنچ چکا ہے، جبکہ سپین میں اوسط ماہانہ تنخواہ تقریباً 2460 یورو ہے۔

   اس طرح ایک عام شہری اپنی آمدنی کا تقریباً نصف حصہ صرف رہائش پر خرچ کرنے پر مجبور ہے، جو ماہرین کے تجویز کردہ قابلِ برداشت تناسب سے کہیں زیادہ ہے۔

   

   ،تصویر کا ذریعہReuters

   انتخابات سے قبل سیاسی کشمکش

   سپین میں 29 نومبر کو پارلیمانی انتخابات منعقد ہونے والے ہیں۔ وزیراعظم پیڈرو سانچیز نے گزشتہ ماہ قبل از وقت انتخابات کا اعلان کیا تھا جب پارلیمان ان کے مجوزہ رہائشی اصلاحات کے منصوبے کی منظوری نہ دے سکی۔

   غیرمعمولی طور پر حکمران سوشلسٹ حکومت نے ہڑتال کی مخالفت کے بجائے اس کی حمایت کی ہے۔ وزیراعظم سانچیز نے کارکنوں کے حقِ ہڑتال کا دفاع کرتے ہوئے اسے مزدوروں کی تاریخی جدوجہد کا تسلسل قرار دیا۔

   دوسری جانب حزبِ اختلاف کی قدامت پسند جماعت پیپلز پارٹی نے حکومت پر الزام لگایا ہے کہ وہ انتخابات سے قبل سیاسی فائدے کے لیے ہڑتال کو استعمال کر رہی ہے۔

   ’گھر خریدنا ناممکن ہو گیا ہے‘

   27 سالہ گونزالو الواریز، جو کرایہ داروں کے حقوق کے لیے کام کرنے والی ایک تنظیم سے وابستہ ہیں، کہتے ہیں کہ ماری کارمین اباسکال کی بے دخلی نے عوامی غصے کو بھڑکا دیا۔

   وہ اپنی ساتھی کے ساتھ ایک چھوٹے سے اپارٹمنٹ میں رہتے ہیں اور دونوں مل کر ماہانہ ایک ہزار یورو کرایہ ادا کرتے ہیں۔

   ان کے مطابق: ’خوراک، بجلی، پانی اور گیس کے اخراجات کے بعد گھر خریدنے کے لیے رقم جمع کرنا تقریباً ناممکن ہو چکا ہے۔‘

   ہڑتال کتنی مؤثر رہی؟

   کاروباری حلقوں نے ہڑتال کو سیاسی قرار دیتے ہوئے تنقید کی ہے، تاہم بجلی کے استعمال کے ابتدائی اعداد و شمار سے معلوم ہوتا ہے کہ صنعتی سرگرمیوں میں نمایاں کمی آئی۔

   سپین کے قومی گرڈ آپریٹر کے مطابق بدھ کی صبح ملک میں بجلی کی طلب میں تقریباً 7.5 فیصد کمی دیکھی گئی، جو ہڑتال میں شرکت کے ایک اہم اشاریے کے طور پر دیکھی جا رہی ہے۔

   ماہرین کے مطابق اس ہڑتال کی عوامی حمایت اور احتجاجی سرگرمیوں کی شدت 29 نومبر کے انتخابات سے قبل حکمرانوں اور اپوزیشن، دونوں کے لیے ایک اہم سیاسی اشارہ تصور کی جائے گی۔

3. 5 گھنٹے قبلبریکنگ, حوثی جنگجوؤں کا سعودی عرب کے شہر ینبع میں تیل کی پمپنگ تنصیب پر ڈرون حملے کا دعویٰ

   یمن کے حوثی جنگجوؤں نے دعویٰ کیا ہے کہ انھوں نے بحیرۂ احمر کے ساحل پر واقع سعودی شہر ینبع میں تیل کی پمپنگ تنصیب کو ڈرون سے نشانہ بنایا ہے۔

   حوثی جنگجوؤں نے سعودی عرب کے دارالحکومت ریاض میں واقع کنگ خالد انٹرنیشنل ایئرپورٹ پر تین کروز میزائلوں سے حملے کا دعویٰ بھی کیا ہے۔

   حوثی ترجمان یحییٰ سریع نے سعودی قیادت میں قائم اتحاد کے اس دعوے کی بھی تردید کی کہ مکہ شہر کے اوپر ایک ڈرون کو روک کر تباہ کیا گیا تھا۔ انھوں نے کہا کہ حوثی جنگجوؤں کے حملوں کا ہدف سعودی عرب کی تیل کی تنصیبات اور فوجی اڈے ہیں۔

4. 5 گھنٹے قبلآبنائے ہرمز جنگ سے پہلے والی صورتِ حال میں واپس نہیں آئے گی: باقر قالیباف

   

   ،تصویر کا ذریعہIRNA

   ایرانی پارلیمان کے سپیکر باقر قالیباف کا کہنا ہے کہ ’آبنائے ہرمز جنگ سے پہلے والی صورتِ حال میں واپس نہیں آئے گی اور یہ ایران کی سات نکاتی شرائط کا حصہ ہے۔‘

   بی بی سی فارسی کے مطابق الجزیرہ کو انٹرویو دیتے ہوئے انھوں نے کہا کہ ’ایران نے آبنائے ہرمز میں بحری جہازوں کی آمدورفت کے راستے اور ان کی نقل و حرکت کو الگ رکھنے کے نظام سے متعلق عمان کے ساتھ معاہدہ کر لیا ہے۔‘

   قالیباف نے انٹرویو میں مزید کہا کہ ’ایران کی ترجیح امن ہے، بشرطیکہ اس کی شرائط تسلیم کی جائیں۔‘

5. 7 گھنٹے قبلہماری دفاعی صلاحیت پہلے سے زیادہ مضبوط ہے: ایرانی وزارتِ دفاع

   ایرانی وزارتِ دفاع کے ترجمان رضا طلائینیک کا کہنا ہے کہ ’ایران کی دفاعی صلاحیت پہلے کے مقابلے میں اب مزید مضبوط ہوئی ہے اور جنگ کا نتیجہ واضح ہے۔‘

   امریکی صدر اور وزیرِ دفاع کے نام ایکس پر ایک پیغام میں انھوں نے لکھا کہ ’ایران کو ہتھیاروں کی فراہمی، اس کی سٹریٹجک پیداوار اور جدید ٹیکنالوجی پر انحصار کرتی ہے اور یہ امریکی صدر ڈونلڈ ٹرمپ اور پیٹ کے ’گمراہ کن اعداد و شمار‘ سے کہیں آگے ہے۔‘

   رضا طلائینیک نے مزید کہا کہ امریکہ کو ایران کے جائز مطالبات تسلیم کرنے‘ کے لیے تیار رہنا چاہیے۔

   حالیہ دنوں میں امریکی صدر ڈونلڈ ٹرمپ نے کہا تھا کہ ایران کی فوجی صورتِ حال ’تقریباً تباہ‘ ہو چکی ہے۔ انھوں نے دعویٰ کیا تھا کہ میزائل اور ڈرون بنانے کی ایران کی صلاحیت میں 85 فیصد کمی آئی ہے۔

6. 8 گھنٹے قبلایران سے مبینہ دھمکیوں کے بعد امریکی وزیرِ خزانہ سکاٹ بیسنٹ فوجی اڈے پر منتقل

   

   ،تصویر کا ذریعہGetty Images

   امریکی میڈیا رپورٹس کے مطابق ایران سے منسلک مبینہ دھمکیوں کے بعد امریکی وزیرِ خزانہ سکاٹ بیسنٹ کو واشنگٹن ڈی سی میں واقع ان کے گھر سے ایک فوجی اڈے پر منتقل کر دیا گیا ہے۔

   بی بی سی کے امریکی شراکت دار ادارے سی بی ایس کے مطابق یہ اقدام اس وقت کیا گیا جب اخبار وال سٹریٹ جرنل نے سکاٹ بیسنٹ کے گھر کی ایک تصویر شائع کی۔

   سکاٹ بیسنٹ ایران پر اقتصادی پابندیاں عائد کرنے اور اس کی معیشت کو دباؤ میں لانے کے لیے وسیع تر اقدامات میں پیش پیش رہے ہیں۔

   بیسنٹ کو ملنے والی دھمکیوں کی نوعیت واضح نہیں ہے، تاہم امریکی انٹیلیجنس حکام خبردار کر چکے ہیں کہ ایران نے امریکی شہریوں، بشمول سرکاری عہدیداروں، کو نشانہ بنانے کی کوششیں ’نمایاں طور پر بڑھا دی ہیں‘۔

   سی بی ایس کو ایک ذریعے نے بتایا کہ وال سٹریٹ جرنل میں ایک مضمون شائع ہونے کے بعد سکیورٹی خدشات میں اضافہ ہوا۔ اس مضمون میں آن لائن دستیاب ایسی تصویر شامل تھی جس کی مدد سے وزیرِ خزانہ کے جارج ٹاؤن میں واقع گھر کا مقام معلوم کیا جا سکتا تھا۔

   جارج ٹاؤن واشنگٹن کا ایک خوشحال علاقہ ہے جہاں کئی سرکاری عہدیدار اور معروف شخصیات رہائش پذیر ہیں۔

   تفصیلات کے مطابق سکیورٹی خدشات کے باعث حکام نے بیسنٹ کو علاقے میں واقع ایک فوجی اڈے پر منتقل کرنے کا فیصلہ کیا۔

   امریکی محکمۂ خزانہ کے ترجمان نے ایک بیان میں صرف اتنا کہا کہ ’بیسنٹ دھمکیوں سے خوفزدہ نہیں ہوں گے اور ایران کی معیشت پر دباؤ ڈالنے کی امریکی کوششوں کے لیے پُرعزم رہیں گے۔‘

   بی بی سی نے اس معاملے پر وائٹ ہاؤس سے بھی تبصرے کے لیے رابطہ کیا ہے۔

   گذشتہ سال ستمبر میں امریکی ڈائریکٹر آف نیشنل انٹیلیجنس جے کلیٹن نے خبردار کیا تھا کہ ایران نے امریکی شہریوں کو نشانہ بنانے کی کوششیں ’نمایاں طور پر بڑھا دی ہیں‘۔

   رپورٹس کے مطابق ایران کے ممکنہ اہداف کی فہرست میں سابق امریکی وزیرِ خارجہ مائیک پومپیو، سابق قومی سلامتی کے مشیر جان بولٹن اور سابق چیئرمین جوائنٹ چیفس آف سٹاف مارک ملی بھی شامل ہیں۔

   صدر ڈونلڈ ٹرمپ کی گذشتہ سال اقتدار میں واپسی کے کچھ ہی عرصے بعد مارک ملی اور جان بولٹن کی سکیورٹی ٹیمیں واپس لے لی گئی تھیں۔

   سکاٹ بیسنٹ امریکی حکومت کے ان کئی عہدیداروں میں شامل ہیں جو فوجی اڈوں پر رہائش پذیر ہیں۔ وائٹ ہاؤس کے نئے چیف آف سٹاف سٹیفن ملر کو بھی سنہ 2025 کے اواخر میں ایک فوجی اڈے پر منتقل کیا گیا تھا، اس وقت ایران کے ساتھ تنازع شروع نہیں ہوا تھا۔

   امریکی وزیرِ دفاع پیٹ ہیگستھ اور وزیرِ خارجہ مارکو روبیو بھی فوجی اڈوں پر رہتے ہیں۔ ان سے پہلے سابق اٹارنی جنرل پام بونڈی اور سابق انٹیلیجنس سربراہ تلسی گیبارڈ بھی وہاں مقیم رہ چکی ہیں۔

   واضح رہے کہ امریکہ اور اسرائیل نے فروری میں ایران کے خلاف فضائی حملے شروع کیے تھے، جن میں ایران کے رہنما ہلاک ہوئے۔ اس کے جواب میں تہران نے خطے میں امریکی اتحادیوں کو نشانہ بنایا اور آبنائے ہرمز کو عملاً بند کر دیا، جہاں سے عام حالات میں دنیا کی تقریباً پانچواں حصہ تیل اور گیس گزرتی ہے۔

7. 11 نومبر 2026عمران خان اور بشری بی بی سے وکلا کی اڈیالہ جیل میں ملاقات: ’تین، چار گھنٹے کی ملاقات میں صحت اور مقدمات پر بات ہوئی‘

   

   ،تصویر کا ذریعہEPA

   پاکستان تحریک انصاف (پی ٹی آئی) کے بانی اور سابق وزیراعظم عمران خان سے ان کے وکلا بیرسٹر سلمان صفدر اور سردار لطیف کھوسہ نے اڈیالہ جیل میں ملاقات کی ہے۔

   ملاقات کے بعد میڈیا سے بات کرتے ہوئے عمران خان کے وکیل سردار لطیف کھوسہ نے کہا کہ ان کی عمران خان سے تین سے چار گھنٹے تک ملاقات ہوئی، جس میں ان کی صحت اور مقدمات سمیت مختلف معاملات پر بات چیت کی گئی۔

   واضح رہے کہ گذشتہ روز اسلام آباد ہائیکورٹ نے سابق وزیر اعظم عمران خان کے وکیل سلمان صفدر اور ان کی اہلیہ بشری بی بی کے وکیل سردار لطیف کھوسہ کو راولپنڈی کی اڈیالہ جیل میں اپنے موکلوں سے ملنے کی اجازت دے دی ہے۔

   لطیف کھوسہ کے مطابق عمران خان کا بلڈ پریشر ’خوف ناک حد تک فلکچوئیٹ کرتا‘ ہے، جبکہ ان کی آنکھ کا مسئلہ بھی زیرِ گفتگو آیا۔ تاہم ان کا کہنا تھا کہ ’عمران خان کا ارادہ مضبوط تھا اور وہ مستعد دکھائی دے رہے تھے۔‘

   اُن کا مزید کہنا تھا کہ عمران خان سے ملاقات دو گھنٹے سے زائد جاری رہی اور ملاقات میں بشریٰ بی بی بھی موجود تھیں۔

   ایک صحافی کے 28ویں آئینی ترمیم کے حوالے سے ایک سوال کے جواب میں لطیف کھوسہ نے کہا کہ ’ملاقات میں 28ویں آئینی ترمیم پر بھی گفتگو ہوئی، تاہم وہ اس بارے میں مزید بات نہیں کرنا چاہتے۔‘

   انھوں نے کہا کہ ملاقات کے دوران تمام معاملات پر سیر حاصل گفتگو ہوئی اور وہ اس کی تفصیلات تحریری طور پر سامنے لائیں گے۔ ان کے بقول ’کل ہم ملاقات کی تفصیل لکھیں گے اور یہ سب آپ کے سامنے آشکار ہو جائے گا۔‘

   واضح رہے کہ گذشتہ روز اسلام آباد ہائیکورٹ نے سابق وزیر اعظم عمران خان کے وکیل سلمان صفدر اور ان کی اہلیہ بشری بی بی کے وکیل سردار لطیف کھوسہ کو راولپنڈی کی اڈیالہ جیل میں اپنے موکلوں سے ملنے کی اجازت دی تھی۔

   عدالت نے جیل کے حکام کو ہدایت کی تھی کہ بدھ کے روز ان وکلا کی سابق وزیر اعظم اور ان کی اہلیہ بشری بی بی سے ایک گھنٹے تک ملاقات کروائی جائے۔

   اسلام آباد ہائیکورٹ کے چیف جسٹس سرفراز ڈوگر کی سربراہی میں دو رکنی بینچ نے منگل کے روز یہ حکم مجرمان کی طرف سے ایک سو نوے ملین پاؤنڈ کے مقدمے (القادر ٹرسٹ کیس) میں سزا کے خلاف اپیلوں کی سماعت کے دوران دی۔

8. 11 نومبر 2026کوہاٹ میں پولیس پر حملہ: ریسکیو 1122 کا کیا کہنا ہے؟

   

   ،تصویر کا ذریعہRescue 1122

   خیبر پختونخوا کے علاقے کوہاٹ میں پولیس پارٹی پر حملے کے بعد ہنگامی امداد کے ادارے ریسکیو 1122 نے واقعے میں 12 پولیس اہلکاروں کے زخمی ہونے کی تصدیق کی ہے۔

   ادارے کی جانب سے جاری ایک ویڈیو میں ریسکیو 1122 کوہاٹ کے ترجمان جواد آفریدی نے بتایا کہ پولیس پارٹی پر فائرنگ کے بعد اب تک تقریباً 12 پولیس اہلکاروں کو ہسپتال منتقل کیا جا چکا ہے۔

   ترجمان کا کہنا ہے کہ زخمی پولیس اہلکاروں نے انھیں بتایا ہے کہ جائے وقوعہ پر کچھ اہلکاروں کی لاشیں پڑی ہیں۔

   ان کا کہنا ہے کہ دشوار گزار علاقہ ہونے کی وجہ سے وہاں تک پہنچنے میں وقت لگ رہا ہے۔

   ان کا مزید کہنا تھا کہ جب انھیں ہلاکتوں کی تصدیق ہو جائے گی تو وہ تفصیلات جاری کر دیں گے۔

   حکام کی جانب سے تاحال سرکاری سطح پر ہلاکتوں کی تعداد نہیں بتائی گئی ہے۔ تاہم پولیس کی جانب سے جاری بیان میں حکام نے چند ہلاکتوں کا خدشہ بھی ظاہر کیا تھا جبکہ گورنر ہاؤس سے جاری بیان میں بھی پولیس اہلکاروں کی ہلاکت کا تذکرہ ہے۔

9. 11 نومبر 2026کوہاٹ میں پولیس پر حملہ: واقعہ کہاں پیش آیا؟

   پاکستان میں صوبہ خیبر پختونخوا کے حکام کا دعویٰ ہے کہ کوہاٹ شہر میں دربوکچ کے علاقے میں شدت پسندوں کی جانب سے پولیس پر کیے گئے ایک حملے میں کم از کم آٹھ اہلکار زخمی ہوئے ہیں۔ حکام نے چند ہلاکتوں کا خدشہ بھی ظاہر کیا ہے تاہم اس حوالے سے مزید کوئی تفصیل فراہم نہیں کی گئی ہے۔

   یہ واقعہ کوہاٹ شہر سے تقریباً 25 کلومیٹر کے فاصلے پر واقع کوہاٹ کی تحصیل گمبٹ کی حدود میں دربو کچ کے نزدیک پیش آیا ہے۔

   یہ علاقہ کوہاٹ اور راولپنڈی کو ملانے والی شاہراہ کے قریب واقع ہونے کی وجہ سے جغرافیائی اور تجارتی لحاظ سے اہمیت رکھتا ہے۔

   گمبٹ کے گردونواح میں متعدد دیہات اور آبادیاں موجود ہیں، جبکہ یہاں مقامی سطح پر بازار، تعلیمی ادارے اور دیگر بنیادی سہولیات بھی دستیاب ہیں۔

   دربو کچ بھی ان میں سے ایک دور افتادہ گاؤں ہے جو گمبٹ تحصیل سے کوئی چالیس کلومیٹر کے فاصلے پر واقع ہے۔ یہ پہاڑی علاقہ ہے اور وہاں جانے کے لیے سڑک بھی مناسب نہیں ہے جس وجہ سے کوہاٹ سے سے گاؤں تک جانے میں دو سے ڈھائی گھنٹے لگ جاتے ہیں۔

   مقامی لوگوں نے بتایا ہے کہ دربو کچ بنیادی طور پر خوشحال گڑھ اور شکردرہ کے درمیان واقع ہے یہ ایک لمبی پٹی ہے جو دریائے سندھ کے ساتھ ساتھ چلتی ہے۔

   اس علاقے میں دریا کے کنارے سونے کی تلاش کا کام کیا جاتا ہے اور علاقے میں ہمیشہ سے شورش زدہ رہا ہے۔ اس علاقے میں اس سے پہلے بھی مقامی گروہوں کے درمیان لڑائیاں اور پولیس کے چھاپے پڑ چکے ہیں۔

10. 11 نومبر 2026گورنر خیبر پختونخوا کا کوہاٹ میں پولیس پر حملے میں ہلاکتوں پر افسوس کا اظہار، حکام سے تفصیلی رپورٹ طلب

    پاکستان کے صوبہ خیبر پختونخوا گورنر فیصل کریم کنڈی نے کوہاٹ میں پولیس ٹیم پر فائرنگ کے نتیجے میں پولیس اہلکاروں کی ہلاکت پر دکھ کا اظہار کیا ہے۔

    گورنر کے دفتر سے جاری بیان کے مطابق گورنر فیصل کریم کنڈی نے کوہاٹ میں جرائم پیشہ عناصر اور شدت پسندوں کے غیر قانونی مائننگ کے خلاف آپریشن کے دوران پولیس گاڑی پر فائرنگ کے واقعے کی شدید مذمت کرتے ہوئے اس واقعے میں کچھ پولیس اہلکاروں کی ہلاکت کا حوالہ دیا ہے۔

    تاہم گورنر ہاؤس کی جانب سے جاری بیان میں ہلاکتوں کی تعداد نہیں بتائی گئی۔ اس سے قبل خیبر پختونخوا پولیس نے بھی اپنے بیان کچھ اہلکاروں کی ہلاکت کا خدشہ ظاہر کیا تھا۔

    گورنر فیصل کریم کنڈی نے ہلاک ہونے والے اہلکاروں کو خراج عقیدت پیش کرتے ہوئے پولیس حکام سے واقعے کی تفصیلی رپورٹ طلب کر لی ہے۔

    فیصل کریم کنڈی کا کہنا ہے کہ پولیس ٹیم پر فائرنگ میں ملوث عناصر کو کیفر کردار تک پہنچایا جائے۔

11. 11 نومبر 2026کوہاٹ میں پولیس پر حملے میں کم از کم آٹھ اہلکار زخمی، ہلاکتوں کا خدشہ

    

    ،تصویر کا ذریعہGetty Images

    پاکستان میں صوبہ خیبر پختونخوا کے حکام کا دعویٰ ہے کہ کوہاٹ شہر میں دربوکچ کے علاقے میں شدت پسندوں کی جانب سے پولیس پر کیے گئے ایک حملے میں کم از کم آٹھ اہلکار زخمی ہوئے ہیں۔ حکام نے چند ہلاکتوں کا خدشہ بھی ظاہر کیا ہے تاہم اس حوالے سے مزید کوئی تفصیل فراہم نہیں کی گئی ہے۔

    خیبر پختونخوا پولیس کی جانب سے جاری کردہ اعلامیے میں بتایا گیا ہے کہ یہ حملہ اُس وقت ہوا جب پولیس اس علاقے میں شدت پسندوں اور جرائم پیشہ عناصر کے گٹھ جوڑ سے جاری غیرقانونی گولڈ مائننگ کے خلاف آپریشن میں مصروف تھی۔

    اعلامیے کے مطابق اس واقعے میں اب تک آٹھ پولیس اہلکار زخمی ہوئے ہیں جبکہ چند ہلاکتوں کا بھی خدشہ ہے۔

    خیبرپختونخوا پولیس کا کہنا ہے کہ پولیس اور سکیورٹی فورسزکے تازہ دم دستے جائے وقوعہ پر پہنچ چکے ہیں جبکہ فائرنگ کا تبادلہ جاری ہے۔

    یاد رہے کہ یہ واقعہ کوہاٹ کی تحصیل گمبٹ کی حدود میں پیش آیا ہے جو جو کوہاٹ شہر سے تقریباً 25 کلومیٹر کے فاصلے پر واقع ہے۔

    یہ علاقہ کوہاٹ اور راولپنڈی کو ملانے والی شاہراہ کے قریب واقع ہونے کی وجہ سے جغرافیائی اور تجارتی لحاظ سے اہمیت رکھتا ہے۔

    گمبٹ کے گردونواح میں متعدد دیہات اور آبادیاں موجود ہیں، جبکہ یہاں مقامی سطح پر بازار، تعلیمی ادارے اور دیگر بنیادی سہولیات بھی دستیاب ہیں۔

    گمبٹ کی آبادی کا بڑا حصہ زراعت، مقامی کاروبار اور دیگر ذرائع معاش سے وابستہ ہے۔ یہ علاقہ جنوبی خیبر پختونخوا اور ضلع کوہاٹ کے دیہی علاقوں کے درمیان رابطے کے حوالے سے بھی اہمیت رکھتا ہے۔

12. 11 نومبر 2026ایران اپنی افزودہ یورینیم کا ایک بھی ذرہ بیرونِ ملک منتقل نہیں کرے گا: محسن رضائی

    

    ،تصویر کا ذریعہNurPhoto via Getty Images

    ایران کی سپریم نیشنل سکیورٹی کونسل کے سیکریٹری محسن رضائی نے کہا ہے کہ ایران اپنی افزودہ یورینیم کا ایک بھی ذرہ بیرونِ ملک منتقل نہیں کرے گا اور خود اسے استعمال کرے گا۔

    ایرانی خبر رساں ایجنسی تسنیم کے مطابق المدین ٹی وی کو دیے گئے ایک انٹرویو میں محسن رضائی کا کہنا تھا کہ ’افزودہ جوہری مواد کی معمولی ترین مقدار بھی ایران سے باہر نہیں لے جائی جائے گی۔‘

    محسن رضائی نے کہا کہ تہران نے اپنے روسی دوستوں کو بھی آگاہ کر دیا ہے کہ افزودہ مواد ایران ہی میں رہے گا اور ایران خود اسے استعمال کرے گا۔

    انھوں نے وضاحت کی کہ ایران کو جوہری توانائی سے چلنے والے جہازوں اور آبدوزوں کے لیے افزودہ جوہری مواد کی ضرورت ہے۔

    رضائی نے جنگ کے خاتمے اور امریکہ کے ساتھ مذاکرات کے حوالے سے ایران کے مؤقف کا بھی خاکہ پیش کیا۔ ان کا کہنا تھا کہ کسی بھی جنگ بندی کا اطلاق مغربی ایشیا کے تمام محاذوں پر ہونا چاہیے، خاص طور پر لبنان میں۔

    انھوں نے خبردار کیا کہ اگر امریکہ نے دوبارہ فوجی حملہ کیا تو اس کے جواب میں امریکی فوجی اڈوں کو نشانہ بنایا جائے گا، جن میں ایران سے دور واقع اڈے بھی شامل ہوں گے۔

    سپریم نیشنل سکیورٹی کونسل کے سیکریٹری کے یہ بیانات ایسے وقت میں سامنے آئے ہیں جب ایران جنگ کے خاتمے کے لیے کئی شرائط پیش کر چکا ہے، جن میں لبنان سمیت تمام محاذوں پر لڑائی کا خاتمہ، بحری ناکہ بندی کا خاتمہ، ایران کے منجمد اثاثوں بحال کرنے اور مستقبل میں دوبارہ فوجی جارحیت نہ کرنے کی ضمانتیں شامل ہیں۔

13. 11 نومبر 2026ڈیرہ اسماعیل خان: تبلیغی جماعت کے افراد کو لے جانے والی کوچ اور موٹر سائیکل کے درمیان حادثہ، تین افراد ہلاک

    پاکستان کے صوبہ خیبر پختونخوا کے علاقے ڈیرہ اسماعیل خان میں تبلیغی جماعت کے افراد کو لے جانے والی کوچ اور موٹر سائیکل کے درمیان حادثے کے نتیجے میں تین افراد ہلاک ہو گئے ہیں۔

    ریسکیو 1122 کی جانب سے جاری ایک بیان میں کہا گیا ہے کہ حادثے میں 13 افراد زخمی بھی ہوئے ہیں۔ متاثرہ افراد میں دو خواتین اور ایک بچہ بھی شامل ہیں۔

    ریسکیو حکام کا کہنا ہے کہ حادثے کی اطلاع ملتے ہی ریسکیو 1122 کی میڈیکل ٹیمیں فوری طور پر جائے وقوعہ پر پہنچ گئیں اور ابتدائی طبی امداد کے بعد تمام زخمیوں کو مفتی محمود ہسپتال منتقل کر دیا گیا۔

    حکام کے مطابق ہلاک ہونے والوں کی میتیں بھی ضروری کارروائی کے لیے ہسپتال منتقل کر دی گئیں۔

14. 11 نومبر 2026مسعود پزشکیان کا امریکہ پر دھمکیوں کے ذریعے سفارت کاری کو آگے بڑھانے کی کوشش کا الزام: ’عالمی امن کو خطرے میں کون ڈال رہا ہے؟‘

    

    ،تصویر کا ذریعہAFP via Getty Images

    ایران کے صدر مسعود پزشکیان کا کہنا ہے کہ امریکہ نے ایران کی جانب سے جوہری ہتھیار حاصل کرنے کے خدشات کو جواز بنا کر ایران کے خلاف جنگ چھیڑی، اور پھر پہلی بار مرتبہ لامرد میں جدید پی آر ایس ایم (پریسیشن سٹرائیک) میزائل استعمال کیا۔

    ہزشکیان نے اپنے ایکس اکاؤنٹ پر جاری ایک بیان میں کہا ہے کہ واشنگٹن اب دھمکیوں کے ذریعے سفارت کاری کو آگے بڑھانے کے لیے ’مدر آف آل بمبز‘ کا حوالہ دے رہا ہے۔

    ایرانی صدر نے امریکہ کے اس طرزِ عمل کو ’تضاد نہیں بلکہ شرمناک‘ قرار دیا۔

    پزشکیان نے سوال کیا، ’عالمی امن اور سلامتی کو خطرے میں کون ڈال رہا ہے؟‘

15. 11 نومبر 2026ایرانی صدر کوپ 31 میں شرکت کے لیے ترکی پہنچ گئے

    ایران کے صدر مسعود پزشکیان بدھ کے روز ترکی پہنچ گئے ہیں، جہاں وہ اقوام متحدہ کی موسمیاتی تبدیلی سے متعلق 31ویں کانفرنس کوپ 31 میں شرکت کریں گے۔

    ایرانی میڈیا کی رپورٹس کے مطابق، دو روزہ دورے کے دوران پزشکیان انطالیہ میں ہونے والے سربراہی اجلاس سے خطاب کرنے کے علاوہ ترک صدر رجب طیب اردوغان اور کانفرنس میں شریک دیگر ممالک کے متعدد رہنماؤں سے ملاقات اور بات چیت بھی کریں گے۔

    اس سال کا اجلاس ایران کے خلاف امریکہ اور اسرائیل کی جنگ، توانائی کی بڑھتی ہوئی قیمتوں اور فوسل فیول پر انحصار کم کرنے کے معاملے پر ممالک کے درمیان اختلافات کے سائے میں منعقد ہو رہا ہے۔

    امریکہ مسلسل دوسرے سال بھی ان موسمیاتی مذاکرات میں شریک نہیں ہے۔

16. 11 نومبر 2026آبنائے ہرمز میں تیل بردار جہاز بحری بارودی سرنگ سے ٹکرا گیا، ایرانی بحریہ کا دعویٰ

    

    ،تصویر کا ذریعہNurPhoto via Getty Images

    ایرانی بحریہ نے دعویٰ کیا ہے کہ بدھ کی صبح آبنائے ہرمز کے مشرق میں بحری بارودی سرنگ سے ٹکرانے کے بعد ایک تیل بردار جہاز میں آگ لگ گئی۔

    بحریہ کے شعبۂ تعلقات عامہ کی جانب سے جاری بیان میں اس آئل ٹینکر کو ’خلاف ورزی کرنے والا‘ قرار دیا گیا ہے اور دعویٰ کیا گیا ہے کہ جہاز ایک ’غیر محفوظ اور ممنوعہ‘ علاقے میں موجود تھا جہاں وہ بارودی سرنگ سے ٹکرایا۔

    ایرانی حکام نے اپنے بیان میں ایک بار پھر زور دیتے ہوئے کہا ہے کہ آبنائے ہرمز سے جہازوں کی محفوظ آمد و رفت کے لیے ایرانی مسلح افواج کے ساتھ رابطہ اور بحری قوانین کی پابندی ضروری ہے۔

    اس سے قبل برطانیہ کے میری ٹائم ٹریڈ آپریشنز سینٹر (یو کے ایم ٹی او) نے کہا تھا کہ اسے آبنائے ہرمز میں ایک آئل ٹینکر سے متعلق ’مشتبہ واقعے‘ کی اطلاع ملی ہے اور اس بارے میں تحقیقات جاری ہیں۔

    ابھی یہ واضح نہیں کہ برطانوی ادارے کی رپورٹ اور ایرانی فوج کے بیان میں ایک ہی ٹینکر کا ذکر ہے یا یہ دو الگ واقعات ہیں۔

    ایرانی فوج کے بیان میں ٹینکر کا نام، اس کا پرچم، عملے کی صورت حال یا نقصان کی نوعیت اور شدت کے بارے میں کوئی تفصیل نہیں دی گئی۔

17. 11 نومبر 2026ایران نے ارجنٹینا کی بحریہ اور فضائیہ کو ’دہشت گرد تنظیم‘ نامزد کر دیا

    

    ،تصویر کا ذریعہGetty Images

    ارجنٹینا کی جانب سے ایران کی پاسدارانِ انقلاب کو دہشت گرد تنظیم قرار دیے جانے کے فیصلے کے جواب میں ایرانی وزارت خارجہ نے ارجنٹینا کی بحریہ اور فضائیہ کو ’دہشت گرد تنظیمیں‘ نامزد کر دیا ہے۔

    ایرانی وزارت خارجہ کی جانب سے جاری ایک بیان میں کہا گیا ہے کہ یہ فیصلہ 2019 میں منظور کیے گئے ’باہمی کارروائی‘ کے قانون اور باہمی جواب دینے کے اصول کی بنیاد پر کیا گیا ہے۔

    بیان میں کہا گیا کہ تہران کے اس اقدام کے نتیجے میں پیدا ہونے والے تمام نتائج کی ذمہ داری ارجنٹینا کی حکومت پر عائد ہو گی۔

    ارجنٹینا کی حکومت نے رواں برس اپریل میں پاسدارانِ انقلاب کو دہشت گرد تنظیموں کی فہرست میں شامل کیا تھا۔

    ارجنٹینا 1994 میں بیونس آئرس میں یہودی کمیونٹی سینٹر ’امیا‘ پر ہونے والے بم حملے کا ذمہ دار ایران اور لبنان کی تنظیم حزب اللہ کو ٹھہراتا ہے۔ اس حملے میں 85 افراد ہلاک اور سیکڑوں زخمی ہوئے تھے۔

    ایران مسلسل اس بم حملے میں ملوث ہونے کی تردید کرتا آیا ہے۔

18. 11 نومبر 2026عراقچی کا اقوامِ متحدہ سے امریکہ کی انعامی پیشکش کی مذمت کا مطالبہ

    

    ،تصویر کا ذریعہAFP via Getty Images

    ایران کے وزیرِ خارجہ عباس عراقچی نے اقوامِ متحدہ کے سیکریٹری جنرل، سلامتی کونسل کے صدر اور بین الاقوامی جوہری توانائی ایجنسی (آئی اے ای اے) کے ڈائریکٹر جنرل کو خط لکھ کر امریکہ کی جانب سے ایران کے جوہری پروگرام سے متعلق معلومات کے عوض دو کروڑ ڈالر تک انعام دینے کی پیشکش کی مذمت کا مطالبہ کیا ہے۔

    10 نومبر کو لکھے گئے اس خط میں عراقچی نے امریکی محکمۂ خارجہ کے اقدام کو ’خطرناک‘ قرار دیتے ہوئے کہا ہے کہ اس پیشکش سے جاسوسی، تخریب کاری اور ایرانی جوہری تنصیبات سے وابستہ سائنس دانوں اور عملے کو نشانہ بنانے کے خطرات پیدا ہو سکتے ہیں۔

    انھوں نے خبردار کیا کہ ایسے اقدامات نہ صرف جوہری تنصیبات کی سلامتی بلکہ آئی اے ای اے کے حفاظتی نگرانی کے نظام (سیف گارڈز) کی ساکھ کو بھی متاثر کر سکتے ہیں، اور ایران کی جانب سے اپنی معمول کی حفاظتی ذمہ داریوں پر عمل درآمد میں رکاوٹ پیدا کر سکتے ہیں۔

    ایرانی وزیرِ خارجہ نے اقوامِ متحدہ کے سیکریٹری جنرل انتونیو گوتیرس اور سلامتی کونسل سے مطالبہ کیا ہے کہ وہ اس معاملے پر امریکہ کو جواب دہ ٹھہرائیں۔

    انھوں نے آئی اے ای اے کے ڈائریکٹر جنرل رافیل گروسی سے بھی درخواست کی ہے کہ وہ اس معاملے کو بورڈ آف گورنرز کے سامنے اٹھائیں اور حساس جوہری معلومات کے افشا کو روکنے کے لیے اقدامات کریں۔

    یاد رہے کہ امریکی محکمۂ خارجہ نے گذشتہ ہفتے اپنے ’ریوارڈز فار جسٹس‘ پروگرام کے تحت اعلان کیا تھا کہ ایران کے جوہری پروگرام سے منسلک افراد، تنصیبات اور آلات کے بارے میں معلومات فراہم کرنے والوں کو دو کروڑ ڈالر تک انعام دیا جا سکتا ہے۔

19. 11 نومبر 2026تحریک انصاف کا عمران خان کی صحت اور انھیں فراہم کی جانے والی طبی سہولیات پر اظہار تشویش

    

    ،تصویر کا ذریعہBloomberg via Getty Images

    عمران خان کو ہسپتال منتقل کر کے ان کی آنکھ میں انجیکشن لگائے جانے اور بعد ازاں اڈیالہ جیل راولپنڈی واپس منتقل کیے جانے پر ردِعمل دیتے ہوئے پاکستان تحریکِ انصاف (پی ٹی آئی) نے ان کی صحت اور انھیں فراہم کی جانے والی طبی سہولیات کے بارے میں تشویش کا اظہار کیا ہے۔

    پارٹی کے بیان میں کہا گیا ہے کہ ’کسی انسان کی صحت کو سیاسی سودے بازی کا ذریعہ نہیں بنایا جا سکتا اور نہ ہی کسی سابق وزیرِ اعظم کے طبی علاج کو محض ایک رسمی کارروائی تک محدود کیا جا سکتا ہے۔‘

    تحریکِ انصاف کے مطابق عمران خان کی سلامتی اور صحت کی مکمل ذمہ داری ریاست پر عائد ہوتی ہے۔

    پارٹی کے بیان میں مطالبہ کیا گیا ہے کہ عمران خان کے اہلِ خانہ، ذاتی معالجین اور قانونی ٹیم کو ان تک ’فوری اور بلا رکاوٹ‘ رسائی دی جائے۔

    بیان میں کہا گیا کہ ان کی صحت کے بارے میں شفاف معلومات کی فراہمی اور معیاری طبی سہولیات تک مسلسل رسائی نا گزیر ہے۔

    پارٹی نے مزید کہا کہ عوام خاموشی نہیں بلکہ جواب کے حق دار ہیں اور عمران خان کی صحت اور سلامتی کو کسی بھی صورت میں خطرے میں نہیں ڈالا جانا چاہیے۔

    واضح رہے کہ اڈیالہ جیل راولپنڈی میں قید سابق وزیرِ اعظم عمران خان کو منگل اور بدھ کی درمیانی شب اسلام آباد کے پاکستان انسٹیٹیوٹ آف میڈیکل سائنسز (پمز) ہسپتال منتقل کیا گیا تھا۔

    پمز انتظامیہ کے اعلامیے مطابق ماہرینِ امراضِ چشم کی ٹیم نے عمران خان کی آنکھ میں انٹرا وٹریئل اینٹی وی ای جی ایف انجیکشن لگایا اور ہسپتال سے ڈسچارج کر دیا گیا۔

20. 11 نومبر 2026عمران خان کا طبی معائنہ، آنکھ میں اینٹی وی ای جی ایف انجیکشن لگانے کے بعد ڈسچارج کر دیا گیا: پمز انتظامیہ

    

    ،تصویر کا ذریعہAFP via Getty Images

    اسلام آباد کے پاکستان انسٹیٹیوٹ آف میڈیکل سائنسز (پمز) کی انتظامیہ نے کہا ہے کہ سابق وزیرِ اعظم عمران خان کو 10 اور 11 نومبر 2026 کی درمیانی شب راولپنڈی کی اڈیالہ جیل سے طبی معائنے اور آنکھ کے علاج کے فالو اپ کے لیے پمز منتقل کیا گیا۔

    پمز کے جاری کردہ اعلامیے کے مطابق آنکھوں کے معالج کی ہدایت پر عمران خان کا طبی معائنہ کیا گیا جس میں آنکھوں کا جائزہ بھی شامل تھا۔

    پمز کے اعلامیے میں تحریر ہے کہ معائنے کے دوران عمران خان کی اہم جسمانی علامات معمول کے مطابق پائی گئیں، ان کی حالت بھی مستحکم تھی اور عمومی جسمانی معائنہ بھی معمول کے مطابق تھا۔

    اعلامیے کے مطابق مریض کی رضا مندی حاصل کرنے اور معیاری طبی نگرانی، احتیاطی تدابیر اور طبی پروٹوکول اختیار کرنے کے بعد ماہرینِ امراضِ چشم کی ٹیم نے ان کی آنکھ میں انٹرا وٹریئل اینٹی وی ای جی ایف انجیکشن لگایا۔

    واضح رہے کہ اینٹی وی ای جی ایف انجیکشن عموماً ریٹینا اور بینائی سے متعلق بعض بیماریوں کے علاج کے لیے استعمال کیا جاتا ہے، تاہم پمز کے اعلامیے میں عمران خان کی تشخیص کی تفصیل بیان نہیں کی گئی۔

    پمز انتظامیہ کا کہنا ہے کہ ہسپتال میں قیام کے دوران عمران خان کی طبی حالت طریقۂ علاج سے قبل، دورانِ علاج اور بعد میں مستحکم رہی۔

    اعلامیے کے مطابق انھیں تقریباً رات ڈھائی بجے عمران خان کو ہسپتال سے ڈسچارج کر دیا گیا اور آئندہ نگہداشت اور فالو اپ علاج سے متعلق ضروری ہدایات بھی فراہم کی گئیں۔