یمن میں حکومتی افواج اور حوثیوں کے درمیان جھڑپوں میں 140 سے زائد ہلاکتیں

لائیو کوریج

1. 6 ستمبر 2026ایرانی عدلیہ کے سربراہ کا برکس ممالک سے ایران پر حملوں کی مذمت اور جنگی جرائم کے ذمہ داروں کے خلاف کارروائی کا مطالبہ

   

   ،تصویر کا ذریعہTasnim

   ایران کے چیف جسٹس غلام حسین محسنی نے برکس ممالک پر زور دیا اور کہا ہے کہ وہ ایران کی خودمختاری اور علاقائی سالمیت کی خلاف ورزیوں کی مذمت کریں اور ایران کے خلاف ہونے والی دو جنگوں کے دوران جنگی جرائم اور انسانیت کے خلاف جرائم کے ذمہ دار افراد کے خلاف عالمی دائرۂ اختیار کے اصول کے تحت قانونی کارروائی کریں۔‘

   انڈیا میں برکس ممالک کے سربراہانِ عدلیہ کے اجلاس سے خطاب کرتے ہوئے انھوں نے کہا کہ ’دنیا کو انصاف کی پہلے سے کہیں زیادہ ضرورت ہے اور انصاف کو سیاسی مفادات کی بنیاد پر منتخب نہیں ہونا چاہیے۔‘

   ایرانی خبر رساں ادارے تسنیم کے مطابق حسین محسنی نے برکس کو دنیا کے اہم اقتصادی و سیاسی اتحادوں میں سے ایک قرار دیتے ہوئے کہا کہ ’یہ گروپ نئے عالمی نظام کی تشکیل میں بڑھتا ہوا اہم کردار ادا کر رہا ہے۔‘

   ان کے مطابق برکس کی دستاویزات میں ریاستوں کی خودمختاری اور علاقائی سالمیت کے احترام، تنازعات کے پرامن حل اور اقوام متحدہ کے چارٹر کی پابندی پر بارہا زور دیا گیا ہے۔

   ایرانی چیف جسٹس نے کہا کہ ’گزشتہ ایک سال کے دوران ایران کو امریکہ اور اسرائیلی حکومت کی جانب سے ’وحشیانہ جارحیت‘ کا سامنا رہا ہے اور یہ حملے بین الاقوامی قوانین کی خلاف ورزی اور غیر قانونی اقدام تھے۔‘

   ان کے مطابق حملوں کے پہلے ہی روز مناب کے ایک سکول کے 168 طلبہ سمیت بڑی تعداد میں ایرانی شہری ہلاک ہوئے، جبکہ 40 روزہ جنگ کے دوران ہسپتالوں، تعلیمی و ثقافتی مراکز، رہائشی علاقوں اور دیگر بنیادی ڈھانچے کو بھی نشانہ بنایا گیا، جس میں خواتین اور بچوں سمیت متعدد شہری مارے گئے۔

   حسین محسنی نے امریکی اور اسرائیلی اقدامات کو جنگی جرائم کی واضح مثالیں قرار دیتے ہوئے بین الاقوامی اداروں کی خاموشی پر تنقید کی۔

   انھوں نے برکس ممالک سے مطالبہ کیا کہ ’وہ ایران کی خودمختاری اور علاقائی سالمیت کی خلاف ورزیوں کی مذمت کرتے ہوئے مزید غیر قانونی اقدامات کی روک تھام کے لیے عملی اقدامات کریں اور عالمی دائرۂ اختیار کے اصول کو استعمال کرتے ہوئے جنگی جرائم اور انسانیت کے خلاف جرائم کے ذمہ داروں کے خلاف کارروائی کریں۔‘

2. 6 ستمبر 2026امریکی بحری جہازوں کے خلاف مزید ’شدید اور بڑے پیمانے‘ پر کارروائی کی جائے گی: ایران

   

   ،تصویر کا ذریعہIRNA

   خاتم الانبیاء سینٹرل ہیڈکوارٹرز کے ترجمان نے امریکہ کی ’دہشت گرد‘ فوج کو خبردار کیا ہے کہ ’اگر واشنگٹن خطے میں اپنی جارحانہ کارروائیاں جاری رکھتا ہے تو ایرانی مسلح افواج امریکی جنگی بحری جہازوں کے خلاف پہلے سے زیادہ شدید اور وسیع پیمانے پر کارروائی کریں گی۔‘

   ایرانی خبر رساں ادارے ارنا کے مطابق لیفٹیننٹ کرنل ابراہیم ذوالفقاری نے سنیچر کی شب کہا کہ ’اگر امریکی فوج اپنی ’جارحانہ کارروائیاں‘ جاری رکھتے ہوئے خطے میں عدم تحفظ پیدا کرتی، ایرانی بحری جہازوں کو ہراساں کرتی یا ایران کی بحری ناکہ بندی برقرار رکھتی ہے تو ایرانی مسلح افواج اس کا مزید سخت جواب دیں گی۔‘

   انھوں نے مزید کہا کہ اگر واشنگٹن ایسی کارروائیاں جاری رکھتا ہے تو ایرانی مسلح افواج خطے میں موجود امریکی فوجی بحری جہازوں کو ’پہلے سے زیادہ شدت سے‘ نشانہ بنائیں گی۔

   انھوں نے خبردار کیا کہ اگر امریکہ ایران کے خلاف اپنے اقدامات جاری رکھتا ہے تو ایرانی فوجی ردِعمل کا دائرہ بھی مزید وسیع ہو سکتا ہے۔

   یہ دھمکی امریکی فوج کے اس بیان کے بعد سامنے آئی ہے جس میں کہا گیا تھا کہ ’امریکی افواج نے خلیج فارس اور خلیج عمان میں تین ایرانی خام تیل بردار ٹینکروں کو نشانہ بنایا ہے۔‘

3. 6 ستمبر 2026اسرائیل میں امریکی سفیر کی اسرائیلی آبادکاروں کی ’لاقانونیت‘ پر مذمت

   

   ،تصویر کا ذریعہGetty Images

   اسرائیل میں امریکی سفیر مائیک ہکابی نے کہا ہے کہ ’ترمیزیا کی یہودی بستی میں رہنے والے امریکی شہریوں نے سٹی کونسل کے ایک اجلاس کے دوران انھیں اپنے تباہ شدہ گھروں، بچوں کو دی جانے والی دھمکیوں، تشدد اور خوف زدہ کرنے کے واقعات سے آگاہ کیا۔‘

   یہ بستی مقبوضہ مغربی کنارے کے شہر رام اللہ میں واقع ہے اور یہاں بڑی تعداد میں امریکی شہری رہتے ہیں۔

   مائیک ہکابی نے سوشل میڈیا پلیٹ فارم ایکس پر ایک پوسٹ میں لکھا کہ ’میرا خیال ہے کہ یہودیہ/سامریہ (مقبوضہ مغربی کنارے کے لیے اسرائیل کی استعمال کردہ اصطلاح) میں رہنے والے اسرائیلیوں کو وہاں رہنے کا حق ہے اور میں اس کی حمایت کرتا ہوں، لیکن بائبل پر یقین رکھنے والا کوئی بھی شخص لاقانونیت کی حمایت نہیں کرتا۔‘

   مقبوضہ مغربی کنارے میں اسرائیلی بستیاں بین الاقوامی قانون کے تحت غیر قانونی تصور کی جاتی ہیں۔

4. 6 ستمبر 2026پاسدارانِ انقلاب کا آبنائے ہرمز کے ’غیر مجاز راستوں‘ سے گزرنے والے تین آئل ٹینکروں اور علاقے میں موجود تین امریکی جہازوں کو نشانہ بنانے کا دعویٰ

   

   ،تصویر کا ذریعہNurPhotos via Getty Images

   ایرانی خبر رساں ادارے تسنیم نیوز ایجنسی کے مطابق پاسدارانِ انقلاب کی بحریہ نے آبنائے ہرمز میں ’غیر مجاز راستوں‘ سے گزرنے والے تین آئل ٹینکروں اور امریکہ کے تین جہازوں کو نشانہ بنانے کا دعویٰ کیا ہے۔

   تسنیم نیوز ایجنسی کی خبر کے مطابق سنیچر کو پاسدارانِ انقلاب کی جانب سے جاری ایک بیان میں کہا گیا ہے کہ اس کی بحریہ نے آبنائے ہرمز میں ’غیر مجاز راستوں‘ سے گزرنے والے تین آئل ٹینکروں کے ساتھ ساتھ دیگر علاقوں میں موجود امریکہ کے تین جہازوں کو بھی نشانہ بنایا ہے۔

   امریکہ کی جانب سے تاحال پاسدارانِ انقلاب کی ان کارروائیوں پر کوئی ردِعمل سامنے نہیں آیا ہے۔

   اس سے قبل امریکی فوج کی مرکزی کمان (سینٹکام) نے کہا تھا کہ امریکی فورسز نے سنیچر کو ایران کے تین آئل ٹینکروں کو نشانہ بنایا، جن میں ایک جزیرۂ خارگ کے قریب موجود تھا۔

   جزیرۂ خارگ کو ایرانی تیل کی برآمدات کا سب سے اہم مرکز تصور کیا جاتا ہے۔

5. 6 ستمبر 2026ایرانی وزارتِ خارجہ کی خلیج فارس اور بحیرۂ عمان میں ’ایران کے تجارتی جہازوں‘ پر امریکی حملوں کی مذمت۔

   ایرانی وزارتِ خارجہ نے ایک بیان میں خلیج فارس اور بحیرۂ عمان میں ’ایران کے تجارتی جہازوں‘ پر امریکہ کے حملوں کی مذمت کی ہے۔

   وزارتِ خارجہ نے اپنے بیان میں امریکی حملوں کو ’غیر قانونی اور جارحانہ اقدام‘ قرار دیتے ہوئے کہا کہ یہ ’امریکہ کی فوجی جارحیت کا تسلسل‘ ہیں۔

   بیان میں کہا گیا کہ یہ کارروائی ’اقوام متحدہ کے منشور کی خلاف ورزی، جنگی جرم، اور بین الاقوامی امن کے ساتھ ساتھ تجارتی جہاز رانی کے تحفظ کے لیے واضح خطرہ‘ ہے۔

   ایرانی وزارتِ خارجہ کا مزید کہنا ہے کہ ’خطے میں امریکہ کے جارحانہ اور مداخلت پسندانہ اقدامات کے اس تسلسل کے نتیجے میں پیدا ہونے والے تمام نتائج کی ذمہ داری امریکی حکومت اور اس کے معاونین اور شراکت داروں پر عائد ہو گی۔‘

6. 6 ستمبر 2026امریکی حملوں کا نشانہ بننے والے دو آئل ٹینکروں کے عملے کو لائف بوٹس کے ذریعے ساحل پر منتقل کر دیا گیا: ایرانی میڈیا

   ایران کی سرکاری خبر رساں ایجنسی ارنا نے خبر دی ہے کہ آج امریکی افواج کے حملوں کا نشانہ بننے والے دو آئل ٹینکروں کے عملے کو ’لائف بوٹس کے ذریعے ساحل پر منتقل کر دیا گیا‘۔

   رپورٹ کے مطابق ان میں سے ایک ٹینکر خالی تھا جبکہ دوسرے میں تیل کا کارگو موجود تھا۔

   چند گھنٹے قبل امریکی سینٹرل کمانڈ (سینٹکام) نے کہا تھا کہ اس نے ایران کے تین ٹینکروں کو نشانہ بنایا ہے۔

   سینٹکام کی جانب سے ایکس پر جاری بیان میں کہا گیا ہے کہ یہ کارروائی ایرانی پاسدارانِ انقلاب کی جانب سے امریکی بحریہ کے دو جنگی جہازوں کو نشانہ بنانے کی کوشش کے بعد کی گئی تھی۔

7. 6 ستمبر 2026چاغی اور دُکی میں پرتشدد واقعات میں چار افراد ہلاک

   بلوچستان کے دو اضلاع چاغی اور دُکی میں دو الگ الگ واقعات میں ایک قبائلی رہنما سمیت کم از کم چار افراد مارے گئے ہیں جبکہ دو افراد لاپتہ ہیں۔

   سرکاری حکام کے مطابق دُکی میں مارے جانے والے تین افراد افغان شہری تھے جو ایک قبائلی رہنما کی زرعی اراضی پر چوکیدار کے طور پر کام کرتے تھے۔

   دُکی پولیس کے سربراہ منصور احمد بزدار نے تین افراد کے مارے جانے اور دو کے لاپتہ ہونے کی تصدیق کرتے ہوئے بتایا کہ انھیں جھالار کے علاقے سے آگے ایک پہاڑی علاقے میں نامعلوم مسلح افراد نے حملے کا نشانہ بنایا۔

   ان کا کہنا تھا کہ یہ افراد جھالار میں مقامی قبائلی رہنما سردار اکبر خان ناصر کی اراضی پر چوکیدار کے طور پر کام کر رہے تھے۔

   انھوں نے کہا کہ مارے جانے والے اور لاپتہ ہونے والے تمام افراد کی شناخت ہو گئی ہے۔

   تاہم انھوں نے مزید تفصیلات فراہم نہیں کیں اور کہا کہ واقعے کی تحقیقات شروع کر دی گئی ہیں۔

   ایک اور سرکاری اہلکار نے بتایا کہ مارے جانے والے افراد کی شناخت افغان شہریوں کے طور پر ہوئی ہے۔

   ان کا کہنا تھا کہ لاپتہ افراد کی بازیابی کے لیے کوششیں جاری ہیں۔

   دُکی ان علاقوں میں شامل ہے جہاں طویل عرصے سے بدامنی کے واقعات پیش آتے رہے ہیں۔

   گذشتہ اتوار کلی بختیار لونی کے قریب ایک بم حملے میں تین بھائی مارے گئے تھے جبکہ ایک اور شخص زخمی ہوا تھا۔

   ادھر ضلع چاغی میں نامعلوم مسلح افراد کے حملے میں قبائلی شخصیت ملک کریم داد محمد حسنی مارے گئے ہیں۔

   چاغی میں ایک پولیس اہلکار نے نام ظاہر نہ کرنے کی شرط پر بتایا کہ ملک کریم داد محمد حسنی کو صبح کے وقت چاغی بازار میں نامعلوم مسلح افراد نے حملے کا نشانہ بنایا۔

   پولیس اہلکار کے مطابق اس واقعے کے محرکات تاحال معلوم نہیں ہو سکے۔

   چاغی بلوچستان کا ایک سرحدی ضلع ہے اور اس کی سرحدیں افغانستان اور ایران دونوں سے ملتی ہیں۔

8. 6 ستمبر 2026سابق خاتون پولیس سرجن ڈاکٹر عائشہ فیض کوئٹہ سے گرفتار

   بلوچستان کے دارالحکومت کوئٹہ سے سابق خاتون پولیس سرجن ڈاکٹر عائشہ فیض کو گرفتار کر لیا گیا ہے۔

   بی بی سی کی جانب سے رابطہ کرنے پر بلوچستان کے وزیر داخلہ میر ضیا اللہ لانگو نے ان کی گرفتاری کی تصدیق کی۔

   ایک سینیئر حکومتی عہدیدار نے نام ظاہر نہ کرنے کی شرط پر بی بی سی کو بتایا کہ ان کے خلاف دو مقدمات درج ہیں۔ ان کا کہنا تھا کہ جب کوئی ریاست کے خلاف بات کرے گا یا جو لوگ ریاست کو نقصان پہنچا رہے ہیں ان کی حمایت میں بیان دے گا تو قانون اس کے خلاف اپنا راستہ لے گا۔

   ان کا کہنا تھا کہ ڈاکٹر عائشہ فیض کے خلاف ایک ایف آئی آر سی ٹی ڈی کی جانب سے درج کی گئی ہے جبکہ دوسری ایف آئی آر ان کے خلاف ایک شہری کی جانب سے درج کروائی گئی ہے۔

   حزب اختلاف سے تعلق رکھنے والے سیاسی رہنمائوں نے ڈاکٹر عائشہ فیض کی گرفتاری کی مذمت کی ہے۔

   ڈاکٹر عائشہ فیض کون ہیں؟

   ڈاکٹر عائشہ فیض کا تعلق ضلع مستونگ سے ہے۔ وہ بلوچستان کے معروف قوم پرست رہنما فیض محمد دہوار کی صاحبزادی ہیں۔

   ان کے والد قیام پاکستان سے اپنی زندگی کے آخری دنوں تک بلوچستان کے لوگوں کے حقوق کے لیے جدوجہد کرتے رہے۔

   ڈاکٹر عائشہ فیض نے اپنی تعلیم مستونگ اور کوئٹہ سے حاصل کی۔

   ایم بی بی ایس کی ڈگری حاصل کرنے کے بعد انھوں نے سرکاری ملازمت اختیار کی۔

   وہ طویل عرصے تک کوئٹہ میں بلوچستان کے سب سے بڑے ہسپتال سنڈیمن پروونشل ہسپتال میں پولیس سرجن کے طور پر کام کرتی رہی اور چند ماہ قبل ہی ملازمت سے ریٹائر ہوئی ہیں۔

   ڈاکٹر عائشہ فیض کی گرفتاری کی مذمت

   بلوچستان میں حزب اختلاف سے تعلق رکھنے والے رہنماؤں اور وکلا نے ڈاکٹر عائشہ فیض کی گرفتاری کی مذمت کی ہے۔

   سابق سینیٹر نوابزادہ لشکری رئیسانی نے سماجی رابطے کی میڈیا ایکس پر اپنے بیان میں کہا کہ ڈاکٹر عائشہ فیض کو گرفتار کر کے حکومت نے قانونی اور اخلاقی حدیں پار کر دی ہیں۔

   قانون دان اور جمعیت وکلا فورم کے مرکزی صدر سینیٹر کامران مرتضیٰ ایڈووکیٹ کا کہنا ہے کہ سیاسی یا انتظامی معاملات پر اختلافِ رائے اور تنقید کا جواب گرفتاریوں، طاقت کے استعمال اور سخت قوانین کے نفاذ سے دینا جمہوری اقدار، آئین اور قانون کی روح کے منافی ہے۔

   بلوچستان نیشنل پارٹی نے بھی ڈاکٹر عائشہ فیض کی گرفتاری کی مذمت کرتے ہوئے کہا ہے ان کی پریس کانفرنس کے بعد گرفتاری ظاہر کرتی ہے کہ اب آزادی اظہار پر مکمل پابندی لگ چکی ہے۔

9. 5 ستمبر 2026پنجاب کو ہمسایہ ممالک سے کم اور پڑوسی صوبوں سے زیادہ خطرہ ہے: وزیرِ اعلیٰ مریم نواز

   

   ،تصویر کا ذریعہyoutube/PTVNewsOfficial

   پاکستان کے صوبہ پنجاب کی وزیرِ اعلیٰ مریم نواز کا کہنا ہے کہ پنجاب کو ہمسایہ ممالک کی نسبت ہمسایہ صوبوں سے زیادہ خطرہ ہے۔

   سنیچر کے روز لاہور میں ’پرووینشل انٹیلی جنس فیوژن اینڈ تھریٹ اسیسمنٹ سنٹر پنجاب‘ کے افتتاح کے موقع پر خطاب کرتے ہوئے وزیرِ اعلیٰ کا کہنا تھا کہ ان کی خواہش ہے کہ پنجاب کے لوگوں کو یہ احساس ہو کہ وہ ایک محفوظ ماحول میں سوتے ہیں۔

   ’آپ خود دیکھیے کہ ٹرائی بارڈر ایریاز ہیں۔۔۔ افسوس کی بات یہ ہے کہ مجھے تھریٹ جو ہے وہ میرے پڑوسی ممالک سے کم ہیں اور میرے پڑوسی صوبوں سے زیادہ ہیں۔‘

   ان کا کہنا تھا کہ ’وہاں سے دہشتگردی پنجاب میں آتی ہے۔‘

   یاد رہے کہ صوبہ پنجاب کی سرحدیں سندھ، بلوچستان اور خیبر پختونخوا سے ملتی ہیں جبکہ مشرق کی جانب اس کی سرحد پڑوسی ملک انڈیا سے ملتی ہے۔

   وزیرِ اعلیٰ کا کہنا تھا کہ پنجاب کے اوپر سب کی نظر ہے تاہم انھوں نے دعویٰ کیا کہ پنجاب ایک محفوظ صوبہ ہے جہاں مصنوعی ذہانت (اے آئی) اور ٹیکنالوجی پر کام کیا گیا ہے۔

   مریم نواز نے دعویٰ کیا کہ انھوں نے پنجاب کی سکیورٹی اور سیفٹی کی ضروریات کو پورا کرنے کے لیے اربوں روپے ٹیکنالوجی میں لگائے ہیں۔

   ان کا کہنا تھا کہ جب وہ وزیرِ اعلیٰ بنیں تو انھوں نے دیکھا کہ سکیورٹی اہلکاروں سے زیادہ ٹیکنالوجی شدت پسندوں کے پاس ہوتی تھی۔ ’ان کے پاس نائٹ وژن گلاسز، اور وہ بہت منصوبہ بندی کے ساتھ آتے تھے، لیکن اب اللہ کا شکر ہے کہ ہمارے پاس بھی وہ سارا سسٹم موجود ہے۔‘

   ان کا کہنا تھا کہ سی سی ٹی وی کیمروں کی بلٹ پروفنگ کی گئی ہے کیونکہ شدت پسند اس کو نشانہ بناتے تھے، اسی طرح اب حکومت نے تھرمل کیمرے لگائے ہیں جبکہ ڈرونز پر بھی سرمایہ کاری کی گئی ہے۔

   سکیورٹی اداروں کی چیک پوسٹوں کو مزید محفوظ بنانے کے لیے کیے گئے اقدامات کے متعلق ان کا کہنا تھا کہ ’دو ڈھائی سال پہلے کی چیک پوسٹ دیکھیں، ایسا لگتا تھا کہ چند بوریاں رکھ کر مٹی کی دیواروں کے پیچھے سکیورٹی اہلکار بنا کسی حفاظت کے بیٹھے ہیں۔

   ’آج آپ جا کر دیکھیں، اونچی اونچی دیواریں ہیں، محفوظ کمرے ہیں، کسی حملے کی صورت میں وہ پناہ لے سکتے ہیں، یا اپنی جان بچا سکتے ہیں۔‘

10. 5 ستمبر 2026امریکی فوج کا پاسدارانِ انقلاب کے تین تیل بردار جہاز تباہ کرنے کا دعویٰ

    

    ،تصویر کا ذریعہCencom

    امریکی فوج کی مرکزی کمان (سینٹکام) نے دعویٰ کیا ہے کہ امریکی افواج نے پاسدارانِ انقلاب کے تین تیل بردار جہازوں کو تباہ کر دیا ہے۔

    سینٹکام کی جانب سے ایکس پر جاری بیان میں کہا گیا ہے کہ یہ کارروائی ایرانی پاسدارانِ انقلاب کی جانب سے امریکی بحریہ کے دو جنگی جہازوں کو نشانہ بنانے کی کوشش کے بعد کی گئی تھی۔

    بیان میں کہا گیا ہے کہ امریکی جنگی جہاز ایرانی حملے سے بچ نکلنے میں کامیاب رہے اور اس میں کسی بھی امریکی اہلکار کو نقصان نہیں پہنچا۔

    سینٹکام کا کہنا ہے کہ ایرانی حملوں کے بعد امریکی افواج نے جزیرہ خارگ کے ساحل کے قریب پاسدارانِ انقلاب کے دو خام تیل بردار جہازوں کو مستقل طور پر ناکارہ بنا دیا جبکہ خلیجِ عمان میں ایک خالی ایرانی آئل ٹینکر کو بھی مکمل طور پر تباہ کر دیا۔ بیان میں مزید دعویڑٰ کیا گیا ہے کہ حملے سے قبل عملے کو جہاز چھوڑنے کی ہدایت کی گئی تھی۔

    سینٹکام کے کمانڈر ایڈمرل بریڈ کوپر کا کہنا ہے کہ ’پاسدارانِ انقلاب کے لیے پیغام واضح ہے: اگر آپ ہمارے دو جہازوں پر فائر کریں گے تو ہم آپ پر اس سے بھی زیادہ معاشی نقصان پہنچائیں گے – اور آپ کے تین جہاز تباہ کر دیں گے۔‘

    ’ہم امریکی افواج کے دفاع میں کسی ہچکچاہٹ کا مظاہرہ نہیں کریں گے، اور اگر ضرورت پڑی تو ایران کے محدود اور غیر محفوظ تیل بردار بیڑے کو تباہ کر دیں گے۔‘

11. 5 ستمبر 2026خارگ میں صورتحال معمول کے مطابق اور پرسکون ہے: ایرانی میڈیا

    ایرانی میڈیا کا کہنا ہے کہ جزیرہ خارگ میں صورتحال معمول کے مطابق اور پرسکون ہے۔

    اس سے قبل بعض ایرانی میڈیا اداروں نے خبر دی تھی کہ امریکہ نے جزیرہ خارگ کے قریب ایک ایرانی آئل ٹینکر کو میزائل حملے میں نشانہ بنایا ہے، تاہم اس بارے میں نہ ایرانی حکام نے کوئی باضابطہ بیان جاری کیا ہے اور نہ ہی امریکی حکام نے تبصرہ کیا ہے۔

    ایران کی طالب علم خبر رساں ایجنسی نے جزیرے کی تازہ تصاویر جاری کرتے ہوئے کہا ہے کہ علاقے میں آگ یا دھوئیں کے کوئی آثار دکھائی نہیں دیے اور صورتحال معمول کے مطابق ہے۔

    ادھر تسنیم نیوز ایجنسی کے مطابق مبینہ حملے کے وقت ایرانی ٹینکر جزیرہ خارگ سے تقریباً چھ میل (11 کلومیٹر) کے فاصلے پر موجود تھا۔

12. 5 ستمبر 2026یمن میں حوثیوں اور سرکاری افواج کے درمیان جھڑپوں میں 60 سے زائد افراد ہلاک

    طبی اور عسکری ذرائع نے ’اے ایف پی‘ کو بتایا ہے کہ یمن میں سعودی حمایت یافتہ سرکاری افواج اور حوثیوں کے درمیان جھڑپوں میں 60 سے زائد افراد ہلاک ہو گئے ہیں۔

    اس رپورٹ کے مطابق ہلاک ہونے والوں میں عام شہری بھی شامل ہیں۔

    اے ایف پی کی رپورٹ کے مطابق جنوب مغربی یمن میں کئی گھنٹوں تک جاری رہنے والی لڑائی میں سرکاری افواج کے 26 اہلکار ہلاک ہوئے۔

    ایران کے اتحادی حوثیوں کے طبی اور عسکری ذرائع نے بھی ان فورسز کے 31 اہلکاروں کی ہلاکت کی اطلاع دی۔

    حکومت کے زیرِ کنٹرول شہر تعز میں طبی ذرائع نے بتایا کہ ایک بس پر میزائل حملے میں چھ شہری ہلاک اور سات زخمی ہو گئے۔

    حوثی، جو خود کو ’انصار اللہ‘ کہلاتے ہیں، یمن کے شمالی اور بحیرہ احمر کے ساتھ واقع مغربی ساحل کے ایک بڑے حصے کے ساتھ ساتھ دارالحکومت صنعا پر بھی کنٹرول رکھتے ہیں۔

    یمنی صدارتی لیڈرشپ کونسل جسے عالمی برادری حکومت کے طور پر تسلیم کرتی ہے، سعودی عرب کی حمایت یافتہ ہے اور یمن کے مشرقی حصے اور جنوبی ساحل (بشمول عدن کی بندرگاہ) پر کنٹرول رکھتی ہے۔

13. 5 ستمبر 2026یوکرین جنگ کے خاتمے کی کوششیں، امریکی صدر کے ایلچی جیرڈ کشنر اور سٹیو وٹکوف ماسکو پہنچ گئے

    

    ،تصویر کا ذریعہReuters

    یوکرین میں جنگ کے خاتمے کی کوششوں کے لیے مذاکرات سے قبل امریکی صدر ڈونلڈ ٹرمپ کے دو اعلیٰ ایلچی ماسکو پہنچ گئے ہیں۔

    سٹیو وٹکوف اور جیرڈ کشنر سنیچر کے روز روسی دارالحکومت پہنچے، جہاں وہ بات چیت کریں گے اور اس کے بعد اتوار کو یوکرین کے ساتھ مذاکرات کے لیے کیئو روانہ ہوں گے۔

    ٹرمپ نے جمعہ کو نامہ نگاروں کو بتایا کہ یہ دونوں شخصیات ’جنگ کے خاتمے کی تجویز اپنے ساتھ لا رہی ہیں۔‘ اب تک، امن معاہدہ کروانے کے لیے امریکہ اور اس کے اتحادیوں کی کوششیں کسی بڑی پیش رفت کا باعث نہیں بن سکیں۔

    امریکی خبر رساں ادارے ’ایگزیوس‘ نے رپورٹ کیا کہ امریکی ایلچی روسی صدر ولادیمیر پیوتن اور یوکرینی صدر ولادیمیر زیلنسکی دونوں سے الگ الگ ملاقات کریں گے۔

    وٹکوف اور کشنر کی ماسکو کے ونوکوفو ہوائی اڈے پر اترنے کے بعد روسی سفارت کار کریل دمتریو کی جانب سے استقبال کیے جانے کی تصاویر سامنے آئی ہیں۔

    فلائٹ ٹریکنگ کے اعداد و شمار سے ظاہر ہوا کہ امریکی حکومت کا ایک طیارہ فن لینڈ کے شہر ہیلسنکی سے آیا تھا، جہاں وہ دن کے آغاز میں امریکہ سے پہنچا تھا۔

14. 5 ستمبر 2026خارگ میں تیل بردار جہاز امریکی میزائلوں کا نشانہ بنا ہے: ایرانی میڈیا

    ایران کی تسنیم نیوز ایجنسی نے رپورٹ کیا ہے کہ امریکہ نے جزیرہ خارگ کے قریب ایرانی تیل بردار جہاز کو نشانہ بنایا ہے۔

    خارگ میں موجود تسنیم کے نامہ نگار کے مطابق اس جہاز کو خلیجِ فارس میں ایرانی تیل کی برآمدات کے اہم مرکز، جزیرہ خارگ سے ’چھ میل‘ کے فاصلے پر چار امریکی میزائلوں کے ذریعے نشانہ بنایا گیا۔

    تسنیم نے مقامی ذرائع کے حوالے سے بتایا کہ اس واقعے میں کوئی زخمی نہیں ہوا اور جہاز کا عملہ وہاں سے نکل رہا تھا۔

    ایرانی حکام نے ابھی تک اس معاملے پر کوئی بیان جاری نہیں کیا ہے اور امریکی سینٹرل کمانڈ (سینٹ کام) نے بھی اس پر کوئی تبصرہ نہیں کیا۔

    گذشتہ ہفتے ڈونلڈ ٹرمپ نے سوشل میڈیا پر مصنوعی ذہانت کی مدد سے تیار کردہ ایک ویڈیو پوسٹ کی تھی جس میں اُنھوں نے لکھا تھا کہ جزیرہ خارگ ’ٹکڑے ٹکڑے ہو رہا ہے۔‘

    ایرانی حکام نے خبردار کیا ہے کہ اگر خارگ پر حملہ کیا گیا تو وہ اس کا بھرپور جواب دیں گے۔

15. 5 ستمبر 2026خارگ جزیرے کے قریب ایرانی آئل ٹینکر پر مبینہ امریکی میزائل حملے کی اطلاعات

    

    ،تصویر کا ذریعہGetty Images

    ایرانی میڈیا کی جانب سے یہ خبر سامنے آئی ہے کہ امریکہ کے ساتھ بڑھتی ہوئی فوجی کشیدگی کے دوران ملک کی مرکزی آئل پورٹ خارگ جزیرے کے قریب ’کئی دھماکوں‘ کی آوازیں سنی گئی ہیں۔

    فارس نیوز ایجنسی کے مطابق اس کے نمائندے نے دھماکوں کی آوازیں سننے کی اطلاع دی، تاہم دھواں نظر نہیں آیا۔

    ادھر مقامی سی این این نے رپورٹ کیا ہے کہ امریکہ نے خارگ جزیرے کے قریب ایک ایرانی آئل ٹینکر کو نشانہ بنایا ہے۔

    ادھر ایرانی نیوز ویب سائٹس، جن میں عصر ایران بھی شامل ہے، نے بھی رپورٹ کیا ہے کہ ٹینکر کو خالی کرانے کا عمل شروع کر دیا گیا ہے۔

    ایرانی حکومت کے قریب سمجھے جانے والے میڈیا ادارے نور نیوز نے کہا ہے کہ مقامی ذرائع نے خارگ کے قریب ایک ایرانی ٹینکر پر امریکی فورسز کے میزائل حملے کی اطلاع دی ہے، تاہم ان اطلاعات کی ابھی تصدیق نہیں ہوئی۔

    واضح رہے کہ یہ اطلاعات ایسے وقت میں سامنے آئی ہیں جب ایرانی پارلیمان کے سپیکر محمد باقر قالیباف نے کہا ہے کہ ’ایران خطے میں نیا سکیورٹی نظام تشکیل دینے کی چین کی تجویز کا خیرمقدم کرتا ہے۔‘

    قالیباف نے کہا کہ ’مشترکہ سکیورٹی کو مضبوط بنانے پر چین کی توجہ ان باتوں کی عکاسی کرتی ہے جن پر ایران برسوں سے زور دیتا آیا ہے۔‘

    ان کا کہنا تھا کہ ’خطے کے ممالک کو اپنا مستقبل خود تشکیل دینا چاہیے اور حقیقی استحکام صرف خطے میں ایک نئے اور مقامی سکیورٹی نظام کے قیام سے ہی حاصل کیا جا سکتا ہے۔‘

    انھوں نے کہا کہ ’ایران تیار ہے۔‘

16. 5 ستمبر 2026ایرانی جزیرے خارگ کے قریب دھماکے کی آوازیں سنی گئیں: ایرانی میڈیا

    

    ایرانی ذرائع ابلاغ کے مطابق ایران کے اہم ترین تیل برآمدی مرکز خارگ جزیرے کے قریب تقریباً ایک گھنٹہ قبل دھماکے کی آوازیں سنی گئی ہیں۔

    دھماکوں کی نوعیت اور وجوہات تاحال واضح نہیں ہو سکیں۔ تاہم بعض ایرانی میڈیا اداروں نے مقامی ذرائع کے حوالے سے دعویٰ کیا ہے کہ ایک ایرانی آئل ٹینکر کو نشانہ بنایا گیا ہے۔

    حکام کی جانب سے ابھی تک اس حوالے سے کوئی باضابطہ بیان جاری نہیں کیا گیا، جبکہ واقعے کی مزید تفصیلات سامنے آنے کا انتظار کیا جا رہا ہے۔

    خارگ جزیرے

    ایران کے جنوب مغرب میں واقع جزیرہ خارگ 20 مربع کلومیٹر پر پھیلا ہوا ہے اور یہ صوبہ بوشہر کا حصہ ہے۔ یہاں کی خاص بات تیل کی تنصیبات کے ساتھ ساتھ ہرنوں کی بڑی تعداد بھی ہے، جو اس جزیرے میں جابجا گھومتے دکھائی دیتے ہیں۔

    یہ جزیرہ ایران کی تیل کی برآمدات کے لحاظ سے بہت اہم ہے اور تیل کی برآمدات کا بڑا ٹرمینل بھی یہاں موجود ہے۔

    خارگ کو خام تیل کی برآمد اور لوڈنگ کے لیے سب سے موزوں مقام سمجھا جاتا ہے، کیونکہ اس کی ملک کے جنوبی تیل سے مالا مال خطوں سے قربت، اچھی بحری جگہ، بڑے آئل ٹینکرز کے لنگر انداز ہونے کے لیے گہرے پانی جیسی سہولیات ہیں۔

    ایرانی تیل کا سب سے بڑا آف شور ابو زر آئل کمپلیکس خارگ سے 75 کلو میٹر مغرب میں واقع ہے۔ خلیج فارس میں ایرانی تیل کی زیادہ تر پیداوار اسی آئل فیلڈ سے ہوتی ہے۔

17. 5 ستمبر 2026خود کو جنگ کا پیادہ نہ بننے دیں: اسماعیل بقائی کا امریکی عوام سے مطالبہ

    ایران کی وزارت خارجہ کے ترجمان نے امریکی شہریوں سے اپیل کی ہے کہ وہ امریکی حکومت کو انھیں ’جنگ کا پیادہ‘ بنانے کی اجازت نہ دیں۔

    اسماعیل بقائی نے سوشل میڈیا پلیٹ فارم ایکس پر ایک پوسٹ میں امریکی شہریوں کو مخاطب کرتے ہوئے لکھا: ’خود کو جنگی محاذ کا پیادہ اور اس کے اخراجات ادا کرنے والا نہ بننے دیں، ایسی جنگ جس کا انتخاب آپ نے کبھی نہیں کیا۔ اپنے بچوں کو بھی ان کی غیرقانونی جنگ کے کرائے کے سپاہی نہ بننے دیں۔‘

    اس سے قبل امریکی صدر ڈونلڈ ٹرمپ نے جمعے کے روز صحافیوں سے گفتگو کرتے ہوئے کہا تھا کہ امریکہ بہت جلد ایران کے کوہ کلنگ پر حملہ کر سکتا ہے۔

    کوہ کلنگ، جو نطنز میں واقع یورینیم افزودگی کی تنصیبات کے قریب ہے، ایک انتہائی مضبوط مقام ہے جہاں دو بہت گہری سرنگوں کے مجموعے موجود ہیں۔

    امریکی صدر نے اپنی گفتگو کے ایک اور حصے میں کہا کہ ایران کے ساتھ جنگ امریکہ کے لیے ’ایک معمولی مسئلہ‘ ہے۔ موجودہ صورتحال کے بارے میں بات کرتے ہوئے انھوں نے کہا کہ ’بہت سے لوگ اسے جنگ نہیں کہتے۔ میں اسے ایک فوجی تصادم کہتا ہوں، کیونکہ ہمارے لیے یہ نسبتاً چھوٹا معاملہ ہے۔‘

18. 5 ستمبر 2026نیویارک کے میئر ظہران ممدانی کا سرکاری سکولوں میں اے آئی کے استعمال پر عارضی پابندی کا اعلان

    

    ،تصویر کا ذریعہGetty Images

    امریکہ میں نیویارک کے میئر زوہران ممدانی نے شہر کے سرکاری سکولوں میں جنریٹو آرٹیفیشل انٹیلی جنس (اے آئی) کے استعمال پر عارضی پابندی کا اعلان کیا ہے۔

    جنریٹو اے آئی چیٹ جی پی ٹی کی طرح ایسے الگورتھمز ہیں جو صارف کی جانب سے دی گئی ہدایات یا پرامپٹ کی بنیاد پر مواد تیار کر سکتے ہیں۔

    ظہران ممدانی نے اعلان کیا کہ اگلے تعلیمی سیشن میں پرائمری اور مڈل سکول کے طلبہ، یعنی 14 سال تک کی عمر کے بچوں کو اے آئی استعمال کرنے کی اجازت نہیں ہوگی۔ اس فیصلے سے تقریباً 6 لاکھ طلبہ متاثر ہوں گے۔

    ممدانی نے کہا، ’بچوں کو سیکھنے اور آگے بڑھنے کے لیے اپنے اساتذہ اور انسانی تعلق کی ضرورت ہوتی ہے۔‘

    ’انھیں اپنے ساتھیوں کے ساتھ مل کر مہارتیں پیدا کرنے، اساتذہ کے ساتھ تعلقات بنانے اور مشکل مسائل کا خود سامنا کرنے کی ضرورت ہے۔‘

    اس پالیسی کے تحت سکولوں میں بچوں کے اسکرین ٹائم سے متعلق نئی ہدایات بھی نافذ کی جائیں گی۔

    سفارش کی گئی ہے کہ تیسری سے پانچویں جماعت کے طلبہ کا سکول میں سکرین ٹائم 30 منٹ تک محدود ہونا چاہیے۔ جبکہ چھٹی سے آٹھویں جماعت کے طلبہ کے لیے یہ حد 45 منٹ ہوگی۔

    ہائی سکول سمیت تمام جماعتوں کے طلبہ پر کمپینین چیٹ بوٹس کے استعمال پر پابندی ہوگی۔

    ہائی سکول کے طلبہ کو سال میں دو بار اے آئی کے بارے میں تعلیم حاصل کرنا ہوگی۔ اس کے ساتھ پورے سال اے آئی تعلیم سے متعلق پروگراموں کا جائزہ لیا جائے گا۔

    میئر ممدانی نے کہا کہ اس پالیسی کی پورے سال قریب سے نگرانی کی جائے گی۔ انھوں نے کہا کہ یہ پالیسی ’حتمی نہیں‘ ہے اور حکام یہ دیکھیں گے کہ پالیسی مؤثر ثابت ہوتی ہے یا نہیں۔

19. 5 ستمبر 2026امریکہ کا سعودی عرب کو پانچ ارب ڈالر کا اسلحہ فروخت کرنے کا معاہدہ

    

    ،تصویر کا ذریعہGetty Images

    امریکی محکمہ خارجہ نے سعودی عرب کو پانچ ارب ڈالر مالیت کا فوجی سازوسامان فروخت کرنے کے معاہدے کی منظوری دے دی ہے۔

    امریکی محکمہ خارجہ کے مطابق سعودی عرب نے کئی ہزار بموں اور طویل فاصلے تک مار کرنے والے میزائلوں کے لیے رہنمائی کے نظام خریدنے کی درخواست کی تھی، جسے منظور کر لیا گیا ہے۔

    محکمے کے مطابق اس معاہدے میں ہتھیاروں کے علاوہ ضروری معاون سامان، اضافی پرزے، دیگر متعلقہ اشیا اور تکنیکی، انجینیئرنگ اور لاجسٹک معاونت کی خدمات بھی شامل ہوں گی۔

    امریکہ نے اس معاہدے کو اپنے ایک اہم اتحادی کی سکیورٹی بہتر بنانے کی کوشش قرار دیا ہے۔ امریکی محکمہ خارجہ کے مطابق اس سے خلیج میں سیاسی استحکام اور معاشی ترقی میں بھی مدد ملے گی۔

    بیان میں کہا گیا ہے کہ یہ معاہدہ موجودہ علاقائی خطرات سے نمٹنے کے لیے سعودی عرب کی فضائی دفاعی صلاحیت مضبوط کرے گا۔

20. 5 ستمبر 2026تہران کے جوہری پروگرام پر مغربی ممالک کی قرارداد لانے کا کوئی فائدہ نہیں: ایران

    

    ،تصویر کا ذریعہGetty Images

    ویانا میں عالمی اداروں کے لیے ایران کے مستقل مشن نے ایران کے جوہری پروگرام پر امریکہ اور تین یورپی ممالک کی جانب سے قرارداد لانے کی کوشش کو ’مایوس کن اور بے سود کوشش‘ قرار دیا ہے۔

    ایرانی مشن کی جانب سے ایکس پر جاری ایک بیان میں کہا گیا ہے کہ ’امریکہ اور تین یورپی ممالک ایک بار پھر بین الاقوامی جوہری توانائی ایجنسی کے بورڈ آف گورنرز میں ایران کے جوہری پروگرام سے متعلق قرارداد پیش کرنے کا ارادہ رکھتے ہیں۔‘

    مشن کے مطابق ان ممالک کا کہنا ہے کہ ’وہ ایران کے جوہری معاملے کو نیویارک میں اقوام متحدہ کی سلامتی کونسل میں لے جانا چاہتے ہیں۔‘

    ایرانی مشن نے بیان میں کہا ہے کہ ’ایسا لگتا ہے کہ یہ ممالک خود ہی اس معاملے کو دوبارہ سلامتی کونسل میں لے جانے کی پالیسی پر یقین نہیں رکھتے، جسے وہ پہلے اختیار کر چکے ہیں اور جس کی بڑے پیمانے پر تشہیر بھی کرتے رہے ہیں۔‘

    مشن نے مزید کہا کہ ’اس نئی کوشش سے بھی ان ممالک کو کوئی فائدہ نہیں ہوگا۔‘

    ایرانی مشن کا اشارہ فرانس، برطانیہ اور جرمنی کی جانب سے اگست سنہ 2025 میں ایران کے جوہری معاہدے کے تحت ’سنیپ بیک‘ طریقہ کار فعال کرنے کی کوشش کی طرف ہے۔ اس کے ذریعے ایران پر اقوام متحدہ کی پابندیاں دوبارہ عائد کرنے کا مطالبہ کیا گیا تھا۔

    روس اور چین نے اس اقدام کی مخالفت کرتے ہوئے اس کی قانونی حیثیت پر سوال اٹھایا تھا۔ تاہم سلامتی کونسل کی جانب سے پابندیوں میں نرمی کی مدت بڑھانے میں ناکامی کے بعد ستمبر 2025 میں اقوام متحدہ کی پابندیاں دوبارہ نافذ ہو گئی تھیں۔

    اس سے قبل جمعے کو خبر رساں ادارے روئٹرز نے سفارتی ذرائع کے حوالے سے بتایا کہ امریکہ اور تین یورپی ممالک، یعنی برطانیہ، فرانس اور جرمنی، آئی اے ای اے کے بورڈ آف گورنرز کے آئندہ اجلاس میں ایسی قرارداد منظور کرانے کی کوشش کر رہے ہیں جس کے ذریعے ایران کے جوہری معاملے کو اقوام متحدہ کی سلامتی کونسل میں بھیجا جا سکے۔

    روئٹرز کے مطابق امریکہ اور تین یورپی ممالک آئی اے ای اے کے 35 رکنی بورڈ آف گورنرز کے دیگر ارکان کی حمایت حاصل کرنے کی کوشش کر رہے ہیں تاکہ قرارداد منظور ہو سکے۔