ڈونلڈ ٹرمپ: ’امریکہ میں وبا کی صورتحال بہتر ہونے سے پہلے مزید خراب ہو سکتی ہے‘

لائیو کوریج

1. 21 جولائی 2020پنجاب کے چار شہروں کے مختلف علاقوں میں سمارٹ لاک ڈاؤن نافذ کر دیا گیا

   حکومتِ پنجاب نے صوبے کے چار شہروں کے مختلف علاقوں میں سمارٹ لاک ڈاؤن نافذ کر دیا ہے۔

   اس حوالے سے سیکرٹری پرائمری اینڈ سیکنڈری ہیلتھ کیئر کیپٹن (ر) محمد عثمان کی جانب سے نوٹیفکیشن جاری کر دیا گیا ہے۔

   کیپٹن (ر) محمد عثمان کے مطابق مندرجہ ذیل شہروں کے منتخب علاقوں میں سمارٹ لاک ڈاؤن نافذ کیا گیا ہے:

   • سیالکوٹ میں کلاں لدھڑ اور ٹاون غازی پور
   • واہ کینٹ میں وارڈ 3، وارڈ 8 اور یو سی سرائے کالا
   • گجرات میں محلہ کالو پورہ، چاہ ترنگ اور گاؤں مدینہ سیداں
   • گوجرانوالہ میں نندی پور، اروپ ٹاون اور قلعہ دیدار سنگھ

   کیپٹن (ر) محمد عثمان کے مطابق سمارٹ لاک ڈاؤن والے علاقوں میں بنیادی اشیائے ضروریہ بدستور میسر رہیں گی۔

   ان کا کہنا تھا کہ سمارٹ لاک ڈاؤن کا مقصد زیادہ کیسز والے علاقوں سے لوگوں کی آمدورفت کو محدود کرنا ہے۔

   ان کا مزید کہنا تھا کہ صوبہ بھر میں سمارٹ لاک ڈاؤن سے بہترین نتائج حاصل ہو رہے ہیں۔ اور این سی او سی کی مشاورت سے حکومت پنجاب کورونا وائرس پر قابو پانے کے لیے بہترین لائحہ عمل اپنا رہی ہے۔

2. 21 جولائی 2020’قرنطینہ ڈانس‘ سے مشہور ہونے والے نیپالی پولیس افسر

   نیپال کے ایک کورونا وائرس کے قرنطینہ کیمپ میں مقیم افراد کو محظوظ کرنے کے لیے ڈانس کرنے والے پولیس آفیسر کی ویڈیو سوشل میڈیا پر وائرل ہوگئی۔ بی بی سی سے بات کرتے ہوئے پولیس اہلکار جے پرکاش چوہدری نے بتایا کہ انھوں نے سوچا بھی نہیں تھا کہ ویڈیو وائرل ہوجائے گی، وہ تو صرف لوگوں کو تفریح فراہم کرنا چاہتے تھے۔

3. 21 جولائی 2020’ویکسین کی ترقی مثبت ہے لیکن ابھی بہت دور جانا ہے‘

   عالمی ادارۂ صحت (ڈبلیو ایچ او) نے ویکسین کے متعلق آج کی ترقی کو خوش آمدید کہتے ہوئے کہا ہے کہ کووڈ۔19 کے پھیلاؤ کو روکنے کے لیے ابھی بھی کام کرنے کی ضرورت ہے۔

   جینیوا میں ایک بریفنگ کے دوران ڈبلیو ایچ او کے ہنگامی حالتوں کے ڈائریکٹر ڈاکٹر مائیک ریان نے آکسفورڈ ویکسین کے تجربات میں شامل سائنسدانوں کو مبارکباد دیتے ہوئے کہا: ’یہ ایک مثبت نتیجہ ہے لیکن ہمیں بہت دور تک جانا ہے۔‘

   انھوں نے مزید کہا ’حقیقی دنیا‘ کے ٹرائل بڑے پیمانے پر ہونے چاہیے۔ اس وقت دنیا میں ممکنہ طور پر 23 ویکسین بنائی جا رہی ہیں۔

   ڈبلیو ایچ او کے سربراہ تیدروس ادہانوم گیبریئیسس نے بھی اس بات پر زور دیا کہ کسی بھی کامیاب ویکسین تک سبھی کی رسائی ہونی چاہیے۔

   انھوں نے کہا کہ بہت سے ممالک ویکسین کی تیاری کو ’ایک عالمی عوامی بہتری‘ کی افادیت کے طور پر دیکھ رہے ہیں، لیکن کچھ ’الٹ سمت میں جا رہے ہیں۔‘

   ’اگر کوئی اتفاقِ رائے نہیں ہوتا تو حقیقت میں یہ ان کی ملکیت ہو گی جن کے پاس پیسہ ہے اور جو اسے نہیں خرید سکتے یہ انھیں نہیں ملے گی۔‘

   ڈائریکٹر جنرل نے کہا کہ جبکہ ویکسین پر تحقیق جاری ہے، ہمیں اب زندگیاں بچانی ہیں۔

   ’ہمیں ویکسین کی تحقیق میں تیزی جاری رکھنی چاہیئے، جبکہ جو آلات ہمارے پاس موجود ہیں ان سے مزید کچھ کرنا چاہیے۔‘

4. 21 جولائی 2020بریکنگ, پاکستان: صوبہ پنجاب میں کورونا کے 253 نئے کیس، مزید سات اموات

   پاکستان کے صوبہ پنجاب میں کورونا وائرس کے 253 نئے کیس سامنے آئے ہیں جس کے بعد صوبے میں متاثرین کی تعداد 90444 ہو گئی ہے۔

   گذشتہ 24 گھنٹوں کے دوران مزید سات اموات سے پنجاب میں کورونا سے ہونے والی اموات کی تعداد 2090 ہو گئی ہے۔

   صوبہ پنجاب میں اب تک 66021 افراد کورونا وائرس سے صحت یاب بھی ہو چکے ہیں۔

5. 20 جولائی 2020ٹرمپ کووڈ۔19 کی بریفنگز دوبارہ شروع کریں گے

   امریکی صدر ڈونلڈ ٹرمپ نے کہا ہے کہ کل سے وہ امریکہ میں کورونا وائرس کی وبا کے متعلق اپنی انتظامیہ کا ردِ عمل پیش کرنے کے لیے باقاعدہ عوامی بریفنگز دوبارہ شروع کریں گے۔

   صدر ٹرمپ نے مارچ اور اپریل میں وائٹ ہاؤس کی کورونا وائرس ٹاسک فورس کے ہمراہ روزانہ کی بنیادوں پر 35 بریفنگز دی تھیں، لیکن اکثر وہ غلط یا گمراہ کن بیانات دینے کی وجہ سے تنقید کی زد میں آ جاتے تھے۔ اس کے برعکس انھوں نے میڈیا پر الزام لگایا تھا کہ وہ متعصب ہے۔

   انھوں نے کہا کہ بریفنگز کے دوبارہ شروع ہونے سے انھیں موقع ملے گا کہ وہ اپنی انتظامیہ کی مثبت چیزیں بتا سکیں، اور ویکسین اور دوسرے علاج کے متعلق تازہ ترین اطلاعات مہیا کر سکیں۔

   صدر نے رپورٹروں کو بتایا کہ ’میرے خیال میں یہ عوام کو معلومات فراہم کرنے کا ایک اچھا طریقہ ہے۔ بہت سے لوگ ہمیں دیکھ رہے ہیں، کیبل ٹی وی کی تاریخ میں ریکارڈ تعداد میں لوگ دیکھ رہے، اور اس طرح کی پہلے کوئی چیز نہیں ہوئی ہے۔‘

6. 20 جولائی 2020پاکستان کے صوبہ بلوچستان میں ایک دن میں فقط 104 ٹیسٹ

   پاکستان کے صوبہ بلوچستان میں پیر کو کورونا کے صرف پانچ کیس رپورٹ ہوئے جو کہ اپریل کی وسط کے بعد سے رپورٹ ہونے والے کورونا کے کیسز کی کم ترین شرح ہے۔

   محکمہ صحت حکومت بلوچستان کے ترجمان ڈاکٹر وسیم بیگ کے مطابق 20 جولائی کو کورونا کے صرف 104 ٹیسٹ کیے گئے۔

   محکمہ صحت کی جانب سے جاری اعداد و شمار کے مطابق پانچ کیسز کے اضافے کے بعد بلوچستان میں کورونا کے رپورٹ ہونے والے کیسز کی مجموعی تعداد 11441 ہوگئی۔

   مزید ایک مریض کی ہلاکت کے باعث کورونا سے ہلاک ہونے والے افراد کی مصدقہ تعداد 133 ہوگئی ہے۔

   بلوچستان میں اب تک کورونا کے مجموعی طور پر 55773 ٹیسٹ کیے گئے ہیں جن میں سے 44332 کے نتائج منفی آئے۔

   بلوچستان میں مجموعی طوپر پر 125742 افراد کی سکریننگ کی گئی ہے۔ کورونا وائرس سے اب تک9061 افراد صحتیاب ہوئے ہیں۔

7. 20 جولائی 2020خیبر پختونخوا: کورونا سے مزید 5 ہلاک اور 157 نئے مریض

   پاکستان کے صوبہ خیبر پختونخوا میں کورونا وائرس کے شکار مزید پانچ افراد جان کی بازی ہار گئے۔

   حکام کی جانب سے جاری تازہ ترین رپورٹ کے مطابق مزید 157 کیسز سامنے آئے ہیں جبکہ 361 مریض صحتیاب بھی ہو ہوئے۔

   اس وقت صوبے میں کل متحرک کیسز کی تعداد 579 ہے۔

8. 20 جولائی 2020بریکنگ, اسلام آباد: 2 لاکھ کے قریب ٹیسٹ، ڈھائی مہینے میں آج سب سے کم مریض ریکارڈ, آسیہ انصر، بی بی سی اردو

   پاکستان کے دارالحکومت اسلام باد میں حکام کا کہنا ہے کہ گذشتہ ڈھائی مہینوں میں پیر 20 جولائی کو کورونا وائرس کے مریضوں کی تعداد سب سے کم رہی جو کہ 23 ہے۔

   ڈسٹرکٹ ہیلتھ آفیسر ڈاکٹر زعیم ضیا نے بی بی سی کو بتایا کہ روزانہ کی بنیاد پر اسلام آباد میں 2 سے 3 ہزار ٹیسٹ کیے جاتے ہیں۔

   ان کا کہنا تھا کہ اب تک 14 ہزار میں کورونا وائرس کی تشخیص ہوئی ہے۔

   وہ کہتے ہیں کہ چھ مئی سے پہلے ایک مرتبہ 21 کورونا کیسز سامنے آئے تھے اور اس کے بعد آج 23 کیسز سامنے آئے ہیں۔

   ڈی ایچ او ڈاکٹر زعیم ضیا نے بتایا کہ جب ہم اسلام آباد میں کیے جانے والے ٹیسٹ کا قومی سطح سے تقابل کرتے ہیں تو یہ سب سے زیادہ ہے۔ جب ہم سرویلنس کر رہے تھے تو اس وقت مثبت نتائج 23 فیصد تھے جو اب کم ہو کر 3 فیصد رہ گئے ہیں۔

   مختلف جگہوں پر لیے جانے والے ٹیسٹ کے نمونوں میں ایک فیصد میں کورونا کی تشخیص ہوئی ہے۔

   ان کا کہنا تھا کہ 2 لاکھ کے قریب یا اس سے زیادہ کورونا وائرس کی تشخیص کے لیے ٹیسٹ کیے جا چکے ہیں۔

   ان کا کہنا تھا کہ گذشتہ دنوں ہم نے پانچ ہزار افراد کے مختلف سیکٹرز میں ٹیسٹ لیے جن میں سے 40 سے 45 میں کورونا وائرس کی تشخیص ہوئی ہے۔

   ڈاکٹر زعیم ضیا کا کہنا تھا کہ عید ایک بڑا چییلنج ہے اور لوگوں پر بھی اس کا انحصار ہے کہ وہ آپس میں کم میل جول رکھیں۔

9. 20 جولائی 2020جنوبی افریقہ کے علاقوں کے نام کووڈ۔19 اور سینیٹائیزر, پمزا فہلانی، بی بی سی نیوز، جوہانسبرگ

   ایک برادری نے جنوبی افریقہ کے شہر کیپ ٹاؤن کے گرد ایک نئی غیر رسمی بستی میں اپنے علاقے کا نام کووڈ۔19 رکھ کے وبا کو ایک نئی شکل دے دی ہے۔

   اس آبادی میں وہ لوگ رہ رہے ہیں جن کی آمدنی کورونا وائرس کی وبا کی وجہ سے ختم ہو گئی تھی اور ان کے پاس مکانوں کے کرائے دینے کے بھی پیسے نہیں تھے۔

   اس میں مختلف حصے ہیں جنھیں کووڈ۔1، کووڈ۔2 کہا جاتا ہے اور یہ کووڈ۔19 تک جاتے ہیں۔

   یہاں اکثر گھر نالی دار لوہے کی چادر سے بنے ہوئے ہیں۔

   اس کے قریب ہی ایک اور غیر رسمی بستی کا نام سینیٹائزر رکھا گیا ہے۔ ویسے تو یہ نام شاید مذاق کے طور پر ہی رکھا گیا ہے لیکن اس سے یہ ظاہر ہوتا ہے کہ وائرس کئی برادریوں کو کتنا متاثر کر رہا ہے۔

   مقامی لوگوں کا کہنا ہے کہ اس دوران کئی نئی غیر رسمی بستیاں بن رہی ہیں، لیکن ان کا انتظام چلانا بہت مشکل کام ہے۔

   جب سے ملک میں لاک ڈاؤن لگا ہے 30 لاکھ سے زیادہ افراد اپنا روز گار کھو چکے ہیں اور وبا نے معیشت کو بری طرح متاثر کیا ہے۔ ملک میں بڑھتے ہوئے کورونا وائرس متاثرین کی وجہ سے صحت کا نظام بھی شدید دباؤ میں ہے۔

10. 20 جولائی 2020بریکنگ, پاکستان کے زیر انتظام کشمیر میں مزید 53 مریض صحت یاب, ایم اے جرال، صحافی

    پاکستان کے زیر انتظام کشمیر میں محکمہ صحت کے فوکل پرسن برائے کووڈ 19 ڈاکٹر ندیم الرحمن کے مطابق گذشتہ چوبیس گھنٹوں کے دوران 247 مشتبہ افراد کے ٹیسٹ لیے گے ہیں جن میں 3 خواتین سمیت 7 افراد میں کورونا وائرس کی تصدیق ہوئی ہے۔

    ان کے مطابق خطے میں اب تک کورونا وائرس سے متاثر ہونے والے افراد کی تعداد 1922 ہوگی ہے۔

    ڈاکٹر ندیم الرحمن کے مطابق کورونا وائرس سے متاثر ہونے والے افراد میں ایک ڈاکٹر اور ایک پیرا میڈیکس کا اہلکار بھی شامل ہے۔

    انھوں نے بتایا کہ گذشتہ چوبیس گھنٹوں کے دوران 53 مریض صحتیاب ہوئے ہیں جس کے بعد صحتیاب مریضوں کی تعداد 1254 ہوگی ہے۔ ڈاکٹر ندیم الرحمن کے مطابق اب تک اس خطے میں 22741 مشتبہ افراد کے ٹیسٹ کیے جا چکے ہیں۔

11. 20 جولائی 2020پشاور میں مزید دو مقامات پر سمارٹ لاک ڈاؤن

    کورونا وائرس پھیلاؤ کے خدشات کے پیش نظرصوبہ خیبر پختونخوا کے دارالحکومت پشاور میں دو مقامات پر لاک ڈاؤن کا اعلان کیا گیا ہے۔

    ضلعی انتظامیہ کی جانب سے جاری تحریری بیان میں بتایا گیا ہے کہ درمنگی گارڈن اور ایگزیکٹو لاجز ورسک روڈ میں 21 جولائی سہ پہر چار بجے سے سمارٹ لاک ڈاؤن نافذ کرنے کا نوٹیفیکیشن جاری کیا گیا ہے۔

    ڈپٹی کمشنر پشاور محمد علی اصغر کے مطابق سمارٹ لاک ڈاؤن کے دوران ان علاقوں سے ان آوٹ انٹری بند رہے گی۔

    ان کا کہنا ہے کہ ان علاقوں میں کورونا وائرس کے تیزی سے پھیلتے ہوئے کیسز کی وجہ سے سمارٹ لاک ڈاؤن لگایا گیا جس کے بعد ان علاقوں میں صرف ضروری اشیائے خورد و نوش، میڈیسن، جنرل سٹور، تندوراور ایمرجنسی سروس کی دکانیں کھلی رہیں گی۔

    مزید بتایا گیا ہے کہ ان علاقوں کی مساجد میں صرف پانچ افراد کو باجماعت نماز پڑھنے کی اجازت ہو گی۔

    خیال رہے کہ گذشتہ روز حکام نے تہکال بالا سے سمارٹ لاک ڈاؤن ختم کرنے کا نوٹیفیکیشن جاری کیا تھا اور کہا تھا کہ لاک ڈاؤن کے نفاذ سے کورونا کیسز میں کمی آ رہی ہے۔

12. 20 جولائی 2020مردوں کا ٹی 20 عالمی کپ ملتوی کر دیا گیا

    کورونا وائرس کی وجہ سے مردوں کا ٹی 20 عالمی کپ، جو کہ 18 اکتوبر اور 15 نومبر کے درمیان آسٹریلیا میں منعقد ہونا تھا، ملتوی کر دیا گیا ہے۔

    اب یہ کرکٹ ٹورنامنٹ سنہ 2022 میں اکتوبر اور نومبر کے درمیان ایک اور ٹورنامنٹ کے ساتھ منعقد کیا جائے گا۔

    آئی سی سی کے چیف ایگزیکیٹیو مانو سواہنے کہتے ہیں کہ ’یہ فیصلہ ہمیں دو محفوظ اور کامیاب ٹی 20 عالمی کپ منعقد کرانے کا ممکنہ طور پر اچھا موقع فراہم کرتا ہے۔‘

13. 20 جولائی 2020آل پاکستان پرائیویٹ سکولز فیڈریشن کا 15 اگست سے تعلیمی ادارے کھولنے کا مطالبہ

    آل پاکستان پرائیویٹ سکولز فیڈریشن کی ملک بھر سے200 سے زائد رجسٹرڈ پرائیویٹ سکولز ایسوسی ایشنز، مدارس، فنی و تعلیمی اداروں اور اکیڈمیز نے کاشف مرزا کی قیادت میں مشترکہ اعلامیے میں حکومت کی جانب سے 14 ستمبر تک تعلیمی ادارے بند رکھنے کے فیصلے کو مسترد کیا ہے اور مطالبہ کیا ہے کہ فوری طور پر تعلمی ادارے کھولے جائیں۔

    اعلامیے میں فیڈریشن کے صدر نے حکام سے مطالبہ کیا ہے کہ وہ ملک بھر میں مدارس کے کامیاب تجربے کی روشنی میں سکولز 15اگست سے کھولے، بصورت دیگر سکولز 15 اگست کودیگر مدارس دینیہ کی طرح اتحادی تنظیموں کےساتھ ملکر از خود تعلیمی ادارے کھول دیں۔

    فیڈریشن کی جانب سے ملک بھر میں تعلیمی آئینی حقوق کے جائزمطالبات کے لیے پرامن احتجاج کا اعلان بھی کیا جائے گا۔

    اعلامیے کے اہم نکات:

    • چیف جسٹس پاکستان،آرمی چیف، وزیر اعظم، وزرااعلیٰ،گورنرز سے اپیل کی کہ SOPs کے تحت دیگر شعبہ جات کی طرح سکولز و تعلیمی ادارے بھی فوری طور پر کھولے جائیں۔ پرائیویٹ سکولز فیڈریشن نےعالمی معیار کے SOPs تیار اور جاری کر دیے ہیں۔
    • نجی سکولز، پیف وپیما، دیگرتعلیمی اداروں واکیڈمیز کا معاشی قتل کیا جارہا ہے۔ تعلیمی اداروں کی بندش سے50% تعلیمی ادارے مکمل بنداور10لاکھ لوگ بے روزگار ہوجائیں گے۔
    • 7.5 کروڑ پاکستانی بچےاپنے آئینی حق سےمحروم ہیں،جن میں50 فیصد سے زائد تعداد لڑکیوں کی ہے۔ تعلیمی نقصان کاازالہ ناممکن، تعلیم ہر بچے کاحق اور 25-A ریاست کا آئینی فریضہ ہے۔ حکومت جان بوجھ کر شعبہ تعلیم کو تباہ کر رہی ہے، چائلڈ لیبر رجحان میں خطرناک اضافہ ہواہے۔
    • امیروں کی اولاد گھر میں ٹیوٹر اورعام انسان کا بچہ تعلیم سے محروم کیوں؟ آن لائن تعلیم اورتعلیم گھر ٹی وی اک فلاپ ڈرامہ!
    • سکولز کی ٹائمنگ صبح 7 تا 10 اور سیکنڈ شفٹ میں سماجی فاصلے کو برقرار رکھ کے کلاسز جاری رکھی جا سکتی ہیں
    • ٹیچرز تنخواہیں اور90 فیصد سکولزکی عمارتوں کے کرائے فکسُ ہیں۔ بند سکولز کو بھی اوسط شرح بنیاد پریوٹیلیٹی بلز کی ادائیگیکرنی پڑ رہی ہے۔وزیراعظم ٹیچرز کیلیے تعلیمی ریلیف پیکیج کااعلان کریں۔
    • بورڈ امتحانات منسوخ کرنے کی بجائےامتحانات سماجی فاصلے برقرار رکھ کر لیے جائیں۔بورڈز فیس کی مد میں 45 لاکھ طلبا سے وصول شدہ 25ارب روپے واپس کریں۔
    • حکومت غیرآئینی اقدامات بند کرے۔ فیسوں کے حوالے سے حکومت سندھ اورپنجاب کا فیس میں 20فی صد کمی کا نوٹیفیکیشن وآرڈیننس آئین کےآرٹیکل 18,8،5,4,3, 25(1)،37اور38 سے متصادم،امتیازی وغیر قانونی ہے۔
    • وزیر اعظم پاکستان و وزرائے اعلی کو ملک بھر کے 2 لاکھ پرائیویٹ سکولز آئسولیشن سینٹرز اور قرنطینہ سنٹرزاور 15 لاکھ ٹیچرز بطور والیئنٹیرز پیشکش بھی کی گئی۔

14. 20 جولائی 2020کورونا وائرس انفیکشنز: بلیکبرن انگلینڈ کا نیا ’ہاٹ سپاٹ‘

    سرکاری اعداد و شمار کے مطابق لنکا شائر کی بورو بلیکبرن اور ڈاروین انفیکشنز کی شرح کے حوالے سے لیسٹر سے بھی آگے نکل رہے ہیں۔

    پبلک ہیلتھ انگلینڈ کے مطابق گذشتہ ہفتے انفیکشنز دو گنا زیادہ ہو گئیں، اور 17 جولائی تک ہر ایک لاکھ افراد میں سے 79.2 کو کورونا وائرس تھا۔

    لیکن انفیکشنز کے حوالے سے اس کے ٹاپ کی فہرست میں آنے کی ایک وجہ یہ بھی ہو سکتی ہے کہ لیسٹر میں لاک ڈاؤن کے بعد انفیکشنز میں کمی آئی ہے۔ اب وہاں ہر ایک لاکھ افراد میں سے 77.7 افراد میں ہی کورونا وائرس کی انفیکشن ہے، 29 جون تک یہ نمبر 135 تھا۔

    بلیکبرن میں لگائے گئے نئے اقدامات میں زیادہ منہ ڈھانپنا اور دوسرے گھروں سے مہمانوں کے آنے پر زیادہ پابندیاں شامل ہیں

15. 20 جولائی 2020کورونا وائرس: آکسفورڈ ویکسین ٹرائل کے نتائج حوصلہ افزا

16. 20 جولائی 2020جنوبی ایشیا میں کورونا وائرس: کیا جانچ کی کمی عالمی وبا کی اصل شدت کو چھپا رہی ہے؟, شروتی مینن، بی بی سی ریئلٹی چیک

    نڈیا میں کورونا وائرس سے متاثرین کی تعداد دس لاکھ سے زیادہ ہو چکی ہے اور اب وہ امریکہ اور برازیل کے بعد دنیا میں کورونا وائرس کے کیسز میں تیسرا سب سے زیادہ متاثرہ ملک ہے۔

    انڈیا کی بڑی آبادی کو دیکھتے ہوئے یہ تعجب کی بات نہیں لیکن اس کے چھوٹے پڑوسی ممالک بھی اس وائرس سے بہت زیادہ متاثر ہوئے ہیں۔

    پاکستان، بنگلہ دیش، نیپال، سری لنکا اور افغانستان میں کیا ہو رہا ہے اس پر ہماری نظر ہے۔

    مزید پڑھیے

17. 20 جولائی 2020وبا کے دوران انسدادِ پولیو مہم، سلام صحت محافظ

    پاکستان میں سماجی رابطوں کی ویب سائٹس پر چاروں صوبوں میں انسداد پولیو مہم کی ٹیموں کی تصاویر اور ویڈیوز شیئر کی جا رہی ہیں۔ کورونا وائرس کی وبا پھوٹنے سے پاکستان میں پولیو کے تدارک کا پروگرام بھی متاثر ہوا تھا۔

    گذشتہ دنوں حکام نے اعلان کیا تھا کہ ملک کے طبّی مراکز پر والدین اپنے بچوں کو حفاظتی ٹیکے اور ویکسین لگوا سکتے ہیں جبکہ پیر کی صبح سے ملک کے منتخب اضلاع میں 5 روزہ انسداد پولیو مہم کا آغاز ہو گیا ہے۔

    نیشنل اننسٹی ٹیوٹ آف ہیلتھ میں نیشنل کوارڈینیٹر برائے انسدادِ پولیو ڈاکٹر محمد نے مہم کے پہلے روز ٹیمز کی ویڈیو شیئر کی اور اپنے پیغام میں لکھا `سلام صحت محافظ، کورونا ہو یا پولیو آپ کے عزم کو کوئی نہیں ہرا سکتا۔

18. 20 جولائی 2020آکسفورڈ کے ویکسین کے نتائج سے پتہ کیا چلے گا؟, جیمز گیلیگھر، ہیلتھ اینڈ سائنس کے نامہ نگار

    یونیورسٹی آف آکسفورڈ کی بنائی ہوئی ویکسین کے آج پہلے نتائج متوقع ہیں۔

    یہ اس پہلے مرحلے کی تحقیق کے نتائج ہوں گے جس میں ایک ہزار کے قریب رضاکاروں نے شرکت کی ہے۔ یہ لوگوں پر کیے جانے والے سب سے پہلے کلینیکل ٹرائلز ہیں۔

    اس کا بنیادی مقصد یہ ہے کہ اس بات کو یقینی بنایا جائے کہ یہ زیادہ افراد کو محفوظ طریقے سے دی جا سکتی ہے۔

    لیکن ہو سکتا ہے کہ ہمیں ’جیب‘ (jab) کی وجہ سے مدافعت کے نظام کا ردِ عمل بھی پتہ چلے کہ آیا اس کی وجہ سے اینٹی باڈیز بنتی ہیں یا یہ مدافعت کے نظام کے دوسرے حصوں کو متحرک کرتا ہے۔

    آج جو ہمیں نہیں پتہ چلے گا وہ یہ ہے کہ کیا یہ ویکسین ’کام‘ کرتی ہے، مطلب یہ کہ کیا اس سے آپ انفیکشن سے بچتے ہیں یا یہ کم از کم علامات کو کم کرتی ہے۔

    اس کے لیے ٹرائلز میں بہت زیادہ افراد کو شامل کرنے کی ضرورت ہے اور ان ممالک میں بھی جہاں برطانیہ سے کہیں زیادہ کورونا وائرس کے متاثرین موجود ہیں۔

19. 20 جولائی 2020عید پر خیرات ، آلائشیں اورقربانی کی کھالیں اکھٹی کرنے کے لیے ہدایات و ضابطہ اخلاق جاری

    پاکستان کے صوبہ خیبر پختونخوا میں حکام نے عید الاضحٰی کے موقع پر خیرات، آلائشیں اورقربانی کی کھالیں اکھٹی کرنے کے لیے ہدایات و ضابطہ اخلاق جاری کیا ہے۔

    تفصیلات کے مطابق:

    • وہ ادارے/ تنظیمیں جن پرUNSCR 1267 کے تحت پابندی عائد کی گی ہے۔ اُسی نام یا تبدیل شدہ نا م سے کھالیں اکٹھی نہیں کر سکتیں۔
    • وہ ادارے جو دہشتگردی ایکٹ 1997 کے تحت دہشتگرد قرار پا چکے ہیں کسی قسم کی عوامی سرگرمیوں میں حصہ نہیں لے سکتے۔
    • وہ خیراتی تنظیمیں جو قربانی کی کھالیں اکھٹی کرنا چاہتی ہیں وہ۔ ڈپٹی کمشنر کے دفتر میں درخواست دے سکتی ہیں۔ جس میں رجسٹریشن سرٹیفیکٹ، پچھلے سال کی NOC اور بیان حلفی جس میں اقرار نامہ کہ UNSCR 1267 کے تحت کالعدم تنظیموں میں اس کا شمار نہ ہو، کا شامل ہونا ضروری ہے۔
    • ڈپٹی کمشنر اسی درخواست پر 5 دن کے اندر فیصلہ کرنے کا مجاز ہوگا۔ اور NACTA SOPs کو مد نظر رکھتے ہوئے اجازت دینے کا مجاز ہوگا۔
    • فیصلے پر اعتراض کی صورت میں درخواست کنندہ نظر ثانی درخواست ۲ دنوں کے اندر اندر ڈسٹرکٹ انٹیلیجنس کوارڈینیشن کمیٹی کو داخل کرنے کا مجاز ہوگا۔
    • متعلقہ ڈویژنل کمشنر کمیٹی کے فیصلے پر دو دنوں کے اندر نظرثانی کرنے کے مجاز ہوں گے۔
    • تمام زیر سماعت درخواستیں 5 دنوں کے اندر اور عید سے 5 دن پہلے مندرجہ بالا طریق کار کے مطابق نمٹایا جائے گا۔
    • ڈپٹی کمشنر ایسی جگہوں کو مختص کریں گے جہاں عوام قربانی کی کھالیں جمع کرسکتے ہیں۔
    • وہ خیراتی تنظیمیں جن کے پاس ڈپٹی کمشنر کے جاری شدہ سرٹیفیکٹ ہوں ان مخصوص جگہوں سے کھالیں اکھٹی کر سکتی ہیں۔ لیکن ان کے پاس اجازت نامہ اور شناختی کارڈ ہونا لازمی ہوگا۔
    • اس سلسلے میں کھالوں کو جمع کرنے کے لیے کسی قسم کا کیمپ یا بینر لگانا ممنوع ہے۔
    • کھالوں کو اکھٹا کرنے کے لیے کسی کو زبردستی مجبور نہیں کیا جائے گا۔ خلاف ورزی کی صورت میں اینٹی ٹیررازم ایکٹ 1977 کے تحت کاروائی کی جائے گی۔
    • ضلعی انتظامیہ اور پولیس اتھارٹی ویڈیو کے ذریعے ایسی جگہوں کو چیک کرے گی تا کہ کوئی کالعدم تنظیم اس میں شامل نہ ہو۔
    • کھالوں اور عطیات جمع کرنے کے لیے لاؤڈ سپیکر کا استعمال ممنوع ہے۔ خلاف ورزی کرنے پر قانون کے مطابق کارروائی کی جائے گی۔
    • ضلعی انتظامیہ، پولیس اتھارٹی اسی سلسلے میں پولیس اور ریونیوسٹاف کی سپیشل ڈیوٹیاں لگا کر غیر قانونی کھالیں اکھٹی کرنے والوں کی روک تھام کریں۔
    • کاروباری حضرات اس بات کو یقینی بنائیں کہ کھالوں کو اسی جگہ سے خریدیں جہاں قانونی طور پر کھالیں اکھٹی کرنے کی اجازت ہو۔
    • ہر قسم کا اسلحہ لے جانے پر پابندی ہوگی۔ ( ہوم ڈپارٹمنٹ کی طرف سے تمام اجازت نامے عارضی طور منسوخ تصور ہوں گے۔

20. 20 جولائی 2020سکاٹ لینڈ: وبا کی وجہ سے کانٹیکٹ ٹریسنگ سینٹر بند

    سکاٹ لینڈ میں ایک کانٹیکٹ ٹریسنگ سینٹر توجہ کا مرکز اس وقت بنا جب اس کے عملے کے چھ اراکین میں کورونا وائرس کا نتیجہ مثبت آیا۔

    سائٹل کا، جو کووڈ۔19 کو سرحد کے جنوب کی طرف پھیلنے سے روکنے کے لیے این ایچ ایس انگلینڈ کے لیے کال سینٹر چلاتا ہے، کہنا ہے کہ اسے مدرویل کے ایک علاقے میں اپنی ایک سائٹ پر ’مقامی وبا کے پھیلاؤ‘ کا علم ہے۔ ڈپٹی فرسٹ منسٹر جان سوینے نے بی بی سی ریڈیو کے پروگرام گڈ مارننگ سکاٹ لینڈ میں بتایا کہ سائٹ کو اب بند کر دیا گیا ہے۔

    انھوں نے کہا کہ ’وسیع پیمانے پر کانٹیکٹ ٹریسنگ‘ جاری ہے، اور معلوم کرنے کی کوشش کی جا رہی ہے کہ ان لوگوں کے کن کن سے رابطے ہوئے تھے۔