کورونا: امریکہ میں کیلیفورنیا کے بعد فلوریڈا سب سے زیادہ متاثرہ ریاست بن گئی

لائیو کوریج

1. 23 جولائی 2020خیبر پختونخوا میں سیاحوں کو علاقہ چھوڑنے کے لیے 24 گھنٹے کا نوٹس

   ایبٹ آباد, گلیات ڈویلپمنٹ اتھارٹی اور ضلعی انتظامیہ نے گلیات میں موجود سیاحوں کو 24 گھنٹے میں علاقہ چھوڑنے کا حکم دے دیا ہے۔

   صوبائی حکومت کی جانب سیاحتی مقامات میں سیاحوں کے داخلے پر مکمل پابندی عائد کر رکھی ہے۔

   گلیات میں سیاحوں کی موجودگی کے حوالے سے اطلاعات کے بعد انتظامیہ نے گلیات کے کچھ ہوٹل اور ریسٹ ہاوس مالکان کو 24 گھنٹے کے اندر اپنی عمارتوں کو خالی کروانے کے احکامات دیے جا چکے ہیں۔

   گلیات ڈویلپمنٹ اتھارٹی اور ضلعی انتظامیہ گلیات میں موجود سیاحوں اور صوبائی حکومت کے احکامات کی خلاف ورزی کرنے والوں کے خلاف سخت کاروائی عمل میں لانے کا اعلان کر دیا۔

2. 23 جولائی 2020امریکہ میں متاثرین کی تعداد 40 لاکھ کے قریب

   جان ہوپکنزیونیورسٹی کے مطابق امریکہ میں کورونا وائرس سے ہونے والی انفیکشنز کی تعداد چالیس لاکھ کے قریب پہنچ گئی ہے۔

   وائرس کی وجہ ہلاکتوں کی تعداد بھی 1 لاکھ 43 ہزار سے زیادہ ہو چکی ہے۔

   روئٹرز کی طرف سے دیے جانے والے مختلف اعداد و شمار میں بتایا گیا ہے کہ اوسطً ہر گھنٹے میں 2 ہزار 600 متاثرین رپورٹ کیے جاتے ہیں، جو کہ دنیا میں سب سے زیادہ شرح ہے۔

   نیو یارک میں، جہاں امریکہ میں وبا نے سب سے زیادہ نقصان پہنچایا تھا، ابھی بھی ملک میں سب سے زیادہ متاثرین اور ہلاکتیں رپورٹ ہو رہی ہیں۔

   لیکن فلوریڈا اور ٹیکساس کی طرح کی جنوبی ریاستوں میں بھی حالیہ ہفتوں میں انفیکشن کی شرح تیزی سے بڑھی ہے۔

   کیلیفورنیا، جو کہ امریکہ کی سب سے زیادہ آبادی والی ریاست ہے، پہلے ہی کیسز کی تعداد کے حوالے سے نیو یارک سے آگے ہے۔

3. 23 جولائی 2020بریکنگ, خیبر پختونخوا میں مزید 11 ہلاکتیں

   پاکستان کے صوبہ خیبر پختونخوا میں مزید 145 افراد میں کورونا وائرس کی تصدیق ہوئی ہے جبکہ 11 افراد ہلاک ہو گئے ہیں۔

   صوبے میں متاثرین کی کل تعداد 32898 ہو گئی ہے جبکہ ہلاکتیں بڑھ کر 1169 ہو گئی ہیں۔

   گذشتہ 24 گھنٹوں مںی ہونے والی ہلاکتیں 6 پشاور، 4 ایبت آباد اور ایک کرک میں ہوئی۔

   مزید 894 افراد وبا سے صحت یاب بھی ہوئے ہیں۔ صوبے میں صحت یاب ہونے والوں کی تعداد 26607 ہو گئی ہے۔ اس وقت صوبے میں ایکٹو کیسز کی تعداد 5122 ہے۔

4. 23 جولائی 2020جہاں سکیورٹی فورسز کورونا وائرس سے زیادہ ’مہلک‘

   یوگینڈا میں سکیورٹی فورسز نے کورونا وائرس کی وبا کو پھیلنے سے روکنے کے لیے لاک ڈاؤن کی پابندیوں کو نافذ کرتے ہوئے مبینہ طور پر اب تک 12 افراد کو ہلاک کر دیا ہے۔

   ابھی تک ملک میں وائرس کی وجہ سے کوئی ہلاکت رپورٹ نہیں ہوئی ہے، لیکن ایک ہزار سے زیادہ متاثرین کی تصدیق ہو چکی ہے۔

5. 23 جولائی 2020کورونا وائرس لاطینی امریکہ کے فوٹو فیسٹیول میں ایک بڑا موضوع

   کورونا وائرس کی عالمی وبا اس سال نیو یارک میں ہونے والے برونکس ڈوکیومینٹری سینٹر کے لاطینی امریکی فوٹو فیسٹیول کا ایک بڑا موضوع رہا ہے۔

   اس فیسٹیول میں ایوارڈ یافتہ کیریبیائی اور لاطینی امریکی فوٹو گرافر حصہ لیتے ہیں۔

   وبا کی وجہ سے اس فیسٹیول کو میلروز کے علاقے میں آؤٹ ڈور منتقل کرنا پڑا ہے۔

6. 23 جولائی 2020امیتابھ بچن نے کورونا منفی ہونے کی خبر کی تردید کر دی

   امیتابھ نے سوشل میڈیا اور کچھ نیوز چینلز پر امیتابھ بچن کے کورونا کے ٹیسٹ منفی ہونے کی خبر کی تردید کی ہے۔

   ایسی ہی ایک ٹی وی رپورٹ کو ٹویٹ کرکے ، انہوں نے لکھا ، ’... یہ خبر غلط، غیر ذمہ دارانہ ، دھوکہ دہی اور ناقابل تصور جھوٹ ہے۔‘

   امیتابھ اور ان کے بیٹے ابھیشیک بچن 11 جولائی سے ممبئی کے ناناوتی اسپتال میں داخل ہیں۔

   امیتابھ بچن نے اپنی ٹویٹ کے ذریعے ہی اپنی صحت سے متعلق معلومات فراہم کیں۔

   انھوں نے لکھا کہ ’کوڈ انڈر 19 کے لیے میرا ٹیسٹ مثبت آیا ہے، مجھے ہسپتال میں داخل کرایا گیا ہے۔ خاندان کے باقی افراد کا بھی کورونا ٹیسٹ ہوا ہے‘

   77 سالہ امیتابھ بچن گذشتہ پانچ دہائیوں سے بالی ووڈ سے وابستہ ہیں اور اب تک دو سو سے زیادہ فلموں میں اداکاری کرچکے ہیں۔ اسی کے ساتھ ہی ان کے بیٹے ابھیشیک اور بہو ایشوریا نے اب تک قریب پچاس فلموں میں اداکاری کی ہے۔

   امیتابھ بچن اور ان کے بیٹے ابھیشیک بچن کے بعد اداکارہ ایشوریا رائے بچن اور ان کی بیٹی ارادھیا میں بھی کورونا مثبت پایا گيا لیکن جیا بچن کی رپورٹ منفی آئی۔

   ابھیشیک بچن نے ٹویٹر پر ایشوریا اور ارادھیا کے بارے میں معلومات دیتے ہوئے کہا کہ ان دونوں نے خود کو الگ الگ کرلیا ہے۔

7. 23 جولائی 2020کورونا وائرس: ایمریٹس مسافروں کا طبی خرچہ اٹھائے گی

   ایمریٹس دنیا کی پہلی ایئر لائن بن گئی ہے جس نے یہ گارنٹی دی ہے کہ اگر اس کے کسی مسافر میں کورونا وائرس کی تشخیص ہوئی تو وہ اس کا طبی خرچہ برداشت کرے گی۔

   دبئی میں قائم کمپنی نے جمعرات کو کہا ہے کہ وہ اس سے قطع نظر کہ مسافر کس کلاس میں بیٹھا ہے کووڈ۔19 کے طبی اخراجات اور قرنطینہ کا خرچہ ’مفت‘ اٹھائے گی۔

   اس نئی پالیسی کے تحت جو 31 اکتوبر تک چلے گی، کورونا وائرس کے ٹیسٹ مثبت آنے والے مسافروں کو کسی بھی کلاس میں 1 لاکھ 74 ہزار ڈالر طبی اخراجات کے طور پر دیے جائیں گے یا پھر قرنطینہ کے دو ہفتوں کا خرچہ 100 یورو یومیہ دیا جائے گا۔

   ایمریٹس کے صدر نے اس ماہ بتایا تھا کہ وبا کی وجہ سے کمپنی اپنے 60 ہزار کے عملے میں سے 9 ہزار نوکریاں ختم کر رہی ہے۔

8. 23 جولائی 2020بریکنگ, سندھ میں مزید 36 افراد کورونا کے باعث ہلاک

   وزیراعلیٰ سندھ سید مراد علی شاہ کے مطابق گزشتہ 24 گھنٹوں میں کورونا کے مزید 36 مریض جان کی بازی ہار گئے ہیں۔ سندھ اب تک وبا کے باعث ہلاکتوں کی تعداد 2096 ہوگئی ہے۔

   وزیراعلیٰ سندھ کے مطابق گذشتہ 24 گھنٹوں میں 9804 ٹیسٹ کیے گئے جن میں 670 کورونا کے نئے کیسز سامنے آئےآ

   اب تک سندھ میں 686505 ٹیسٹ ہوچکے ہیں اور صوبے بھر میں سامنے آنے والے متاثرین کی تعداد 115883 ہوچکی ہے۔

   گذشتہ 24 گھنٹوں میں 3176 مریض صحتیاب ہوئے جس کے بعد اب تک صحتیاب ہونے والوں کی تعداد 99402 ہوگئی ہے۔

   سندھ میں اس وقت 14385 مریض زیر علاج ہیں، جن میں 13641 گھروں میں اور 59 مراکز پر ہیں۔ اس وقت 685 مریض مختلف اسپتالوں میں زیر علاج ہیں، 440 مریضوں کی حالت تشویش ناک ہے جن میں 70 مریض وینٹی لیٹرز پر ہیں۔

9. 23 جولائی 2020ایران میں گذشتہ 24 گھنٹوں میں 221 ہلاکتیں

   ایران نے گذشتہ 24 گھنٹوں میں کورونا وائرس کے 2 ہزار 621 متاثرین اور 221 ہلاکتوں کی تصدیق کی ہے۔

   اس سے ایران میں کورونا وائرس سے ہونے والی ہلاکتوں کی کل تعداد 15 ہزار 74 ہو جاتی ہے اور جن لوگوں میں وائرس مثبت آیا ہے ان کی تعداد 2 لاکھ 84 ہزار 34 ہو جاتی ہے۔

   ایران میں حالیہ دنوں میں انفیکشنز میں اضافے کی دوسری لہر آئی ہوئی ہے۔ اپریل کے وسط میں وہاں کچھ پابندیوں میں نرمی لائی گئی تھی۔

10. 23 جولائی 2020دوسری جنگ عظیم کے بعد آسٹریلیا کی معیشت کو سب سے بڑا جھٹکا

    آسٹریلیا کی معیشت کورونا وائرس کے وبا کی بڑی قیمت ادا کر ہی ہے جہاں دوسری جنگ عظیم کے بعد آسٹریلیائی بجٹ کو سب سے بڑا خسارہ برداشت کرنا پڑا۔

    آسٹریلوی حکومت نے کہا کہ اس کا بجٹ خسارہ ساٹھ ارب ڈالر ہے۔ آسٹریلیا کے وزیر خزانہ جوش فریڈن برگ نے کہا کہ اس نقصان سے بحالی میں برسوں لگیں گے۔

    عالمی مالیاتی بحران نے بھی آسٹریلیا کو اتنا نقصان نہیں پنہنچایا تھا اور وہ اس دوران کساد بازاری سے بچ گیا تھا۔ لہذا ، اسے بعض اوقات 'معجزہ' معیشت بھی کہا جاتا ہے لیکن اب آسٹریلیا تقریبا تین دہائیوں کے دوران پہلی مرتبہ کساد بازاری کا شکار نظر آتا ہےگ

    آسٹریلیا میں کورونا وائرس کا سب سے زیادہ پھیلاؤ میلبورن میں دیکھا گیا۔ یہاں اگلے چار ہفتوں کے لیے ایک بار پھر لاک ڈاؤن نافذ کردیا گیا ہے۔

    میلبورن ریاست وکٹوریہ کا دارالحکومت ہے، جہاں آج انفیکشن کے 403 نئے کیس سامنے آئے ہیں۔ یہاں گھر سے باہر جانے والوں کے لیے ماسک لازمی قرار دیا گیا ہے۔

    ایک روز قبل ہی وکٹوریا میں ایک ہی دن ریکارڈ 484 نئے واقعات رپورٹ ہوئے تھے، جو اس وبا کے آنے کے بعد آسٹریلیا کے لیے بدترین دن تھا۔

    تاہم ، دوسرے ممالک کے مقابلے میں آسٹریلیا میں ایسے معاملات کم ہیں۔ اب تک یہاں 133 افراد لقمہ اجل بن چکے ہیں اور متاثرہ افراد کی تعداد 13،300 ہے لیکن میلبورن میں کیسز میں اضافے کے ساتھ ہی آسٹریلیا کا گراف ایک بار پھر اوپر جاتا ہوا نظر آتا ہے۔

11. 23 جولائی 2020وینٹیلیٹر کیسے کام کرتا ہے؟

    کورونا وائرس انسانی جسم میں نظام تنفس کو شکار کرتا ہے جس سے سانس لینے میں دشواری پیدا ہوتی ہے۔ جن مریضوں میں مدافعتی نظام کمزور ہوتا ہے انہیں مصنوعی سانس دینے کے لیے وینٹیلیٹر کی ضرورت پڑتی ہے۔

    جانیے کہ یہ مشین کام کیسے کرتی ہے؟

12. 23 جولائی 2020جھارکھنڈ: ماسک نہ پہننے پر 2 سال جیل ، 1 لاکھ روپے جرمانہ

    انڈیا کی ریاست جھارکھنڈ میں ماسک پہننا لازمی قرار دیا گیا ہے۔ اس کی خلاف ورزی کرنا اب جرم ہوگا۔ ماسک نہ پہننے پر لوگوں کو زیادہ سے زیادہ دو سال قید یا 1 لاکھ روپے جرمانہ یا دونوں سزاییں دی جائیں گی۔

    کابینہ کی جانب سے 'جھارکھنڈ متعدی وبائی بل' کے منظور ہونے کے بعد یہ نیا قانون نافذ ہوگیا ہے۔

    ریاستی وزیر اعلی ہیمنت سورین حکومت نے بدھ کی شام کو یہ اطلاع دی۔

    انھوں نے کہا ، ’حکومت کو بعض اوقات سخت فیصلے کرنے پڑتے ہیں۔ ہماری کابینہ نے یہ فیصلہ کورونا کے پھیلاؤ کے باعث کیا ہے۔ میری اپیل ہے کہ لوگ ماسک کے بغیر گھر سے باہر نہ نکلیں۔ ورنہ قانون اپنا کام کرے گا۔ یہ نظام ہر عام اور خصوصی پر لاگو ہوگا۔‘

    جھارکھنڈ میں ، 6000 سے زیادہ افراد کورونا سے متاثر ہوئے ہیں۔ 60 سے زیادہ افراد کی ہلاکت بھی ہوئی ہے۔

    بدھ کے روز جھارکھنڈ اسمبلی کے سابق اسپیکر اور سابق وزیر سی پی سنگھ مںی بھی کورونا کے ٹیسٹ بھی مثبت پائے گئے۔

    دریں اثنا ، کچھ ایم ایل اے کو کورونا سے متاثر ہونے کے بعد جھارکھنڈ قانون ساز اسمبلی کا سکریٹریٹ تین دن کے لیے بند کردیا گیا ہے۔

13. 23 جولائی 2020لاطینی امریکہ کی تازہ ترین صورتحال کیا ہے؟

    لاطینی امریکہ دنیا کے سب سے زیادہ متاثرہ خطوں میں سے ہے اور یہاں اب تک مجموعی طور پر 40 لاکھ سے زیادہ متاثرین کی تصدیق ہو چکی ہے۔

    • برازیل خطے کا وہ واحد ملک نہیں جہاں بدھ کو ریکارڈ متاثرین سامنے آئے، بلکہ ارجنٹینا میں بھی 24 گھنٹوں میں 5782 متاثرین سامنے آئے جو وہاں کی ریکارڈ تعداد ہے۔
    • کولمبیا کے دارالحکومت بوگوٹا میں مختلف علاقوں میں باری باری لاک ڈاؤن لگایا جا رہا ہے۔ وہ سات علاقے جہاں دو ہفتوں سے لاک ڈاؤن ہے، اب انھیں آج سے اپنی زندگیاں دوبارہ شروع کرنے کی اجازت ملے گی جبکہ پانچ دیگر علاقوں میں آج سے لاک ڈاؤن کر دیا جائے گا۔ یہ نظام وائرس کو قابو میں رکھتے ہوئے معیشت کو بحال کرنے کے لیے بنایا گیا ہے۔
    • پیرو میں نظامِ صحت متاثرین کو علاج فراہم کرنے کی جدوجہد میں مصروف ہے تاہم مریضوں کے زبردست دباؤ کی وجہ سے وہاں طبی عملے کو مشکلات ہیں۔ کئی مریضوں کو ہسپتالوں کے باہر خیمے لگائے دیکھا گیا جبکہ کچھ مریضوں کو ان کی گاڑیوں میں ہی آکسیجن لگائی جا رہی تھی۔

14. 23 جولائی 2020روس میں ایک دن میں چھ ہزار کے قریب نئے متاثرین

    روس میں گذشتہ 24 گھنٹوں کے دوران کورونا وائرس کے پانچ ہزار 848 نئے متاثرین سامنے آئے ہیں جبکہ 147 مزید ہلاکتیں رپورٹ کی گئی ہیں۔

    نئے اعداد و شمار گذشتہ روز کے پانچ ہزار 862 متاثرین سے ذرا ہی کم ہیں جبکہ گذشتہ روز 165 اموات ریکارڈ کی گئی تھیں۔

    روس میں اب ہلاکتوں کی تعداد 12 ہزار 892 ہوچکی ہے جبکہ یہاں مصدقہ متاثرین کی تعداد سات لاکھ 95 ہزار 38 ہوچکی ہے۔

15. 23 جولائی 2020اسلام آباد کے کورونا آئی سی یو وارڈ سے بی بی سی کی خصوصی رپورٹ

    پاکستان میں ڈاکٹروں اور دیگر طبی عملے کو کورونا وائرس سے متاثرہ مریضوں اور ان کے اہلخانہ کی جانب سے دھمکیوں کا سامنا رہا ہے۔

    طبی عملے کے مطابق ملک میں کورونا وائرس کی علامات کو چھپایا جاتا ہے اور اسے بدنامی سمجھا جاتا ہے۔ کئی لوگ اب بھی اسے جھوٹ قرار دیتے ہیں، اور کچھ کے خیال میں ڈاکٹر مریضوں کو مار رہے ہیں۔

    بی بی سی کی نامہ نگار فرحت جاوید اور موسیٰ یاوری کو اسلام آباد کے سرکاری اسپتال پمز کے کورونا آئی سی یو میں خصوصی رسائی دی گئی۔

    انھوں نے وہاں تعینات ڈاکٹروں سے ملاقات کی جو وائرس کے ساتھ ساتھ افواہوں کے خلاف بھی لڑ رہے ہیں۔

16. 23 جولائی 2020چینی کمپنی کی کورونا ویکسین رواں سال کے آخر تک تیار ہونے کا امکان

    چین کے سرکاری میڈیا کا کہنا ہے کہ ایک چینی دواساز کمپنی کی تیار کردہ کورونا کی ویکسین رواں سال کے اواخر تک تیار ہو سکتی ہے۔

    چائنا نیشنل فارماسیوٹیکل گروپ (سائنو فارم) کے چیئرمین لیو جنگژین نے کہا کہ انسانوں پر اس دوا کی آزمائش اگلے تین ماہ میں مکمل ہونے کی توقع ہے۔

    سائنو فارم کے یونٹ چائنا نیشنل بائیوٹیک گروپ نے خبردار کیا تھا کہ چونکہ چین میں انفیکشن کی تعداد میں کمی ہو رہی ہے اس لیے اسے آزمانے کے لیے لوگوں کی کمی ہے، جس سے ویکسین کی تیاری میں دیر ہو سکتی ہے، تاہم اب اسے متحدہ عرب امارات سمیت دیگر ممالک میں آزمایا جا رہا ہے۔

    یاد رہے کہ ایک اور چینی کمپنی سائنوویک بائیوٹیک کی بنائی گئی ویکسین کو لوگوں پر برازیل میں آزمایا گیا تھا۔

17. 23 جولائی 2020اسرائیل: 'گرینڈ کورونا لا' نامی متنازع قانون منظور کر لیا گیا

    اسرائیل نے ایک متنازع نئے قانون کی منظوری دے دی ہے جس کے تحت حکومت کورونا وائرس سے نمٹنے کے لیے نئی پابندیاں عائد کر سکتی ہے جبکہ پارلیمان اس پر صرف محدود نگرانی ہی کر سکے گی۔

    'گرینڈ کورونا لا' کہلانے والے اس قانون کے ذریعے کابینہ فوری نوعیت کی تصور کی جانے والی پابندیاں عائد کر سکے گی اور پارلیمان 24 گھنٹے گزرنے کے بعد ہی اس فیصلے پر نظرِثانی کر سکے گی۔

    اپوزیشن ارکان نے اس قانون کو جمہوریت مخالف قرار دیا ہے جبکہ حکومت کا کہنا ہے کہ اسے بحران سے نمٹنے کے لیے اس قانون کی ضرورت ہے تاکہ اپنا اختیار مستحکم کیا جا سکے۔

    حالیہ ہفتوں میں اسرائیل میں روزانہ ایک ہزار سے زیادہ متاثرین سامنے آ رہے ہیں جبکہ بے روزگاری ریکارڈ سطح تک پہنچ گئی ہے۔

    منٹوں کے نوٹس پر شٹ ڈاؤن کے فیصلوں اور امدادی پیکج میں تاخیر پر عوام میں غصہ ہے۔ ہزاروں لوگوں نے حالیہ دنوں میں سڑکوں پر احتجاج کرتے ہوئے وزیرِ اعظم نیتن یاہو سے استعفے کا مطالبہ کیا ہے۔

18. 23 جولائی 2020کورونا وائرس: برازیل میں ایک روز میں 67 ہزار نئے متاثرین سامنے آ گئے

    گذشتہ ایک روز میں برازیل میں کورونا وائرس کے متاثرین کی تعداد میں ریکارڈ اضافہ ہوا ہے اور 67 ہزار نئے متاثرین سامنے آئے ہیں۔

    وزارت صحت نے اسی دورانیے 1300 کے قریب اموات ہوئی ہیں۔ 22 لاکھ سے زیادہ مصدقہ متاثرین کے ساتھ برازیل اس وقت امریکہ کے بعد دنیا کا دوسرا سب سے زیادہ متاثرہ ملک ہے۔

    برازیل میں اس وائرس سے چھوٹے قصبے اور دور دراز کے علاقے بھی متاثر ہو رہے ہیں جہاں کم ہی طبی سہولیات ہیں اور صدیوں سے وہاں رہائش پذیر مقامی آبادیاں اس کا نشانہ بن رہی ہیں۔

19. 23 جولائی 2020یورپ میں تازہ ترین صورتحال کیا ہے؟

    • فرانس غربت کی سطح پر موجود 70 لاکھ لوگوں کو بار بار قابلِ استعمال ماسک مفت میں فراہم کرے گا۔ وزیرِ صحت اولیویئر ویرن نے کہا کہ چار کروڑ کے قریب ماسک دیے جائیں گے کیونکہ 'فرانس ماسک حاصل نہ کر سکنے والے لوگوں کو بے یار و مددگار نہیں چھوڑے گا۔'
    • پرتگال میں گوشت کے ایک کارخانے کو 34 ملازمین کا کورونا ٹیسٹ مثبت آنے پر بند کر دیا گیا ہے۔
    • یورپ میں گوشت کے کارخانوں سے منسلک وبا کی سب سے بڑی لہروں میں سے ایک جرمنی کی مغربی ریاست نارتھ رائن ویسٹفیلیا سے تعلق رکھتی تھی۔ وہاں کے وزیر صحت کا کہنا ہے کہ اس وبا سے 2119 لوگ متاثر ہوئے تاہم کسی کی ہلاکت نہیں ہوئی۔
    • اٹلی کی حکومت نے کورونا وائرس کی وجہ سے مشکلات کی شکار اپنی معیشت کی بحالی کے لیے 25 ارب یورو (29 ارب ڈالر) کے معاشی منصوبے کی منظوری دے دی ہے۔ یہ اس حکومت کی جانب سے تیسرا کورونا پیکج ہے اور یورپی یونین کی جانب سے گرانٹس اور قرضوں کی مد میں 209 ارب یورو ملنے تک یہ معیشت کو سہارا دے سکے گا۔
    • بیلجیئم میں گذشتہ ہفتے یومیہ متاثرین کی تعداد میں 91 فیصد اضافہ دیکھا گیا ہے چنانچہ حکام کا کہنا ہے کہ پابندیاں اٹھائے جانے کا فی الحال کوئی امکان نہیں ہے۔
    • سپین میں کورونا وائرس کے متاثرین کی تعداد دوبارہ بڑھ رہی ہے اور اب مرض پھیلنے کی شرح 1.3 تک پہنچ گئی ہے۔ بدھ کو 730 نئے متاثرین سامنے آئے جو گذشتہ ہفتے کے مقابلے میں دو گنا تعداد ہے۔

20. 23 جولائی 2020کورونا پابندیوں کے دوران چائے بسکٹ، کتابوں اور ہوم ڈیلیوری پر اضافی خرچ