Илк қора танли аёл губернатор, илк очиқча гей сенатор ва илк мусулмон сенатор – АҚШ оралиқ сайловларидаги асосий лаҳзалар

Демократлар АҚШ Конгрессининг ҳар икки палатаси — Сенат ва Вакиллар палатасида ғалаба қозониб, Доналд Трамп президентлигининг қолган даврида Конгресс устидан назоратни қўлга киритди.

Овозларни санаш ҳали тўлиқ якунланмаган бўлса-да, дастлабки натижалар демократларга ғалабани нишонлаш, уларнинг рақиблари — республикачиларга эса мағлубиятдан афсусланиш учун етарлича асос берди.

Ҳозиргача сайловнинг бир қатор муҳим воқеалари маълум бўлди. Улар орасида АҚШ тарихида илк бор юз берган ҳодисалар ҳам бор.

Жеффрис тарихий ғалабадан сўнг «Американинг буюк қайтиши» ҳақида гапирди

Демократлар икки йил аввал Трамп ишончли ғалаба қозонган штатларда ҳам устун келди. Жумладан, Техас, Канзас, Огайо ва Жанубий Каролинада сайловчилар овози сезиларли даражада демократлар фойдасига ўзгарди.

Ғалабани олқишлаган Демократик партия етакчилари орасида Вакиллар палатасидаги демократлар раҳбари Ҳаким Жеффрис ҳам бор. Энди у Конгресс қуйи палатаси спикери лавозимини эгаллаши кутилмоқда.

«Бугун Американинг буюк қайтиши бошланмоқда», — деди у тарафдорлари олдида сўзга чиқиб.

Агар Вакиллар палатасидаги демократлар Жеффрисни партия фракцияси раҳбари сифатида сақлаб қолса, у республикачилар вакили Майк Жонсон ўрнига палата спикери бўлади.

Ал-Сайид АҚШ тарихидаги биринчи мусулмон сенатор бўлди

Абдул Ал-Сайид Мичиган штатидаги кескин кураш кечган сайловда ғалаба қозониб, АҚШ Сенатига сайланган тарихдаги биринчи мусулмон бўлди.

Унинг ғалабаси Мичиганнинг Сенатдаги ушбу ўрни демократлар қўлида қолишини англатади.

Ал-Сайид республикачилар номзоди Майк Рожерсни мағлуб этди. Сайлов арафасида Рожерс кутилмаганда Демократик партиянинг дастлабки саралаш сайловида Ал-Сайидга рақиб бўлган сиёсатчининг қўллаб-қувватловига эришган эди.

Мичигандаги сайлов кампанияси оралиқ сайловларнинг энг кескин ва муросасиз курашларидан бири бўлди.

Трамп 2001 йил 11 сентябрдаги террорчилик ҳужумларини тилга олиб, ҳеч қандай далил келтирмасдан Ал-Сайидни ҳатто «жиҳодчи» деб атади.

Бу баёнот кескин норозиликларга сабаб бўлди ва Трамп исломофобияда айбланди.

Би-би-си мухбири Нада Тавфиқнинг ёзишича, Ал-Сайид ғалабасини нишонлаш учун саҳнага чиққан пайтда тарафдорлари қувончдан ҳайқириб юборган. Оломон орасида юзлаб одамлар телефонларини кўтариб, тарихий лаҳзани тасвирга олган.

Трамп мухолифатни «яхши иш» билан табриклади

Сайлов оқшоми давомида Трамп АҚШнинг бир қатор оммавий ахборот воситаларига интервью берди.

У бу сафар муросага мойил оҳангда гапириб, демократлар «яхши иш» қилганини тан олди.

Трамп сайлов натижаларини қабул қилишини ва мухолифат партияси билан ҳамкорлик қилишга тайёрлигини айтди.

Шу билан бирга, президент демократлар илгари сурадиган қонун лойиҳаларига вето қўйиш ваколатини сақлаб қолади.

Трамп сайловда қатнашган айрим республикачилар номзодларидан ўзини узоқлаштиришга ҳаракат қилди.

«Айрим ҳолларда сайловчиларга номзодлар ёқмади, айрим ҳолларда эса бу номзодлар менинг дўстим эмас эди», — деди у.

Трамп АҚШ ва Исроилнинг Эронга қарши уруши ҳам сайлов натижаларига таъсир қилганини тан олди. Уруш АҚШда истеъмол товарлари нархининг ошишига сабаб бўлган.

«Эрон ҳам омиллардан бири бўлди», — деди президент.

Мейн штатида узоқ йиллик сенатор Коллинз мағлубиятини тан олди

Мейн штатидан 30 йил давомида Сенат аъзоси бўлиб келган республикачилар вакили Сюзан Коллинзнинг мағлубияти партия сайловда қанчалик катта йўқотишларга учраганини кўрсатади.

У демократлар номзоди Трой Жексонга ютқазди.

Аввал дарахт кесувчи бўлиб ишлаган Жексон ўзининг оддий меҳнаткаш оиладан чиққанини таъкидлаб, Мейн штатидаги ишчилар синфи вакилларининг овозини қозонишга ҳаракат қилди.

АҚШ оммавий ахборот воситалари тарқатган баёнотда Коллинз мағлубиятини тан олди ва 30 йил давомида Мейн штатига хизмат қилиш «ҳаётидаги энг катта шараф» бўлганини айтди.

Коллинз сайлов арафасида ўз ўрнини йўқотиш хавфи энг юқори бўлган республикачилардан бири ҳисобланган.

У сайлов кампанияси давомида ўзини Трампдан узоқроқ тутишга ҳаракат қилди, аммо бу тактика иш бермади.

Би-би-си мухбири Ҳелена Ҳамфрининг хабар беришича, Коллинз тарафдорлари сайлов натижаларини кутиб йиғилган тадбирда тушкун кайфият ҳукм сурган.

Тадбирда рамзий маънога эга Closing Time — «Ёпилиш вақти» қўшиғи янграган.

Республикачиларнинг анъанавий таянчи бўлган Техас демократлар қўлига ўтди

Жеймс Таларико АҚШ Сенатига, Жина Инохоса эса Техас штати губернаторлигига сайланиши билан демократлар штат миқёсида иккита йирик ғалабага эришди.

Шу тариқа, демократлар қарийб икки авлод давомида Техасда кетма-кет учраб келган мағлубиятларига чек қўйди.

Би-би-си мухбири Гари О'Донохюнинг ёзишича, сайлов кечасида дастлабки натижалар эълон қилиниши билан Таларико тарафдорлари қувончдан ўзларини қўярга жой тополмай қолган.

Улар бир-бирини қучоқлаб, ўпиб, ичимликлар билан ғалабани нишонлаган. Кўпчилик бундай натижага эришиш мумкинлигига ҳатто ишонишга ҳам журъат этмаган эди.

Жина Инохоса Техас тарихида губернаторликка сайланган биринчи лотин америкалик аёл бўлди.

Демократлар бошқа штатларда ҳам тарихий натижаларга эришди.

Жумладан, Канзасда Адам Ҳамилтон кескин кураш кечган сайловда Сенат ўрнини қўлга киритди.

Шу тариқа, Канзас қарийб бир асрдан бери илк бор Сенатга демократ вакилни сайлади.

Кейша Ланс Боттомс АҚШдаги биринчи қора танли аёл губернатор бўлди

Атланта шаҳрининг собиқ ҳокими, демократ Кейша Ланс Боттомс Жоржия штати губернаторлиги учун сайловда ғалаба қозонди.

У Жоржия тарихида губернаторликка сайланган биринчи қора танли шахс ва биринчи аёл бўлди.

Би-би-си мухбири Карл Насманнинг хабар беришича, демократлар ғалабаси маълум бўлиши билан уларнинг тарафдорлари орасида мислсиз қувонч бошланган.

Бундан аввал штатнинг собиқ сенатори партия бу йилги имкониятларига «кўнгил айнийдиган даражадаги ҳаяжон билан оптимистик» қараётганини айтган эди.

Боттомс республикачилар номзоди, миллиардер тадбиркор ва соғлиқни сақлаш соҳаси раҳбарларидан бири Рик Жексонни мағлуб этди.

Жоржияда сўнгги 20 йилдан ортиқ вақт давомида демократ губернатор бўлмаган эди.

Штатнинг бошқа бир ҳудудида эса демократ сенатор Жон Оссофф ҳам диққат марказида бўлган кескин сайловда ғалаба қозониб, иккинчи муддатга сайланди.

Энди Оссоффнинг 2028 йилги президентлик сайловида қатнашиш эҳтимоли ҳақидаги тахминлар янада кучайиши мумкин.

Агар у президентликка номзодини қўйса, Демократик партиянинг асосий даъвогарларидан бири бўлиши мумкинлиги айтилмоқда. Бироқ Оссофф ҳозирча бундай режаси борлигини рад этиб келмоқда.

Крис Паппас АҚШ Сенатига сайланган ўз гейлигини очиқ эътироф этган биринчи эркак бўлди

Демократ Крис Паппас ҳам тарихий натижага эришди. У АҚШ Сенатига сайланган илк очиқча гей эркак бўлди. Паппас Нью-Ҳэмпшир штатидаги ғалабасини саҳнада турмуш ўртоғи билан бирга нишонлади.

Паппас сайловда республикачиларнинг собиқ сенатори Жон Сунунуни мағлуб этди. Сешанба куни у рақибига миннатдорлик билдириб, шундай деди:

«Жон Сунунунинг Ню-Ҳэмпшир халқига қилган хизматлари учун барчамиз ундан чуқур миннатдор бўлишимиз керак».

46 ёшли Паппас 2019 йилдан бери Ню-Ҳэмпшир штати номидан АҚШ Вакиллар палатасида фаолият юритиб келган. Аммо Сенатга сайланиш учун курашиш мақсадида у Вакиллар палатасига қайта сайланишдан воз кечганди.

Сайлов кечасида яна бир тарихий натижа Флорида штатида қайд этилди.

Доналд Трампнинг қатъий қўллаб-қувватловига эришган республикачи Байрон Доналдс Флорида тарихидаги биринчи қора танли губернатор бўлди.

Бу ғалаба республикачилар учун умуман олганда оғир кечган сайлов оқшомидаги саноқли қувончли натижалардан бири эди.