Oson ish Ўзбекистон учун қанчалар муҳим? - Видео

Ўзбекистон ҳукумати йил бошида Oson ish платформасини ишга туширди. Аммо бугунга келиб Камбағалликни қисқартириш ва бандлик вазирлиги ўтказган сўров ҳам ҳали кўплаб ўзбекистонликлар ушбу онлайн макон орқали иш топиши мумкинлигидан бехабарлар.

Ўзбекистондек ҳар икки йилда мустақил ҳаётга бир миллион ёш ўғил-қиз қадам қўяётган мамлакатда аҳоли бандлигини таъминлаш ўта муҳим вазифа ҳисобланади.

2026 йил 1 июл ҳолатида мамлакат аҳолисининг жами сони 39 миллиондан кўп экани расман эълон қилинди.

Шундан тахминан 15 миллион ўзбекистонлик иқтисодий фаол, яъни меҳнат қилишга лаёқатли ҳисобланади.

2026 йил биринчи ярми якунларига кўра, Ўзбекистонда ишсизлик даражаси 4,5 фоизни ташкил этган.

Бу кўрсаткич йил бошидаги 4,8 фоиздан пасайган.

Бу дегани, расман мамлакатда ишсизлар сони 675 000 атрофида дегани.

Ўзбекистон Бош вазири ўринбосари, Иқтисодиёт ва молия вазири Жамшид Қўчқоров маълумотига кўра, ярим йил давомида 506 минг киши доимий иш билан таъминланган.

Айни пайтда Миграция агентлиги маълумотларига кўра, қарийб 1,4 миллион нафар Ўзбекистон фуқароси дунёнинг қарийб 40 та мамлакатида меҳнат қилмоқда.

Ишсизлар сонига қараганда хориждаги меҳнат мигрантларининг сони икки баравар кўп экани Ўзбекистон меҳнат бозори учун муҳим хулосани кўрсатади: муаммо фақат иш ўринларининг етишмаслигида эмас, балки хориждаги иш ҳақи маҳаллий бозордагидан юқорироқ эканидир.

Шунинг учун ҳатто иш топиш имконияти бўлган фуқаролар ҳам яхши даромад излаб чет элга кетишни афзал кўраяптилар.

Ўз юртида иш топиш истаги

Аммо жуда юқори маош бўлмаса ҳам ўз юртида, оиласи яқинида ишлашни истаган ўзбекистонликлар ўзининг кўнглидаги ишни топишда қийналардилар, бунга мавжуд бўш иш ўринлари ҳақидаги маълумотлар бир жойга йиғилмагани ҳам сабаб бўлган.

Камбағалликни қисқартириш ва бандлик вазирлиги Oson ish платформаси биринчи босқичини ишга туширган, уни янада такомиллаштириш 2027 йилда мўлжалланаётганини хабар қилади.

Oson Ish Ўзбекистон учун муҳим рақамли меҳнат инфратузилмаларидан бири.

У иш излаётганлар, иш берувчилар ва меҳнат бозори ўртасидаги ахборот алмашинувини тезлаштиради.

Меҳнат бозоридаги асосий муаммолардан бири - бўш иш ўринлари мавжуд бўлса ҳам, аҳолининг улар ҳақида етарли маълумотга эга эмаслигидир.

Oson Ish эса вакансиялар ва резюмеларни бир майдонга жамлаб, иш берувчи ва иш изловчини тезроқ учраштириш имконини беради.

Платформада 52 мингдан зиёд вакансия ва 281 мингдан ортиқ резюме мавжудлиги унинг меҳнат бозоридаги аҳамиятини кўрсатади.

Oson Ish платформасида талабалар, битирувчилар ва ёшлар учун махсус вакансиялар ажратилган.

Бу меҳнат бозорига энди кириб келаётган авлоднинг биринчи ишини топишига ёрдам беради.

Oson Ish да ногирон инсонлар учун алоҳида бўлимлар мавжудлиги меҳнат бозорига кенгроқ аҳоли қатламини жалб қилиш имконини беради.

Бу ижтимоий интеграция нуқтаи назаридан ҳам муҳим.

Дунёда бундай платформалар янгилик эмас.

АҚШда Indeed ва LinkedIn, Германияда StepStone, Россия ва МДҲ давлатларида HeadHunter (hh.ru), Қозоғистонда Enbek.kz каби платформалар меҳнат бозорининг муҳим қисмига айланган.

Шу нуқтаи назардан қаралганда, Oson Ish Ўзбекистоннинг миллий рақамли меҳнат платформаси вазифасини бажармоқда.

Унинг афзаллиги шундаки, хизмат маҳаллий меҳнат бозори эҳтиёжлари ва миллий қонунчиликка мослаштирилган.

Платформанинг ҳақиқий аҳамияти фақат рўйхатга олинган вакансиялар сони билан эмас, балки:

Агар Oson Ish шу вазифаларни самарали бажара олса, у келажакда Ўзбекистоннинг меҳнат бозори учун LinkedIn ёки Қозоғистоннинг Enbek.kz порталига ўхшаш стратегик аҳамиятга эга миллий платформага айланиши мумкин.

Шунингдек, Бандлик вазирлиги "Менинг ишим" платформасини ҳам ишга туширди, бу платформа ҳам иш излаётган инсон билан иш берувчи бир-бирларини тез топишларини осонлаштириш мақсадини кўзлаган.

Би-би-си Камбағалликни қисқартириш ва бандлик вазирлиги матбуот котиби Гулноза Алимовадан Oson Ish борлигидан янада кўп ўзбекистонликлар хабардор бўлишлари учун қандай ишлар қилинаяпти деб сўради.

Гулноза Алимова айтишича, тез орада, шаҳарлар кўчаларидаги LED экранларда, постер ва баннерларда платформани кенг тарғиб этиш бошланади.