Shin Iran na son yaƙi ya zama hanyar karya lagon Trump a zaɓe ne?

A cikin 'yan makonni masu zuwa za a gudanar da zaɓe a Isra'ila daba baya kuma a yi a Amurka, zaɓe biyu da za su tantance yadda majalisun dokokin ƙasashen biyu za su kasance.

Dukkan zaɓukan biyu suna nuna alamun cewa yaƙin da ake yi da Iran yana tasiri a kansu.

Yaƙin da Isra'ila da Amurka suka ƙaddamar kan Iran ya janyo hauhawar farashin makamashi a kasuwannin duniya, kuma babu wata alama da ke nuna cewa zai ƙare nan kusa.

A irin wannan yanayi, Sakataren Tsaro a wa'adin farko na gwamnatin Donald Trump ya bayyana a wata hira cewa mafi kyawun manufar Amurka game da Iran ita ce ci gaba da killace ƙasar ta ruwa.

Mark Esper ya shaida wa Fox News cewa killacewa ta ruwa ta fi kyau ƙwarai da "hari ta ƙasa, wanda babu wanda yake so."

Ya ƙara da cewa wata fa'idar ci gaba da killace Iran ta ruwa ita ce tana sa Amurka ta ci gaba da kasancewa a yankin, saboda a ganinsa ficewar Amurka daga yankin zai zama gazawar dabarun siyasa.

Esper, wanda shi ma ya yi aiki a rundunar sojin Amurka kuma ya halarci Yaƙin Tekun Fasha, ya ce killacewar ta ruwa za ta ɗauki lokaci kafin ta fara yin tasiri, amma daga ƙarshe za ta shafi tattalin arzikin Iran da shugabanninta.

Ya ce wannan dabarar daga ƙarshe za ta mayar da Iran kan teburin tattaunawa.

Sai dai ya jaddada cewa domin irin wannan manufa ta yi nasara, dole ne Amurka ta kasance mai haƙuri kuma ta aiwatar da ita cikin daidaito da tsayayyen tsari.

Daya daga cikin muhimman abubuwan da Mark Esper ya faɗa a hirar, a martaninsa ga kalaman jami'an Iran da Isra'ila, ya jawo hankalin masu sauraro kan cewa bangarorin biyu, duk da cewa suna magana da Turanci kuma suna jawabi ga jama'ar Amurka, a zahiri suna magana ne da al'ummomin ƙasashensu.

Ya ce kalaman jami'an Iran, ciki har da Abbas Araqchi, wanda ya rubuta a wani saƙo a dandalin X cewa Iran ma tana da "ayyukan da ba a kammala ba," sun fi kasancewa ga masu sauraro na cikin gida a Iran fiye da komai.

Hakazalika ma game da kalaman Benjamin Netanyahu ga masu sauraro a Amurka cewa yaƙi da Iran zai rage farashin makamashi sosai, in ji Esper.

Esper na ganin cewa waɗannan kalamai ma ba ga Amurkawa aka yi su ba, yana mai nuni cewa an yi su ne ga mutanen da ake sa ran za su je rumfunan zaɓe a Isra'ila mako mai zuwa.

Mene ne burin Tehran: kunyata Trump?

Shugabannin Iran na ƙoƙarin matsa wa Trump lamba ta hanyar ƙara masa matsalolin siyasa a makonnin da suka rage kafin zaɓen tsakiyar wa'adin mulki a Amurka?

Akalla jami'ai biyu "masana" da The Washington Post ta tattauna da su sun ce manufar Tehran ita ce hukunta Trump.

Susannah George ta rubuta a rahotonta cewa daga mahangar jami'an Iran, abin da Donald Trump ya fi damuwa da shi, shi ne hauhawar farashin makamashi har zuwa ranar zaɓe.

Saboda haka, suna ganin cewa har zuwa zaɓen ranar 3 ga Nuwamba, za a iya amfani da matakan da za su haifar da tashin farashin makamashi domin ƙara matsin lamba kan shugaban Amurka, shugaban da yanzu da alama ake ɗora masa alhakin matsalolin tattalin arziki da tsadar rayuwa fiye da kowane lokaci.

Wata wakiliyar Washington Post, wadda ta ambaci jami'an diflomasiyya na yankin da na Yammacin duniya, ta rubuta cewa wasu jami'an Iran na ƙoƙarin ɗora wa Donald Trump nauyin sakamakon ayyukansu.

A cewar jaridar, suna nuna misalin shekarar 1980, lokacin da Jamhuriyar Musulunci ta jinkirta sakin waɗanda aka yi garkuwa da su daga ofishin jakadancin Amurka a Tehran har sai bayan zaɓen shugaban ƙasa domin tabbatar da shan kashin shugaban Amurka na lokacin, Jimmy Carter.

Sabbin kuri'un jin ra'ayi a Amurka sun nuna cewa farin jinin Donald Trump ya sake raguwa, inda kashi 31% kacal suka amince da yadda yake gudanar da mulkinsa.

A binciken da Reuters da Ipsos suka gudanar, an tambayi mutane jam'iyyar da za su zaɓa idan zaɓe zai gudana yanzu.

'Yan Democrat sun kasance a gaba da Republican da tazarar maki 12, inda suka samu kashi 47% na goyon baya.

Yaƙin da ba ya da farin jini a wurin Amurkawa, amma mai amfani ga yaɗa farfagandar Democrat

Yaƙin da Iran ba ya da farin jini tsakanin masu zaɓe a Amurka.

Binciken ra'ayi ya nuna cewa masu zaɓe da yawa na ganin yaƙin ya yi mummunan tasiri ga yanayin tattalin arzikinsu.

Sai dai kamar yadda Associated Press ta ruwaito, rashin jin daɗin jama'a game da yaƙin ya zama wata dama ta siyasa da 'yan Democrat ke amfani da ita kan abokan hamayyarsu na Republican.

Rahoton ya ce 'yan takarar Democrat suna amfani da yaƙin Iran domin haskaka kura-kuran abokan hamayyarsu na Republican a ko'ina cikin Amurka.

A yaƙin neman zaɓen 'yan takara a faɗin Amurka, ɗaya daga cikin abubuwan da suka ja hankalin 'yan jarida shi ne bayyana sau nawa wakilin yankinsu na yanzu a Majalisar Wakilai ya yi amfani da ƙur'arsa wajen share hanya ga yaƙi da Iran.

Rahoton Associated Press ya ce 'yan takarar Democrat sun ambaci yaƙin Iran a zaɓen kujeru hamsin daga cikin kujeru 435 na Majalisar Wakilai, kuma a da yawa daga cikinsu sun yi ƙoƙarin danganta yaƙin da matsalolin tattalin arzikin jama'a.

A ɗaya hannun kuwa, 'yan Republican a wuraren da fafatawar take kusa sun yi ƙoƙarin kauce wa batun yaƙin tare da guje wa bayyana matsaya ta ƙarshe a kansa.

Wani yanki da aka yi amfani da tallace-tallacen talabijin masu adawa da yaƙi a kan wani ɗan takarar Republican shi ne San Diego a California, inda wakilin yankin na yanzu ya faɗi wani abu a farkon yaƙin da za a iya fassara shi zuwa Farsi da cewa "ba za a samu taska ba tare da wahala ba."

An yi amfani da wannan furuci sau da dama a tallace-tallacen da aka yi a kansa, kamar yana yin watsi da wahalhalun tattalin arzikin mutanen California.

Sanatoci biyar na neman a bayyana kuɗin da yaƙin Iran ya lakume

Jaridar Stars and Stripes, mai bayar da labaran sojan Amurka, ta ruwaito yadda sanatocin Democrat biyar suka nemi a sanar a hukumance, yawan kudin da yaƙin Amurka da Iran ya ci.

Sanatocin biyar sun ce sun samu wannan bayani ne a wani taro na sirri, kuma yanzu sun rubuta wasiƙa zuwa Admiral Brad Cooper, kwamandan CENTCOM (Babban Rundunar Amurka ta Yankin Gabas ta Tsakiya), suna neman ya bayyana kudin yaƙin ga jama'a.

Sanata Elizabeth Warren, wadda ta rubuta wasiƙar, a wani saƙo da ta wallafa a dandalin X ta ce, "Amurkawa suna da haƙƙin sanin nawa daga cikin kuɗinsu aka ƙone a yaƙin Trump da Iran."

Sauran sanatoci huɗu da suka sanya hannu a wasiƙar Warren duk 'yan Democrat ne.

Sun bai wa Cooper wa'adin zuwa ranar 2 ga Nuwamba, kwana ɗaya kafin zaɓe, da ya fitar da alkaluman.

Marubucin rahoton ya wallafa alkaluma daban-daban da suka fito daga wurare daban-daban, amma ya rubuta cewa waɗannan alkaluman ba su da cikakken daidaito kuma ba sa ƙunsar dukkan sakamakon yaƙin.

Sai dai wani ƙiyasi daga Ofishin Kasafin Kuɗi na Majalisar Dokokin Amurka ya ce yaƙin ya zuwa yanzu ya ci kudin Amurka dala biliyan 38, kuma wannan adadin bai haɗa da asarar da aka yi a sansanonin sojan Amurka ba.