KAI TSAYE , Abubuwan da ke faruwa a Najeriya da sauran sassan duniya, Alhamis 12/11/2026

Rahoto kai-tsaye

Abdullahi Bello Diginza

1. Mintuna 59 da suka wuceWakilan Amurka za su gana da Putin a Moscow

   Wakilan Shugaba Trump na musamman - Jared Kushner da Steve Witkoff - za su gana da Shugaba Vladimir Putin a birnin Moscow.

   Matakin na zuwa ne bayan sun shiga tsakani a tattaunawar kwana biyu tsakanin wakilan Rasha da na Ukraine a birnin Abu Dhabi.

   Ana sa ran wakilan na Amurka za su gabatar da shawarar faɗaɗa tattaunawa kan yaƙin na Ukraine, ta yadda za a sanya wakilan ƙasashen Turai a ciki.

   Ya zuwa yanzu, Rasha ba ta nuna sha'awar karɓar wannan shawara ba.

   Daga nan, wakilan biyu za su nufi ƙasar Ireland domin ganawa da Shugaban Ukraine, Volodymyr Zelensky, wanda a baya ya shaida wa manema labarai cewa gwamnatinsa ta mayar da hankali wajen samun ci gaba a kan cimma yarjejeniya a cikin wannan shekarar.

2. Sa'a 1 da ta wuceZa a ƙwalla rana a arewacin Najeriya - NiMet

   Hukumar kula da yanayi ta Najeriya ta yi hasashen ƙwalla rana a jihohin arewacin Najeriya.

   Cikin wata sanarwar da ta fitar a shafinta na X, NiMet ta ce za a ƙwalla rana mai zafi a jihohin arewacin Najeriya a ranar Alhamis, 12/11/2026.

   ''Da safiyar wannan rana ana hasashen samun yanayi na bushi da zafin rana a ilahirin yankin'', in ji sanarwar.

   Haka kuma NiMet ta ce wannan yanayi zai ci gaba da ƙaruwa a lokacin da rana ta take, har zuwa yammacin wannan rana.

   Kan haka ne hukumar ta shawarci mazauna yankin su ɗauki matakin kauce wa shigar ranar domin rage hatsarin fuskantar illar ranar.

3. Sa'o'i 2 da suka wuceIran ta sake yin barazanar kashe Trump da Netanyahu

   Mataimakin babban hafsan sojin Iran, Birgediya Janar Kiomars Heidari ya yi barazanar kashe shugabannin Amurka da Isra'ila a wata hira da ya yi a kafar talabijin.

   "Za mu kashe Trump da Netanyahu," in ji babban sojan a cikin wani bidiyo da kamfanin dillancin labaran Iran ya wallafa ranar Laraba.

   A cikin tattaunawar, babban jami'in sojan na Iran ya yi iƙirarin cewa Amurka ta girke jiragen ruwanta na yaƙi a wurin da bai fi nisan kilomita 500 ba daga gaɓar Iran.

   Wannan lamari na zuwa ne bayan da Iran ta kai farmaki kan wasu jiragen ruwan sojin Amurka biyu a ranakun 6 da 7 ga watan Satumba.

   Birgendiya Janar Heidari ya yi iƙirarin cewa a artabun da aka samu na baya-bayan nan tsakanin Iran da Amurka, dakarun Iran sun yi nasarar lalata jiragen yaƙin Amurka 300, sannan sun yi amfani da fasahar zamani wajen kama wasu jiragen.

   Haka nan ya bayyana cewa akwai wasu ɓoyayyun makaman yaƙi na Iran waɗanda ƙasar ke shirin amfani da su matuƙar yaƙin ya tsawaita.

4. Sa'o'i 3 da suka wuceTinubu ya gode wa sarkin Gwandu kan bai wa ɗansa sarauta

   Shugaban Najeriya Bola Tinubu ya taya ɗansa, Seyi Tinubu, murnar samun sarautar Ɗan Zakin Gwandu.

   A ranar Laraba ne Mai Martaba Sarkin Gwandu a jihar Kebbi, Alhaji Muhammadu Iliyasu Bashar, ya naɗa Seyi sarautar a fadarsa.

   Cikin wta sanarwa da fadar shugaban Najeriya ta fitar, Tinubu ya gode wa Sarkin Gwandu da Majalisar Masarautar Gwandu bisa wannan karramawa, wadda Sarkin ya ce ita ce irinta ta farko a tarihin masarautar.

   ''Wannan karramawa ta zarce girmama mutum kaɗai, domin tana nuna dangantakar abota, mutunta juna da kuma haɗin kai da ke tsakanin al'ummomin Najeriya mabambanta'', in ji shi.

   "A matsayina na uba, ina farin cikin ganin an karrama ɗana daga wata fitacciyar masarauta mai dogon tarihi'', in ji Shugaba Tinubu.

   ''Don haka ina gode wa Sarkin Gwandu da mutanen Jihar Kebbi bisa wannan girmamawa da suka yi wa ɗana."

   Ya kuma yabawa ƙoƙarin Seyi wajen hulɗa da matasa, bunƙasa al’umma da kuma ƙarfafa gwiwar jama'a, musamman ta hanyar rawar da yake takawa a ƙungiyar City Boy Movement da sauran shirye-shiryen tallafa wa matasan Najeriya.

   "Sarautar Dan Zaki Gwandu na ɗauke da darajoji irin su jarumtaka, shugabanci da hidima. Ina ƙarfafa shi ya yi rayuwa bisa waɗannan darajoji, ya ci gaba da zama mai tawali'u, kuma ya sadaukar da kansa wajen kyautata rayuwar al'umma.''

   Shugaba Tinubu ya kuma buƙaci Seyi da ya ɗauki wannan sarauta a matsayin kira na ƙara zage damtse wajen bayar da gudunmawa ga ci gaba, zaman lafiya da kuma yi wa Najeriya hidima.

5. Sa'o'i 3 da suka wuceAn kama tsohon babban alƙali da zargin safarar ƙwaya

   An kama wani tsohon babban alkali a ƙasar Bolivia bisa zargin safarar miyagun kwayoyi, bayan da Amurka ta sanya sunansa a jerin mutanen da ta haramta mu'amala da su.

   An kama Aldo Quezada a gidansa da ke birnin Santa Cruz, a gabashin asar.

   A watan da ya gabata ne ya yi murabus daga muƙaminsa na babban alƙali a kotun yankin.

   Shi ne mutum na baya-bayan nan daga ɓangaren shari'a da ya shiga cikin jerin waɗanda ake gudanar da bincike a kansu, saboda zargin suna da alaƙa da ƙungiyoyi masu aikata manyan laifuka.

   A farkon wannan watan, babban alƙalin Kotun Kolin Bolivia da iyalansa sun tsere daga ƙasar, inda suka zargi shugaban ƙasa, Rodrigo Paz—wanda ke samun goyon bayan Amurka - da yunƙurin gallaza masa da kuma yi masa barazana.

6. Sa'o'i 4 da suka wuceAn kafa sabon tarihi a siyasar Amurka

   Jam'iyyar Democrat ta sake samun wani babban nasara a zaɓen tsakiyar wa'adi na Amurka - inda aka sanar da Scott Colom a matsayin wanda ya lashe zaɓen majalisar dattawa a jihar Mississippi.

   Sakamakon—wanda aka sanar mako guda bayan zaɓen—ya nuna cewa ya samu nasara da tazara kaɗan a kan Cindy Hyde-Smith, 'yar jam'iyyar Republican wadda ke riƙe da kujerar.

   Wannan dai shi ne karo na farko da jihar ke zaɓar ɗan jam'iyyar Democrat cikin kusan shekara 40.

   Mista Colom ya gudanar da yaƙin neman zaɓensa ne kan tsadar rayuwa inda ya caccaki sanata Cindy Hyde-Smith kan kalaman da ta yi da ke nuna ta yi watsi da halin da mutane ke ciki.

   Sabon zaɓaɓɓen ɗan majalisar dattawan ya zama baƙar fata na farko da ya lashe muƙamin siyasa a matakin jiha a Mississippi, tun shekarun da suka biyo bayan Yaƙin Basasar Amurka.

7. Sa'o'i 4 da suka wuceSallama

   Masu bin shafin BBC Hausa kai-tsaye barkanmu da safiyar wannan rana ta Alhamis.

   Abdullahi Bello Diginza ke fatan sake kasancewa da ku a daidai wannan lokaci domin kawo muku halin da duniya ke ciki.

   Ku biyo mu a shafukanmu na sada zumunta domin tafka muhawara kan labaran da muke wallafawa.