विश्लेषण, उत्तर प्रदेशच्या निकालाचा अर्थ- बीबीसीच्या भारतीय भाषांचे डिजिटल संपादक मुकेश शर्मा
पंतप्रधान नरेंद्र मोदी उत्त रप्रदेशात सुरुवातीपासूनच मोठा फॅक्टर असल्याचे मी आधीपासूनच म्हणत होतो. ते आता दिसतंय. सात-आठ वर्षे केंद्रात सत्तेत असूनही पंतप्रधान मोदींची लोकप्रियता उत्तर प्रदेशात टिकून आहे.
उत्तर प्रदेशात एखाद्या भागात लोक योगींना ओळखत नसतील, पण मोदींना ओळखतात.
अनेक भागात लोकांना विचारलं गेलं की, तुम्ही कुणाला मत देणार, तेव्हा लोक म्हणत होते की, मोदींना मत द्यायला जातोय. मोदी मोठे फॅक्टर बनलेत.
उत्तर प्रदेशात कायदा-सुव्यवस्थेचा प्रश्न बनला होता. महिलांसाठी विशेषत: हा मुद्दा महत्वाचा बनला होता. यावेळी कुटुंबापासून वेगळं मत महिलांनी दिल्याचं दिसतंय. शक्यता अशी दिसतेय की, कुटुंबातील पुरुषांनी वेगळ्या पक्षाला आणि महिलांनी वेगळ्या पक्षाला मत दिलंय.
दुसरं म्हणजे, हिंदू आणि मुस्लिमांमध्ये ध्रुवीकरण जास्त दिसत नाही. याचं कारण असं असू शकेल की, हिंदूही ओळख लोकांमध्ये आता पूर्णपणे रुजली आहे. त्यामुळे ती वेगळ्या मार्गानं सांगण्याची गरज भासली नसावी. त्यात भाजपच्यामागे राष्ट्रीय स्वयंसेवक संघाचं केडर ठाम उभं राहिल्याचं दिसून आलं. संघटनाच्या पातळीवर संघानं भाजपला मोठी मदत केली.
शेवटी सर्वात महत्वाचं म्हणजे कल्याणकारी योजनांनी योगी आदित्यनाथ आणि भाजपला उत्तर प्रदेशात मोठी मदत केल्याचे दिसतेय.
अखिलेश यादव यांचा समाजवादी पक्ष गेल्या सात-आठ महिन्यात चित्रात आला. मात्र, सीएए असेल किंवा इतर आंदोलनांमध्ये सपा कुठेच नव्हती. तेव्हा सर्व ग्राऊंड काँग्रेसनं तयार केला. मात्र त्या ग्राऊंडचा फायदा सपाला मिळाला. मात्र, मुद्द्यांबाबत स्पष्टता सपामध्ये दिसत नाही.