"په افغانستان کې د ښځو پر کار بنديز د مرستو رسېدو بهير اغېزمن کړی"

په مرستندویه چارو کې د ملګرو ملتونو یوې کارې ډلې یو تازه راپور وايي، په افغانستان کې د ښځو پر کار بندیز په ډېرېدونکي ډول هلته د مرستو د رسېدو بهیر اغېزمن کړی دی.

دغه راپور، چې د کورنیو او نړیوالو نادولتي بنسټونو، ملګرو ملتونو او مدني ټولنې له ۱۴۲ بنسټونو څخه د پوښتنو پر بنسټ چمتو شوی، وايي، د طالبانو د حکومت پالیسۍ نه یوازې د دغو بنسټونو عملیاتي چارې اغېزمنوي بلکې مهمو خدماتو ته د ښځو لاسرسي ته خنډ جوړوي.

بشري مرستو ته د لاسرسي پر موضوع ورټولې د ملګرو ملتونو د هغې کاري ډلې تازه راپور چې په بشري او مرستندويه فعاليتونو کې د ښځو او نارينه وو ګډون او اغېز څاري وايي، په افغانستان کې د بشري مرستو پر بهير او د دغو مرستو پر وېشونکو او ترلاسه کوونکو ټولو د طالبانو د حکومت د محدودوونکو پاليسو اغېز ډېرېږي.

په کورنيو او نړيوالو نادولتي بنسټونو کې د ښځو پر کار بندیز د ۲۰۲۲ کال د ډسمبر پر ۲۴ ولګېد او دری نيمې مياشتې وروسته د ا بنديز د ملګرو ملتونو پر بنسټونو هم پلی شو.

دغه راپور وايي په سروې کې شامل د دغو ۱۴۲ بنسټونو يوازې درېيمه برخه بنسټونو اوس د دواړو ښځينه او نارينه وو کارکوونکو په ګډون کار ته دوام ورکوي، دغو بنسټونو د خپل فعاليت د دوام لپاره د طالبانو د حکومت چارواکو سره خبرې هم جاري ساتلې خو هر ډول اجازه او استثنا په موقتي ډول ورکړل شوې ده.

په راپور کې راغلي چې دغه بنسټونه تر ښځو او نجونو د خپلو مرستو او خدماتو ورسولو لپاره د طالبانو حکومت ته بېلې طرحې هم وړاندې کړې چې ځينې يې منل شوې او له مخې يې د روغتيا په ګډون په ځينو برخو کې ښځينه کارکوونکو ته د کار اجازه ورکړل شوې خو دا هره استنثنا او اجازه موقتي ده.

د راپور له مخې دغو بنسټونو ويلي په ټولو بشري قعاليتونو او د لومړنيو انساني اړتياو په برخه کې له نویو ستونزو او بنديزونو سره مخ شوي چې پر ښځو او د دوی پر ښځينه کارکوونکو يې ناوړه اغېز کړی دی.

د دغو بنسټونو نژدې درېيمې برخې ویلي چې ښځينه کارکوونکو يې د طالبانو د حکومت د امر بالمعروف او نهي عن المنکر د قانون په ګډون د لګول شويو محدوديتونو له امله دندې هم پراېښې او دری برخې بنسټونو ويلي چې اوس يې يوازې نارينه کارکوونکي له دفترونو کار کوي، دغو بنسټونو د بشري مرستو په چارو کې د ښځو پر ګډون د دغو محدوديتونو اغېزې ژورې او اوږدمهاله بللې دي.

که څه هم د طالبانو حکومت دغه تازه راپور ته غبرګون نه دی ښودلی خو له دې وړاندې يې د ښځو پر کار د يو شمېر محدوديتونو په وضاحت کې ويلي چې د ښځو کار ته مناسب چاپېريال برابروي.

د طالبانو حکومت مرکزي وياند ذبيح الله مجاهد د دغو اندېښنو ته په ځواب کې دا هم ويلي وو چې دوی نه غواړي ملګرو ملتونو ته خنډ جوړ کړي خو پرېکړه يې د افغانستان کورنۍ مسئله ده او بايد ټول لوري ورته درناوی وکړي.