You dey view text-only version of dis website wey dey use small data. Check di main version of di website wey get all images and videos.
Latest news updates on Ukraine-Russia war and di big tori dem from around di world.
Na here we go match break for today coverage of wetin dey happun as e concern Russia invasion of Ukraine and all the oda big tori from around di world.
No forget say you fit scroll down to read more on di tori wey you fit don miss today.
Make you join us tomorrow for more coverage on di tori wey dey make headlines around di world.
One group of Nigerian students wey goment evacuate from north-east Ukrainian city of Sumy don arrive Hungary. Di students bin hook for frontline before dia evacuation begin on Tuesday.
Di students bin dey on di road for almost two days.
Reports say dem bin first move dem from Sumy to di Ukrainian central city of Poltava from where dem joine train enter Hungary.
On Thursday, di students meet with representative of di Nigerian embassy for Gyor, for northwest Hungary before dem put dem for anoda train.
One of the students, Samuel Otunla tell BBC say dem bin don travell for about 30 hours. Im express relief after e leave Sumy and add say Nigerian government dey do very good job so far.
Before di evacuation, several Sumy students bin no fit leave di city due to di blockade of the access routes.
In other news, Pharmaceutical company Pfizer dey set to supply Africa top health body with dia coronavirus drug.
Di drug - Paxlovid - dey intended for use soon after symptoms develop for pipo wey dey at high risk of severe disease.
Paperwork for di deal between di Africa Centres for Disease Control and Pfizer now dey in di hands of di African Union legal office - after which dem go make formal announcement, na so Africa CDC director John Nkengasong tok.
Roman Abramovich attempt to sell Chelsea don dey on hold after di oligarch chop sanction from UK government as part of dia response to Russia invasion of Ukraine.
Di Russian put di European champions up for sell after UK parliament bin raise threat of sanctions.
Freezing of Abramovich's assets,wey include Chelsea, mean say di club no go fit sell match tickets.
Di intention of di move na to stop Abramovich from making money from Chelsea.
Season-ticket holders fit still attend games wey dem bin don already buy tickets but di club no go fit sell any more tickets from today.
Chelsea go also dey unable to buy or sell players, or offer new contracts, while di sanctions dey for Abramovich head.
Dem don also close di London club merchandise shop.
You fit read more on di tori for here: Wetin UK sanction on Abramovich mean for Chelsea.
First round of toks between di foreign ministers of Russia and Ukraine don fail to yield progress on ceasefire, na so Ukraine tok.
Speaking after di meeting wey hold for Turkey, Dmytro Kuleba say di demands im Russian counterpart Sergei Lavrov make amount to surrender.
Mr Lavrov meanwhile say im kontri military operation dey go according to plan.
Di toks dey come after Russia bomb children's hospital, which Ukraine say be "war crime".
Officials say three pipo including one pikin die for di attack wey happun for south-eastern city of Mariupol.
Russia launch a full-scale invasion of Ukraine two weeks ago and more than 2.3 million pipo don run comot from di country.
Bombs reportedly dey fall ontop homes for di Black Sea port city of Mariupol again, according to one Telegram post from di city council.
A humanitarian convoy wey dey try reach di south-eastern city don has turn back sake of di fighting, according to one social media post from Ukraine's deputy prime minister, Reuters bin report.
One Ukrainian presidential advisor tok say on social media dat Russia dey deliberately block di evacuation of civilians from di city sake of dem fail to seize di strategically-important port, Reuters tok.
Di south-eastern city don be di site of di fighting. Yesterday, dem bomb one maternity hospital, killing three pipo, wey include one child, Ukrainian officials tok.
Una well done, those wey just dey join us, dis na di summary of di latest happening from Ukraine:
Di Russian and Ukrainian foreign ministers dey meet for di first time since Russia's invasion of Ukraine start, Reuters news agency dey report.
Russian foreign minister Sergei Lavrov and im Ukrainian counterpart, Dmytro Kuleba, dey for Antalya, Turkey.
Di UK goment don sama Chelsea football club's owner Roman Abramovich sanction.
Di Russian billionaire na one of seven Russian oligarchs whose assets don dey frozen.
For one UK Treasury documentwey dem post online, Abramovich dey described as "pro-Kremlin oligarch" wey get close associations to Russian President Vladimir Putin.
Abramovich don previously deny say im get close financial ties wit Putin or the Kremlin.
Ghanaian gold businessman and politician dey trend after he declare interest to buy Chelsea Football Club.
Bernard Antwi Boasiako popular known as Chairman Wontumi say he put in $3.1 Billion dollars bid to own take over affairs for Stamford Bridge.
De popular gold businessman say he go buy Lionel Messi and Christiano Ronaldo make dem play for de Blues.
Social media dey blow over de idea say as African, he make bold move to own English club.
Current owner Roman Abramovich put de club up for sale after Russia-Ukraine war start.
One man don tok about how e find out say Russian attack kill im wife and two pikin dem for Twitter wey show dia dead bodi.
Sarhiy Perebynis tell di New York Times say "I recognize dia luggage and dat na how I find out".
Tetiana Perebyinis and dia two pikin, Mykyta, 18, and Alisa, 9 die for di town of Irpin as dem bin dey try escape. For 2014, di family bin run comot eastern Ukraine to stay fo Kyiv on top di kasala dia between di Ukrainian army and Russian-backed separatists.
Serhiy bin dey take care of im mama wey dey sick before di war start.
And he tell di newspaper say e hear wiiinnn as e bin dey try enta Kyiv, dem force am go Russia to cross enta Poland.
E tell di Russian soldiers for di Poland borde say, "My whole family die for wetin you dey call special operation and we dey call war. Do as you like with me, I no get anytin to lose."
Serhiy write for Facebook for Russians sat wetin im face be like horror feem.
E write say "e dey hard to watch di wife wey you love dey lie down for black bag for ground".
E say also add, "I go go fight for dem to di end".
Ukrainian officials don reveal say seven civilians don die from over night Russian attacks.
Four of di pipo wey die na pikin according to reports.
Authorities reveal say dem bin die for di Kharkiv and Sumy regions.
Officials say overnight attacks by Russia for Sumy region bin kill at least three pipo wey include one 13 year old boy and two women.
Reports say dem bomb residential area and gas pipeline for di area.
While for Kharkiv, four pipo die wey include two small pikin dem according to di Ukrainian State |Emergency Services.
Dem say di bombing for dat side bin hit a residential building near Kharkiv city just afta midnight.
Four pipo dey reportedly killed - of which two na small pikin dem - after Russian forces shell one residential building near di city of Kharkiv for night, na so Ukraine State Emergency Services (SES) tok.
Di attack reportedly take place in di village of Slobozhanske, for south-east Ukraine.
SES add say dem also rush a five-year-old girl wey bin dey injured to hospital for treatment.
Rescuers dey expected to continue search operations today to pull bodies from di rubble.
Fire from bombardment also set a shopping mall ablaze for di heart of Kharkiv - however dem no report any casualties.
Di General Staff of di Armed Forces of Ukraine don post im daily morning update, wia e tok say di Russian advance into parts of Ukraine don slow.
Here na oda tins wey e tok:
Di BBC neva independently verify di statement.
Una welcome. See wetin you need to know about wetin dey happun for Ukraine.
Una good morning.
Una welcome to our live coverage today of tori from around di world.
We go bring una tori from Nigeria, across Africa and di rest of di world.
Di world eye still dey Ukraine afta Russian invade dem.
Nigeria president don extend sympathy to di family of di vigilante members wey bandits brutally murder for Kebbi State northwest Nigeria.
“Dis egregious level of criminality dey shocking”, Muhammadu Buhari tok for inside statement.
Oga Buhari say di killing dey very very sad.
On Monday, 7 March, bandits ambush di vigilante members for Sakaba/Wassagu Local Government Area of di state.
President Buhari also assure Nigerians say im go do evritin to tackle dis kain palava.
Di Nigerian leader don direct security forces to redouble dia efforts to frustrate di operational plans of terrorists even before dem launch attacks.
Kebbi State command tok-tok pesin, Nafiu Abubakar, wey confam di attack say dem neva fit ascertain di number of casualties as dem still dey investigate di mata.
Buhari currently dey London for medical examination.