You dey view text-only version of dis website wey dey use small data. Check di main version of di website wey get all images and videos.
Latest news updates on Ukraine-Russia war and di big tori dem from around di world.
Una welcome to our live coverage today of tori from around di world.
We go bring una tori from Nigeria, across Africa and di rest of di world.
Di biggest tori for di world na still di Russian invasion of Ukraine.
Today na day 12 since President Vladimir Putin send troops enta Ukraine.
We go bring una all di latest wey dey happun wit dat tori as we dey get dem including oda top gist from around di world.
British pipo wey dia presence for Russia no dey essential don get strong advise to consider leaving, UK Foreign Office don tok.
UK Foreign Office say make dem pass through di remaining commercial routes.
Di office also advise dia kontri men make dem travel to Russia.
E advise any British kontri man wey need consular assistance make e call di British Embassy for Moscow.
More informate from Mariupol city council on di postponement of di evacuation from di city.
For one post on Telegram, di council say police dey use loudspeakers to inform residents of di latest information on di evacuation and im postponement.
Di post say negotiations dey happun currently wit Russia over establishing ceasefire and making sure safe humanitarian corridor out of di city dey.
Earlier, both Ukraine and Russia say dem don agree on temporary ceasefire around cities of Mariupol and Volnovakha.
But deputy mayor of Mariupol and one resident for di city both told tell BBC say Russian forces continue dia bombardment.
Samsung and Paypal don become di latest global businesses to change dia operations for Russia.
Samsung wey be di leading supplier of smartphones for Russia go suspend shipments to di kontri "due to current geopolitical developments."
Tori be say Ukraine vice prime minister, Mykhailo Fedorov, wey dey responsible for digital operations, write to Samsung vice chairman to ask di Korean tech giant to temporarily cease supplying services and products to Russia.
“We believe say dis kain actions go motivate di youth and active population of Russia to proactively stop di disgraceful military aggression,” Fedorov tok for letter wey im post on Friday on im Twitter account.
For one statement di South Korea company say e go “continue to actively monitor di complex situation to determine im next steps.”
E neva clear if Samsung shops go close.
Meanwhile, di online payments company Paypal don also close down services for Russia sake of the war.
"Under di current circumstances, we dey suspend PayPal services for Russia," President and Chief Executive Dan Schulman tok for statement. Im add say di company "stand wit international community condemn Russia violent military aggression for Ukraine."
One company tok tok pesin say PayPal go support withdrawals "for a period of time, to make sure say account balances disperse in line wit applicable laws and regulations.”
Ukraine goment officials don bin dey call on PayPal to leave Russia and help dem wit fundraising.
Ukraine don top di medal table on di first day of di Winter Paralympics for Beijing, with three golds and seven medals overall.
Di kontri delegation wey include 20 Athletes travel to China despite di Russian invasion.
Biathlete Grygorii Vovchynskyi na im win Ukraine first medal in di men's sprint. Im dedicate im race to peace in Ukraine.
Dem ban Russian and Belarusian athletes from di competition.
A ceasefire wey Russia and Ukraine agree to allow civilians to leave di city of Mariupol no dey fully observed, di city council tok.
For one message wey dem post on Telegram, di council tok say fighting dey take place for Zaporizhzhia region, wey be say na dia di humanitarian corridor end.
Ukrainian officials dey negotiate with di Russian side to confirm di temporary ceasefire along di entire evacuation route, di message tok.
Russian Formula One driver Nikita Mazepin don chop sack from di Haas team as a result of Russia decision to invade Ukraine.
Haas, wey be US-based outfit, also terminate di contract of dia title sponsor, Russian chemicals company Uralkali.
Mazepin Billionaire papa, Dimitry, na part owner of Uralkali and pady to Russia President Vladimir Putin.
Im papa bin be one of di leading Russian businessmen wey dem invite to meet Putin for Kremlin hours after di invasion began.
Ukraine Deputy Prime Minister Iryna Vereshchuk don warn Russia say make dem no abuse ceasefire.
Vereshchuk tok say make Russia no take advantage of agreed humanitarian corridor to advance dia troops.
She tok say dia goment dey "verify" information say Russian troops dey use di ceasefire to move closer to Ukrainian positions for areas along di evacuation routes.
"We dey use dis channel to evacuate civilians - women and children – and to also deliver humanitarian cargo to pipo wey remain,” she tok.
"Di whole world dey watch.”
Vereshchuk also confirm say di International Committee of Red Cross dey part of di ceasefire tok.
And na dem go head di evacuation columns along di routes wey lead out of di cities wey dem agree on.
Di ceasefire dey place around di cities of Mariupol and Volnovakha from 09:00 -16:00 local time (07:00-14:00 GMT).
Di ceasefire no dey hold at di end of di evacuation route out of Mariupol.
We dey now hear say di city imsef still dey under shelling.
"Russia continue to bomb us and use artillery. E dey crazy," Mariupol deputy mayor Serhiy Orlov tell BBC.
"E no get any ceasefire for Mariupol and e no get any ceasefire all along di route. Our civilians dey ready to escape but dem no fit to escape under shelling."
Ogbonge Tech oga, Elon Musk say e dey important to increase oil and gas output immediately.
Di oga of Tesla wey dey react to di sactions on Russia sake of Ukraine war, say sustainable energy solution no go fit automatically make up for Russia oil and gas export.
Di tweet say: “Hate to say it, but we need to increase oil & gas output immediately. Extraordinary times demand extraordinary measures. Obviously, dis go negatively affect Tesla, but sustainable energy solutions no just fit react automatically to make up for Russian oil & gas exports.”
But Oga Musk no be di only tech boss wey dey worry about di coming scarcity sake of dis war.
Blockchain developer Ser Jeff Garzik also tweet im concerns concerning di economic sanctions as e say dis fit accidentally become “oil and gas embargo.”
Garzik say: “Di economic sactions on Russia dey sufficiently wide sotey dem fit effectively become accidental(?) oil and gas embargo, due to difficulty in paying for 2nd-order service like shipping. Di carve-outs for oil and gas fit punch through di sanctions.”
United States and western kontris impose economic embargo on Russia and dis one mean say dem no go buy anytin wey Russia dey seel and dat include dia oil and gas.
Russia na energy giant and di second largest producer of natural gas for di world.
Di whole of Europe dey heavily depend on Russia to satisfy im need for oil and gas.
Already, Russia don threaten to restrict export of oil and gas.
Di Russian invasion of Ukraine don enta di 10th day. Dis na di recap of di major developments since di invasion begin:
·Di number of civilian casualties still dey unclear but di UN refugee agency tok say more dan one million pipo don run komot from Ukraine since February 24 and millions more dey on di move.
·Di first major Ukrainian city wey fall na Kherson. Di city dey where the Dnieper river meets the Black Sea.
·Russian missiles bin don dey target di capital Kyiv and di second-largest city Kharkiv. One massive armoured convoy approaching Kyiv by road dey currently stalled.
·Di southern port of Mariupol still dey under siege and Russian troops dey head towards anoda port, Odesa – to capture both go cut off Ukraine maritime access.
·Russian troops don also seize di Zaporizhzhia nuclear plant on Friday after dem shell am for hours. Di Zaporizhzhia nuclear plant na di largest for Europe. Di move bin alarm world leaders who tok say di attack fit cause kasala.
·Di Chernobyl plant, di site of di 1986 nuclear accident, also dey under Russian control.
·Ukraine President Volodymr Zelensky don condemn di West for dia refusal to enforce no-fly zone over im kontri. Im tok say "all di pipo wey go die go die because of you".
·Di US and EU don impose sanctions on Russia. Dem freeze Russian assets and target di kontri central bank and President Vladimir Putin and im inner circle. Di rouble don go down sake of di restrictions wey also hit trade, investments and travel.
·Independent media wey include di BBC don suspend dia work in Russia after di kontri approve one draconian law wey go censor reporting of di war for Ukraine.
·Companies like Samsung, Airbnb and Cartier don suspend exports to / or operations for Russia.
Tori bi say dem don invite di United States to speak with Ukraine President United President Volodymyr Zelensky on Zoom.
Zelensky don dey in touch wit President Joe Biden but dis go be di first time di Senate go speak to di Ukraine leader since Russia invade di kontri more dan one week ago.
Last week, Ukraine ambassador to US Oksana Markarova bin meet members of di Senate and tok say her kontri urgently need more supplies to fight Russia.
Di third batch of Nigerians wey run komot from Ukraine war don land for Nigeria.
Di Nigerians in Diaspora Commission (Nidcom) tok say di evacuees land for Nnamdi Azikiwe International Airport, Abuja about 11:50pm local time on Friday.
Dem arrive from Budapest, Hungary.
Some 1.2 million pipo don already run from Ukraine sake of di Russia invasion, according to di latest figures from UN High Commissioner for Refugees.
Over half of dat number don enta Poland wey be Ukraine neighbour.
As of Thursday 3 March, 650,000 bin run to Poland while 150,000 enta Hungary and di rest bin enta into oda European nations.
Moldova, Slovakia and Romania na dem receive di next largest numbers of refugees.
"Many more dey on di move both inside and outside di kontri,” di UNHCR tok.
"Dem dey in need of protection and support. As the situation dey continue to unfold, estimated 4 million pipo fit run away from Ukraine.”
Total population for Ukraine before di invasion na about 44 million.
Na day 10 of Russia invasion of Ukraine - and latest tori be say Russia declare temporary ceasefire inside two Ukrainian cities.
See news lines we dey follow inside dis latest update:
Na Saturday morning we dey so, 5 March and di Russia-Ukraine war don enta di tenth day.
For readers wey just dey join us, dis na di summary of di latest developments:
·Cities around Ukraine dey under heavy pressure from Russian shelling, and dem dey hit civilian targets. Cities for di south of di kontri, wey get access to the Black Sea bin dey face particular pressure, though Russia continue to dey press from di north and east of di kontri as well.
·Ukraine President Volodymr Zelensky don condemn di West for dia refusal to enforce a no-fly zone over. "All di pipo wey go die go die because of you,” im tok.
·Western companies wey dey Russia don dey stop work and some of dem na Microsoft, Samsung, LVMH.
·Meanwhile, independent media firms, wey include di BBC, don suspend work for di kontri after Moscow approve one draconian law censoring reporting of di war for Ukraine.
·Di mayor of Mariupol for southeast Ukraine don appealed for a humanitarian corridor to im city sake of wetin im call "blockade" by Russian forces.
Singapore don tok say dem go impose sanctions on Russia sake of say dem invade dia neighbour Ukraine.
Dem go impose export controls and put financial limits ontop certain Russian bank. Dem go also place restrictions on cryptocurrency transactions and ban financial institutions from providing services wey fit help Russia central bank.
Foreign Minister Vivian Balakrishnan bin tell parliament say Singapore won "act like many oda like-minded kontris to impose appropriate sanctions and restrictions against Russia".
Na di first among regional neighbours wey go enact sanctions, though oda members of di Association of South East Asian Nations don condemn Russia actions.