Ukraine's president, Zelensky say Russian shelling dey affect evacuation for Mariupol

Live Coverage

1. 5 March 2022European peace dey as fragile as ever

   Article Information

   • • Author, Kevin Connolly
     • Role, Europe correspondent, Brussels

   

   Wia dis foto come from, Getty Images

   Na time to stop saying e dey somehow unbelievable say dis fit dey happun for 2022.

   E no dey unbelievable now dan e bin dey for 1914 or 1939.

   Peace always fragile - and wetin dey happun even for di most distant corners of Europe go always affect all of us.

   But to pick out di correct lessons from big moments wen everytin change no dey easy.

   Di question for our generation na weda or not we miscalculate how to handle Russia wen di Soviet Union collapse.

   Western Europe main reaction to di end of di Cold War na to take 30-year holiday from serious defence spending.

   But dis new age of containment go call for much more.

2. 5 March 2022If you just dey join us - Dis na quick recap of wetin don happun, Daniel Semeniworima, Onyinye Chime and Solomon Babatunde dey run dis Saturday morning.

   

   Wia dis foto come from, Getty Images

   If you just dey join our live coverage, we welcome you.

   Di Ukraine conflict na still di biggest tori for world.

   • Russia say e go allow civilians to leave Mariupol and Volnovakha from 07:00 GMT
   • Mariupol - key southern port - don dey under siege by Russian forces for days
   • Earlier, Ukraine president condemn Nato leaders for not putting no-fly zone over im kontri
   • Di no-fly zone bin suppose stop Russian warplanes - but di West say e no want to escalate
   • Russia don ban Facebook, and now dem dey report say dem also block access to Twitter and YouTube
   • More dan 1.2m people don run from Ukraine since di invasion begin, UN say

3. 5 March 2022Good morning and welcome

   Una welcome to a live daily coverage of news around di world.

   Russia invasion of Ukraine wey enta tenth day dis morning still be di biggest news we go dey update you.

   Daniel Semeniworima,Onyinye Chime and Solomon Babatunde go join oda BBC reporters to give you latest update for dis live page.

4. 4 March 2022Good night!

   Na hia we go end today BBC Pidgin Live Page.

   To catch up wit all di tori wey you fit don miss today, make you scroll down di page.

   We go return on Monday 7am wit all di latest tori on Russia-Ukraine war as e dey happun plus oda ogbonge tori around di world..

   Na Jelilat Olawale, Helen Oyibo, Faith Oshoko, Victor Ezeama and Annette Arotiba bring una all di tori from afternoon till dis night.

   Good night.

5. 4 March 2022Russia don launch pass 500 missiles since di invasion start - US

   

   Wia dis foto come from, Reuters

   One senior US defence official don tell tori pipo di way wey Pentagon dey view di main developments wey dey happun for day nine of Russia invasion for Ukraine.

   Here be di main points:

   • Russia don launch pass 500 missiles since di invasion start and 92% of Russian combat power wey dem bin plan before dey for inside Ukraine
   • But di airspace ova Ukraine still dey contested

   • Di main advance of Russian forces go north of Kyiv still dey about 25km outside di city
   • Russian forces now dey around 10km outside di city centres of Chernihiv and Kharkiv

   • For di south, heavy fighting still dey happun for Kherson wey tori be say dey under Russian control, and US no dey position dispute am
   • Fighting dey happun now inside Mykolaiv, for di north-east of Odessa

   • Di US no dey assess say Russians dey Mariupol but Moscow no get plan to surround Mariupol for di north and for di coast

   • Di assault for di Zaporizhizhya nuclear power plant show say Russian invasion dey "reckless" but no radioactive leakage don comot so far for di plant, according to US assessment.

   

6. 4 March 2022Russia media regulator ban Facebook

   

   Wia dis foto come from, Getty Images

   Russia don ban Facebook, according to one tori Russian state-owned news agency RIA Novosti.

   Di tori say di kontri media regulator Roskomnadzor decide to block access to di social media platform.

   Di regulator add say dem don get 26 cases of discrimination against Russian media by Facebook since October 2020, wit access wey dem restrict to state-owned channels like RT and the RIA news agency.

7. 4 March 2022Ukraine invasion: Second batch of Nigerians land Abuja from Poland

   

   Anoda batch of Nigerian student wey dem evacuate di conflict for Ukraine don arrive di Nnamdi International Airport dis evening

   Emergency officials say one hundred and eighty students na dem land from Poland.

   Early dis morning, four hundred and fifty Nigerians bin land di capital from Romania. Dem gatz return on Wednesday but delay bin happun sake of logistics wahala.

   Some of di students wey speak to BBC Pidgin say dia experience dey devasting.

   Yemi Ajayi say im get unforgettable experience as e see pipo dey die from hunger and sake of say dem weak and no fit walk again.

   E also for all im life e neva see wia dem just dey shoot pipo and kill dem anyhow.

   E say im feel happy becos wen e get life, hope dey.

   

8. 4 March 2022China TV rights holder no go show Premier League matches sake of FA support for Ukraine

   

   Wia dis foto come from, Getty Images

   Chinese company wey hold television rights don tell di Premier League say dem no go broadcast top matches for England dis weekend sake of say di league plan to show support for Ukraine, di BBC don discover.

   China na close political ally of Russia, wey don invade Ukraine.

   Di Premier League don say dem “use dia who mind reject wetin Russia dey do" and dem dey ready to show solidarity wit Ukraine.

   "We call for peace and our thoughts dey wit all those wey di war don affect," dem add, wen dem dey announce dia plan earlier diis week.

   Di plan include for captains to wear special armbands in Ukrainian colours, while stadium screens go display 'Football Stands Together' in front of di kontri blue and yellow flag.

   Dem also don tell fans to join "a moment of reflection and solidarity before kick-off for each game".

   Wen we about di refusal of di Chinese company to show matches, di Premier League no gree tok.

   For 2019 China state broadcaster CCTV remove one Arsenal-Manchester City game from dia schedule afta comment wey former Gunners midfielder Mesut Ozil make.

   Ozil bin make social media post about how China dey treat Uighur Muslims.

9. 4 March 2022BBC don suspend operations for Russia for now

   

   Wia dis foto come from, Getty Images

   As we don dey tok since morning, di lower chamber of di Russian parliament say e approve law wey go put pipo for prison for up to 15 years say dem dey spread "fake" information.

   Dem don shut down some independent outlets for Russia while some don stop operation.

   International media houses like BBC and Deutsche Welle now dey restricted.

   Now di BBC director-general don announce di suspension of di of di work of all BBC tori pipo for Russia to follow di law.

   Director General Tim Davies say, "Di law be like say e wan make di process of independent journalism to crime, we no get choice but to suspend di work of all BBC tori pipo and support staff for insde Russia as we dey look dis mata well-well. We go continue to run our BBC News Service for Russian from outside Russia".

   E add say, "Di safety of our staff na di most important and we no dey ready to put dem for criminal prosecution kjust because dem dey do dia jobs.

   "I go like hail dem for dia bravery, determination and professionalism. We dey committed to do accurate, independent information wey dey available to pipo around di world including all di millions of Russians wey dey use our services."

   E conclude say "Our journalists for Ukraine and around di world go continue to report di invasion for Ukraine."

10. 4 March 2022In-fotos: Tears, hugs, shock and oda moments of Nigerian returnees

11. 4 March 2022IGP approve new 'improved' dress code for police women, Police women don dey allowed to dey use small earring and scarf under dia beret

    

    Wia dis foto come from, Getty Images

    Nigeria Inspector General of Police, Usman Alkali Baba don approve new and improved dress codes for women officers.

    Di Police Force inside statement wey di Public Relations Officer Olumuyiwa Adejobi sign say women officers go now dey allowed to dey wear small earrings and scarf under dia berets or cap to complete dia uniform.

    Di IGP say dis development dey in line wit international best practices wey dey address di growing concern for gender mainstreaming and respect for culture and diversity.

    E add say di Nigeria Police workforce get officers wey come from different ethnic, religious backgrounds and plenty women dey di force.

    “Di need to guarantee inclusion, gender mainstreaming, ethnic and religious diversity for di work place for optimum output and professionalism don become important.” E tok.

    Oga Baba add say di dress code dey optional and e ask senior women police officers to ensure compliance wit di approved standard for women police officers wey choose to follow dis dress code.

    Di IGP say kontris like Canada, America, Sweden, Turkey, Australia, UK, among odas also follow for dis dress code mata.

    Dem unveil di dress code for one IGP meeting wit Strategic Police Managers on March 3, 2022.

12. 4 March 2022Before and afta fotos show Russian destruction for Ukraine

13. 4 March 2022'Women dey desperately pass dia babies give border guards'

    

    Wia dis foto come from, Masha

    Women for Ukraine don dey share dia experience about di Russian invasion on Radio 5 Live.

    Vlada wey be 29 years old and don choose to stay for Kyiv wit her mama. Di two of dem dey hide for house.

    She say dem dey “try to support each oda and describe how dem dey feel.”

    “Explosions near us wey make our windows begin shake,” she tok.

    Olesia dey travel to Polish border wit hope say she go find where to stay. She leave behind her 83 year old grandmother for Kyiv.

    “She bin dey worry about us, Olesia tok. So she tell us to go. Even though Kyiv dey safe for now, we no know wetin fit happun later, so we decide to escape.”

    Masha and her 14 year old don become refugees and don relocate go Tel Aviv.

    “We waka go Ukranian border and na terrible night. We see pregnant women, children and elderly wey stand for several hours.”

    “women dey desperate to carry dia children give border guards because dem dey freeze.”

14. 4 March 2022More on Russia-Ukraine war:

    Why is Russia attacking Ukraine?: Why Ukraine be so important for Putin

    RussiaUkraine: How dis war fit end? Five possible ways

15. 4 March 2022Ukraine to Nato: We need more than just una weapons

    

    Wia dis foto come from, MFA of Ukraine/Facebook

    Ukrainian foreign minister Dmytro Kuleba don thank kontris for di Nato military alliance for di weapons and ammunition dem don send to help fight di Russian invasion u say dem need pass dat one.

    "Help us," na wetin im hala for video on Facebook.

    "If you no do, I dey fear say you go need share responsibility for di lives and suffering of civilian Ukrainians wey don die sake of Russian pilots wey dey throw bombs for dem."

    Kuleba say e sure say di time go come for di war wey Europe "go ready to give us anything we need so dat Putin ino go hit reach you" wey go turn Europe to a "nightmare".

    "My hope be say, make e no dey too late".

16. 4 March 2022We dey fight di world first 'dynamic' war - Ukraine cyber chief

    

    Wia dis foto come from, Uknown

    Di Ukraine cyber security authority say di kontri dey fight war for di cyber realm and for ground.

    Dem say dem dey face constant cyber-attacks against dia goment and infrastructure network, wit citizens as well as officials wey don become target.

    State Service of Special Communications Deputy Chairman, Viktor Zhora, say im cyber defence dey stop most attacks - but say dem dey involve for fight against Russia.

    "These two war [wey we dey fight] dey part of dis serious war. Dis dey happen for di first time in history and I believe say cyber war only fit end wit di end of conventional war and we go do everything we fit do to bring dis moment closer."

    As di invasion start, di digital ministry launch di "IT Army of Ukraine", wey don dey focus on Russian targets including attempt to disturb transport and power network.

    Di Telegram group for di army don get 270,000 members - but di ministry estimate say e fit reach as many as 400,000 hackers wey dey fight online for Ukraine.

17. 4 March 2022'Everywia e go, e dey spread love' - Riky Rick memorial

    

    Wia dis foto come from, Getty Images

    Pipo send messages of love and live performances dem boku from hip-hop artistes bin attend di memorial service of di South African rapper Riky Rick wet die last week at di age of 34.

    Dem bin stream am live for YouTube and thousands of pipo attend online.

    DJ Black Coffee bin reveal for di memorial say, "e always tell us say e no go dey here long. E bin know".

    Di ogbonge DJ say Riky Rick no deserve wetin one Sunday newpaper bin do wen dem revea im suicide note to im wife and pikin dem. E say "Everywia e bin go, e dey spread love, e no mata who you be or wia you from come. E sabi how to lift pipo and eyet e bin dey suffer plenti personally."

    Di mood for di memorial bin dey like party as pipo bin dey look for di life and last days of di man wey im real name na Rikhado Makhado.

    Many wey perform credit am with how dem take start dia career and for di stage wey im perform dem write di phrase wey e bin like tok, "We neva die, we multiply".

18. 4 March 2022Ukraine-Russia don plan anoda round of tok-tok dis weekend

    

    Wia dis foto come from, Reuters

    Ukrainian and Russian officials go continue dia tok-tok for di third time dis weekend to try to end di fight-fight wey di Russian invasion cause.

    "Di third leg fit happun tomorrow or di day afta – we dey follow up di mater well-well," Ukrainian presidential advisor Mykhailo Podolyak tok.

    Di first round of tok-tok see officials from both sides meet on di Ukrainian border wit Belarus – wit small breakthrough.

    For di second meeting between officials, Russia agree to di need for temporary ceasefire for humanitarian corridors to allow civilians to escape di fight-fight. But Ukraine say di outcome no be wetin dem dey expect.

    Ukraine President Volodymyr Zelensky bin don request for one-to-one meeting wit Russian President Vladimir Putin, saying dat na di only way to end di war.

19. 4 March 2022Hungary don gree to collect Ghanaian students from Ukraine

    

    Wia dis foto come from, Reuters

    Ghana say Hungary don agree to take some of dia citizens wey run comot from Ukraine so dem go fit continue dia studies for Europe.

    Some universities for Hungary dey open spaces and resources for students wey go pay di same fees as dem bin dey pay for Ukraine, Hungarian authorities tok.

    More dan 1,000 Ghanaian students bin dey live for Ukraine until Russia invade dem last week, and di West African nation done evacuate dia pipo two times so far.

    One 24-year-old computer science student wey arrive Accra on Friday morning tell di BBC say some Ukrainian institutions dey help students complete dia courses online.

    Some 700 Ghanaian students don cross di Ukrainian border into neighbouring kontris, but some no dey willing to return home sake of say dem no dey sure of di future of dia education.

20. 4 March 2022Pakistan bombing kill at least 30 pipo for Shia mosque for Peshawar

    

    Wia dis foto come from, EPA

    At least 30 pipo don die inside bomb blast wey happun for one mosque for di north-western Pakistani city of Peshawar.

    According to di police wey give di informate, more than 50 pipo dey reported to injure for di suspected suicide attack on Shia mosque during di Friday prayers.

    Some of those wey injure dey for critical condition. No group don claim say na dem carry out di attack yet.

    Thousands of pipo don die, most especially, for Pakistani sectarian violence in recent years.

    "I see one man wey shoot two policemen before e enta di mosque. Seconds later I hear one loud noise," one witness Zahid Khan tell AFP news agency reports.

    Di blast scata di windows of nearby buildings. Local pipo dey help carry pipo wey die and injure for dia motor or motorbikes.

    One tok-tok pesin for Peshawar Lady Reading hospital, Muhammad Asim Khan, a spokesman for Peshawar's Lady Reading Hospital. Say dem don declare emergency for di hospital.

    E confam say about 30 deadi bodies dey di hospital.