வங்கக்கடலில் புதிய புயல் உருவாகிறது - தமிழ்நாட்டில் 7 நாளில் எங்கெல்லாம் மழை பெய்யும்?

வங்கக்கடலில் உருவாகியுள்ள காற்றழுத்தத் தாழ்வுப் பகுதி நவம்பர் 15ஆம் தேதி காற்றழுத்தத் தாழ்வு மண்டலமாகவும், நவம்பர் 16ஆம் தேதி புயலாகவும் வலுப்பெற வாய்ப்புள்ளதாக இந்திய வானிலை ஆய்வு மையம் தெரிவித்துள்ளது.

மத்திய அந்தமான் கடல் பகுதிகள் மற்றும் அதனை ஒட்டிய அந்தமான் & நிகோபார் தீவுப் பகுதிகளின் மேல் நிலவும் வளிமண்டல சுழற்சியின் காரணமாக இன்று காலை (13-11-26) 0530 மணி அளவில் தென்கிழக்கு வங்கக்கடல் பகுதியில் ஒரு காற்றழுத்த தாழ்வு பகுதி உருவாகி, காலை 8.30 மணி அளவில் அதே பகுதியில் நிலவுகிறது.

இது வடமேற்கு திசையில் நகர்ந்து, நவம்பர் 14 ஆம் தேதி வாக்கில் ஆழ்ந்த காற்றழுத்த தாழ்வு பகுதியாகவும், நவம்பர் 15 ஆம் தேதி காலை அதே பகுதியில் காற்றழுத்த தாழ்வு மண்டலமாகவும் வலுப்பெறக்கூடும். இது மேலும் வடக்கு- வடமேற்கு திசையில் நகர்ந்து மத்திய வங்கக்கடல் பகுதியில் நவம்பர் 16 ஆம் தேதி மாலை புயலாக வலுப்பெறக்கூடும் என்று கணிக்கப்பட்டுள்ளது.

தமிழ்நாட்டில் 7 நாளில் எங்கெல்லாம் மழை பெய்யும்?

13-11-2026 மற்றும் 14-11-2026: மேற்கு தொடர்ச்சி மலை மாவட்டங்கள் மற்றும் வட கடலோர தமிழகத்தில் ஓரிரு இடங்களிலும், புதுவை மற்றும் காரைக்கால் பகுதிகளிலும் லேசான மழை பெய்யக்கூடும். ஏனைய தமிழகத்தில் பொதுவாக வறண்ட வானிலை நிலவக்கூடும்.

15-11-2026: மேற்கு தொடர்ச்சி மலை மாவட்டங்கள் மற்றும் தென் தமிழகத்தில் ஓரிரு இடங்களில் லேசானது முதல் மிதமான மழை பெய்யக்கூடும். வட கடலோர தமிழகத்தில் ஓரிரு இடங்களிலும், புதுவை மற்றும் காரைக்கால் பகுதிகளிலும் லேசான மழை பெய்யக்கூடும். ஏனைய தமிழகத்தில் பொதுவாக வறண்ட வானிலை நிலவக்கூடும்.

16-11-2026: மேற்கு தொடர்ச்சி மலை மாவட்டங்கள் மற்றும் தென் தமிழகத்தில் ஓரிரு இடங்களில் லேசானது முதல் மிதமான மழை பெய்யக்கூடும். ஏனைய தமிழகம், புதுவை மற்றும் காரைக்கால் பகுதிகளில் பொதுவாக வறண்ட வானிலை நிலவக்கூடும்.

17-11-2026 மற்றும் 18-11-2026: தென்காசி, தூத்துக்குடி, திருநெல்வேலி மற்றும் கன்னியாகுமரி மாவட்டங்களில் ஓரிரு இடங்களில் மிதமான மழை பெய்யக்கூடும். ஏனைய மேற்கு தொடர்ச்சி மலை மாவட்டங்களில் ஓரிரு இடங்களில் லேசான மழை பெய்யக்கூடும். ஏனைய தமிழகம், புதுவை மற்றும் காரைக்கால் பகுதிகளில் பொதுவாக வறண்ட வானிலை நிலவக்கூடும்.

19-11-2026: மேற்கு தொடர்ச்சி மலை மாவட்டங்கள் மற்றும் தென் தமிழகத்தில் ஓரிரு இடங்களில் லேசான மழை பெய்யக்கூடும். ஏனைய தமிழகம், புதுவை மற்றும் காரைக்கால் பகுதிகளில் பொதுவாக வறண்ட வானிலை நிலவக்கூடும்.

சென்னைக்கான வானிலை முன்னறிவிப்பு

இன்று (13-11-2026) மற்றும் நாளை (14-11-2026): சென்னை மற்றும் புறநகர்ப் பகுதிகளில் வானம் ஓரளவு மேகமூட்டத்துடன் காணப்படும். நகரின் ஒருசில பகுதிகளில் லேசான மழை பெய்ய வாய்ப்புள்ளது.

அதிகபட்ச வெப்பநிலை 32-33° செல்சியஸை ஒட்டியும், குறைந்தபட்ச வெப்பநிலை 24° செல்சியஸை ஒட்டியும் இருக்கக்கூடும்.

'வங்கக்கடலில் பலத்த காற்று வீசும்'

இந்தக் காற்றழுத்தத் தாழ்வுப் பகுதியின் தாக்கத்தால் நவம்பர் 13 மற்றும் 14ஆம் தேதிகளில் அந்தமான் கடல் பகுதியிலும், நவம்பர் 13 முதல் 16ஆம் தேதி வரை தென்கிழக்கு வங்கக்கடல் பகுதியிலும் மணிக்கு 40 முதல் 50 கி.மீ. வேகத்திலும், இடையிடையே 60 கி.மீ. வேகத்திலும் பலத்த காற்று வீசக்கூடும்.

நவம்பர் 15 முதல் 17ஆம் தேதி வரை தென்மேற்கு வங்கக்கடல் பகுதியிலும், நவம்பர் 16 மற்றும் 17ஆம் தேதிகளில் மத்திய வங்கக்கடல் பகுதியிலும் மணிக்கு 45 முதல் 55 கி.மீ. வேகத்திலும், இடையிடையே 65 கி.மீ. வேகத்திலும் காற்று வீசக்கூடும் என எச்சரிக்கப்பட்டுள்ளது.

இலங்கையில் கனமழைக்கு வாய்ப்பு

இந்த வானிலை அமைப்பின் நகர்வு காரணமாக நவம்பர் 14 முதல் 16ஆம் தேதி வரை இலங்கையின் பல பகுதிகளில் கனமழை பெய்ய வாய்ப்புள்ளதாக இலங்கை வானிலைத் துறை தெரிவித்துள்ளது.

குறிப்பாக, கிழக்கு மாகாணத்தின் மட்டக்களப்பு, அம்பாறை, திருகோணமலை மாவட்டங்களிலும், வடக்கு, வடமத்திய மற்றும் வடமேற்கு மாகாணங்களிலும் கனமழை பெய்யக்கூடும். சில இடங்களில் திடீர் வெள்ளப்பெருக்கு ஏற்படவும் வாய்ப்புள்ளதாக எச்சரிக்கப்பட்டுள்ளது.

தற்போதைய கணிப்புகளின்படி, இந்த வானிலை அமைப்பு இலங்கையைக் கடந்து செல்லாமல் அதன் கிழக்குக் கடற்கரைக்கு அருகே வடக்கு நோக்கி நகரக்கூடும்.

கடந்த 24 மணி நேரத்திற்கான வானிலை தொகுப்பு

கடந்த 24 மணி நேரத்தில் தமிழகத்தில் ஓரிரு இடங்களில் மழை பெய்துள்ளது. புதுவை மற்றும் காரைக்கால் பகுதிகளில் வறண்ட வானிலை நிலவியது

பதிவான அதிகபட்ச மழை அளவு:

மாம்பழத்துறையாறு (கன்னியாகுமரி) 61.0 மில்லிமீட்டர்

வெப்பநிலை நிலவரம்:

கடந்த 24 மணி நேரத்தில் தமிழகம், புதுவை மற்றும் காரைக்கால் பகுதிகளில் அதிகபட்ச வெப்பநிலையில் பொதுவாக குறிப்பிடத்தக்க மாற்றம் ஏதுமில்லை.

தமிழகத்தில் அதிகபட்ச வெப்பநிலை ஓரிரு இடங்களில் இயல்பிலிருந்து 2-3° செல்சியஸ் வரை உயர்ந்துள்ளது. ஏனைய தமிழகம், புதுவை மற்றும் காரைக்கால் பகுதிகளில் இயல்பை ஒட்டியே இருந்தது.

- இது, பிபிசிக்காக கலெக்டிவ் நியூஸ்ரூம் வெளியீடு