அனிருத் – காவ்யா மாறன் திருமணம்: பிரபலங்களின் விருப்பத் தேர்வாக கிரீஸ் இருப்பது ஏன்?
பட மூலாதாரம், Anirudh Ravichander
இசையமைப்பாளர் அனிருத் ரவிச்சந்தர், சன் டிவி நெட்வொர்க்கின் நிர்வாக இயக்குநர்களுள் ஒருவரான காவ்யா மாறனுக்கும் திருமணம் நடைபெறுகிறது.
நவம்பர் 10, 11 ஆகிய தேதிகளில் இரண்டு நாள் நிகழ்வாகத் திருமணம் நடைபெறுவதாகவும் தமிழக முன்னாள் முதலமைச்சர் மு.க. ஸ்டாலின், நடிகர் ரஜினிகாந்த் உள்ளிட்ட மணமக்களின் நெருங்கிய உறவினர்கள் திருமணத்தில் பங்கேற்பதற்காக கிரீஸ் சென்றுள்ளதாகவும் ஊடகங்களில் செய்திகள் வெளியானது வெளியாகியுள்ளது.
'டெஸ்டினேசன் வெட்டிங்' செய்துகொள்வதற்காக பிரபலங்கள் கிரீஸ் நாட்டைத் தேர்வு செய்வது புதிதல்ல. பிரபலங்களின் விருப்பமான திருமணச் சுற்றுலாத் தலங்களில் ஒன்றாக கிரீஸ் திகழ்வதன் பின்னணியில் பல்வேறு அம்சங்கள் உள்ளன.
கிரீஸ் ஏன் திருமணத்துக்கான சிறந்த இடமாகக் கருதப்படுகிறது?
பட மூலாதாரம், Getty Images
ஐரோப்பிய நாடான கிரீஸ், இயற்கை அழகுக்கும், தொன்மையான வரலாற்றுக்கும் பெயர் பெற்றது.
கிரீஸ் நாட்டில் ஆயிரக்கணக்கான தீவுகள் உள்ளன. அவற்றில் மிகப்பெரியது கிரீட் தீவு. ஏஜியன் கடலில் அமைந்துள்ள பல தீவுகள், கிரீஸ் நாட்டின் முக்கிய அடையாளங்களாகத் திகழ்கின்றன என்று அந்நாட்டின் சுற்றுலா இளையதளம் கூறுகிறது.
வானுயர்ந்த மலைகள், நீண்ட நெடிய கடற்கரைகள், நீல நிறக் கடல் என இயற்கை எழில் கொஞ்சும் நிலப்பரப்புகளை கொண்ட நாடு கிரீஸ்.
இதனால் 'டெஸ்டினேசன் வெட்டிங்' செய்துகொள்வதற்காக உலகம் முழுவதிலுமிருந்து சுற்றுலாப் பயணிகள் அங்கு செல்கின்றனர்.
கிரீஸின் மேற்கத்திய இலக்கியம், கலை, தத்துவம், அரசியல் ஆகியவற்றின் மீது பண்டைய கிரேக்க நாகரிகத்தின் தாக்கம் அதிகம் என்றும் தலைநகர் ஏதென்ஸ் உள்ளிட்ட கிரீஸின் முக்கிய நகரங்களில் காணப்படும் வரலாற்றுச் சின்னங்கள் இதற்குச் சான்றுகளாக உள்ளன என்றும் ஓபன்ஸ்டாக்ஸ் கூறுகிறது.
இரண்டாம் உலகப் போருக்குப் பிறகு, கிரீஸில் பொருளாதார மற்றும் சமூக மாற்றங்கள் வேகமாக நிகழ்ந்தன. சுற்றுலா மற்றும் கப்பல் போக்குவரத்துத் துறைகள் அந்நாட்டின் பொருளாதாரத்தில் முக்கியப் பங்கு வகிக்கத் தொடங்கின.
கிரீஸ் தீவு ஒன்றில் திருமணம் செய்துகொள்ள வேண்டும் என்ற கனவு பல காதல் ஜோடிகளுக்கு இருக்கிறது. இதற்கு 'மம்மா மியா' போன்ற திரைப்படங்களுக்கும் முக்கியப் பங்குள்ளது. அந்தத் திரைப்படம் படமாக்கப்பட்ட கிரீஸின் ஸ்கோபெலோஸ் தீவு சர்வதேச அளவில் கவனம் பெற்றுவிட்டது.
வெளிநாட்டுப் பிரபலங்களின் விருப்பத் தேர்வு
பட மூலாதாரம், Getty Images
கிரீஸின் சான்டோரினி தீவு, வெளிநாட்டுத் தம்பதிகளின் 'டெஸ்டினேசன் வெட்டிங்' விருப்பப் பட்டியலில் முக்கிய இடம்பிடித்துள்ளது.
2018-ஆம் ஆண்டு கோடைக்காலத்தில் மட்டும் ஆயிரத்துக்கும் மேற்பட்ட வெளிநாட்டுத் தம்பதிகள் சான்டோரினி தீவில் திருமணம் செய்துகொண்டதாக கார்டியன் இதழ் செய்தி வெளியிட்டுள்ளது.
திருமணம் மட்டுமின்றி, ஏற்கெனவே திருமணம் செய்துகொண்டவர்கள் தங்களது திருமண உறுதிமொழியை மீண்டும் புதுப்பிப்பதற்காகவும் சான்டோரினிக்கு வருகின்றனர்.
ஆரஞ்சு நிறத்தில் காட்சியளிக்கும் சூரிய அஸ்தமனம், வெள்ளை நிற வீடுகள், எரிமலை வெடிப்பால் உருவான கடல்நீர் நிரம்பிய பள்ளத்தாக்கு ஆகியவை தம்பதிகளை ஈர்க்கும் முக்கிய அம்சங்களாக இங்கு உள்ளன.
கடலைப் பார்த்தபடி அமைந்துள்ள விடுதிகள், தனிப்பட்ட விருந்து ஏற்பாடுகள், திருமண நிகழ்வுகளுக்கான சிறப்பு வசதிகள் ஆகியவையும் இந்தத் தீவின் மீதான ஈர்ப்பை அதிகரித்துள்ளன.
கிரீஸின் அதிகாரப்பூர்வ சுற்றுலா இணையதளமும் சான்டோரினியை வெளிநாட்டுத் தம்பதிகளின் விருப்பமான திருமண மற்றும் தேனிலவுத் தலமாகக் குறிப்பிடுகிறது.
பட மூலாதாரம், Getty Images
குடும்பத்தினர், நெருங்கிய நண்பர்கள் மட்டும் பங்கேற்கும் சிறிய அளவிலான திருமணங்களுக்கு ஏற்ற இடங்களாகக் கிரீஸ் தீவுகள் மாறியுள்ளன.
மணமக்கள் 20 பேருக்கு மிகாமல் நெருங்கிய உறவினர்கள் மற்றும் நண்பர்கள் மட்டும் பங்கேற்கும் சிறிய அளவிலான திருமணங்களை விரும்புகின்றனர். இதனால், கிரீஸ் தீவுகளான மைகோனோஸ், ஃபாபோஸ் போன்ற கொண்டாட்டங்களுக்குப் பெயர்பெற்ற தீவுகளைவிட அமோர்கோஸ், கெஃபலோனியா போன்ற சிறிய, அழகிய தீவுகள் அதிக வரவேற்பைப் பெற்று வருகின்றன என பிபிசி செய்தி கூறுகிறது
ஆனால், வெளிநாட்டில் திருமணம் செய்துகொள்வது அவ்வளவு எளிதல்ல. திருமணம் நடைபெறும் நாட்டின் சட்ட நடைமுறைகள், தேவையான ஆவணங்கள், பருவநிலை, தங்குமிடம், நிகழ்ச்சி ஏற்பாடுகள், செலவுகள் என பலவற்றையும் முன்கூட்டியே திட்டமிட வேண்டும்.
- இது, பிபிசிக்காக கலெக்டிவ் நியூஸ்ரூம் வெளியீடு
