இலங்கையை சேர்ந்தவரை இஸ்ரேல் சுற்றுலாப் பயணி கடலில் தள்ளும் வைரல் வீடியோ – இதுவரை தெரியவந்தது என்ன?

இஸ்ரேலிய சுற்றுலாப் பயணி ஒருவர், இலங்கை சுற்றுலா வழிகாட்டியை படகிலிருந்து கடலுக்குள் தள்ளிவிடும் காணொளி ஒன்று தற்போது சமூக ஊடகங்களில் வேகமாகப் பரவி வருகிறது.

ரஷ்ய அரசு ஊடகமான ஆர்.டி, தனது எக்ஸ் கணக்கில் அந்தக் காணொளியைப் பதிவிட்டு, "ஒரு இலங்கை தொழிலாளி படகிலிருந்து கடலுக்குள் தள்ளிவிடப்படுவதை இஸ்ரேலிய சுற்றுலா பயணிகள் சிரித்தபடி படம்பிடிக்கின்றனர்" என்று குறிப்பிட்டுள்ளது.

ஆனால், இது வெறும் நகைச்சுவைதான் என்றும், அந்த நபரை புண்படுத்தவோ அவமதிக்கவோ தங்களுக்கு எந்த நோக்கமும் இல்லை என்றும் சம்பந்தப்பட்ட சுற்றுலாப் பயணிகள் கூறியதாக ஆர்.டி செய்தி வெளியிட்டுள்ளது. இஸ்ரேலிய பத்திரிகையாளரும் சமூகச் செயல்பாட்டாளருமான டேனியல் அம்ரம் இதனைத் தெரிவித்ததாகவும் அந்தச் செய்தியில் குறிப்பிடப்பட்டுள்ளது.

டேனியல் அம்ரமின் எக்ஸ் கணக்கைச் சரிபார்த்த பிபிசி சிங்கள சேவை, அவர் சம்பந்தப்பட்ட சுற்றுலாப் பயணிகளின் புகைப்படத்தைப் பதிவிட்டு, இந்தக் குறிப்பையும் வெளியிட்டிருந்ததை உறுதிப்படுத்தியது.

அந்தப் பதிவில், " நாங்கள் நல்லவர்கள். இவ்வளவு வெறுப்புக்கு ஆளாக வேண்டியவர்கள் அல்ல" என்று அவர்கள் கூறியதாகக் குறிப்பிடப்பட்டிருந்தது.

என்ன நடந்தது?

இந்தச் சம்பவம் குறித்து பிபிசி சிங்கள சேவை மேலும் விசாரித்தபோது, சம்பந்தப்பட்ட சுற்றுலா வழிகாட்டியான செனுர ரஷ்மிகாவின் சகோதரர் கவிந்துவைத் தொடர்புகொண்டது. சகோதரர்கள் இருவரும் மிரிஸ்ஸா பகுதியில் சுற்றுலாத் துறையில் பணியாற்றி வருகின்றனர்.

அவர் அளித்த தகவலின்படி, இந்தச் சம்பவம் நவம்பர் 8-ஆம் தேதி மிரிஸ்ஸா கடல் பகுதியில் நிகழ்ந்துள்ளது.கொழும்பிலிருந்து சுமார் 150 கிலோமீட்டர் தொலைவில் அமைந்துள்ள இந்த சுற்றுலாத்தலம், வெளிநாட்டு பயணிகளிடையே மிகவும் பிரபலமானது.

"உண்மையைச் சொல்வதென்றால், இது ஒரு தவறான புரிதல். இந்தக் குழுவினரை எங்களுக்குப் பல ஆண்டுகளாகத் தெரியும். 2018-ஆம் ஆண்டு முதல் அந்த இஸ்ரேலியக் குழுவுடன் எங்களுக்குப் பழக்கம் இருக்கிறது. உணவகத்தை அமைக்கவும், படகுகளை வாங்கவும் அவர்கள் எங்களுக்கு உதவினார்கள். எங்கள் உணவகத்திற்குப் பெயர் கிடைப்பதற்கும் அவர்கள்தான் காரணம். ஒவ்வோர் ஆண்டும் அவர்கள் இங்கு வருவார்கள். நாங்கள் சகோதரர்களைப் போலப் பழகுகிறோம்," என்று செனுராவின் சகோதரர் கவிந்து பிபிசி சிங்கள சேவையிடம் தொலைபேசி வாயிலாகத் தெரிவித்தார்.

"அப்போது நாங்கள் காணொளி எடுத்துக்கொண்டு விளையாடிக் கொண்டிருந்தோம். எனது சகோதரர் அவர்களைத் தள்ளினார். இதையடுத்து, அவர்கள் எனது சகோதரனைத் தூக்கிக் கடலில் வீசினர். என்னையும் கடலில் தள்ளினர். நாங்கள் மீண்டும் படகில் ஏறினோம். நாங்கள் நீர் விளையாட்டுகளில் ஈடுபட்டிருந்தோம். அப்போது இந்த வீடியோ எடுக்கப்பட்டது. பின்னர் அந்த வீடியோ ஒரு குழுவில் பதிவிடப்பட்டது" என்றும் அவர் கூறினார்.

"அந்தக் குழுவில் இருந்த ஒருவர் அந்தக் காணொளியை எடுத்து, இதை ஒரு பிரச்னையாக மாற்றிவிட்டார். வேடிக்கைக்காக எடுத்த காணொளி இவ்வளவு பெரிய பிரச்சினையாகிவிட்டது," என்று அவர் தெரிவித்தார்.

பிபிசி தொடர்பு கொண்டபோது, ​​செனூரா சுற்றுலாப் பயணிகள் குழுவுடன் படகுப் பயணத்தில் இருந்ததால், அவரால் நேரடியாகப் பேச முடியவில்லை.

இருப்பினும், அந்தச் சம்பவத்திற்குப் பிறகு செனூரா பதிவுசெய்த ஒரு காணொளியை அவரது சகோதரர் பிபிசிக்கு வழங்கினார்.

அந்தக் காணொளியில், சம்பவத்தன்று தனக்கு நேர்ந்ததை செனூரா பதிவுசெய்துள்ளார்.

"நாங்கள் சமீபத்தில் விருந்தினர்களுடன் ஒரு சுற்றுலாவுக்கு சென்றிருந்தோம். ஒரு சிறிய விஷயம் நடந்துவிட்டது. இதை பெரிதுபடுத்தாதீர்கள். நான்தான் அவர்களைத் தள்ளினேன். இதைப் பெரிதுபடுத்த வேண்டாம். இது போலியான செய்தி. அவர்கள் நீண்ட காலமாக எங்கள் நண்பர்கள். அவர்கள் எங்களை நன்றாக நடத்தினார்கள்." என்று தெரிவித்துள்ளார்.

ரஷ்ய ஒளிபரப்பு நிறுவனமான ஆர்.டி தனது எக்ஸ் பக்கத்தில் வெளியிட்ட காணொளியில், செனூரா படகில் அமர்ந்து பாட்டிலில் தண்ணீர் குடித்துக் கொண்டிருப்பது தெரிகிறது. அப்போது, அவருக்கு அருகில் இருந்த இஸ்ரேலிய சுற்றுலாப் பயணி, அவரைக் கடலுக்குள் தள்ளுகிறார். இதைப் பார்த்த படகில் இருந்த மற்றவர்கள் சிரிப்பதும் காணொளியில் பதிவாகியுள்ளது.

சமூக ஊடகங்களில் பரவும் இந்தக் காணொளியின் திருத்தப்படாத பதிப்பைப் பெற பிபிசி முயற்சித்து வருகிறது. ஆனால் இதுவரை அதைப் பெற முடியவில்லை.

இந்தக் குற்றச்சாட்டுகள் குறித்து பேசுவதற்காக சம்பந்தப்பட்ட சுற்றுலாப் பயணிகளையும் பிபிசி தொடர்புகொள்ள முயன்றது.

செனுராவின் சகோதரர் கவிந்து பிபிசியிடம், அந்தச் சுற்றுலாப் பயணிகள் நவம்பர் 10-ஆம் தேதியான இலங்கையிலிருந்து புறப்படத் திட்டமிட்டிருந்ததாகத் தெரிவித்தார்.

"அவர்கள் புறப்பட்டுச் சென்றிருப்பார்கள்" என்று கவிந்து கூறினார்.

'நாங்கள் இஸ்ரேலுக்குச் சென்று இப்படிச் செய்திருந்தால்?'

இந்தச் சம்பவம் தொடர்பான காணொளி சமூக ஊடகங்களில் பரவியதைத் தொடர்ந்து, அது உள்நாட்டிலும் வெளிநாட்டிலும் பலரது கவனத்தை ஈர்த்தது. அந்த வெளிநாட்டுப் பயணியின் செயலுக்கு சிலர் கடும் கண்டனம் தெரிவித்தனர்.

"நாங்கள் இஸ்ரேலுக்குச் சென்று இப்படிச் செய்திருந்தால், அந்த நாட்டின் சட்டம் எங்கள் மீது பாய்ந்திருக்கும். இந்தச் சம்பவத்திலும் நிச்சயம் சட்ட நடவடிக்கை எடுக்க வேண்டும்" என்று ஒருவர் ஃபேஸ்புக்கில் பதிவிட்டிருந்தார்.

"இதை ஒரு சாதாரண கேலியாகக் கருத முடியாது. கடலின் நடுவே ஒருவரை இப்படி திடீரெனத் தள்ளிவிடுவது, படகின் இயந்திர இறக்கையில் சிக்குவது அல்லது நீரில் மூழ்குவது உள்ளிட்ட காரணங்களால் கடுமையான காயம் அல்லது உயிரிழப்பைக்கூட ஏற்படுத்தியிருக்கலாம்" என்று சிலர் விமர்சித்தனர்.

"இலங்கைப் பண்பாட்டில், ஓர் உயிரினம் உணவு உண்ணும்போதோ தண்ணீர் குடிக்கும்போதோ அதற்கு இடையூறு செய்யக்கூடாது என்று நமக்குக் கற்பிக்கப்படுகிறது. 'நல்ல பிள்ளைகள்' என்று கருதப்படும் ஒரு குழுவினர், தங்கள் பெற்றோரிடமிருந்தோ பெரியவர்களிடமிருந்தோ இதைக் கற்றுக்கொள்ளவில்லை என்பது மிகவும் வருத்தமளிக்கிறது" என்று இலங்கைப் பத்திரிகையாளர் ஒருவர், டேனியல் அம்ராமின் எக்ஸ் பதிவுக்குப் பதிலளித்திருந்தார்.

காவல்துறை விசாரணை

இந்தக் காணொளி சமூக ஊடகங்களில் பரவியதைத் தொடர்ந்து எழுந்த சர்ச்சையை அடுத்து, கொட்டவிலா காவல்துறையினர் இச்சம்பவம் குறித்து விசாரணை நடத்தினர்.

"அந்தச் சுற்றுலாப் பயணிகளை நாங்கள் இங்கு சுற்றுலா காவல்துறையிடம் அழைத்துச் சென்றோம். நாங்கள் நிரபராதிகள் என்றும், விளையாட்டாகத்தான் இதைச் செய்தோம் என்றும் அவர்கள் தெரிவித்தனர்" என்று கவிந்து பிபிசியிடம் கூறினார்.

அந்தச் சுற்றுலாப் பயணிகள் தங்களது நண்பர்கள் என்று அவர்கள் கூறியதாக கொட்டவிலா காவல்துறை செய்தித் தொடர்பாளர் பிபிசி சிங்கள சேவையிடம் தெரிவித்தார்.

இதையடுத்து, இந்தச் சம்பவம் தொடர்பாக மேற்கொண்டு விசாரணை நடத்தப்படாது என்றும் கொட்டவிலா காவல்துறை செய்தித் தொடர்பாளர் தெரிவித்தார்.

- இது, பிபிசிக்காக கலெக்டிவ் நியூஸ்ரூம் வெளியீடு