சௌதியில் மரண தண்டனையை எதிர்கொண்ட இலங்கை தமிழர் சிவராசா அனோஜன் முழுமையாக விடுதலை

பேஸ்புக் பதிவொன்றின் ஊடாக முகமது நபி குறித்து அவதூறாக பேசிய குற்றச்சாட்டின் கீழ் சௌதி அரேபியாவில் மரண தண்டனை விதிக்கப்பட்டிருந்த இலங்கை தமிழரான சிவராசா அனோஜன், அனைத்து குற்றச்சாட்டுகளில் இருந்து விடுதலை செய்யப்பட்டுள்ளதாக இலங்கை அரசாங்கம் அறிவித்துள்ளது.

இவ்வாறு விடுதலை செய்யப்பட்டுள்ள சிவராசா அனோஜனை விரைவில் நாட்டிற்கு அழைத்து வருவதற்கான நடவடிக்கைகள் எடுக்கப்படும் என வெளிவிவகார அமைச்சர் விஜித்த ஹேரத் தெரிவித்துள்ளார்.

சிவராசா அனோஜனுக்கு விதிக்கப்பட்டிருந்த மரண தண்டனையை கடந்த அக்டோபர் மாதம் 14ம் தேதி அந்த நாட்டு உச்ச நீதிமன்றம் ரத்து செய்திருந்த நிலையில், ஏனைய தண்டனைகளிலிருந்து அவர் கடந்த 9ம் தேதி விடுவிக்கப்பட்டிருந்தார்.

இந்த வழக்கு நடவடிக்கைகளை மேற்கொண்டு முன்னெடுத்து செல்வதில்லை என சௌதி அரேபியா அரச வழக்கறிஞர் அலுவலகம் கடந்த 9ம் தேதி தீர்மானித்திருந்ததாக வெளிவிவகார அமைச்சர் மேலும் குறிப்பிட்டுள்ளார்.

இதனடிப்படையிலேயே, சிவராசா அனோஜன் விடுதலை செய்யப்பட்டுள்ளதாக வெளிவிவகார அமைச்சர் விஜித்த ஹேரத் குறிப்பிட்டுள்ளார்.

சிவராசா அனோஜனின் குடும்பத்தினர், வெளிவிவகார அமைச்சர் விஜித்த ஹேரத்தை இன்று மாலை சந்தித்து கலந்துரையாடல்களை நடாத்தியிருந்தனர்.

தனது மகனின் விடுதலைக்காக முன்னின்று செயற்பட்ட ஜனாதிபதி உள்ளிட்ட அரசாங்கத்திற்கு இதன்போது அவர்கள் தமது நன்றியை தெரிவித்திருந்ததாக வெளிவிவகார அமைச்சு வெளியிட்டுள்ள அறிக்கையில் தெரிவிக்கப்பட்டுள்ளது.

அனோஜனின் விடுதலைக்காக ஒத்துழைப்பு வழங்கிய சௌதி அரசாங்கத்திற்கும், அதற்கான ஒத்துழைப்பு வழங்கிய இலங்கை அதிகாரிகள் உள்ளிட்ட தரப்பினருக்கும் அமைச்சர் நன்றி தெரிவித்துள்ளார்.

சௌதியில் அனோஜனை கைது செய்ய காரணம் என்ன?

இலங்கையின் பிரசித்தி பெற்ற முருகன் ஆலயமாக விளங்கும் கதிர்காமத்திற்கு, நாட்டின் வடக்கு பகுதியிலிருந்து குழுவொன்று பாத யாத்திரை சென்றிருந்தது.

இந்த பாத யாத்திரை குழுவுடன், சுப்ரமணியம் என்றழைக்கப்படும் நாய் ஒன்றையும், பாத யாத்திரையில் ஈடுபட்டவர்கள் அழைத்து சென்றிருந்தார்கள்.

கல்முனை பகுதி ஊடாக பாத யாத்திரை பயணித்துக் கொண்டிருந்த தருணத்தில், சுப்ரமணியம் என்றழைக்கப்படும் நாயின் மீது இஸ்லாமிய இளைஞர் ஒருவர் தாக்குதல் நடாத்தியிருந்தார்.

இந்த இளைஞன் நாயின் மீது தாக்குதல் நடாத்தும் புகைப்படமொன்று சமூக வலைத்தளங்களில் பகிரப்பட்டதை தொடர்ந்து, இந்த விடயம் நாட்டில் பாரிய பேசுப்பொருளாகியது.

இந்தநிலையில், குறித்த இளைஞன் மீது நடவடிக்கை எடுக்குமாறு வலியுறுத்தி, போலீஸ் நிலையத்தில் முறைப்பாடுகளும் பதிவு செய்யப்பட்டன.

இவ்வாறு பதிவு செய்யப்பட்ட முறைப்பாடுகளின் அடிப்படையில், குறித்த முஸ்லிம் இளைஞன் கைது செய்யப்பட்டு, பின்னர் பிணையில் விடுவிக்கப்பட்டிருந்தார்.

நாயின் மீது தான் அறியாமல் தாக்குதல் நடாத்தியதாக தெரிவித்த இளைஞன், பொதுமக்களிடம் பகிரங்க மன்னிப்பு கோரியிருந்தார்.

இந்த சம்பவம் தொடர்பிலான விவாதம் சமூக வலைத்தளங்களில் தொடர்ச்சியாக பேசுப் பொருளாகி, பல்வேறு பதிவுகள் பகிரப்பட்டு வந்திருந்தன.

இந்த நிலையில், இந்து மத கடவுளை தவறாக பிரதிபலிக்கும் வகையில் இஸ்லாமிய நபர் ஒருவர் பேஸ்புக்கில் வெளியிட்ட கருத்திற்கு பதிலளிக்கும் வகையில், அனோஜன் முகமது நபியை நிந்திக்கும் வகையிலான பதிவொன்றை வெளியிட்டு, குறுகிய நேரத்தில் அந்த பதிவை அழித்திருந்தார்.

அவ்வாறு அனோஜன் வெளியிட்ட கருத்தை ஸ்கிரின் ஷோட் எடுத்த சிலர், அதனை பகிர்ந்து, மீண்டும் பேசுப் பொருளாக்கியிருந்தனர்.

அனோஜன் பதிவிட்ட பதிவு பின்னரான சந்தர்ப்பங்களில் அரபு மொழியில் மொழி பெயர்ப்பு செய்யப்பட்டு, பகிரப்பட்ட நிலையில், அந்த விடயம் சௌதியில் முறைப்பாடு செய்யப்பட்டது.

சௌதி அரேபியாவில் பணிப்புரிந்து வந்த சிவராசா அனோஜன், இந்த முறைப்பாட்டின் அடிப்படையில் அந்த நாட்டு போலீஸாரினால் கைது செய்யப்பட்டார்.

அவ்வாறு கைது செய்யப்பட்ட அனோஜன், சௌதி அரேபியா நீதிமன்றத்தில் முன்னிலைப்படுத்தப்பட்டு, அவருக்கு ஐந்து வருட கடூழிய சிறைத் தண்டனையும், 3 மில்லியன் ரியால் தண்டப் பணமும் விதித்து அந்த நாட்டு நீதிமன்றம் தீர்ப்பளித்திருந்தது.

இவ்வாறு அனோஜனுக்கு வழங்கப்பட்ட தீர்ப்பை அடுத்து, அவரது பெற்றோர் இலங்கை வெளிவிவகார அமைச்சின் ஊடாக, சௌதி அரேபியாவில் மேன்முறையீட்டை செய்ய நடவடிக்கை எடுத்திருந்தனர்.

இதன்படி, சௌதி அரேபியாவில் மேன்முறையீடு செய்யப்பட்டது. அனோஜனுக்கு மேன்முறையீட்டு நீதிமன்றம் மரண தண்டனையை விதித்து தீர்ப்பளித்திருந்தது.

இவ்வாறு வழங்கப்பட்ட மரண தண்டனையை சவாலுக்கு உட்படுத்தி அந்த நாட்டு உச்ச நீதிமன்றத்தில் மனுத் தாக்கல் செய்யப்பட்ட நிலையில், அவருக்கு விதிக்கப்பட்ட மரண தண்டனையை ரத்து செய்யும் உத்தரவை நீதிமன்றம் கடந்த அக்டோபர் மாதம் 14ம் தேதி வழங்கியிருந்தது.

இவ்வாறு மரண தண்டனை ரத்து செய்யப்பட்டதை அடுத்து, ஏனைய தண்டனைகளிலிருந்து அவர் தற்போது முழுமையாக விடுதலையாகியுள்ளார்.

- இது, பிபிசிக்காக கலெக்டிவ் நியூஸ்ரூம் வெளியீடு