کرینہ کپور کو دیوالی کی تقریب پر آیت الکرسی کے نقش والا شاہی ہار پہننے پر قانونی نوٹس
،تصویر کا ذریعہRhea Kapoor/instagram
بالی وڈ اداکارہ کرینہ کپور خان کو انڈیا کے کانگریس رہنما اور قومی میڈیا کوآرڈینیٹر عباس حفیظ کی جانب سے قانونی نوٹس بھیجا گیا ہے۔ یہ نوٹس اس وجہ سے جاری کیا گیا کہ کرینہ نے اپنی دیوالی کی تقریب کے دوران 30 قیراط کا ایک زمردی لاکٹ پہنا تھا، جس پر قرآنی آیت ’آیت الکرسی‘ کندہ ہے۔
یہ نوٹس نہ صرف اداکارہ کرینہ کپور بلکہ ان کی سٹائلسٹ ریحا کپور کو بھی بھیجا گیا ہے۔
قانونی نوٹس میں سوشل میڈیا پر شیئر کی گئی تصاویر میں قرآنی آیت کی نمائش کے طریقے پر اعتراض کیا گیا ہے۔
نوٹس میں مطالبہ کیا گیا ہے کہ متعلقہ تصاویر، ویڈیوز اور سوشل میڈیا پوسٹس کو حذف کیا جائے، عوامی سطح پر معافی مانگی جائے اور یہ یقین دہانی کرائی جائے کہ مستقبل میں اس مقدس قرآنی عبارت کو ایسے انداز میں پیش نہیں کیا جائے گا جس سے اس کی مذہبی حرمت متاثر ہونے کا خدشہ ہو۔
،تصویر کا ذریعہKareena Kapoor Khan/Instagaram
اداکارہ کرینہ کپور نے دو دن قبل اپنے انسٹاگرام پر دیوالی کی تقریب کے لیے اختیار کیے گئے اپنے شاہی سٹائل کی تصاویر پوسٹ کی تھیں۔
دیوالی کی تقریب میں فلمی دنیا کے متعدد لوگ مدعو تھے، تاہم کرینہ نے اپنے خاص انداز کی تصاویر کو اپنے سوشل میڈیا پر شیئر کیا تھا۔
،تصویر کا ذریعہRhea Kapoor/instagram
انھیں سٹائل کرنے والی ریحا کپور نے خود یہ تصاویر اپنے انسٹاگرام پر پوسٹ کرتے ہوئے لکھا ’حقیقی فلمی ستارہ، حقیقی چاندی، حقیقی خاندانی ورثہ اور حقیقی ذاتی انداز۔‘
End of سب سے زیادہ پڑھی جانے والی
انھوں نے تفصیل بتاتے ہوئے پوسٹ کے ساتھ لکھا کہ ’کرینہ نے پونیت بالانا کی تیار کردہ خالص چاندی کے رنگ کے کافتان اور پگڑی پہن رکھی ہے، جبکہ ان کے ساتھ نوابِ بھوپال کی 200 سال پرانی کلغی اور بیگمِ بھوپال کا 30 قیراط کا زمرد بھی ہے، جس پر آیت الکرسی کندہ ہے۔‘
انھوں نے بتایا کہ یہ زیورات ’بھوپال کے شاہی خاندان کا خاندانی ورثہ ہیں۔‘
مزید وضاحت کرتے ہوئے ان کا کہنا تھا کہ ’یہ تاریخی زیورات سیف علی خان کے خاندان کے ذریعے کرینہ تک پہنچے ہیں کیونکہ سیف کی دادی ساجدہ سلطان، بھوپال کے آخری حکمران نواب کی صاحبزادی تھیں۔‘
،تصویر کا ذریعہANI
قانونی نوٹس میں کیا ہے؟
کانگریس کے ترجمان عباس حفیظ کے وکیل محمد ظفر نے میڈیا کو بتایا کہ ان کے موکل چاہتے ہیں کہ مقدس آیات والی تصاویر کو سوشل میڈیا سے ہٹایا جائے۔
ان کا کہنا تھا کہ ’ہمارا اعتراض اس بات پر نہیں ہے کہ بالی وڈ اداکارہ کرینہ کپور نے ایک لاکٹ پہنا، بلکہ ہمارا اعتراض اس چیز پر ہے جو اس لاکٹ پر نقش ہے۔‘
انھوں نے کہا ’اس پر قرآنِ مجید کی ایک آیت درج ہے، جسے انتہائی مقدس سمجھا جاتا ہے۔‘
’میرے مؤکل اور ہم سب کا یہ ماننا ہے کہ اس سے پوری مسلم برادری کے جذبات مجروح ہوئے ہیں۔‘
وکیل محمد ظفر نے بتایا کہ ’ہماری روایت میں اس آیت کی تلاوت کرنے یا قرآنِ مجید کو چھونے سے پہلے وضو کرنا ضروری سمجھا جاتا ہے۔ ہمارا بنیادی اعتراض اس طریقے پر ہے جس انداز میں اسے سوشل میڈیا پر پیش کیا گیا۔‘
ان کا مزید کہنا تھا کہ ’اسی لیے ہم یہ قانونی نوٹس جاری کر رہے ہیں اور مطالبہ کر رہے ہیں کہ اسے ہٹا دیا جائے۔‘
،تصویر کا ذریعہRhea Kapoor/instagram
’تہواروں کی اصل روح کو کمزور کرنے کی کوشش‘
بی بی سی اردو کی خبروں اور فیچرز کو اپنے فون پر حاصل کریں اور سب سے پہلے جانیں پاکستان اور دنیا بھر سے ان کہانیوں کے بارے میں جو آپ کے لیے معنی رکھتی ہیں
سبسکرائب کرنے کے لیے کلک کریں
مواد پر جائیں
کرینہ کپور کی جانب سے قرآنی آیات کے نقش والا ہار دیوالی کے موقع پر پہننے پر سوشل میڈیا صارفین نے بھی حیرت کا اظہار کیا۔
کرینہ کپور اور ریحا کپور دونوں کی سوشل میڈیا پوسٹس پر صارفین یہ کہتے نظر آئے کہ ’کیا واقعی انھوں نے آیت الکرسی والا لاکٹ پہنا ہے؟‘
فہیمہ نامی صارف نے لکھا ’آیت الکرسی کی بے حرمتی نہ کریں۔ یہ ہماری مقدس کتاب قرآنِ مجید کی آیات ہیں۔‘
ایک طرف قرآنی آیات پہننے پر مذمت کرنے والے ہیں تو دوسری جانب ہندو شائقین بھی معترض ہیں۔
شیتل گپتا نے کہا ’کرینہ کپور دیوالی پر اسلامی طرز کے لباس اور مبینہ طور پر قرآنی آیات سے مزین زیورات پہن کر سامنے آئیں۔ ہمیشہ ہماری ثقافت اور تہواروں کی اصل روح کو کمزور کرنے کی کوشش کی جاتی ہے۔ ہمارے تہواروں کی اصل شناخت کو متاثر کرنا بند کریں۔ سناتن ثقافت احترام کی مستحق ہے، محض علامتی نمائندگی کی نہیں۔‘
لیکن کچھ صارفین کا خیال ہے کہ یہ اتنا بڑا مسئلہ نہیں تھا کہ اس پر اتنا شور ہو جاتا۔
آروہی ریڈی نے لکھا کرینہ کپور کا ’واحد جرم یہ تھا کہ انھوں نے دیوالی کے موقع پر بھوپال کی بیگم کا تاریخی ہار پہنا۔۔۔ ذرا سوچیے کہ بعض لوگوں کے مذہبی جذبات کتنی آسانی سے معمولی باتوں پر مجروح ہو جاتے ہیں!‘
’بائیں بازو کے لبرل حلقے، جو ہندو مذہب سے متعلق معمولی معاملات پر بھی فوراً آواز اٹھاتے ہیں، آج مکمل خاموش ہیں۔‘
'BBC News اردو' ایڈیشن کا انتخاب کریں اور نیوز الرٹس، تحقیقاتی اور تفصیلی رپورٹس، سب کچھ ایک ہی جگہ پر حاصل کریں۔
نوٹ: نئی ایپ برطانیہ اور امریکہ میں دستیاب نہیں ہے اور اس کا انگریزی زبان میں ایڈیشن موجود نہیں۔
