اسلام قبول کرنے والی خاتون کو نکاح کے پانچ دن بعد طلاق: ’فریبی شوہر نے یقین دلایا اسے مجھ سے محبت ہے‘

اپنے نکاح کے صرف پانچ دن بعد جین کو ایک ایسا ٹیکسٹ میسج موصول ہوا، جس نے ان کی زندگی کو الٹ کر رکھ دیا۔

ان کے نئے شوہر نے اس پیغام میں لکھا کہ ’میں تمھیں طلاق دیتا ہوں اور طلاق دے چکا ہوں۔‘

جین، جن کا اصل نام بی بی سی نے شائع نہ کرنے کا فیصلہ کیا، نے بتایا کہ وہ اس شخص سے 10 ماہ قبل مسلمانوں کی شادی کے لیے بنائی گئی ویب سائٹ ’مُز‘ پر ملی تھیں۔

اس وقت جین سمجھتی تھیں کہ ان کا نام ایڈم ہے اور وہ مانچسٹر میں رہتے ہیں۔

انھوں نے کہا کہ ’یہ میرے لیے بہت مشکل ہے۔ میں سمجھی تھی کہ میں شادی کے بندھن میں داخل ہو رہی ہوں، لیکن اس کے بجائے میں اپنی زندگی کے ایک بدترین خواب میں داخل ہو گئی۔‘

’یہ سب کچھ پاگل پن لگتا ہے۔ مجھے سمجھ نہیں آتا کہ لوگ صرف سیکس کے لیے ایسا کام کیوں کرتے ہیں۔‘

جین نے مزید بتایا کہ بالمشافہ ملاقات پر رضامندی سے قبل وہ شخص چھ ماہ تک ان سے آن لائن پیغامات اور ویڈیو کالز کے ذریعے رابطے میں رہا۔

انھوں نے بی بی سی کو بتایا کہ وہ اس تعلق کو حقیقی سمجھتی تھیں اور جب بعد میں اس شخص نے شادی کی پیشکش کی تو انھوں نے اس پر کوئی شک نہیں کیا۔

جین کہتی ہیں کہ اس شخص نے ’مجھے یقین دلایا کہ وہ مجھ سے محبت کرتا ہے اور میرے ساتھ زندگی گزارنا چاہتا ہے، اس لیے میرے پاس اس پر شک کرنے کی واقعی کوئی وجہ نہیں تھی۔‘

بعد میں انھیں معلوم ہوا کہ ایڈم کا اصل نام کچھ اور تھا اور وہ پہلے سے شادی شدہ تھا۔

تاہم ایڈم کے وکلا کا کہنا ہے کہ وہ جین کے الزامات کو مکمل طور پر مسترد کرتے ہیں۔

2 جون کو جین، جنھوں نے اسلام قبول کیا، لنکاشائر کے علاقے بریئرفیلڈ گئیں جہاں ان کا نکاح ہوا۔ نکاح شریعت کے تحت ایک اسلامی عقدِ ازدواج یا شادی کی تقریب ہوتی ہے۔

تاہم ایسے نکاح کے معاہدے قانونی شادی کے مترادف نہیں ہوتے اور انگلینڈ اور ویلز میں انھیں قانونی طور پر شادی تسلیم نہیں کیا جاتا۔

جین نے بتایا کہ وہ اپنے آبائی شہر گلاسگو میں اپنے دوستوں اور اہلِ خانہ کے درمیان شادی کرنا چاہتی تھیں، لیکن ان کے ہونے والے شوہر نے سکاٹ لینڈ میں شادی پر اعتراض کیا تھا۔

اب وہ اس واقعے کو ایک خطرے کی علامت کے طور پر دیکھتی ہیں۔

انھوں نے وضاحت کرتے ہوئے کہا ’سکاٹ لینڈ میں قانونی شادی اور نکاح دونوں کو ایک ہی وقت میں انجام دینے کا تقاضا کیا جاتا ہے۔‘

’انھوں (ایڈم) نے کہا ’وہ میرا شناختی کارڈ کیوں دیکھنا چاہتے ہیں؟ میرا مطلب ہے، نکاح تو ایک بہت سادہ عمل ہے اور انھیں میرا شناختی کارڈ دیکھنے کی بالکل ضرورت نہیں۔‘

’اور اس بات پر وہ واقعی بہت ناراض تھے۔‘

جین کے مطابق بریئرفیلڈ میں نکاح کی تقریب دو اماموں کی موجودگی میں ہوئی، جنھوں نے گواہوں کا کردار ادا کیا، اور اس کے بعد جوڑے نے ایک ہوٹل میں دو راتیں گزاریں۔

تاہم شادی کے صرف پانچ دن بعد جین کو ایک پیغام موصول ہوا، جس میں انھیں بتایا گیا کہ ان کی شادی ختم ہو چکی ہے۔

جین کا کہنا ہے کہ اس واقعے کے بعد وہ شدید صدمے اور الجھن کا شکار ہو گئیں اور انھوں نے اسے ’جھوٹی شادی‘ قرار دیا ہے۔

جین کا ماننا ہے کہ انھیں پہنچنے والا ’صدمہ‘ جذباتی اور جنسی استحصال کے زمرے میں آتا ہے۔

بی بی سی کو معلوم ہوا ہے کہ وہ شخص اب بھی ایک دوسری خاتون کے ساتھ قانونی اور مذہبی دونوں اعتبار سے شادی کے رشتے میں ہے۔

اپنے وکلا کے ذریعے دیے گئے ایک تفصیلی جواب میں اس شخص نے کہا کہ یہ الزامات ان کے خلاف چلائی جانے والی ایک منظم مہم کا حصہ ہیں جس کے حق میں کوئی ثبوت موجود نہیں اور یہ دعوے بے بنیاد اور غلط ہیں۔

انھوں نے بی بی سی کو بتایا کہ ان کے مؤکل نے جین کو اپنی پچھلی شادی کے بارے میں دھوکہ نہیں دیا تھا کیونکہ اس نے اس کا کبھی ذکر ہی نہیں کیا تھا۔

وکلا کے مطابق اس نے جین کے ساتھ نکاح کی تقریب کے دوران اپنی شناخت بھی نہیں چھپائی تھی کیونکہ اس نے اپنا ڈرائیونگ لائسنس پیش کیا تھا۔

’گہرے افسوس کا اظہار‘

بی بی سی کو مسجد کی جانب سے جین کو فراہم کیے گئے نکاح نامے کی ایک نقل موصول ہوئی ہے، جس میں بعض معلومات نامکمل اور بعض غلط درج ہیں۔

نکاح پڑھانے والے امام مفتی عدیل زمان نے کہا کہ یہ نکاح دو بالغ افراد کے درمیان ہوا تھا، جو اپنی رضامندی سے شادی کر رہے تھے اور بظاہر خوش دکھائی دے رہے تھے۔ ان کے بقول وہ یہ اپنی ذمہ داری نہیں سمجھتے تھے کہ اس سے آگے بڑھ کر مزید سوالات کریں۔

انھوں نے بی بی سی کو بتایا ’ہم ان حالات پر گہرے افسوس کا اظہار کرتے ہیں جو سامنے آئے ہیں۔‘

’ابتدا سے ہماری کوشش یہ رہی ہے کہ مناسب مدد اور معاونت فراہم کی جائے، تمام فریقوں کے ساتھ منصفانہ رویہ اختیار کیا جائے اور اپنے تبصروں کو صرف ان معاملات تک محدود رکھا جائے جن کے بارے میں ہمیں براہِ راست معلومات حاصل ہیں۔‘

انھوں نے تسلیم کیا کہ شناختی دستاویزات کی جانچ کے حوالے سے غلطیاں ہوئی تھیں، تاہم ان کا کہنا تھا کہ انھوں نے خود جین کے شوہر کی حقیقی شناخت سامنے لانے میں مدد کی تھی۔

لنکاشائر کونسل آف مساجد، جو اس شادی کے خاتمے کے بعد ثالثی کے عمل میں شامل رہی ہے، کا کہنا ہے کہ اس نوعیت کی تقریبات منعقد کرنے والوں پر لازم ہے کہ وہ مناسب جانچ پڑتال کریں۔

کونسل کے مطابق نکاح یا شادی کی ایسی تقریبات انجام دینے والے افراد کی ذمہ داری ہے کہ وہ متعلقہ شناختی اور دیگر ضروری معلومات کی مناسب تصدیق کریں۔

نیو بِگننگز، جو اولڈہم، گریٹر مانچسٹر میں قائم ایک تنظیم ہے اور اسلام قبول کرنے والے افراد کو خدمات فراہم کرتی ہے، کا کہنا ہے کہ اسے ایسے معاملات کا سامنا رہا ہے، جن میں بعض افراد نے مسلم برادری کے اندر دوسروں کو دھوکا دینے کی کوشش کی۔

تنظیم کے بانی بلال براؤن کہتے ہیں کہ ’ہم اپنی برادری، یعنی مسلم کمیونٹی، میں موجود ایسے دھوکے بازوں کے بارے میں جانتے ہیں اور یہ لوگ دوسروں کو فریب دینے کے لیے موجود ہیں۔‘

ان کا کہنا تھا کہ ایسے تعلقات یا شادیاں جو غیر معمولی طور پر جلدی میں طے کی جا رہی ہوں، یا جن میں خاندان کے دیگر افراد شامل نہ ہوں، واضح خطرے کی علامات ہیں کہ ممکن ہے سب کچھ ٹھیک نہ ہو۔

انھوں نے مزید کہا کہ ایسے حالات میں اسلام قبول کرنے والے افراد خاص طور پر غیر محفوظ اور کمزور پوزیشن میں ہو سکتے ہیں۔

لنکاشائر کی سابق اسسٹنٹ پولیس اینڈ کرائم کمشنر صائمہ افضل نے بی بی سی نارتھ ویسٹ ٹونائٹ سے گفتگو کرتے ہوئے کہا کہ اسلامی شادیوں کو قانونی طور پر تسلیم نہ کیے جانے کا مسئلہ بعض خواتین کے لیے مشکلات پیدا کر سکتا ہے۔

انھوں نے کہا ’نکاح سے متعلق ایک خلا (لوپ ہول) ہے جس کا اکثر ذکر کیا جاتا ہے۔ ہم ان لوگوں کے خلاف مقدمہ نہیں چلا سکتے کیونکہ برطانیہ میں نکاح کو قانونی طور پر شادی تسلیم نہیں کیا جاتا۔‘

’اگر نکاح کے مسئلے کو ایک طرف بھی رکھ دیں تو یہاں سامنے آنے والے رویوں پر نظر ڈالیں۔ آپ کے سامنے ایک ایسی صورتحال ہے، جس میں ایک خاتون کو دھوکے اور فریب کے ذریعے اپنے جال میں پھنسایا گیا، لہٰذا یہ سراسر فریب دہی ہے۔‘

سنہ 2018 میں پارلیمان کے سامنے پیش کیے گئے ایک آزاد جائزے میں یہ نتیجہ اخذ کیا گیا تھا کہ اسلامی شادیوں کی ایک قابلِ ذکر تعداد کو قانونی سول شادی میں تبدیل نہیں کیا جاتا، جس کے نتیجے میں لوگ ان قانونی تحفظات سے محروم رہ جاتے ہیں جو قانوناً تسلیم شدہ شادیوں کے ساتھ وابستہ ہوتے ہیں۔

دوسری جانب سکاٹ لینڈ پولیس نے کہا کہ سکاٹ لینڈ میں اس حوالے سے کسی مجرمانہ عمل کے شواہد ان کے سامنے نہیں آئے ہیں۔

گریٹر مانچسٹر پولیس نے تصدیق کی کہ اسے جین کی جانب سے کی گئی ایک شکایت کی تحقیقات کے لیے کہا گیا تھا۔

مز کا کہنا ہے کہ اس شخص کا اکاؤنٹ پلیٹ فارم پر مستقل طور پر بلاک کر دیا گیا ہے۔

کمپنی کے چیف ایگزیکٹو شہزاد یونس نے کہا کہ ’ہم صارفین سے یہ ظاہر کرنے کا مطالبہ کرتے ہیں کہ آیا وہ شادی شدہ ہیں یا نہیں (چاہے قانونی طور پر یا کسی اور صورت میں)۔ اگر وہ شادی شدہ ہوں تو ہم رجسٹریشن کے مرحلے پر ہی انھیں ایپ استعمال کرنے سے روک دیتے ہیں۔‘

ان کا کہنا تھا کہ کمپنی اپنی معمول کی جانچ کے حصے کے طور پر ای میل، ٹیلی فون نمبر، ڈیوائس اور سیلفی کی تصدیق کرتی ہے، جبکہ شناختی دستاویزات کی تصدیق اختیاری ہوتی ہے۔

پروفائل پر یہ بھی ظاہر کیا جاتا ہے کہ کون سی جانچ مکمل ہو چکی ہے اور کون سی نہیں۔

جین نے کہا کہ وہ چاہتی ہیں کہ ان کا معاملہ دوسری خواتین کو اسی طرح کے حالات کا شکار ہونے سے بچانے میں مددگار ثابت ہو۔

انھوں نے مزید کہا ’یہ ہماری برادری کا ایک مسئلہ ہے۔ اگر میں کسی ایسی کمزور خاتون کی مدد کر سکوں جیسی میں خود تھی، تو یہ ایک کامیابی ہوگی۔‘

BBC World Service کی نئی ایپ ڈاؤن لوڈ کریں۔

’BBC News اردو‘ ایڈیشن کا انتخاب کریں اور نیوز الرٹس، تحقیقاتی اور تفصیلی رپورٹس، سب کچھ ایک ہی جگہ پر حاصل کریں۔

نوٹ: نئی ایپ برطانیہ اور امریکہ میں دستیاب نہیں ہے اور اس کا انگریزی زبان میں ایڈیشن موجود نہیں۔