سپین میں عوامی مقامات پر کِسنگ (بوسہ لینا) اتنی عام کیوں ہے؟
،تصویر کا ذریعہGetty Images
- مصنف, لوسی لوول
- عہدہ, بی بی سی نیوز
- وقت اشاعت
- مطالعے کا وقت: 7 منٹ
سپین میں بوسے دیتے لوگ ہر جگہ دکھائی دیتے ہیں۔ کسی سے ملاقات ہو جائے تو دونوں گالوں پر بوسہ دینے کی روایت کافی عام ہے، لیکن عوامی مقامات پر رومانوی بوسہ دینا بھی کوئی معیوب بات نہیں سمجھی جاتی۔
کئی بار ایسا ہوا کہ میں ایک مصروف بازار کی سڑک پر کسی ادھیڑ عمر جوڑے کے پیچھے چل رہی ہوتی ہوں، تو پتا چلتا ہے کہ وہ اچانک رُک کر ایک دوسرے کو بوسہ دینے لگتے ہیں۔
پارکوں میں دھوپ کا مزا لیتے نوجوانوں کو بوسہ دیتے ہوئے دیکھ کر مجھے ماضی کی یاد آ جاتی ہے۔
یہاں تک کہ میری اکاؤنٹنٹ اپنی ای میلز کا اختتام بھی ’بیسوس‘ (ہسپانوی زبان میں بوسہ) لکھ کر کرتی ہیں۔
سپین میں چھ برس سے زیادہ عرصہ گزارنے کے بعد میں محبت کے اس عوامی اظہار کی عادی ہو چکی ہوں۔ لیکن جب میری ایک دوست جاپان کے سفر سے واپس ویلنشیا (سپین) پہنچیں تو انھوں نے فوراً اس فرق کو محسوس کیا۔
ریلوے سٹیشن سے باہر نکلتے ہی اُن کی نظر ایک بینچ پر بیٹھے ایک جوڑے پر پڑی جو کِسنگ کر رہے تھے۔ ایسے ملک (جاپان) میں وقت گزارنے کے بعد جہاں عوامی مقامات پر محبت کا اظہار نسبتاً کم دیکھنے میں آتا ہے، یہ منظر دیکھنا میری دوست کے لیے باعثِ اطمینان تھا۔
اور اس وقت اُس نے سوچا کہ ’تو میں گھر واپس آ گئی ہوں۔‘
End of سب سے زیادہ پڑھی جانے والی
اس واقعے نے مجھے سوچنے پر مجبور کر دیا کہ کیا واقعی سپین کِسنگ کرنے والوں کا ملک ہے؟ اور محبت کے یہ عوامی اظہار اس کی ثقافت، تاریخ اور قربت کے بارے میں لوگوں کے رویوں کے متعلق ہمیں کیا بتاتے ہیں؟
،تصویر کا ذریعہGetty Images
بی بی سی اردو کی خبروں اور فیچرز کو اپنے فون پر حاصل کریں اور سب سے پہلے جانیں پاکستان اور دنیا بھر سے ان کہانیوں کے بارے میں جو آپ کے لیے معنی رکھتی ہیں
سبسکرائب کرنے کے لیے کلک کریں
مواد پر جائیں
اس کی ایک وجہ شاید یہ ہو کہ سپین میں لوگ عوامی مقامات پر زیادہ جاتے ہیں۔ ملک کے کئی حصوں میں روزمرہ زندگی سڑکوں، کیفوں اور پارکوں میں گزرتی ہے۔
واروک یونیورسٹی کی ایک تحقیق کے مطابق سپین اُن ممالک میں شامل ہے جہاں لوگ نئے افراد سے ملتے وقت کم فاصلہ رکھتے ہیں۔
سپین میں یہ رجحان یونان، اٹلی اور پرتگال سے بھی زیادہ نمایاں ہے۔ سپین کے مصروف چوک، چوراہوں پر دوست اکثر کندھے سے کندھا ملا کر بیٹھتے ہیں اور دھوپ میں بیئر پیتے ہیں۔
میڈرڈ کی کمپلوتینسے یونیورسٹی میں عمرانیات کی پروفیسر امپارو لاسین کہتی ہیں کہ سپین میں لوگ شمال یورپی ممالک کے مقابلے میں اپنے جذبات کا زیادہ کھل کر اظہار کرتے ہیں۔
ان کا کہنا ہے کہ ’اگر آپ اس کا موازنہ نارڈک ممالک (شمالی یورپ اور نارتھ امریکہ کے ممالک) یا انگلینڈ سے کریں تو فرق واضح نظر آتا ہے۔‘
ممکن ہے سپین کے لوگ دوسروں سے زیادہ محبت کرنے والے نہ ہوں، لیکن وہ اپنے جذبات کا اظہار کرنے میں زیادہ جھجک محسوس نہیں کرتے۔
عوامی مقامات پر بوسہ لینا ان کے لیے کوئی غیر معمولی بات نہیں بلکہ روزمرہ زندگی کا حصہ ہے۔
رہائش کے حالات بھی اس کی ایک وجہ ہو سکتے ہیں۔ سپین کی تقریباً 65 فیصد آبادی فلیٹس میں رہتی ہے، جو یورپی یونین میں سب سے زیادہ شرح ہے۔
دوسری جانب پراپرٹی کی بڑھتی ہوئی قیمتوں کی وجہ سے نوجوانوں کے لیے والدین کا گھر چھوڑ کر الگ رہائش اختیار کرنا پہلے سے زیادہ مشکل ہو گیا ہے۔
تنہائی کے لمحے گزارنے کے لیے بینچ کی تلاش
لاسین کے مطابق گھر میں محدود رازداری لوگوں کو ذاتی لمحات کے لیے عوامی مقامات کا رخ کرنے پر مجبور کر سکتی ہے۔
وہ کہتی ہیں کہ ’سپین میں رہائش کا یہ بحران موجود ہے، جس کا مطلب یہ ہے کہ ہم اپنے دوستوں سے گھروں کے بجائے باہر ملنے کے زیادہ عادی ہو گئے ہیں، جیسے بارز یا ریستورانوں وغیرہ میں۔‘
وہ مزید کہتی ہیں کہ اب جوڑوں کو تنہائی کے چند لمحے گزارنے کے لیے کسی نسبتاً ویران جگہ پر بینچ تلاش کرنی پڑتی ہے، یا کم از کم ایسی جگہ کی جہاں انھیں کچھ حد تک تنہائی میسر آ سکے۔
تاہم لاسین کے مطابق رہائشی بحران عوامی سطح پر محبت کے اظہار کی بنیادی وجہ نہیں ہے۔
ان کے نزدیک زیادہ اہم بات اس حوالے سے ملک کا نسبتاً بے تکلف رویہ ہے۔ وہ کہتی ہیں کہ اگر کوئی آپ کو ناپسندیدگی سے نہیں دیکھتا، یا پھر آپ کو اس کی پروا نہیں، تو یہی وہ چیز ہے جو عوامی طور پر اس طرح کے اظہار کو آسان بناتی ہے۔‘
28 سالہ ازابیل نیتو توس بیرونِ ملک رہنے کے بعد تین سال قبل واپس اپنے والدین کے ساتھ سپین میں رہنے لگی ہیں۔ وہ اچھی طرح جانتی ہیں کہ محدود رازداری کی صورت میں تعلقات نبھانا کس قدر مشکل اور بعض اوقات غیر آرام دہ ہو سکتا ہے۔
وہ کہتی ہیں کہ ’میں اپنے والدین کو یہ نہیں بتانا چاہتی تھی کہ میں دوسروں کے گھروں میں رہ رہی ہوں کیونکہ یہ کچھ عجیب سا لگتا تھا، اس لیے میں کہہ دیتی تھی کہ میں کسی دوست کے گھر ٹھہری ہوں۔‘
ازابیل توس جاپان، فرانس، جرمنی اور تیونس میں رہ چکی ہیں اور وہ سمجھتی ہیں کہ سپین میں تعلقات قائم کرنے کا انداز مختلف ہے۔
ان کے مطابق یہاں ابتدا ہی سے ایک فوری گرم جوشی محسوس ہوتی ہے۔
وہ کہتی ہیں کہ ’لوگ بہت جلد جسمانی قربت اختیار کر لیتے ہیں اور ایک دوسرے کے قریب آ جاتے ہیں۔ ممکن ہے آپ کسی غیر واضح نوعیت کے رومانوی تعلق میں ہوں، آپ کسی سے صرف دو بار ملے ہوں، اور پھر بھی آپ عوامی مقامات پر ہاتھ تھامے ہوئے ہوں اور ایک دوسرے کے ساتھ بہت قریب ہوں۔‘
،تصویر کا ذریعہGetty Images
ازابیل توس کے مطابق ’میرا خیال ہے کہ عوامی مقامات پر کسنگ عمومی طور پر قابلِ قبول سمجھا جاتا ہے۔ لوگ نجی جگہوں پر بھی تقریباً ویسا ہی رویہ اختیار کرتے ہیں جیسا عوامی مقامات پر۔‘
اگرچہ آج سپین میں عوامی طور پر محبت کا اظہار ایک عام بات ہے، لیکن ماضی میں اس نوعیت کے اظہار پر سخت پابندیاں عائد تھیں۔
فرانسسکو فرانکو کی آمریت (1939-1975) کے دوران قدامت پسند کیتھولک اقدار اور سخت قوانین عوامی رویے کو کنٹرول کرتے تھے۔
ہم جنس پرستی کو جرم قرار دیا گیا تھا اور عوامی مقامات پر محبت کے اظہار پر نظر رکھی جاتی تھی۔ یہاں تک کہ عوامی مقام پر بوسہ لینے پر جوڑوں کو جرمانہ بھی ہو سکتا تھا۔
سنہ 1975 میں فرانکو کی وفات کے بعد سپین میں گہری ثقافتی تبدیلی آئی۔ میڈرڈ میں ’لا موویدا مادریلے نیا‘ (La Movida Madrileña) کہلانے والی پرجوش ثقافتی تحریک نے آزادی اور اظہار کی حوصلہ افزائی کی۔
پیڈرو المودووار جیسے فلم سازوں نے ماضی کی قدامت پسند اقدار کو چیلنج کیا۔ جیسے جیسے یہ تحریک زور پکڑتی گئی، محبت اور جنسیت کا اظہار عوامی زندگی میں زیادہ نمایاں ہوتا گیا۔
تاہم یہ بڑی تبدیلی اچانک رونما نہیں ہوئی تھی۔ ایل جی بی ٹی کارکن کئی دہائیوں سے احتجاج کرتے آ رہے تھے اور ایک زیادہ کھلے اور قبولیت رکھنے والے معاشرے کی راہ ہموار کر رہے تھے۔
ایک اہم احتجاج 23 فروری 1987 کو میڈرڈ میں ہوا۔ اس سے ایک سال قبل دو خواتین کو میڈرڈ میں بوسہ لینے پر گرفتار کر لیا گیا تھا اور انھیں عوامی سکینڈل سے متعلق قانون کے تحت دو دن تک پولیس حراست میں رکھا گیا تھا۔
ان کی گرفتاری کے بعد مقامی کارکنوں نے اس معاملے کے خلاف آواز بلند کرنے کے لیے ’اجتماعی بوسے‘ کے احتجاج کا اہتمام کیا۔
اس کے بعد سے تقریباً 1990 کی دہائی تک میڈرڈ میں ہونے والی ہر پرائیڈ ریلی کا اختتام سپین کے مشہور مقام پوئرتا دل سول (Puerta del Sol) میں ایک اجتماعی بوسے کے ساتھ ہوتا تھا۔
وقت کے ساتھ سرعام بوسہ لینا پُرامن احتجاج کی ایک علامت بن گیا اور سنہ 1988 میں عوامی بے حیائی سے متعلق قانون ختم کر دیا گیا۔
آج سپین میں عوامی مقامات پر محبت کا اظہار عام ہے لیکن ہر شخص اس آزادی سے یکساں طور پر فائدہ نہیں اٹھا پاتا۔ امپارو لاسین کے مطابق عوامی مقامات پر بوسہ لینے والے عمر رسیدہ یا ہم جنس جوڑوں کو بعض اوقات دوسروں کی زیادہ توجہ کا سامنا کرنا پڑتا ہے۔
ان کا کہنا ہے کہ ’ہر کوئی اپنے تعلقات کو کھلے عام ظاہر کرنے میں ایک سا محسوس نہیں کرتا۔‘
،تصویر کا ذریعہGetty Images
ویلنشیا سے تعلق رکھنے والی سابق فوٹوگرافر پاؤلا فوریو کے مطابق بوسہ لینا صرف محبت کا اظہار نہیں بلکہ آزادی کی بھی ایک علامت ہے۔
ان کا کہنا ہے کہ ’ابھی بہت کچھ بدلنا باقی ہے، لیکن مجموعی طور پر سپین ایک کھلا معاشرہ ہے۔ بوسہ لینا اس آزادی کی ایک جھلک ہے جو لوگوں کو یہاں حاصل ہے۔‘
یہ بات مجھے اپنی اُس دوست کی یاد دلاتی ہے جو جاپان سے واپس آئی تھی۔ ایک بینچ پر بوسہ لیتے ہوئے جوڑے کو دیکھ کر اسے خوشی محسوس ہوئی تھی۔
شاید وہ صرف گھر واپس آنے پر خوش نہیں تھی بلکہ ایک ایسے ملک میں لوٹنے پر بھی خوش تھی جہاں لوگ اپنے جذبات کا اظہار زیادہ آزادی سے کرتے ہیں۔
شاید سپین میں بوسے کی سب سے خاص بات یہ ہے کہ یہ اب ایک عام سا منظر بن چکا ہے۔
'BBC News اردو' ایڈیشن کا انتخاب کریں اور نیوز الرٹس، تحقیقاتی اور تفصیلی رپورٹس، سب کچھ ایک ہی جگہ پر حاصل کریں۔
نوٹ: نئی ایپ برطانیہ اور امریکہ میں دستیاب نہیں ہے اور اس کا انگریزی زبان میں ایڈیشن موجود نہیں۔
