آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
تربیلا فائیو منصوبہ: ٹنل حادثے کے بعد چینی انجینئرز اور عملے کو کیسے نکالا گیا اور ’کوفر ڈیم‘ پر تشویش کیوں ہے؟
پاکستان کے صوبہ خیبر پختونخوا میں واقع تربیلا ڈیم کے پانچویں توسیعی پن بجلی منصوبے (ٹی فائیو) میں نو نومبر کو پیش آنے والے حادثے کے بعد حفاظتی انتظامات کو مزید سخت کیا جا رہا ہے۔ چیئرمین واپڈ لیفٹیننٹ جنرل (ر) محمد سعید نے منگل کو ڈیم کے دورے کے دوران واقعے کی محکمانہ انکوائری کا بھی حکم دیا ہے۔
چیئرمین واپڈ نے متعلقہ حکام کو ہدایت کی کہ واقعے کے تمام پہلوؤں کا جائزہ لے کر جلد رپورٹ پیش کی جائے اور اس حادثے کی وجہ سے منصوبے کی تکمیل میں ممکنہ تاخیر کو کم سے کم کیا جائے۔
دوسری جانب وزیرِ اعظم پاکستان شہباز شریف نے بھی اس حادثے کی رپورٹ طلب کرتے ہوئے ذمہ داران کے تعین اور آئندہ اس نوعیت کے حادثات سے بچاؤ کی ہدایت کی ہے۔
خیال رہے کہ پیر کو خیبر پختونخوا کے ضلع ہری پور میں تربیلا ڈیم کے پانچویں توسیعی پن بجلی منصوبے پر کام کے دوران ذخیرہ شدہ پانی منصوبے کی کنیکٹنگ ٹنل (رابطہ سرنگ) اور زیرِ تعمیر پاور ہاؤس میں داخل ہو گیا تھا۔
واپڈا کے مطابق یہ واقعہ کنیکٹنگ ٹنل کے دوسرے حصے کی کھدائی کے دوران پیش آیا، جب چٹان کا ایک کمزور حصہ گر گیا اور اس کے نتیجے میں پانی ان ٹیک پٹ سے ٹنل اور پاور ہاؤس میں داخل ہونا شروع ہو گیا۔ حکام کے مطابق تربیلا ڈیم کا مجموعی سٹرکچر بالکل محفوظ ہے۔
واپڈا کی جانب سے جاری ہونے والے ایک بیان میں کہا گیا ہے کہ ’تمام ورکرز کو فوری طور پر بحفاظت باہر نکال لیا گیا اور ان ٹیک پٹ سے پانی بھی مکمل طور پر نکال دیا گیا ہے۔ اب زیریں حصے میں واقع کام کی جگہوں پر مزید پانی داخل نہیں ہو رہا، جبکہ زیرِ تعمیر پاور ہاؤس سے بھی پانی نکالنے کا عمل شروع کر دیا گیا ہے۔‘
دوسری جانب ہنگامی حالات سے نمٹنے ادارے (پی ڈی ایم اے) کے مطابق اس حادثے کے بعد تربیلا ڈیم سے دریائے سندھ میں پانی کے اخراج میں اضافے کا الرٹ جاری کیا گیا ہے اور متعلقہ اضلاع کو احتیاطی اقدامات کی ہدایت کی گئی ہے۔
End of سب سے زیادہ پڑھی جانے والی
تربیلا ڈیم منصوبے کے سپرنٹنڈنگ انجینئر سروے اینڈ ہائیڈرولوجی کی جانب سے جاری کردہ نوٹیفکیشن کے مطابق تربیلا ڈیم سے دریائے سندھ میں پانی کا اخراج تقریباً ڈیڑھ لاکھ کیوسک سے زائد رہنے کا امکان ہے۔
پی ڈی ایم اے نے ڈپٹی کمشنرز ہری پور، صوابی اور نوشہرہ کو آئندہ 24 گھنٹوں کے دوران عوام کے تحفظ کے لیے ضروری احتیاطی اور حفاظتی اقدامات یقینی بنانے کی ہدایت کی ہے۔
حکام کے مطابق صوابی میں صورتحال نارمل ہے لیکن احتیاط کے طور پر پیر کے روز مساجد میں اعلانات کر کے لوگوں کو دریا کے قریب نہ جانے کی ہدایت کی گئی تھی۔
’واقعے کے بعد چینی انجینئرز کو بھی بحفاظت نکال لیا گیا تھا‘
ڈپٹی کمشنر ہری پور کی رپورٹ کے مطابق نو نومبر کو تربیلا ڈیم کے ٹی فائیو (T-5) ٹنل منصوبے میں کھدائی کے دوران چٹان کا بڑا حصہ گرنے سے پانی زیرِ تعمیر ٹنل اور پاور ہاؤس کے علاقے میں داخل ہو گیا۔
واقعے کے بعد چینی انجینیئروں، کارکنوں اور مقامی مزدوروں کو بحفاظت نکال لیا گیا جبکہ ایک مقامی آپریٹر معمولی زخمی ہوا۔ سوشل میڈیا پر وائرل ویڈیوز کے بعد ڈیم کے بند سے متعلق افواہیں پھیلیں، تاہم رپورٹ میں واضح کیا گیا کہ ڈیم محفوظ رہا اور نقصان صرف زیرِ تعمیر ٹنل تک محدود تھا۔
رپورٹ میں خبردار کیا گیا ہے کہ انٹیک ایریا پر قائم کوفر ڈیم کے مزید کمزور ہونے یا ناکام ہونے کی صورت میں ڈیم کا پانی براہِ راست ٹنل میں داخل ہو سکتا ہے، جس سے زیریں علاقوں میں درمیانے درجے کے سیلاب کا خطرہ پیدا ہو سکتا ہے۔
اسی خدشے کے پیشِ نظر صوابی اور نوشہرہ کے نشیبی علاقوں کے رہائشیوں کو محتاط رہنے اور وہاں کاشت کاری یا مویشی چرانے سے گریز کی ہدایت کی گئی ہے۔
ڈپٹی کمشنر نے اپنی رپورٹ میں اس بات پر بھی تشویش ظاہر کی کہ بظاہر ڈیم انتظامیہ کے پاس ایسی ہنگامی صورتحال سے نمٹنے کے لیے مکمل حکمتِ عملی موجود نہیں تھی، جبکہ ٹنل کے فلڈ گیٹس بھی مرمت کے لیے بھیجے گئے تھے۔
رپورٹ میں واقعے کی وجوہات جاننے کے لیے جامع تکنیکی تحقیقات اور ممکنہ غفلت کی نشاندہی کی سفارش کی گئی ہے۔ ضلعی انتظامیہ نے کہا ہے کہ وہ صورتحال کی مسلسل نگرانی کر رہی ہے اور واپڈا سمیت متعلقہ اداروں سے رابطے میں ہے۔
کوفر ڈیم سے متعلق خدشات کیا ہیں؟
ڈپٹی کمشنر ہری پور کی رپورٹ میں کہا گیا ہے کہ ڈیم کی جانب والی دیوار اور ٹنل کے بالائی حصے میں مسلسل کٹاؤ جاری ہے۔ رپورٹ کے مطابق ممکنہ خطرات میں سے ایک یہ ہے کہ انٹیک ایریا پر تعمیر کیا گیا کوفر ڈیم (پانی میں بنایا جانے والا ایک عارضی واٹر ٹائٹ) مکمل طور پر ناکام ہو سکتا ہے اور ایسی صورت میں ڈیم سے پانی براہِ راست ٹنل میں داخل ہو سکتا ہے۔
رپورٹ میں خبردار کیا گیا ہے کہ اس صورت میں نشیبی علاقوں کی جانب پانی کا اخراج نمایاں طور پر بڑھ سکتا ہے اور وہاں آباد آبادی متاثر ہو سکتی ہے۔
رپورٹ کے مطابق ڈپٹی کمشنر صوابی نے بھی موقع کا دورہ کیا تھا اور انھیں بتایا گیا کہ نشیبی علاقوں میں رہنے والے لوگوں کو خبردار کرنے کے لیے مساجد میں اعلانات کروائے جائیں۔
ڈیم حکام نے ضلعی انتظامیہ کو آگاہ کیا کہ اگر کوفر ڈیم ٹوٹ جائے تو زیریں علاقوں میں درمیانے درجے کا سیلاب آ سکتا ہے۔
تاہم مقامی انتظامیہ کے مطابق اس وقت صوابی میں صورتحال معمول کے مطابق ہے اور پانی کی سطح میں کسی غیر معمولی اضافے کی اطلاع نہیں ملی۔
ڈپٹی کمشنر کی رپورٹ میں کہا گیا ہے کہ ڈیم انتظامیہ نے کوفر ڈیم کی دیواروں پر دباؤ کم کرنے کے لیے پانی کا اخراج بڑھا دیا ہے۔
رپورٹ کے مطابق اس حکمتِ عملی کے باعث زیریں علاقوں کی طرف پانی کے بہاؤ میں اضافہ ہوا، جو سال کے اس موسم میں غیر معمولی سمجھا جا رہا ہے۔
ڈپٹی کمشنر نے اپنی رپورٹ میں لکھا ہے کہ اس واقعے کا ایک تشویشناک پہلو یہ ہے کہ ڈیم انتظامیہ کے پاس بظاہر ایسی ہنگامی صورتحال سے نمٹنے کے لیے مناسب حکمتِ عملی موجود نہیں تھی۔
رپورٹ کے مطابق جنرل منیجر ٹی فائیو تربیلا ڈیم نے آگاہ کیا کہ اس ٹنل کے لیے فلڈ گیٹس مرمت کی غرض سے بھیجے گئے تھے جبکہ ٹی فور سے فلڈ گیٹس منتقل کرنے کے لیے تین سے چار روز درکار ہوں گے۔
رپورٹ میں کہا گیا ہے کہ یہ صورتحال اس بات پر سنجیدہ سوالات اٹھاتی ہے کہ اگر کوفر ڈیم کی حالت مزید خراب ہوتی ہے یا وہ ٹوٹ جاتا ہے تو فوری ہنگامی اقدامات کس حد تک مؤثر ثابت ہو سکیں گے۔
دوسری جانب چیئرمین واپڈا نے زیرِ تعمیر تربیلا پانچویں توسیعی منصوبے کے ان ٹیک سٹرکچر، ٹنل، پاور ہاؤس اور دیگر اہم تعمیراتی مقامات کا دورہ کیا جبکہ کنسلٹنٹس، کانٹریکٹر اور واپڈا کی پراجیکٹ مینجمنٹ ٹیم نے انھیں موجودہ صورتحال اور اب تک کیے گئے اقدامات پر بریفنگ دی۔
وزارت آبی وسائل نے واپڈا سے واقعے کی ابتدائی جائزہ رپورٹ طلب کی ہے، جو وزارت کو بھجوا دی گئی ہے۔
تربیلا ٹی فائیو منصوبہ ہے کیا؟
ترجمان واپڈا کے مطابق تربیلا ٹی-فائیو توسیعی منصوبہ، تربیلا ڈیم کی سرنگ نمبر پانچ پر تعمیر کیا جا رہا ہے۔
اس منصوبے کی تکمیل سے 1530 میگا واٹ بجلی پیدا ہو سکے گی اور اس منصوبے کے لیے عالمی بینک اور ایشین انفراسٹرکچر انویسٹمنٹ بینک مالی معاونت فراہم کر رہے ہیں۔
ایشین انفراسٹرکچر انویسٹمنٹ بینک کے مطابق اس منصوبے پر مجموعی طور پر 82 کروڑ 35 لاکھ ڈالرز لاگت آئے گی جس کے لیے عالمی بینک نے 39 کروڑ ڈالرز جبکہ ایشین انفراسٹرکچر انویسٹمنٹ بینک 30 کروڑ ڈالرز قرض دے گا۔
بینک کے مطابق باقی رقم واپڈا اور نیشنل گرڈ کمپنی فراہم کر رہی ہے، منصوبے کی تکمیل پر سالانہ 1.8 ارب یونٹ سے زیادہ صاف بجلی قومی گرڈ میں شامل ہونے کی توقع ہے۔
بینک کے مطابق اس منصوبے کی مالی معاونت کی منظوری 27 ستمبر 2016 کو دی گئی، قرضے کے معاہدے پر 18 جنوری 2017 کو دستخط ہوئے جبکہ یہ 11 اگست 2017 سے مؤثر ہوا۔ منصوبے کی تکمیل کی اصل تاریخ 30 جون 2022 تھی، تاہم بعد ازاں اس میں توسیع کرتے ہوئے نظرِثانی شدہ اختتامی تاریخ 30 جون 2028 مقرر کی گئی ہے۔
'BBC News اردو' ایڈیشن کا انتخاب کریں اور نیوز الرٹس، تحقیقاتی اور تفصیلی رپورٹس، سب کچھ ایک ہی جگہ پر حاصل کریں۔
نوٹ: نئی ایپ برطانیہ اور امریکہ میں دستیاب نہیں ہے اور اس کا انگریزی زبان میں ایڈیشن موجود نہیں۔