’ایپسٹین نے 200 سے زیادہ مرتبہ میرا ریپ کیا‘: متاثرہ خواتین کے بیانات جو ماڈلنگ ایجنسی کا مبینہ کردار واضح کرتے ہیں

جیفری ایپسٹین کے ہاتھوں ریپ کا نشانہ بننے والی ایک خاتون روزا نے دعویٰ کیا ہے کہ اُن کی نمائندگی کرنے والی ایک ماڈلنگ ایجنسی کے سربراہ نے انھیں فلوریڈا میں سزا یافتہ جنسی مجرم (جیفری ایپسٹین) کے گھر پر ہونے والے دو فوٹو شوٹس پر بھیج کر خطرے میں ڈال دیا تھا۔

سنہ 2009 میں، جب یہ واقعات پیش آئے، تو جیفری ایپسٹین کم عمر لڑکی کے ساتھ جنسی جرائم کے الزام میں قید کی سزا کاٹ رہے تھے، تاہم انھیں روزانہ اپنے گھر سے کام کرنے کی اجازت حاصل تھی۔

روزا نے بی بی سی کو بتایا کہ ’میری نمائندگی کرنے والی ماڈلنگ ایجنسی کی ذمہ داری تھی کہ وہ میری حفاظت کرتی، لیکن وہ اس میں ناکام رہی اور اس نے مجھے خطرے میں ڈالا۔ انھیں اس عمل کے لیے جوابدہ ٹھہرایا جانا چاہیے۔‘

روزا کی عمر محض 18 برس تھی جب ’ایم سی ٹو ماڈل مینجمنٹ‘ نامی اُن کی ماڈلنگ ایجنسی نے انھیں پہلی مرتبہ پام بیچ میں واقع جیفری ایپسٹین کے گھر بھیجا تھا۔

یہ وہ وقت تھا جب ازبکستان سے تعلق رکھنے والی روزا کو امریکہ آئے صرف ایک ماہ ہوا تھا۔

'ایم سی ٹو ماڈل مینجمنٹ' کے امریکہ میں سابق سربراہ جیف فلر، اب ’دی سورس ماڈلز‘ نامی ایک اور امریکی ماڈلنگ ایجنسی چلاتے ہیں۔

روزا کا کہنا ہے کہ ’میری نمائندگی کرنے والی ماڈلنگ ایجنسی کو بخوبی معلوم تھا کہ میں کہاں جا رہی ہوں۔ اس لیے جیف فلر کو بھی اچھی طرح علم تھا کہ وہ مجھے کس جگہ بھیج رہے ہیں۔‘

روزا نے ایک دستاویز بھی دکھائی جس سے بظاہر معلوم ہوتا ہے کہ جیفری ایپسٹین کے گھر پر ہونے والے اُن کے دوسرے فوٹو شوٹ کے بعد پام بیچ سے اُن کی واپسی کی فلائیٹ خود جیف فلر نے بُک کروائی تھی۔

تاہم جیف فلر ماضی میں یہ مؤقف اختیار کر چکے ہیں کہ انھیں اس بات کا علم نہیں تھا کہ روزا کو جیفری ایپسٹین کے گھر بھیجا جا رہا ہے۔

روزا کے مطابق انہی دو فوٹو شوٹس کے نتیجے میں بعدازاں جیفری ایپسٹین نے انھیں اپنی معاون کے طور پر ملازمت دی تھی۔

جیفری ایپسٹین کی دیگر متاثرہ خواتین بھی ماضی میں یہ بیان کر چکی ہیں کہ کیسے ایپسٹین نوجوان خواتین کو ملازمت دینے کے بہانے اپنے قریب لاتے اور مبینہ طور پر اُن کا استحصال جاری رکھتے تھے۔

روزا کا کہنا ہے کہ اس کے بعد جیفری ایپسٹین نے منظم انداز میں ان کا بار بار ریپ کیا۔

10 لاکھ ڈالرز کا عطیہ

بی بی سی کی جانب سے رابطہ کیے جانے پر جیف فلر نے ان الزامات یا واقعات کے بارے میں اپنا مؤقف پیش نہیں کیا۔

ماضی میں وہ یہ کہہ چکے ہیں کہ انھیں اس بات کا علم نہیں تھا کہ روزا کے ساتھ مبینہ طور پر بدسلوکی یا اُن کا جنسی استحصال ہو رہا ہے۔

جیفری ایپسٹین سے متعلق امریکی محکمہ انصاف کی جانب سے جاری کردہ دستاویزات کے جائزے سے معلوم ہوا کہ ایپسٹین کو عدالت سے سزا ملنے کے بعد بھی ’ایم سی ٹو‘ ماڈلنگ ایجنسی سے وابستہ 10 ماڈلز نے اُن سے ملاقات کی یا ان کے ساتھ رابطے میں رہیں۔

ان دستاویزات سے یہ بھی ظاہر ہوتا ہے کہ جیفری ایپسٹین نے سنہ 2005 میں 'ایم سی ٹو' کو 10 لاکھ امریکی ڈالر عطیہ کیے تھے، جبکہ یہ رقم عطیہ کیے جانے کے دو سال بعد ایجنسی کے مالکان نے ایک امریکی ذرائع ابلاغ کو بتایا تھا کہ ایپسٹین کا اُن کی کمپنی سے کوئی تعلق نہیں ہے۔

بی بی سی آئی کے ساتھ شیئر کی گئی گواہیوں نے ماڈلنگ انڈسٹری سے وابستہ دو دیگر افراد کے کردار کے بارے میں بھی سوالات اٹھائے ہیں۔ امریکی محکمہ انصاف کی فائلوں کے مطابق سابق ایجنٹ رامسی الخولی اور ایجنسی ڈائریکٹر فیتھ کیٹس کے ایپسٹین کے ساتھ قریبی تعلقات تھے۔

گذشتہ سال امریکی محکمہ انصاف کی جانب سے جاری ایک بیان میں کہا گیا تھا کہ ایسے تیسرے فریق، جس پر کبھی فرد جرم عائد نہیں ہوئی، کے خلاف مزید تحقیقات کا جواز دینے والا کوئی ثبوت نہیں ملا۔ تاہم اب نیویارک سٹیٹ کانگریس کے سینیٹر زیلنر مائری نے محکمہ انصاف کے اس مؤقف کو چیلنج کیا ہے۔

زیلز مائری نے انسانی سمگلنگ اور جنسی استحصال کے خلاف ایک بل پیش کیا ہے جس کا مقصد قانون نافذ کرنے والے اداروں کو جیفری ایپسٹین کے مبینہ ساتھیوں اور معاونین کی تحقیقات کے لیے پولیس کو مزید اختیارات فراہم کرنا ہے۔

امریکہ میں ماڈلز کے حقوق اور تحفظ کے لیے کام کرنے والی تنظیم ’ماڈل الائنس‘ کی بانی سارا زِف نے بھی اس مؤقف کی حمایت کی ہے۔

سارا زِف کا کہنا ہے کہ ’اکثر اوقات مسئلہ خود ماڈلنگ ایجنسیاں ہوتی ہیں۔ یہ ایجنسیاں ہی ماڈلز اور ان کا استحصال کرنے والے افراد کے درمیان رابطے کا ذریعہ بنتی ہیں۔‘

قریبی تعلق

روزا کا دعویٰ ہے کہ جیفری ایپسٹین کے گھر میں اُن کے جو دو فوٹو سیشنز ہوئے تھے، اُن میں کیمرے کے پیچھے کوئی پیشہ ور فوٹوگرافر نہیں بلکہ اُس وقت کی جیفری ایپسٹین کی گرل فرینڈ نادیہ مارچنکو تھیں (یعنی اس کام کے لیے کسی پروفیشنل فوٹو گرافر کی خدمات حاصل نہیں کی گئی تھیں)۔

روزا کے مطابق یہ صورتِحال 'غیر معمولی' تھی کیونکہ 'وہاں کوئی سٹائلسٹ بھی موجود نہیں تھا' جبکہ اس موقع پر بنائی گئی اُن کی تصاویر کو کبھی استعمال بھی نہیں کیا گیا۔

ان کا کہنا ہے کہ وقت گزرنے کے ساتھ اُن کا یہ یقین مزید مضبوط ہوا کہ یہ فوٹو شوٹس جیفری ایپسٹین اور 'ایم سی ٹو' کی منصوبہ بندی کا حصہ تھے۔

امریکی محکمہ انصاف کی فائلوں میں موجود ایک ای میل، جو جیف فلر نے ایپسٹین کو بھیجی تھی، ماڈلنگ ایجنسی اور جیفری کے درمیان قریبی تعلقات کی نشاندہی کرتی ہے۔

مارچ 2012 میں ایک اور ماڈل کے بارے میں فلر نے ایپسٹین کو لکھا کہ ’اگر آپ نہ ہوتے تو ہم اسے کئی ماہ پہلے ہی فارغ کر چکے ہوتے۔‘

انھوں نے مزید لکھا ’میں احتیاط برتنے کا مشورہ دوں گا کیونکہ وہ (ماڈل) اِدھر اُدھر باتیں کرتی پھر رہی ہے۔‘

سنہ 2019 میں ایپسٹین کی دوسری بار ہونے والی گرفتاری کے ایک ماہ بعد ’ایم سی ٹو‘ نامی ماڈلنگ ایجنسی کو ختم کر دیا گیا، جبکہ امریکہ میں اس کے سربراہ جیف فلر نے ’دی سورس ماڈلز‘ کے نام سے ایک نئی ایجنسی قائم کی، جو اب بھی کام کر رہی ہے۔

بی بی سی کی تحقیقات میں معلوم ہوا کہ ایم سی ٹو سے وابستہ 50 ماڈلز کو اس نئی ایجنسی میں منتقل کر دیا گیا تھا۔

بی بی سی نے اپنی تحقیقات پر مؤقف جاننے کے لیے 'دی سورس ماڈلز' سے رابطہ کیا، تاہم ادارے کی جانب سے کوئی جواب موصول نہیں ہوا۔

جیفری ایپسٹین کے 100 سے زائد متاثرین کی نمائندگی کرنے والی مرکزی وکیل سِگریڈ میک کاولی کے مطابق ماڈلنگ ایجنسیاں ایپسٹین کے لیے نہایت اہم کردار ادا کرتی تھیں۔

انھوں نے کہا کہ ’ایپسٹین متعدد افراد کو بتایا کرتا تھا کہ وہ روزانہ تین مختلف لڑکیاں چاہتا ہے۔ ذرا اس تعداد پر غور کیجیے۔ ماڈلز کی تلاش کرنے والے افراد اس پورے نظام میں کلیدی حیثیت رکھتے تھے کیونکہ وہی ایسی خواتین کی نشاندہی کرتے تھے جو ایپسٹین کی پسند کے مطابق ہوتی تھیں۔‘

سابق ایجنٹ رامسی الخولی کے معاملے میں بی بی سی آئی کو معلوم ہوا کہ انھوں نے 34 خواتین کو ایپسٹین سے ملوانے کی کوشش کی، جن میں ایک 18 سالہ طالبہ بھی شامل تھی، جو اُس وقت زیرِ تعلیم تھی۔

ان خواتین میں سے ایک کے اکاؤنٹ سے یہ واضح ہوتا ہے کہ کس طرح لوگوں کو اس مبینہ استحصالی نظام کا حصہ بنایا جاتا تھا۔

امریکی محکمہ انصاف کی فائلوں کے مطابق، رامسی الخولی نے ایپسٹین کو مشورہ دیا تھا کہ اس خاتون کو ایپسٹین سے متعارف کرانے سے پہلے اُن کی ایک معاون اس سے دوستی قائم کرے۔

بی بی سی نے اس خاتون سے بات کی تو انھوں نے بتایا کہ 19 برس کی عمر میں نیویارک میں جیفری ایپسٹین سے اپنی پہلی ملاقات کے دوران اُن کے ساتھ جنسی بدسلوکی کی گئی تھی۔

الزامات کے جواب میں رامسی الخولی نے بی بی سی کو بتایا کہ ’میں اس بات کی سختی سے تردید کرتا ہوں کہ مجھے کسی بھی قسم کے مبینہ استحصال کا علم تھا یا میں نے اس میں کوئی سہولت فراہم کی۔ اس وقت مجھے کسی بدسلوکی کے بارے میں کچھ معلوم نہیں تھا اور میں صرف ایپسٹین کے 2008 کے مقدمے سے متعلق اس کے اپنے مؤقف پر یقین کرتا تھا، جو بعد میں غلط ثابت ہوا۔‘

انھوں نے مزید کہا کہ ’ریکارڈز اور شائع شدہ رپورٹس سے ظاہر ہوتا ہے کہ خواتین کو اکثر ان کے قریبی حلقے میں شامل دیگر خواتین کے ذریعے متاثر یا گمراہ کیا جاتا تھا۔ میں کبھی اس حلقے کا حصہ نہیں رہا اور نہ ہی ایسی کسی سرگرمی میں شریک تھا۔ میرا مقصد صرف ماڈلز کو پیشہ ورانہ مواقع فراہم کرنے کے لیے انھیں ایک ایسے شخص سے متعارف کرانا تھا جس کے وسیع روابط تھے۔‘

دوسری جانب وکیل سِگریڈ میک کاولی کا کہنا ہے کہ ایپسٹین کے لیے کام کرنے والی نوجوان خواتین کے پاس ’بہت کم یا کوئی اختیار نہیں تھا۔‘

ان کے مطابق ’یہ نوجوان متاثرین مسلسل استحصال کا شکار تھیں۔ ان کا روزگار بھی خطرے میں تھا، اس لیے انھیں اکثر وہی کرنا پڑتا تھا جو انھیں کہا جاتا تھا۔‘

’ہم گہرے ذہنی صدمے کے ساتھ زندگی گزار رہے ہیں‘

مشرقی یورپ سے تعلق رکھنے والی ایک اور ماڈل، سیمونا (فرضی نام)، نے بی بی سی کو بتایا کہ جیفری ایپسٹین نے ان کے ساتھ 200 سے زائد مرتبہ ریپ کیا۔

سیمونا کا کہنا ہے کہ ’لوگ سمجھتے ہیں کہ ہمیں اس سب سے کوئی فائدہ حاصل ہوا، یا ہم نے مالی مفاد یا اثر و رسوخ کے لیے اس استحصال کو قبول کیا، لیکن یہ درست نہیں۔ اس سب کے نتیجے میں ہمیں ایک گہرا ذہنی صدمہ ملا ہے۔‘

اُن کے مطابق جب وہ 20 برس کی تھیں اور نیویارک میں ایک ماڈلنگ ایجنسی کے ساتھ معاہدے کے تحت کام کر رہی تھیں، تو اِسی دوران اُن کی پہلی ملاقات ایپسٹین سے ہوئی۔ سیمونا کا کہنا ہے کہ ایپسٹین نے انھیں اپنی ’اچھی دوست‘ فیتھ کیٹس سے متعارف کروانے کی پیشکش کی۔

اس وقت فیتھ کیٹس دنیا کی بڑی ماڈلنگ ایجنسیوں میں شمار ہونے والی 'نیکسٹ مینجمنٹ' کی ڈائریکٹر تھیں۔ وہ گذشتہ سال دسمبر میں اپنے انتظامی عہدے سے الگ ہو گئیں، تاہم قانونی طور پر اب بھی وہ کمپنی کے بورڈ میں شامل ہیں۔

سیمونا کو یاد ہے کہ اس ملاقات کے دوران فیتھ کیٹس نے انھیں پلاسٹک سرجری کروانے کا مشورہ دیا اور ایپسٹین کو ایک سرجن کی تفصیلات بھی بھیجیں۔

سیمونا کا کہنا ہے کہ فیتھ کیٹس سے ملاقات کے بعد ایپسٹین نے انھیں ماڈلنگ چھوڑنے پر آمادہ کیا۔ بعد ازاں، روزا اور دیگر متاثرین کی طرح سیمونا بھی ایپسٹین کی معاون بن گئیں۔

ان کا دعویٰ ہے کہ تقریباً دو سال تک ایپسٹین نے نہ صرف ان کا ریپ کیا بلکہ ان کی زندگی کے تقریباً ہر پہلو پر کنٹرول بھی برقرار رکھا۔

امریکی محکمہ انصاف کی فائلوں سے معلوم ہوتا ہے کہ ایپسٹین نے فیتھ کیٹس سے مزید پانچ ماڈلز سے ملاقات کرنے کی درخواست کی تھی، تاہم یہ واضح نہیں کہ ان میں سے کتنی ملاقاتیں عملی طور پر ہوئیں۔

فیتھ کیٹس کے وکلا نے بی بی سی کو بتایا کہ ’جیفری ایپسٹین لوگوں کو اپنے اثر میں لینے اور دھوکا دینے میں ماہر تھا۔ فیتھ کیٹس بھی ان افراد میں شامل تھیں جنھیں ایپسٹین نے گمراہ کیا۔ اگر انھیں اُس وقت وہ حقائق معلوم ہوتے جو آج سب کو معلوم ہیں تو وہ کبھی اس کے ساتھ تعلق نہ رکھتیں۔‘

وکلا نے یہ بھی کہا کہ فیتھ کیٹس نے کبھی کسی ماڈل کو پلاسٹک سرجری کروانے کا مشورہ نہیں دیا۔

بی بی سی نے نیکسٹ مینجمنٹ سے بھی مؤقف جاننے کے لیے رابطہ کیا، تاہم کمپنی کی جانب سے کوئی جواب موصول نہیں ہوا۔

دوسری جانب نیویارک کے ریاستی سینیٹر زیلنر مائری کا کہنا ہے کہ اگر ان کا مجوزہ قانون منظور ہو جاتا ہے تو ایسے افراد کو بھی جوابدہ ٹھہرایا جا سکے گا جو ماڈلنگ ایجنسیاں چلاتے تھے اور ماڈلز کو ایپسٹین کے پاس بھیجتے تھے، جبکہ انھیں اس کے مبینہ طرزِ عمل کا علم تھا یا ہونا چاہیے تھا۔

زیلنر مائری نے کہا کہ ’جب یہ بل قانون بن جائے گا تو اگر آپ کسی ایجنسی کی قیادت کر رہے تھے، ماڈلز کو ایپسٹین کے پاس بھیج رہے تھے، اور آپ کو معلوم تھا یا معلوم ہونا چاہیے تھا کہ وہ (ایپسٹین) کیا کر رہا ہے، تو آپ کو جوابدہ ٹھہرایا جائے گا۔‘

روزا کو امید ہے کہ اپنی کہانی بیان کرکے وہ دیگر متاثرین کو بھی سامنے آنے اور اپنی آواز بلند کرنے کی ترغیب دے سکیں گی۔

انھوں نے کہا کہ ’بہت سے متاثرین خوف کی وجہ سے کبھی بات نہیں کرتے۔ اپنے تمام ساتھی متاثرین سے میں یہی کہنا چاہتی ہوں: آپ مجھے جانتے ہیں، میرا نام جانتے ہیں، مجھ سے رابطہ کیجیے۔‘

اضافی رپورٹنگ اینیکا گروسر

BBC World Service کی نئی ایپ ڈاؤن لوڈ کریں۔

'BBC News اردو' ایڈیشن کا انتخاب کریں اور نیوز الرٹس، تحقیقاتی اور تفصیلی رپورٹس، سب کچھ ایک ہی جگہ پر حاصل کریں۔

نوٹ: نئی ایپ برطانیہ اور امریکہ میں دستیاب نہیں ہے اور اس کا انگریزی زبان میں ایڈیشن موجود نہیں۔