اکتوبر میں ریاض ایئرپورٹ پر 20 حملے ہوئے، حوثیوں نے کشیدگی میں کمی کے لیے ملاقات کی تجویز مسترد کر دی: سعودی حکام

لائیو کوریج

1. 14 اکتوبر 2026ریاض میں میزائل کے ٹکڑے گرنے سے چار افراد زخمی، 15 گھروں کو بھی نقصان پہنچا: سعودی سول ڈیفنس

   

   ،تصویر کا ذریعہSaudi Press Agency

   سعودی سول ڈیفینس کے مطابق حوثیوں کی جانب سے داغے گئے دو کروز میزائلوں کو روکنے کے دوران ریاض میں 15 گھروں کو نقصان پہنچا اور چار افراد زخمی ہوئے۔

   بی بی سی عربی کے مطابق سعودی عرب کی سول ڈیفینس نے ایک بیان میں کہا کہ میزائل روکنے کی کارروائی کے نتیجے میں ملبہ دھران شہر کے رہائشی علاقے میں گرا، جس میں آرامکو کا ہیڈکوارٹر ہے۔ ان میزائلوں کا ملبہ گرنے سے ایک مرد، دو خواتین اور ایک بچہ زخمی ہوئے۔

   دوسری جانب مشرقی صوبے کے شہر ظہران میں آرامکو کی ایک انتظامی عمارت کو نشانہ بنایا گیا ہے جس کے نتیجے میں آگ لگ گئی۔

   سرکاری سعودی خبر رساں ایجنسی ایس پی اے کے مطابق سعودی وزارتِ توانائی کے ایک ذریعے نے بتایا کہ اس واقعے میں کوئی جانی نقصان نہیں ہوا۔

   خبر رساں ادارے روئٹرز کے مطابق ایک ذریعے نے بتایا ہے کہ آرامکو کے ملازمین کو بدھ کے روز گھر سے کام کرنے کی ہدایت کی گئی تھی

   یاد رہے کہ یہ پیش رفت ایسے وقت میں ہوئی ہے جب سعودی ولی عہد محمد بن سلمان کی صدارت میں ہونے والے سعودی کابینہ کے اجلاس میں کہا گیا کہ ایران کی حمایت یافتہ گروہ اپنی حالیہ مہلک کارروائیوں کے نتائج بھگتے گا۔

   یاد رہے کہ ہفتے کے روز ریاض کے شاہ خالد بین الاقوامی ہوائی اڈے پر ایک میزائل حملے میں 13 افراد ہلاک ہوئے تھے، جبکہ اگلے روز اسی نوعیت کے ایک اور حملے میں ایک شخص جان سے ہاتھ دھو بیٹھا تھا۔

2. 14 اکتوبر 2026تیل کی قیمتیں جان بوجھ کر بڑھانے کی کوشش کی جا رہی ہے، سعودی عرب پر حملوں کو ’کبھی فراموش نہیں کروں گا: ٹرمپ

   

   ،تصویر کا ذریعہRoberto Schmidt/Getty Images

   امریکی صدر ڈونلڈ ٹرمپ نے اپنے ایک بیان میں یمن کے حوثیوں پر الزام عائد کیا ہے کہ وہ امریکی وسط مدتی انتخابات سے قبل جان بوجھ کر تیل کی قیمتیں بڑھانے کی کوشش کر رہے ہیں۔ ٹرمپ نے ساتھ ہی خبردار کیا ہے کہ وہ سعودی عرب پر ہونے والے ان کے حملوں کو ’کبھی فراموش نہیں کریں گے۔‘

   صدر ٹرمپ کا یہ بیان ایسے وقت میں سامنے آیا ہے جب خطے میں امریکہ اور ایران کے درمیان جنگ کے باعث تنازع مزید پھیل رہا ہے۔

   خبر رساں ادارے روئٹرز کے مطابق ٹرمپ نے یہ بھی واضح کیا کہ ان کی تنبیہ صرف تین نومبر کو ہونے والے وسط مدتی انتخابات تک محدود نہیں ہو گی۔

   انھوں نے کہا کہ ’میں انتخابات کے بعد بھی موجود رہوں گا، اور میں کبھی نہیں بھولوں گا۔‘

   ٹرمپ نے ٹروتھ سوشل پر ایک پوسٹ میں حوثیوں پر الزام عائد کرتے ہوئے لکھا کہ ’حوثی بہت بُرا رویہ اختیار کر رہے ہیں اور انھوں نے ایران کی ایما پر حملے دوبارہ شروع کر دیے ہیں، جبکہ گزشتہ سال یمن میں امریکی حملوں کے بعد نسبتاً سکون کا ایک دور دیکھا گیا تھا۔‘

   منگل کے روز ٹرمپ نے صحافیوں کو بتایا کہ ممکن ہے کہ وہ ترکی کے صدر طیب اردوغان سے سعودی مفادات کے حق میں مداخلت کرنے کی درخواست کریں۔

   ٹرمپ نے دعویٰ کیا کہ ’میرے خیال میں صدر اردوغان وہی کریں گے جو میں ان سے کہوں گا۔‘

3. 14 اکتوبر 2026سعودی فوجی اتحاد کا سعودی عرب کے مختلف شہروں میں حوثیوں کے حملے ناکام بنانے کا دعویٰ

   

   ،تصویر کا ذریعہGetty Images

   سعودی عرب کی قیادت میں فوجی اتحاد نے دعویٰ کیا ہے کہ منگل کی شب حوثیوں کی جانب سے سعودی عرب کے مختلف شہروں کی جانب داغے جانے والے کروز، بیلسٹک میزائل اور ڈرونز کو روک کر تباہ کر دیا گیا ہے۔

   فوجی اتحاد کے ترجمان میجر جنرل ترکی المالکی نے ایکس پر لکھا کہ سعودی عرب کے دارالحکومت ریاض اور جنوبی علاقوں کی جانب داغے جانے والے تین کروز میزائل اور دو ڈرونز کو روک کر تباہ کر دیا گیا۔

   اُنھوں نے دعویٰ کیا کہ ظہران شہر کی جانب حوثیوں کی جانب سے داغے گئے ایک بیلسٹک میزائل کو بھِی روک کر تباہ کر دیا گیا۔

   اُن کا کہنا تھا کہ اس میزائل کا ملبہ شہری آبادی پر گرا ہے جس کے بعد مقامی انتظامیہ متحرک ہے۔

   ترکی المالکی کا کہنا تھا کہ حوثیوں کی جانب سے حرض کی طرف داغا گیا بیلسٹک میزائل فضا ہی میں تباہ کر دیا گیا۔

   ریاض کی ایک مرکزی سڑک پر چلتے ہوئے ایک عینی شاہد نے اے ایف پی کو بتایا، ’میں نے ایک شے (پروجیکٹائل) کو ایک شاپنگ مال کے اوپر آسمان سے گزرتے ہوئے دیکھا۔ اس کے پیچھے پیلی روشنی کی ایک لکیر اور پھر دھواں رہ گیا، اور اس کے فوراً بعد ہم نے دھماکے کی آواز سنی۔‘

   نام ظاہر نہ کرنے کی شرط پر بات کرتے ہوئے اُنھوں نے کہا، ’لوگ خاموش تھے۔ کوئی کچھ نہیں کہہ رہا تھا۔ ہم خوفزدہ تھے اور سب آسمان کی طرف دیکھ رہے تھے۔‘

4. 14 اکتوبر 2026بلوچستان میں تین مختلف واقعات میں دو سگے بھائیوں سمیت 12 افراد کی ہلاکت, محمد کاظم، بی بی سی اردو ڈاٹ کام، کوئٹہ

   

   ،تصویر کا ذریعہGetty Images

   پاکستان کے صوبہ بلوچستان کے تین مختلف علاقوں میں منگل کے روز پیش آنے والے واقعات میں دو سگے بھائیوں سمیت 12 افراد ہلاک ہو گئے ہیں۔

   ان میں سے پانچ افراد کی لاشیں ضلع ڈیرہ بگٹی شمالی کے علاقے سوئی سے ملیں جبکہ پانچ افراد کی لاشوں کو پنجگور شہر کے ڈسٹرکٹ ہیڈکوارٹر ہسپتال منتقل کیا گیا۔

   پولیس حکام کے مطابق ان میں سے دو افراد کی لاشیں ضلع بارکھان سے ملیں جن کو نامعلوم افراد نے گولی مارکر ہلاک کیا تھا۔

   فون پر رابطہ کرنے پر بارکھان پولیس کے ایس ایچ او محمد اسلم نے اس کی تصدیق کی تاہم انھوں نے بتایا کہ دونوں افراد کی ہلاکت کا واقعہ ان کے تھانے کی حدود میں پیش نہیں آیا۔

   تاہم کسی اور علاقے میں دو افراد کی لاشوں کی اطلاع ملنے پر ان کی لاشوں کو ہسپتال منتقل کرنے کے لیے ایمبولینس بھیجوائی گئی۔

   انھوں نے کہا کہ مارے جانے والے دونوں افراد سگے بھائی تھے اور یہ بتایا جا رہا ہے کہ وہ دونوں ضلع بارکھان کے علاقے بالا ڈاکہ میں سکیورٹی ڈیوٹی پر مامور تھے۔

   ان کا کہنا تھا کہ دونوں افراد کے مارے جانے کے محرکات تاحال معلوم نہیں ہو سکے ہیں۔

   ضلع کوہلو کے علاقے گرسنی کے پولیس کے ایس ایچ او نہال خان نے بتایا کہ مارے جانے والے دونوں افراد کا تعلق کوہلو سے تھا لیکن ان کی ہلاکت ضلع بارکھان میں ہوئی۔

   ڈیرہ بگٹی میں سوئی کے علاقے سے پانچ افراد کی لاشیں سوئی ٹاؤن سے چار پانچ کلومیٹر دور سے ملیں جن کا تعلق ڈیرہ بگٹی سے تھا۔

   ڈیرہ بگٹی پولیس کے سربراہ سے رابطے کی کوشش کی گئی لیکن وہاں موجود نہ ہونے کی وجہ سے ان سے رابطہ نہیں ہوسکا۔

   تاہم پولیس کے ایک اہلکار امیر حمزہ نے سوئی ٹائون کے قریب ان پانچ افراد کے مارے جانے کی تصدیق کرتے ہوئے بتایا کہ ان افراد کی لاشیں ان کے ورثا کے حوالے کردی گئی ہیں۔ انھوں نے اس حوالے سے مزید معلومات فراہم نہیں کیں۔

   ادھر ایران سے متصل ضلع پنجگور کے ہیڈ کوارٹر پنجگور شہر میں بھی پانچ افراد کی لاشیں ڈسٹرکٹ ہیڈ کوارٹر ہسپتال منتقل کی گئیں۔

   پنجگور سٹی پولیس کے ایس ایچ او توفیق احمد نے پانچ افراد کی لاشوں کی ہسپتال منتقلی کی تصدیق کی تاہم انھوں نے ان کے مارے جانے کے محرک کے بارے میں لاعلمی کا اظہار کیا۔

   ایک اور پولیس آفیسر نے نام ظاہر نہ کرنے کی شرط پر بتایا کہ مارے جانے والے پانچ افراد میں سے تاحال ایک کی شناخت ہوئی ہے۔

   تین مختلف علاقوں میں ان 12 افراد کے مارے جانے کے محرکات کے حوالے سے بلوچستان کے وزیر داخلہ میرضیاء اللہ لانگو اور وزیر اعلیٰ کے معاون برائے میڈیا شاہد رند سے بھی رابطے کی کوشش کی گئی لیکن ان سے رابطہ نہیں ہو سکا۔

5. 14 اکتوبر 2026اہم خبروں کا خلاصہ

   بی بی سی اردو کی لائیو کوریج جاری ہے تاہم بدھ کے روز خبروں کا سلسلہ آگے بڑھانے سے پہلے گزشتہ روز کی اہم خبروں کے خلاصے پر ایک نظر ڈال لیتے ہیں۔

   • ایران نے اعلان کیا ہے کہ اس نے تہران میں برطانوی سفیر کو وزارتِ خارجہ طلب کیا ہے اور دھمکی دی ہے کہ وہ لندن کے ساتھ تعلقات پر ’سنجیدگی سے نظر ثانی‘ کر سکتا ہے۔ ایرانی میڈیا کے مطابق برطانوی سفیر کو طلب کرنے کی وجہ برطانیہ کی 'فیئر فورڈ ایئر بیس' پر پیش آنے والے سکیورٹی واقعے کے حوالے سے ایران پر لگائے گئے الزامات پر احتجاج کرنا تھا۔
   • سعودی قیادت میں قائم فوجی اتحاد نے منگل کے روز اعلان کیا کہ اس نے یمن کے دارالحکومت صنعا، الحدیدہ اور ذمار میں ایندھن کے ذخیرہ کرنے اور نقل و حمل کی تنصیبات پر حملے کیے ہیں۔
   • امریکی صدر ڈونلڈ ٹرمپ نے کہا ہے کہ وہ ترک صدر اردوغان کو حوثیوں کے خلاف کارروائی کا کہہ سکتے ہیں۔ صحافیوں سے گفتگو کرتے ہوئے صدر ٹرمپ کا کہنا تھا کہ یمن کے حوثی سعودی مفادات کو نشانہ بنا کر ’انتہائی برا‘ رویہ اختیار کیے ہوئے ہیں۔
   • حوثیوں کے قریب سمجھے جانے والے میڈیا نے رپورٹ کیا ہے کہ یمن کے دارالحکومت صنعا میں واقع یمنی آئل کمپنی کی تنصیبات پر ایک حملہ ہوا ہے۔
   • پشاور پولیس نے دعویٰ کیا ہے کہ پشاور کے علاقے باڑہ میں صورتحال مکمل طور پر قابو میں ہے اور وہاں کوئی پولیس اہلکار اغوا نہیں ہوا۔ ترجمان پشاور پولیس کے بیان میں کہا گیا ہے کہ عوام بے بنیاد افواہوں پر کان نہ دھریں، باڑہ صورتحال مکمل قابو میں ہے۔
   • وزیرِ اعظم پاکستان شہباز شریف نےدعویٰ کیا ہے کہ 2018 تک ملک میں دہشت گردی کا خاتمہ ہو چکا تھا، اُنھوں نے الزام لگایا کہ پی ٹی آئی کی حکومت میں دہشت گردوں کو خیبر پختونخوا میں لایا گیا۔
   • ترکی کے صدر رجب طیب اردوغان نے سعودی عرب کے ولی عہد محمد بن سلمان سے ٹیلی فونک پر گفتگو کی ہے۔ ترک صدر کے دفتر کے مطابق گفتگو کے دوران اردوغان نے محمد بن سلمان سے کہا کہ ترکی حوثیوں کے خلاف سعودی عرب کے ساتھ کھڑا ہے۔
   • بین الاقوامی تنظیم ہلالِ احمر نے خبردار کیا ہے کہ مشرقِ وسطیٰ میں جاری لڑائی کے شہریوں پر ’تباہ کن‘ اثرات ہو سکتے ہیں۔

6. 14 اکتوبر 2026بی بی سی اردو کے نئے لائیو پیج میں خوش آمدید

   بی بی سی اردو کے نئے لائیو پیج میں خوش آمدید۔ اس صفحے پرآپ کو پاکستان سمیت دنیا بھر سے اہم تجزیے اور تازہ ترین خبریں پڑھنے کو ملتی ہیں۔

   اگر آپ 13 اکتوبر کی خبروں کو پڑھنا چاہیں تو اس لنک پر کلک کریں۔