’آپ یہ اپنے باس سے کیوں نہیں کہتے؟‘: امریکی الیکشن میں شکست کی وجہ جنگ کو قرار دینے پر قالیباف کا وینس سے سوال

لائیو کوریج

1. 5 نومبر 2026امریکی مڈٹرم انتخابات کے نتائج اور یوکرین سے امن معاہدے سے متعلق روسی میڈیا کی قیاس آرائیاں, سٹیو روزنبرگ، مدیر برائے روس

   روسی اخبار کومرسانت نے پیش گوئی کی ہے کہ جب تک صدر ڈونلڈ ٹرمپ کو کانگریس کی حمایت حاصل ہے، وہ ’آئندہ دو ماہ کے دوران یوکرین تنازع کے حل کے لیے سنجیدہ کوششیں کریں گے۔‘

   اخبار میں شائع ہونے والے ایک تجزیاتی مضمون میں روسی حکام پر زور دیا گیا کہ وہ ’اس موقع سے بھرپور فائدہ اٹھائیں۔‘

   تاہم کریملن نے اس بات کی تردید کی ہے کہ وہ اپنی حکمتِ عملی کا انحصار امریکہ کی اندرونی سیاسی صورتِ حال پر کر رہا ہے۔

   صدر ولادیمیر پوتن کے ترجمان دمیتری پیسکوف نے صحافیوں کے ساتھ اپنی روزانہ کی بریفنگ میں مجھ سے کہا: ’یوکرین کے حوالے سے روسی فیڈریشن کے مفادات کا تعین امریکہ کی صورتِ حال کے مطابق نہیں کیا جا سکتا۔

   ’ہمارے مفادات ہر صورت میں محفوظ رہیں گے۔ روس ایک مکمل خود مختار ریاست ہے۔‘

   کومرسانت کے مطابق جب کانگریس کا کنٹرول ڈیموکریٹس کے پاس چلا جائے گا تو ’ڈیموکریٹس اپنی یہ کوشش بڑھا دیں گے کہ ٹرمپ ماسکو سے مذاکرات نہ کر سکیں، وہ یوکرین کو براہِ راست امریکی فوجی امداد کی بحالی کا مطالبہ کریں گے، اور روس اور اس کے اہم تجارتی شراکت داروں کے خلاف نئی پابندیاں تجویز کریں گے۔‘

   آج ایک اور روسی اخبار، نیزاویسیمایا گزیٹا نے تجویز دی ہے کہ یوکرین سے متعلق کسی امن معاہدے کے لیے ’نومبر اور دسمبر بہترین وقت ہوں گے۔‘

2. 5 نومبر 2026کانگریس میں ڈیموکریٹس کی بڑی کامیابی کے بعد اب آگے کیا ہو گا؟

   

   ،تصویر کا ذریعہBloomberg via Getty Images

   ڈیموکریٹک پارٹی نے کانگریس کا کنٹرول حاصل کر لیا ہے۔

   امریکی انتخابات کی اصطلاح میں اسے ’نیلی لہر‘ کہا جا رہا ہے کیوں کہ امریکہ میں ڈیموکریٹک پارٹی کی نمائندہ رنگت نیلی سمجھی جاتی ہے، اور جب وہ مختلف ریاستوں اور حلقوں میں توقع سے کہیں زیادہ کامیابیاں حاصل کرے تو اسے ’نیلی لہر‘ کہا جاتا ہے۔

   تمام ووٹوں کی گنتی ابھی مکمل نہیں ہوئی

   ہم ابھی بھی سینیٹ کی دو اہم نشستوں (الاسکا اور مسیسیپی) اور ایوانِ نمائندگان اور گورنروں کے درجنوں مقابلوں کے نتائج کے منتظر ہیں۔

   جب تمام نتائج آ جائیں گے تو ہمیں کانگریس کے دونوں ایوانوں کی مکمل ساخت کی زیادہ واضح تصویر ملے گی، جن پر ڈیموکریٹس ڈونلڈ ٹرمپ کی صدارت کے آخری دو برسوں کے دوران کنٹرول رکھیں گے۔

   ڈیموکریٹس کانگریس کا کنٹرول کب سنبھالیں گے؟

   نو منتخب ڈیموکریٹس کا ایک نیا گروپ جنوری میں کانگریس میں داخل ہو گا، لیکن انھیں کچھ رکاوٹوں کا سامنا کرنا پڑ سکتا ہے۔

   اگرچہ ڈیموکریٹس کو سینیٹ اور ایوانِ نمائندگان دونوں میں کنٹرول حاصل ہو گا، تاہم ریپبلکن صدر ڈونلڈ ٹرمپ اب بھی قانون سازی کو مسترد کرنے کا اختیار رکھتے ہیں۔

   ٹرمپ کے لیے اس کے کیا معنی ہو سکتے ہیں؟

   نئی کامیابی پر خوش ڈیموکریٹس کو صدر ٹرمپ بار ہا یاد دلا چکے ہیں کہ ان کے پاس صدارتی ویٹو کا اختیار موجود ہے۔

   تاہم، ہمارے شمالی امریکہ کے نامہ نگار کے مطابق، صرف یہ حقیقت کہ بعض صدارتی اختیارات اب بھی ٹرمپ کے اختیار میں ہیں، اس بات کی ضمانت نہیں کہ ان کے پاس انھیں استعمال کرنے کی سیاسی خواہش بھی موجود ہو۔

3. 5 نومبر 2026میں کسی کے ساتھ بھی مل کر کام کرنے کے لیے تیار ہوں: عبدل السید

   

   ،تصویر کا ذریعہGetty Images

   مشی گن سے ڈیموکریٹک پارٹی کے نو منتخب سینیٹر عبدل السید نے چند لمحے قبل امریکی چینل ایم ایس ناؤ کے پروگرام ’مارننگ جو‘ میں اپنی کامیاب انتخابی مہم کے بارے میں گفتگو کی۔

   عبدل السید نے کہا کہ اگر امریکی صدر ’پیسہ عوام کی جیبوں میں پہنچانے اور میڈی کیئر فار آل‘ میں دلچسپی رکھتے ہیں تو وہ اُن کے ساتھ اور ’ہر اُس شخص کے ساتھ کام کرنے کے منتظر ہیں جو ایسا کرنا چاہتا ہو۔‘

   انھوں نے کہا کہ اُن کی انتخابی مہم کا مقصد بنیادی حقوق، نوکریوں اور ایسی آمدنی کے مطالبے پر متحد کرنے کے لیے تھی جس سے گھر کا خرچ چل سکے۔

4. 5 نومبر 2026’آپ یہ اپنے باس سے کیوں نہیں کہتے؟‘: امریکی الیکشن میں شکست کی وجہ جنگ کو قرار دینے پر قالیباف کا وینس سے سوال

   

   ،تصویر کا ذریعہGetty Images

   ایرانی پارلیمنٹ کے سپیکر محمد باقر قالیباف نے اپنے ایک بیان میں دعویٰ کیا ہے کہ ’امریکہ ’اسرائیل فرسٹ‘ پالیسی کے خاتمے کے دہانے پر موجود ہے۔‘

   باقر قالیباف نے یہ بیان امریکی نائب صدر جے ڈی وینس کے حالیہ بیان کے بعد ردِعمل میں دیا ہے جس میں جے ڈی وینس نے ریپبلکن پارٹی کی انتخابی شکست میں ایران کے ساتھ جنگ کو ایک اہم سبب قرار دیا تھا۔

   سماجی رابطے کی ویب سائٹ ایکس پر جے ڈی وینس کی پوسٹ کا حوالہ دیتے ہوئے قالیباف نے لکھا کہ ’آپ کا باس جنگ کے اگلے مرحلے کی تیاری کر رہا ہے، جبکہ امریکہ 'اسرائیل فرسٹ' پالیسی کے خاتمے کے دہانے پر کھڑا ہے۔‘

   قالیباف نے انھیں ایک ایسے ’ہارے ہوئے جواری‘ سے تشبیہ دی جو شکست کے باوجود کھیل کی میز چھوڑنے کو تیار نہیں۔

   انھوں نے ڈونلڈ ٹرمپ کا حوالہ دیتے ہوئے مزید کہا کہ ’تھیٹر کی تقریریں چھوڑیں۔ آپ یہ بات اپنے باس سے کیوں نہیں کہتے؟‘

   یاد رہے کہ جے ڈی وینس نے کہا تھا کہ ایران کے ساتھ جنگ امریکی وسط مدتی انتخابات میں ریپبلکنز کی شکست کے اہم عوامل میں سے ایک تھی۔

   جے ڈی وینس نے کیا کہا تھا

   امریکی نائب صدر جے ڈی وینس نے بدھ کے روز اپنی جماعت کی وسط مدتی انتخابات میں شکست کا ذمہ دار براہِ راست ایران کے ساتھ جنگ کو ٹھہرایا تھا۔

   سیاسی مبصرین نے اسے ممکنہ طور پر 2028 کے صدارتی انتخاب سے قبل خود کو صدر ڈونلڈ ٹرمپ سے الگ شناخت دینے کی کوشش قرار دیا ہے۔

   وینس نے ایکس پر 600 الفاظ پر مشتمل بیان میں لکھا کہ ’اگر آپ یہ مؤقف اختیار کرنا چاہتے ہیں کہ اس جنگ کی قیمت کے طور پر اگلے چھ برس کے لیے سینیٹ سے محرومی قابلِ قبول تھی تو ضرور کریں۔ کم از کم یہ ایک دیانت دار مؤقف ہوگا۔‘

   یہ غیر معمولی بیان تھا۔ حالیہ امریکی سیاسی تاریخ میں ایسی مثالیں کم ہی ملتی ہیں کہ کوئی موجودہ نائب صدر خارجہ پالیسی کے ایک اہم معاملے پر صدر سے اس قدر کھل کر اختلاف کرے۔

   مزید حیران کن بات یہ رہی کہ صدر ٹرمپ نے بھی اس رائے سے اتفاق کیا کہ وسط مدتی انتخابات کے نتائج پر جنگ نے ’بڑی حد تک‘ اثر ڈالا۔ تاہم انھوں نے یہ بھی کہا کہ اگر انھیں دوبارہ وہی فیصلہ کرنا پڑے تو وہ پھر یہی راستہ اختیار کریں گے۔

   یہ ردعمل اس بات کا ابتدائی اشارہ سمجھا جا رہا ہے کہ ٹرمپ، جو عموماً اپنے قریبی ساتھیوں سے مکمل وفاداری کی توقع رکھتے ہیں، وینس کو 2028 کی ممکنہ صدارتی مہم کے لیے نسبتاً زیادہ آزادی دے سکتے ہیں۔

5. 5 نومبر 2026امریکی وسط مدتی انتخابات، کن مقابلوں کا فیصلہ باقی ہے

   

   ،تصویر کا ذریعہGetty Images

   امریکہ میں وسط مدتی انتخابات کے بیشتر مقابلوں کے نتائج سامنے آ چکے ہیں، تاہم ملک بھر میں کئی مقامات پر ووٹوں کی گنتی اب بھی جاری ہے۔

   سینیٹ میں الاسکا اور مسیسیپی کی نشستوں کے نتائج کا ابھی انتظار ہے۔ گورنر کے دو انتخابات، یعنی ریاستی گورنر کے عہدے کے لیے مقابلے، بھی اب تک جاری ہیں۔ یہ مقابلے کنساس اور الاسکا میں ہیں۔

   ایوانِ نمائندگان میں، جہاں تمام نشستوں پر انتخابات ہوئے، 48 حلقوں کے نتائج ابھی تک سامنے نہیں آئے ہیں۔

   ابھی تک جن حلقوں کے نتائج کا انتظار ہے ان میں کولوراڈو 5، مونٹانا 1، نیویارک 17، نارتھ کیرولائنا 1، ساؤتھ کیرولائنا 1، ورجینیا 1، الاسکا 1 اور ایریزونا 2 شامل ہیں۔

   اس کے ساتھ کولوراڈو 4، فلوریڈا 7، فلوریڈا 9، فلوریڈا 13، فلوریڈا 27، مین 2،مینیسوٹا 1، نیویارک 21 اور اوہائیو 10کے حلقوں کے نتائج کا بھی انتظار کیا جا رہا ہے۔

   اس کے علاوہ ورجینیا 5، ایریزونا 1،ایریزونا 6، لوزیانا 6 اور ٹینیسی 9 کے حلقوں کے نتائج کا فیصلہ بھی باقی ہے۔

6. 5 نومبر 2026امریکہ کے وسط مدتی انتخابات اور ٹرمپ سے ملاقات سے قبل چین کا محتاط ردِعمل, لورا بیکر، بی بی سی نیوز

   

   ،تصویر کا ذریعہReuters

   صدر شی جن پنگ اس ماہ ڈونلڈ ٹرمپ سے ملاقات کی تیاری کر رہے ہیں اور اس تناطر میں عام حیال یہی ہے کہ بیجنگ بظاہر واشنگٹن کے ساتھ ایک مستحکم تعلق برقرار رکھنے کا خواہاں ہے۔

   چین اس بات سے آگاہ ہو گا کہ کانگریس پر کسی بھی جماعت کا کنٹرول ہو، وائٹ ہاؤس ہی امریکہ اور چین کے تعلقات پر سب سے زیادہ اثر و رسوخ برقرار رکھے گا۔

   چینی وزارتِ خارجہ کی ترجمان ماؤ ننگ نے بدھ کو ایک پریس بریفنگ میں کہا کہ بیجنگ ایک تعمیری اور سٹریٹیجک طور پر مستحکم چین امریکہ تعلقات قائم کرنا چاہتا ہے۔

   وسط مدتی انتخابات پر یہ محتاط ردِعمل ان چیلنجز اور مواقع دونوں کو چھپاتا ہے جو ٹرمپ کی بھاری شکست نے شی جن پنگ کے لیے پیدا کیے ہیں۔

   چینی رہنما اپنی ملاقات کے دوران ٹرمپ کے ساتھ تجارتی معاہدے کے لیے بھرپور کوشش کریں گے اور تجزیہ کاروں کے ذہن میں اہم سوال یہ ہے کہ کیا اس کا اثر تائیوان پر پڑ سکتا ہے؟

   چین بحیرۂ جنوبی چین میں امریکہ اور اس کے اتحادیوں کا امتحان لیتا رہا ہے اور خود مختار جزیرے تائیوان کے اردگرد سمندری اور فضائی حدود میں اپنی موجودگی مسلسل بڑھا رہا ہے، جسے بیجنگ اپنا حصہ قرار دیتا ہے۔

   واشنگٹن، تائی پے کا سب سے اہم سکیورٹی حامی ہے اور وہ تائیوان کو اربوں ڈالر مالیت کے ہتھیار فروخت کر چکا ہے جنھیں جزیرہ کسی ممکنہ چینی حملے کا دفاع کرنے کے لیے استعمال کر سکتا ہے۔

   ٹرمپ ہتھیاروں کی ان فروخت پر سوال اٹھا چکے ہیں اور یہاں تک دعویٰ بھی کر چکے ہیں کہ انھیں چین کے ساتھ مذاکرات میں سودے بازی کے ایک ذریعے کے طور پر استعمال کیا جا سکتا ہے۔

   انھوں نے جزیرے کو 14 ارب ڈالر مالیت کے ہتھیاروں کی فروخت میں بھی تاخیر کی ہے۔

   کیا شی جن پنگ ٹرمپ کو ایک پرکشش تجارتی معاہدے کی پیشکش کر سکتے ہیں اور اس کے بدلے امریکہ سے تائیوان کے بارے میں اپنا مؤقف نرم کرنے کا مطالبہ کر سکتے ہیں؟

   یہ بات قابلِ ذکر ہے کہ واشنگٹن کے ساتھ معاملات طے کرنے کے حوالے سے کمیونسٹ پارٹی بھی زیادہ معاملہ فہم ہو گئی ہے۔

   بیجنگ کی حکومت جانتی ہے کہ ایک وائٹ ہاؤس کے ساتھ کوئی معاہدہ کرنے کا یہ مطلب نہیں کہ اگلی انتظامیہ کے ساتھ بھی وہی معاہدہ برقرار رہے گا۔

   کچھ تجزیہ کاروں کا خیال ہے کہ شی جن پنگ ایک غیر متوقع امریکی صدر پر بہت زیادہ دباؤ ڈالنا بھی نہیں چاہیں گے، کہیں ایسا نہ ہو کہ اس کے نتائج توقع سے برعکس ملیں۔

7. 5 نومبر 2026امریکہ کے وسط مدتی انتخابات میں ایوان نمائندگان اور سینیٹ کی موجودہ صورتحال

   

   ،تصویر کا ذریعہGetty Images

   امریکہ کے وسط مدتی انتخابات میں تاحال 48 نشستوں کے نتائج موصول ہونا ابھی باقی ہیں۔ ایوانِ نمائندگان کی موجودہ صورتِ حال کے مطابق اب تک ڈیموکریٹس پارٹی ایوانِ نمائندگان میں 240 نشستیں جیت چکی ہے۔

   دوسری جانب ریپبلکن پارٹی اب تک 147 نشستیں حاصل کر چکی ہے۔ یاد رہے کہ اکثریت حاصل کرنے کے لیے 218 نشستیں درکار ہوتی ہیں۔

   دوسری جانب امریکی سینیٹ میں ڈیموکریٹس پارٹی نے 52 نشستیں جبکہ ریپبلکن پارٹی نے 44 نشستیں جیتی ہیں۔

   اب تک کے نتائج کے مطابق ڈیموکریٹس کو کانگریس کے اس ایوان میں اکثریت حاصل ہو گئی ہے چاہے باقی رہ جانے والی دو نشستوں کے نتائج کچھ بھی ہوں۔

   امریکہ میں وسط مدتی انتخابات کے لائیو نتائج آپ یہاں کلک کر کے دیکھ سکتے ہیں۔

8. 5 نومبر 2026کیا تیل کی قیمتوں میں حالیہ کمی برقرار رہے گی؟, نک ایڈسر، بی بی سی نیوز

   

   ،تصویر کا ذریعہReuters

   امریکہ کے وسط مدتی انتخابات کے نتائج کے سامنے آنے کے بعد سے تیل کی قیمت میں کمی آتی جا رہی ہے۔

   آکسفورڈ انسٹی ٹیوٹ فار انرجی سٹڈیز میں سینئر ریسرچ فیلو بل فیرن پرائس کہتے ہیں کہ ’تیزی سے آنے والی کمی سے یہ تاثر ملتا ہے کہ مارکیٹ امریکہ اور ایران کے درمیان سفارتی پیش رفت کی توقع کر رہی ہے۔‘

   وہ مزید کہتے ہیں کہ ’میرا خیال ہے کہ شاید یہ نتیجہ اخذ کرنا ابھی کچھ قبل از وقت ہو۔‘

   فیرن پرائس نے بی بی سی کے پروگرام ٹو ڈے میں گفتگو کرتے ہوئے کہا کہ ’گزشتہ چند مہینوں کے دوران ہم کئی مرتبہ اس مرحلے سے گزر چکے ہیں، اور امریکہ اور ایران کے درمیان یہ مذاکرات بہت پیچیدہ ہیں۔‘

   انھوں نے مزید کہا کہ ’ایران آبنائے ہرمز کو مکمل طور پر کھولنے اور تجارتی جہازوں کو آزادانہ آمد و رفت کی اجازت دینے کے بدلے زیادہ سے زیادہ قیمت حاصل کرنے کی کوشش کرے گا۔‘

   یاد رہے کہ ایران جنگ کے آغاز کے نتیجے میں آبنائے ہرمز عملاً بند ہو گئی تھی۔

   جنگ سے قبل معمول کے حالات میں دنیا کے تقریباً 20 فیصد تیل اور مائع قدرتی گیس کی ترسیل اسی راستے سے ہوتی رہی ہے،اور یہی وہ وجہ تھی جس کے باعث عالمی توانائی کی قیمتوں میں شدید اضافہ ہوا۔

9. 5 نومبر 2026اب تک کی اہم خبروں کا خلاصہ

   امریکہ کے وسط مدتی انتخابات پر بی بی سی کی لائیو کوریج جاری ہے تاہم آگے بڑھنے سے قبل ایک نظر صبح سے اب تک کی اہم خبروں پر،

   • ایران کے ساتھ جنگ میں کمی یا ممکنہ خاتمے کی توقعات کے باعث عالمی منڈی میں تیل کی قیمتیں مزید گر گئیں۔ جمعرات کو ایشیائی تجارت کے دوران برینٹ خام تیل کی قیمت 0.9 فیصد کم ہو کر 93.74 ڈالر فی بیرل جبکہ امریکی خام تیل تقریباً 1.5 فیصد کمی کے بعد 86.83 ڈالر فی بیرل تک آ گیا۔
   • امریکہ کے وسط مدتی انتخابات میں ری پبلکن امیدواروں کی مہنگی انتخابی اشتہاری مہم بھی مطلوبہ نتائج نہ دے سکی۔ سینیٹ کی پانچ اہم ریاستوں میں ری پبلکن امیدواروں نے اپنے ڈیموکریٹک حریفوں کے مقابلے میں 28 کروڑ ڈالر سے زائد اضافی رقم اشتہارات پر خرچ کی، تاہم ان ریاستوں میں انھیں شکست کا سامنا کرنا پڑ رہا ہے۔
   • جنوبی ایشیا کے امور پر نظر رکھنے والے تجزیہ کار مائیکل کگلمین کا کہنا ہے کہ کانگریس پر ڈیموکریٹس کے متوقع کنٹرول کے بعد امریکی صدر ڈونلڈ ٹرمپ اور ان کے خاندان کے کاروباری معاملات کی جانچ پڑتال میں اضافہ ہو سکتا ہے، جس کے اثرات ٹرمپ انتظامیہ کی تجارتی سفارت کاری پر بھی پڑ سکتے ہیں۔
   • امریکی ایوانِ نمائندگان میں ڈیموکریٹک رہنما حکیم جیفریز نے سپیکر شپ کے لیے اپنی امیدواری کا اعلان کر دیا ہے۔ اگر وہ منتخب ہو جاتے ہیں تو امریکی تاریخ کے پہلے سیاہ فام سپیکر بن جائیں گے۔
   • امریکی ڈیموکریٹ رکنِ کانگریس رو کھنہ نے کہا ہے کہ وہ نائب صدر جے ڈی وینس کی اس رائے سے اتفاق کرتے ہیں کہ ریپبلکنز کی وسط مدتی انتخابات میں شکست کی وجوہات میں ایران کے خلاف جنگ اور جیفری ایپسٹین معاملے کو چھپانے سے جڑی بدعنوانی شامل ہیں۔
   • امریکی نائب صدر جے ڈی وینس نے بدھ کے روز اپنی جماعت کی وسط مدتی انتخابات میں شکست کا ذمہ دار براہِ راست ایران کے ساتھ جنگ کو ٹھہرا کر واشنگٹن میں ہلچل مچا دی ہے۔
   • امریکی ریاست مسی سپی میں سینیٹ کی نشست کے لیے کانٹے دار مقابلے کے نتائج کا اعلان پیر تک مؤخر ہونے کا امکان ہے۔

10. 5 نومبر 2026ٹرمپ کو جوابدہ ٹھہرایا جانا چاہیے: برنی سینڈرز کا مطالبہ

    

    ،تصویر کا ذریعہReuters

    امریکہ کے سینیئر سینیٹر برنی سینڈرز نے، کانگریس پر ڈیموکریٹس کے کنٹرول کے بعد، کہا ہے کہ صدر ڈونلڈ ٹرمپ کو اپنی پالیسیوں اور اقدامات پر جوابدہ ٹھہرایا جانا چاہیے۔

    بی بی سی کے پروگرام نیوز نائٹ میں ان سے پوچھا گیا کہ کیا ڈیموکریٹس اب ٹرمپ اور ان کے خاندان کے خلاف تحقیقات یا سیاسی کارروائی کا رخ کریں گے؟ اس پر برنی سینڈرز کا مختصر جواب تھا: ’بالکل۔‘

    اگرچہ برنی سینڈرز آزاد حیثیت رکھتے ہیں، تاہم ان کے ڈیموکریٹک پارٹی کے ساتھ قریبی تعلقات ہیں۔ انھوں نے یہ بھی کہا کہ وسط مدتی انتخابات میں کامیابیوں کے باوجود ڈیموکریٹک پارٹی عوام میں زیادہ مقبول نہیں ہے۔

    انھوں نے کہا کہ ’ڈیموکریٹس عوام کو آخر پیش کیا کر رہے ہیں؟ آپ ہی مجھے بتائیں، جبکہ میں خود بھی اسی اتحاد کا رکن ہوں۔‘

11. 5 نومبر 2026’ہماری شکست کی وجہ جنگ ہے‘، کیا جے ڈی وینس 2028 کی صدارتی دوڑ کی تیاری کر رہے ہیں؟

    

    ،تصویر کا ذریعہReuters

    امریکی نائب صدر جے ڈی وینس نے بدھ کے روز اپنی جماعت کی وسط مدتی انتخابات میں شکست کا ذمہ دار براہِ راست ایران کے ساتھ جنگ کو ٹھہرا کر واشنگٹن میں ہلچل مچا دی۔

    سیاسی مبصرین نے اسے ممکنہ طور پر 2028 کے صدارتی انتخاب سے قبل خود کو صدر ڈونلڈ ٹرمپ سے الگ شناخت دینے کی کوشش قرار دیا ہے۔

    واشنگٹن کے سیاسی حلقوں میں یہ بات کوئی راز نہیں کہ وینس ایران جنگ کے بارے میں تحفظات رکھتے ہیں۔ اگرچہ وہ عوامی سطح پر جنگ کی حمایت کرتے رہے ہیں، تاہم اطلاعات کے مطابق وہ نجی ملاقاتوں میں انتظامیہ کے بعض عہدیداروں کے سامنے اس پالیسی سے اختلاف کا اظہار کر چکے ہیں۔

    تاہم یہ اختلافات اب تک منظرِ عام پر نہیں آئے تھے۔

    وینس نے ایکس پر 600 الفاظ پر مشتمل بیان میں لکھا کہ ’اگر آپ یہ مؤقف اختیار کرنا چاہتے ہیں کہ اس جنگ کی قیمت کے طور پر اگلے چھ برس کے لیے سینیٹ سے محرومی قابلِ قبول تھی تو ضرور کریں۔ کم از کم یہ ایک دیانت دار مؤقف ہوگا۔‘

    یہ غیر معمولی بیان تھا۔ حالیہ امریکی سیاسی تاریخ میں ایسی مثالیں کم ہی ملتی ہیں کہ کوئی موجودہ نائب صدر خارجہ پالیسی کے ایک اہم معاملے پر صدر سے اس قدر کھل کر اختلاف کرے۔

    مزید حیران کن بات یہ رہی کہ صدر ٹرمپ نے بھی اس رائے سے اتفاق کیا کہ وسط مدتی انتخابات کے نتائج پر جنگ نے ’بڑی حد تک‘ اثر ڈالا۔ تاہم انھوں نے یہ بھی کہا کہ اگر انھیں دوبارہ وہی فیصلہ کرنا پڑے تو وہ پھر یہی راستہ اختیار کریں گے۔

    یہ ردعمل اس بات کا ابتدائی اشارہ سمجھا جا رہا ہے کہ ٹرمپ، جو عموماً اپنے قریبی ساتھیوں سے مکمل وفاداری کی توقع رکھتے ہیں، وینس کو 2028 کی ممکنہ صدارتی مہم کے لیے نسبتاً زیادہ آزادی دے سکتے ہیں۔

12. 5 نومبر 2026ٹرمپ انتظامیہ کا احتساب کریں گے: حکیم جیفریز سپیکر شپ کی دوڑ میں شامل

    

    ،تصویر کا ذریعہEPA

    امریکی ایوانِ نمائندگان میں ڈیموکریٹک رہنما حکیم جیفریز نے سپیکر شپ کے لیے اپنی امیدواری کا اعلان کر دیا ہے۔ اگر وہ منتخب ہو جاتے ہیں تو امریکی تاریخ کے پہلے سیاہ فام سپیکر بن جائیں گے۔

    جنوری میں ڈیموکریٹس کے کانگریس کا کنٹرول سنبھالنے کے بعد سپیکر کا عہدہ بھی اسی جماعت کے حصے میں آئے گا۔ اپنی جماعت کے ارکان کے نام خط میں جیفریز نے کہا کہ ڈیموکریٹس نے اقلیت میں رہتے ہوئے بھی کامیابیاں حاصل کیں اور اب عوام کی مطلوبہ بڑی تبدیلیاں لانے کا وقت آ گیا ہے۔

    انھوں نے کہا کہ نئی کانگریس کو ایک ’قابلِ برداشت اور سستی امریکہ‘ کے لیے بھرپور جدوجہد کرنا ہو گی کیونکہ عام امریکی معاشی مشکلات کا شکار ہیں۔ جیفریز کا کہنا تھا کہ ایوانِ نمائندگان اب ٹرمپ انتظامیہ کے زیرِ اثر ادارے کے طور پر کام نہیں کرے گا بلکہ انتظامیہ پر آئینی نگرانی اور توازن کا کردار ادا کرے گا۔

    نیویارک سے تعلق رکھنے والے ڈیموکریٹ رہنما نے ’ٹرمپ کارٹیل‘ کا حوالہ دیتے ہوئے کہا کہ امریکی عوام کا استحصال کرنے والے یا ان سے لوٹ مار کرنے والے افراد مزید نہیں چھپ سکیں گے اور ان کا احتساب کیا جائے گا۔

    تاہم حکیم جیفریز صرف اپنی موجودہ حیثیت کی بنیاد پر سپیکر نہیں بنیں گے بلکہ انھیں ایوانِ نمائندگان کے ارکان کی ووٹنگ کے ذریعے باضابطہ طور پر منتخب ہونا ہو گا۔ حالیہ سپیکر ریپبلکن رہنما مائیک جانسن ہیں، جبکہ امریکی صدارتی جانشینی کی ترتیب میں سپیکر نائب صدر کے بعد تیسرے نمبر پر ہوتا ہے۔

13. 5 نومبر 2026ایران کے ساتھ جنگ میں کمی یا خاتمے کی توقعات کے باعث تیل کی قیمتوں میں مزید کمی

    

    ،تصویر کا ذریعہGetty Images

    ایران کے ساتھ جنگ میں کمی یا ممکنہ خاتمے کی توقعات کے باعث عالمی منڈی میں تیل کی قیمتیں مزید گر گئیں۔ جمعرات کو ایشیائی تجارت کے دوران برینٹ خام تیل کی قیمت 0.9 فیصد کم ہو کر 93.74 ڈالر فی بیرل جبکہ امریکی خام تیل تقریباً 1.5 فیصد کمی کے بعد 86.83 ڈالر فی بیرل تک آ گیا۔

    بدھ کے روز تیل کی قیمتوں میں آٹھ فیصد سے زائد کمی دیکھی گئی تھی، جب نائب صدر جے ڈی وینس نے کہا تھا کہ ایندھن کی قیمتوں پر جنگ کے اثرات ریپبلکن پارٹی کی انتخابی شکستوں کی ایک وجہ بنے۔ تیل کی قیمتیں اب دو ماہ کی کم ترین سطح پر پہنچ چکی ہیں۔

14. 5 نومبر 202640 برس بعد مسیسیپی سے ڈیموکریٹ سینیٹر منتخب ہونے کا امکان

    

    ،تصویر کا ذریعہGetty Images

    امریکہ کی ریاست مسیسیپی میں سینیٹ کی نشست کے لیے جاری سخت مقابلے میں ڈیموکریٹ امیدوار سکاٹ کولوم توجہ کا مرکز بنے ہوئے ہیں، جہاں ان اور ریپبلکن سینیٹر سنڈی ہائیڈ سمتھ کے درمیان فرق ایک ہزار سے کچھ زیادہ ووٹوں کا ہے۔

    سکاٹ کولوم اس وقت ڈسٹرکٹ اٹارنی کے طور پر خدمات انجام دے رہے ہیں جبکہ اس سے قبل وہ پراسیکیوٹر اور جج بھی رہ چکے ہیں۔ صدر جو بائیڈن نے انھیں شمالی مسیسیپی کے لیے وفاقی جج نامزد کیا تھا، تاہم سینیٹ میں ان کی نامزدگی سنڈی ہائیڈ سمتھ نے روک دی تھی۔

    اگرچہ ابتدا میں یہ انتخابی مقابلہ قومی توجہ حاصل نہیں کر سکا تھا، لیکن حالیہ ہفتوں میں سابق صدر بل کلنٹن، سابق نائب صدر کملا ہیرس اور سینیٹر رافیل وارناک نے کولوم کی انتخابی مہم میں حصہ لیا۔

    کولوم نے ایک موقع پر ہائیڈ سمتھ کے اس بیان کو بھی انتخابی موضوع بنایا جس میں انھوں نے گوشت کی بڑھتی قیمتوں پر عوامی شکایات کے جواب میں لوگوں کو ’کوئی اور پروٹین استعمال کرنے‘ کا مشورہ دیا تھا۔ کولوم نے اس پر مبنی اشتہار میں ووٹروں سے کہا کہ وہ ’ایک اور سینیٹر منتخب کریں‘، جسے خاصی توجہ ملی۔

    اگر سکاٹ کولوم کامیاب ہو جاتے ہیں تو وہ تقریباً 40 برس میں امریکی سینیٹ کے لیے منتخب ہونے والے پہلے ڈیموکریٹ ہوں گے اور تعمیرِ نو کے دور کے بعد مسیسیپی کے پہلے سیاہ فام سینیٹر بھی بن جائیں گے۔

    ساتویں نسل کے مسیسیپی باشندے سکاٹ کولوم دو بچوں کے والد ہیں۔

15. 5 نومبر 2026عوامی ریلیف اور ٹرمپ انتظامیہ کا احتساب، ڈیموکریٹس کا نیا ایجنڈا, سارہ سمتھ، واشنگٹن ڈی سی میں بی بی سی کی شمالی امریکہ کی ایڈیٹر

    

    ،تصویر کا ذریعہEPA

    امریکہ کے وسط مدتی انتخابات میں نمایاں کامیابی حاصل کرنے کے بعد ڈیموکریٹک پارٹی کو اب اپنے انتخابی وعدوں پر عملدرآمد کا چیلنج درپیش ہے، خصوصاً مہنگائی میں کمی اور حکومت کو جوابدہ بنانے کے حوالے سے۔

    واشنگٹن ڈی سی میں بی بی سی کی شمالی امریکہ کی ایڈیٹر

    ایوانِ نمائندگان میں ڈیموکریٹ رہنما حکیم جیفریز نے کہا ہے کہ ان کی جماعت عوامی مسائل، خاص طور پر اشیائے ضروریہ کی قیمتوں اور حکومتی احتساب پر توجہ دے گی۔ ان کا کہنا تھا کہ ایوانِ نمائندگان کا کام ٹرمپ انتظامیہ کی توسیع بننا نہیں بلکہ امریکی عوام کی نمائندگی کرنا ہے۔

    دوسری جانب سینیٹ میں ڈیموکریٹ رہنما چک شومر نے ایران کے ساتھ جنگ کے خاتمے کو ترجیح قرار دیتے ہوئے کہا کہ اگر ضرورت پڑی تو محکمہ دفاع کی فنڈنگ محدود کرنے پر بھی غور کیا جا سکتا ہے۔

    تاہم سیاسی مبصرین کے مطابق ڈیموکریٹس کے اندر موجود نظریاتی اختلافات، خصوصاً اسرائیل سے متعلق پالیسی پر اختلافِ رائے، پارٹی کے لیے اپنے وعدوں کو عملی شکل دینا مشکل بنا سکتے ہیں۔

16. 5 نومبر 2026ڈیموکریٹس کی کامیابی کینیڈا کے لیے خوش آئند، ٹیرف میں نرمی کی امید پیدا, نادین یوسف، سینیئر رپورٹر

    

    ،تصویر کا ذریعہGetty Images

    امریکہ کے وسط مدتی انتخابات کے نتائج کینیڈا میں بہت سے لوگوں کی خواہش کے مطابق سامنے آئے ہیں۔ ڈیموکریٹک پارٹی کی نمایاں کامیابی کو امریکی ووٹروں کی جانب سے صدر ڈونلڈ ٹرمپ کی قریبی تجارتی شراکت داروں، خصوصاً کینیڈا، پر عائد محصولات کی پالیسی کے خلاف ایک ردعمل کے طور پر بھی دیکھا جا رہا ہے۔

    کینیڈا کے صوبہ اونٹاریو کے وزیرِاعلیٰ ڈگ فورڈ نے بدھ کے روز خوشی کا اظہار کرتے ہوئے کہا کہ ’میں تو خوشی سے سڑک پر قلابازیاں لگا رہا تھا۔‘

    انھوں نے ان نتائج کو ’کینیڈا کی فتح‘ قرار دیا۔

    تاہم ماہرین کا کہنا ہے کہ انتخابی نتائج کے باوجود کینیڈا کو فوری طور پر امریکی محصولات سے چھٹکارا ملنے کا امکان نہیں۔ اس کے باوجود توقع کی جا رہی ہے کہ نئی سیاسی صورتحال کے باعث دونوں ممالک کے درمیان جاری تجارتی مذاکرات کے لیے زیادہ سازگار ماحول پیدا ہو سکتا ہے۔

    ڈیموکریٹ رہنما حکیم جیفریز اور چک شومر حالیہ مہینوں میں کینیڈا پر عائد ٹیرف کم کرنے یا ختم کرنے کی حمایت کرتے رہے ہیں۔ کانگریس میں ان کے بڑھتے ہوئے اثر و رسوخ سے اوٹاوا کو مذاکرات میں بہتر پوزیشن مل سکتی ہے۔

    تاہم ایک اہم حقیقت یہ بھی ہے کہ ٹرمپ کے بیشتر محصولات کانگریس کی منظوری کے بغیر صدارتی اختیارات یعنی ایگزیکٹو آرڈرز کے ذریعے نافذ کیے گئے تھے۔ اس لیے کانگریس پر ڈیموکریٹس کے کنٹرول کے باوجود ٹیرف پالیسی میں فوری اور بڑی تبدیلی کی توقع نہیں کی جا رہی۔

17. 5 نومبر 2026امریکہ میں ڈیٹا سینٹرز کے خلاف ووٹروں کا ردعمل، اے آئی صنعت کو بڑا سیاسی دھچکہ

    

    ،تصویر کا ذریعہEPA

    امریکہ کے 2026 کے وسط مدتی انتخابات میں مصنوعی ذہانت (اے آئی) سے وابستہ ڈیٹا سینٹرز ایک اہم سیاسی مسئلہ بن کر سامنے آئے ہیں۔ مختلف ریاستوں میں ووٹروں نے تقریباً ہر اس تجویز کو مسترد یا محدود کرنے کے حق میں ووٹ دیا جس کا تعلق ڈیٹا سینٹرز کی تعمیر اور توسیع سے تھا، جسے اے آئی صنعت کے لیے ایک بڑا دھچکا قرار دیا جا رہا ہے۔

    منگل کو 10 ریاستوں میں ڈیٹا سینٹرز سے متعلق 41 مقامی بیلٹ اقدامات پر ووٹنگ ہوئی۔ نتائج کے مطابق صرف نارتھ ڈکوٹا کے شہر ہارووڈ میں ایک استثنا سامنے آیا، جبکہ باقی تقریباً تمام مقامات پر ووٹروں نے ڈیٹا سینٹرز پر پابندیوں یا سخت نگرانی کی حمایت کی۔

    اوہائیو میں مسئلہ مرکزی انتخابی موضوع بن گیا

    ریاست اوہائیو میں اکیلے 21 تجاویز ووٹ کے لیے پیش کی گئی تھیں۔ یہاں ڈیٹا سینٹرز کا معاملہ سینیٹ کے انتخاب میں بھی اہم موضوع رہا۔ ڈیموکریٹ امیدواروں نے ریپبلکن قیادت پر الزام لگایا کہ وہ مقامی آبادی کے مفادات پر ٹیکنالوجی کمپنیوں کو ترجیح دے رہی ہے۔

    اوہائیو وہی ریاست ہے جہاں اوپن اے آئی نے رواں سال دنیا کے سب سے بڑے مجوزہ اے آئی ڈیٹا سینٹر منصوبوں میں سے ایک میں آٹھ گیگاواٹ کمپیوٹنگ صلاحیت حاصل کرنے کا اعلان کیا تھا۔ اس منصوبے میں سافٹ بینک، ایس بی انرجی اور امریکی محکمہ توانائی شریک ہیں جبکہ این ویڈیا بھی اس کی معاون کمپنیوں میں شامل ہے۔ منصوبے کی مجموعی لاگت 500 ارب ڈالر سے تجاوز کر سکتی ہے۔

    تاہم اب اس منصوبے کو نئی سیاسی مزاحمت کا سامنا ہو سکتا ہے۔ اوہائیو میں ڈیموکریٹ امیدوار ایمی ایکٹن نے گورنر کا انتخاب جیت لیا ہے اور وہ ڈیٹا سینٹرز کی تعمیر پر ’مشروط پابندی‘ کی حامی ہیں، جب تک یہ منصوبے اپنی مکمل توانائی لاگت خود برداشت نہ کریں اور یونین مزدوروں کو روزگار نہ دیں۔

    ٹیکساس میں بڑا انتخابی دھچکہ

    انتخابات کی ایک اہم خبر ٹیکساس سے آئی جہاں ڈیموکریٹ امیدوار جینا ہینوخوسا نے ریپبلکن گورنر گریگ ایبٹ کو شکست دی۔ ہینوخوسا نے اپنی مہم کے دوران الزام لگایا تھا کہ ایبٹ نے مقامی آبادی کے مفادات کے بجائے ٹیکنالوجی کمپنیوں کے مفادات کو ترجیح دی اور ریاست میں ڈیٹا سینٹرز کی تیزی سے توسیع کی حوصلہ افزائی کی۔

    ٹیکساس کو 2030 تک دنیا کی سب سے بڑی ڈیٹا سینٹر مارکیٹ بننے کا امیدوار سمجھا جا رہا تھا۔

    سیلیکون ویلی کی بھاری سرمایہ کاری بھی مؤثر نہ رہی

    انتخابات میں سیلیکون ویلی اور ٹیکنالوجی صنعت سے وابستہ گروپوں نے ریکارڈ مالی سرمایہ کاری کی۔ کرپٹو کرنسی، مصنوعی ذہانت اور آن لائن جوئے سے وابستہ مفادات نے مجموعی طور پر 377 ملین ڈالر سے زیادہ خرچ کیے۔

    ارب پتی کاروباری شخصیت ایلون مسک، جو اس انتخابی دور کے سب سے بڑے انفرادی عطیہ دہندہ تھے، کم از کم 474 ملین ڈالر سیاسی مہمات پر خرچ کرنے کے باوجود ٹیکساس کی اہم انتخابی دوڑوں میں اپنے حمایت یافتہ امیدواروں کو کامیاب نہ کرا سکے۔

    نتائج کے بعد مسک نے طنزیہ انداز میں ایکس پر لکھا، ’اس وقت خلا میں ڈیٹا سینٹرز کا خیال کافی پرکشش لگ رہا ہے۔‘

    عوامی تشویش کتنی بڑی تھی؟

    امریکہ میں بی بی سی کے شراکت دار ادارے سی این بی سی کے ایک سروے کے مطابق 56 فیصد ووٹروں نے کہا کہ ڈیٹا سینٹرز کا معاملہ ان کے ووٹ کا اہم یا فیصلہ کن عنصر تھا۔ ڈیموکریٹ ووٹروں میں اس مسئلے کی حساسیت نسبتاً زیادہ دیکھی گئی۔

    مقامی برادریوں کی شکایات میں بجلی کے بڑھتے استعمال، پانی کے وسائل پر دباؤ، ماحولیاتی اثرات اور ٹیکنالوجی کمپنیوں کو دی جانے والی مراعات شامل تھیں۔

    ڈیموکریٹس کی نئی حکمت عملی: اے آئی کمپنیوں کا احتساب

    انتخابی نتائج سامنے آنے کے چند گھنٹوں کے اندر ڈیموکریٹ رہنماؤں نے اے آئی صنعت کے خلاف سخت مؤقف اختیار کرنا شروع کر دیا۔

    ٹیکساس سے ڈیموکریٹ رکن کانگریس گریگ کاسار نے مطالبہ کیا کہ اے آئی کمپنیوں کے سربراہوں کو کانگریس کے سامنے حلف کے تحت گواہی دینے کے لیے طلب کیا جائے۔

    ان کا کہنا تھا کہ ’ایوانِ نمائندگان میں ڈیموکریٹ اکثریت کو امریکی ملازمتوں، آزادیوں اور عوامی مفادات کے تحفظ کو اولین ترجیح بنانا چاہیے۔‘

    انھوں نے یہ بھی دعویٰ کیا کہ ووٹروں نے ارب پتی اے آئی سرمایہ کاروں اور کمپنیوں کے سیاسی اثر و رسوخ کو مسترد کر دیا ہے۔

18. 5 نومبر 2026ایلون مسک اور دیگر ارب پتیوں کا ردعمل: ڈیموکریٹک کامیابی کے کیا اثرات ہوں گے؟

    

    ،تصویر کا ذریعہReut

    امریکہ کے وسط مدتی انتخابات میں ڈیموکریٹک پارٹی کی نمایاں کامیابی کے بعد ملک کے بڑے کاروباری اور مالیاتی حلقوں میں ملا جلا ردعمل سامنے آیا ہے۔ ایک طرف بعض ارب پتی سرمایہ کاروں اور ٹیکنالوجی صنعت سے وابستہ شخصیات نے نتائج پر تشویش ظاہر کی، جبکہ دوسری جانب وال سٹریٹ نے ان نتائج کا بھرپور خیرمقدم کیا۔

    انتخابی نتائج کے بعد امریکی سٹاک مارکیٹ میں زبردست تیزی دیکھی گئی۔ ڈاؤ جونز انڈسٹریل ایوریج تقریباً 1,569 پوائنٹس یا تین فیصد بڑھ گیا، جبکہ ایس اینڈ پی 500 اور نیسڈیک انڈیکس میں بھی نمایاں اضافہ ہوا۔ سرمایہ کاروں نے سیاسی غیر یقینی صورتحال میں کمی اور انتخابی نتائج کی قبولیت کو مارکیٹ کے لیے مثبت قرار دیا۔

    انتخابی اخراجات پر تنقید

    ورجن گروپ کے بانی رچرڈ برینسن نے انتخابات پر اربوں ڈالر خرچ کیے جانے پر تنقید کرتے ہوئے انتخابی فنڈنگ کے نظام میں اصلاحات کا مطالبہ کیا۔ ان کا کہنا تھا کہ ٹیکنالوجی کے شعبے سے وابستہ کاروباری شخصیات اور ہیج فنڈ مینیجرز کی جانب سے انتخابی مہمات پر اتنی بڑی رقوم خرچ کرنا باعثِ تشویش ہے۔

    دوسری جانب ایلون مسک، جو اس انتخابی دور کے سب سے بڑے انفرادی عطیہ دہندگان میں شمار ہوتے ہیں، اپنے حمایت یافتہ ریپبلکن امیدواروں کی ٹیکساس سمیت کئی اہم ریاستوں میں شکست کے بعد مایوس نظر آئے۔ اطلاعات کے مطابق انھوں نے ملک بھر میں سیاسی سرگرمیوں پر تقریباً 474 ملین ڈالر خرچ کیے، جن میں سے 224 ملین ڈالر صرف ٹیکساس میں خرچ ہوئے۔

    ’سیاست سے پیسے کا کردار ختم ہونا چاہیے‘

    لنکڈ اِن کے شریک بانی ریڈ ہوفمین نے بھی سیاست میں بڑے پیمانے پر مالی اثر و رسوخ پر تنقید کرتے ہوئے کہا کہ سیاست کو دولت کے اثر سے آزاد ہونا چاہیے۔ انھوں نے ایلون مسک پر تنقید کرتے ہوئے الزام لگایا کہ انھوں نے مخصوص سیاسی قوتوں کو اقتدار میں رکھنے کے لیے غیر معمولی رقوم خرچ کیں۔

    ادھر معروف سرمایہ کار اور ڈیموکریٹک پارٹی کے بڑے حامی الیکس سوروس نے نتائج کو ’تاریخی کامیابی‘ قرار دیتے ہوئے کہا کہ یہ ایک نسل در نسل اثرات رکھنے والا سیاسی موڑ ثابت ہو سکتا ہے۔

    مصنوعی ذہانت کی صنعت کو خدشات

    انتخابی نتائج کے بعد سب سے زیادہ تشویش مصنوعی ذہانت (اے آئی) کے شعبے سے وابستہ سرمایہ کاروں اور کمپنیوں میں دیکھی گئی۔ پرشنگ سکوائر کے بانی بل ایکمین نے خبردار کیا کہ اگر امریکہ نے مصنوعی ذہانت کے شعبے میں ترقی کی رفتار کم کر دی تو اس کی تکنیکی برتری کو نقصان پہنچ سکتا ہے۔ ان کے بقول، ’حقیقت یہ ہے کہ ہم رفتار سست نہیں کر سکتے۔‘

    ارب پتی سرمایہ کار چماتھ پالیہاپیتیا نے خبردار کیا کہ اگر نئی حکومتوں یا ریاستی قیادتوں نے ڈیٹا سینٹرز کی تعمیر محدود کر دی تو مصنوعی ذہانت کے شعبے میں سرمایہ کاری اور ترقی متاثر ہو سکتی ہے۔

    یہ خدشات خاص طور پر ٹیکساس میں اس وقت بڑھ گئے جب نومنتخب ڈیموکریٹ گورنر جینا ہینوخوسا نے نئے ڈیٹا سینٹرز کی تعمیر پر عارضی پابندی کے حق میں موقف اختیار کیا، جب تک کہ ان کے لیے مزید سخت ضابطے اور حفاظتی اقدامات متعارف نہ کرائے جائیں۔

    سرمایہ کاری فرم آلٹی میٹر کیپیٹل کے سربراہ بریڈ گرسٹنر کا کہنا ہے کہ اس سیاسی تبدیلی کے نتیجے میں 2027 تک متوقع اے آئی ڈیٹا سینٹرز کی گنجائش میں نمایاں کمی آ سکتی ہے۔ بعض تجزیہ کاروں کے مطابق امریکہ میں منصوبہ بندی کے مراحل میں موجود تقریباً 10 فیصد ڈیٹا سینٹرز شاید اب تعمیر نہ ہو سکیں۔

    اے آئی کے فوائد عوام تک پہنچانے کی ضرورت

    اے ایم ڈی کی چیف ایگزیکٹو لیزا سو نے مصنوعی ذہانت اور ڈیٹا سینٹرز کے خلاف بڑھتی عوامی مزاحمت کا اعتراف کرتے ہوئے کہا کہ ٹیکنالوجی کمپنیوں کو مقامی آبادی کو یہ باور کرانے کی ضرورت ہے کہ ان منصوبوں سے صرف کمپنیاں ہی نہیں بلکہ عام لوگ بھی فائدہ اٹھائیں گے۔

    انھوں نے کہا کہ ’آخرکار ہمیں یہ یقینی بنانا ہوگا کہ مصنوعی ذہانت سے سب فائدہ اٹھائیں۔‘

    مارکیٹ کا مختلف نقطۂ نظر

    اگرچہ اے آئی صنعت کے حامیوں کو خدشات لاحق ہیں، لیکن وال سٹریٹ کے کچھ سرمایہ کار اس صورتحال کو ایک موقع کے طور پر بھی دیکھ رہے ہیں۔ ان کے مطابق اگر نئے ڈیٹا سینٹرز کی تعمیر کی رفتار کم ہوتی ہے تو موجودہ مراکز کی قدر میں اضافہ ہو سکتا ہے اور بڑی ٹیکنالوجی کمپنیوں پر اربوں ڈالر کے اضافی اخراجات کا دباؤ بھی کم ہوگا۔

    اسی تناظر میں انتخابی نتائج کے بعد بڑی ٹیکنالوجی کمپنیوں کے حصص میں نمایاں اضافہ دیکھنے میں آیا اور ان کی مجموعی مارکیٹ ویلیو میں ایک موقع پر 750 ارب ڈالر سے زیادہ کا اضافہ ریکارڈ کیا گیا۔

19. 5 نومبر 2026ریپبلکن پارٹی میں انتخابی شکست کے بعد الزام تراشی اور خود احتسابی کا آغاز, ول گرانٹ، شمالی امریکہ کے نامہ نگار

    

    ،تصویر کا ذریعہGetty Images

    گذشتہ تین دہائیوں میں اپنی بدترین انتخابی ناکامیوں میں سے ایک کے بعد ریپبلکن پارٹی کے اندر خود احتسابی اور الزام تراشی کا سلسلہ شروع ہو گیا ہے۔ ملک بھر کے ووٹروں نے اپنے فیصلے کے ذریعے واضح پیغام دیا کہ صدر ڈونلڈ ٹرمپ کا ایران کے خلاف جنگ کا فیصلہ انتخابات میں ایک اہم مسئلہ بن گیا تھا۔

    اب ٹرمپ کے بعض قریبی اتحادی بھی اس پالیسی سے فاصلہ اختیار کرتے دکھائی دے رہے ہیں، جن میں سب سے نمایاں نائب صدر جے ڈی وینس ہیں۔ جے ڈی وینس نے سوشل میڈیا پر لکھا، ’ہماری شکست کی وجہ جنگ تھی، اور آئندہ کے راستے پر کوئی بھی دیانت دارانہ گفتگو اسی حقیقت سے شروع ہونی چاہیے۔‘

    یہ مؤقف وہی ہے جسے ٹرمپ نے بھی وائٹ ہاؤس میں ایک نئے بال روم کی تعمیر کے مقام پر صحافیوں سے گفتگو کے دوران کسی حد تک تسلیم کیا، تاہم انہوں نے اصرار کیا کہ وہ اپنے فیصلے میں کوئی تبدیلی نہ کرتے۔

    ٹرمپ نے کہا، ’آپ ایران کو جوہری ہتھیار حاصل کرنے کی اجازت نہیں دے سکتے۔‘

    سیاسی مبصرین جے ڈی وینس کے حالیہ بیانات کو 2028 کے صدارتی انتخاب کے لیے ان کی ممکنہ انتخابی مہم کے غیر اعلانیہ آغاز کے طور پر بھی دیکھ رہے ہیں۔

    انتخابی نتائج کو بعض حلقے اس بات کی علامت قرار دے رہے ہیں کہ امریکہ میں ’میک امریکہ گریٹ اگین‘ (میگا) تحریک، جس کی قیادت ٹرمپ کرتے رہے ہیں، اپنے زوال کے ابتدائی مرحلے میں داخل ہو رہی ہے۔

20. 5 نومبر 2026’عوام مہنگائی اور غربت سے پریشان تھے، قیادت نے توجہ نہ دی‘: ٹیکساس سے ریپبلکن سینیٹر

    

    ،تصویر کا ذریعہGetty Images

    امریکی ریاست ٹیکساس سے تعلق رکھنے والے ریپبلکن سینیٹر ٹیڈ کروز نے کہا ہے کہ وسط مدتی انتخابات کے نتائج صرف ’بلیو ویو‘ (ڈیموکریٹس کی کامیابی کی لہر) نہیں بلکہ ’بلیو سونامی‘ ہیں۔

    سوشل میڈیا پر اپنے بیان میں انھوں نے کہا کہ اس انتخاب کے اثرات سب سے زیادہ ٹیکساس میں محسوس کیے جائیں گے، جہاں کئی دہائیوں بعد پہلی مرتبہ 37 سالہ جیمز ٹالاریکو سینیٹ کے لیے ڈیموکریٹ امیدوار کی حیثیت سے کامیاب ہوئے ہیں۔

    اسی طرح ڈیموکریٹ سیاستدان جینا ہینوخوسا نے ملک کے طویل عرصے سے خدمات انجام دینے والے ریپبلکن گورنروں میں شمار ہونے والے گریگ ایبٹ کو شکست دی۔

    ٹیڈ کروز نے مہنگائی، بڑھتی ہوئی زندگی کے اخراجات اور غربت کا حوالہ دیتے ہوئے کہا، ’حقیقی امریکیوں کو حقیقی مشکلات کا سامنا تھا، لیکن بہت سے ریپبلکن سیاستدان یا تو اسے سمجھ نہیں سکے یا پھر انھیں اس کی پروا نہیں تھی۔‘

    انھوں نے مزید کہا کہ ’ٹیکساس اب بلیو (ڈیموکریٹ) ہے۔ یہ ایک ایسا جملہ ہے جسے زبان پر لانا بھی مشکل ہے۔‘

    کروز کے مطابق ریپبلکن جماعت کو دیہی علاقوں کے ووٹروں، ہسپانوی نژاد امریکیوں اور نوجوانوں میں اپنی کھوئی ہوئی حمایت دوبارہ حاصل کرتے ہوئے خود کو ایک ’حقیقی محنت کش طبقے کی جماعت‘ کے طور پر ازسرِ نو تعمیر کرنا ہوگا۔