ایرانی پارلیمنٹ کے سپیکر محمد باقر قالیباف نے یہ بیان امریکی نائب صدر کے حالیہ بیان کے بعد ردِعمل میں دیا ہے جس میں جے ڈی وینس نے کہا تھا کہ ایران کے ساتھ جنگ امریکی وسط مدتی انتخابات میں ریپبلکنز کی شکست کے اہم عوامل میں سے ایک تھی۔
،تصویر کا ذریعہGetty Images
بی بی سی کے امریکی شراکت دار سی بی ایس نیوز کے مطابق ڈیموکریٹ امیدوار جوسلین بینسن کے مشی گن کے گورنر کا انتخاب جیتنے کی پیش گوئی کی گئی ہے، جس کے ساتھ یہ عہدہ ڈیموکریٹک پارٹی کے پاس برقرار رہے گا۔
تاہم ریاست کی سینیٹ نشست کے لیے مقابلے کا نتیجہ ابھی سامنے نہیں آیا۔ ڈیموکریٹ عبدل السید اپنے ریپبلکن حریف مائیک راجرز سے آگے ہیں، جبکہ اب تک 78 فیصد ووٹوں کی گنتی مکمل ہو چکی ہے۔
امریکہ کے وسط مدتی انتخابات میں ڈیموکریٹس کے لیے حوصلہ افزا نتائج سامنے آئے ہیں اور پیش گوئی کی جا رہی ہے کہ وہ سینیٹ اور ایوانِ نمائندگان دونوں میں اکثریت حاصل کر کے کانگریس کا کنٹرول واپس لے لیں گے۔
،تصویر کا ذریعہgettyimages
امریکہ کے وسط مدتی انتخابات کے نتائج تیزی سے سامنے آ رہے ہیں۔ صدر کی مدتِ صدارت کے وسط میں ہونے والے یہ انتخابات اس بات کا اہم پیمانہ سمجھے جاتے ہیں کہ امریکی عوام ڈونلڈ ٹرمپ کی کارکردگی کے بارے میں کیا رائے رکھتے ہیں۔
اگر آپ ابھی ہمارے ساتھ جڑے ہیں تو اب تک کی اہم خبریں یہ ہیں:
،تصویر کا ذریعہGetty Images
انتہائی پُرامید ڈیموکریٹس نے بھی شاید ایسی ڈرامائی کامیابی کی توقع نہیں کی تھی۔ انھوں نے کانگریس کے دونوں ایوانوں میں اکثریت کی جانب پیش رفت ایسے علاقوں میں نمایاں کامیابیاں حاصل کر کے کی ہے جنھیں طویل عرصے سے ریپبلکنز کے قابلِ اعتماد سیاسی گڑھ سمجھا جاتا تھا۔
سینیٹ کا کنٹرول کس کے پاس جائے گا، یہ جاننے میں کئی دن لگ سکتے ہیں۔ تاہم ڈیموکریٹس کی کامیابی کا حجم اس قدر بڑا رہا کہ امریکہ میں نصف شب سے پہلے ہی ان کی فتح کی پیش گوئی کی جانے لگی۔
ڈیموکریٹس کے لیے آئیوا یا اوہائیو میں کامیابی ہی غیر معمولی سمجھی جاتی۔ شاید ٹیکساس یا کینساس میں فتح بھی۔ لیکن ان چاروں ریاستوں میں کامیابی حیران کن ہے۔
یہ سب کیوں ہوا، اس میں کوئی راز نہیں۔ امریکہ بھر کے ووٹر مہنگی زندگی کے اخراجات پر ناراض ہیں اور اس کا ذمہ دار ڈونلڈ ٹرمپ کو ٹھہراتے ہیں۔ ان کا خیال ہے کہ ایران کے خلاف جنگ شروع کرنے کا فیصلہ اور تجارتی محصولات کی پالیسیوں نے قیمتوں میں اضافے کو ہوا دی۔
ٹرمپ نے سوشل میڈیا پر لکھا: ’میرا نام بیلٹ پیپر پر نہیں تھا، اور اگر ہوتا تو ہم بھاری اکثریت سے جیت جاتے۔‘
انھوں نے کئی ہفتوں تک اپنے حامیوں سے کہا کہ وہ ایسے ووٹ دیں جیسے وہ خود انتخاب لڑ رہے ہوں۔ ایسے وقت میں جب ان کی مقبولیت ریکارڈ کم سطح پر تھی، خود کو ریپبلکن انتخابی مہم کا مرکز بنانا ہمیشہ ایک خطرناک حکمتِ عملی تھی، اور اب ایسا لگتا ہے کہ یہ الٹا اثر دکھا گئی ہے۔
اب ٹرمپ کا کہنا ہے کہ وہ ’مسٹر ویٹو‘ بن جائیں گے۔ وہ اپنے صدارتی ویٹو کے اختیار کو استعمال کرتے ہوئے ڈیموکریٹس کے زیرِ کنٹرول کانگریس سے منظور ہونے والے کسی بھی بل کو قانون بننے سے روک سکتے ہیں۔ تاہم ڈیموکریٹس بھی اب ان کی مطلوبہ قانون سازی کی راہ میں رکاوٹ ڈال سکتے ہیں۔
اس کے علاوہ وہ کانگریس کے ذریعے ٹرمپ کے بعض متنازع فیصلوں اور ان طریقوں کی تحقیقات بھی شروع کر سکتے ہیں جن کے ذریعے وائٹ ہاؤس میں واپسی کے بعد وہ اور ان کا خاندان مالی فائدہ حاصل کرتے رہے ہیں۔
،تصویر کا ذریعہgettyimages
امریکہ میں 2026 کے وسط مدتی انتخابات کے لیے ووٹنگ کا عمل مکمل ہو گیا ہے۔ چند لمحے قبل ہوائی میں بھی پولنگ ختم ہو گئی، جو ملک بھر میں بند ہونے والا آخری پولنگ مرکز تھا۔
ابتدائی اندازوں کے مطابق ڈیموکریٹس کے سینیٹ اور ایوانِ نمائندگان دونوں میں اکثریت حاصل کرنے کی پیش گوئی کی جا رہی ہے، تاہم ووٹوں کی گنتی جاری ہے اور مزید نتائج کا انتظار ہے۔
صدر ڈونلڈ ٹرمپ نے فاکس نیوز سے گفتگو میں اعتراف کیا ہے کہ ایران کے ساتھ جنگ اور ایندھن کی بڑھتی قیمتوں نے وسط مدتی انتخابات میں ریپبلکن پارٹی کو نقصان پہنچایا۔
ایران پر ممکنہ امریکی حملوں سے متعلق خبروں پر بات کرتے ہوئے ٹرمپ نے کہا: ’ہمیں کچھ بڑا کرنا ہو گا‘ اور مزید کہا کہ اس میں ’شدید حملہ‘ بھی شامل ہو سکتا ہے۔ انھوں نے ایک بار پھر کہا کہ ’ایران کبھی جوہری ہتھیار حاصل نہیں کرے گا۔‘
ٹرمپ نے یہ بھی تسلیم کیا کہ پٹرول کی قیمتوں میں اضافے نے ووٹروں کو ناراض کیا اور اس کا اثر ریپبلکن امیدواروں پر پڑا۔
تاہم انھوں نے اس تاثر کو مسترد کیا کہ انتخابی نتائج ان کی صدارت کے خلاف فیصلہ ہیں، حالانکہ پیش گوئی کی جا رہی ہے کہ ان کی جماعت کانگریس کے دونوں ایوانوں میں اکثریت کھو سکتی ہے۔ ٹرمپ نے کہا کہ ڈیموکریٹس طویل عرصے سے ایسی کامیابی کے منتظر تھے اور بالآخر اسے حاصل کرنے میں کامیاب ہو گئے اور انھوں نے انھیں ’اچھا کام‘ کرنے پر مبارکباد بھی دی۔
بی بی سی کے امریکی شراکت دار سی بی ایس نیوز کے مطابق مین کی سینیٹ نشست ڈیموکریٹ امیدوار ٹرائے جیکسن کے حصے میں جانے کی پیش گوئی کی گئی ہے۔
یہ نشست ریپبلکن سینیٹر سوزن کولنز کے پاس تھی، جو تقریباً 30 برس سے اس عہدے پر فائز تھیں اور امریکی سینیٹ کی تاریخ میں سب سے طویل عرصہ خدمات انجام دینے والی ریپبلکن خاتون سینیٹر ہیں۔
دنیا کی نظریں اس وقت امریکہ کے وسط مدتی انتخابات پر ہیں جس کے نتائج صدر ڈونلڈ ٹرمپ کی باقی مدت صدارت کو متاثر کر سکتے ہیں۔ لیکن جہاں کچھ ریاستوں میں انتخابات کے نتائج چند گھنٹوں میں آ جاتے ہیں وہیں کچھ میں بعض اوقات کئی دن بھی لگتے ہیں۔ اس کی وجہ کیا ہے؟
اب پیش گوئی کی جا رہی ہے کہ ڈیموکریٹس کو سینیٹ اور ایوانِ نمائندگان دونوں میں اکثریت حاصل ہو سکتی ہے۔
اس کا مطلب یہ ہے کہ جنوری سے وہ دوبارہ کانگریس کا کنٹرول سنبھال سکتے ہیں، جو ملک میں قوانین بنانے کا ذمہ دار ادارہ ہے۔
فی الحال کانگریس کے دونوں ایوانوں میں صدر ڈونلڈ ٹرمپ کی ریپبلکن پارٹی کو اکثریت حاصل ہے۔
تاہم اگر ڈیموکریٹس کانگریس کا کنٹرول واپس لینے میں کامیاب ہو جاتے ہیں تو وہ قانون سازی نسبتاً آسانی سے کر سکیں گے، صدر کے سیاسی ایجنڈے کو چیلنج کر سکیں گے اور ان کی انتظامیہ کے ارکان کے خلاف تحقیقات بھی شروع کر سکتے ہیں۔
یہ امریکی سیاست میں ایک بڑی تبدیلی ہوگی اور ایسی کامیابی جس کی ڈیموکریٹس کو ٹرمپ کی صدارت کے آخری دو برسوں میں امید تھی۔
،تصویر کا ذریعہGetty Images
وسط مدتی انتخابات میں ریپبلکنز کی خراب کارکردگی کے بعد صدر ڈونلڈ ٹرمپ نے ڈیموکریٹس کو سراہتے ہوئے کہا ہے کہ ’انھوں نے اچھا کام کیا۔‘
فاکس نیوز سے گفتگو میں ٹرمپ نے کہا کہ انتخابی نتائج پر اثر انداز ہونے والا ماحول موجود تھا اور انھیں ان نتائج پر کسی حد تک حیرت ہوئی ہے۔
انھوں نے کہا: ’ہم نے شاندار جلسے کیے تھے، اس لیے مجھے تھوڑی حیرت ہوئی ہے۔‘
تاہم نسبتاً مفاہمتی لہجہ اختیار کرتے ہوئے ٹرمپ نے کہا کہ کانگریس میں ڈیموکریٹس کے ساتھ کام کرنے کے لیے ’بہت سے معاملات‘ موجود ہیں۔
ٹرمپ نے یہ بھی واضح کیا کہ وہ وسط مدتی انتخابات کے نتائج کے بعد اپنی کابینہ میں کسی تبدیلی کا ارادہ نہیں رکھتے۔
سی بی ایس کے اندازوں کے مطابق امریکی ایوانِ نمائندگان میں ڈیموکریٹس کم از کم 239 جبکہ ریپبلکنز کم از کم 161 نشستیں حاصل کرنے کی جانب بڑھ رہے ہیں۔
435 رکنی ایوانِ نمائندگان کی تمام نشستوں کے نتائج ابھی سامنے نہیں آئے، اور متعدد حلقوں میں ووٹوں کی گنتی جاری ہے، خاص طور پر کیلیفورنیا اور ٹیکساس میں جہاں نشستوں کی تعداد زیادہ ہے۔
اس کے علاوہ مین اور الاسکا جیسی ریاستوں میں بھی ووٹوں کی گنتی نسبتاً سست رفتار سے ہوتی ہے، جس کے باعث حتمی تصویر سامنے آنے میں مزید وقت لگ سکتا ہے۔
،تصویر کا ذریعہReuters
صدر ڈونلڈ ٹرمپ نے وسط مدتی انتخابات کے نتائج پر ایک بار پھر اپنے سوشل میڈیا پلیٹ فارم ٹروتھ سوشل پر ردعمل دیتے ہوئے بعض ریپبلکن رہنماؤں اور فاکس نیوز کو تنقید کا نشانہ بنایا ہے۔
ٹرمپ نے لکھا: ’میں اب ایک سیاسی مبصر بننے جا رہا ہوں اور امیدواروں کی جیت اور شکست کی وجوہات پر رائے دوں گا۔‘
انھوں نے ٹیکساس کے گورنر گریگ ایبٹ کو تنقید کا نشانہ بناتے ہوئے کہا کہ اگر وہ گزشتہ چھ ماہ میں ’رائنو‘ (صرف نام کے ریپبلکن) نہ بنے ہوتے تو انتخابات نہ ہارتے۔
ٹرمپ نے ایک سرخ ٹوپی کی تصویر بھی شیئر کی جس پر ’ویٹو` لکھا تھا، جو بظاہر اس اختیار کی جانب اشارہ تھا جس کے تحت وہ ڈیموکریٹس کے زیرِ کنٹرول ہونے والی آئندہ کانگریس کی منظور کردہ قانون سازی کو روک سکتے ہیں۔
انھوں نے فاکس نیوز پر بھی تنقید کرتے ہوئے کہا کہ چینل کو اپنی سیاسی نشریات میں ڈیموکریٹ شخصیات کو مسلسل جگہ دینے کی وجہ سے انتخابی نتائج کی ذمہ داری قبول کرنی چاہیے۔
اس سے قبل ٹرمپ نے کہا تھا: ’میرا نام بیلٹ پیپر پر نہیں تھا، اور اگر ہوتا تو ہم بھاری اکثریت سے جیت جاتے۔‘
ڈیموکریٹس کے لیے جشن کی رات ریپبلکن پارٹی کی ایک تاریخی انتخابی شکست میں بدلتی دکھائی دے رہی ہے، ایسی کامیابی جس کا تصور چند ماہ قبل خود ڈیموکریٹک پارٹی کے بہت سے رہنما بھی نہیں کر رہے تھے۔
اب پیش گوئی کی جا رہی ہے کہ ڈیموکریٹس ایوانِ نمائندگان اور سینیٹ دونوں کا کنٹرول حاصل کر لیں گے۔
یہ پیش رفت ٹیکساس، کینساس، اوہائیو اور جنوبی کیرولائنا میں کامیابیوں کے بعد سامنے آئی ہے، جو صرف دو سال قبل صدر ڈونلڈ ٹرمپ نے نسبتاً آسانی سے جیتی تھیں۔
،تصویر کا ذریعہReuters
انتخابی نتائج واضح ہونے کے ساتھ ریپبلکنز کو اپنی شکست کی سنگینی کا زیادہ شدت سے احساس ہونے لگا ہے۔ پارٹی رہنماؤں کو ابتدا ہی سے ایوانِ نمائندگان میں اکثریت کھونے کا خدشہ تھا، تاہم بہت سے افراد کو اب بھی امید تھی کہ سینیٹ میں مقابلہ ان کے حق میں جا سکتا ہے۔
لیکن اب جب انتخابی شکست کا حجم واضح ہو رہا ہے تو متعدد ریپبلکنز کانگریس کے دونوں ایوانوں کا کنٹرول کھونے کی ذمہ داری صدر ڈونلڈ ٹرمپ پر ڈال رہے ہیں۔
ٹیکساس سے تعلق رکھنے والے طویل عرصے سے ریپبلکن لابیسٹ بل ملر نے کہا: ’اس کی ذمہ داری انھی پر عائد ہوتی ہے۔ کسی اور پر نہیں۔ یہ صدر ٹرمپ کو مکمل طور پر مسترد کیے جانے کا نتیجہ ہے۔‘
ڈیموکریٹس نے کئی ایسی ریاستوں میں سینیٹ کی نشستیں جیتی ہیں جہاں وہ برسوں، اور بعض جگہوں پر دہائیوں سے کامیاب نہیں ہوئے تھے۔ ٹیکساس اور جنوبی کیرولائنا اس فہرست میں سرفہرست ہیں۔ اس کے علاوہ آئیوا اور اوہائیو جیسی ریاستوں میں بھی ڈیموکریٹس نے نمایاں پیش رفت کی ہے، جو ٹرمپ کے دور میں ریپبلکنز کی جانب جھک گئی تھیں۔
ریپبلکنز کا کہنا ہے کہ ٹرمپ کی کم مقبولیت، غیر مقبول پالیسیوں اور مہنگائی کے بارے میں ووٹروں کی تشویش کو بار بار کم اہمیت دینے کے رویے نے پارٹی کو نقصان پہنچایا۔
مِنیسوٹا سے تعلق رکھنے والے ریپبلکن حکمتِ عملی کے ماہر گریگ پیپن نے کہا: ’یہ ایک کے بعد ایک غلطی تھی۔ واضح طور پر مختلف ریاستوں میں لوگوں نے صدر کی پالیسیوں کو پسند نہیں کیا۔‘
سی بی ایس نیوز نے لوزیانا کی سینیٹ نشست کے بارے میں اپنی تازہ درجہ بندی تبدیل کرتے ہوئے کہا ہے کہ یہاں اب کانٹے کا مقابلہ جاری ہے۔
لوزیانا ماضی میں مسلسل ریپبلکنز کے حق میں ووٹ دیتی رہی ہے، اس لیے اس ریاست میں مقابلے کا غیر یقینی صورت اختیار کرنا ڈیموکریٹس کے لیے ایک اور حوصلہ افزا اشارہ سمجھا جا رہا ہے۔
بی بی سی کے امریکی شراکت دار سی بی ایس کے مطابق ڈیموکریٹس امریکی سینیٹ میں بھی اکثریت حاصل کرنے کی جانب بڑھ رہے ہیں اور یوں ریپبلکنز سے اس کا کنٹرول واپس لینے کے قریب ہیں۔
اس پیش گوئی کے مطابق ڈیموکریٹس اب کانگریس کے دونوں ایوانوں پر کنٹرول حاصل کرنے کی پوزیشن میں ہیں، کیونکہ اس سے قبل سی بی ایس ایوانِ نمائندگان میں بھی ڈیموکریٹس کی اکثریت کی پیش گوئی کر چکا ہے۔
بی بی سی کے امریکی شراکت دار سی بی ایس نیوز نے کینساس کی سینیٹ نشست کی درجہ بندی تبدیل کرتے ہوئے اسے اب ’ڈیموکریٹس کے حق میں جاتی ہوئی‘ قرار دیا ہے۔
،تصویر کا ذریعہgettyimages
ریپبلکنز کے مضبوط گڑھ سمجھے جانے والے بعض حلقوں میں ڈیموکریٹ امیدواروں کی کامیابی کے بعد صدر ڈونلڈ ٹرمپ نے انتخابی نتائج پر تازہ ردعمل دیا ہے۔
نیویارک ٹائمز کو دیے گئے ایک انٹرویو میں ٹرمپ نے کہا کہ وہ ان نتائج کو ’مکمل طور پر قبول کرنے کے لیے تیار ہیں‘ اور مخالف جماعت کے ساتھ کام کرنے پر آمادہ ہیں۔
انھوں نے کہا: ’ہم ان کے ساتھ کام کرنے کے منتظر ہوں گے۔‘
ٹرمپ نے مزید کہا: ’ممکنہ طور پر ہم کسی نہ کسی اتفاقِ رائے تک پہنچ جائیں گے۔‘
بی بی سی کے امریکی شراکت دار سی بی ایس نیوز کے مطابق اوہائیو کی سینیٹ نشست ڈیموکریٹ امیدوار شیرروڈ براؤن کے حصے میں جانے کی پیش گوئی کی گئی ہے۔
،تصویر کا ذریعہgettyimages
ٹیکساس کے ڈیموکریٹس کئی دہائیوں سے اس ریاست کو اپنے حق میں کرنے کی کوشش کر رہے تھے۔
ہر بار وہ کامیابی کے قریب پہنچتے، لیکن آخری مرحلہ عبور نہ کر پاتے۔
مسلسل ناکامیوں کے باعث ڈیموکریٹک پارٹی کس حد تک کمزور ہو گئی تھی، اس کا اندازہ لگانا بھی مشکل ہے۔ کئی برس تک پارٹی کے کارکنوں اور حامیوں میں کامیابی کی امید تقریباً ختم ہو چکی تھی۔
تاہم گذشتہ ہفتے جب میں ٹیکساس میں ڈیموکریٹس سے ملا تو انھیں محسوس ہو رہا تھا کہ اس بار صورتحال مختلف ہے اور جیمز تالاریکو کے پاس کامیابی کا حقیقی موقع موجود ہے۔
ان کا خیال تھا کہ تالاریکو کی سیاسی مقبولیت میں اضافہ ہو رہا ہے، جبکہ ریپبلکن امیدوار کین پیکسٹن ان کی نظر میں تنازعات میں گھرا اور کمزور امیدوار تھا۔ اس کے ساتھ ساتھ وہ یہ بھی سمجھتے تھے کہ ٹیکساس کے ووٹروں کے رویوں میں بنیادی تبدیلی آ چکی ہے اور یہی وہ انتخاب ہوگا جس میں وہ آگے بڑھنے میں کامیاب ہوں گے۔
اور بالآخر ایسا ہی ہوا۔
مٹیکساس کے بہت سے ڈیموکریٹس چند گھنٹے پہلے تک بھی کھل کر اس امکان کا اعتراف کرنے کو تیار تھے، لیکن حقیقت یہ ہے کہ یہ تبدیلی کافی عرصے سے شکل اختیار کر رہی تھی۔
